كورد له‌به‌غدا
كورد له‌به‌غدا ‌ سه‌رتیپ جه‌وهه‌ر‌ 10/8/2017
به‌شی پانزه‌

دادگای‌ فیدراڵیی باڵا
یه‌كێكی دیكه‌ له‌و شوێنانه‌ی‌ ده‌مویست سه‌ردانی بكه‌م، دادگای‌ فیدراڵیی باڵا بوو له‌عیراق، ئه‌و دادگایه‌ بۆ ئێمه‌ی‌ كورد گرنگییه‌كی گه‌وره‌ی‌ هه‌یه‌، چونكه‌ یه‌كێك له‌تایبه‌تمه‌ندییه‌كانی ئه‌و دادگایه‌ راسته‌وخۆ په‌یوه‌ندی به‌شیكردنه‌وه‌ی‌ ده‌ستوورو هه‌موو ناكۆكییه‌ قانونییه‌كانی نێوان هه‌رێم‌و به‌غداوه‌ هه‌یه‌.
وه‌زیفه‌ی‌ سه‌ره‌كی ئه‌و دادگایه‌ به‌پێی‌ مادده‌ی‌ 93 ده‌ستووری عیراق شیكراوه‌ته‌وه‌، بریتییه‌ له‌ چاودێریكردنی ده‌ستوور و سیستم، لێكدانه‌وه‌ی‌ ده‌ستوور، داوه‌ریی‌و بڕیاردان له‌سه‌ر هه‌ر گرفتێك له‌جێبه‌جێكردنی قانون، له‌نێوان هه‌رێم‌و ناوه‌ند، یان هه‌ر ناكۆكییه‌ك له‌نێوان هه‌رێم‌و به‌غدا، هه‌روه‌ها بڕیاردان‌و یه‌كلاییكردنه‌وه‌ی‌ هه‌ر تۆمه‌تێك كه‌ ئاراسته‌ی‌ سه‌رۆك كۆمارو سه‌رۆك وه‌زیران‌و وه‌زیره‌كان ده‌كرێت، له‌گه‌ڵ چه‌ند تایبه‌تمه‌ندییه‌كی دیكه‌.
دادگای‌ فیدراڵی باڵا ده‌كه‌وێته‌ ناوچه‌ی‌ حارسییه‌، شه‌قامی‌ كیندی، ویستم سه‌ردانی بكه‌م، به‌ڵام ئه‌و دادوه‌ره‌ی‌ ده‌بو بیبینم‌و په‌یوه‌ندیم له‌گه‌ڵ هه‌بوو، ئه‌وكاته‌ له‌وێ‌ نه‌بوو، هه‌رچۆنێك بێت هاته‌وه‌ له‌هه‌ولێر بینیم.
ئه‌و دادگایه‌ 9 ئه‌ندامی سه‌ره‌كی هه‌یه‌ له‌گه‌ڵ دوو ئه‌ندامی یه‌ده‌گ، به‌پێی‌ قانون، خانه‌نشینیان بۆنییه‌و تا كۆتایی ته‌مه‌ن ده‌مێننه‌وه‌، هه‌مویان دادوه‌ری زۆر به‌ته‌مه‌نن، ئه‌زمونێكی ئێجگار زۆریان له‌گه‌ڵ دادگا هه‌یه‌و، قانون زانی زۆر شاره‌زان، بچوكترینیان 80 ساڵه‌و 91 ساڵیشیان تێدا، هه‌ر 9 ئه‌ندامیان له‌سه‌ر بنه‌مای‌ به‌ركه‌وته‌ی‌ قه‌ومی‌و تائیفی له‌عیراق دانراون، له‌و ژماره‌یه‌ جگه‌ له‌سه‌رۆك مدحه‌ت مه‌حمود كه‌ شیعه‌یه‌، ئه‌وانی دیكه‌ سێ‌ شیعه‌، دوو كورد، یه‌كێك سوننه‌، یه‌كێك توركمان، یه‌كێك مه‌سیحی، له‌گه‌ڵ دوو ئه‌ندامی یه‌ده‌گ كه‌ یه‌كێكیان كورده‌و ئه‌ویدیكه‌یان سوننه‌یه‌.
ئه‌ندامه‌ كورده‌كان شێخ محه‌مه‌د سائیب (یه‌كێتی - هه‌ولێر)، ئه‌كره‌م بابان (پارتی- سلێمانی) هه‌روه‌ها میخاییل شه‌مشون (ئاشوری – دهۆك)، ئه‌ویش له‌سه‌ر كوردستان هه‌ژمارده‌كرێت.
ئه‌و دادگایه‌ به‌پێی‌ قانونی به‌ڕێوه‌بردنی كاتیی عیراق له‌سه‌رده‌می ئه‌نجومه‌نی حوكم، به‌ژماره‌ 44 له‌ 8ی ئاداری 2004  به‌ناوی دادگای‌ فیدراڵیی باڵا، بڕیاری‌ دروستكردنی دراوه‌،  دواتر به‌قانونی ژماره‌ 30 ساڵی 2005 بڕیاری‌ دروستكردنی درا، دواتر له‌ ده‌ستووری هه‌میشه‌یی (2005) له‌ مادده‌ی‌ 93 تایبه‌تمه‌ندییه‌كانی به‌ڕوونی دیاریكرا.

رۆڵی‌ گرنگی‌ دادگا
هاتمه‌وه‌ له‌هه‌ولێر دادوه‌ر محه‌مه‌د سائیب-م له‌ته‌كیه‌كه‌ی‌ خۆیان له‌شێخه‌ڵڵا بینی، پیاوێكی له‌سه‌رخۆو زانا، له‌باره‌ی‌ دادگاكه‌یان‌و رۆڵی دادگاكه‌یان گفتوگۆی زۆرمان كرد، ئه‌و پێی‌ وابوو ئه‌و دادگایه‌ رۆڵێكی گرنگ ده‌گێڕێت له‌یه‌كلاییكردنه‌وه‌ی‌ هه‌ر ناكۆكی‌و تێگه‌یشتنێك له‌باره‌ی شیكردنه‌وه‌و یه‌كلاییكردنه‌وه‌ی‌ هه‌ر بڕگه‌یه‌كی ده‌ستووریی‌و قانونی له‌نێوان ده‌سه‌ڵاته‌ جیاوازه‌كانی ناو حوكمڕانی له‌به‌غدا، هه‌روه‌ها هه‌ر ناكۆكییه‌ك له‌نێوان به‌غداو هه‌رێمی كوردستان یان هه‌ر پارێزگایه‌ك.
دادگای‌ فیدراڵیی باڵا له‌عیراق، باڵاترین ده‌سه‌ڵاتی دادوه‌رییه‌، ناكرێت هیچ بڕیارێكی ئه‌و دادگایه‌ پێداچوونه‌وه‌ی‌ بۆ بكرێت، به‌ڵكو هه‌موو بڕیاره‌كانی یه‌كلاكه‌ره‌وه‌یه‌و پله‌ی‌ كۆتایی وه‌رده‌گرێت.
شێخ محه‌مه‌د سائیب ده‌یوت، هه‌ر داوایه‌ك كه‌ پێشكه‌شی دادگا ده‌كرێت، چ له‌لایه‌ن حكو‌مه‌ت یان په‌رله‌مانه‌وه‌ بێت، یان له‌لایه‌ن كه‌سێكی دیاریكراوه‌وه‌، ئه‌وا دوای‌ رێكاری قانونی خۆی، دادوه‌ران بۆچوونی خۆیان ده‌رده‌بڕن، وتی: ئێمه‌ چووینه‌ته‌ ته‌مه‌نه‌وه‌و شاره‌زاییه‌كی باشمان له‌قانون هه‌یه‌، زه‌حمه‌ته‌ بكه‌وینه‌ ژێر كاریگه‌ری‌ بارودۆخی سیاسی یان قه‌ومی یان تائیفی، به‌ڵكو هه‌وڵده‌ده‌ین به‌چاوی قانونی له‌هه‌موو دۆسێیه‌ك بڕوانین‌و له‌نێوان خۆشماندا به‌رده‌وام گفتوگۆی جددی قانونی له‌سه‌ر پرس‌و بابه‌ته‌كان ده‌كه‌ین كه‌ دێنه‌به‌رده‌ست، ته‌ئكیدیكرده‌وه‌ كه‌ زۆربه‌ی‌ بڕیاره‌كانیان له‌ دادگا به‌ته‌وافوق ده‌رده‌كه‌ن، ئه‌مه‌ دوای‌ گفتوگۆی جددی له‌سه‌ر هه‌موو بڕگه‌و بابه‌تێك.

سكاڵاكان بۆ به‌رده‌م دادگای‌ باڵا
زۆربه‌ی‌ لایه‌نه‌كانی عیراق به‌كوردو سوننه‌و شیعه‌و پێكهاته‌كانی دیكه‌ له‌حاڵی هه‌ستكردن به‌پێشێلكردنی ده‌ستوور یان قانون په‌نایان بۆ ئه‌و دادگایه‌ بردووه‌، به‌ڵام ده‌توانم بڵێم كورد كه‌مترین داوای سه‌باره‌ت به‌پرسی پێشێلكردنی ده‌ستوور له‌لایه‌ن ده‌سه‌ڵاته‌ جیاوازه‌كانی عیراق پێشكه‌ش به‌و دادگایه‌ كردووه‌، بۆ نمونه‌ هیچ داوایه‌كی سه‌باره‌ت به‌پرسی مادده‌ی‌ 140 پێشكه‌شی ئه‌و دادگایه‌ نه‌كرد له‌كاتی كۆتایی هاتنی ماوه‌ی‌ 140 به‌پێی‌ ده‌ستوور له‌كۆتایی 2007 دا، یان له‌هه‌ر پرسێكی دیكه‌ی‌ په‌یوه‌ندیدار به‌ماف‌و به‌ركه‌وته‌ی‌ كورد له‌حوكمڕانیی عیراق، ئه‌مه‌ش جێی‌ پرسیاره‌و پێویسته‌ لێپرسراوان‌و لایه‌نه‌ په‌یوه‌ندیداره‌كانی كوردستان وه‌ڵامی ئه‌و پرسیاره‌ بده‌نه‌وه‌، بۆ نمونه‌ كاتێك حكومه‌تی عیراق مووچه‌و بودجه‌ی‌ هه‌رێمی كوردستان ده‌بڕێت، بۆ هه‌رێمی كوردستان داوایه‌ك له‌سه‌ر ئه‌و پرسه‌ پێشكه‌شی دادگای فیدراڵی ناكات؟، خۆ خه‌ڵكی كوردستان به‌شێك نین له‌ململانێی‌ سیاسی‌و پاره‌و مووچه‌ی‌ خه‌ڵكی كوردستان په‌یوه‌ندی به‌ده‌سه‌ڵاتدارانی هه‌رێمه‌وه‌ نییه‌، به‌ڵكو قوت‌و مووچه‌ی‌ خه‌ڵكه‌و له‌هیچ بارێكدا نابێت به‌غدا بیبڕێت، كه‌چی حكومه‌تی هه‌رێم هیچ داوایه‌كی پێشكه‌ش نه‌كردووه‌ یان په‌رله‌مانتارانی كورد له‌به‌غدا هیچ داوایه‌كیان پێشكه‌شی ئه‌و دادگایه‌ نه‌كردووه‌.
دادوه‌ر محه‌مه‌د سائیب وتی: ئه‌گه‌ر هه‌رێم یان هه‌ر لایه‌نێكی په‌یوه‌ندیدار به‌ڕه‌سمیی داوای‌ سه‌باره‌ت به‌مادده‌ی‌ 140 پێشكه‌شی دادگا كردبا، ئه‌وا بێگومان چاومان پێداده‌خشاندو قسه‌یه‌كمان لێده‌كردو بڕیارمان لێده‌دا، به‌ڵام كاتێك داوا پێشكه‌ش ناكرێت ئێمه‌ ناتوانین له‌خۆمانه‌وه‌ بڕیاربده‌ین.
له‌و دادگایه‌دا چه‌ندینجار بڕیاری حكومه‌ت‌و په‌رله‌مانی عیراق هه‌ڵوه‌شێنراوه‌ته‌وه‌، چونكه‌ نا ده‌ستووریی یان ناقانونی بوون، واته‌ حكومه‌ت بڕیارێكی دیاریكراوی ده‌ركردووه‌و دادگا به‌ڕه‌سمیی هه‌ڵیوه‌شاندۆته‌وه‌، په‌رله‌مانیش بڕیاریداوه‌ دادگا هه‌ڵیوه‌شاندۆته‌وه‌، بۆ نمونه‌ كاتێك حكومه‌تی عیراق ده‌یویست ته‌نها یه‌ك دادگای‌ لێكۆڵینه‌وه‌ی‌ تایبه‌ت به‌پاسپۆرت هه‌بێت، به‌ڵام دادگای‌ فیدراڵ بڕیاریدا له‌هه‌موو پارێزگایه‌ك بكرێته‌وه‌، هه‌روه‌ها ده‌بینین كه‌ دوو دانیشتنی په‌رله‌مان له‌لایه‌ن دوو گروپی جیاواز له‌ نیسانی 2016 كرا له‌سه‌ر پرسی لادانی سه‌رۆكی په‌رله‌مان‌و ده‌نگدان له‌سه‌ر چه‌ند وه‌زیرێك، یه‌كێكیان له‌لایه‌ن سه‌لیم جبوری سه‌رۆكی په‌رله‌مان‌و ئه‌ویدیكه‌یان له‌لایه‌ن گروپێكی دژه‌وه‌، به‌ڵام دادگا هه‌ردوو دانیشتنه‌كه‌ی‌ هه‌ڵوه‌شانده‌وه‌، به‌وپێیه‌ی‌ دانیشتنه‌كان ده‌ستووریی نه‌بوون‌و رێژه‌ قانونی ئاماده‌بونی په‌رله‌مانتاران جێبه‌جێنه‌كراوه‌، بۆیه‌ ده‌نگی هیچ كام له‌ دوو دانیشتنه‌كه‌ هه‌ژمارنه‌كرا، ئه‌و دوو بڕیاره‌ نمونه‌ی‌ هه‌ڵوه‌شاندنه‌وه‌و یه‌كلاییكردنه‌وه‌ی‌ به‌شێك له‌و دۆسیانه‌بوون كه‌ له‌لایه‌ن دادگای‌ فیدراڵیی باڵا بڕیاریان لێدراوه‌. 

״سەرۆک مام جه‌لال پیاوی ده‌وڵه‌ت‌و ئاشتیی بووه‌ له‌عیراق״
سه‌رۆكی دادگای‌ فیدراڵی باڵا، مدحه‌ت مه‌حمود، پیاوێكی دیاره‌ له‌مێژووی دادوه‌ریی له‌عیراق، هاوته‌مه‌نی سەرۆک مام جه‌لال-ه‌و به‌یه‌كه‌وه‌ له‌ كۆلێژی حقوق «ماف»   1959 له‌به‌غدا خوێندنیان ته‌واوكردووه‌، ئه‌و پیاوه‌ یه‌كێكه‌ له‌وانه‌ی‌ هه‌میشه‌ پێی‌ وابووه‌ مام جه‌لال پیاوی ده‌وڵه‌ت‌و ئاشتیی بووه‌ له‌عیراق، چه‌تری كۆكردنه‌وه‌ی‌ عیراقییه‌كان به‌شیعه‌و سوننه‌و كورد بووه‌ له‌مێژووی دوای‌ روخانی سه‌دام له‌ 2003 تا نه‌خۆشكه‌وتنی، بۆیه‌  له‌ 2016 كاتێك حكومه‌تی عیراق به‌ڕه‌سمیی داوا له‌دادگای‌ فیدراڵی باڵا ده‌كات پێشنیاریان هه‌بێت بۆ ناوێك له‌مێژووی عیراق تا خه‌ڵاتی نۆبڵ بۆ ئاشتی پێبدرێت، به‌وپێیه‌ی‌ ره‌نگه‌ ئه‌و خه‌ڵاته‌ به‌ر عیراق بكه‌وێت، له‌ وەڵامدا، مدحه‌ت مه‌حمود سه‌رۆكی دادگای فیدراڵیی باڵا، به‌ڕه‌سمیی سه‌رۆك مام جه‌لال بۆ ئه‌و خه‌ڵاته‌ پێشنیار ده‌كات‌و پێیوایه‌ شایسته‌ترین كه‌سه‌ له‌عیراق خه‌ڵاتێكی ئاوهای‌ پێ ببه‌خشرێت.
له‌و نووسراوه‌دا كه‌ له‌  (2016) ده‌رچووه‌ به‌كورتی ده‌ڵێت: به‌هه‌ڵسه‌نگاندن‌و خوێندنه‌وه‌ی‌ واقعی عیراق‌و ئه‌و بارودۆخه‌ی‌ پێیدا تێپه‌ڕیوه‌، ده‌بینین پیاوی مه‌زن هه‌یه‌ خه‌ڵاتی نۆبڵ وه‌رگرێت، له‌پای ئه‌و خزمه‌ت‌و هه‌وڵه‌ی‌ پێشكه‌شی عیراقی كردووه‌ بۆ سه‌ركه‌وتن‌و سه‌رخستنی ئاشتی‌و به‌یه‌كه‌وه‌ ژیانی ره‌نگه‌ جیاوازه‌كانی كۆمه‌ڵگه‌ی‌ عیراقیی، ئێمه‌ ئه‌و گه‌وره‌ییه‌ له‌ كه‌سایه‌تی فه‌خامه‌تی سه‌رۆك مام جه‌لال- سه‌رۆكی پێشوی كۆماری عیراقدا ده‌بینین،  چونكه‌ له‌ رۆژی یه‌كه‌می دوای‌ پڕۆسه‌ی‌ ئازادیی له‌عیراق له‌ 2003دا، ئه‌و پیاوه‌ كلیلی ئاشتی و ئاسایش بووه‌ له‌عیراق، هۆكارێكی كاریگه‌ر بووه‌ له‌ڕێگریكردن له‌چه‌ندین فیتنه‌و ئاژاوه‌ی‌ تائیفی‌و ره‌گه‌زپه‌رستی، ئه‌مه‌ جگه‌ له‌ مێژوی پڕ خه‌باتی پڕشنگداری ئه‌و پیاوه‌.
بۆیه‌ ئێمه‌ وایده‌بینین باشترین كه‌س بێت بۆ وه‌رگرتنی خه‌ڵاتی ئاشتی (نۆبڵ)

״مام هۆكاری‌ چه‌سپاندنی مافه‌كانی كوردبوو״
له‌به‌غدا كه‌سێكم نه‌بینی به‌شه‌وقه‌وه‌ باسی مام جه‌لال نه‌كات، هه‌موویان پێیان وابوو له‌قۆناغێكی زۆر گرنگ‌و هه‌ستیاری عیراق، رۆڵی گرنگی بینیوه‌ بۆ كوردو بۆ عیراق، رۆڵی سه‌ركرده‌یه‌كی زۆر كاریگه‌ری‌ بینیوه‌، ئه‌وانه‌ی‌ كورد بوون، پێیان وابوو سەرۆک مام جه‌لال هۆكاری‌ چه‌سپاندنی مافه‌كانی كوردبوو به‌سیاسه‌تێكی میانڕه‌و هاوسه‌نگ، چ به‌رامبه‌ر لایه‌نه‌ ناكۆكه‌كانی عیراق به‌شیعه‌و سوننه‌وه‌، چ به‌رامبه‌ر وڵاتانی ده‌وره‌به‌ر كه‌ رۆڵی گرنگیان ده‌بینی‌ له‌بارودۆخی ناوخۆی عیراق‌و گۆڕانكارییه‌كانی دوای‌ روخانی سه‌دام.
لایه‌نه‌ سیاسییه‌كانی كورد له‌به‌غدا، پێیانوابو له‌و ماوه‌یه‌ی‌ له‌به‌غدابوو «مام جه‌لال» كۆكه‌ره‌وه‌ی‌ كوردو مه‌رجه‌ع‌و پیاوی بڕیاردان و چاره‌سه‌ركردنی كێشه‌و گرفته‌كانی كورد بوو، به‌بێ‌ ئه‌وه‌ی‌ هیچ توندوتیژیی‌و گرژی لێبكه‌وێته‌وه‌، هه‌موو لایه‌نه‌كان وه‌كو یه‌ك، ئه‌وانه‌ش كه‌ عه‌ره‌ب بوون، دیسان رۆڵی ئه‌و پیاوه‌یان زۆر به‌گرنگ پێناس ده‌كرد، به‌هۆكاری سه‌قامگیریی عیراق‌و كۆكه‌ره‌وه‌ی‌ عیراقییه‌كان پێناسیان ده‌كرد.
ده‌مه‌وێ‌ لێره‌دا خاڵێكی گرنگ باس بكه‌م، له‌ماوه‌ی‌ بوونی سەرۆک مام جه‌لال له‌به‌غدا له‌نێوان 2004 تا 2012 رۆژنامه‌و رۆژنامه‌نوسانی عه‌ره‌بی كه‌مترین ره‌خنه‌یان له‌و پیاوه‌گرت، وه‌ك سه‌رۆك كۆمارێكی سه‌نگین مامه‌ڵه‌ی‌ له‌گه‌ڵ كۆی لایه‌نه‌ سیاسییه‌كان ده‌كرد، كاتێك شیعه‌ گرفتیان له‌گه‌ڵ سوننه‌ ده‌بوو، وه‌ك نێوه‌ندگیرێكی كاریگه‌ر ده‌هاتنه‌ لای سەرۆک مام بۆ چاره‌سه‌ر، كاتێك سوننه‌كانیش له‌گه‌ڵ شیعه‌ گرفتیان ده‌بوو، ئه‌وا هیچ شوێنێك نه‌بوو رووی تێبكه‌ن جگه‌ له‌ماڵه‌كه‌ی‌ ئه‌و! ئه‌وه‌ی‌ گرنگ بوو، هه‌موو لایه‌نه‌ ناكۆكه‌كان هیچ كاتێك ته‌ماشای ده‌ستپێشخه‌ریی‌و راسپارده‌كانی ئه‌و پیاوه‌ مه‌زنه‌یان نه‌ده‌كرد وه‌ك ته‌ره‌فدار، ته‌نانه‌ت له‌هه‌وڵه‌كانیدا بۆ به‌ده‌ستهێنانی زیاتری ده‌ستكه‌وت بۆ كوردستان، لایه‌نه‌كانی دیكه‌ وه‌ك نێوانگر ته‌ماشایان ده‌كرد، چونكه‌ هه‌میشه‌ داواو خواسته‌كانی كوردی ده‌به‌سته‌وه‌ به‌به‌ڵگه‌ی‌ ره‌وایی، به‌تایبه‌ت به‌ده‌ستوورو قانونه‌وه‌، ئه‌مه‌ش ئه‌وه‌نده‌ی‌ دیكه‌ داواكانی ئه‌وی‌ به‌هێز ده‌كرد.
هه‌ڵسوكه‌وتی سەرۆک مام جه‌لال له‌كۆكردنه‌وه‌ی‌ شیعه‌و سوننه‌و كورد به‌یه‌كه‌وه‌ له‌سه‌ر مێزی گفتوگۆ، خاڵی به‌هێزی ئه‌و پیاوه‌بوو له‌حوكمڕانیدا، هه‌میشه‌ خۆی له‌كێشه‌و گرفت‌و قه‌یرانه‌كان گه‌وره‌تر ده‌بینی، بۆیه‌ سوننه‌و شیعه‌ متمانه‌یه‌كی زۆریان پێده‌كردو هه‌میشه‌ بۆ چاره‌سه‌ری‌ كێشه‌كانیان په‌نایان بۆ ده‌برد.
نه‌خۆشكه‌وتنی‌ سەرۆک مام جه‌لال‌و دوركه‌وتنه‌وه‌ی‌ له‌به‌غدا، كاریگه‌ری‌ زۆری له‌سه‌ر دۆخی كورد له‌به‌غدا هه‌بوو، هه‌موو ئه‌وانه‌ی‌ له‌به‌غدا بوون، شایه‌تی ئه‌وه‌ ده‌ده‌ن كه‌ سەرۆک مام جه‌لال بۆ ئه‌وان پشت‌و په‌نایه‌كی زۆر به‌هێزبووه‌ له‌هه‌ر هه‌نگاو و بڕیارێكدا، بگره‌ له‌حاڵی دروستبوونی هه‌ر كێشه‌یه‌كدا ئه‌وه‌نده‌ ترسیان نه‌بوو، چونكه‌ پێیانوابو سەرۆک مام جه‌لال توانای‌ چاره‌كردنی هه‌یه‌.


ناو:  
ئیمه‌یل:    
سه‌رنج:  

#7397
23/10/2017
ئه‌رشیف
وه‌رزش
‌ بێڵد چاره‌سه‌ره‌ ئه‌فسوناوییه‌كه‌ی‌ یۆب هاینكس ئاشكرا ده‌كات 23/10/2017
‌ كۆنتا كۆتایی به‌ وه‌رزی یاریكردنی ده‌هێنێت 23/10/2017
زانست
‌ سوودی پشوویەكی كورت لە كاتی كاردا 23/10/2017
‌ تایبەتمەندییەكانی نۆكیا 8 23/10/2017
‌ دانانی بۆیلەری ژێر حەمام گونجاوە؟ 23/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP