هه‌تا پێشمه‌رگه‌ هه‌بێت هیچ هیزێك ناتوانێ‌ ئاساییش‌و ئارامی‌ كه‌ركوك بشێوێنێت
عه‌مید تالیب فاروق هه‌تا پێشمه‌رگه‌ هه‌بێت هیچ هیزێك ناتوانێ‌ ئاساییش‌و ئارامی‌ كه‌ركوك بشێوێنێت ‌ 16/6/2017
ئاماده‌كردنی‌: سه‌لاح ره‌نجده‌ر
 له‌ دوای‌ هێرش و په‌لاماره‌كانی‌ داعش بۆ سه‌ر شاره‌كانی‌ موسڵ‌و دیالا‌و سه‌لاحه‌دین، كه‌ركوك ئه‌و شاره‌ بوو كه‌ تیرۆریستان ده‌یانویست بیخه‌نه‌ ژێر ده‌سهڵاتی‌ ڕه‌شی‌ خۆیانه‌وه‌‌و بۆ ئه‌و مه‌به‌سته‌ش لاوازی‌ سوپای‌ عیراقیان به‌ هه‌ل زانی‌‌و هه‌ر زوو هێزه‌كانیان ئاراسته‌ی‌ كه‌ركوك كرد. بهڵام هێزی‌ پێشمه‌رگه‌ی‌ كوردستان وه‌ك شورایه‌كی‌ پۆڵایین به‌رسنگی‌ هیرشه‌كانیان دایه‌و خه‌ونه‌كانیان له‌ گۆڕنان.لیوای‌ یه‌كی‌ كه‌ركوك به‌ فه‌رمانده‌یی‌ شه‌هیدی‌ نه‌مر لیوا شێركۆ فاتیح بێ‌ گوێدانه‌ رێگریه‌كانی‌ فیرقه‌ی‌ 12ی‌ سوپای‌ عیراق‌و فه‌رمانده‌یی‌ عی‌مه‌لیاتی‌ دیجله‌ ئاماده‌كاری‌ پێویستیان بۆ پاراستنی‌ كه‌ركوك له‌ هێرش‌و په‌لامارێك رێكخستبو، له‌مباره‌یه‌وه‌ عه‌مید تالیب فاروق له‌ دیدارێكی‌ كوردستانی‌ نوێدا وتی‌:
له‌سه‌ره‌تای‌ دامه‌زراندنی‌ لیواكه‌ماندا  به‌ ناوی‌ لیوای‌ (10) له‌ كه‌ركوك بوین، ئه‌و سه‌رده‌مه‌  شه‌هید شێركۆ فه‌رمانده‌ی‌ لیوامان بوو هه‌تا (2006) ئێمه‌ لیوایه‌كی‌ سه‌ر به‌هێزه‌كانی‌ (70) بووین بهڵام له‌دوای‌ ساڵی‌  (2010)وه‌ كه‌ هێزه‌كان تێكه‌ڵ كران‌و وه‌زاره‌تی‌ پێمشه‌رگه‌ دروست كرا، ئێمه‌ بووین به‌ لیوای‌ (یه‌كی‌) كه‌ركوك له‌سه‌ر وه‌زاره‌تی‌ پێشمه‌رگه‌.

ڕووبه‌روو بوونه‌وه‌ له‌ گه‌ڵ فه‌رمانده‌یی‌ عه‌مه‌لیاتی‌ دیجله‌
عه‌مید تالیب له‌ باره‌ی‌ په‌یوه‌ندی‌ ‌و هاریكاری‌ نێوان پێشمه‌رگه‌و سوپا وتی‌: فرقه‌ی‌ (12) ی‌ سوپای‌ عیراق كه‌ حكومه‌تی‌ مه‌ركه‌زی‌ وه‌ك لایه‌نی‌  به‌رپرسی‌ سه‌ربازی‌ كه‌ركوك به‌ فه‌رمی‌ ناساندبووی‌  ده‌سهڵاتی‌ سه‌ربازی‌ له‌ ناو شاری‌ كه‌ركوك به‌ ده‌ست بوو. بوونی‌ هێزی‌ پێشمه‌رگه‌ی‌ له‌ كه‌ركوك پێ‌ خۆش نه‌بوو. له‌ ساڵی‌ (2011) كاك شێركۆ كۆبونه‌وه‌یه‌كی‌ به‌ هه‌موو فه‌رمانده‌ی‌ فه‌وجه‌كان ، له‌ كۆبوونه‌وه‌كه‌دا پێی‌ وتین : هێزێك دروست بووه‌ به‌ ناوی‌ (هێزی‌ دیجله‌) ئه‌م هێزه‌ كه‌ هاتۆته‌ كه‌ركوك نیازێكی‌ خراپی‌ هه‌یه‌ ، ده‌یه‌وێ‌ هه‌موو شوێنه‌ سه‌ره‌كیه‌كانی‌ ناو شاری‌ كه‌ركوك داگیر بكات. ئه‌یه‌وێ‌ هێز بهێنێت بۆ ناوچه‌ی‌ كه‌لی‌ (سێكانیان ) ‌و شوان ‌و قه‌ره‌هه‌نجیر، بۆ ئه‌وه‌ی‌ ده‌ره‌وه‌ی‌ كه‌ركوك كۆنترۆڵ بكات‌و بازنه‌یه‌ك له‌ده‌وری‌ كه‌ركوكدا دروست بكات. كاك شێركۆ پێشتر له‌ لیژنه‌ی‌ ئه‌منی‌ كه‌ركوكدا بوو، یان هه‌فتانه‌ یان مانگانه‌ له‌ كۆبونه‌وه‌كاندا به‌شدار ده‌ بوو، ئاگای‌ له‌وه‌زعه‌كان بوو ، ورده‌كاریه‌كانیشی‌ ده‌ست كه‌وتبوو.
له‌ساڵه‌كانی‌ (2009/2010) له‌كه‌ركوكدا لیژنه‌ی‌ ئه‌منی‌ دروست بوو بوو، هه‌روه‌ها لیژنه‌ی‌ هاریكاری‌ هه‌بوو، پاراستنی‌ به‌شی‌ باكووری‌ كه‌ركوك درا بوو به‌ پێشمه‌رگه‌، له‌ده‌ره‌وه‌ی‌ كه‌ركوك له‌و زنجیره‌یه‌ی‌ كه‌ نزیك به‌  ناوچه‌ی‌ شوان بوو له‌ نزیك كه‌لی‌ سێكانیان، ناوچه‌ی‌ حه‌ویجه‌و دوزخورماتوش واته‌ باشوور‌و ڕۆژئاوای‌ كه‌ركوك  به‌ سوپای‌ عێراقی‌ سپێردرا بوون، عه‌مید تالیب ده‌ڵێ‌: ئێمه‌ توانیمان زۆر به‌ باشی‌ ئه‌ركی‌ خۆمان ئه‌نجام بده‌ین‌و نه‌مانهێشت به‌هیچ شێوه‌یه‌ك  گروپه‌كانی‌ تیرۆریستان زیان به‌ ئاساییشی‌ شاری‌ كه‌ركوك بگه‌یه‌نن. رێگامان له‌ هه‌موو كارێكی‌ تیرۆریستی‌ ده‌گرت.
بهڵام له‌و لایه‌ی‌ كه‌ هێزی‌ عێراقی‌ لێ‌ دانرابوو هه‌موو ڕۆژێك ته‌قینه‌وه‌ ئه‌بوو، خه‌ڵك ئه‌ڕفێنراو ده‌ستدرێژی‌ ئه‌كرایه‌ سه‌ر خه‌ڵك ، ئه‌و ڕۆژه‌ی‌  كاك شیركۆ كۆبونه‌وه‌كه‌ی‌ پێكردین بۆ شه‌وه‌كه‌ی‌ به‌ئاگاداری‌ وه‌زاره‌تی‌ پێشمه‌رگه‌و سه‌رۆكایه‌تی‌ هه‌رێم توانیمان هێزه‌كه‌مان بجوڵێنین، ئه‌مریكاش ئاگای‌ له‌وه‌ هه‌بوو كه‌ ئێمه‌ هێز ئه‌جوڵێنین . هێزه‌كان به‌م شێوه‌یه‌ ئه‌جوڵان باره‌گای‌ لیوا كاك شێركۆ خۆی‌ ئامر لیوا بوو، بۆ ( سكه‌ی‌ قیتاره‌كه‌ ) له‌وێ‌ باره‌گا دابنێت، باره‌گای‌ فه‌وجی‌ یه‌كمان له‌( تۆپ زاوه‌)‌و فه‌وجی‌ دوو كه‌ من فه‌رمانده‌ی‌ فه‌وج بووم، جوڵه‌ی‌ كرد به‌ره‌و ڕێگای‌ كه‌ركوك – داقوق باره‌گای‌ فه‌وجم له‌وێ‌ دانا له‌ سه‌ناعه‌كه‌ی‌ كه‌ركوك. باره‌گایه‌كیشم له‌ تركهڵان دانا، ئه‌و جاده‌یه‌ی‌ ده‌ڕواته‌ خواره‌وه‌ بۆ ره‌شادو بۆ سكه‌كان ، دوو فه‌وجمان مایه‌وه‌ كه‌ یه‌ده‌ك بوون، كه‌ فه‌وجی‌ سێ‌ زنجیره‌ی‌ كانی‌ دوومهڵانی‌ پێ‌ سپێردرا بوو، له‌م سه‌ر بۆ ئه‌و سه‌ر له‌نزیك كۆمپانیای‌ نه‌وته‌وه‌ تا ده‌گاته‌ سۆنه‌گۆلی‌‌و هه‌تا ده‌گاته‌وه‌ به‌ چیمه‌ن ‌و به‌رزاییه‌كانی‌ لای‌ پشتی‌ چومڕ. فه‌وجی‌ چواریش له‌یلانی‌ پێ سپێردرا، ئه‌وكاته‌ كه‌ سوپای‌ عێراقی‌ له‌ناوچه‌ی‌ له‌یلان ‌و دوز خورماتوو لیوای‌ (15)یان له‌وێ‌ بوو ئێمه‌ش ئه‌و فه‌وجه‌مان له‌وێ‌ جێگیر بوو.

مشتو مڕ له‌ گه‌ڵ فیرقه‌ی‌ 12ی‌ 
سوپای‌ عیراق
سوپای‌ عیراق نه‌یده‌توانی‌ هیچ كارێك بۆ پاریزگاری‌ له‌ ئه‌منی‌ شار‌و هاوڵاتیان بكات ، له‌ گه‌ڵ ئه‌وه‌شدا بوونی‌ پێشمه‌رگه‌ی‌ له‌ ناوچه‌كه‌دا به‌لاوه‌ په‌سه‌ند نه‌بوو،ماوه‌ی‌ شه‌ش بۆ هه‌شت مانگ ئێمه‌ له‌م شوێنانه‌ جێگیر بووین، هێزی‌ ئه‌مریكاش له‌ ناوچه‌كه‌ هه‌بوو. فه‌رمانده‌ی‌ لیوای‌ (15) سوپای‌ عێراق خه‌ڵكی‌ شنگال بوو ناوی‌ (عمید روكن احمد) بوو هات بۆ لامان له‌ منی‌ پرسی‌ به‌بڕیاری‌ كێ‌ هاتونه‌ته‌ ئێره‌؟  وتمان به‌  بڕیاری‌ خۆمان هاتوین،  كه‌ركوك شاری‌ خۆمانه‌‌و ئێمه‌ بۆمان هه‌یه‌ به‌رگری‌ لێ‌ بكه‌ین، له‌به‌ر ئه‌وه‌ی‌ خاكی‌ كوردستانه‌ وتی‌ ئێمه‌ لێره‌ین ئێمه‌ به‌رگری‌ لێ‌ ئه‌كه‌ین.
وتمان ڕاسته‌ ئێوه‌ لێره‌ن، بهڵام هه‌موو ڕۆژێك خه‌ڵكی‌ تیا ده‌كوژرێت‌و ته‌رمه‌كه‌ی‌ فڕێ‌ ده‌درێت، ئه‌مه‌ سه‌ناعه‌كه‌ی‌ كه‌ركوكه‌ ، ئه‌وه‌ مه‌عره‌زه‌كانی‌ كه‌ركوكه‌ خه‌ڵكی‌ لێ‌ تیرۆر ده‌كه‌ن، ئه‌وه‌ ته‌كیه‌ی‌ قادریه‌ یاخود فولكه‌ی‌ حه‌ویجه‌یه‌ هه‌موو ڕۆژێك بۆمبی‌ لێ‌ دائه‌نرێ‌ ‌و خه‌ڵك ده‌كوژرێ، هه‌موو ئه‌و پێكهاتانه‌ی‌ كه‌ له‌ كه‌ركوك داده‌نیشن دوچاری‌ كێشه‌ی‌ تیرۆر بوونه‌ته‌وه‌‌و ئێوه‌ به‌رگرییان لێ‌ ناكه‌ن، دواتر هێزێكی‌ ئه‌مریكا هاتن نه‌قیبێك ‌و فه‌رمانده‌یی‌ سریه‌یه‌كیان له‌گه‌ڵ بوو ، ئێمه‌ له‌گه‌ڵ هێزی‌ ئه‌مریكادا په‌یوه‌ندیه‌كی‌ باشمان هه‌بوو، به‌بڕیاری‌ پارێزگار خه‌نده‌قێك لێدرا له‌چوار ده‌وری‌ كه‌ركوك، ئه‌و شوێنانه‌ی‌ كه‌ ئێمه‌ بۆی‌ هاتبوین له‌ده‌ره‌وه‌ی‌ خه‌نده‌قه‌كه‌ بوو، ئه‌م خه‌نده‌قه‌ به‌ئاگاداری‌ حكومه‌تی‌ عێراقی‌‌و وه‌زاره‌تی‌ پێشمه‌رگه‌ لێدرا. بهڵام له‌گه‌ڵ لێدانی‌ خه‌نده‌قه‌كه‌دا ئێمه‌ كه‌وتبوینه‌ ده‌ره‌وه‌ی‌ خه‌نده‌قه‌كه‌ ئه‌وكاته‌ به‌ بڕیاری‌ وه‌زاره‌تی‌ پێشمه‌رگه‌ كشاینه‌وه‌ بۆ سه‌ر خه‌نده‌قه‌كان، خه‌نده‌قه‌كانیش به‌م شێوه‌یه‌ دابه‌ش ببوون:
 باره‌گای‌ لیوامان هاته‌ پشتی‌ خه‌نده‌قه‌كه‌ له‌لای‌ مه‌عره‌زه‌كانه‌وه‌ به‌رامبه‌ر باره‌گا لیوای‌ (134) ، تاده‌گه‌یشته‌ گوندی‌ (بڵاوه‌) كه‌ باره‌گای‌ فه‌وجه‌كه‌ی‌ منی‌ لێ‌ بوو،  ده‌ستی‌ پێده‌كرد تا ده‌هاته‌ سه‌یته‌ره‌ی‌ كه‌یوان له‌به‌ری‌ ڕۆژههڵاتدا باره‌گای‌ فه‌وجی‌ (3) ی‌ لێ‌ بوو، تا ده‌گه‌یشته‌ عه‌لوه‌كه‌ له‌سه‌یته‌ره‌كه‌ی‌ عه‌لوه‌كه‌وه‌ بۆ جاده‌ی‌ له‌یلان كه‌ ده‌گاته‌ پشتی‌ داقوق‌و دوز هه‌تا ئه‌و به‌رزاییانه‌ی‌ دوزیش فه‌وجی‌ (4)مان له‌وێ‌ بوو. به‌م شێوه‌یه‌ هێزه‌كه‌مان دابه‌ش بوو تا ئه‌و ڕۆژه‌ی‌ داعش به‌ره‌و عێراق هات‌و چه‌ند شارێكی‌  عێراقی‌ گرت.

شه‌ری‌ ته‌ل وه‌رد
دوای‌ ئه‌وه‌ی‌ داعش گه‌یشته‌ شاری‌ موسڵ‌و ده‌وروبه‌ری‌ به‌ره‌ به‌ره‌ هاته‌ حه‌ویجه‌‌و له‌وێشه‌وه‌ دوای‌ هێزه‌ شكستخواردوه‌كه‌ی‌ عیراق كه‌وتبو به‌ره‌و باشووری‌ كه‌ركوك، یه‌كه‌كانی‌ سوپا بۆ پشتی‌ هێزه‌كانی‌ پێشمه‌رگه‌ ههڵاتن، بهڵام پێشمه‌رگه‌كانی‌ كوردستان رێگه‌یان له‌ تیرۆریستان گرت‌و لێیان دان‌و نه‌یانهێشت بێنه‌ پێشه‌وه‌، به‌م شێوه‌یه‌ داعش بۆی‌ ده‌ركه‌وت كه‌ ناتوانێت به‌ ئاسانی‌ به‌ره‌و كه‌ركوك بروات.
 عه‌مید تالیب ده‌ڵێت ئێمه‌ ئاماده‌كاریمان كردبوو بۆ به‌رپه‌رچدانه‌وه‌ی‌ تیرۆریستان ، بۆیه‌ ئه‌وانیش بیریان له‌ هێرش‌و په‌لاماری‌ گه‌وره‌ كرده‌وه‌، جارێكی‌ تر داعش به‌هێزێكی‌ زۆره‌وه‌ هێرشیان كرد له‌ به‌رواری‌ (8/6) كاتژمێر یه‌كی‌ دوانیوه‌ڕۆ هێرشیان  ده‌ست پێكرد‌و ئێمه‌ش ڕووبه‌ڕوویان بوینه‌وه‌‌و لێمان دان ، ئێمه‌ هێزه‌كه‌مان له‌چوار ده‌وری‌ ته‌ل وه‌رد دابه‌ش  كردبوو، له‌ خانوه‌كه‌ی‌ عه‌لی‌ حسن مه‌جیدو له‌ نێو گوندی‌ ته‌للوه‌رده‌وه‌ ده‌هات ، له‌گه‌ڵ كاك شێركۆ قسه‌م كرد، وتم ئێمه‌ فه‌سیلێكمان لێره‌یه‌ من خۆم ده‌چم له‌گه‌ڵ (10 بۆ 15) كه‌سی‌ تردا له‌و فه‌سیله‌ی‌ تریش سێ‌ چوار كه‌سی‌ تر ئه‌به‌م وتم من هێرش ده‌كه‌م بۆ ئه‌و جاده‌یه‌ی‌ كه‌ له‌ پشتی‌ ئه‌واندایه‌ ، جاده‌كه‌ش بۆ پرده‌ ڕوخاوه‌كه‌ی‌ مه‌كته‌ب خالید ده‌هات جاده‌یه‌ك ده‌ڕوات بۆ حه‌ویجه‌‌و جاده‌یه‌كیش بۆ موسڵ دێت جاده‌كه‌ خۆڵ بوو، بهڵام له‌ دێی‌ ته‌للورد قیرتاو كرابوو، ئه‌م جاده‌ قیره‌ ده‌چووه‌ پشتی‌ دێیه‌كه‌،  هێرشه‌كه‌مان كرد‌و پشتی‌ هێزه‌كه‌ی‌ دوژمنمان گرت ئه‌مه‌ش تاكتیكێكی‌ تازه‌ بوو، كه‌زانییان ته‌قه‌ له‌پشته‌وه‌ دروست بوو یه‌كسه‌ر شكان‌و ڕایانكرد به‌سه‌ر مندا دێنه‌وه‌ من لێره‌ پێشم گرتن‌و لێمان دان، نزیكه‌ی‌ (26) كه‌سمان لێ‌ كوشتن سه‌یاره‌یه‌كی‌ بابه‌هانی‌ عه‌سكه‌رییان پی‌ بوو بوو سوتاندمان ، دێكه‌مان گرت‌و فه‌وجی‌ یه‌كیش كاك شێركۆ پێی‌ وتبوون جوڵه‌ بكه‌ن ئه‌وانیش هاتن بۆ پرده‌كه‌ ئێمه‌ له‌ناو دێیه‌كه‌ بووین ئه‌وان هاتنه‌ سه‌ر پرده‌كه‌ كاك شێركۆ‌و ئه‌وانیش لێره‌وه‌ هێرشیان كرد ، ئێمه‌ دوو دژه‌ هێرشمان كرد‌و پشتمان گرتن،  له‌ناو دێیه‌كه‌ یه‌كمان گرته‌وه‌‌و دوژمنمان خسته‌ ناوه‌ڕاسته‌وه‌ ئه‌وه‌ی‌ ده‌رباز بوو ڕۆی‌ ئه‌وه‌ی‌ كه‌ له‌به‌ر ده‌ستماندا كوژرا بوو (26) كه‌س بوو ئۆتۆمبیلێك‌و چه‌كێكی‌ زۆریشمان گرت .

ناوچه‌یه‌كی‌ گرنگی‌ ستراتیژی‌‌و ئه‌ركێكی‌ مێژوویی‌ 
ناوچه‌ی‌ باشوور‌و خۆرئاوای‌ كه‌ركوك له‌ رووی‌ ئابووری‌‌و ستراتیژی‌ سه‌ربازیه‌وه‌ گرنگیه‌كی‌ بێ‌ هاوتای‌ هه‌یه‌، هه‌ره‌شه‌ی‌ داعش له‌ سه‌ر ئه‌و ناوچه‌یه‌ هه‌ره‌شه‌یه‌ بۆ سه‌ر كه‌ركوك‌و سه‌رجه‌م ناوچه‌كانی‌ كوردستان ، كۆمپانیاكانی‌ نه‌وت‌و غاز‌و كاره‌با‌و ڕێگا ستراتیژیه‌كانی‌ نێوان كه‌ركوك‌و موسڵ‌و كه‌ركوك‌و تكریتی‌ له‌سه‌ره‌، هه‌روه‌ها چه‌ندین پێكهاته‌ی‌ ئایینی‌‌و نه‌ته‌وه‌یی‌ له‌و ناوچانه‌دا هه‌ن كه‌ پێشمه‌رگه‌ پاراستنی‌ ئه‌وانیشی‌ له‌ ئه‌ستۆ گرتوه‌، بۆیه‌ داعش چه‌ندین جار به‌ نه‌خشه‌و پلانی‌ تازه‌وه‌ هه‌وڵی‌ داگیر كردنی‌ ئه‌و ناوچه‌یه‌ی‌ ده‌دا.

هێرشێكی‌ فراوان‌و به‌رگریه‌كی‌
 كه‌م وێنه‌ 
عه‌مید تالیب له‌ درێژه‌ی‌ وته‌كانیدا تیشكی‌ خسته‌ سه‌ر دوا هه‌وڵه‌كانی‌ تیرۆریستان‌و وتی‌: داعش بۆ دواجار هێزه‌كانی‌ خۆی‌ كۆكرده‌وه‌‌و هێرشێكی‌ دیكه‌ی‌ بۆ سه‌ر ناوچه‌كه‌ ده‌ست پێكرد، ئه‌م هێرشه‌ گه‌وره‌ترین هه‌وڵی‌ تیرۆریستانی‌ داعش بوو بۆ ده‌ست به‌سه‌را گرتنی‌ باشووری‌ كه‌ركوك‌و دواتریش داگیر كردنی‌ كه‌ركوك ، شه‌وی‌ پێش شه‌ره‌كه‌ په‌یوه‌ندیم به‌كاك شێركۆوه‌ كرد‌و وتم به‌ پێی‌ ئه‌و زانیاریانه‌ی‌ كه‌ بۆمان هاتوه‌ داعش به‌نیازی‌ هێرشكردنه‌ ، هێزێكی‌ زۆریان كۆكردۆته‌وه‌، هێزه‌كانی‌ خۆمان كۆبكه‌ینه‌وه‌‌و بكه‌وینه‌ ئاماده‌ باشیه‌وه‌، شه‌وبوو كاتژمێر یه‌ك‌و پێنج ده‌قیقه‌ هێرش ده‌ستی‌ پێكردو كاك شێركۆ له‌مه‌قه‌ڕ لیوا بوو له‌ واحید حوزه‌یران هێرشه‌كان به‌م شێوه‌یه‌ بوون بۆ سه‌ر ئه‌م شوێنانه‌:
 مه‌لا عبدالله‌: بۆ سه‌ر لیوای‌ (11) هێرش ده‌ستی‌ پێكرد.
ته‌ل وه‌رد: لیوای‌ (6)ی‌ لێ‌ بوو، مه‌كته‌ب خالیدیش فه‌وجی‌ یه‌كی‌ لێبوو، فه‌وجی‌ (3) له‌سه‌ر سكه‌ی‌ قیتاره‌كه‌ بوو فه‌وجی‌ (4) له‌ نه‌هره‌وان بوو فه‌وجی‌ (2)مان له‌ ڕه‌شاد بوو كه‌ من ئامر فه‌وجی‌ بووم هێرشه‌كه‌ له‌ مه‌لا عبدالله‌وه‌ هه‌تا ڕه‌شاد هێرشی‌ به‌رفراوان كرا، په‌لاماره‌كه‌یان له‌كاتژمێر یه‌ك‌و پێنج ده‌قیقه‌وه‌ ده‌ستی‌ پێكرد، به‌تۆپباران‌و به‌هاوه‌ن بارانێكی‌ زۆر له‌گه‌ڵ ئه‌وه‌شدا سه‌یاره‌ی‌ گه‌وره‌‌و شۆفڵ به‌ (10) جۆر ته‌غلیف كرابوون،  له‌مه‌لا عبدالله‌ سه‌یاره‌كان گیرا بوون كه‌ ئێستا له‌ باره‌گای‌ میحوه‌رن هێرشه‌كه‌ (30/12/2014) بوو به‌م شێوه‌یه‌ ده‌ستی‌ پێكرد.
له‌ ئاوه‌كه‌ی‌ مه‌لا عبدالله‌ بپه‌ڕنه‌وه‌ بۆ خه‌بازه‌‌و هێزێكی‌ تریشیان له‌ ته‌للورد ده‌ستی‌ به‌هێرش بكات بپه‌ڕێته‌وه‌ بۆ ناوچه‌ی‌ كه‌یوان‌و له‌گه‌ڵ ئه‌و هێزه‌ی‌ تردا یه‌ك بگرێته‌وه‌، هێزێكیان له‌مه‌كته‌ب خالیده‌وه‌ ده‌ستی‌ به‌ هێرش كرد بۆ كۆمپانیای‌ ( غازشیمال )، هێزێكی‌ تریان له‌ سكه‌ی‌ قیتاره‌كه‌وه‌ بۆ ناو غازشیمال بۆ ئه‌وه‌ی‌ له‌پشته‌وه‌ بێن ، هێزی‌ چواره‌میان: له‌نه‌هره‌وان به‌ پشتی‌ غازشیمال ‌و تۆپ زاوادا بۆ سه‌رسكه‌كه‌ بێن.
هێزی‌ پێنجه‌م: بۆ ڕه‌شادو فولكه‌ گه‌وره‌كه‌ی‌ حه‌ویجه‌و تكریت ‌و نێو شاری‌ كه‌ركوك ، ئه‌م هێرشه‌ به‌هاوه‌ن باران‌و به‌ته‌قه‌یه‌كی‌ زۆره‌وه‌ ده‌ستی‌ پێكرد ، له‌ قۆڵی‌ ڕه‌شاده‌وه‌  ئێمه‌ زۆر به‌ باشی‌ شكاندمان ، بهڵام له‌ قۆڵه‌كانی‌ تره‌وه‌ تیرۆریستان پێشره‌وییان كردبوو چونكه‌ هێزێكی‌ زۆر گه‌وره‌ بوون.
شه‌هید شێركۆ كه‌پێیان وتبو نه‌هره‌وان گیراوه‌ یه‌كسه‌ر له‌جاده‌ی‌ مه‌كته‌ب خالیده‌وه‌ ڕۆیشتبوو كه‌چووه‌ مه‌كته‌ب خالید به‌ره‌و سكه‌كه‌ ڕۆیشتبوو، ئه‌و پێشمه‌رگانه‌ی‌ كه‌ له‌وێ‌ بوون پێیان نه‌وتبوو هێزه‌كه‌ی‌ نه‌هره‌وان شكاوه‌ ته‌نها وتبویان نه‌هره‌وان وه‌زعی‌ خراپه‌ ئه‌ویش وتبوی‌ قسه‌ی‌ وامه‌كه‌ن به‌ره‌و نه‌هره‌وان رۆیشتبوو هه‌تا چوبوه‌ ناو دوژمنه‌وه‌ ، كه‌ دابه‌زیبوو دوو مه‌تر له‌ دوژمنه‌وه‌ دوور بوو، (20) كه‌س ده‌بوون شوێنه‌كه‌یان گرته‌وه‌ بهڵام ته‌واو كه‌هه‌ستا بووه‌ سه‌ر پێ‌  له‌ به‌رامبه‌ره‌وه‌ ته‌قه‌یان لێكردبوو، كاك شێركۆو پێنج پێشمه‌رگه‌ی‌ شه‌هید بوون به‌داخه‌وه‌ به‌ شه‌هید بونی‌ كاك شێركۆ هێزه‌كه‌ی‌ ئێمه‌ ڕوخا، ئێمه‌ بۆ به‌یانی‌ ماینه‌وه‌ كاتژمێر شه‌ش بوو دژه‌ تیرۆر گه‌یشته‌ لامان ئێمه‌ هێرشمان كرد شوێنه‌كه‌ی‌ خۆمان گرته‌وه‌ بهڵام  له‌ نه‌هره‌وان شه‌هید شێرزاد شه‌هید بوو كه‌ جێگری‌ فه‌رمانده‌ی‌ لیوا بوو ، كۆمه‌ڵێك پێشمه‌رگه‌ش شه‌هیدو بریندار بوون. 

به‌ خوێنی‌ خۆی‌‌و هه‌ڤاڵه‌ شه‌هیده‌كانی‌ مه‌شخه‌ڵی‌ سه‌ركه‌وتنیی‌ داگیرساند
دیاره‌ شه‌هید بوونی‌ شێركۆی‌ فه‌رمانده‌ هانده‌رێك بوو بۆ وره‌ به‌رزی‌‌و خۆراگری‌ پێشمه‌رگه‌و ئه‌فسه‌ره‌كان‌و پێشمه‌رگه‌‌و فه‌رمانده‌كان بریاریان دابوو تۆڵه‌ی‌ بكه‌نه‌وه‌‌و نه‌هێڵن شه‌شه‌مه‌ كوێره‌كانی‌ داعش نیازی‌ گڵاویان بۆ داگیركردنی‌ شاری‌ كه‌ركوك بهێننه‌ دی‌، عه‌مید تالیب هه‌روه‌ها وتی‌: دواتر نه‌هره‌وان گیرایه‌وه‌ ، ئێمه‌ توانیمان شانبه‌شانی‌ هه‌موو یه‌كه‌كانی‌ دیكه‌ له‌ هه‌موو شوێنه‌كان به‌رگریه‌كی‌ زۆرباش بكه‌ین‌و ڕێگا له‌ پیلانه‌كانی‌ دوژمن بگرین. شه‌هید شێركۆ پیاوێكی‌ زۆر دڵسۆز بوو بۆ یه‌كێتی‌‌و كورد‌و كه‌ركوك هه‌میشه‌ به‌ پێشمه‌رگه‌كانی‌ ده‌وت: چه‌نده‌ دڵسۆز بین چه‌ند به‌وه‌فابین بۆ خوێنی‌ شه‌هیده‌كانمان ، بۆ خاكمان بۆ نیشتمانمان هێشتا كه‌مه‌ ، ئێمه‌ بۆ ئه‌وه‌ دروست بوین كه‌ به‌رگری‌ له‌خاك ‌و  نیشتمانی‌ خۆمان بكه‌ین.

پێشمه‌رگه‌ ئاماده‌یه‌ بۆ ئازاد 
كردنی‌ حه‌ویجه‌
قوربانیه‌كانی‌ هێزی‌ پێشمه‌رگه‌ له‌ باشوور‌و رۆژئاوای‌ كه‌ركوك زۆر گه‌وره‌‌و بێ‌ ئه‌ژمارن، له‌ ساڵی‌ 2014ه‌وه‌ پێشمه‌رگه‌ به‌ خوێنی‌ خۆی‌‌و بێ‌ گوێدانه‌ ئه‌رك‌و ماندوێتی‌ ئه‌و ناوچه‌ گرنگه‌ی‌ پاراستوه‌‌و نه‌یهێشتوه‌ تیرۆریستان ئامانجه‌ گڵاوه‌كانیان به‌دی‌ بهێنن، له‌ ئێستاشدا بۆ شه‌ری‌ كۆتایی‌‌و ئازاد كردنی‌ قه‌زای‌ حه‌ویجه‌‌و ده‌ورو به‌ری‌ ئاماده‌یه‌‌و چاوه‌روانی‌ فه‌رمانه‌، عه‌مید تالیب له‌م رووه‌وه‌ ده‌ڵێت:
هێزی‌ پێشمه‌رگه‌ی‌ كوردستان ئێستا له‌ هه‌موو كاتێك به‌ تواناتره‌ له‌رووی‌ چه‌ك‌و ته‌قه‌مه‌نی‌‌و توانای‌ به‌رگی‌‌و هێرش بردنه‌وه‌ ساز‌و ئاماده‌یه‌ بۆ گرتنی‌ حه‌ویجه‌و ده‌وروبه‌ری‌ ، پێشمه‌رگه‌ ئه‌زموونی‌ باشی‌ له‌ شه‌ڕی‌ داعش دا هه‌یه‌‌و ئه‌و هێزه‌یه‌ كه‌ توانای‌ راماڵینی‌ تیرۆریستانی‌ هه‌یه‌. له‌ دواییشدا عه‌مید تالیب ده‌ڵێ‌: با دانیشتوانی‌ كه‌ركوك‌و هه‌موو ناوچه‌كانی‌ تریش ئاسووده‌ بنوون‌و بزانن ئێمه‌ هه‌میشه‌ بێدارین‌و ده‌ستمان له‌ سه‌ر په‌لاپیتكه‌ی‌ تفه‌نگه‌كانمانه‌ بۆ پاراستنی‌ كه‌ركووك‌و هه‌تا پێشمه‌رگه‌ هه‌بێت هیچ هێزێك ناتوانێ‌ ئاسایش‌و ئارامی‌ كه‌ركوك بشێوێنێت.

پڕۆفایلی‌ عمید تالیب فاروق
ساڵی‌ 1968 له‌ كه‌ركوك هاتوه‌ته‌ دنیاوه‌
ساڵی‌ 1983 په‌یوه‌ندی‌ به‌ هێزی‌ پێشمه‌رگه‌وه‌ كردوه‌
دوو براو پێنج ئامۆزای‌ له‌ شۆرشدا شه‌هید بوون.
ئێستا: جێگری‌ فه‌رمانده‌ی‌ لیوایه‌ له‌ (ه.پ.ك).


ناو:  
ئیمه‌یل:    
سه‌رنج:  

#7301
23/6/2017
ئه‌رشیف
وه‌رزش
‌ یۆرۆی لاوان 22/6/2017
‌ رۆناڵدۆ كه‌ی ده‌چێته‌ دادگا؟ 22/6/2017
زانست
‌ دروستبوونی ورگ و هۆكار و چاره‌سه‌ر 22/6/2017
‌ دۆزینه‌وه‌یه‌كی سه‌رنجڕاكێش له‌ پیرۆ 22/6/2017
‌ ناسا : له‌ خۆر نزیك ده‌بێته‌وه‌ 22/6/2017

© 2009 KURDISTANY NWE, All RIGHTS RESERVED. | CREATED BY AVESTA GROUP