فه‌رید ئه‌سه‌سه‌رد: پاش بڕیاری دوا كۆبوونه‌وه‌ی ئه‌نجومه‌نی سه‌ركردایه‌تی یه‌كێتی، ئیراده‌یه‌كی زۆر به‌هێز بۆ جێبەجێکردنی رێكەو‌تنی نێوان یه‌كێتی‌و گۆڕان هه‌یه‌
فه‌رید ئه‌سه‌سه‌رد: پاش بڕیاری دوا كۆبوونه‌وه‌ی ئه‌نجومه‌نی سه‌ركردایه‌تی یه‌كێتی، ئیراده‌یه‌كی زۆر به‌هێز بۆ جێبەجێکردنی رێكەو‌تنی نێوان یه‌كێتی‌و گۆڕان هه‌یه‌ ‌ 2/7/2017
وتارێكی فه‌رید ئه‌سه‌سه‌رد ئه‌ندامی ئه‌نجومه‌نی سه‌ركردایه‌تیی ی.ن.ك ماوه‌یه‌ك به‌ر له‌ئێستا له‌ كوردستانی نوێدا بڵاوكرابۆوه‌ سه‌باره‌ت به‌ بابه‌تی ریفراندۆم‌و زه‌روره‌تی  كاراكردنه‌وه‌ی په‌رله‌مان‌و چه‌ند بابه‌تێكی گه‌رمی دیكه‌، كه‌ بووه‌ هۆی وروژاندنی چه‌ند پرسێك‌و له‌زۆرێك له‌ سایت‌و میدیاكاندا لێكدانه‌وه‌ی جیاجیای به‌شوێن خۆیدا هێنا،  رادیۆی ده‌نگی گه‌لی كوردستانی خسته‌ سه‌ر ئه‌و بڕوایه‌ی كه‌ یه‌كێك له‌ به‌رنامه‌كانی خۆی ته‌رخان بكات بۆ دیدارێك له‌گه‌ڵ نووسه‌ری بابه‌ته‌كه‌ تا خۆی شیكردنه‌وه‌ی وردتر بۆ بابه‌ته‌كه‌ی بكات‌و وه‌ڵامی ئه‌و پرسیارانه‌ بداته‌وه‌ كه‌ له‌ مشتومڕه‌كه‌یان له‌ناوه‌نده‌ میدیاییه‌كاندا دروستكردووه‌‌و كوردستانی نوێ-ش له‌به‌ر گرنگیی ناوه‌ڕۆكی دیداره‌كه‌، به‌باشی زانی پوخته‌ی شیكردنه‌وه‌‌و تێڕوانینه‌كانی بڵاوبكاته‌وه‌.
سازدانی دیدار: ئەمیر عومەر
ئامادەکردن‌و داڕشتنەوەی : تاریق كه‌مال
*وتارێكت نووسیووه‌ تێیدا ده‌ڵێیت پاش ئه‌وه‌ی ئه‌مریكا‌و روسیا‌و ئه‌ڵمانیا‌و عیراق ده‌نگی ناڕه‌زاییان بۆ ئه‌نجامدانی ریفڕاندۆم بۆ سه‌ربه‌خۆی كوردستان به‌رزكرده‌وه‌، پرۆژه‌ی ریفڕاندۆم پێ ده‌نێته‌ قۆناغێكی مه‌ترسیداره‌وه‌؟ بۆچی به‌م شێوه‌یه‌ بیرده‌كه‌یته‌وه‌؟ 
 -له‌به‌رئه‌وه‌ی ئه‌و ده‌وڵه‌تانه‌ كاریگه‌رییان له‌سه‌ر ناوچه‌كه‌‌و جیهان هه‌یه‌، به‌شێكی زۆری ئه‌و وڵاتانه‌ی كه‌ له‌ ناوچه‌كه‌دان، ته‌نانه‌ت سنووره‌كه‌شیان له‌لایه‌ن ده‌وڵه‌ته‌ زلهێزه‌كانه‌وه‌ كێشراوه‌، له‌به‌رئه‌وه‌ كه‌ هه‌ڵوێست له‌سه‌ر مه‌سه‌له‌یه‌كی دیاریكراو وه‌رده‌گرن، به‌دڵنیاییه‌وه‌ ده‌بێـت به‌هه‌ند وه‌ربگیرێت‌و له‌به‌ر چاوبگیرێت، نه‌ك به‌نه‌بوو حسابی بۆ بكرێت. ئه‌وه‌ی هه‌ستی پێده‌كه‌م له‌ هه‌رێمی كوردستاندا، ئه‌وه‌یه‌ هیچ ده‌وڵه‌تێك بۆچوونی خۆی له‌و باره‌یه‌وه‌ ده‌رنه‌بڕیبێت، به‌داخه‌وه‌ ئه‌و ده‌وڵه‌تانه‌شی بۆچوونه‌كانیان ده‌ربڕیووه‌، هه‌م له‌سه‌ر ئاستی جیهان ده‌وڵه‌تی زلهێز‌و كاریگه‌ر‌و گه‌وره‌ن، هه‌م له‌سه‌ر ئاستی ناوچه‌كه‌ش ئه‌و ده‌وڵه‌تانه‌ن رووداو دروست ده‌كه‌ن‌و رۆڵیان هه‌یه‌ له‌ناوچه‌كه‌دا. به‌دڵنییایه‌وه‌ ئێمه‌ هه‌رێمێكین رووبه‌ڕووی ئه‌و هه‌موو ره‌خنانه‌ ببینه‌وه‌ كه‌ ره‌نگه‌ ئه‌و لایه‌نانه‌ ئاراسته‌ی سیاسه‌تی هه‌رێمی بكه‌ن، له‌به‌رئه‌وه‌ ده‌بێـت ئه‌و مه‌سه‌له‌یه‌ به‌هه‌ند وه‌ربگیرێت‌و به‌شێوه‌یه‌ك چاره‌سه‌ر بكرێت قازانجی هه‌رێمی تێدا بێت.
*ره‌نگه‌ ئه‌وه‌ شتێكی روون‌و ئاشكرا بێت لای هه‌ر تاكێكی كوردستان‌و حزب‌و لایه‌نه‌ سیاسییه‌كان كه‌ هه‌ڵوێستی هه‌ر یه‌ك له‌ ئێران‌و توركیا‌و عیراق‌و سوریا به‌و حاڵه‌ی ئێستاشه‌وه‌، هه‌ڵوێستێكی دژیان هه‌بێت، ئه‌وه‌ شتێكی چاوه‌ڕوان كراو نه‌بوو؟
-به‌ڵی ئه‌وه‌ راسته‌، به‌ڵام ئه‌وه‌ی ئه‌مریكاش چاوه‌ڕوانكراو نه‌بوو، چونكه‌ پێش ئه‌وه‌ شاندێكی هه‌رێم سه‌ردانی ئه‌مریكایان كرد، ئه‌وه‌ی ئه‌مریكا به‌ئاشكرا به‌ شانده‌كه‌ی ئێمه‌شیان وتبوو، به‌ڵام له‌گه‌ڵ ئه‌وه‌شدا هه‌رێم سووربوو له‌سه‌ر ئه‌وه‌ی به‌رده‌وامبێـت له‌سه‌ر هه‌وڵه‌كانی خۆی بۆ ریفڕاندۆم‌و هه‌وڵیدا به‌شێك له‌ نیگه‌رانییه‌كان بڕه‌وێنێته‌وه‌‌و تائێستاش نه‌یتوانییوه‌ ئه‌و نیگه‌رانییانه‌ بڕه‌وێنێته‌وه‌، به‌ڵام پرۆسه‌كه‌ خۆی هه‌ر به‌رده‌وامه‌‌و هه‌نگاوی تریشی بۆ نراوه‌.
*باس له‌وه‌ ده‌كرێـت ئێستا له‌سه‌رده‌مێكدا ده‌ژین، بارودۆخی ناوچه‌كه‌‌و هه‌رێمی كوردستان‌و عیراق به‌جۆرێك له‌جۆره‌كان له‌گۆڕاندایه‌، باس له‌وه‌ ده‌كرێت ئه‌و ده‌رفه‌ته‌ی بۆ باشووری كوردستان‌و رۆژئاوای كوردستان  هاتۆته‌ پێش، ده‌رفه‌تێكی زێڕینه‌، ده‌بێت حه‌كیمانه‌ مامه‌ڵه‌ی له‌گه‌ڵ بكه‌ین، ره‌نگه‌ ئه‌وه‌ی ئه‌م سه‌رده‌مه‌ له‌ده‌ست بده‌ین، له‌مێژوویه‌كی دوورتردا جارێكی تر پێی نه‌گه‌ینه‌وه‌؟
-مه‌رج نییه‌ ئه‌م لێكدانه‌وانه‌ راست بن، له‌هه‌موو حاڵه‌تێكدا ئێمه‌ تا چه‌ند مانگێك له‌مه‌وبه‌ریش هه‌ر باسی ئه‌وه‌مان ده‌كرد هه‌لومه‌رجه‌كان گونجاو نییه‌ بۆ ریفڕاندۆم، ئێستا باس له‌وه‌ ده‌كرێت كه‌ گونجاوه‌، له‌كاتێكدا جیاوازییه‌كی زۆر له‌ماوه‌ی ئه‌و سێ مانگه‌ نه‌هاتۆته‌ دی، به‌ڵام كاتێك ناڕه‌زاییه‌ك له‌سه‌ر ئاستی جیهان‌و ناوچه‌كه‌ دێته‌ ئاراوه‌، ئه‌مه‌ به‌ڵگه‌ی ئه‌وه‌یه‌ كه‌ ده‌وترا كاته‌كه‌ی گونجاو نییه‌، دیاره‌ گونجاو نییه‌، كاتی گونجاو ئه‌وه‌یه‌ كه‌ كه‌مترین دژایه‌تی بۆ پرۆسه‌كه‌ هه‌بێت‌و زۆرترین پشتیوانی بۆ پرۆسه‌كه‌ هه‌بێت.
*ئه‌مه‌ ره‌نگه‌ له‌ده‌وڵه‌تێكی دیموكراتدا یان له‌ وڵاتێكی پێشكه‌وتووی وه‌ك سویددا ره‌نگه‌ به‌م شێوازه‌ بێت؟
-نه‌خێر وانییه‌، ته‌نانه‌ت بۆ نموونه‌ بۆ ریفڕاندۆمی كه‌ته‌لۆنیاش، هه‌موو یه‌كێتیی ئه‌وروپا دژایه‌تی ده‌كه‌ن، ئه‌مریكییه‌كانیش دژیین، هه‌ریه‌كه‌ له‌به‌ر به‌رژه‌وه‌ندیی تایبه‌تی خۆی. مه‌سه‌له‌ی ئه‌مه‌ په‌یوه‌ندیی به‌ مه‌سه‌له‌ی دیموكراسی‌و مه‌سه‌له‌ی مه‌ده‌نیبوونی ده‌وڵه‌ته‌وه‌ نییه‌، ئه‌وه‌ی په‌یوه‌ندیی به‌ ئێمه‌وه‌یه‌، زیاتر په‌یوه‌ندیی به‌ خۆرهه‌ڵاتی ناوه‌ڕاسته‌وه‌ هه‌یه‌، ئه‌م ناوچه‌یه‌ هه‌موو جیهان سه‌رقاڵه‌ پێوه‌ی، ئه‌م ناوچه‌یه‌ هێوربكرێته‌وه‌‌و كێشه‌كانی چاره‌سه‌ر بكرێت، بۆئه‌وه‌ی نه‌بن به‌ مایه‌ی ئاژاوه‌‌و كێشه‌ بۆ سه‌رتاسه‌ری جیهان.
 ئێمه‌ له‌م كاته‌دا ئه‌م مه‌سه‌له‌یه‌مان هێنایه‌ پێشه‌وه‌، ده‌كرا ئێمه‌ لانیكه‌م پێنچ شه‌ش ساڵێك چاوه‌ڕێمان بكردایه‌، ده‌كرا هه‌لومه‌رجێكی گونجاوتر بهاتایه‌ته‌ پێشه‌وه‌، به‌ڵام له‌گه‌ڵ ئه‌وه‌شدا مادام ده‌ستمان پێكردووه‌، ئێستا ناتوانین لێی په‌شیمان ببینه‌وه‌‌و ده‌بێت هه‌ر به‌رده‌وام بین له‌سه‌ری.
*باستان له‌وه‌ كردووه‌ كه‌ سه‌ركردایه‌تیی سیاسیی كورد په‌یامه‌ سیاسییه‌كانی به‌هه‌ڵه‌ خوێندۆته‌وه‌ له‌ هه‌ڵسه‌نگاندندا هه‌ڵه‌ی كردووه‌، ئێوه‌ ئه‌ندامی سه‌ركردایه‌تیی ی.ن.ك-ن، له‌هه‌مان كاتیشدا یه‌كێتیی به‌شێكه‌ له‌و پڕۆژه‌یه‌، واته‌ له‌هه‌موو هه‌ڵسه‌نگاندنه‌كاندا هه‌ڵه‌ كرابێت، چۆن یه‌كێتیی ده‌چێته‌ ژێرباری به‌رپرسیارێتییه‌كی وا گرنگ ‌و مێژوویی‌و نیشتمانییه‌وه‌؟
-زۆرتر یه‌كێتی ناگرێته‌وه‌، ره‌نگه‌ لایه‌نی تر بگرێته‌وه‌. له‌سه‌رده‌می شه‌ڕی دژی داعشدا كه‌ ئێستا خه‌ریكه‌ به‌ره‌و كۆتایی ده‌چێت، هه‌موو جیهان پشگیریی كوردی ده‌كرد، پشگیریی كورد به‌و ماناییه‌ی دژی هێزێكی تیرۆریستی جیهانییه‌ كه‌ مایه‌ی سه‌رئێشه‌یه‌ بۆ هه‌موو جیهان، به‌شێك له‌ سه‌ركردایه‌تی سیاسیی كورد به‌وجۆره‌ سه‌یری مه‌سه‌له‌كه‌ی كردووه‌، مادام جیهان له‌م قۆناغه‌دا پشگیریی كوردی كردووه‌، هه‌م له‌ عیراق‌و هه‌م له‌ سوریا له‌دژی داعش، مانای وایه‌ پشگیریی سه‌ربه‌خۆیی ده‌كات بۆ جیابوونه‌وه‌ له‌ عیراق‌و سوریا، هه‌ڵه‌كه‌ له‌وه‌دا بوو، ئه‌و وڵاتانه‌ی پشگیریی كوردیان كردووه‌، پشگیرییه‌كه‌ له‌ شه‌ڕی دژی داعشدا بوو،  كه‌ ئه‌وه‌ له‌به‌رژه‌وه‌ندیی خۆیاندایه‌ كه‌ داعش تێكبشكێت، به‌ڵام پشگیریی كوردیان نه‌كردووه‌ تا له‌و وڵاتانه‌ جیا ببێته‌وه‌، چونكه‌ نایانه‌وێت كۆمه‌ڵێك كێشه‌ی تر له‌ ناوچه‌كه‌دا دروست ببێت، سه‌ركردایه‌تی سیاسی كورد ئه‌وه‌ی لێك جیانه‌كردۆته‌وه‌، پشگیریی كورد له‌ دژی داعش جیاوازه‌ له‌ پشگیریكردنی كورد بۆ گۆڕینی نه‌خشه‌ی سیاسیی ناوچه‌كه‌.
*كه‌واته‌ ده‌ته‌وێت بڵێیت ئێمه‌ له‌ڕووی سه‌ربازییه‌وه‌ پشگیریی ده‌كرێین، به‌ڵام له‌ رووی سیاسییه‌وه‌ پشگیریی ناكرێین؟
-ده‌زانم ئێمه‌ هیچ به‌ڵێنێكمان پێنه‌دراوه‌، له‌سه‌رده‌می شه‌ڕی دژی داعشیش كه‌ پاش داعش پشگیریی كورد بكرێت بۆ به‌ده‌ستهێنانی سه‌ربه‌خۆیی. 
دیپلوماسییه‌تی كورد له‌ ساڵانی رابردوودا زۆر كارابوو، په‌یوه‌ندیكردنی به‌لایه‌نه‌ نیوده‌وڵه‌تییه‌كانه‌وه‌ لانیكه‌م بۆ ئاماژه‌پێكردن بووه‌. ئه‌گه‌ر هه‌وڵدانی كورد بۆ مه‌سه‌له‌ی سه‌ربه‌خۆیی له‌گه‌ڵ ئه‌وه‌شدا بتوانێ هێنده‌ی ئه‌وه‌ی كه‌ پێویسته‌ پشتیوانییه‌كی گرنگ بۆ ئه‌م مه‌سه‌له‌یه‌ به‌ده‌ست بهێنێت.
*تا چه‌ند به‌رژه‌وه‌ندییه‌ ئابوورییه‌كان له‌گه‌ڵ به‌رژه‌وه‌ندیی هه‌ریه‌كه‌ له‌ وڵاتانی توركیا‌و روسیا یه‌ك ده‌گرێته‌وه‌، به‌و پێیه‌ی ئه‌و دوو وڵاته‌ كۆمپانیای زۆریان له‌بواری نه‌وت‌و له‌ ده‌ره‌وه‌ی بواری نه‌وتیشدا هه‌یه‌، كۆمپانیای زۆریان هه‌یه‌ به‌تایبه‌تی توركیا له‌ هه‌رێمی كوردستاندا، روسیاش به‌ دوو كۆمپانیای گه‌وره‌ی گازپڕۆم  ‌و روز نه‌فت له‌لایه‌ن هه‌رێمی كوردستانه‌وه‌ رێكه‌وتنیان له‌گه‌ڵ كراوه‌، واته‌ ئه‌و به‌رژه‌وه‌ندییه‌ ئابوورییانه‌ هۆكارن بۆ سه‌رخستنی پڕۆسه‌كه‌؟
-به‌رژه‌وه‌ندییه‌ ئابووریه‌كانی روسیا به‌ به‌راورد له‌گه‌ڵ توركیا ره‌نگه‌  نوێ بێت، تازه‌ په‌یدا بووه‌، به‌ڵام ئه‌وه‌ی توركیا به‌ دڵنیاییه‌وه‌ هیچ ده‌وڵه‌تێك هێنده‌ی توركیا سوود‌و قازانج له‌ فرۆشتنی نه‌وتی كوردستان ناكات، بۆچوونی زاڵ تائێستا ئه‌وه‌بووه‌ كه‌ توركیا ئه‌وه‌ له‌به‌رچاو ده‌گرێت كه‌ به‌شێكی زۆر گرنگی له‌به‌رژه‌وه‌ندییه‌كانی هه‌رێمی كوردستاندا هه‌یه‌، به‌شێكی گرنگی بازاڕی كوردستان پشت به‌پیشه‌سازیی‌و كه‌ره‌سته‌‌و به‌روبوومی توركیا ده‌به‌ستێت، هه‌روه‌ها تائه‌ندازه‌یه‌ك په‌یوه‌ندییه‌كانمان له‌گه‌ڵ توركیا وه‌ك حكومه‌تی هه‌رێمی كوردستان گه‌شتۆته‌ ئاستێكی ستراتیژیی، له‌گه‌ڵ ئه‌وه‌شدا ئه‌و په‌یوه‌ندییه‌ نه‌گه‌یشته‌ ئه‌و راده‌ییه‌ی كه‌ ببێته‌ ماییه‌ی هاندانی حكومه‌تی توركیا بۆ پشگیریی كردنی ریفڕاندۆم ‌و سه‌ربه‌خۆیی.
*باس له‌ په‌یوه‌ندییه‌كانی هه‌رێمی كوردستان به‌ وڵاتانی دراوسێ له‌گه‌ڵ وڵاتانی ده‌ره‌وه‌ ده‌كرێت كه‌ ئێمه‌ پێمان وابوو ئه‌مانه‌ پشگیریی باشووری كوردستان ده‌كه‌ن، بۆئه‌وه‌ی بڕیاری مافی چاره‌نووسی خۆیان بده‌ن. خاڵێكی تریش كه‌ گرنگه‌ هه‌ڵوێسته‌ی له‌سه‌ر بكه‌ین، بابه‌ته‌ ناوخۆییه‌كانی كوردستانه‌، ئه‌مانه‌ تا چه‌ند له‌بارو گونجاون بۆئه‌وه‌ی ئه‌و پرسه‌ نیشتمانییه‌ سه‌ربخرێت؟
-مادام پرسه‌كه‌ نه‌ته‌وه‌یی‌و نیشتمانی‌و فراوانه‌‌و ره‌هه‌ندێكی گشتیی هه‌یه‌، به‌دڵنیاییه‌وه‌ ده‌بێت به‌وجۆره‌ مامه‌ڵه‌ی له‌گه‌ڵدا بكرێت، نابێت هیچ لایه‌نێك له‌ پرۆسه‌كه‌ دوور بخرێته‌وه‌، نابێت كارێكی وابكرێت پرۆسه‌كه‌ له‌سه‌ر ده‌ستی لایه‌نێك یان دوو و سێ لایه‌ن بێت، به‌ دڵنیاییه‌وه‌ ده‌بێت هه‌موو لایه‌نه‌كان به‌شداریی تێدا بكه‌ن، هه‌ركاتێك هه‌موو لایه‌نه‌كان به‌شداربوون، به‌دڵنیاییه‌وه‌ یه‌كڕیزیی نیشتمانی دێته‌ ئاراوه‌‌و هێزێك به‌ پرۆسه‌كه‌ ده‌دات، له‌ جیاتی ئه‌وه‌ی لایه‌ن هه‌بێت له‌ ده‌ره‌وه‌ی پرۆسه‌كه‌ دژی پرۆسه‌كه‌، یاخود بێلایه‌نی له‌م باره‌یه‌وه‌ نیشان بدات، كاتێك له‌ناو پڕۆسه‌كه‌دا ئه‌وه‌ هه‌بێت، به‌ دڵنیاییه‌وه‌ ئێمه‌ ده‌توانین بڵێین هه‌موو گه‌لی كوردستان له‌گه‌ڵ ریفڕاندۆمدایه‌، به‌ڵام كاتێك هێزی دووه‌م‌و پێنجه‌م هه‌ڵوێستێكی دیاركراویان به‌رامبه‌ر مه‌سه‌له‌كه‌ هه‌یه‌و هه‌ندێكیان مه‌رجه‌كانیشیان نه‌هاتۆته‌دی، ره‌نگه‌ هه‌وڵیش هه‌بێت بۆ دوورخستنه‌وه‌یان، به‌دڵنیاییه‌وه‌ ئه‌مه‌ په‌یامێكی خراپ ده‌بێت بۆ ده‌ره‌وه‌ی هه‌رێم كه‌ گه‌لی كوردستان كۆده‌نگ نییه‌ له‌سه‌ر ئه‌م مه‌سه‌له‌یه‌. هه‌ر بۆ نموونه‌ مه‌سه‌له‌ی كاراكردنه‌وه‌ی په‌رله‌مان، ئێمه‌ ده‌مانه‌وێت كاراكردنه‌وه‌ی په‌رله‌مان به‌ ئاماده‌بوونی هه‌موو ئه‌ندام په‌رله‌مانه‌كانی خۆمان ده‌ست پێبكرێت‌و ئه‌م پڕۆسه‌یه‌ به‌ڕێوه‌بچێت، ئه‌گه‌ر به‌و شێوه‌یه‌ بڕوات، دوو لایه‌ن له‌ مه‌سه‌له‌ی كاراكردنه‌وه‌ی په‌رله‌ماندا به‌شداریی نه‌كه‌ن، ئه‌وه‌ به‌و مانایه‌ دێت 30 ئه‌ندام په‌رله‌مان به‌شداریی له‌ پرۆسه‌كه‌دا ناكه‌ن، ئه‌م رێژه‌یه‌ له‌ 27%ی په‌رله‌مان ده‌كات، به‌ ومانایه‌ دێت له‌ 27% ئه‌ندام په‌رله‌مانی كوردستان به‌شدارنییه‌ له‌ ده‌ركردنی یاسایه‌كدا بۆ ریفڕاندۆم، له‌ هه‌مان كاتدا فراوانی بكه‌ین، ده‌توانیین به‌وجۆره‌ش باسی بكه‌ین ئه‌و 30 په‌رله‌مانتاره‌ نوێنه‌رایه‌تی نزیكه‌ یه‌ك ملێۆن‌و 350 هه‌زار  كه‌س ده‌كه‌ن له‌ هه‌رێمی كوردستاندا. ئێمه‌ خۆمان 5 ملیۆن كه‌سین له‌به‌رئه‌وه‌ رێژه‌كه‌ زۆر گه‌وره‌یه‌، ژماره‌كه‌ش زۆر گه‌وره‌یه‌، لایه‌نه‌كان ئه‌وه‌ له‌به‌رچاو ده‌گرن، ره‌نگه‌ ئه‌وه‌ ببێته‌ مایه‌ی ئه‌وه‌ی كه‌ به‌چاوێكی تره‌وه‌ سه‌یری پرۆسه‌كه‌ بكرێت، كه‌ ئه‌مه‌ نه‌بۆته‌ مایه‌ی كۆده‌نگی. له‌ راستیشدا به‌بێ به‌شداریی هه‌موو لایه‌نه‌كان، كۆ ده‌نگی له‌ مه‌سه‌له‌ی ریفڕاندۆمدا نایه‌ته‌ دی.
*با ئێمه‌ باس له‌ باشووری كوردستان بكه‌ین، باسی هه‌رسێ پارچه‌كه‌ی تری كوردستان ناكه‌ین، باس له‌ باشووری كوردستان ده‌كه‌ین، ده‌ڵیین باشووری كوردستان له‌ژێر سێبه‌ری دوو ره‌وتی مه‌زهه‌بیی دوو وڵاتی دراوسێدایه‌، ره‌نگه‌ ئه‌وه‌ش یه‌كێك بێت له‌ هه‌وێنی ناكۆكییه‌كانی نیوان حزب‌و لایه‌نه‌ سیاسییه‌كانی هه‌رێمی كوردستان، ره‌نگه‌ به‌شێك له‌ هێز‌و لایه‌نه‌ سیاسییه‌كان به‌جۆرێك له‌ جۆره‌كان نزیكایه‌تیشیان له‌لایه‌نێك هه‌بێت‌و به‌شێكی تریشیان له‌ لایه‌نێكی تر‌و ره‌نگه‌ ناكۆكی مه‌زهه‌بیشیان هه‌بێت، جگه‌ له‌ كێشه‌ ئابوورییه‌كان؟
-مه‌به‌ستت چییه‌؟
*مه‌به‌ست ئه‌وه‌ی هه‌ولێر له‌ توركیاوه‌ نزیكه‌‌و ده‌ڤه‌ری ئه‌م لاش له‌ ئیرانه‌وه‌ نزیكه‌ ناكۆكییه‌كانی ئه‌م دوو وڵاته‌ هۆكاربن حزب‌و لایه‌نه‌ سیاسییه‌كان به‌ یه‌ك نه‌گه‌ن؟
-نا من پێم وانییه‌ ئه‌مه‌ كاریگه‌ریی زۆر گه‌وره‌ی هه‌بێت، ئه‌گه‌ر ئیراده‌یه‌كی به‌هێز هه‌بێت له‌ناو هه‌رێمی كوردستاندا بۆ دابینكردنی یه‌كڕیزیی نیشتمانی‌و ته‌بایی‌و كۆده‌نگی، نه‌ ئیران‌و نه‌ توركیا ده‌توانن كاریگه‌ریی له‌سه‌ر پڕۆسه‌كه‌ به‌جێ بهێڵن، به‌ڵام كاتێك كێشه‌كانی ناوخۆی هه‌رێم بوونه‌ته‌ لێكترازان، بێگومان ناتوانین گله‌یی له‌ ئیران یان توركیا بكه‌ین، ئه‌و دابه‌شبوونه‌ش به‌و جۆره‌ نییه‌ كه‌ لایه‌نێك سه‌ربه‌ توركیا بێت‌و لایه‌نێكیش سه‌ربه‌ ئێران بێت، چه‌ند لایه‌نێك هه‌یه‌ له‌ هه‌رێمی كوردستاندا، ئاستی په‌یوه‌ندییه‌كانی په‌ره‌پێداوه‌‌و گه‌یاندوێتییه‌ ئاستێكی ستراتیژیی، به‌ڵام به‌دڵنیاییه‌وه‌ ئه‌وه‌ی په‌یوه‌ندیی به‌ یه‌كێتییه‌وه‌ هه‌یه‌، ئێمه‌ په‌یوه‌ندیی دۆستانه‌مان له‌گه‌ڵ ئیران هه‌یه‌، هه‌وڵی ئه‌وه‌ ده‌ده‌ین ئه‌و په‌یوه‌ندییه‌ به‌رده‌وام بێت‌و په‌ره‌شی پێ بده‌ین، به‌ڵام نه‌گاته‌ ئه‌و راده‌ییه‌ی ئێمه‌ فه‌رمانمان له‌ تارانه‌وه‌ بۆ بێت بۆ به‌رژه‌وه‌ندیی ئه‌وان هه‌ڵسوكه‌وت بكه‌ین.
*كه‌واته‌ ئه‌وه‌ وه‌ڵامه‌كه‌ته‌، وڵاتانی دراوسێ كاریگه‌رییان نییه‌ له‌ باشووری كوردستان له‌سه‌ر پرسه‌ سیاسیی‌و ئابوورییه‌كان؟
-به‌ڵگه‌ی قسه‌كه‌م ئه‌وه‌یه‌، ئێران‌و توركیا له‌سه‌ر مه‌سه‌له‌ی ریفڕاندۆم یه‌ك بۆچوونیان هه‌یه‌، ئه‌وه‌ نییه‌ یه‌كێكیان پشتگیریی بكات‌و ئه‌وی تریان دژی بێت.
*لای هه‌ر نه‌ته‌وه‌یه‌ك ئه‌گه‌ر پرسێكی وا نیشتمانی بخرێته‌ به‌ر باس، وه‌ك مه‌سه‌له‌ی ریفراندۆم، ریفراندۆمیش خه‌ڵك چاوه‌ڕوان بكات بۆ سه‌ربه‌خۆیی بێت، ره‌نگه‌ تا گه‌یشتن به‌ رۆژی ئه‌نجامدانی ریفراندۆم، فیستیڤاڵ ‌و ئاهه‌نگی بۆ ساز بكه‌ن، به‌ڵام ئه‌وه‌ی ده‌بینرێت له‌ هه‌رێمی كوردستان به‌شێكی خه‌ڵك‌و لایه‌نه‌كان زۆر نیگه‌رانن؟
-به‌شێكی ئه‌و نیگه‌رانییه‌ په‌یوه‌ندیی به‌ باری گوزه‌رانی خه‌ڵكه‌وه‌ هه‌یه‌، نزیكه‌ی دوو ساڵ زیاتره‌ خه‌ڵك نه‌یتوانیووه‌ ژیانی ئابووریی خۆی به‌ڕێوه‌به‌رێت، بێكاریی هه‌یه‌، بێ مووچه‌یی هه‌یه‌، كاریگه‌ریی هه‌یه‌ له‌سه‌ر هه‌موو مه‌سه‌له‌كان، پێموایه‌ ئه‌وه‌ به‌شێكه‌ له‌و مه‌سه‌لانه‌ی كه‌ كاریگه‌ریی له‌سه‌ر حه‌ماسی خه‌ڵك هه‌یه‌، هه‌رچه‌ند هه‌وڵی ئه‌وه‌ ده‌درێت ئه‌وه‌ كاریگه‌ریی نه‌بێت، به‌ڵام به‌بێ كاریگه‌ریی تێناپه‌ڕێت، خه‌ڵك ترسی ئه‌وه‌ی هه‌یه‌ ئه‌م مه‌سه‌له‌یه‌ هه‌ندێك لێكه‌وته‌ی خراپی لێبكه‌وێته‌وه‌، ئه‌مه‌ هه‌مووی له‌لایه‌ك، له‌لایه‌كی تریشه‌وه‌ روون نییه‌ سه‌باره‌ت به‌و مه‌سه‌له‌یه‌، هه‌ر بۆ نموونه‌ له‌لایه‌ن یه‌ك حزبه‌وه‌ سه‌رۆكه‌كه‌ی باس له‌وه‌ ده‌كات ئه‌م ریفراندۆمه‌ بۆ سه‌ربه‌خۆییه‌، له‌لایه‌ن ئه‌ندامێكی سه‌ركردایه‌تی ئه‌و حزبه‌وه‌ باس له‌وه‌ ده‌كرێت كه‌ ریفراندۆم ناوچه‌كانی ده‌ره‌وه‌ی هه‌رێم ده‌گرێته‌وه‌، سه‌رۆكی حزبه‌كه‌ به‌وجۆره‌ باس له‌وه‌ ده‌كات، ئه‌ندامی سه‌ركردایه‌تی حزبه‌كه‌ ده‌ڵێت مه‌رج نییه‌ به‌و جۆره‌ بێت، واته‌ كێشه‌یه‌ك هه‌یه‌، له‌مباره‌یه‌وه‌ له‌لایه‌ك له‌ناو یه‌ك حزیدا باس له‌وه‌ ده‌كرێت كه‌ ریفراندۆم مه‌رج نییه‌ بۆ سه‌ربه‌خۆیی بێت، كاریگه‌ریی نابێت له‌سه‌ر یه‌ك پارچه‌یی خاكی عیراق، له‌هه‌مان كاتیشدا باس له‌وه‌ ده‌كرێت پرسیاری كاغه‌زی ریفراندۆمه‌كه‌ش ئه‌وه‌یه‌ كه‌ ئایا تۆ له‌گه‌ڵ جیابوونه‌وه‌ی یاخود له‌گه‌ڵ مانه‌وه‌ی له‌گه‌ڵ عیراقدا، ئه‌وه‌ به‌و مانایه‌ دێت، ریفراندم كه‌ له‌سه‌ر كاغه‌ز بۆ سه‌ربه‌خۆییه‌، به‌ڵام له‌ لێدوانه‌كاندا جۆرێك له‌ پاشه‌كشێی پێوه‌یه‌، بۆ نموونه‌ ئه‌و بڕیاره‌ی له‌ 7/6/2017 ده‌رچووه‌، ناوچه‌كانی ده‌ره‌وه‌ی لێ جیاناكاته‌وه‌، هه‌مووی یه‌ك حیسابه‌، به‌ڵام لێدوانه‌كانی پاشتر باس له‌وه‌ ده‌كات، كه‌ ره‌نگه‌ پێویستمان به‌ دوو ریفراندۆم بێت، یه‌كێكیان له‌پێشدا هه‌رێمی كوردستان ‌و پاشان ریفراندۆمێكی تر بۆ ده‌ره‌وه‌ی هه‌رێمی كوردستان، ئه‌مه‌ كێشه‌یه‌كی دروست كردووه‌، شێواوییه‌كی له‌بیركردنه‌وه‌ی خه‌ڵكدا دروستكردووه‌، كه‌ تائێستا لێی تێناگه‌ن، كه‌ ئاخۆ ئێمه‌ مه‌به‌ستمان له‌م ریفراندۆمه‌ چییه‌؟ هه‌ندێك لێدوانی تر هه‌یه‌ باس له‌وه‌ ده‌كه‌ن كه‌ ئه‌م ریفراندۆمه‌ له‌ بنه‌ڕه‌تدا بۆ جیابوونه‌وه‌ نییه‌. به‌ڵكو بۆ ئه‌وه‌یه‌ كه‌ كارتێكی گوشار دانان هه‌بێت، كاتێك له‌گه‌ڵ به‌غدا داده‌نیشین، ده‌توانین سوودی لێ وه‌ربگرین.
*زۆر جاریش هه‌ندێك له‌به‌رپرسان باس له‌وه‌ ده‌كه‌ن ریفراندۆم كارتێكی گوشاره‌‌و بۆ جیابوونه‌وه‌ نییه‌ له‌ عیراق، به‌ڵكو ئه‌وه‌ بۆ زانینی بۆچوونی ره‌وشی هاووڵاتیانی كوردستانه‌، تا بزانن چیان ده‌وێت، هه‌ندێك جار باس له‌وه‌ ده‌كرێت ئه‌م لێدوانانه‌ به‌جۆرێك ده‌ه‌درێن بۆئه‌وه‌ی لایه‌نی به‌رامبه‌ر به‌جۆرێك له‌جۆره‌كان په‌رچه‌ كرداریان نه‌بێت یان ئه‌وه‌ی هه‌یانه‌ كه‌می بكه‌نه‌وه‌؟
- ئه‌مه‌ ئه‌گه‌ر واش بێت، به‌دڵنیاییه‌وه‌ ره‌نگه‌ مه‌به‌ست له‌و لێدوانانه‌ ئه‌وه‌ بێت كه‌ ئاستی دژایه‌تیكردنی خاو بكه‌نه‌وه‌، به‌ڵام له‌هه‌مان كاتدا كاریگه‌ریی زۆری له‌ناوخۆی هه‌رێمی كوردستاندا به‌جێ هێشتووه‌.
*باسمان له‌ لایه‌نه‌ ئابوورییه‌كه‌ كرد، خه‌ڵكی كوردستان چۆن ژیان به‌سه‌ر ده‌به‌ن، خاڵێكی زۆر گرنگ بێت قسه‌ی له‌باره‌وه‌ بكه‌م كه‌ له‌ تۆڕه‌ كۆمه‌ڵایه‌تییه‌كان‌و میدیاكانه‌وه‌ هاووڵاتیان قسه‌ ده‌كه‌ن، به‌شێكی زۆری هاووڵاتیان متمانه‌یان به‌سه‌ركردایه‌تی سیاسیی كورد نه‌ماوه‌، هه‌میشه‌ ترسیان له‌وه‌ هه‌یه‌ له‌ راگه‌یاندنی هه‌ر مژده‌یه‌كدا كه‌ له‌ میدیاكانه‌وه‌ ده‌یده‌ن به‌ گوێی هاووڵاتیاندا، له‌ پشت ئه‌و مژدانه‌وه‌ كاره‌سات‌و ماڵوێرانیه‌كی تر هه‌بێت، وه‌ك چۆن باس له‌ ئابووریی سه‌ربه‌خۆ‌و فرۆشتنی نه‌وت كرا، كوردستان به‌شدار ده‌بێت، دواتر بینیمان خه‌ڵكی كوردستان چی به‌سه‌ر هات؟
-خۆی له‌ده‌ستدانی ئه‌و متمانه‌یه‌ كتوپڕ نه‌بوو، به‌ڵكو ورده‌ ورده‌ هاته‌ ئاراوه‌، هۆكه‌شی په‌یوه‌ندیی به‌وه‌وه‌ هه‌یه‌ خه‌ڵك سیاسه‌ته‌ چه‌وته‌كانی بینی، ئه‌نجامه‌ خراپه‌كانی بینی، ئه‌و ئه‌نجامه‌ خراپانه‌ كاریگه‌ریی زۆر خراپیان له‌سه‌ر ناوخۆی هه‌رێم به‌جێ هێشت، ئێمه‌ له‌ خۆشگوزه‌رانییه‌كی زۆره‌وه‌ هاتووینه‌ته‌ سه‌ر ئه‌وه‌ی ئاستی خۆشگوزه‌رانیی خه‌ریكه‌ بۆ له‌ 50% كه‌متر داده‌به‌زێ، ئه‌مه‌ به‌دڵنیاییه‌وه‌ متمانه‌ی كه‌مكردۆته‌وه‌، ئێمه‌ پێویستمان به‌وه‌یه‌ متمانه‌ بگێڕینه‌وه‌ بۆ سه‌ركردایه‌تیی سیاسی كورد، به‌ڵام ئه‌وه‌ی كه‌ ده‌توانێ ئه‌و متمانه‌یه‌ بگێڕێته‌وه‌، خودی سه‌ركردایه‌تیی كورده‌، ئه‌ویش به‌ به‌رنامه‌یه‌كی سه‌ركه‌وتوو، كه‌ ده‌توانێ جێبه‌جێی بكات‌و متمانه‌ی خه‌ڵكی پێ به‌ده‌ست بهێنێت‌و بیبێته‌ مایه‌ی چاككردنی گوزه‌رانی خه‌ڵك ، ته‌نها متمانه‌ به‌ دروشم ناگه‌ڕێته‌وه‌ به‌ڵكو به‌ خودی متمانه‌ ده‌گه‌ڕێته‌وه‌.
*باس له‌ سه‌ركردایه‌تی سیاسی كورد ده‌كه‌یت ئه‌مڕۆش یه‌كێتی به‌شێكه‌ له‌سه‌ركردایه‌تیی سیاسی كورد، ئه‌وه‌ی كه‌ له‌ ئه‌ستۆی یه‌كێتییه‌ چییه‌؟
-له‌ڕاستیدا ئه‌مه‌ كێشه‌یه‌كی گه‌وره‌ دروست ده‌كات، چونكه‌ له‌ناو سه‌ركردایه‌تیی سیاسیی كورددا بۆچوونی جیاواز هه‌یه‌، له‌هه‌موو حاڵه‌تێكدا یه‌كێتی وه‌ك حزب مامه‌ڵه‌ی له‌گه‌ڵ ده‌كه‌م نه‌ك وه‌ك حزبێك كه‌ ده‌سه‌ڵاتی به‌ده‌سته‌وه‌ بێت، چونكه‌ ئێمه‌ حكومه‌ته‌كه‌مان هی هه‌موو لایه‌نه‌كانه‌، له‌هه‌مان كاتیشدا جیاوازییه‌كی زۆر له‌بۆچوونی حزبه‌كان‌و حكومه‌تدا هه‌یه‌، ته‌نانه‌ت ئه‌و لایه‌نانه‌ی به‌شدارن له‌حكومه‌تدا بۆچوونیان هه‌یه‌ له‌گه‌ڵ بۆچوونی حكومه‌تدا ناگونجێ، سیاسه‌ته‌كانی حكومه‌ت به‌جۆرێك به‌ڕێوه‌ چووه‌، پرس به‌ حزبه‌كان نه‌كراوه‌. 
ته‌نانه‌ت پرس به‌ نوێنه‌رانی حزبه‌كان له‌و حكومه‌ته‌ نه‌كراوه‌، له‌به‌رئه‌وه‌ ئه‌وه‌نده‌ی حكومه‌ت خۆی به‌رپرسه‌ له‌و كه‌موكوڕییانه‌ی كه‌ هه‌یه‌، حزبه‌كان به‌وجۆره‌ به‌رپرس نین، بۆیه‌ با ئه‌و مه‌سه‌له‌یه‌ش له‌به‌رچاو بگیرێت.
*له‌ حكومه‌تی هه‌رێمی كوردستاندا جێگری سه‌رۆكی حكومه‌ت له‌ پشكی یه‌كێتی نیشتمانی كوردستانه‌؟
-ئه‌مه‌ تۆ باسی ئه‌م كابینه‌یه‌ ده‌كه‌یت، به‌شێك له‌و كێشانه‌ی هاتۆته‌ ئاراوه‌، پێش دروستبوونی ئه‌م كابینه‌یه‌یه‌، بۆنموونه‌ ده‌توانین به‌و جۆره‌ باسی بكه‌ین رێككه‌وتنێكی 50 ساڵه‌كه‌ی حكومه‌تی هه‌رێم‌و توركیا تائێستا ده‌قی رێككه‌وتنه‌كه‌ لای یه‌ك حزب هه‌یه‌، لایه‌نه‌كانی تریش به‌هیچ شێوه‌یه‌ك نه‌یاندیووه‌، ئه‌مه‌ له‌كاتێكدا بوو كه‌ كابینه‌ی نوێ پێكنه‌هاتبوو، تازه‌ ده‌ست به‌كار ده‌بوو، حكومه‌تێكی كاربه‌ڕێكه‌ربوو، له‌ رووی یاساییه‌وه‌ هیچ مافێكی ئه‌وه‌ی نه‌بوو رێكه‌وتن واژو بكات، به‌ڵام له‌گه‌ڵ ئه‌وه‌شدا واژوكراو بوو به‌ ماڵ به‌سه‌ر هه‌رێمی كوردستان ‌و ئه‌م حكومه‌ته‌ی ئێستاوه‌، له‌به‌رئه‌وه‌ یه‌كێتی به‌رپرس نییه‌ له‌و رێككه‌وتنه‌ 50 ساڵییه‌ی كه‌ كراوه‌.
ده‌بێت ئه‌وه‌شمان له‌به‌رچاو بێت كه‌ یه‌كێتی دوایین لایه‌ن بوو كه‌ به‌شداریی له‌ حكومه‌تدا كردووه‌‌و ژماره‌یه‌كی كه‌م وه‌زیریشی وه‌رگرت.
*لایه‌نێك له‌ هه‌رێمی كوردستان په‌یوه‌ندیی له‌گه‌ڵ به‌غدا دروستده‌كات و له‌گه‌ڵ به‌غدا ده‌شی بچڕێنێت، په‌یوه‌ندییه‌كانی ده‌ره‌وه‌ هه‌مووی له‌ده‌ست خۆێدایه‌، په‌رله‌مانی كوردستانی په‌ك خستووه‌، نه‌وت له‌به‌غدا ده‌بڕێت، له‌گه‌ڵ به‌غدا تێكیده‌دات، دواتر شاند ده‌نێرێته‌وه‌، رێكه‌وتنی 50 ساڵه‌ ده‌كات، ئه‌مه‌ لایه‌نێك له‌ هه‌رێمی كوردستان ده‌یكات، ئێوه‌ وه‌ك یه‌كێتی به‌و مێژووه‌ دوورو درێژه‌ی خه‌باتی شاخ و شار كه‌ هه‌تانبووه‌، به‌و قورساییه‌ سیاسی و سه‌ربازیی و ئابوورییه‌‌و ئه‌و ناوچه‌ جوگرافییه‌ی له‌به‌ر ده‌ستاندا بووه‌ چ رۆڵێكتان هه‌بووه‌ یاخود چ به‌شدارییه‌كتان هه‌بووه‌ له‌ بڕیاره‌كاندا؟
-ناتوانین یه‌كێتی له‌ لێپرسراوێتی ئه‌م مه‌سه‌له‌یه‌ دوور بخه‌ینه‌وه‌، به‌ڵام ئه‌وه‌شمان له‌به‌رچاوبێت، یه‌كێتی دوای هه‌ڵبژاردنی 2013  جیاوازه‌ تا پێش هه‌ڵبژاردنی 2013.
چونكه‌ ئه‌و ئه‌نجامه‌ی له‌و هه‌ڵبژاردنه‌دا هاته‌ ئاراوه‌، ئه‌نجامێكی دڵخۆشكه‌ر نه‌بوو، رۆڵی یه‌كێتی تا ئه‌ندازه‌یه‌ك پاشه‌كشه‌ی كرد له‌ دروستكردنی بڕیاردا له‌ هه‌رێمی كوردستان‌و  به‌هۆی ئه‌وه‌شه‌وه‌ له‌ نه‌خشه‌ رێگه‌ی یه‌كێتی جه‌ختمانكردووه‌ له‌سه‌ر شه‌راكه‌تی راسته‌قینه‌و له‌سه‌ر مه‌سه‌له‌ی هاوسه‌نگیی له‌سه‌ر دابه‌شكردنی پوسته‌كاندا. ئه‌گه‌ر 50% لێپرسراوێتییه‌كان له‌ ئه‌ستۆی ئێمه‌دابێت ، به‌دڵنیایه‌وه‌ له‌ 50%ی ره‌خنه‌كانیش ئێمه‌ بگرێته‌وه‌ ، ئێمه‌ ته‌نها  چه‌ند وه‌زاره‌تێكی كه‌ممان هه‌بووه‌، ئێستاش هه‌ر هه‌یه‌و كه‌مه‌، به‌دڵنیاییه‌وه‌ هێنده‌ی 18 كورسییه‌كه‌ی خۆمان لێپرسراوێتی ده‌مانگریته‌وه‌.
*به‌ڵام هه‌ندێك كه‌س پێیانوایه‌ له‌ باشووری كوردستان‌و له‌م ناوچه‌یه‌دا په‌رله‌مان پێوه‌ر نییه‌ بۆ سه‌نگ‌و قورسایی هێز، ئه‌وه‌ی به‌رامبه‌ر بزووتنه‌وه‌ی گۆران كرا به‌24 كورسی، به‌ڵام هیچ هێزێك نه‌یده‌توانی به‌رامبه‌ر یه‌كێتی بیكات كه‌ 18 كورسی هه‌یه‌، ره‌نگه‌ ئه‌گه‌ر ئه‌وه‌ی بكردایه‌، ده‌بوو به‌ دوو ئیداره‌یی‌و سه‌ریشی بكێشایه‌ بۆ شه‌ڕی ناوخۆ، باس له‌وه‌ ده‌كرێت ئه‌و هێزانه‌ی له‌ هه‌رێمی كوردستانن جگه‌ له‌ خه‌باتی په‌رله‌مانی، هێزی سه‌ربازیی ‌و ئابووریی‌و پێگه‌ی جوگرافیان نییه‌، ئه‌مه‌ش پێوه‌ره‌ بۆ به‌هێزیی ئه‌و حزب‌و لایه‌نانه‌ی له‌ هه‌رێمی كوردستاندا هه‌ن، هه‌موو شته‌كان له‌به‌رچاوی خه‌ڵكدا روونه‌؟
-ئه‌مه‌ ره‌ها نییه‌، ناتوانیین به‌ ره‌هایی سه‌یری بكه‌ین، بۆ نموونه‌ كاتێك ئه‌م كابینه‌یه‌ پێكهات، پێوه‌ری سه‌ره‌كی بریتی بوو له‌ ژماره‌ی ئه‌ندام په‌رله‌مان، به‌پێی ئه‌وه‌ش وه‌زاره‌ته‌كان دابه‌شكران به‌سه‌ر لایه‌نه‌كاندا، ته‌نانه‌ت شیوه‌ی دابه‌شكردنی پۆسته‌ گرنگه‌كانیش ژماره‌ی په‌رله‌مانتارانی له‌ ناو په‌رله‌ماندا ده‌ستنیشان كرد، به‌ڵام پاش سه‌رهه‌ڵدانی شه‌ڕی داعش، یه‌كێتی توانیی تا ئه‌ندازه‌یه‌ك قه‌ره‌بووی شكستی خۆی بكاته‌وه‌و توانی ئه‌و رۆڵه‌ قه‌ره‌بوو بكاته‌وه‌‌و به‌شدارییه‌كی كاریگه‌ر بكات له‌ پاراستنی كوردستاندا له‌به‌رامبه‌ر شه‌ڕی داعشدا، به‌دڵنیاییه‌وه‌ ئه‌گه‌ر شه‌ڕی داعش نه‌بوایه‌، پێموایه‌ ره‌نگه‌ به‌شێك له‌و مه‌سه‌لانه‌ هه‌ر وه‌ك خۆی بمایه‌ته‌وه‌‌و یه‌كێتی ئه‌و رۆڵه‌ كاریگه‌ره‌ی نه‌ده‌بوو، شه‌ڕی داعش سه‌لماندی كه‌ یه‌كێتی ده‌توانێت به‌هێزه‌وه‌ بگه‌ڕێته‌وه‌‌و رۆڵێكی كاریگه‌رتر بگێڕێت، به‌ڵام كه‌ باس له‌ دۆخی شه‌ڕ ده‌كه‌ین، ده‌بێت ئه‌وه‌شمان له‌به‌رچاوبێت له‌ پێكهێنانی حكومه‌تدا ئێمه‌ زۆر زیانمان كرد، له‌ دۆخی شه‌ڕدا هێزی پێشمه‌رگه‌ی كوردستان توانیی تا ئه‌ندازه‌یه‌ك لاسه‌نگییه‌كه‌ی سه‌رده‌می پێكهێنانی حكومه‌ت راست بكاته‌وه‌.
*به‌شێكی زۆر له‌ چاودێران پێانوایه‌ ده‌بێت یه‌كێتیی له‌سه‌ر سه‌روه‌رییه‌كانی نه‌خه‌وێت، هه‌میشه‌ ره‌خنه‌ له‌خۆی بگرێت بۆئه‌وه‌ی كه‌موكوڕییه‌كان‌و ئه‌وه‌ی له‌ رابردوودا بووه‌و تۆ ئێستا به‌شكست ناوت برد له‌ هه‌ڵبژاردنه‌كانی 2013 ،جارێكی تر دووباره‌ نه‌بێته‌وه‌، تا چه‌ند پێویسته‌ ره‌خنه‌ی بنیاتنه‌ر له‌ یه‌كێتیی بگیرێت‌و به‌رده‌وام یه‌كێتییه‌كان له‌ ناوخۆیاندا ره‌خنه‌ له‌ خۆیان بگرن، بۆ ئه‌وه‌ی یه‌كێتی به‌ره‌و باشتر بڕوات؟
-به‌دڵنیاییه‌وه‌ سه‌روه‌ریی بۆ هه‌موو حزبێك شتێكی گرنگه‌، هه‌موو حزبێكیش مافی ئه‌وه‌ی هه‌یه‌ شانازیی به‌ سه‌روه‌رییه‌كانی خۆیه‌وه‌ بكات، به‌ڵام سه‌روه‌ریی به‌ته‌نها هیچ بایه‌خێكی نییه‌‌و ده‌بێت سه‌روه‌ریی به‌كار‌و كرده‌وه‌ی تر پشتگیریی بكرێت، بۆ خه‌ڵك روون بێته‌وه‌ ئه‌و حزبه‌ی ئه‌و هه‌موو سه‌روه‌رییه‌ی هه‌یه‌، شایسته‌ی ئه‌وه‌یه‌ كه‌ پشتگیریی لێبكرێت، شتی گرنكتر پێشكه‌ش بكات. 
*دوو بابه‌تی زۆر گرنگ هه‌یه‌، ده‌مه‌وێت لێره‌دا قسه‌ی له‌سه‌ر بكه‌م، نێوانی یه‌كێتیی نیشتمانی كوردستان‌و بزووتنه‌وه‌ی گۆڕانه‌، ئایا ئه‌و رێكه‌وتنه‌ی هه‌ردوولا كه‌ به‌ ئاماده‌بوونی سه‌رۆك مام جه‌لال له‌نێوان ره‌حمه‌تی كاك نه‌وشیروان‌و كاك كۆسره‌تدا ئیمزاكراوه‌، بۆچی نه‌چۆته‌ بواری جێبه‌جێكردنه‌وه‌؟ ئایا گرفت‌و له‌مپه‌ره‌كان ئه‌وه‌نده‌ زۆرن؟
-كۆمه‌ڵێك گرفت هه‌بوو، به‌ڵام په‌یوه‌ندیی نێوان بزووتنه‌وه‌ی گۆڕان‌و یه‌كێتی تا پێش كۆبوونه‌وه‌ی ئه‌م دواییه‌ی ئه‌نجومه‌نی سه‌ركردایه‌تی، ده‌توانم بڵێم خراپ بوو، پاش ئه‌م كۆبوونه‌وه‌یه‌ كه‌ هه‌ندێك بڕیاری باش درا، پێموایه‌ په‌یوه‌ندییه‌كان هه‌نگاوی  باش ده‌نێین بۆ پێشه‌وه‌، هه‌نگاوه‌كان په‌یوه‌ندییان به‌ جێبه‌جێكردنی رێكه‌وتننامه‌كه‌وه‌ هه‌یه‌، ئه‌م رێكه‌وتنه‌ 13 مانگه‌ هیچی لێ جێبه‌جێ نه‌كراوه‌، به‌دڵنیاییه‌وه‌ ئه‌وه‌ شتێكه‌ له‌ یه‌كێتیی نیشتمانی ناوه‌شێته‌وه‌ رێكه‌وتنێك له‌به‌ر سه‌رۆك مام جه‌لال واژۆ بكات‌و جێگری یه‌كه‌می سكرتێری گشتی واژۆی بكات 13 مانگ هیچی لێ جێبه‌جێ نه‌كرێت، ئێمه‌ له‌ كۆبووه‌نه‌ی ئه‌نجومه‌نی سه‌ركردایه‌تی هه‌ر به‌و جۆره‌ باسمان كردووه‌، هه‌ر له‌مپه‌ر‌و به‌ر به‌ستێك هه‌بێت ده‌بێت لاببرێت ، كۆبووه‌نه‌كه‌ بۆ ئه‌وه‌بوو كه‌ ئێمه‌ ده‌ستبكه‌ین به‌ جێبه‌جێكردنی رێكه‌وتنه‌كه‌‌و سه‌ركردایه‌تی هاوبه‌ش كۆببێته‌وه‌‌و میكانیزمێكی گونجا‌و دابنێت بۆ جێبه‌جێكردنی ئه‌و به‌شانه‌ی پێویستیان به‌ جێبه‌جێكردنه‌ به‌پێی ریزبه‌ندییه‌كی باش.
*له‌چوارچێوه‌ی لێدوان بیهێنینه‌ ده‌ره‌وه‌، ئیراده‌یه‌كی به‌هێز هه‌یه‌ بۆ جێبه‌جێكردنی ئه‌و رێكه‌وتنه‌؟
-به‌ڵێ، من ده‌توانم پێت بڵێم پاش بڕیاری دوا كۆبوونه‌وه‌ی ئه‌نجومه‌نی سه‌ركردایه‌تی یه‌كێتی، ئیراده‌یه‌كی زۆر به‌هێز بۆ رێكه‌تنی نێوان هه‌ردوولا هه‌یه‌.
*خاڵێكی تر زۆر گرنگه‌ قسه‌ی له‌باره‌وه‌ بكه‌ین، نه‌خشه‌ رێگاكه‌ی یه‌كێتی نیشتمانی كوردستانه‌، زۆر بابه‌تی ژیانی سیاسی‌و ئابووریی‌و كۆمه‌ڵایه‌تی خه‌ڵكی كوردستانی خستۆته‌ به‌ر باس، تا چه‌ند زه‌مینه‌ له‌باره‌ بۆ جێبه‌جێكردنی خاڵه‌كانی نێو نه‌خشه‌ رێگاكه‌؟
-خۆی ئه‌م بابه‌ت یان ئه‌و نه‌خشه‌ رێگایه‌، حزبێكی ده‌وێت به‌ته‌نها حوكمڕانیی بكات، ئینجا ده‌توانێ جێبه‌جێی بكات، به‌ڵام ئێمه‌ پره‌نسیپه‌ گشتییه‌كانی بۆ چوونه‌كانی خۆمانمان به‌شێوه‌ی چاره‌سه‌ركردنی قه‌یرانه‌كان خستۆته‌ڕوو، ئه‌گه‌ر ئێمه‌ به‌ته‌نها حوكمی كوردستان بكه‌ین، ئه‌و نه‌خشه‌ رێگایه‌ ده‌بێته‌ به‌رنامه‌ی ئێمه‌‌و ده‌بێبته‌ نه‌خشه‌ی ئێمه‌ بۆ چاره‌سه‌ركردنی قه‌یرانه‌كان، به‌ڵام ئێمه‌ له‌به‌رئه‌وه‌ی ده‌زانین ئه‌م حكومه‌ته‌ حكومه‌تی یه‌ك حزب نییه‌‌و حكومه‌تی ئیئتلافییه‌، به‌ ته‌نها ناتوانین هیچی لێ جێبه‌جێ بكه‌ین.
*له‌قسه‌كانی پێشووتدا ئاماژه‌ت به‌وه‌ت كرد كه‌ له‌هه‌رێمی كوردستاندا حكومه‌ت حكومه‌تی هاوپه‌یمانییه‌، به‌ڵام ئه‌وه‌ی ده‌یبینین‌و ئه‌وه‌ی له‌هه‌رێمی كوردستان حاكمه‌ ته‌نها یه‌ك لایه‌نه‌؟
-نا ئێمه‌ به‌و جۆره‌ باسمان كردووه‌ كه‌ كۆمه‌ڵێك كێشه‌ له‌ هه‌رێمی كوردستاندا هه‌یه‌، پێویستی به‌چاره‌سه‌ره‌، چاره‌سه‌ره‌كانمان پێشنیازكردووه‌، ئه‌وه‌ بۆچوونه‌كانی ئێمه‌ ده‌رباره‌ی ئه‌م مه‌سه‌له‌یه‌ به‌و جۆره‌یه‌‌و هه‌روه‌ها بنه‌مایه‌كمان داناوه‌ بۆ په‌یوه‌ندییه‌كانی خۆمان له‌گه‌ڵ پارتی، له‌گه‌ڵ گۆڕان، له‌گه‌ڵ لایه‌نه‌كانی تر، هه‌موو نه‌خشه‌رێگاكه‌ پره‌نسیپی گشتییه‌، پێشنیازكردنی هه‌ندێك چاره‌سه‌ره‌ بۆ رێكخستنه‌وه‌ی په‌یوه‌ندییه‌كان، ناوه‌ڕۆكی نه‌خشه‌ رێگاكه‌ی ئێمه‌ به‌و جۆره‌یه‌، نه‌خشه‌ رێگاكه‌ بۆ لایه‌نه‌كانمان دانه‌ناوه‌، بۆ خۆمانمان داناوه‌ كه‌ له‌سه‌ری بڕۆین، به‌ڵام به‌دڵنییاییه‌وه‌ ئه‌گه‌ر بمانه‌وێت هه‌مووی جێبه‌جێ بكه‌ین، پێش هه‌موو شتێك ئێمه‌ به‌ته‌نها ناتوانین هه‌مووی جێبه‌جێی بكه‌ین، هاوكاریی لایه‌نه‌كانی تریشی ده‌وێت، به‌ڵام ئه‌گه‌ر بهاتایه‌ یه‌ك حزب حوكمی بكردایه‌، ئێمه‌ ده‌مانتوانی هه‌مووی جێبه‌جێ بكه‌ین، به‌ڵام ئێمه‌ ئێستا پێویستمان به‌هاوكاریی لایه‌نه‌كانی تره‌ تا بتوانین جێبه‌جێی بكه‌ین.
*دروستبوونی ئه‌و قه‌یرانانه‌ی له‌ هه‌رێمی كوردستاندایه‌ به‌ داخستنی په‌رله‌مانیشه‌وه‌، هه‌ندێك له‌ چاودێرانی سیاسی پێیانوایه‌ كه‌ یه‌كێتی زۆر بڕیاری گرنگ هه‌بوو ده‌یتوانی بیدات بۆ یه‌كلایی كردنه‌وه‌ی بارودۆخه‌كه‌‌و ره‌نگه‌ به‌شێك له‌و چاودێرانه‌ پێیانوابێت ئه‌گه‌ر یه‌كێتیی له‌گه‌ڵ پارتی ده‌یانتوانی هاوپه‌یمانێتییه‌ك دروست بكه‌ن، زیاتر لێك نزیك ببنه‌وه‌ بۆ تێپه‌ڕاندنی قه‌یرانه‌كان، یاخود به‌پێچه‌وانه‌وه‌ له‌گه‌ڵ بزووتنه‌وه‌ی گۆڕان بۆ كۆنتڕۆڵكردنی هه‌ندێك بارودۆخ، نه‌ده‌بوو رووبدات، هه‌ندێكی تریش پێیانوایه‌ یه‌كێتیی  نیشتمانی زۆر مه‌سئولانه‌ هه‌ڵوێستێكی مێژوویانه‌ی هه‌بووه‌ به‌ ئارسته‌یه‌ك وه‌ستاوه‌ لایه‌نگیریی هیچ لایه‌ك نه‌كات، به‌جۆرێك له‌جۆره‌كان ده‌مانه‌وێت بزانین یه‌كێتی له‌سه‌روبه‌ندی ئه‌و قه‌یرانانه‌دا چۆن سیاسه‌تی كردووه‌، سیاسه‌ته‌كه‌ی به‌ڕاست ده‌زانی؟
-ئێمه‌ ئه‌گه‌ر پێداچوونه‌وه‌یه‌ك به‌ سیاسه‌ته‌كانی خۆماندا بكه‌ین، بڵێین یه‌كێتی به‌شێك له‌ هه‌له‌كانیشی له‌ده‌ست داوه‌، ده‌بوایه‌ سیاسه‌تێكی روونتری سه‌باره‌ت به‌هه‌ندێك مه‌سه‌له‌ هه‌بوایه‌.
*ئه‌وه‌ی كه‌ له‌ده‌ستیداوه‌ چییه‌؟
-بۆ نموونه‌ یه‌كێك له‌وانه‌ په‌كخستنی په‌رله‌مانه‌ كه‌ ده‌كرا هه‌ر له‌سه‌ره‌تاوه‌ هه‌ڵوێستێكی روونتری هه‌بوایه‌‌و گوشاری دروست بكردایه‌‌و بۆچوونی فه‌رمیی خۆی روونتر پیشان بدایه‌.
*به‌ڵام به‌یاننامه‌ی ده‌ركرد دژی داخستنی په‌رله‌مان؟
-هه‌ندێك بابه‌ت هه‌یه‌ به‌ ده‌ركردنی به‌یاننامه‌ نابێت، ده‌بێـت شێوازی تر به‌كاربهێنرێت، به‌ڵام له‌هه‌موو حاڵه‌تێكدا ئه‌وه‌ بۆ مێژوو نووسه‌كان به‌جێ ده‌هێڵین ئه‌و سیاسه‌ته‌ چه‌ندی باش بووه‌‌و چه‌ندی خراپ بووه‌، به‌ڵام ده‌كرا ئێمه‌ رۆڵێكی كاریگه‌رترمان هه‌بوایه‌‌و زۆرتر په‌یوه‌ندیی به‌وه‌وه‌ هه‌بووایه‌ كه‌ یه‌كێتی له‌قۆناغێك له‌ قۆناغه‌كانی دوای په‌كخستنی په‌رله‌مان نه‌یتوانیووه‌ رۆڵێكی كاریگه‌رتر له‌م باره‌یه‌وه‌ بگێڕێت، زۆرتر په‌یوه‌ندیی به‌ دووركه‌وتنه‌وه‌ی مام جه‌لال‌و كێشه‌ی ناوخۆییه‌وه‌ ئێمه‌ له‌و قۆناغه‌ ئه‌وه‌نده‌ی سه‌رقاڵی كێشه‌ ناوخۆییه‌كانمان بووین، نه‌په‌رژاوینه‌ته‌ سه‌ر ئه‌وه‌ی بیر له‌ مه‌سه‌له‌ گشتییه‌كان‌و چاره‌سه‌رییان بكه‌ینه‌وه‌.
*ئێستا بیرتان له‌ چاره‌سه‌ره‌كان كردۆته‌وه‌؟
-تا ئه‌ندازه‌یه‌كی باش توانیومانه‌ په‌یوه‌ندییه‌ ناوخۆیه‌كانمان رێكبخه‌ینه‌وه‌، ئێستا ئێمه‌ لێی رازیین، ئومێد هه‌یه‌ كه‌ چاكتریش ببێت، له‌به‌ر ئه‌وه‌شه‌ له‌ نه‌خشه‌ رێگاكه‌ماندا باسمان له‌وه‌ كردووه‌ پێویسته‌ یه‌كێتی كاربكات بۆ ئه‌وه‌ی رۆڵێكی كاریگه‌رتر له‌ مه‌سه‌كاندا بگێڕێت، ئه‌گه‌ر تۆ سه‌رنجت دابێت، هیچ كات هێنده‌ی ئه‌مساڵ یه‌كێتیی هه‌وڵه‌كانی نه‌خستۆته‌گه‌ڕ بۆئه‌وه‌ی رۆڵێكی كاریگه‌رتر له‌جاران‌و رۆڵێكی ئه‌كتیڤتر بگێڕێت هه‌م بۆ نزیككردنه‌وه‌ی لایه‌نه‌كان‌و هه‌م بۆ نه‌هێشتنی ئه‌و به‌ربه‌ستانه‌ی كه‌ دێنه‌ به‌رده‌م مه‌سه‌له‌ نیشتمانییه‌كان.
*ئێستا یه‌كێتیی داوای كاراكردنه‌وه‌ی په‌رله‌مانی كوردستان ده‌كات، پێش ئه‌وه‌ی ریفڕاندۆم له‌ هه‌رێمی كوردستاندا ئه‌نجام بدرێت، له‌ كۆبوونه‌وی ئه‌مجاره‌ی یه‌كێتی‌و پارتی، یه‌كێتیی چ په‌یامێكی نوێی پێبوو بۆ كاراكردنه‌وه‌ی په‌رله‌مانی كوردستان؟
-بێگومان ئێمه‌ پشگیریی كاراكردنه‌وه‌ی په‌رله‌مان ده‌كه‌ین، پشتگیریی هه‌موو هه‌وڵه‌كان ده‌كه‌ین له‌و باره‌یه‌وه‌، پێویسته‌ كاراكردنه‌وه‌ی په‌رله‌مان كێشه‌ی تری لێ نه‌كه‌وێته‌وه‌، ئێمه‌ ده‌مانه‌وێت له‌رێگه‌ی كاراكردنه‌وه‌ی په‌رله‌مانه‌وه‌، به‌شێكی زۆری كێشه‌ ناوخۆییه‌كانی هه‌رێمی كوردستان چاره‌سه‌ر بكه‌ین‌و ده‌شمانه‌وێت یه‌كڕیزیی نیشتمانی‌و كۆده‌نگیی له‌سه‌ر ئه‌و مه‌سه‌له‌یه‌ هه‌بێت‌و هه‌موو لایه‌نه‌كان رۆڵیان هه‌بێت بۆ كاراكردنه‌وه‌ی په‌رله‌مان.
*ده‌مه‌وێت بزانم چ شێوازێك گونجاوه‌ بۆ ئه‌مڕۆ كه‌ په‌رله‌مانی كوردستانی پێ كارابكرێته‌وه‌؟ ئه‌وه‌ی بزووتنه‌وه‌ی گۆڕان داوی ده‌كات یاخود ئه‌وه‌ی پارتی داوای ده‌كات یان یه‌كێتی چ بڕیارێكی پێیه‌ له‌و نێوانه‌دا؟
-ئێمه‌ به‌وجۆره‌ سه‌یری مه‌سه‌له‌كه‌ ده‌كه‌ین، كه‌ یه‌كێك له‌ به‌ربه‌سته‌كانی كاراكردنه‌وه‌ی په‌رله‌مانی كوردستان كێشه‌ی نێوان پارتی‌و گۆڕانه‌، هه‌ردوولایان هان ده‌ده‌ین، به‌شێوه‌ی راسته‌وخۆ دانیشن‌و ئه‌م كێشه‌یه‌ چاره‌سه‌ربكه‌ن، ئه‌و رێكه‌وتنه‌ی كه‌ ئه‌وان پێی ده‌گه‌ن، ئێمه‌ پشگیرییان ده‌كه‌ین به‌هۆی ئه‌وه‌شه‌وه‌ ئه‌گه‌ر پێویستی كرد، ئێمه‌ ناوبژیوان بین‌و ده‌توانین ئه‌و رۆڵه‌ش بگێڕین، هه‌موو هه‌وڵه‌كانی خۆشمان ده‌خه‌ینه‌گه‌ڕ بۆئه‌وه‌ی ئه‌و دوو لایه‌نه‌ بگه‌ن به‌ ڕێكه‌وتنێكی دیاریكراو‌و گه‌وره‌ترین به‌ربه‌ست بۆ كاراكردنه‌وه‌ی په‌رله‌مان رێك نه‌كه‌وتنی ئه‌و دوو لایه‌نه‌یه‌، به‌هۆی ئه‌وه‌شه‌وه‌ نامانه‌وێت پشگیریی هیچ لایه‌نێكیان بكه‌ین له‌سه‌ر حسابی لایه‌نه‌كه‌ی تر، ئێمه‌ هه‌وڵی ئه‌وه‌ ده‌ده‌ین كاراكردنه‌وه‌ی په‌رله‌مان یه‌كڕیزیی نیشتمانی پێ دابین بكرێت.
*له‌كۆبونه‌وه‌ی سه‌ركردایه‌تیدا باس له‌ بژێویی خه‌ڵكی كوردستان كراوه‌، ده‌مه‌وێت بزانم ئاسۆیه‌ك هه‌یه‌ بۆ ده‌رچوون له‌و قه‌یرانه‌ی رووبه‌ڕووی خه‌ڵكی كوردستان بۆته‌وه‌، هه‌ندێك كه‌س پێیانوایه‌ ئه‌و كێشه‌ ئابوورییه‌ی له‌كوردستان رووده‌دات دروستكراوه‌؟
-من پێموانییه‌ ئه‌و شیكردنه‌وانه‌ دروست بن، له‌كوردستاندا قه‌یرانێكی دارایی سه‌خت هه‌یه‌، حكومه‌ت لێی به‌رپرسیاره‌، ئێمه‌ وه‌ك یه‌كێتی ناتوانین هیچ چاره‌سه‌رێكمان هه‌بێت بۆ ئه‌م مه‌سه‌له‌یه‌، ئه‌وه‌ی چاره‌سه‌ری ده‌كات، ته‌نها حكومه‌تی هه‌رێمی كوردستانه‌، ئه‌وه‌ی كه‌ كێشه‌كه‌ی دروستكردووه‌، ده‌توانێ خۆی چاره‌سه‌ری بكات.
*كه‌واته‌ هیچ ئاسۆیه‌ك نییه‌ بۆ ده‌باز بوون له‌و قه‌یرانه‌ به‌م نزیكانه‌؟
-پێموایه‌ دیسان ئه‌و پرسیاره‌ له‌حكومه‌ت بكرێت، ئه‌و پرسیاره‌ ئاراسته‌ی به‌رپرسێكی باڵای حكومه‌ت بكرێت كه‌ ئاگاداری هه‌موو مه‌سه‌له‌كانه‌ كه‌ ده‌بێت پێمان بڵێت ئایا ئاسۆیه‌ك هه‌یه‌ بۆ چاره‌سه‌ركردنی كێشه‌كان یاخود نییه‌.
*به‌ڵی ئه‌م پرسیاره‌م بۆیه‌ كرد بڕیار درا 25 ی ئه‌یلول بۆ رۆژی ریفراندۆم دیاری بكرێت، باسیان له‌وه‌ كرد پێش ئه‌و واده‌یه‌ هه‌وڵبدرێت بژێویی خه‌ڵكی كوردستان چاره‌سه‌ر بكرێت، له‌به‌شێكی تری ئه‌و به‌یاننامه‌یه‌شدا، باس له‌وه‌ ده‌كات كه‌ بۆ ریفڕاندۆم باربۆ (تبرع) له‌ هه‌ندێك له‌ سه‌رمایه‌دار‌و كۆمپانیاكان كۆبكرێته‌وه‌، واته‌ ئه‌مه‌ دووشتی زۆر دژ به‌یه‌ك بوون؟
-پێش هه‌موو شتێك، چاككردنی بژێویی خه‌ڵك په‌یوه‌ندیی به‌ ریفڕاندۆمه‌وه‌  نییه‌، ئێمه‌ ریفڕاندۆم بكه‌ین‌و نه‌كه‌ین، حكومه‌ت هه‌رده‌بێت له‌خه‌می چاككردنی بژێویی خه‌ڵكدا بێت، له‌به‌رئه‌وه‌ نابێ ببه‌سترێته‌وه‌ به‌ مه‌سه‌له‌ی ریفراندۆمه‌وه‌، وه‌كو هانده‌رێك بۆئه‌وه‌ی خه‌ڵك بچێت بۆ ده‌نگدان له‌كاتی ریفراندۆمدا، مه‌سه‌له‌ی ریفراندۆم شتێكه‌‌و مه‌سه‌له‌ی بژێوی خه‌ڵك شتێكی تره‌، ریفراندۆم یه‌ك جاره‌‌و ئه‌نجام ده‌درێت‌و كۆتایی پێدێت، به‌ڵام مه‌سه‌له‌ی بژێویی خه‌ڵك لێپرسراوێتییه‌كه‌ له‌ ئه‌ستۆی هه‌موو حكومه‌تێكه‌ هه‌موو حكومه‌ته‌كانی كوردستان دابینكردنی بژێویی خه‌ڵكیان له‌ ئه‌ستۆدا بووه‌، ئه‌م حكومه‌ته‌ش له‌ ئه‌ستۆیدایه‌‌و هه‌ر حكومه‌تێكی تریش بێته‌ سه‌ر حوكم، پاشان ئه‌م حكومه‌ته‌ ئه‌و لێپرسراوێتییه‌ ده‌كه‌وێته‌ ئه‌ستۆی، بۆیه‌ بائه‌وه‌ نه‌به‌سترێته‌وه‌ به‌ مه‌سه‌له‌ی ریفڕاندۆمه‌وه‌‌و هیچ په‌یوه‌ندییه‌كیان به‌سه‌ر یه‌كه‌وه‌ نییه‌.
*میدیا له‌باشووری كوردستاندا چ رۆڵێكی هه‌یه‌؟ ئایا ئه‌م رۆڵه‌ له‌ پێناو هۆشیاركردنه‌وه‌ی تاك به‌ تاكی خه‌ڵكی كوردستاندایه‌، یاخود به‌ پێچه‌وانه‌وه‌  هه‌ندێك جار گرژییه‌كان زیاتر ده‌كات له‌ رووی ده‌رونییه‌وه‌؟ هاووڵاتیان ماندوده‌كات له‌ رووی سیاسییه‌وه‌؟ په‌یوه‌ندیی حزب‌و لایه‌نه‌ سیاسییه‌كان به‌جۆرێك له‌ جۆره‌كان  لیكتران دروستده‌كات، رات چییه‌ له‌سه‌ر رۆڵی میدیا به‌گشتی؟
-من به‌و جۆره‌ سه‌یری ده‌كه‌م كه‌ رۆڵی میدیا له‌ هه‌رێمی كوردستاندا وه‌ك رۆڵی میدیا وایه‌ له‌ هه‌ر وڵاتێكی ئازاددا له‌ رووی رۆژنامه‌وانی ‌و ئازادیی له‌ چوار چێوه‌ی یاسادا، ئه‌و رۆڵه‌ی كه‌ له‌هه‌رێمی كوردستاندا میدیا هه‌یه‌تی، بێگومان ده‌توانن رۆڵی زور ئه‌رێنی بگێڕن، ببنه‌ فاكته‌رێك بۆ دابینكردنی یه‌كڕیزیی نیشتمانی، له‌هه‌مان كاتیشدا ده‌توانن كۆمه‌ڵێك كێشه‌ دروست بكه‌ن، هه‌ندێكجار ره‌نگه‌ كێشه‌ له‌ نێوان لایه‌نه‌كاندا دروست بكه‌ن‌و  ئه‌م مه‌سه‌له‌یه‌ له‌ هه‌موو وڵاتێكی دیموكراتدا هه‌یه‌، میدیا ده‌توانێت هه‌ردوو رۆڵه‌كه‌ بگێڕێت، ئه‌وه‌ ده‌كه‌وێته‌ سه‌ر سیاسه‌تی میدیاكه‌. ئێستا تۆ باس له‌ میدیاكان ده‌كه‌یت وه‌ك ئه‌وه‌ی هه‌مووی یه‌ك بارسته‌و یه‌ك پارچه‌ بێت، له‌كاتێكدا هه‌ر میدیایه‌ك به‌رژه‌وه‌ندیی تایبه‌تیی خۆی هه‌یه‌‌و تێڕوانینی تایبه‌تی خۆی هه‌یه‌، له‌به‌رئه‌وه‌ هه‌ر یه‌كێك به‌پێی بۆچوونه‌كانی خۆی باس له‌ مه‌سه‌كان ده‌كات، بۆ نموونه‌ ئه‌گه‌ر ئێمه‌ میدیای حكومیمان هه‌بوایه‌، میدیای حكومی میدیایه‌كی ئومێد به‌خشه‌ به‌ خه‌ڵك‌و هه‌وڵ ده‌دات كه‌موكوڕییه‌كان بشارێته‌وه‌‌و هه‌لومه‌رجێكی وا له‌ مێشكی هاووڵاتیدا دروست بكات كه‌ ئه‌م حكومه‌ته‌ توانیوێتی هه‌موو ئه‌ركه‌كان جێبه‌جێبكات، به‌ڵام مه‌رج نییه‌ كه‌ میدیاكانی تر كه‌ حكومی نیین هه‌مان بۆچوونیان هه‌بێت، ئه‌وان ئازاترن له‌ باسكردنی كه‌موكوڕییه‌كان‌و ئازاترن له‌ ره‌خنه‌گرتنیش.
*ئێستا باس له‌وه‌ ده‌كرێت میدیا له‌ هه‌رێمی كوردستاندا ته‌نها ره‌ش‌و سپی ده‌بینرێت، ته‌نانه‌ت حزب‌و لایه‌نه‌كانیش ره‌ش‌و سپی ده‌بینن، له‌نێوان ره‌ش‌و سپیشدا ره‌نگی جوانیش هه‌یه‌، ئێستا باس له‌وه‌ ده‌كرێت ئه‌و حزبانه‌ی له‌گه‌ڵ پارتیدا كه‌ چوونه‌ته‌ كۆبوونه‌وه‌‌و بڕیاریانداوه‌ لایه‌نێك به‌ هاو ئاوازییان ده‌خوێنی، باشه‌ ئه‌و حزبانه‌ مێژوویان هه‌یه‌، پێگه‌یان هه‌یه‌، واته‌ ئه‌و جۆره‌ لێدوانانه‌ له‌ خزمه‌تی چیدایه‌؟
-ئه‌وه‌ له‌خزمه‌تی یه‌كڕیزیی نیشتمانیدا نییه‌، به‌ڵام ره‌نگه‌ له‌خزمه‌تی لایه‌نێكی دیاریكراودا بێت، یاخود له‌خزمه‌تی بۆچوونێكی دیاریكراودابێت‌و پێیوایه‌ ئه‌وه‌ بۆچوونه‌ راسته‌كه‌یه‌، به‌ دڵنیایه‌وه‌ ئه‌گه‌ر باس له‌یه‌كڕیزیی نیشتمانی بكه‌ین، ئه‌م یان ئه‌و جۆره‌ لێدوانانه‌ رۆڵی زۆر خراپیان له‌و باره‌یه‌وه‌ هه‌یه‌.


ناو:  
ئیمه‌یل:    
سه‌رنج:  

#7372
25/9/2017
ئه‌رشیف
وه‌رزش
‌ بارسێلۆنا بۆندی چه‌ند یاریزانێكی نوێ ده‌كاته‌وه‌ 24/9/2017
‌ ئه‌ندریه‌ واردی پاڵه‌وانی جیهان وازهێنانی راگه‌یاند 24/9/2017
زانست
‌ 12 ساڵ دوای‌ هاوسه‌رگیری چی‌ ڕوو ده‌دا؟ 22/9/2017
‌ باوه‌ڕت به‌ خه‌ونه‌كه‌ت هه‌بێت، وه‌ك ئه‌وه‌ی‌ به‌كرده‌وه‌ به‌ده‌ستت هێنابێ 22/9/2017
‌ كێش كاریگه‌ری‌ له‌سه‌ر ناكۆكی‌ خێزان هه‌یه‌ 22/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP