تیپی مۆسیقای شه‌هید كارزان.. سه‌نگه‌ری ره‌سه‌نایه‌تی‌ و هونه‌ری به‌ره‌نگاریی
رێوره‌سمی ناساندنی سی دی «ئاسووده‌بن» تیپی مۆسیقای شه‌هید كارزان.. سه‌نگه‌ری ره‌سه‌نایه‌تی‌ و هونه‌ری به‌ره‌نگاریی ‌ 30/7/2017
ئەم  دوو توێیە
سته‌می رژێمی رووخاوی به‌عس له‌دوای هه‌ره‌سی شۆڕشی ئه‌یلوله‌وه‌، گه‌یشته‌ ترۆپك، به‌تایبه‌تی له‌دوای گرتنه‌به‌ری سیاسه‌تی به‌عه‌ره‌بیكردنی كه‌لتوور‌و راگواستنی زۆره‌ملێ‌و گۆڕینی دیموگرافیای كوردستان‌و به‌به‌عسیكردنی زۆره‌ملێی خه‌ڵك، ئه‌مه‌ش وایكرد، زۆرێك له‌ خه‌ڵكی كوردستان له‌هه‌موو توێژه‌ جیاجیاكان بۆ به‌رگریی له‌ بوون‌و پاراستنی كه‌رامه‌تی مرۆیی خۆیان سه‌نگه‌ری به‌ره‌نگاربوونه‌وه‌و مقاوه‌مه‌ت هه‌ڵبژێرن‌و هه‌ریه‌كه‌و له‌ سۆنگه‌ی تێڕوانینی خۆیه‌وه‌ بیر له‌ شێوازی جیاجیای به‌ره‌نگاربوونه‌وه‌ بكاته‌وه‌‌و به‌شێك وه‌ك پێشمه‌رگه‌و به‌شێك وه‌ك به‌رهه‌ڵستیی سیاسی‌و رێكخراوه‌یی نهێنی‌و به‌شێكیش وه‌ك یاخیبوونی مه‌ده‌نییانه‌‌و ملكه‌چ نه‌كردن، به‌ڵام هه‌شبوون كه‌ له‌چه‌ند سه‌نگه‌رێكه‌ كه‌وتنه‌ به‌ره‌نگاربوونه‌وه‌ی ئه‌و سیاسه‌تانه‌، نموونه‌ی ئه‌وه‌ش ئه‌و پێشمه‌رگانه‌ بوون كه‌ له‌شاخدا هاوكات له‌گه‌ڵ پێكه‌وه‌گرێدانی خه‌باتی سیاسی ‌و پێشمه‌رگه‌یی‌و رێكخراوه‌یی، خه‌باتی هونه‌ری به‌رگرییشیان كرده‌ سه‌نگه‌رێكی دیكه‌ی رووبه‌ڕووبوونه‌وه‌و له‌پێشنیازێكه‌وه‌ «تیپی مۆسیقای شه‌هید كارزان»یان دروستكرد‌و سه‌ره‌ڕای ئه‌و ئاسته‌نگه‌ سیاسی‌و ته‌كنیكی‌و ئابوورییانه‌ی دامه‌زرێنه‌رانی ئه‌م تیپه‌ له‌م دووتوێیه‌دا باسی ده‌كه‌ن، توانیان چه‌ندین به‌رهه‌می نه‌مر بخه‌نه‌ سه‌ر خه‌رمانی هونه‌ری گۆرانی‌و موزیكی كوردی.

ستران عه‌بدوڵڵا: 
میوانانی كوردستانی نوێ به‌خێربێن بۆ چالاكیی ساڵۆنه‌كه‌مان كه‌ ئه‌مرۆ په‌خش‌و ناساندنی سیدی-ی «ئاسوده‌بن»ه‌، كه‌ گوڵبژێرێكه‌ له‌ كاره‌ هونه‌رییه‌كانی هه‌ردوو هونه‌رمه‌ند كاك دلێر ئیبراهیم‌و كاك ئاراس ئیبراهیم، وه‌ك دوو گوڵی باخچه‌ جوانه‌كه‌ی تیپی موسیقای شه‌هید كارزان، هه‌م بۆ یادی تێكۆشانی هونه‌ری‌و شۆڕشگیریی  ئه‌و تیپه‌ ‌و هه‌م بۆیادی هه‌موو ئه‌و تێكۆشه‌رانه‌ی له‌ بواری هونه‌ریدا خزمه‌تی كوردایه‌تی‌و خزمه‌تی كوردستانیان كرد، هه‌روه‌ها بۆ یادی هه‌موو شه‌هیدانی كورد‌و كوردستان. ده‌سپێكی ئه‌م كۆڕه‌شمان به‌ ده‌قیقه‌یه‌ك وه‌ستان بۆ گیانی پاكی شه‌هیدان ده‌ست پێده‌كه‌ین.
میوانانی به‌ڕێز.. به‌تایبه‌تیش هونه‌رمه‌ندانی خۆشه‌ویست كه‌ میوانی ئه‌م یاده‌ تایبه‌ته‌ن، سیدی-ی «ئاسوده‌بن» وه‌كو باسمانكرد، گوڵبژێرێكه‌ له‌ به‌رهه‌مه‌كانی تیپی مۆسیقای شه‌هید كارزان، ئه‌و تیپه‌ی كه‌ له‌ شۆڕشی نوێی كوردستاندا رۆڵی گه‌وره‌ی گیڕا، هه‌م له‌ ناساندنی شۆڕشی كوردستان به‌ كۆمه‌ڵانی خه‌ڵكی كوردستان، هه‌م ده‌رخستنی رووی شارستانیی‌و وه‌ رووی هونه‌ریی‌و فه‌رهه‌نگیی ئه‌و شۆڕشه‌.
 ئه‌م به‌رهه‌مه‌ هه‌مووتان یان زۆربه‌تان ده‌زانن و یادگاریتان له‌گه‌ڵیدا هه‌یه‌، چ به‌ گوێگرتن، چ به‌ زانینی حیكایه‌ته‌كانی چۆنێتغی پێكهاتنی ئه‌م تیپه‌ ناوازه‌یه‌ی ناو شۆڕشی كوردستان، ئه‌مرۆ ئێمه‌ ئه‌م یاده‌ ده‌كه‌ینه‌وه‌، وه‌كو رێزلێنان له‌ هه‌ردوو هونه‌رمه‌ند كاك دلێر‌و كاك ئاراس ‌و بۆ یادی ئه‌م تیپه‌ شۆڕشگێڕه‌ی كوردستانیش. له‌هه‌مان كاتیشدا ره‌نگه‌ به‌شی زۆری ئه‌وانه‌ی چاودێریی كاری هونه‌ریی ده‌كه‌ن، چاودێریی كاری فه‌رهه‌نگی‌و رۆژنامه‌وانی ده‌كه‌ن، ده‌زانن كه‌  كاری رۆژنامه‌گه‌ریی با ته‌نانه‌ت سیاسیش بێت، بایه‌خدانه‌ به‌ لایه‌نی هونه‌ریی. ره‌نگه‌ بپرسن بۆچی ئه‌مه‌ رادیۆیه‌ك یان ته‌له‌فزیۆنێك ئه‌مه‌ به‌رهه‌م ناهێنێت؟ له‌ راستیدا رۆژنامه‌كانی هه‌موو جیهان وه‌ك جۆرێك له‌ رێزگرتن‌و حورمه‌تگرتن له‌ خوێنه‌رانیان، جار به‌جار دیاریی له‌مجۆره‌ پێشكه‌ش ده‌كه‌ن، بایه‌خی ئه‌م سیدی-یه‌، هه‌ر ئه‌وه‌ نییه‌ كه‌ ده‌كه‌وێته‌ به‌رده‌ستی ئێوه‌ی به‌ڕێز، یان  ئه‌رشیفكردنی ‌و كه‌ ئاخۆ چۆن له‌ ستۆدێۆكانی كوردستاندا داده‌نرێت، به‌ڵكو ئه‌مه‌ سبه‌ینێش له‌گه‌ڵ كوردستانی نوێ-دا وه‌ك دیاریی رۆژنامه‌ی كوردستانی نوێ دابه‌ش ده‌كرێت ‌و پێشموایه‌ ئه‌مه‌ش دووه‌م تاقیكردنه‌وه‌یه‌. كاری یه‌كه‌ممان ئه‌و سیدی-یه‌ی سروودی ئه‌ی ره‌قیب‌و مه‌شخه‌ڵانمان دابه‌شكرد كه‌ مامۆستا ئه‌نوه‌ر قه‌ره‌داغی ئاماده‌ی كردبوو، ئه‌م به‌رهه‌مه‌یان دووه‌م كاری ئێمه‌ ده‌بێت بۆ ئه‌وه‌ی له‌ كاروانه‌ هونه‌رییه‌كه‌، له‌ كاروانی پێشكه‌شكردنی دیاریی به‌ خوێنه‌ره‌كانی دوانه‌كه‌وێت.
 ره‌نگه‌ هیچ كه‌سێك هێنده‌ی خاوه‌نی كێشه‌كه‌‌و هێنده‌ی خاوه‌نی ئه‌و به‌رهه‌مه‌ نه‌توانێت ورده‌كاریی ئه‌و به‌رهه‌مه‌ باس بكات، بۆیه‌ داوام له‌ كاك دلێر‌و كاك ئاراس خۆیان كرد كه‌ حۆیان دیاریی ده‌كه‌ن برا گه‌وره‌یی‌و برا بچووكی ده‌كه‌ن، كه‌ كێ له‌پێشدا تیپه‌كه‌ی دامه‌زراند‌و پێمخۆشه‌ ئه‌وان باسی ئه‌م به‌رهه‌مه‌مان بۆ بكه‌ن، له‌گه‌ڵ كۆی كاره‌كانی تیپی موسیقای شه‌هید كارزان ‌و دواتریش كاك دلێر‌و كاك ئاراس سیدییه‌كانتان به‌ ئیمزای خۆیان پێشكه‌ش بكه‌ن.

ئاراس ئیبراهیم:
زۆر زۆر به‌خێربێن، سوپاسی ماندووبوونتان ده‌كه‌ین، ئه‌ركتان كێشاوه‌، ده‌رباره‌ی دروستبوون و ناونانی تیپی مۆسیقای شه‌هید كارزان ده‌مه‌وێت به‌وه‌ ده‌ست پێبكه‌م و بڵێم: له‌ناو گرمه‌ گرمی تۆپ‌و ته‌یاره‌و تاوانه‌كانی رژێمی داگیركه‌ر له‌ وێرانكردن و راگواستنی دێهاته‌كان و ته‌قینه‌وه‌ی كانیاوه‌كانی كوردستان و زیندانیكردنی رۆڵه‌كانی نه‌ته‌وه‌كه‌مان و ئیعدامكردن و ته‌هجیركردن و ئیباده‌ كردنی میلله‌ته‌كه‌ماندا، كارێكی ئاسان نه‌بوو به‌ڕاستی، له‌كۆبونه‌وه‌یه‌كی گه‌وره‌ی راگه‌یاندندا له‌گه‌ڵ به‌ڕێز مام جه‌لال له‌ ناوه‌ڕاستی ساڵی 1981 له‌ زه‌ڵێ، گه‌نجێكی ٢٠ ساڵان ئه‌وه‌ ته‌مه‌نیشم ده‌زانن، موسیقاژه‌نێكی تیپی مۆسیقای سلێمانی، پێشمه‌رگه‌یه‌كی ساده‌، بیه‌وێت هه‌ستێت و پێشنیار بكات تیپێكی مۆسیقا دروست بكرێت، له‌ راستیدا خۆم ئاماده‌كردبوو بۆ هه‌موو پرسیارێك یه‌خه‌م بگرێت، زۆر بیرم كردبۆوه‌ ناوی چی بێت؟ له‌كاتی بیركردنه‌وه‌ له‌و مه‌سه‌له‌یه‌، ناوی زۆر هونه‌رمه‌ندی گه‌وره‌و نه‌مر هات به‌ مێشكمدا، كه‌ ئه‌وه‌ ده‌هێنن چه‌نده‌ها ده‌زگاو شوێن به‌ناویانه‌وه‌ ناوبنرێت، زۆر سه‌رقاڵی ئه‌وه‌بووم ناوێك هه‌ڵبژێم له‌ دواییدا نه‌بێته‌ مایه‌ی گله‌یی و تا راده‌یه‌ك عه‌داله‌تی تیابێت، به‌ڵام له‌ ئه‌نجامی بیركردنه‌وه‌ گه‌یشتمه‌ ئه‌و قه‌ناعه‌ته‌ی ناوی شه‌هید كارزان هه‌ڵبژێرم، منداڵه‌، به‌ توانابووه‌، له‌ سه‌رتاسه‌ری عیراقدا پله‌ی یه‌كه‌می به‌ده‌ستهێناوه‌، ژیان ماوه‌ی خراپه‌و گه‌نده‌ڵیی نه‌داوه‌، به‌ش به‌حاڵی خۆم زۆرم خۆشویستووه‌، ماوه‌یه‌ك له‌ جیاتی دلێر وانه‌م پێوتووه‌، هه‌م به‌و و هه‌م به‌ هاوڕێكانی، له‌ رۆژی ماڵئاواییه‌وه‌ تا ئێستاشی پێوه‌بێت، به‌رگی ره‌شم دانه‌كه‌ندووه‌، ناونانی تیپه‌كه‌  جگه‌ له‌مانه‌ دوو هۆی ترن كه‌ ئه‌وانیش:
یه‌كه‌م: تیپه‌كه‌ خنجیلانه‌ بوو، چونكه‌ جگه‌ له‌ خۆم ئه‌وانی تریش كه‌ له‌ گه‌ڵمدابوون، ئه‌وانه‌ی به‌ڕاستی له‌گه‌ڵمدابوون، هیچیان له‌ تیپێكدا كاریان نه‌كردبوو، له‌ شۆڕشدا ئه‌وكاته‌ هونه‌رمه‌ندی مۆسیقیش زۆر كه‌م  تیابوو، ده‌توانم بڵێم هه‌ر نه‌بوو. تاكه‌ كه‌س وه‌كو هونه‌رمه‌ند من بووم.
 دووه‌م: ئه‌گه‌ر ناوم بنایه‌ تیپی مۆسیقای شۆڕش، ئه‌وا وه‌بیرهێنانه‌وه‌ی تیپه‌ كۆنه‌كه‌ بوو له‌ شۆڕشی ئه‌یلولدا، كه‌ هه‌موو ئه‌و هاوڕییانه‌ زۆربه‌ی زۆریان له‌و تیپه‌ به‌شداربوون، ئه‌وه‌شم پێ باش نه‌بوو، به‌راستی، چونكه‌ ئه‌و تیپه‌ی كۆن زۆربه‌ی هه‌ره‌ زۆری هونه‌رمه‌ندانی شاره‌كانی كوردستانی تێدابووه‌، واته‌ تیپێكی زۆر گه‌وره‌و به‌توانا بوو، ئێمه‌ش تیپێكی خنجیله‌و بچووك بووین، ئه‌وه‌ش جیاوازییه‌كی فراوانی له‌گه‌ڵ ئه‌و حاڵه‌ته‌ تازه‌یه‌دا هه‌بوو، بۆیه‌ بڕیاری دواییم ئه‌وه‌بوو ناوه‌كه‌ ببێت به‌ تیپی مۆسیقای شه‌هید كارزان. به‌و شێوه‌یه‌ سازو ئاماده‌بووم بۆ كۆبوونه‌وه‌كه‌.
با بێینه‌وه‌ سه‌ر پێشنیاره‌كه‌، له‌و كۆبوونه‌وه‌یه‌دا به‌ چه‌شنی هه‌وره‌ بروسكه‌ مه‌ساری گفتوگۆی كۆبوونه‌وه‌كه‌م گۆڕی، پێش من پێشنیازێك كرابوو بۆ مام جه‌لال، ئه‌ویش هه‌ڵچوبوو، داروبه‌ردی دا به‌یه‌كدا، وتی: پێشنیاری وام قبوڵ نییه‌، منیش دانیشتبووم كاك فه‌ره‌یدون عه‌بدولقادر له‌ته‌نیشتم بوو، مام جه‌لال-یش له‌ولاوه‌ دانیشتبوو، خۆشم بچووك كردبۆووه‌‌و چوبوومه‌ دواوه‌، ئێستا بڵێم تیپی مۆسیقا گۆچانه‌كه‌مان به‌رده‌كه‌وێت، ئه‌وی راستی بێت هه‌رچۆنێك بێت پێشنیاره‌كه‌م كرد، كه‌ ده‌ستم به‌رزكرده‌وه‌، وتی: ها كوڕم ئه‌تۆ چیت ده‌وێت؟ منیش وتم وه‌ڵا مامه‌ گیان ئێمه‌ به‌حوكمی ئه‌وه‌ی كه‌ شۆڕش له‌ هه‌موو لایه‌نه‌كانی كورده‌واری خۆماندا به‌رپامان كردووه‌، هونه‌ریش لایه‌نێكه‌ له‌و لایه‌نانه‌ی كه‌ ده‌بێت گه‌وره‌ی بكه‌ین‌و گرنگیی پێ بده‌ین، به‌تایبه‌تی كه‌ له‌شاریشدا ناتوانن ئه‌و به‌رهه‌مانه‌ تۆمار بكه‌ن، ئێمه‌ ده‌توانین له‌ شاخدا ئه‌و ئیشه‌ بكه‌ین، بۆیه‌ پێشنیازی دامه‌زراندنی تیپێكی مۆسیقا ده‌كه‌م، هه‌ر ئه‌وه‌نده‌م وت‌و ئیتر ته‌واو، ته‌قییه‌وه‌، خۆشبه‌ختانه‌ هه‌ر ده‌ستبه‌جێ مام جه‌لال وه‌ڵامی دایه‌وه‌ كه‌ پێشنیارێكی به‌جێیه‌و زۆر باشه‌، با ده‌ستبه‌كاربین، فڵان فیسار كاره‌كان بكه‌ن، گه‌یشتن به‌و ئامانجه‌ش دیسان رێیه‌كی سه‌خته‌و ئاسان نه‌بوو، چونكه‌ من ئامێری مۆسیقام له‌لا نه‌بوو، بۆیه‌ ده‌بوایه‌ بچم بۆ ئێران ئامێر بكڕم، به‌س ئێرانمان له‌به‌ر ده‌ستا بوو، باشییه‌كه‌ی ئه‌وه‌بوو له‌ سه‌ره‌وه‌ ره‌زامه‌ندیم وه‌رگرتبوو، هیچ ترسێكم نه‌بوو، بۆیه‌ شتێك ئاسانكاریم مسۆگه‌ر كردبوو، كێشه‌ی هه‌ره‌ گه‌وره‌ی من ئه‌وه‌بوو له‌ناو شۆڕشدا هێشتا هه‌بوو پێیوابوو ئه‌وه‌ی داواكراوه‌ زیاده‌یه‌، «كوڕه‌ بابه‌ مۆسیقای چی و وه‌ڵا هه‌ر له‌مه‌مان كه‌مبوو، ده‌بیسترایه‌وه‌، به‌ڵام  به‌سووربوون له‌سه‌ر داواكه‌و پشتگوێ خستنی ئه‌و ده‌نگه‌ دژانه‌، به‌رده‌وام بووم. گرفته‌كانیش ئاسانتربوون‌و چاره‌سه‌ركران.
 لێره‌دا بۆ نموونه‌ باسی ده‌كه‌م: چه‌ند به‌رپرسێك هه‌ندێك بۆچوونی جیاوازتری هه‌بوو له‌سه‌ر بڕی پاره‌كه‌، یان كڕینی جۆری ئامێره‌كان، شتێك گرفتی ده‌خسته‌ سه‌ر رێگای دابینكردنی ئامێره‌كان، ناحه‌قیشیان نه‌بوو، له‌و كاتانه‌و له‌و سه‌ده‌مانه‌دا كه‌ شۆڕش بۆ خۆی سواڵی ده‌كردو به‌ فیشه‌كی قاچاخ شه‌ڕی ده‌وڵه‌تانی ده‌كرد، ئه‌و داوایه‌ وه‌ك ئه‌وه‌ وابوو بڵێی ئه‌ستێره‌یه‌كم بۆ دابگرن، جگه‌ له‌وه‌ی وه‌كو ئه‌ركێكی زۆر گران له‌سه‌ر شانی شۆڕش ده‌وه‌ستا، تا ئه‌م مه‌سره‌فه‌ش دابین بكات و وا ده‌بینرا كه‌ هێنانه‌دی ئه‌و ئاواته‌ی دڵی هونه‌رمه‌ندانێكی كه‌م، ئه‌وه‌نده‌ گران بكه‌وێت له‌سه‌ر دارایی شۆڕش، كارێكی زیاده‌و لای هه‌مووان به‌ ئاسانی په‌سه‌ند نه‌ده‌كرا.
خاڵێكی تر ئه‌وه‌بوو ئه‌م تیپه‌ش تیپێكی مۆسیقای ئاسایی نه‌بوو، به‌رپرسیارییه‌كی مه‌زن و گه‌وره‌ ده‌كه‌وته‌ سه‌ر شانی، ئه‌م تیپه‌ ده‌بێت شایه‌نی شه‌هیدان‌و پێشمه‌رگه‌و دڵسۆزی كوردایه‌تی بێت، بۆیه‌ به‌ كارێكی پێویستم ده‌زانی‌و هه‌ر چۆنێك بیرم لێ ده‌كرده‌وه‌، پڕ به‌پێستی ئه‌وكاته‌ بوو، بۆیه‌ بڕیارمدا چۆن بوێرانه‌ ئه‌و داوایه‌م پێشكه‌شكرد، ئاواش به‌رده‌وام بم.
به‌مجۆره‌ له‌ رۆژی ١/١٠/١٩٨١ دا ئه‌م تیپه‌ له‌دایك بوو. دیاره‌ دوایی له‌گه‌ڵ چه‌ند هونه‌رمه‌ندێكی دڵسۆزدا ئه‌و كاره‌مان گه‌یانده‌ ئه‌نجام، تا ساڵی ١٩٩٠ به‌رده‌وام بوو، ئێستاش ئه‌م كۆڕه‌ جوانه‌ به‌ڵگه‌ی گرنگیی پێگه‌ی ئه‌و تیپه‌یه‌و مایه‌ی سه‌ربه‌رزییه‌ بۆ هه‌موو ئه‌وانه‌ی هاوكاریی ئه‌م تیپه‌یان كردووه‌، لێره‌دا پڕ به‌دڵ سوپاسی یه‌كه‌به‌یه‌كه‌ی هه‌موویان ده‌كه‌م و سوپاس بۆ ئاماده‌بوونی ئێوه‌ی خۆشه‌ویستیش، هه‌ر بمێنن به‌ شادی.

دلێر ئیبراهیم:
 به‌ڕێزان به‌خێرهاتن سه‌رچاومان، زۆر ماییه‌ی سه‌ربه‌رزیمه‌ ئه‌و برایانه‌م به‌رامبه‌رم دانیشتوون‌و دوای 37 ساڵ باسی تیپێك ده‌كه‌ین كه‌ له‌ سه‌رده‌می خۆیدا دروستبوو، كۆمه‌ڵێك به‌رهه‌می هه‌بوو، من زۆر سوپاسی كاك (ئه‌نوه‌ر قه‌ره‌داغی) ده‌كه‌م كه‌ ئه‌م گوڵبژێره‌ی پاك كرده‌وه‌‌و به‌ جوانی خستییه‌ به‌رده‌ستان، هه‌روه‌ها زۆر سوپاسی شوان كابان ده‌كه‌م كه‌ ئه‌م پێشنیاره‌ی كرد‌و سوپاسی (ستران‌و عومه‌ر‌و كوردستانی نوێش) ده‌كه‌م بۆ ئه‌م كۆڕه‌‌و سوپاسی ئێوه‌ی ئازیزیش ده‌كه‌م ئه‌ركتان كێشا‌و ئاماده‌بوون له‌گه‌ڵماندا، من پێموایه‌ ده‌بوایه‌ یه‌كێتی زۆر زووتر له‌م كۆڕانه‌ی رێك بخستایه‌ بۆ تیپی شه‌هید كارزان، چونكه‌ ئه‌م كۆڕه‌ كه‌وتۆته‌ دوای 36 ساڵ له‌ دوای دروستبوون‌و نزیكه‌ی 27 ساڵ له‌ دوای دواهه‌مین به‌رهه‌م، من پێموایه‌ زووتریش بكرایه‌، ده‌مانتوانی ئه‌م حه‌قایه‌ته‌ی ئێستا باس بكه‌ین، بماندایه‌ به‌گوێی دۆست‌و خۆشه‌ویسته‌كانماندا كه‌ كاره‌كان چۆن بووه‌‌و چۆن رۆشتووه‌، من لێره‌دا پێم باشه‌ باسێكی ئاراس بكه‌م، هه‌موو ئه‌ندامه‌كان ئێمه‌ 11 ئه‌ندام بووین، به‌ موسیقار‌و به‌ گۆرانی بێژه‌وه‌، به‌ڵام هه‌موو ئه‌ندامه‌كان رۆڵی خۆیان هه‌بوو، هه‌ر یه‌كێك لابرایه‌ كه‌لێنێكی دروست ده‌كرد، به‌ڵام به‌راستی ئاراس به‌شێوه‌یه‌ك له‌شێوه‌كان له‌هه‌موومان زه‌روورتربوو، رۆڵی سه‌ره‌كی گێڕاوه‌ له‌ تیپدا، ته‌نانه‌ت له‌ منیش زیاتر، باشترین ژه‌نیار بووه‌ كه‌ تێكڕای موسایه‌ره‌‌و له‌زمه‌و ته‌رجه‌مه‌‌و وه‌ستان‌و ده‌ستپێكردنه‌وه‌‌و ته‌واوبوونی ئاوازه‌كانی له‌سه‌ر شان بووه‌، له‌كاتی تۆماركردندا ئاواز دانه‌ر بووه‌. پرۆڤه‌ی به‌ ژه‌نیاره‌كان كردووه‌، له‌كاتی پێویستدا. پرۆڤه‌ی به‌ گۆرانیبێژ‌و كۆرسه‌كان كردووه‌ له‌ زۆربه‌ی به‌رهه‌مه‌كاندا، زۆربه‌ی ئه‌ندامان له‌ڕێی ئه‌وه‌وه‌ یان له‌ نزیكایه‌تی له‌وه‌وه‌ بوونه‌ته‌ ئه‌ندام. 
له‌هه‌ر هه‌مووی گرنگ تر كاری تۆماركردنی له‌ ئه‌ستۆ گرتووه‌ كه‌ ئه‌مه‌یان پرۆسێسێكی زۆر زۆر گرنگه‌‌و زه‌وقێكی پێگه‌یشتوو و كامڵی ده‌وێت، جگه‌ له‌مه‌ش ئه‌و تۆماركردنه‌ بۆته‌ مایه‌ی نه‌مربوونی به‌رهه‌مه‌كان،  ده‌ڵێم ئه‌و نه‌بوایه‌ ره‌نگه‌ هیچ نه‌بوایه‌، به‌داخه‌وه‌ من یه‌كێكم له‌وانه‌ی زیاترین به‌ری ره‌نجی ئه‌وم خواردووه‌، بۆیه‌ ده‌ڵێم ژیان هه‌میشه‌ دادپه‌روه‌ر نییه‌، (ئاراس) ده‌بوایه‌ زۆر زیاتری بۆ بكرایه‌، شایسته‌ی زیاتره‌ من پێموایه‌ زیاترین كه‌س له‌م كۆڕه‌دا له‌و باسانه‌ی كه‌ من باسم كرد، ره‌نگه‌ مامۆستا ئه‌نوه‌ر بێت، چونكه‌ هه‌ر ماده‌یه‌كمان هێناوه‌ بۆ تیپ، كلك‌و گوێی كردووه‌، ده‌ستی بۆ درێژكردووه‌، قاچی بڕیوه‌ته‌وه‌، ئینجا تۆماركردنه‌كه‌ش، كاكه‌ ئه‌مان واده‌ڵین، ئه‌و هیلاكییه‌ له‌سه‌ر كاك ئه‌نوه‌ر بووه‌، ره‌نگه‌ زیاتر بووه‌ له‌سه‌ر ئه‌وه‌ی ئاوازه‌كه‌ چه‌ند كه‌سه‌كه‌ی هیلاك كردووه‌، پێم وایه‌ ئه‌و له‌هه‌موومان باشتر تێده‌گات ئه‌و ده‌وره‌ چه‌ند گرنگ بووه‌.
دیاره‌ هۆنراوه‌ی ئاسوده‌بوون هۆنراوه‌كه‌ هی مامۆستا محەمەد ساڵح دیلانه‌، هۆنراوه‌كه‌ كورته‌، ئه‌وكاته‌ش كه‌ من ئه‌و ئاوازه‌م دانا، له‌شار بووم، به‌ڵام ئه‌م ئاوازه‌ به‌م شێوه‌یه‌ بوترێت چاكه‌، له‌دوای تێكچوونی گفتوگۆی ساڵی 1984 ی یه‌كێتیی نیشتمانیی كوردستان   له‌گه‌ڵ حكومه‌ت، ئه‌م سرووده‌ میلۆدییه‌كه‌ی تۆماركراوه‌، به‌ڵام له‌به‌ر كورت‌و ساده‌یی ئاوازه‌كه‌ی، له‌به‌رچاوی خۆم، رووم نه‌ده‌هات باسی بكه‌م‌و بۆ كه‌سی بڵێم، زۆر كورت بوو، هه‌رچه‌نده‌ پوخت بوو،  هه‌موو جار به‌ شوانم ده‌وت: «شوان من رووم بێت ئه‌و دوو دێڕه‌‌و ته‌واو؟ ئه‌مه‌ بكه‌ین نه‌یكه‌ین؟»  جارێكیان له‌به‌ر خۆمه‌وه‌ بۆ ئاراسم وت، بۆ رۆژی دواتر ئاراس كۆپله‌یه‌كی زۆر به‌هێزی دانابوو، گوێم لێگرت، وتم: «به‌ڕاستی زۆر جوانه‌‌و زۆر به‌هێزه‌»، وتی: «ئه‌وه‌م كردووه‌ بۆ پێشه‌كیی ئاوازه‌كه‌ی دوێنێ بێت»، به‌ڕاستی له‌ دڵه‌وه‌ ده‌مویست باوه‌شی پێدابكه‌م‌و ده‌ستخۆشیی لێ بكه‌م‌و سوپاسی بكه‌م، هه‌ر واشم كرد.
 ئینجا ده‌ستمكرد به‌ نووسینه‌وه‌ی هۆنراوه‌كه‌‌و ئاوازه‌كه‌م بۆ وت، لێره‌دا به‌ پێویستی ده‌زانم ئه‌وه‌ بڵێم كه‌ ئه‌و پێشه‌كییه‌ زۆر له‌ سرووده‌كه‌ پته‌وتره‌‌و دانانێكی داهێنه‌رانه‌یه‌‌و له‌ هیچ مارشێكی تری (كوردی‌و بیانی) ناچێت، من نموونه‌یه‌ك ده‌هێنمه‌وه‌ له‌نێوان «ئه‌ی ره‌قیب»‌و «ئه‌ی كوردینه‌»، ئه‌ی ره‌قیب ئه‌مه‌ هه‌نده‌سه‌كه‌یه‌تی چوار به‌چوار سێ به‌سێ، ئه‌ی كوردینه‌، ئه‌ی مه‌ردینه‌ش، ئه‌و كوردینه‌ی عه‌زیز عه‌لی دایناوه‌، هه‌ر وه‌ك ئه‌ی ره‌قیب وایه‌، من ده‌ڵێم ئه‌و هه‌نده‌سه‌ییه‌ی ئاراس دایناوه‌، هیچ تۆنێكی وه‌رگیراو‌و دزراوی تری تێدا نییه‌‌و به‌ تیمپۆیه‌كی ده‌هۆڵی جوان ده‌ستپێده‌كات، كه‌ به‌ئاسانی هه‌ست به‌ مۆركه‌ كوردییه‌كه‌ی ده‌كرێت‌و كورته‌‌و ده‌ستپێكردنی به‌هێز‌و كۆتاییهێنانی به‌هێزه‌‌و هیچ حه‌شویه‌كی  زیاده‌ی تێدا نییه‌‌و له‌سه‌ر هه‌نده‌سه‌یه‌كی ده‌گمه‌ن داڕێژراوه‌ كه‌ نه‌ له‌پێش ئه‌مدا‌و نه‌ ئێستاش له‌و هه‌نده‌سه‌یه‌ له‌ ئاوازی كوردیدا نابینرێت.
 ئاوازه‌كه‌ هه‌ست‌و وروژاندنێكی به‌هێزی تێدایه‌، وه‌كو هاوڕێیه‌كم ده‌ڵێت (پیاوم ئه‌وێ خۆی بۆ بگیرێت كاتێ گوێبیستی ده‌بێت)، ده‌تجوڵێنێ، لێره‌وه‌ كورت شتێكت پێ ده‌ڵێت، له‌به‌رهه‌مدا زۆر گرنگه‌ له‌م سه‌رده‌مه‌دا ره‌نگه‌ تۆزێك گاڵته‌یان به‌وه‌ بێت كه‌ موسیقای كوردی‌و عه‌ره‌بی‌و من ده‌ڵێم ئه‌سڵه‌ن هه‌ر موسیقای عاله‌می وجودی نییه‌، خۆی هه‌ر موسیقای ئه‌وروپییه‌، به‌ڵام پێشكه‌وتووه‌، بۆیه‌ پێی ده‌ڵێن موسیقای عاله‌می، ئه‌وه‌ نه‌بێت موئه‌لیفێك داینابێت، عاله‌می بێت، موئه‌لیفێكی نه‌مساوی دایناوه‌، موئه‌لیفێكی ئیتاڵی دایناوه‌، به‌ڵام به‌رهه‌مه‌كه‌ی ئه‌وه‌نده‌ جوانه‌، ئه‌وه‌نده‌ به‌قوه‌ته‌ به‌ كوردو عه‌ره‌ب‌و هه‌موو نه‌ته‌وه‌كانی تره‌وه‌ به‌كاری ده‌هێنن‌و رێزی لێده‌گرن، ئه‌و وشه‌ی موسیقای عاله‌مییه‌ ره‌واجی پێدراوه‌و له‌ناو خه‌ڵكدا به‌كارهاتووه‌.
ئێمه‌ سه‌رقاڵی كاره‌كانمان بووین، له‌پڕ ئێواره‌یه‌ك كاك ئه‌رسه‌لان بایز هات بۆ تیپ‌و پێموابێ ئه‌وه‌ باشترین راو چاكترین ده‌ستپێشخه‌ریی ئه‌و بوو به‌درێژایی ئه‌و هه‌موو ماوه‌یه‌ی نزیكی یه‌كبووین، وتی: یه‌كێتی به‌ته‌مایه‌ گورزێكی كوشنده‌ له‌ حكومه‌ت بوه‌شێنێ، دێڕه‌ مۆسیقایه‌كی مارش، سروودێك، شتێكتان نییه‌ بمانده‌نێ له‌ ئێزگه‌ لێی بده‌ین به‌و بۆنه‌یه‌وه‌؟ ئێمه‌ش ئه‌وه‌نده‌ به‌دبه‌ختبووین به‌رهه‌مه‌كانمان وه‌كو پێویست له‌ ئێزگه‌ لێ نه‌ئه‌درا، ده‌یانوت موسیقا زۆر به‌ر فراوانه‌، مانگی جارێك به‌رتان ده‌كه‌وێت، له‌گه‌ڵ شوان به‌ ئاراسمان وت: بۆ ئه‌و سرووده‌ی بۆ لێ ناده‌یت، كورته‌‌و پوخته‌، بزانێت باشه‌ یان نا، یه‌كڕاست كاك ئه‌رسه‌لان وتبووی: زۆرم پێ باشه‌، زوو بۆم بكه‌ره‌ سه‌ر شریت‌و ئه‌گه‌ر ئێوه‌ رازین ئه‌و رۆژه‌ بڵاوی ده‌كه‌ینه‌وه‌، ئێمه‌ش هیچ رێگرییه‌كمان پیشان نه‌دا‌و له‌راستیدا خواخوامان بوو ئێزگه‌ بڵاوی بكاته‌وه‌، به‌و شێوه‌یه‌ كاك ئه‌رسه‌لان ئه‌و خزمه‌ته‌ی كردین‌و پێموایه‌ بڵاوكردنه‌وه‌ی ئه‌م به‌رهه‌مه‌ بووه‌ به‌ڵگه‌یه‌كی زیندوو بۆ زیاتر ناسین‌و سه‌ركه‌وتنی تیپی مۆسیقای شه‌هید كارزان له‌ناو پێشمه‌رگه‌دا‌و زۆریش گفتوگۆی به‌دوای خۆیدا هێنا، ده‌وترا له‌ ئه‌مریكا تۆماركراوه‌‌و ئاوازدانه‌رێكی غه‌یری كورد دایناوه‌‌و له‌و باسانه‌ زۆر بڵاوبۆوه‌، به‌ڵام ئێمه‌ باكمان نه‌بوو، چونكه‌ دڵنیابووین له‌ به‌رهه‌مه‌كه‌‌و گۆرانییه‌كی تریشمان هی شوان بوو له‌گه‌ڵ ئاراس هه‌مان سه‌رگوزه‌شته‌ی به‌سه‌ر هاتبوو، له‌به‌رئه‌وه‌ی له‌ ئێزگه‌ی خۆمان لێیان نه‌دا‌و یه‌كه‌م جار له‌ ئێزگه‌ی (دیموكراتی ئێران) بڵاو ببۆوه‌، پێشمه‌رگه‌ ده‌یانوت: وا گرنگه‌‌و له‌ ئه‌مریكا تۆماركراوه‌‌و شاخی وایه‌‌و باڵی وا، ته‌نانه‌ت ئێزگه‌كه‌ی خۆشمان له‌وانی وه‌رگرتبوو، بڵاوی كرده‌وه‌، قوبادی برای حاكم فه‌رهاد به‌ براده‌رانی وتبوو كاكه‌ ئه‌و گۆرانییه‌ هی شوانه‌‌و له‌و ژووره‌ی ته‌نیشت خۆتان تۆماری كردووه‌، دوایی راستییه‌كه‌یان بۆ روون بۆوه‌ به‌ڵام به‌سه‌ر خۆیان نه‌هێنا.
 ئه‌و به‌رهه‌مه‌ش گۆرانی دایه‌ دایه‌ بوو له‌ هۆنراوه‌‌و وتنی شوان كابان‌و ئاوازی ئاراس بوو، ده‌رباره‌ی «ئاسوده‌بن» یش، له‌ پێشدا ته‌نیا مۆسیقاكه‌ لێدراو بڵاوكرایه‌وه‌ وه‌كو ریكلامێك، مژده‌ی سه‌ركه‌وتنێكی گه‌وره‌یان به‌ خه‌ڵك دا، دوایی كاتێك سرووده‌كه‌ له‌هه‌مان رۆژدا به‌دوای مۆسیقای پێشه‌كییه‌كه‌ بڵاوكرایه‌وه‌، دوای گرتنی ره‌بیه‌كانی دابان‌و هه‌لاج‌و به‌رزاییه‌كانی نێوان شه‌ده‌ڵه‌‌و هه‌ڵه‌دن‌و سه‌رگه‌ڵو، ده‌توانم بڵێم ته‌قییه‌وه‌‌و بووه‌ مایه‌ی خۆشترین ساته‌كانی بوونمان له‌ شۆڕشدا‌و هه‌رچیمان ده‌بینی ده‌ستخۆشیی لێ ده‌كردین‌و ئه‌وه‌ی كه‌ بووه‌ مایه‌ی خۆشحاڵی زیاترمان، ئه‌وه‌ بوو له‌گه‌ڵ مێژووییترین بروسكه‌ی یه‌كێتیی نیشتمانیی كوردستاندا له‌كاتی راپه‌ڕیندا درایه‌وه‌ به‌ گوێی هه‌موو میلله‌تی كورددا‌و میلله‌تی ئازاش سه‌رچۆپیه‌كه‌ی گرت‌و بووه‌ هۆی ئه‌وه‌ی سرووده‌كه‌ زۆر به‌به‌رفراوانتر بناسرێت (ئاراس‌و دیلان‌و تیپ‌و كۆرسه‌كه‌‌و ئێزگه‌‌و ته‌له‌فزیون‌و راپه‌رین‌و ئه‌رسه‌لان)‌و ئێوه‌شم خۆشده‌وێت‌و قه‌رزاربارم كه‌ ئه‌و به‌رهه‌مه‌ زیندوو راگیرا. 
له‌ كۆتاییدا ده‌مه‌وێت رای كوڕه‌كه‌م له‌سه‌ر ئه‌و سرووده‌ بگێڕمه‌وه‌ كه‌ هه‌موو جارێك گوێی له‌ ته‌له‌فزیۆنه‌كان ده‌بێت، سه‌د جار له‌سه‌ر یه‌ك لێی ده‌ده‌ن، پێم ده‌ڵێت باوكه‌ تۆ ئه‌گه‌ر له‌ ئه‌وروپا بوویتایه‌، ده‌بوویته‌ ملیاردێر، چونكه‌ ئه‌و شوێنانه‌ ده‌بێت هه‌ر جارێك لێی ده‌ده‌ن، پاره‌ت بۆ حساب بكه‌ن، بۆ نایكه‌ن؟ منیش بۆ پێكه‌نین پێی ده‌ڵێم پارێزه‌رێكی باشم بۆ بدۆزه‌ره‌وه‌ شه‌ریكین. 
ئێمه‌ ئه‌و موسیقا ژه‌نانه‌ی كه‌ هه‌بووین 11 كه‌س ئه‌ندام بوو، 8ی تر له‌گه‌ڵمان ئه‌ندام بوون، به‌ڵام له‌و وه‌خته‌دا بوو ئه‌م تیپه‌ چه‌ندین ته‌جمید‌و وازهێنان‌و بێتاقه‌تی به‌سه‌ر هاتووه‌، زۆربه‌ی جار ئه‌و براده‌رانه‌ كاتێك هاتونه‌ته‌ ده‌ره‌وه‌، تیپه‌كه‌ ته‌جمید بووه‌، به‌ڵام ئێمه‌ وه‌ك وه‌فایه‌ك بۆ ئه‌وان، ئه‌و سیدییه‌ی رێكخراوه‌ دیموكراتییه‌كان بۆیان تۆماركردین، زۆر سوپاسیان ده‌كه‌ین ئه‌و به‌رهه‌مانه‌مان وه‌ك ئه‌رشیفێك بمێنێته‌وه‌، له‌وانه‌ ناوی هه‌موو ئه‌وانه‌مان نووسیووه‌، حه‌وت گۆرانیبێژ له‌گه‌ڵماندا به‌شداربوون، یه‌كێكیان ئاكۆ بووه‌ شه‌هید بووه‌، 5 كۆرسی هه‌میشیه‌ییمان هه‌بوو ناوی ئه‌وانیشمان نووسیووه‌، به‌ڵام له‌كۆراڵی هه‌ڵه‌بجه‌دا 20 كۆرس له‌گه‌ڵماندا به‌شداربوون، ئه‌و وه‌خته‌ له‌ سه‌قز بووین، ئه‌و ئیشه‌مان كرد، وه‌زعه‌كان باشتر بوو، هه‌موو دارایی ئێمه‌ یه‌كێتیی نیشتمانیی دابینی ده‌كرد، دووجار جه‌نابی مام جه‌لال هاوكاریی كردووین كه‌ بچین ئامێری موسیقا بكڕین، جارێكیش له‌ سه‌قز ئاهه‌نگه‌كه‌مان گێڕا، هیرۆخان پاره‌ی بۆ قه‌رزكردین. یه‌كێتی زۆر بێ پاره‌ بوو، وتی: ئه‌مه‌م قه‌رز كردووه‌، به‌كاری بهێنن، تا پاره‌مان ده‌ست ده‌كه‌وێـت، هه‌ر له‌ سه‌قزیش كاك سه‌ڵاح ره‌شید خزمه‌تێكی زۆری كردین، له‌ خاریجه‌وه‌ هاتبۆوه‌، وه‌ك ئێستا نه‌بوو، خه‌ڵكێكی زۆر له‌ خاریج بێت، به‌به‌رچاوی هه‌موویانه‌وه‌ وتی: كاكه‌ ڤیدۆیه‌كم له‌وه‌ بۆ تۆمار بكه‌ن  ده‌یبه‌ینه‌وه‌ بۆ ئه‌وروپا، زۆرمان پێ خۆشبوو، ئه‌و چووبوو ئه‌و ڤیدۆییه‌ی بردو به‌رگێكی بۆ كردبوو وه‌ك هاوكاریی، شتێكی په‌یدا كردبوو، ناردیان بۆ راگه‌یاندن‌و به‌داخه‌وه‌ هیچیان به‌ئێمه‌ نه‌دا‌و كردیان به‌ دیاریی خۆیان‌و وتیان بۆ ئێمه‌ هاتووه‌‌و بۆ ئێوه‌ نه‌هاتووه‌، ئه‌م تیپه‌ی ئێمه‌ چوار كاسێت‌و دوو ئاهه‌نگی كردووه‌، ئاهه‌نگێك له‌ سورداش، ئاهه‌نگێك له‌ سه‌قز، ئه‌وه‌ی سه‌قزیشمان كرد به‌ سیدییه‌ك تا ئێستاش ئه‌وه‌ی سورداش به‌ سیدی ده‌ستمان نه‌كه‌وتووه‌، خه‌ڵك لای خۆی گۆارنییه‌كانی تۆماركردووه‌، ئه‌و كاته‌ش ئه‌و ئاهه‌نگه‌مان گێڕا له‌سورداش، یه‌كێتیی نیشتمانیی كوردستان لیژنه‌یه‌كی دروستكرد له‌و ده‌شته‌ شوێنێك دیاری بكه‌ین، كاك جه‌بار فه‌رمان بوو كاك عه‌لی بچكۆل بوو، وابزانم كاك ئه‌رسه‌لان‌و براشتان بوو، كاتێك چووینه‌ ئه‌وێ كاك جه‌بار فه‌رمان ئه‌قڵی زور باش بوو، وتی: «كاكه‌ ئێمه‌ ئه‌م ده‌شته‌مان له‌به‌ر ده‌ستدایه‌‌و وتی به‌رزاییه‌ك دیاریی ده‌كه‌ین بۆئه‌وه‌ی خه‌ڵك به‌ ته‌درجی دابنیشی وه‌ك مه‌سره‌حه‌ رۆمانییه‌كان كه‌س به‌رچاوی كه‌س نه‌گرێت، راستی ئه‌و شوێنه‌كه‌ی هه‌ڵبژاردو ئینجا بڕۆ موه‌لیده‌ دابنێ‌و قه‌ره‌باڵغیه‌كه‌ش له‌و لاوه‌ بوه‌ستی، به‌هۆی مامه‌ ریشه‌وه‌ به‌ ره‌حمه‌ت بێت كه‌ له‌پشتی مه‌سره‌حه‌كه‌وه‌ دانیشتبوو، هه‌موو خه‌ڵك ده‌هاتن بۆلای‌و ره‌سمیان له‌گه‌ڵدا ده‌گرت، كاتێك ده‌ستمان به‌كاركرد، هیچ وایه‌رێك كاری نه‌ده‌كرد‌و خێرا براده‌ران هه‌رچۆنێك بێت فیشه‌كانیان چاككرده‌وه‌.
مام جه‌لال-یش خۆی توڕه‌كرد‌و وتی بۆ ئیش ناكات، ئیتر باش بوو كاك فه‌ره‌یدون عه‌بدولقادر فریامان كه‌وت‌و وتی: مام جه‌لال نیو ملیۆن كه‌س هاتووه‌ چاره‌سه‌ر ناكرێت، پێشمه‌رگه‌ش وه‌ك حیمایه‌ی ئێستا نه‌بوو، رێگریی بكات له‌خه‌ڵك، خواخوامان بوو خه‌ڵكمان لێ كۆببێته‌وه‌ بۆئه‌وه‌ی حكومه‌ت بزانی به‌ڕاستی سیاسه‌تی مام جه‌لال ئه‌وه‌بوو ئه‌و ئاهه‌نگه‌ گه‌وره‌یه‌ی كرد، بۆئه‌وه‌ی بڵێت داوای ئاشتی ده‌كه‌ین، له‌سه‌ر ئه‌وه‌ش خواردمان‌و گرفت‌و كێشه‌مان هه‌بوو له‌م تیپه‌. من له‌ تیپی مۆسیقای سلێمانی بووم، شتێكم لێ بگیرایه‌، رامده‌كرد بۆلای مامۆستا خالید، مامۆستا ئه‌نوه‌ر، كاكه‌ ئه‌وشته‌ چۆنه‌، ئێمه‌ی نه‌گبه‌ت له‌وێ به‌حساب له‌هه‌موویان زیره‌كتر بووین، به‌ڵام هه‌ندێك كێشه‌ هه‌بوو بۆمان چاره‌سه‌ر نه‌ده‌كرا.
 بۆ نمونه‌ ده‌مانویست سروودی ئه‌ی كوردینه‌ تۆماربكه‌ین، به‌ راستی من هه‌موو میلۆدییه‌كه‌م له‌به‌رنه‌بوو، براده‌رانیش گوێیان لێ گرتبوو، به‌ڵام كه‌س له‌به‌ری نه‌بوو، ناچاربووم به‌ دزییه‌وه‌ بێمه‌وه‌ بۆ ناوشار‌و چوومه‌ ماڵی گه‌نجۆی ره‌ووف زوهدی، شیوعی بوون، ئه‌وان كه‌س لێیان نه‌ده‌ترسا، شیوعی بوون، هه‌میشه‌ خه‌ڵكیش له‌ماڵیان بوو، كاكه‌ بڕۆ ئه‌و شریته‌ په‌یدا بكه‌، شه‌و دانیشین‌و نۆته‌كه‌ی بنووسینه‌وه‌، ئه‌وه‌  موجازه‌فه‌یه‌كی گه‌وره‌بوو، له‌گه‌ڵ كاك فه‌ره‌یدون چووین بۆ به‌غدا بۆ «سوق سلاسه‌»، كاك فه‌ره‌یدون چووه‌ ئه‌و دیو ده‌رگاكه‌‌و من رامكرد، چووم به‌رامبه‌ر ئه‌وێ گردێك بوو، وه‌ستام، وتم ئه‌گه‌ر ئه‌وان گیران، من راده‌كه‌م، ئیتر دوای ماوه‌یه‌ك كاك فه‌ره‌یدون هاته‌ ده‌ره‌وه‌‌و سه‌یری ئه‌ملاولای كرد، دیاره‌ وتم هیچ نه‌بووه‌، چووم بۆلای، وتی: له‌كوێ بوویت، وتم: وه‌ڵڵا له‌و گرده‌بووم وتم نه‌وه‌ك ئێوه‌ گیرابن، ئیتر چووین ئاله‌ته‌كانمان كڕی‌و هێنامانه‌وه‌‌و خستوومانه‌ته‌ ناو جێب‌و بردوومانه‌ بۆ قزله‌ر، له‌وێووه‌ به‌وڵاخدا بیبه‌ین «بێز گیتار»ێكمان كڕیبوو، ده‌سكی بێزگیتاره‌كه‌ كه‌ له‌ هه‌مووی گرنكتربوو نه‌سبه‌كه‌ی له‌سه‌ر بوو، وڵاغه‌كه‌ دای به‌به‌رداێكدا‌و ده‌سككه‌ی شكا، چووینه‌وه‌ ناوزه‌نگ، كاكه‌ چی بكه‌ین، ئیتر كاك شوان ورده‌ ورده‌ كاك سالاری گیتار‌و كاك وشیار‌و ئاراس به‌هه‌موویان دانیشتن‌و به‌ شیوه‌یه‌ك ئه‌و ده‌سكه‌ چاك بكه‌نه‌وه‌، به‌رگه‌ی ئه‌وه‌ بگرێت ، ئاخر ئه‌و هێزه‌ی له‌سه‌ر ئه‌و ته‌لانه‌یه‌ زۆرن ئه‌مه‌ به‌شێوه‌یه‌ك بێت نه‌جووڵێت بۆئه‌وه‌ی نه‌سبه‌كه‌ به‌قوه‌ت بێـت.
 یه‌كێك له‌كێشه‌كانی تر ئه‌وه‌ بوو ئه‌و تیپه‌ی ئیمه‌ ئۆكۆردین‌و كه‌مانچه‌یه‌ك‌و ترامپێتێكمان له‌گه‌ڵدابوو، چه‌ند جومله‌یكی ده‌زانی عه‌سكه‌ری بوو، ئاسۆ‌و كاك وشیاریش ئیقاعی لێ ده‌دا، ده‌نگی گڕمان نه‌بوو، ئاراس‌و  كاك شوان وتیان تۆ ده‌بێـت گیتار لێبده‌یت، وتم بابه‌ به‌ هه‌زارحاڵ سه‌ر له‌ كه‌مانچه‌كه‌ش ده‌رده‌كه‌م، گیتاری چی، توانامان له‌گه‌ڵدا بوو عازف گیتاربوو، وتی من سێ رۆژ ده‌رست پێ ده‌ڵێم، ده‌تكه‌م به‌ عازف گیتار، وتم با ده‌ست پێبكه‌ین، ئه‌وه‌بوو به‌ سێ رۆژ هه‌موو شته‌كانی پێوتم، ئینجا جیهازمان نه‌بوو، گیتاریش ده‌بێت به‌ فیشه‌یه‌ك ره‌بتی بكه‌یت بۆئه‌وه‌ی ده‌نگه‌كه‌ بداته‌وه‌، منی فه‌قیریش نۆته‌كه‌م له‌به‌رده‌ستی خۆم داده‌نا‌و گوێم لێنه‌بوو، چونكه‌ فیشه‌كه‌ی ره‌بت نه‌كردبوو به‌ ته‌سجیله‌كه‌وه‌، كاك ئه‌نوه‌ر ره‌نگه‌ ئه‌وه‌ باش بزانێت، گوێم لێی نه‌بوو، ته‌نانه‌ت رۆژێكیان كارێكمان كرد، كاك وشیار‌و ئه‌وان وتیان گیتاره‌كه‌ی تێدا نییه‌، وتی ره‌نگه‌ لێشی نه‌دابێت، رزگارێكمان له‌گه‌ڵدا بوو، توڕه‌ش بوو، وتم كاكه‌ وه‌ڵا هه‌موویم لێداوه‌، دوایی سه‌یرمان كرد فیشه‌كه‌ لێ بوبۆوه‌، ئینجا وه‌ره‌ هه‌موو مادده‌كان تۆمار بكه‌ره‌وه‌.
 یه‌كێك له‌ كێشه‌كانی تر ئه‌وه‌بوو به‌ موه‌لیده‌ كاره‌بامان دابین ده‌كرد، موه‌لیده‌ش به‌نزینی ده‌ویست، یه‌كێتیش ده‌یوت به‌نزین بۆ ئێزگه‌ هه‌یه‌، ئه‌و به‌رزانی قاله‌ی خه‌ڵوزه‌ ماڵی ئاوابێت هه‌رچی سه‌یاره‌یه‌ك ده‌هاته‌ گاپیڵۆن، به‌رزان لیترێكی لێ ده‌سه‌ند، ده‌یوت بۆ تیپه‌، به‌رمیلێكی بۆ په‌یداكردین، وه‌ڵا وابزانم دوو سیدیمان به‌وه‌ی به‌رزانی قاله‌ی خه‌ڵوز تۆماركرد، ئه‌گه‌ر نه‌بوایه‌ كارمان بۆ نه‌ده‌كرد، ئه‌و موه‌لیده‌یه‌ش زه‌بزه‌به‌كه‌ی به‌رزو نزمی ده‌كرد، ده‌نگه‌كه‌ی تێكده‌دا، باش بوو موهه‌ندیس له‌وێ بوو، جاری واهه‌بوو حه‌مه‌ جه‌زا له‌ شارباژێڕه‌وه‌ ده‌هات، ده‌بوایه‌ شه‌وی دواتر گۆرانییه‌كانمان تۆمار بكردایه‌ته‌وه‌، كێشه‌یه‌كی تریش ئه‌وه‌بوو بڵێین ئێمه‌ مۆسیقا لێده‌ده‌ین‌و بڵێن هه‌قی هیچمان نییه‌، ئێمه‌ پێشمه‌رگه‌ بووین، كاك شوان موزیع بوو، كاك وشیار  له‌ ئیعلام بوو، ئاراس له‌سه‌ر جیهازبوو، كاكه‌ حمه‌ جه‌زا معاون كه‌رت بوو، منیش ئه‌ندام كه‌رتی كه‌رتی رێكخستنی دوكان بووم، رابه‌ر سیاسیی تیپی 47 بووم، ئه‌وه‌ ئه‌ركی ده‌خسته‌ سه‌رمان، به‌ڵام ئه‌وكاته‌ی ده‌مانویست كۆببینه‌وه‌، هه‌موو ده‌زگاو شوێنه‌كان ئیزنیان ده‌داین، ده‌یانوت: بڕۆن كاره‌كه‌ بكه‌ن‌و وه‌رنه‌وه‌، ئیتر مانگێك دوو مانگ ئیشه‌كانمان ده‌كرد‌و ده‌گه‌ڕاینه‌وه‌ بۆ ئیشه‌كانی خۆمان. كاره‌كانمان ده‌خسته‌ سه‌ر شریت‌و بڵاومان ده‌كرده‌وه‌.
ئه‌و كێشانه‌ی تر كه‌ تووشمان ده‌بوو، زۆرجار كارێكمان تۆمار ده‌كرد، دوایی سه‌یرمان ده‌كرد ده‌نگی تۆپ‌و ته‌یاره‌ی تێدا ده‌رچووه‌، ئێ خۆ ناتوانی ئه‌وه‌ بڵاوبكه‌یته‌وه‌، راسته‌ جوانییه‌كی ئه‌دا به‌ كاره‌كان، به‌ڵام جومله‌كانی وا لاواز كردبوو، به‌كه‌ڵك نه‌ده‌هات، له‌به‌ر ئه‌وه‌ جارێكی تر ده‌بوایه‌ تۆمارمان بكردایه‌ته‌وه‌.
 باسی كه‌میی هونه‌رمه‌ندانیشم كرد، ئه‌وه‌ ئه‌زمه‌یه‌كی زۆر گه‌وره‌بوو، من هه‌ر عاده‌تم وایه‌، بمه‌وێت شتێك بنووسم، ئێستا ئه‌و شته‌ی نووسیومه‌ ناردوومه‌ بۆ كاك شوان‌و كاك ستران، كاكه‌ پیاوی چاك بن بزانن له‌كوێدا هه‌ڵه‌م كردووه‌، تێبینم بده‌نێ، به‌ڵام له‌وێ كێشه‌كه‌مان ئه‌وه‌بوو كه‌س نه‌بوو پێی بڵێی كاكه‌ ئه‌و پێشه‌كییه‌ باشه‌  یان خراپه‌؟ هه‌ر خۆمان بڕیارمان ده‌دا، پێمان خۆشبوو خه‌ڵكی تر هه‌بوایه‌‌و پرسمان پێ بكردنایه‌، هه‌تا كاك خالید له‌بیریه‌تی، بۆ لێره‌ ناڕۆم من تۆزێك ته‌مه‌ڵم له‌ كۆپله‌ دانان، هه‌رچیم ده‌كرد كۆپله‌یه‌كم بۆ پێشه‌كی لێره‌ ناڕۆم بۆ دانه‌ده‌نرا، هاتم چووم بۆ لای مامۆستا خالید، وتم: كۆپله‌یه‌كم بۆ دابنێ، مامۆستا خالیدیش كۆپله‌كه‌ی دانا‌و نۆته‌كه‌ی بۆ نووسیمه‌وه‌، بردمه‌وه‌، مامۆستاش چونكه‌ گوێی لێ نه‌گرتبوو، ئیتر ده‌ردی ئیرانی ده‌ڵێ جۆرمان كرد، به‌ڕاستی ئه‌و وه‌خته‌ ئه‌ركمان قورس بوو، ئیتر نازانم شانسمان هه‌بوو پێشمه‌رگه‌ هاوكاریی كردین، ئێستا شته‌كان خه‌ڵك گوێی لێ ده‌گرێت، به‌راستی ئێستا زۆر شانازیی پێوه‌ ده‌كه‌ین‌و شانازیی هونه‌رمه‌ند‌و نووسه‌ر‌و شاعیر ئه‌وه‌یه‌ میلله‌ته‌كه‌ی پێی خۆشبێت، ئه‌و كاره‌ی كردووه‌ گه‌وره‌ترین فه‌خر‌و شانازییه‌ بۆ ئێمه‌، من زۆر سوپاسی ئه‌و ته‌له‌فزیۆن‌و ده‌زگایانه‌ ده‌كه‌م هاوكارییان كردووین‌و وتویانه‌ مه‌تۆرین‌و ئیشی خۆتان بكه‌ن‌و هه‌مووی ئه‌و كه‌سانه‌شی له‌سه‌ریان نووسیوین‌و ده‌یانه‌وێت‌و هه‌ڵسه‌نگاندنمان بۆ بكه‌ن‌و هه‌ڵمان بسه‌نگێنن، هه‌روه‌ها ئه‌م كۆڕه‌ خۆشه‌یسته‌ش من سووپاسی هه‌موو لایه‌ك ده‌كه‌م.

ستران عه‌بدوڵڵا: 
زۆر سوپاس برایان.. ده‌ستتان خۆشبێت، ئێستا راسته‌وخۆ ئه‌م كۆڕه‌ ده‌گوازرێته‌وه‌ له‌لایه‌ن كه‌ناڵی سه‌ته‌لایه‌تی گه‌لی كوردستان‌و كه‌ناڵی كوردساته‌وه‌، كامێرای رۆژنامه‌ی كوردستانی نوێش له‌ فه‌یس بووكه‌وه‌ راسته‌وخۆ ده‌یگوازێته‌وه‌، دواتریش وه‌ك پاشكۆیه‌ك له‌ كوردستانی نوێ بڵاوی ده‌كه‌ینه‌وه‌. مامۆستا ئه‌نوه‌ر ناوت زۆر هات، ده‌توانی قسه‌مان بۆ بكه‌یت كاك شوانیش كادری راگه‌یاندن بووه‌ فه‌رموو ده‌توانی قسه‌مان بۆ بكه‌یت.

ئه‌نوه‌ر قه‌ره‌داغی: 
ئه‌وان باسی هه‌موو شتێكیان كرد، ناتوانم له‌وان زیاتر باس بكه‌م.
بابه‌كر دڕه‌یی:
 ده‌ستخوشی له‌ كاك دلێر‌و كاك ئاراس ده‌كه‌م، ئه‌وانه‌ ماییه‌ی شانازین بۆ هه‌موولایه‌ك، من كاتی خۆی له‌ مه‌راسیمێكدا له‌ ئوتێل فه‌ره‌ح باسم كرد، ده‌ستپێشخه‌ریی ئه‌مان كاتی خۆی ماییه‌ی شانازییه‌، ته‌سه‌ور بكه‌ 36 ساڵ پێش ئێستا، ئینسان بتوانێت پێشنیازی دروستكردنی تیپی مۆسیقا بكات، من ئه‌وه‌ی به‌لامه‌وه‌ گرنگه‌، به‌شه‌ هونه‌رییه‌كه‌ شتێكی گرنگه‌، به‌ڵام ده‌ستپێشخه‌رییه‌كه‌ زۆر گرنگه‌، من به‌دڵ پیرۆزبایی ده‌كه‌م، هه‌م بۆ كلیپه‌كه‌، من نه‌مزانی شتی وا كراوه‌، هه‌م بۆ ئه‌و رێزلێنانه‌ی به‌غدا كه‌ بۆ كاك دلێر كه‌ وه‌زاره‌تی رۆشنبیریی عیراق بیری لێكردۆته‌وه‌ بۆ كاك دلێری بكات، جێی ده‌ستخۆشییه‌و من سوپاستان ده‌كه‌م، هیچ شتێكم نییه‌ ده‌ستتان خۆشبێت.

دلێر ئیبراهیم: 
من زۆر سوپاسی كاك بابه‌كر ده‌كه‌م به‌ڕاستی من شه‌و ته‌له‌فونم بۆ كرد، وتم: حه‌زده‌كه‌م بێیت، وتی مه‌جالم نییه‌، ئێمه‌ جومله‌یه‌كی ئه‌ومان به‌كارهێناوه‌، ئه‌و یه‌كه‌م كه‌س بوو كه‌ وتی: منداڵێكی 19 ساڵ بڕاوات به‌رامبه‌ر مام جه‌لال دانیشێت من به‌ ئاراسم وت بڕۆ ئه‌و وشه‌یه‌ به‌كار بهێنه‌، به‌ڵام خۆشبه‌ختانه‌ خۆی هاتووه‌.
بابه‌كر دڕه‌یی 
ئێمه‌ له‌مه‌ودوا كاری رۆژنامه‌نووسی ده‌كه‌ین، ئێوه‌ش كاری هونه‌ریی بكه‌ن.
ستران عه‌بدوڵڵا: 
ئه‌وه‌ش وه‌ك نوكته‌كه‌ی مامۆستا شێركۆ بێكه‌س‌و ناسری ره‌زازی لێهات، بێگومان براده‌ران ئه‌م كاره‌ به‌ پشتیوانیی مه‌كته‌بی دارایی یه‌كێتیی نیشتمانیی كوردستان ده‌یكه‌ین ‌و راسته‌وخۆشه‌‌و پاره‌كه‌ له‌ ده‌خیله‌ی ئه‌وان وه‌رده‌گرین، به‌ڵام له‌مه‌ودوا ته‌سلیمی پایته‌ختی رۆشنبیریی ده‌كه‌ین، ئیمه‌ خۆمان ته‌رخان ده‌كه‌ین بۆ ئیشی هونه‌ری.
بابه‌كر دڕه‌یی:
 به‌سه‌رچاو بۆ هه‌ر كارێكی هونه‌ریی ئێمه‌ ئاماده‌ین.
ستران عه‌بدوڵڵا:
ده‌ستت خۆشبێت ئه‌وه‌ نوكته‌كه‌ی مامۆستا شێركۆ بێكه‌س‌و كاك ناسرتان بیستووه‌، كاك ناسر وتبووی خه‌ریكم هه‌ندێك شیعر ده‌نووسم ئه‌ی تۆ خه‌ریكی چیت؟ مامۆستا شێركۆش وتبووی: منیش خه‌ریكی گۆرانیم، ئێمه‌ش له‌مه‌ودا رۆژنامه‌ ده‌رده‌كه‌ین‌و كاره‌ هونه‌رییه‌كان ده‌ده‌ین به‌ كاك بابه‌كر.
ئه‌نوه‌ر قەرەداغی:
 به‌ڵام كاك ستران تۆش گۆرانیت وتووه‌؟
ستران عه‌بدوڵڵا: 
به‌ڵی گۆرانیم وتووه‌ له‌ ژێر زه‌مینه‌كه‌ی كاك دلێر نا، له‌ ژێر زه‌مینه‌كه‌ی مامۆستا ئه‌نوه‌ر ، به‌ڵام هێشتا بڵاومان نه‌كردۆته‌وه‌.
دكتۆر مارف عومه‌ر گوڵ:
 من زۆر سوپاستان ده‌كه‌م، راسته‌ ئه‌و تیپه‌ بچووكه‌، به‌ڵام جوانه‌‌و یاده‌وه‌رییه‌كی به‌نرخی رۆژانێكی شیرینه‌، من وه‌ك گوێگرێگ كاریگه‌ریی ئه‌و سروودو گۆرانیانه‌ له‌سه‌ر خۆمان زۆره‌، یه‌كێك له‌و سروودانه‌ «لیڕه‌ ناڕۆم»، ئه‌و سرووده‌ یه‌ك پێداگریی تێدایه‌ كه‌ ده‌ڵێ: «لێره‌ ناڕۆم»، ئه‌وكات دێهات وێران ده‌كرێت، راده‌گوێزرێین، له‌و بارودۆخانه‌دا ئه‌و سروود‌و گۆرانییانه‌ بایه‌خێكی جوانیان هه‌بوو، هه‌م له‌ شاخ‌و هه‌م له‌ شاره‌كانیشدا، من بۆ خۆم یه‌كێكم له‌وانه‌ی ره‌نگه‌ هه‌موو شته‌كانم گوێ لێ بووبێـت، هه‌وڵم داوه‌ ده‌ستم بكه‌وێت‌و چێژم لێ وه‌رگرتووه‌‌و ئه‌و دۆست‌و براده‌رانه‌ش لێمه‌وه‌ نزیك بوون، یان كاسێتم داوه‌ پێیان، یان لێم وه‌رگرتوون، بۆیه‌ هه‌رگیز منیش له‌بیرم ناچێته‌وه‌، كاریگه‌ریی ئه‌و هونه‌ره‌ له‌و رۆژه‌ سه‌ختانه‌دا هه‌رگیز له‌بیرم ناچێته‌وه‌، زۆر جوان بوو، ئه‌و به‌ڕێزانه‌ هه‌ر هه‌موویان كاك دلێر‌و كاك ئارس‌و ئه‌وانه‌ی به‌شداربوون هه‌تا هه‌تایه‌ نیشانه‌ی رێز‌و سومبولێكی جوانی هونه‌ر‌و ئه‌دایه‌كی نیشتمانپه‌روه‌رانه‌ی باش بوون، ئێمه‌ خۆشه‌ویستیی زۆرمان بۆ هه‌موویان هه‌یه‌‌و ده‌ستان خۆشبێت.
شوان كابان:
 زۆر سوپاس بۆ هه‌موو لایه‌ك، سوپاسی كاك دلێر‌و كاك ئاراس ده‌كه‌م، سوپاسی كوردستانی نوێش ده‌كه‌م كه‌ ئه‌و ده‌رفه‌ته‌ی بۆ ره‌خساندین تا كۆمه‌ڵێك راستی ئه‌و سه‌رده‌مه‌ بخه‌ینه‌ڕوو، من تێبینه‌یه‌ك ‌و پێشنیازێكم هه‌یه‌ بۆ كاك دلێر‌و بۆ  كوردستانی نوێ، به‌ڕاستی حه‌زده‌كه‌م پیرۆزبایی له‌ برای خۆشه‌ویستم كاك دلێر بكه‌م، رۆژی چوارشه‌ممه‌ وه‌زاره‌تی رۆشنبیری عیراق له‌ به‌غدا رێزیان له‌ كاك دلێر نا بۆ ئه‌و ماندووبوونه‌ی له‌ بواری مۆسیقادا پێشكه‌شی كردووه‌ له‌ رابردوودا، تێبینیه‌كه‌م ئه‌وه‌یه‌ من ئه‌وه‌شم خوێندۆته‌وه‌ جگه‌ له‌ ئاهه‌نگی سورداشی ساڵی 1984، له‌گه‌ڵ ڤیستیڤاڵی نه‌ورۆزو هه‌ڵه‌بجه‌ 1990 با بڵێین ئه‌وه‌ ئاهه‌نگی راسته‌وخۆ بوو، به‌ڵام رووبه‌ڕووی خه‌ڵك له‌سه‌ری ساڵی 1981 بۆ 1982-ش ئاهه‌نگێكمان بۆ هێزی پێشمه‌رگه‌ كرد، ئه‌وكاته‌ له‌ سه‌ركردایه‌تی كۆببوونه‌وه‌ له‌هۆڵی شه‌هید شیهاب له‌ ناوه‌ندی كۆمه‌ڵه‌، هه‌روه‌ها ساڵی 1982 به‌بۆنه‌ی یه‌كی ئایار جه‌ژنی كرێكارانه‌وه‌ ئاهه‌نگێكی دیكه‌مان پێشكه‌ش كرد، پێشنیازه‌كه‌م بۆ كاك دلێر‌و كوردستانی نوێ ئه‌وه‌یه‌و  داواكاریشم له‌ یادی هه‌ڵه‌بجه‌دا كه‌ كاك دلێر بۆی بڕه‌خسێت‌و كوردستانی نوێ ئه‌و فرسه‌ته‌ی هه‌بێت، كورته‌یه‌كمان له‌سه‌ر كۆڕاڵی هه‌ڵه‌بجه‌ بۆ باس بكات، كه‌ چۆن شیعره‌كانی رێكخستووه‌‌و ڤیستیڤاڵی هه‌ڵه‌بجه‌ له‌و كات‌و سه‌رده‌مه‌دا چۆن كراوه‌، رێگره‌یه‌كانییان چۆن بوو، كاردانه‌وه‌ی دوای ڤیستیڤاڵه‌كه‌ چی بوو، كۆڕاڵی هه‌ڵه‌بجه‌ گرنگیی خۆی له‌و كات‌و سه‌رده‌مه‌ وه‌ك ئێران چۆن بووه‌و چی بوو؟ پێم خۆشه‌ ئه‌گه‌ر ئه‌و ده‌رفه‌ته‌ش بگونجێ بۆ كاك دلێر ئه‌و باسه‌ بكرێـت‌و زۆر سوپاستان ده‌كه‌م.
بابه‌كر دڕه‌یی: 
به‌ڕاستی ئه‌وه‌ بابه‌تێكی زۆر گرنگه‌ كه‌ كاك شوان باسی كرد، به‌بڕوای من ئه‌وه‌ی كاك دلێر باسی كرد، مێژووییه‌كی ته‌واو بوو، مێژوویه‌كی فراوان بوو له‌سه‌ر شتی هونه‌ری، ئێستا شتێك له‌ جیهاندا هه‌یه‌، مێژووی زاره‌كی واته‌ مێژووی گێڕانه‌وه‌، ئه‌گه‌ر جه‌نابت خۆشت تاقه‌تت نییه‌ بینووسیته‌وه‌، مێژووی ئه‌و ماوه‌یه‌ی كه‌ له‌ شاخ میژوویه‌كی ونه‌، ئه‌گه‌ر جه‌نابت بێیت قسه‌ بكه‌یت بۆ كه‌سێك‌و ریكۆردی بكات. ئێستا من ده‌زانم 45 به‌رهه‌متان هه‌بووه‌، ئێستا ده‌زانم كاك ئه‌رسه‌لان مه‌سئولتان بووه‌، ئێستا ده‌زانم فڵان فڵان ناوه‌كان ئه‌و مێژووه‌ مێژوویه‌كه‌ پێویسته‌ نه‌وه‌ی نوێ بیزانێت‌و خه‌ڵكی كوردستان لێی شاره‌زابێت، ئێستا سلێمانی پایته‌ختی رۆشنبیرییه‌، به‌شێكی زۆری په‌یوه‌ندیی هه‌یه‌ به‌ كاری مۆسیقییه‌وه‌، به‌شێكی مامۆستا ئه‌نوه‌ره‌، به‌شێكی مامۆستا خالیده‌، به‌شێكی ئێوه‌بوون، ئه‌مانه‌ مایه‌ی شانازییه‌ كه‌ كاتی خۆی ئێمه‌ له‌ده‌روه‌بووین، هانده‌دراین، كاری هونه‌ری ئێمه‌ی هانده‌دا بۆ حه‌ماسی شۆڕشگێرانه‌، ئه‌م حه‌ماسه‌ چۆن هات؟ چۆن دروستبووه‌؟ ئه‌و مێژووه‌ به‌بڕوای من شاراوه‌یه‌، كێ بینووسێته‌وه‌؟ كه‌سانێك كه‌ خۆیان تیایدا بوون، ئینجا پێشنیاز ده‌كه‌م وه‌ك كاك ستران باس ده‌كات، حه‌قی پێشنیازم هه‌بێتن لێره‌دا ئه‌و مێژووه‌ بنووسرێته‌وه‌‌و ئێمه‌ ئاماده‌ین بۆ چاپكردن‌و بڵاوكردنه‌وه‌ی له‌ خزمه‌تداین.

دلێر ئیبراهیم: 
كاك دكتۆر یه‌كێك بوو له‌وانه‌ی ئه‌وسا شاعیرێك بوو، شتی جوانی ده‌نووسی، به‌ڕاستی ئه‌ویش یه‌كێك بوو له‌وانه‌ی كه‌ هانیداوین‌و ده‌یوت: به‌رده‌وام بن، هه‌قی هیچتان نه‌بێـت، ئیشه‌كه‌ وایه‌، ئه‌و تێبینییانه‌ی كاك شوان راستده‌كات، من نووسیبوومه‌وه‌، وتیشم داومه‌ به‌ كاك شوان، ئه‌م تیپه‌ جگه‌ له‌ سێ ئاهه‌نگی بچووك، له‌ هۆڵی خاڵه‌ شیهاب دوو ئاهه‌نگی گه‌وره‌ی كردووه‌، ئه‌وه‌م نووسیوه‌، به‌ڵام ئه‌وه‌یه‌ مرۆڤ شته‌كه‌ ناخوێنیته‌وه‌، بچیته‌وه‌ سه‌ر یاده‌وه‌ریی خۆت‌و ته‌مه‌نیش له‌ 60 ساڵ تێپه‌ڕبووبێت، یاده‌وه‌ریت خیانه‌تت لێده‌كات‌و هه‌موو شته‌كان ناهێنێته‌وه‌ پێشه‌وه‌، ئه‌و تێبینییه‌ی كاك بابه‌كریش وایه‌، ئه‌و تیپه‌ی ئێمه‌ یه‌كه‌م ئه‌وانه‌ دروستیان كرد كه‌ له‌ شاخ بوون، له‌سه‌ره‌تادا سه‌ر به‌یه‌كێتیی نیشتمانیی كوردستان بوو، ئه‌م براده‌رانه‌ش زۆر باش ئیداره‌یان نه‌ده‌كردن، من چوومه‌ ده‌ره‌وه‌ وتیان كاكه‌ كه‌رتی عه‌سكه‌ریمان زۆره‌، تۆ بڕۆ له‌گه‌ڵ ئه‌واندا خه‌ریك به‌و كاری خۆشته‌، زۆر غه‌دریان له‌ ئارس كردبوو، وتم بڕۆم هه‌روه‌ك براش بێـت، بیخه‌مه‌وه‌ جێی خۆی، به‌ كاك شوان ‌و كاك وشیارم وت، لیژنه‌یه‌كی هونه‌ریی دروست بكه‌ن، چه‌ند كه‌سن بیكه‌ن به‌ لیژنه‌ی هونه‌ریی، من دێم كه‌مانه‌كه‌ ده‌گرم به‌ده‌ستمه‌وه‌‌و ده‌ڵێم ئه‌مه‌ كاره‌كه‌مه‌، ئه‌و ژه‌نینه‌ كه‌مه‌، ئێوه‌ بڕیار بده‌ن، له‌سه‌ر بڕیاری لیژنه‌ی هونه‌ریی ئه‌و كوڕه‌ وه‌رگیرا، ئه‌و كاته‌ منیش دێمه‌ تیپه‌وه‌‌و خۆمان چی ده‌كه‌ین ده‌یكه‌ین. وتیان چۆن شتی واده‌بێـت؟ ئێمه‌ تۆ ده‌ناسین؟ وتم: «نا ئه‌وه‌ بۆ ئه‌وه‌بوو رێگریی له‌ براده‌رێكی تر بكه‌ین كه‌ نووسی با فڵان كه‌س له‌ تیپدا بێت، ده‌ڵێین با له‌لیژنه‌ی هونه‌رییه‌وه‌ بێت، سه‌یرمان كرد ئه‌وه‌شمان بۆ نه‌ده‌چووه‌سه‌ر، سه‌یرمان كرد له‌سه‌ر‌و خۆمانه‌وه‌ گه‌وره‌تربوون‌و ئه‌ندامی مه‌كته‌بی سیاسی بوون، ئیتر نه‌گه‌شتینه‌ ئه‌نجام‌و قڵیشایه‌وه‌ له‌ نێوانماندا، هه‌موومان تیپمان به‌جێ هێشت‌و وتمان فه‌رموو خۆت كاره‌كان بكه‌‌و ئێمه‌ نایكه‌ین، بێگومان به‌خۆشی جیابووینه‌وه‌‌و وازمان هێنا، دوایی كه‌ وازمان هێنا، به‌ڕێز مام جه‌لال خه‌ڵكی نارد به‌ شوێنماندا‌و وتی وه‌رن ئه‌وه‌ چیده‌كه‌ن؟ من تۆ له‌وێ بیت‌و ئه‌و له‌وێ بێت، وتمان ئێمه‌ پێشمه‌رگه‌ین، وتی نا من ده‌مه‌وێت جێگایه‌ك هه‌بێت نووسرابێت تیپی مۆسیقا، له‌ناو شۆڕشدا ده‌بێت ئه‌وه‌مان هه‌بێت، نابێت به‌و شێوه‌یه‌ بێت، منیش وتم به‌خوا به‌و رێگه‌ییه‌ی ئێستا هه‌یه‌ له‌ناو شۆڕشدا ناتوانین ئیش بكه‌ین، وتی: «تۆ رێگه‌یه‌كم بۆ دانێ؟» وتم: «وه‌ڵڵا عه‌قڵم به‌هیچ رێگایه‌ك ناشكێت، به‌ڵام من ده‌مه‌وێـت ئازادبین، كه‌س په‌یوه‌ندیی پێمانه‌وه‌ نه‌بێت، كه‌س شیعر‌و ئاواز فه‌رز نه‌كات، ئێمه‌ ئیشی خۆمان ده‌كه‌ین‌و پێویستمان به‌ باره‌گایه‌‌و پێویستمان به‌ هه‌موو شتێكه‌». وتی: «من وابزانم شتێكم به‌خه‌یاڵدا هاتووه‌، وتی بڕۆن یه‌كێتییه‌كی هونه‌رمه‌ندانی كوردستان دروست بكه‌ن، نه‌چی ئه‌ندامه‌كانی یه‌كێتیی كۆبكه‌یته‌وه‌‌و بڵێی ئه‌وه‌ یه‌كێتیه‌كه‌یه‌ دروستم كردووه‌، ئه‌گه‌ر ئه‌وه‌ بێت من خۆم به‌یانێكیان بۆ ده‌رده‌كه‌م‌و ته‌واو، بڕۆن یه‌كێتییه‌كی هونه‌رمه‌ندان دروست بكه‌ن، سه‌رتاسه‌ری كوردستان بێت، ئێوه‌ بڕۆن ببن به‌ ئه‌ندام‌و وه‌ك ده‌زگایه‌ك سه‌ر به‌یه‌كێتیی هونه‌رمه‌ندانی كوردستان بن، هه‌م پێشمه‌رگه‌ی ئێمه‌ بن‌و هه‌م ئه‌ندامی ئه‌وێش بن، لای ئێمه‌ بڕۆن بۆ ره‌بییه‌كان‌و له‌ كاره‌كه‌ی خۆشتان كه‌مانه‌كه‌ بگرن به‌ده‌ستانه‌وه‌»، وتم: «ئاخر لێمان قبوڵ ناكه‌ن»، وتی: «من خۆم ئه‌ندامی په‌یوه‌ندیی ده‌بم له‌لایه‌نی یه‌كێتیی نیشتمانی كوردستانه‌وه‌، ئێوه‌ش یه‌كێك بۆ خۆتان دابنێن!» منیش وتم: «براده‌ران پێیان باشه‌ ئه‌و په‌یوه‌ندییه‌ بكه‌م له‌ نێوانی تیپ‌و یه‌كێتی؟» وتی: «هه‌تا ئه‌و دووانه‌مان ده‌مرین ئه‌و په‌یوه‌ندییه‌ ده‌ڕوات».
 دواتر  یه‌كێتیی هونه‌رمه‌ندانی كوردستان راگه‌یه‌ندرا له‌ رۆژی 1/3/1983، ئه‌وكاته‌ ئێمه‌ش تیپه‌كه‌مان زیندوو كرده‌وه‌ وه‌ك ئۆرگانێكی سه‌ربه‌ كۆمیته‌ی شاخی یه‌كێتیی هونه‌رمه‌ندانی كوردستان، ده‌ستمانكرده‌وه‌ به‌كاركردن، ئه‌و راستییه‌ی كه‌ لای زۆرینه‌ شاراوه‌یه‌ ئه‌وه‌یه‌ كه‌ ئێمه‌ په‌یوه‌ندییه‌كانمان له‌ نێوان یه‌كێتیی هونه‌رمه‌ندان‌و یه‌كێتیی نیشتمانیی كوردستاندا سه‌رله‌نوێ رێكخست‌و رێككه‌وتین یه‌كێتی هاوكاریی تیپ بكات، به‌بێ ده‌ستتێوه‌ردان‌و ئه‌ندامانی تیپیش به‌رده‌وام بن وه‌كو پێشمه‌رگه‌ له‌ناو ئه‌و حزبه‌ی كه‌ هه‌ڵیده‌بژێرن‌و كاری هونه‌ریش بكه‌ن.
 كاك جه‌بار فه‌رمان هاوكاریی زۆری كردین، جێگایه‌كی بۆ دیاریكردین، كاك جه‌بار زۆر شه‌ڕانی‌و ئازابوو، هه‌ندێك گۆرانیمان لێ ده‌دا به‌دیارییه‌وه‌ ده‌گریا، به‌تایبه‌تی كه‌ڵكی قه‌یوان، ده‌یوت: «خۆمم بیر ده‌كه‌وێته‌وه‌ كه‌ له‌گه‌ڵ جه‌مالی عه‌لی باپیر به‌و شاخانه‌دا هه‌ڵده‌گه‌ڕاین‌و ده‌چووین بۆ سلێمانی، ده‌یوت ئه‌و گۆرانییه‌ ئیحساسی منی تێدایه‌».
 من لێره‌دا به‌ پێیوستی ده‌زانم راستیه‌ك بخه‌مه‌ڕوو، دان به‌وه‌دا بنێم كه‌ ئه‌ندازیاری راسته‌قینه‌ی ئه‌م حاڵه‌ته‌ به‌ڕێز مام جه‌لال بوو، هه‌ر خۆیشی بووه‌ ئه‌ندامی په‌یوه‌ندیی له‌گه‌ڵماندا‌و زۆر سوپاس.
وشیار محه‌مه‌د: 
براده‌ران كاك دلێر باسیكرد به‌رهه‌مه‌كان له‌به‌ر ده‌ستی به‌ڕێزتانه‌‌و كێشه‌كانی باسكرد، راستییه‌كه‌ی ئێمه‌ له‌ شۆڕشدا وه‌كو هونه‌ر نه‌مانده‌توانی مامه‌ڵه‌یه‌كی وا بكه‌ین هه‌موو كه‌سێك لێمان تێبگات، له‌سه‌ر خاڵه‌ سه‌ره‌كییه‌كان ئێمه‌ هه‌میشه‌ كێشه‌مان له‌گه‌ڵ سه‌ركردایه‌تی هه‌بوو، شته‌كان زۆر به‌زه‌حمه‌ت ده‌بوو، هه‌تا وایلێهات هه‌ندێك جار زویربوونمان له‌گه‌ڵ به‌ڕێز مام جه‌لالیشدا هه‌بوو، وه‌ك مێژوو ده‌بێت شیكاریی زۆری بۆ بكرێت، ئه‌گه‌ر كه‌سێك حه‌وسه‌ڵه‌ی هه‌بێت له‌ رووی هونه‌ریشه‌وه‌ ده‌بێت هه‌ڵسه‌نگاندنی هونه‌ریی ئه‌م كاسێت‌و به‌رهه‌مانه‌مان بكات، به‌داخه‌وه‌ ئێمه‌ هه‌م له‌ ئه‌رشیفكردندا لاوازین، هه‌م له‌ كاری شیكردنه‌وه‌شدا. كه‌م كه‌سمان هه‌یه‌، ئه‌وه‌ كاك توانا حه‌مه‌ خه‌ریكه‌، هیوادارم كه‌سانێكی تر كه‌ خولیای مۆسیقایان هه‌یه‌، شیكاریی بۆ ئه‌و رۆژانه‌ بكه‌ن به‌ هه‌موو كار‌و كێشه‌كانه‌وه‌و زۆر سوپاس.
خالید سه‌ركار: 
سه‌ره‌تا ده‌سخۆشی له‌ كاكه‌ دلێر‌و كاكه‌ ئارس ده‌كه‌م، له‌ راستیدا تیپی شه‌هید كارزان سیمایه‌ك‌و سومبلی شۆڕشی نوێی كورد بوو و هه‌ڵقوڵاوی تیپی مۆسیقای سلێمانی بوو، دوو ئه‌ندامی كارای ئێمه‌ كاریگه‌ریی زۆری هه‌بوو كاكه‌ وشیار‌و ئه‌وانی تر.
 تیپه‌كه‌ له‌ رووی هونه‌رییه‌وه‌ كاری جوانی شۆڕشگێریی پێشكه‌ش به‌ میلله‌ته‌كه‌مان كردو ئه‌و سروودانه‌ی ئه‌وان وه‌كو له‌لایه‌ن براده‌رانه‌وه‌ باسكرا، كاریگه‌ریی راسته‌وخۆی له‌ناو ناخی هه‌موو تاكێكی كورددا هه‌بوو، به‌ پێشمه‌رگه‌‌و به‌خه‌ڵكی ئاساییشه‌وه‌، من لێره‌دا شانازیی ده‌كه‌م كاك دلێر رۆژێك له‌ رۆژان هاتبێته‌ ماڵه‌كه‌م‌و داوای كردبێت پێشه‌كییه‌كی مۆسیقای بۆ بنووسم، بۆ فڵان گۆرانی یان فڵان سروود بۆ تیپی شه‌هید كارزان. ئه‌و سه‌رده‌مانه‌ی ئێمه‌ خۆمان ته‌واو سه‌رقاڵ كردبوو، هونه‌رمه‌ندان كه‌ وا رێكخراوێكمان هه‌بوو، یه‌كێتیی هونه‌رمه‌ندانی كوردستان پاڵپشتیمان زۆر زۆر كه‌مبوو، ته‌نها یه‌كێتیی نیشتمانیی كوردستان بوو كه‌ زۆرجار چوینه‌ته‌ لایان‌و چاپه‌مه‌نی ئه‌وان زۆر كاریگه‌ریی له‌سه‌رمان هه‌بوو، به‌رهه‌مه‌كانمان له‌ رێگه‌ی نووسینه‌وه‌ له‌لای ئه‌وانه‌وه‌ بڵاوبكه‌ینه‌وه‌، یادگاریی سورداش ئه‌و ڤیستیڤاڵه‌ گه‌وره‌یه‌ كرا، ئێمه‌ وته‌مان هه‌بوو وه‌ك یه‌كێتیی هونه‌رمه‌ندانی كوردستان، به‌س خۆتان ده‌زانن باردۆخی ئێمه‌ له‌ناو شار‌و به‌عس‌و دڕه‌نده‌یی وایكردبوو له‌به‌رچاو بووین، دامان به‌ كاك دلێر ئه‌و ئه‌ركه‌ قورسه‌ی له‌سه‌ر شانی ئێمه‌ كرده‌وه‌و توانیمان په‌یامی خۆشمان بگه‌ێنیین، بۆیه‌ ئه‌م تیپه‌ له‌لای ئێمه‌ سومبوله‌، به‌ راستی هونه‌رێكی شۆڕشگێڕیی ره‌سه‌ن، بۆیه‌ دووباره‌ ده‌ستخۆشیتان لێده‌كه‌ین، هیوادارم كه‌وا ئه‌و پێشنیازه‌ جوانانه‌ كرا، هه‌مووی تۆماربكرێت، ئه‌و نووسیانه‌ وه‌ك رابردویه‌كی ئه‌و تیپه‌، ئێستا كاك دلێر‌و كاك ئاراس گێڕایانه‌وه‌ له‌ چوارچێوه‌ی كتێبێكدا هه‌بێت، زۆر سوپاس، سوپاسیش بۆ ئه‌م كۆڕه‌ كه‌ ئێمه‌ی كۆكرده‌وه‌.
زانا مه‌حمود هه‌ژار:
 مامۆستا گیان پیرۆزباییتان لێده‌كه‌م، له‌وه‌ی به‌غدا‌و ئه‌وه‌ی ئێره‌ش، ئه‌وه‌ی كه‌ گوێم لێبووه‌، پێشنیازی زۆر جوانه‌ بۆ ئێوه‌ی به‌ڕێز، ئه‌و پێشنیازه‌ی وتی: ئه‌و میژووه‌ بنووسرێته‌وه‌، من زۆر له‌گه‌ڵ ئه‌وه‌دام گفتوگۆ بكه‌ن له‌ناو خۆتاندا، كاك وشیار‌و كاك شوان‌و جه‌نابتان پێكه‌وه‌ دانیشن‌و یه‌كێكتان قسه‌ بكات، رۆژنامه‌نووسێكی باش دانیشێت كاره‌كه‌تان بۆ بكات به‌ وێنه‌وه‌، هی ئه‌و سه‌رده‌مه‌ شتێكی جوان ده‌رده‌چێت، پرسیارێك له‌ مامۆستا دلێر ده‌كه‌م، ئه‌م مه‌راسیمه‌ زۆر دره‌نگه‌، بۆ دوای 25 ساڵ بیری ئه‌وه‌مان كه‌وتۆته‌وه‌؟ هه‌قوابوو هه‌ر دوای راپه‌ڕین ئه‌و كاره‌‌و ئه‌م شتانه‌ بكرایه‌، لام سه‌یره‌ مامۆستا دلێر جه‌نابت له‌ تیپی شه‌هید كارزان دیاری، له‌ سه‌ركرده‌كانه‌وه‌ نزیكیت، بۆ ریزلێنانێك نه‌كراوه‌ بۆ ئه‌ندامانی تیپی شه‌هید كارزان؟ هۆكاره‌كه‌ی چییه‌؟ ئه‌گه‌ر چه‌پكه‌ گوڵێك بێت، ئه‌گه‌ر هاوكارییه‌كی دارایی بێت، وه‌ك ئه‌وه‌ی بۆ تیپی شۆڕش كرا، بۆ وه‌ستاوه‌؟ بۆ چه‌قی به‌ست؟ ئه‌گه‌ر ئێستاش بكرێت تازه‌ ئه‌و پێزه‌ی نییه‌. بۆ براده‌ران باسی ئه‌و حاڵه‌ته‌یان نه‌كردووه‌‌و جه‌نابییشت برا گه‌وره‌ی تیپه‌كه‌یت‌و چاویان له‌ ده‌ستی تۆیه‌؟ ئێمه‌ش حه‌زده‌كه‌ین له‌ نزیكه‌وه‌ ئه‌و راستییه‌ بزانین.
بایز خوێندكاری مامۆستا دلێر: 
دیاره‌ من له‌م رۆژه‌دا زۆر خۆشحاڵم له‌ حزوری مامۆستا دلێری خۆشه‌ویستدا وه‌ستاوم، ئه‌وكات كه‌ له‌قوتابخانه‌ی شێخ مه‌حمود بووم، مامۆستا دلێر مامۆستام بوو، هه‌م به‌هۆی زروفی پێشمه‌رگایه‌تی، هه‌م باوكم‌و دابڕانی مامۆستا دلێره‌وه‌ نه‌كرا بواری مۆسیقا فێرببم، به‌ڵام له‌خۆشه‌ویستی مامۆستا دلێر، كه‌مانچه‌یه‌كم كڕیووه‌ تائێستا ماومه‌، ئه‌وسا خوالیخۆشبوو كارزان‌و فه‌رمان كه‌ چوون بۆ ئه‌و فێستیڤاڵه‌‌و به‌داخه‌وه‌ نه‌گه‌ڕانه‌وه‌ نازانم هۆكاره‌كه‌ی چیبوو كه‌ من نه‌متوانی بچم.
 پاش ماوه‌یه‌ك مامۆستا دلێر دیاره‌ رایكرده‌ ده‌ره‌وه‌ بۆ شاخ‌و ئێمه‌ش بێكه‌س ماینه‌وه‌، نه‌مان ده‌زانی كێ مۆسیقامان پێ بڵی، ماڵمان له‌ گوندی سیته‌ك بوو  پاش چه‌ند رۆژێك گه‌رامه‌وه‌ ماڵه‌وه‌ باوكم وتی:» وه‌ره‌ ژووره‌وه‌ مامۆستا دلێری لێیه‌ له‌و كاته‌دا توشی شا گه‌شكه‌ بووم، هیوادارم مامۆستا دلێر سه‌ركه‌وتوبێت له‌ش ساغ بێت هیوادارم له‌ ته‌مه‌نی من هه‌ڵبگرێت بۆ له‌شساغیی مامۆستا دلێر، مامۆستا ئاراس یه‌كێك بووه‌ له‌ ئه‌ندامانی ماڵه‌كه‌مان، ئه‌مڕۆ دوای 35 ساڵ پێیان شادبوومه‌وه‌، هه‌م به‌هۆی پێشمه‌رگایه‌تی ئه‌وانه‌‌وه‌‌و هه‌م به‌ هۆی دابڕانی منه‌وه‌ له‌ ده‌ره‌وه‌ی وڵات بووم، زۆر خۆشحاڵم بووم له‌ حزورتاندا هیوادارم له‌ش ساغ بن.
نیاز نوری:
 سوپاستان ده‌كه‌م من ئه‌و پێشنیازه‌ی مامۆستا زانا ده‌قۆزمه‌وه‌، ئه‌گه‌ر تیپی مۆسیقای شه‌هید كارزان‌و ئه‌و مامۆستا به‌ڕێزانه‌ قبوڵیان بێت، وه‌ك سه‌ندیكای هونه‌رمه‌ندانی كوردستان ئه‌و مه‌راسیمی رێزلێنانه‌ بۆ تیپی مۆسیقای شه‌هید كارزان سازبكه‌ین شتێكی شایسته‌ به‌ مێژوویان.
ستران عه‌بدوڵڵا: 
به‌هاوكاریی به‌ڕیوه‌به‌رایه‌تی رۆشنبیریی سلێمانی، 
نیاز نوری:
 ئێمه‌ له‌گه‌ڵ به‌ڕێوه‌به‌رایه‌تیی رۆشنبیریی سلێمانی هیچ كێشه‌یه‌كمان نییه‌، مه‌كه‌وه‌ره‌ به‌ینمانه‌وه‌ كاك ستران.
 بابه‌كر دڕه‌یی: 
به‌سه‌رچاو به‌س ده‌بێت براده‌ران خۆیان پێشنیازبكه‌ن ئه‌گه‌ر جه‌نابت بفه‌رمویت ئێمه‌ جێبه‌جێی ده‌كه‌ین.
ستران عه‌بدوڵڵا:
 ئه‌وا من له‌بری كاك دلێر‌و كاك ئاراس ئه‌و پێشنیازه‌ ده‌كه‌م ، دڵنیام كه‌ كاك بابه‌كر ده‌یكات. 
بابه‌كر دڕه‌یی:
 هه‌ر كامێكیان بفه‌رموێت كاك دلێر یان كاك ئاراس، من له‌خزمه‌تیاندام، كه‌سێك پێشنیازه‌كه‌ بكات.
ستران عه‌بدوڵڵا:
 كاك شوان كابان ساحێبی ئه‌م بیرۆكه‌یه‌یه‌‌و ده‌ستخۆشی لێده‌كه‌ین، با ئه‌و دوا قسه‌ بكات‌و كاك دلێر‌و كاك ئاراس-یش دوا قسه‌ی خۆیان بكه‌ن.
شوان  كابان:
 یه‌ك دوو براده‌ری به‌ڕێز باسی ئه‌وه‌یان كرد، كه‌م باسی مێژووی كاره‌كانی ئه‌م تیپه‌ كراوه‌، من به‌ئیجازه‌ی كاك توانا، ئیشێكی له‌سه‌ر ئه‌و بابه‌ته‌ كردووه‌، پێموابێت ته‌واوی كردووه‌، ئه‌گه‌ر ده‌رفه‌ت هه‌بێت، پێمخۆشه‌ قسه‌یه‌كمان له‌و باره‌یه‌وه‌ بۆ بكات چ له‌سه‌ر بیرۆكه‌ی ئیشه‌كه‌ی‌و چ ئه‌و نامیله‌كه‌كه‌ی‌و ناوه‌ڕۆكی كتێبه‌كه‌ی كه‌ له‌سه‌ر تیپی مۆسیقای شه‌هید كارزان ئاماده‌ی كردووه‌ .
توانا حه‌مه‌ (توێژه‌ری بواری موسیقا):
 خۆشحاڵم له‌خزمه‌ت ئه‌و مامۆستا ئازیزانه‌دا دانیشتووم، كه‌ ساڵانێك وانه‌ی مۆسیقایان پێوتوومه‌ته‌وه‌، دیاره‌ ساڵی 2014 ده‌ستمكرد به‌ توێژینه‌وه‌یه‌كی زانستی له‌سه‌ر تیپی مۆسیقای شه‌هید كارزان، هه‌موو ئه‌و پرسیارانه‌ی ئێوه‌ هه‌تان بوو، له‌سه‌ر تیپی مۆسیقای شه‌هید كارزان، جارێكی تر من له‌بیری خۆمدا یادم كرده‌وه‌، به‌هاوكاریی یاده‌وه‌ریی ئه‌و سێ به‌ڕێزه‌‌و چه‌ند كه‌سێكی تر، من توێژینه‌وه‌یه‌كی زانستیم كردووه‌، له‌سه‌ر په‌یوه‌ندیی نێوان مۆسیقا‌و سیاسه‌ت، سامپڵی توێژینه‌وه‌كه‌م تیپی مۆسیقای شه‌هید كارزان بوو، دیاره‌ به‌سوپاسه‌وه‌ ئه‌گه‌ر ئه‌وان نه‌بوونایه‌، من نه‌مده‌توانی ئه‌و ئه‌نجامه‌ی ئێستا به‌ده‌ستبهێنم‌و كتێبێك ده‌رباره‌ی ئه‌و بابه‌ته‌ بنووسم. هه‌میشه‌ من پرسیارم ئه‌وه‌ بووه‌ كه‌ بۆچی تاكی كورد هه‌میشه‌ حه‌زی له‌ سیاسه‌ته‌؟ بۆچی په‌روه‌رده‌ی سیاسیانه‌ی تاكی كورد به‌به‌رده‌وامی هه‌یه‌؟ ئایا پرسیار ئه‌وه‌یه‌ سه‌ری سه‌ركرده‌كانی ئێمه‌ هیچی مۆسیقا‌و سه‌ره‌واوێك له‌مۆسیقای  تیایه‌؟ ئه‌و پرسیارانه‌ هه‌میشه‌ دووباره‌ ده‌بوونه‌وه‌، من له‌رێگای تیپی شه‌هید كارزانه‌وه‌ كۆمه‌ڵێك ئامانجم هه‌بوو توانیم ئه‌و ئامانجانه‌ دانه‌ دانه‌ بپێكم، دیاره‌ به‌ هه‌وڵ‌و كۆششی ئه‌وان‌و به‌ یاده‌وه‌ریی ئه‌وان كارێكی زۆرمان كرد، ئایا بزانین ئایدیای ئه‌و تیپه‌ له‌ رووی هزری سیاسییه‌وه‌ چییه‌؟ چۆن دامه‌زراوه‌؟ له‌ پێش ئه‌ماندا كێ هه‌بوو له‌ تیپی مۆسیقای شۆڕش؟ وابزانم شه‌هید ئارام‌و ئه‌وان كاسێتێكیان له‌ساڵی 1974دا ده‌ركردووه‌، ئه‌و كاسێته‌ چ كاریگه‌رییه‌كی هه‌بووه‌ له‌سه‌ر ئه‌وان؟ له‌سه‌ر دروستبوونی تیپه‌كه‌ی ئه‌وان؟ چه‌ندین پرسیاری تر كه‌ ده‌توانم بڵێم ئه‌گه‌ر نه‌بێت به‌ رێكلام، هه‌مووی هه‌یه‌‌و وه‌ك هه‌میشه‌ باسی ئه‌وه‌ ده‌كرێت با مێژووی خۆمان بنووسینه‌وه‌.
 كتێبه‌كه‌ی من له‌ 2016ه‌وه‌ ئاماده‌یه‌ بۆ چاپكردن، ئێستا سه‌نته‌رێك یان ناوه‌ندێك كه‌ هیچ په‌یوه‌ندییه‌كی نییه‌ به‌ كتێب چاپكردنه‌وه‌، ئه‌و چاپی ده‌كات، ئه‌وه‌ راسته‌ به‌ڕێوه‌به‌رایه‌تیی رۆشنبیریی هاوكارییه‌كیان كردووه‌، به‌ڵام ئه‌و هاوكارییه‌ ئه‌وه‌ نییه‌ كه‌ گه‌نجێك چوار ساڵی ته‌مه‌نی له‌ توێژینه‌وه‌یه‌كدا سه‌رف بكات. هه‌رچه‌نده‌ هیچ كاتێك مۆسیقا نه‌یتوانیووه‌ كه‌س بژێنێت تا من بژێنێت، من سه‌رچاوه‌ی ترم هه‌یه‌، به‌ڵام زۆركات ده‌ڵێین با مێژوو بنووسینه‌وه‌، با فه‌رهه‌نگی زاره‌كیمان بكه‌ینه‌ بۆته‌ی نووسینه‌وه‌، ئه‌مه‌ به‌داخه‌وه‌  ته‌نها قسه‌یه‌.
وه‌ك ئاماژه‌م پێكرد كتێبه‌كه‌ له‌ 2016-وه‌ ئاماده‌یه‌‌و زۆرجار چوومه‌ته‌ لای كاك ئاراس، ئه‌وه‌نده‌ چوومه‌ته‌ لای، شه‌رم ده‌كه‌م، به‌هه‌رحاڵ پشت به‌خوا به‌منزیكانه‌‌و له‌ 10 رۆژی داهاتوودا له‌لایه‌ن ئاژانسی میترۆ گرافییه‌وه‌ بڵاوده‌بێته‌وه‌‌و زۆر میدیای جیهانیی تر رووماڵی ئه‌و بابه‌ت ده‌كه‌ن، له‌نێو شه‌ڕی داعش‌و قه‌یرانی ئابوورییه‌دا، هێشتا گه‌لی كورد خه‌ریكی توێژینه‌وه‌ی زانستییه‌، هێشتا بزاوتی رۆشنبیریی له‌م شاره‌دا نه‌كه‌وتۆته‌ سه‌رپێی خۆی، پشت به‌خوا هه‌موو ئه‌و پرسیارانه‌ی له‌لای ئێوه‌یه‌ له‌و كتێبه‌دا وه‌ڵامه‌كه‌ی وه‌رده‌گرنه‌وه‌.
دلێر ئیبراهیم: 
 من زۆر سوپاسی كاك توانا ده‌كه‌م، بیرۆبۆچوونه‌كانی زۆر باشن، له‌ فه‌یسبوكدا هه‌موو جارێك بۆی ده‌نووسم، كه‌ بیروڕاكانت زۆر جوانه‌‌و به‌رده‌وامبه‌ له‌سه‌ری‌و گوێ مه‌ده‌ره‌ خه‌ڵك، هه‌ندێك جار به‌هه‌ندێك گۆرانیبێژ ده‌وترێت: ئه‌مه‌ گیانێكی ئێرانییه‌، ده‌بینیت كۆمه‌ڵێك كه‌ست لێ راست ده‌بێته‌وه‌ ده‌ڵێت بابه‌ تۆ باسی چی ده‌كه‌یت؟ ئه‌و درك به‌و بیروڕایانه‌ ده‌كات كه‌ له‌ بابه‌ته‌كاندا هه‌یه‌، من زۆر دڵم به‌وه‌ خۆشه‌، نه‌ك له‌به‌رئه‌وه‌ی كاره‌كانی تیپی مۆسیقای شه‌هید كارزانی نووسیوه‌ته‌وه‌، به‌خوا دوای ئه‌وه‌ زانیووه‌مه‌. پێش ئه‌وه‌ش پێموتووه‌ كه‌ تۆ ئیشی باش ده‌كه‌یت‌و ده‌ستت خۆشبێت. شه‌ڕی من‌و كاك زانا بهێڵنه‌وه‌.
ئاراس ئیبراهیم: 
با من پێشنیازه‌كه‌ی خۆم بكه‌م، من وێرای سوپاس‌و باوه‌شی خۆشه‌ویستیم بۆ هه‌موو ئه‌ندامانی تیپه‌كه‌‌و ئه‌وانه‌ی به‌جێیان هێشتوین كاكه‌ حه‌مه‌ جه‌زا‌و كاكه‌ ئازاد‌و كاكه‌ ئاكۆ، خۆشه‌ویستیشم بۆ ئێوه‌ی به‌ڕێز،پێنشیارێكم هه‌یه‌ بۆ كه‌ناڵه‌كانی راگه‌یاندن، هه‌ر سروشتی كوردستان پیشان بدات، به‌ڵام با گۆرانییه‌كانی ئێمه‌ لێبدات ‌و بڵێت گۆرانیی فڵانه‌ كه‌، راسته‌ ئێمه‌ له‌ ژیاندا ماوین، نامانه‌وێت خۆمان ده‌ربكه‌وین، به‌ڵام با ماده‌كانمان بكرێت به‌ كلیپ، من له‌ ساڵی 2001ه‌وه‌ هه‌وڵی ئه‌وه‌ ده‌ده‌م بۆم نه‌كراوه‌، ئه‌گه‌ر ئێوه‌ بۆتان كرا، من سوپاستان ده‌كه‌م، ئه‌و به‌رپرسانه‌ش كه‌ له‌م لێره‌ن، ده‌توانن پاڵێكی پێوه‌ بنێن‌و رادیۆكان ده‌توانن سیدییه‌كانمان لێبده‌ن، گۆرانی هه‌ڵپه‌ڕكی، سروود، دڵداریی، هه‌موویمان هه‌یه‌، ئیتر گۆرانی له‌وه‌ زیاتر چیتر هه‌یه‌، مۆسیقاشمان هه‌یه‌، به‌ڵام به‌داخه‌وه‌ له‌گه‌ڵ رادیۆكاندا قسه‌ ده‌كه‌م، دوو رۆژ ماده‌كانمان داده‌به‌زێنێت، ته‌له‌فۆن ده‌كه‌ن‌و ده‌ڵێن گوێت لێیه‌؟ دوای دوو رۆژ ئیتر ته‌واو، وه‌ك پرسه‌ وایه‌، دوو رۆژ لافیته‌یه‌كه‌‌و ئیتر ته‌واو، به‌داخه‌وه‌ نازانم بۆ رادیۆكان لێی ناده‌ن؟ 
پێشنیاز ده‌كه‌م بۆ ته‌له‌فزیۆنه‌كان كه‌ كلیپیان بۆ بكه‌ن، مه‌رج نییه‌ خۆمانی تێدابین، ناوه‌كه‌ش مه‌نووسن، هه‌ر كێشه‌ نییه‌، به‌ڵام ماده‌كان ئێستاش من خۆم گوێیان لێده‌گرم، نه‌ك بڵێم له‌به‌رئه‌وه‌ی خۆمان كردوومانن، به‌ڵكو له‌به‌رئه‌وه‌ی زۆر خۆشه‌، «ئاسوده‌ بن» كه‌متر، له‌به‌رئه‌وه‌ی ئێستا باوی راپه‌ڕین نه‌ماوه‌. زۆر سوپاستان ده‌كه‌م ئێوه‌ش ئه‌ركتان كێشا.

دلێر ئیبراهیم:
 من سوپاسی كاك زانا ده‌كه‌م، یه‌كه‌م كه‌س بووه‌ له‌ كۆنه‌وه‌ له‌ تیپه‌كه‌ی مندا بووه‌، خۆی خوێندكاری  مامۆستا عوسمان بوو، خۆی بیری دێت كارزانم داناوه‌ به‌ جه‌واب لێدا‌و وتومه‌ زانا تۆ به‌قه‌رار لێی بده‌، ئه‌م دره‌نگتر پرۆڤه‌ی ده‌كرد، ده‌یوت نابێ‌و ناكرێت، منیش ده‌موت: ده‌كرێت، ده‌بێت هه‌وڵ بده‌یت، وابڕۆوه‌ وابكه‌و... هتد، بۆ ئه‌وه‌ی ده‌ربكه‌وێت، سوپاس بۆ خوا ئه‌وه‌تا ئه‌نجامه‌كه‌ی ده‌بینیین، ئێستا كاك زانا بووه‌ به‌مۆسیقاژه‌نێكی گه‌وره‌‌و ته‌مه‌نی له‌و پێناوه‌دا داناوه‌، هه‌ر یه‌كێك بووه‌ له‌وانه‌ی هه‌میشه‌ ئه‌و شه‌ڕه‌ی كردووه‌ ئه‌وه‌ بۆ هیچ بۆ تیپی مۆسیقای شه‌هید كارزان ناكرێت، نه‌كه‌س گوێی له‌و گرت‌و نه‌ كه‌س دڵی ئێمه‌ی خوێنه‌ده‌وه‌، ئێمه‌ چوار گۆرانی بێژمان چوونه‌ته‌ جێی خۆیان، براده‌رانمان هه‌ر یه‌كه‌یان له‌ جێگایه‌كن، ئێستاش یه‌كێتی فه‌قیر بووه‌، ئه‌گه‌ر رێزلێنانمان بۆ بكات، له‌وحه‌یه‌كمان ده‌داتێ وه‌كو ئاراس پێیوتن به‌ براده‌رێكی مه‌كته‌بی سیاسی وت: براده‌ر داینێن ئه‌گه‌ر یه‌كێتی ده‌وڵه‌مه‌ند بۆوه‌ بانگمان بكه‌ن، هه‌م له‌به‌رئه‌وه‌ی 37 ساڵه‌ نه‌یانكردووه‌، نایكه‌ن، هه‌م له‌به‌رئه‌وه‌ی چوار گۆرانیبێژمان به‌جێیانهێشتووین. ئه‌و ئازاد خانه‌قینییه‌ 100 جار به‌ منی وت: كاك دلێر من پاره‌م ناوێ «ئه‌یفۆڕ !»ه‌كه‌شم ناوێت، ته‌نها بانگم بكه‌نه‌ سه‌ر سته‌یجه‌كه‌و گوڵێك بكه‌ن به‌ یه‌خه‌مدا‌و بڵێن گۆرانیبێژی تیپی مۆسیقای شه‌هید كارزان بووه‌، ئازاد ئاواتی ئه‌وه‌ بوو نه‌كرا، حه‌مه‌ جه‌زا ئاواتی ئه‌وه‌ بوو، به‌ڵام هه‌ر نه‌بوو، ئه‌وه‌ هۆكارێكیان، هۆكارێكی تریش دوای 37 ساڵ بێن ‌و لاپه‌ڕه‌یه‌كی «ئه‌ی فۆڕ»ت بده‌نێ من خۆم ناچم بۆ رێزلێنانی هیچ لایه‌ك، نه‌ ئه‌وه‌ی یه‌كێتی هونه‌رمه‌ندانی كوردستان له‌گه‌ڵ رێزم بۆیان، گله‌یی له‌وان نییه‌، یه‌كێتیی هونه‌رمه‌ندان بۆ نایكات، یان كاك بابه‌كر نایكات، گله‌ییه‌كه‌ له‌وه‌یه‌ یه‌كێتیی بۆچی نه‌یكرد؟ ویستم باسی ئه‌وه‌ نه‌كه‌م، باوه‌ڕبكه‌ نووسیبووم، ئاراس وتی: ئه‌گه‌ر ئه‌وه‌ ده‌رنه‌هێنی نایه‌م بۆ كۆڕه‌كه‌» به‌ڵام زانا دیسانه‌وه‌ ئه‌وه‌ی پێ هێناینه‌وه‌ به‌ر باس، من دڵنیام ئه‌وه‌ له‌ رێزو خۆشه‌ویستی ئه‌وه‌وه‌یه‌ بۆ ئێمه‌.
 له‌بیرم ناچێت له‌سورداش زانا هاتبوو جامانه‌یه‌كی له‌ملدا بوو، له‌به‌ر تیپه‌كه‌دا وه‌ستا بوو، بۆ نه‌گبه‌تی براده‌رێكی یه‌كێتی له‌ناو ئه‌و هه‌موو خه‌ڵكه‌دا به‌ زانای ده‌وت لاچۆ، وتم بابه‌ ئه‌وه‌ له‌خۆشیی ئێمه‌ هاتووه‌، مۆسیقاره‌، ئه‌و هه‌موو خه‌ڵكه‌ی لێبوو، پێیان نه‌ده‌وتن، دووربكه‌ونه‌وه‌.
 من كاتی خۆی مامۆستا بووم، كه‌سێكی په‌روه‌رده‌كار بووم، پێموایه‌ ئه‌مڕۆ ده‌ست بخه‌یته‌ سه‌ر ئاگر، ئه‌مڕۆ په‌نجه‌ت ده‌سوتێ، ئاگره‌كه‌ ناڵێ له‌ 2019 په‌نجه‌ت بسووتێ، سزاو پاداشت ده‌بێت له‌جێی خۆیدا بێت، كه‌ سه‌رده‌می به‌سه‌ردا رۆیشت، هیچ تامێكی نییه‌، خۆ ئه‌و براده‌رانه‌ ریزلێنانیان كرد، ئه‌م سیانه‌مان نه‌چووین، ئه‌گه‌رنا «ئه‌ی فۆر»ه‌كه‌‌و ره‌نگه‌ بڕێك پاره‌شیان ده‌داینێ‌و بڵێن ئه‌وه‌ تیپی مۆسیقای شه‌هید كارزانمان له‌كۆڵ بۆوه‌، نه‌وه‌ڵڵا با ئه‌وه‌ هه‌ر وه‌كو خۆی بمێنێت، ئێمه‌ رێزڵێنانمان ناوێت، بۆمان مه‌كه‌ن، ئه‌وه‌ رێزلێنانه‌ كه‌ خه‌ڵكه‌كه‌ ماده‌كان لێده‌دات، ئه‌وه‌ زۆر گه‌وره‌تره‌ له‌ هه‌مووی، زۆر سوپاستان ده‌كه‌م، كاك عیزه‌ت شه‌مساواییش كه‌ ئامر كه‌رتم بووه‌، به‌خوا چه‌ندین شه‌ڕمان كردووه‌، هه‌ر ده‌یوت چالاكیی بكه‌ین، ده‌موت: ئیزنم بده‌، ئه‌وه‌ ده‌كه‌م زۆر سوپاسی ده‌كه‌م‌و مه‌منونیم.


ناو:  
ئیمه‌یل:    
سه‌رنج:  

#7346
21/8/2017
ئه‌رشیف
وه‌رزش
‌ له‌ وه‌رزی نوێی NBA -دا (1230) یاریی دەکرێت 21/8/2017
‌ شاراپۆڤا داوه‌تنامه‌ی‌ گراندسلامی ئه‌مریكای پێشكه‌ش كرا 20/8/2017
زانست
‌ هەسارەیەك لە زەوی نزیك دەبێتەوە 21/8/2017
‌ نۆكیا 8 ركابەریی ئایفۆن و گالاكسی دەكات 21/8/2017
‌ پێنج هەڵەی باو لەكاتی راكردندا 21/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP