خەونی خۆشەویستی
خەونی خۆشەویستی ‌ محه‌مه‌د کوردۆ‌ 16/2/2017
((تۆ دەمریت/ ئایا چێژت لە ژیانی خۆت بینیوە؟/ بەڵێ‌./ چۆن؟/ جارێكیان/ لە ژێر دارێكی كۆندا/ كچێك كە نایناسم/ نامەیەكی دامێ‌ و ڕۆی/ كردتەوە؟/ بەڵێ‌/ چی تێدابوو؟/ هیچ)). ئەوە شیعرێكی (فلادێمێر هۆلان)ە، كە كاتی خۆی لە زمانی عەرەبییەوە كردم بە كوردی و لە گۆڤاری (ئاران)دا بڵاوم كردەوە. ئەم شیعرە، بە دیوێكدا شیعرێكی پوچگەرایە و بە شێوازێكی تایبەتی باسی پوچێتی دنیا دەكات. لەو دیوەدا، پێمان دەڵێت: ژیان هیچە، هەزاران هەزار دەرد و بەڵا و نەهامەتیت بە سەردا دەبارێنێت و لە كۆتاییشدا كە مردن دێت و وەڵامی پرسیاری (ئایا چێژت لە ژیانی خۆت بینیوە)، دەدەیتەوە، بۆت دەردەكەوێت ئەو چێژەی بینیوتە، زۆر بچوكە: (تەنها نامەیەك، لە كچێكەوە كە نایناسیت و نامەكەش هیچی تێدا نییە). لەو دیوەدا، دواجار، ژیان كە لە هیچەوە دەستی پێكردووە، دەگاتەوە بە هیچ و كۆتایی پێدێت. بەڵام بە دیوێكی تردا، ئەم شیعرە شتێكی گرنگترمان پێ دەڵێت. ئەم شیعرە پێمان دەڵێت: لە ژیاندا گرنگترین شت ئەو هەستە گەرمەیە كە لە ناوەوەی مرۆڤدا دادەگیرسێت و مرۆڤەكە لە تیشك و گەرمایی و ڕووناكییدا شەڵاڵ دەكات. بەهادارترین شت ئەو هەستە گەرمەیە كە لە ناوەوە و لە گەرمەی تاریكییە خنكێنەرەكاندا، مرۆڤ ڕووناك دەكاتەوە. ئەم شیعرە، لەم دیوەیاندا پێمان دەڵێت: با ئەو هەستە گەرمەی باسی دەكەین، یەكلایەنەش بێت، با بۆ كەسێكیش بێت كە نایناسین، با دیاریی ئەو كەسەش بۆ ئێمە، تەنها نامەیەك بێت كە هیچی تییدا نییە. بەڵام مادام لە ناو ئێمەدا خەونی خۆشەویستی هەیە، دەكرێت بڵێین: بەڵێ‌ ئێمە ژیاوین و چێژیشمان لە ژیانی خۆمان بینیوە. ئەم شیعرە، لەم دیوەیاندا پێمان دەڵێت: ئەگەر ئەو كەسەشتان نەدۆزییەوە كە هاوكێشەی خۆشەویستیتان بۆ ڕادەگرێت، مەهێڵن خەونی خۆشەویستی لە ناوتاندا بكوژێتەوە، چونكە خەونی خۆشەویستی دەتوانێت هاوكێشەی ژیانتان بۆ ڕابگرێت. چونكە خەونی خۆشەویستی، لە خۆشەویستی خۆی، كەمتر نییە. با ئەوەش بڵێم: ئەوەی ئەم شیعرەی ناوازە كردووە، ئەو دوو دیوەیەتی كە ڕێك پێچەوانەی یەكتریین. كۆكردنەوەی پوچێتی و هیچێتی و خەونی خۆشەویستی پێكەوە، تەرزێكە لە ناوازەیی، كە بێگومان ئەو شاعیرانەی دەتوانن پێی بگەن زۆر كەم و دەگمەنن. 

ناو:  
ئیمه‌یل:    
سه‌رنج:  

#7277
26/5/2017
ئه‌رشیف
وه‌رزش
‌ به‌كورتی 25/5/2017
‌ ته‌نیا هه‌نگاوی كۆتایی ماوه‌ 25/5/2017
زانست
‌ بیری یاقوب چاڵێكی ده‌م كراوه‌ له‌ ته‌كساس 25/5/2017
‌ هۆكاری سێیه‌كی مردنی مرۆڤ له‌م چه‌ند ساڵه‌ی دواییدا 25/5/2017
‌ دایكێكی ته‌مه‌ن ٣٧ ساڵ ٣٨ منداڵی هه‌یه‌ 25/5/2017

© 2009 KURDISTANY NWE, All RIGHTS RESERVED. | CREATED BY AVESTA GROUP