خوێندنه‌وه‌یه‌ك بۆ رۆمانی گۆرانی كریسمس
خوێندنه‌وه‌یه‌ك بۆ رۆمانی گۆرانی كریسمس ‌ 16/2/2017
گۆران عومه‌ر

چارلز دیكنز (1812-1870) یه‌كێكه‌ له‌ رۆماننووسه‌ به‌ناوبانگه‌كانی به‌ریتانیا. (هاڕۆلد بلوم)ی ڕه‌خنه‌گر له‌ باره‌ی ئه‌م ڕۆماننووسه‌وه‌ ده‌ڵێت «له‌ دوای شكسپیر، چارلز دیكنز یه‌كه‌م نووسه‌ره‌ كه‌ كاریگه‌ری له‌سه‌ر زۆرترین خوێنه‌ری جیهان هه‌بووه‌.» به‌مه‌ش ده‌كرێت بڵێین دیكنز شكسپیری رۆمانه‌. دیكنز خاوه‌نی ژماره‌یه‌كی به‌رچاو رۆمانی دیاره‌ له‌ ئه‌ده‌بیاتی ئینگلیزیدا كه‌ زۆرینه‌ی رۆمانه‌كانی رۆمانی قه‌به‌ و دووروو درێژن. هۆكاری ئه‌مه‌ش ئه‌وه‌ بووه‌ كه‌ له‌و سه‌رده‌مه‌دا دیكنز رۆمانه‌كانی به‌ زنجیره‌ له‌ گۆڤاره‌كاندا بڵاوكردووه‌ته‌وه‌ و گۆڤاره‌كانیش به‌ ژماره‌ی وشه‌ حسابیان له‌گه‌ڵ نووسه‌ره‌كانیاندا كردووه‌، ئه‌مه‌ش پاڵی به‌ نووسه‌ره‌كانه‌وه‌ ناوه‌ رۆمانه‌كانیان دووروودرێژبن تا داهاتی زیاتریان ده‌ست بكه‌وێت. 
رۆمانی گۆرانی كریسمس كه‌ یه‌كێكه‌ له‌ رۆمانه‌كانی دیكنز له‌م ڕووه‌وه‌ جیاوازه‌و ڕۆمانێكی كورته‌ كه‌ نزیكه‌ی (30000) وشه‌ ده‌بێت و زیاتر له‌ نۆڤڵێت ده‌چێت (هه‌رچه‌نده‌ له‌ هه‌ندێك شوێندا هه‌ر وه‌ك نۆڤڵێت ناده‌برێت.). نووسه‌ر وه‌ك زۆرێك له‌ رۆمانه‌كانی تری له‌م رۆمانه‌شیدا كاری له‌سه‌ر چینی ناوه‌ند و نه‌هامه‌تییه‌كانی ئه‌و چینه‌ كردووه‌ له‌گه‌ڵ ئه‌وه‌ی كاره‌كته‌ری سه‌ره‌كی رۆمانه‌كه‌ كه‌سێكی بازرگانه‌. دیكنز له‌ رێگه‌ی ئه‌م رۆمانه‌یه‌وه‌ ده‌یه‌وێت كار له‌ سه‌ر گۆڕینی كۆمه‌ڵگه‌ و مرۆڤه‌كان بكات به‌ره‌و دۆخێكی باشتر. 
     كاتی رووداوه‌كانی رۆمانه‌كه‌ ناوه‌ڕاستی (1800)ه‌كانه‌و شوێنی رووداوه‌كانیش شاری له‌نده‌نه‌. سكروج له‌ سه‌ره‌تای رۆمانه‌كه‌وه‌ به‌ خوێنه‌ر ده‌ڵێت «به‌وه‌ ده‌ست پێده‌كه‌ین، مارلی مردووه‌.» مارلی هاوڕێیه‌كی سكروجه‌و پێش حه‌ت ساڵ مردووه‌. سكروج دڵنیایی ده‌داته‌ خوێنه‌ر كه‌ مارلی مردووه‌، وه‌ك ئه‌وه‌ی بزانێت مارلی دێته‌وه‌ بۆ لای. ده‌ستپێكی رۆمانه‌كه‌ رۆژێك پێش كریسمسه‌. سكروج كه‌ كاره‌كته‌ری سه‌ره‌كی رۆمانه‌كه‌یه‌ كه‌سایه‌تییه‌كی خۆپه‌رست و پاره‌په‌رست و چاوبرسی هه‌یه‌. سكروج به‌ ته‌نها ئه‌ژی و هه‌میشه‌ ته‌نهایه‌. نامۆیه‌ به‌ كۆمه‌ڵگه‌و هه‌موو ئه‌وانه‌ی له‌ ده‌وری ئه‌ون. سكروج كه‌سی خۆشناوێت و كه‌سیش ئه‌وی خۆشناوێت. هه‌رله‌سه‌ره‌تای ڕۆمانه‌كه‌وه‌ نووسه‌ر چه‌ند دیمه‌نێك ده‌خاته‌ به‌رچاوی خوێنه‌ر بۆئه‌وه‌ی كه‌سایه‌تی خراپ و له‌ خۆبایی كاره‌كته‌ری سه‌ره‌كی زیاتر بۆ خوێنه‌ر ده‌ربكه‌وێت.

 سكروج به‌ جه‌سته‌ له‌ ناو كۆمه‌ڵگه‌دایه‌
    هه‌ر له‌ سه‌ره‌تاوه‌ خوێنه‌ر به‌ مامه‌ڵه‌ خراپه‌كانی سكروج له‌گه‌ڵ به‌رده‌سته‌كانی ئاشنا ده‌بێت و ده‌زانێت كه‌ سكروج چه‌نده‌ پاره‌ په‌رسته‌، له‌گه‌ڵ ئه‌وه‌ی كه‌ سه‌رمایه‌داره‌ و خاوه‌ن پاره‌یه‌ به‌ڵام مووچه‌ی ئه‌وانه‌ی كه‌ لای ئه‌و كارده‌كه‌ن به‌ جۆرێك كه‌مه‌ كه‌ به‌شی بژێوی ژیانیان ناكات، له‌گه‌ڵ ئه‌وه‌شدا كاری زۆریان پێده‌كات. دیمه‌نێكی تر هاتنی دوو پیاون بۆ لای سكروج به‌ مه‌به‌ستی وه‌رگرتنی بڕه‌ پاره‌یه‌ك وه‌ك خێر بۆ هه‌ژاران بۆ ئه‌وه‌ی بتوانن وه‌ك كه‌سانی تری ئاسایی كریسمسێكی خۆش و دوور له‌ خه‌م به‌سه‌ر به‌رن، به‌ڵام سكروج زۆر به‌ توندی ره‌تیان ده‌كاته‌وه‌ پێیان ده‌ڵێت كه‌ زیندانه‌كان و خانه‌ی هه‌ژاران ماون ده‌توانن بچنه‌ ئه‌وێ. له‌ قسه‌كانیه‌وه‌ ڕوونده‌بێته‌وه‌ كه‌ چه‌نده‌ له‌ خۆباییانه‌ سه‌یری كه‌سانی تر ده‌كات و ته‌نانه‌ت ئاماده‌ نییه‌ به‌ بڕێكی كه‌م پاره‌ش هاوكاری هه‌ژاره‌كان بێت. له‌و گفتوگۆیه‌ی كه‌ له‌ نێوانیاندا دروست ده‌بێت روون ده‌بێته‌وه‌ كه‌ سكروج مرۆڤێكی ته‌واو مادییه‌ و پاره‌ لای ئه‌و سه‌نته‌ره‌ و هه‌موو ژیانی بۆ كۆكردنه‌وه‌ی پاره‌ ته‌رخانكردووه‌. ئه‌و له‌ خۆباییه‌ و سه‌رقاڵی به‌ كاره‌كه‌یه‌وه‌،‌ وای كردووه‌ له‌ سكروج كه‌ هیچ په‌یوه‌ندیه‌ك یان به‌ریه‌ككه‌وتنێكی مرۆییانه‌ی راسته‌وخۆی له‌گه‌ڵ كه‌سانی ده‌ورووبه‌ری نه‌بێت و به‌ ته‌واوی له‌ جیهانی ده‌ره‌وه‌ی خۆی داببڕێت. ئه‌م دابڕانه‌شی به‌ جۆرێك سكروجی ته‌نها كردووه‌ته‌وه‌ كه‌ تووشی نامۆیی بووه‌. ڕاسته‌ سكروج به‌ جه‌سته‌ له‌ ناو كۆمه‌ڵگه‌دایه‌، له‌گه‌ڵ مرۆڤه‌كاندا ئه‌ژی به‌ڵام ئه‌وه‌ ته‌نها جه‌سته‌یه‌ و له‌ رووی ڕۆحیه‌وه‌ زۆر دووره‌ لێیان، دووره‌ له‌ كۆمه‌ڵگه‌، دووره‌ له‌ مرۆڤه‌كان، ته‌نانه‌ت دووره‌ له‌ ناخی خۆشی. ته‌نها شتێك كه‌ سكروج زۆر نزیكه‌ لێیه‌وه‌ و له‌گه‌ڵی ده‌ژی و بۆ ئه‌و ده‌ژی پاره‌و سامانه‌كه‌یه‌تی. ئه‌م گفتوگۆیه‌ی نێوان دوو پیاوه‌كه‌ و سكروج ئه‌و بۆچوونه‌مان زیاتر بۆ ده‌سه‌لمێنێت كه‌ پاش ئه‌وه‌ی داوای به‌خشینی لێده‌كه‌ن و ره‌تی ده‌كاته‌وه‌ دروست ده‌بێت.
«تۆ ده‌ته‌وێت به‌ نه‌ناسراوی بمێنیته‌وه‌.» 
سكروج وه‌ڵامده‌داته‌وه‌، «من ته‌نها ده‌مه‌وێت به‌ ته‌نها جێمبهێڵن. له‌به‌ر ئه‌وه‌ی ئێوه‌ داوام لێده‌كه‌ن كه‌ من چیم ده‌وێت، ئه‌وه‌ وه‌ڵامه‌كه‌ی منه‌. من كریسمس له‌ خۆم پیرۆزناكه‌م و ناشتوانم پاره‌ ببه‌خشم تا كریسمس له‌ كه‌سانی گه‌مژه‌ پیرۆز بكه‌م....» 
وه‌ك پێشتر باسكرا، ئه‌م جۆره‌ ژیانه‌یه‌ كه‌ دیكنز كاری له‌سه‌ر ده‌كات و ده‌یه‌وێت بیگۆڕێت. ده‌یه‌وێت كۆمه‌ڵگا نه‌بێته‌ كۆمه‌لگایه‌كی ته‌واو مادیی و دوور بێت له‌ هه‌موو به‌ها و ئه‌خلاقیاته‌ مرۆییه‌ جوانه‌كان. 
     له‌ دیمه‌نێكی تردا كاتێك سكروج ده‌گه‌ڕێته‌وه‌ بۆ ماڵه‌وه‌ تارمایی رۆحیانه‌تی مارلی هاورێی ده‌بینێت كه‌ پێش حه‌وت ساڵ له‌ هه‌مان ڕۆژدا مردووه‌. مارلی هاوڕێی پێیه‌كانی زنجیركراون. وه‌ك خۆی ده‌ڵێت ئه‌و زنجیره‌ی كه‌ پێیه‌كانی ئه‌وی پێ كۆتكراوه‌، له‌ سندوقی پاره‌كانی و ده‌فته‌ری ژمێریارییه‌كه‌ی پیكهاتووه‌ و وه‌ك سزایه‌ك بۆ كاره‌ نه‌شیاوه‌كانی دوونیای بۆی دانراوه‌. لێره‌وه‌ خوێنه‌ر له‌وه‌ تێده‌گات كه‌ نووسه‌ر باوه‌ڕی به‌وه‌ هه‌یه‌ كه‌ ژیان له‌ دوای مردنیش به‌رده‌وام ده‌بێت و مرۆڤه‌كان له‌وێ پاداشت یان سزای كاره‌كانی ئه‌م ژیانه‌یه‌یان وه‌رده‌گرنه‌وه‌. هاتنی مارلی هه‌ر بۆ ئه‌م مه‌به‌سته‌یه‌. بۆ ئه‌وه‌یه‌ تا سكروج گۆڕانێك له‌ خۆیدا دروست بكات و ژیانی دوای مردنی وه‌ك ئه‌و نه‌بێت. ڕۆحیانه‌تی مارلی سكروج له‌ هاتنی سێ ڕۆحیانه‌تی تر ئاگادار ده‌كاته‌وه‌. هاتنی ئه‌و سێ ڕۆحیانه‌ته‌ بۆ پیشاندانی سێ قۆناغی جیاوازی ژیانی سكروجه‌ له‌ ڕێگه‌ی پیشاندانی چه‌ند دیمه‌نێكی جیاوازه‌وه‌.


 خوێنه‌ر له‌گه‌ڵیان گه‌شت ده‌كات
      له‌ به‌شی دووه‌مدا، رۆحیانه‌تی یه‌كه‌م سه‌ردانی سكروج ده‌كات. كه‌ ناوی رۆحیانه‌تی (كریسمسی ڕابرددوو)ه‌. كریسمسی ڕابردوو سكروج له‌گه‌ل خۆی ده‌بات و گه‌شتێك ده‌كه‌ن بۆ ڕابردوو، بۆ ژیانی رابردووی سكروج. خوێنه‌ریش له‌گه‌ڵیان گه‌شت ده‌كات و له‌ ڕێی ئه‌و گه‌ڕانه‌وه‌یه‌وه‌ بۆ ڕابردوو، زیاتر له‌ ژیانی ڕابردووی كاره‌كته‌ری سه‌ره‌كی ڕۆمانه‌‌كه‌ شاره‌زا ده‌بێت و ده‌زانێت كه‌ ڕۆژانێك سكروج منداڵێكی هه‌تیو و ته‌نها بووه‌. ئه‌و ژیانێكی زۆر دژوار و سه‌ختی له‌ ڕابردوودا به‌ ڕێكردووه‌. یه‌كێك له‌و دیمه‌نانه‌ی كه‌ له‌م گه‌ڕانه‌وه‌یه‌دا ده‌خرێته‌ به‌رچاوی خوێنه‌ر، ئه‌و كاته‌یه‌ كه‌ سكروج له‌ پۆله‌كه‌یدا له‌ قوتابخانه‌ به‌ ته‌نها ماوه‌ته‌وه‌ پاش ئه‌وه‌ی هه‌موو قووتابیه‌كان گه‌ڕاونه‌ته‌‌وه‌ بۆ ماڵه‌وه‌ بۆ خۆ ئاماده‌كردن بۆ ئاهه‌نگی كریسمس. سكروج لێره‌دا زۆر هه‌ست به‌ بێكه‌سی و ته‌نهایی ده‌كات. ته‌نهایی به‌ جۆرێك زۆر دێنێت بۆی، ناچار ده‌بێت بۆ دۆزینه‌وه‌ی هاوڕێیه‌ك و زاڵ بوون به‌سه‌ر ئه‌و ته‌نهاییه‌دا، په‌نا ده‌باته‌ به‌ر چیرۆكه‌كان و پاڵه‌وانی ئه‌و چیرۆكانه‌ ته‌نها هاوڕێی جیهانه‌ چۆڵه‌كه‌ی ئه‌ون. لێره‌وه‌ خوێنه‌ر ده‌زانێت كه‌ سكروج ئه‌و ڕابردووه‌ تاڵه‌ی خۆی له‌ بیر كردووه‌ و ئه‌و كه‌سانه‌ی كه‌ ئێستا ئه‌و به‌ چاوێكی كه‌م سه‌یریان ده‌كات، ڕۆژانێك خۆی وابووه‌. ئه‌و له‌ بیركردنه‌ی ڕابردوو وای كردووه‌ له‌ سكرووج كه‌ ببێته‌ كه‌ سێكی خۆپه‌رست و له‌ خۆبایی. ته‌نها شتێك كه‌ هاوبه‌ش بێت له‌ نێوان ئێستا و ڕابردوویدا بریتییه‌ له‌ ته‌نهاییه‌كه‌ی.

 ئه‌یه‌وێت به‌ خوێنه‌ر بڵێت نابێت پاره‌ ئامانج بێت له‌ ژیانی مرۆڤدا
     له‌ به‌شی سێیه‌مدا رۆحیانه‌تی دووه‌م دێت كه‌ ناوی ڕۆحیانه‌تی (كریسمسی ئێستا)یه‌. كریسمسی ئێستا تیشك ده‌خاته‌ سه‌ر ژیانی ئێستای سكروج. كریسمسی ئێستا سكروج له‌گه‌ڵ خۆی ده‌بات بۆ ناو شه‌قامه‌كانی شار و چه‌ند دێمه‌نێكی خه‌ڵكه‌ ‌هه‌ژاره‌كه‌ی پیشان ده‌دات كه‌ خه‌ریكی ئاماده‌كارین بۆ ئاهه‌نگی كریسمس و ده‌بینرێت كه‌ خه‌ڵك له‌گه‌ڵ ئه‌وه‌ی هه‌ژارن به‌ڵام چێژ بینینیان له‌ ژیان له‌ بیر نه‌كردووه‌. یه‌كێك له‌و دیمه‌نانه‌ی كه‌ پیشانی سكروج ده‌درێت، ماڵی (بۆب گراچیت)ی شاگردی خۆیه‌تی. سكروج مامه‌ڵه‌یه‌كی زۆر ره‌قی له‌گه‌ڵ ده‌كات و موچه‌یه‌كی زۆر كه‌می پێده‌دات. دیمه‌نه‌كه‌ بۆ سكروج زۆر جێی سه‌رسوڕمانه‌، خێزانه‌كه‌ی گراچیت له‌گه‌ل ئه‌وه‌ی هه‌ژارن و منداڵێكی نه‌خۆشیشیان هه‌یه‌، به‌ڵام هه‌موویان په‌یوه‌ندییه‌كی پڕ له‌ خۆشه‌ویستی به‌تین له‌ نێوانیاندا هه‌یه‌ و چێژ له‌ ساته‌كانی پێكه‌وه‌ بوون و ژیانیان ده‌بینن. نووسه‌ر له‌م دیمه‌نه‌وه‌ ئه‌یه‌وێت به‌ خوێنه‌ر بڵێت نابێت پاره‌ ئامانج بێت له‌ ژیانی مرۆڤدا، به‌ڵكو ئه‌وه‌ی ئامانجی مرۆڤ بووه‌ به‌ درێژایی مێژووی مرۆڤایه‌تی به‌ده‌ستهێنانی خۆشبه‌ختی بووه‌. پاره‌ ته‌نها رێگای گه‌شتن به‌ دڵخۆشی نییه‌، چونكه‌ ئه‌گه‌ر وابوایه‌ ئه‌وا خێزانه‌كه‌ی گراچیت هه‌رگیز نه‌یانده‌توانی به‌و جۆره‌ دلخۆش بن و چیژ له‌ ساته‌كانی پێكه‌وه‌بوونیان ببینن. چه‌ند دیمه‌نێكی تر پیشانی سكروج ده‌درێت كه‌ هه‌موویان دیمه‌نی خه‌ڵكه‌ ئاسایی و هه‌ژاره‌كه‌یه‌ كه‌ خۆیان بۆ كریسمس ئاماده‌ ده‌كه‌ن و چێژ له‌ ژیانیان ده‌بینن. پیشاندانی ئه‌م دیمه‌نانه‌ش به‌ ‌سكروج بۆ ئه‌وه‌یه‌ به‌ چاوی خۆی جیاوازی ژیانی خۆی و ئه‌وان ببینێت، تا پێی بڵێت كه‌ ژیان ئه‌وه‌ نییه‌ كه‌ تۆ به‌سه‌ری ده‌به‌ی، ژیان ئه‌و ته‌نهاییه‌ نییه‌. به‌ڵكو ژیان پێكه‌وه‌ بوونه‌، ژیان هاوكاری كردنی كه‌سانی تره‌، ژیان چێژ بینینه‌ له‌ ساته‌كانی پێكه‌وه‌ بوون.

دیمه‌نی مردنی كه‌سێكی پیشان ده‌درێت
     له‌ به‌شی چواره‌می ڕۆمانه‌كه‌دا ڕۆحیانه‌تی سێیه‌م دێت كه‌ ناوی ڕۆحیانه‌تی (كریسمسی داهاتوو)ه‌. رۆحیانه‌تی سێیه‌م سكروج له‌گه‌ڵ خۆی ده‌بات به‌ره‌و داهاتوو، گه‌شتی ئه‌م جاره‌یان بۆ داهاتووه‌ تا پیشانی بدات سه‌ره‌نجامی چۆن ده‌بێت ئه‌گه‌ر گۆڕانكاری نه‌كات و له‌سه‌ر كاره‌كانی به‌رده‌وام بێت. دیسان چه‌ند دیمه‌نێكی تر پیشانی ده‌درێت كه‌ زۆرینه‌یان دیمه‌نی مردنن. مردن لێره‌دا نیشاندانی كۆتاییه‌، به‌ سكروج ده‌ڵیت كه‌ كۆتاییه‌ك هه‌یه‌ بۆ ئه‌م ژیانه‌ت، ئه‌م ژیانه‌ به‌م جۆره‌ هه‌میشه‌یی نیه‌ و له‌ شوێنێك و له‌ كاتێكدا كۆتاییت پێدێت. له‌م گه‌شته‌یدا دیمه‌نی مردنی كه‌سێكی پیشان ده‌درێت كه‌ خه‌ڵك زۆر بێباكانه‌ باس له‌ مردنه‌كه‌ی ده‌كه‌ن، هه‌ندێك دز خه‌ریكی دزینی كه‌لوپه‌له‌كانینی، مردووه‌كه‌ به‌ جۆرێك ته‌نها بووه‌ ڕۆشتنیشی هیچ كاریگه‌رییه‌كی له‌سه‌ر كه‌س تردرووست نه‌كردووه‌ و كه‌سیشی خه‌مبار نه‌كردووه‌‌. له‌ دیمه‌نی دواتردا ده‌چنه‌ ماڵی گراچیت و ده‌بینن ماڵه‌كه‌یان تازیه‌باره‌، هه‌موویان خه‌مبارن و به‌داخن بۆ مردنی كوڕه‌ نه‌خۆشه‌كه‌یان. لێره‌دا سكروج ده‌بینێت منداڵێكی نه‌خۆش زیاتر له‌ ئه‌و خه‌ڵكی خه‌مبار و ناره‌حه‌ت كردووه‌. دواتر له‌ سه‌ردانیاندا بۆ كه‌نیسه‌ سكروج ناوی خۆی له‌سه‌ر كێلی گۆره‌كه‌ی ده‌بینێت و ده‌زانێت كه‌ مردووه‌.  ئه‌م دیمه‌نه‌ به‌ ته‌واوی سكروج ده‌ترسێنێت و زۆر ده‌پاڕێته‌وه‌ بۆ ئه‌وه‌ی ته‌نها یه‌ك ده‌رفه‌تی تری پێببه‌خشن بۆ ئه‌وه‌ی جارێكی تر ژیانی به‌ جۆرێكی تر بنووسێته‌وه‌، بۆ ئه‌وه‌ی په‌شیمانی ده‌رببڕێت له‌و ڕابردووه‌ی كه‌ به‌سه‌ری بردووه‌، بۆ ئه‌وه‌ی سه‌ره‌نجامی وه‌ك مارلی هاوڕێی نه‌بێت. سكروج له‌ گه‌شتی سێیه‌مه‌وه‌ به‌ ته‌واوی ده‌گاته‌ ئه‌و ئه‌نجامه‌ی كه‌ ته‌نانه‌ت مردنه‌كه‌شی له‌گه‌ڵ كه‌سانی تردا جیاوازه‌ و ئه‌و پاره‌ و سامانه‌ی هه‌یه‌تی ناتوانن هیچ جیاوازیه‌كی بۆ درووست بكه‌ن. منداڵی كه‌سێكی هه‌ژار، به‌ نموونه‌، هیچ نه‌بێت خێزانه‌كه‌ی یان كه‌سانی ده‌ورووبه‌ری خه‌مبار ده‌كات، به‌ڵام مردنی ئه‌و به‌و سه‌روه‌ت و سامانه‌وه‌ هیچ كه‌س خه‌مبار ناكات، چونكه‌ تا له‌ ژیاندا بوو هه‌میشه‌ ته‌نها بوو، له‌ خۆبایی بوو، نامۆ بوو به‌ كۆمه‌ڵگه‌. ته‌نها هاوڕێ و هاوده‌می ئه‌و ته‌نهایی و پاره‌كانی بوون كاتێكیش كه‌ مرد نه‌ پاره‌كانی و نه‌ ته‌نهاییه‌كه‌ی نه‌یانتوانی خه‌ڵك خه‌مبار بكه‌ن.

سكروج ته‌نها كاره‌ته‌رێكی خه‌یاڵی نییه‌ ‌له‌ خایاڵدانی دیكنزه‌وه‌ هاتبێت
له‌ به‌شی كۆتاییدا سكروج خه‌به‌ری ده‌بێته‌وه‌ و ده‌بینێت نه‌مردووه‌ و له‌سه‌ر جێگاكه‌یه‌تی، له‌ خۆشیاندا هاوار ده‌كات، بازده‌دات و خۆشی ده‌رده‌بڕێت. سكروج زۆر خۆشحاڵ ده‌بێت به‌وه‌ی كه‌ چانسێكی تری پێدراوه‌ بۆ ئه‌وه‌ی ژیانی خۆی بگۆڕێت، بۆئه‌وه‌ی په‌شیمانی له‌ ڕابردوو ده‌ربڕێت و داهاتووشی به‌ جۆرێكی تر دابڕێژێته‌وه‌. هه‌ر كه‌ سه‌یری ده‌ره‌وه‌ ده‌كات و بۆ جارێكی تر تیشكی خۆر ده‌بینێته‌وه‌ بڕیارده‌دات هه‌موو شتێك له‌ ژیانیدا بگۆڕێت. ئه‌و ده‌زانێت ماڵی گراچیت هه‌ژارن و ره‌نگه‌ نه‌توانن كریسمسێكی خۆش به‌سه‌ربه‌رن هه‌ر له‌به‌ر ئه‌وه‌ بڕیارده‌دات ئه‌و قه‌له‌ی كه‌ له‌ گه‌شتی دووه‌مدا ده‌یبینێت بۆیان بكڕێت و وه‌ك سوپرایزێك بۆیان بنێریت. بڕیارده‌دات له‌گه‌ڵ هه‌موو كه‌س مامه‌ڵه‌ی بگۆڕێت. سه‌ردانی كه‌نیسه‌ ده‌كات و بڕیار ده‌دات كه‌ بڕێك پاره‌ ببه‌خشێت به‌وانه‌ی كه‌ پاره‌یان بۆ هه‌ژاران كۆده‌كرده‌وه‌. بڕیارده‌دات مووچه‌ی كرێكاره‌كانی زیاد بكات و هه‌میشه‌ هاوكاری بێت. بڕیار ده‌دات چیتر ئه‌و سكروجه‌ی پێش بینینی ڕۆحیانه‌ته‌كان نه‌بێت. 
سكروج ته‌نها كاره‌ته‌رێكی خه‌یاڵی نییه‌ ‌له‌ خایاڵدانی دیكنزه‌وه‌ هاتبێت و ته‌واو. سكروج نمونه‌یه‌كه‌ بۆ مرۆڤ، هێمایه‌ بۆ كۆمه‌ڵگه‌، هێمایه‌ بۆ ئه‌و مرۆڤ و كۆمه‌ڵگایانه‌ی كه‌ زۆر به‌ ئاسانی ڕابردوویان له‌ بیرده‌كه‌ن، خۆیان بیرده‌چێته‌وه‌، نازانن له‌ كوێوه‌ هاتوون و بۆ كوێ ده‌چن. زۆرێك له‌ مرۆڤه‌كان وه‌ك سكروج گیرۆده‌ی كاره‌كانیانن و كۆیله‌ی پاره‌كانیانن، هه‌موو كات و هه‌ستێكیان بۆ كار و پاره‌یان ته‌رخانده‌كه‌ن و خێزان و ده‌ورووبه‌ریان له‌ بیرده‌كه‌ن. ئه‌م جۆره‌ له‌ مرۆڤ بیریان ده‌چێته‌وه‌ كه‌ ئه‌وان ته‌نها نین و وه‌ك ئه‌ریستۆ ده‌ڵێت «ئه‌وان ئاژه‌ڵێكی كۆمه‌ڵایه‌تین.» پێویستیان به‌ هاوكاری ئه‌وانی تر هه‌یه‌ و پێویسته‌ هاوكاری خه‌ڵكانی تریش بكه‌ن. ده‌وڵه‌مه‌ند بوون و پاره‌دار بوونی كه‌سانی هاوشێوه‌ی سكروج له‌سه‌ر پشتی كۆمه‌ڵگه‌ و ئه‌ندامانی كۆمه‌ڵگه‌یه‌ بۆیه‌ له‌به‌رامبه‌ردا ده‌بێت مافی كۆمه‌ڵگه‌ و ئه‌ندامانی كۆمه‌لگه‌ بده‌نه‌وه‌. 
رۆحیانه‌ته‌كانیش ده‌كرێت هێما بن بۆ ویژدانی مرۆڤه‌كان. ده‌بێت ویژدانمان ئه‌و گه‌شتانه‌مان پێ بكات، هه‌ندێك جار بۆ ڕابردوو هه‌ندێك جاریش بۆ ئێستا یان داهاتوو. دیكنز له‌ ڕێی ئه‌م ڕۆمانه‌وه‌ ده‌یه‌وێت مرۆڤه‌كان بگۆڕێت، ده‌یه‌وێت كۆمه‌ڵگاش هه‌مان ئه‌و گه‌شتانه‌ بكات و هه‌مان ئه‌و گۆڕانانه‌ بكات بۆ ئه‌وه‌ی نه‌بێته‌ كۆمه‌ڵگایه‌كی مردوو.
ئه‌م تێكسته‌ تێكستێك نیه‌ بۆ سه‌رده‌مێكی دیاریكراو نووسرابێت، دیكنز زۆر به‌ باشی ناخی مرۆڤی ناسیوه‌. به‌شی زۆری رۆمانه‌كانی، ئه‌م ڕۆمانه‌ش له‌ نێویاندا، كات و شوێنیان تێپه‌ڕاندووه‌ و له‌ هه‌ر شوێن و كاتێك ده‌خوێنرێنه‌وه‌ وا هه‌ست ده‌كرێت تایبه‌ته‌ به‌و كات و شوێنه‌، هه‌ر ئه‌مه‌شه‌ نیشانه‌ی تێكستی سه‌ركه‌وتوو نه‌مر. ماوه‌ته‌وه‌ ئاماژه‌ به‌ ڕاستیه‌كی مێژوویی بكه‌ین، دیكنز وه‌ك نووسه‌رێك له‌ كاتی خۆیدا له‌ شوێنی كراوه‌دا رۆمانه‌كانی بۆ خه‌ڵكی و خوێنه‌ره‌كانی خوێندوه‌ته‌وه‌ و بۆ ئه‌م كاره‌ش ته‌نانه‌ت وڵاتان گه‌ڕاوه‌، ئه‌م جۆره‌ خوێندنه‌وه‌ی رۆمانه‌كانی تا دوازده‌ هه‌فته‌ پێش مردنی به‌ردوام بووه‌. رۆمانی دڵخوازی دیكنز رۆمانی (گۆرانی كریسمس) بووه‌‌ و كۆتا خوێندنه‌وه‌شی هه‌ر ئه‌م ڕۆمانی هه‌ڵبژارد و خوێندیه‌وه‌ بۆ خوێنه‌ره‌كانی.


ناو:  
ئیمه‌یل:    
سه‌رنج:  

#7204
26/2/2017
ئه‌رشیف
وه‌رزش
‌ نه‌ورۆز، شیروانه‌، كه‌ركوك، پ.هه‌ولێر بۆ چوارگۆشه‌ی زێڕین 26/2/2017
‌ پێكانه‌كه‌ی‌ كازۆرلا تا كۆتایی وه‌رز درێژه‌ی ده‌بێت 26/2/2017
زانست
‌ هۆكاری خه‌وتنی مرۆڤ و زینده‌وه‌رانی تر ئاشكرا بوو 22/2/2017
‌ میكانیزمێكی نوێ بۆ وه‌ستاندنی خوێنبه‌ربوونی مێشك 22/2/2017
‌ كونێكی ڕه‌ش له‌ گه‌له‌ ئه‌ستێره‌كه‌ماندا خۆی شاردووه‌ته‌وه‌ 22/2/2017

© 2009 KURDISTANY NWE, All RIGHTS RESERVED. | CREATED BY AVESTA GROUP