ئیتر یان به‌شێك ده‌بین له‌ هاوكێشه‌كان بۆ گره‌نتی‌ مافـه‌كانمان، یان خۆمان بڕیار له‌ چاره‌نوسی‌ خۆمان ده‌ده‌ین!
مه‌لا به‌ختیار: ئیتر یان به‌شێك ده‌بین له‌ هاوكێشه‌كان بۆ گره‌نتی‌ مافـه‌كانمان، یان خۆمان بڕیار له‌ چاره‌نوسی‌ خۆمان ده‌ده‌ین! ‌ کوردستانی نوێ‌ 9/8/2017
ئه‌م بابه‌ته‌ی مه‌لا به‌ختیار لێپرسراوی‌ ده‌سته‌ی‌ كارگێڕی‌ كه‌ رۆژی‌ 3/8/2017، له‌ قاوه‌خانه‌ی‌ كه‌لتوری‌ له‌ ده‌ربه‌ندیخان پێشكه‌شكرا، بووه‌ مایه‌ی مشتومڕێكی زۆر له‌ میدیاكان و تۆڕه‌كۆمه‌ڵایه‌تییه‌كان، چونکە بە پچڕ پچڕی و بڕگەکانی لەڕێڕەوی خۆی دەرهێنرا بوو، جا بۆ ده‌رخستنی ڕاستی وته‌كان و كه‌شوهه‌وای كۆڕه‌كه‌، لێره‌دا ده‌قه‌كه‌ی وه‌كو خۆی بڵاوده‌كه‌ینه‌وه‌.
ده‌رفه‌تی گفتوگۆی سه‌نگین و به‌شداری دیموكراتیانه‌ له‌سه‌ر بابه‌تی كۆڕه‌كه‌و باسوخواسی ریفراندۆمی كوردستان بۆ هه‌مووان كراوه‌یه‌.
(١-٢)
سوپاس بۆ قاوه‌خانه‌ی‌ كه‌لتوری‌ ده‌ربه‌ندیخان، كه‌ له‌چوار مانگ له‌مه‌وبه‌ره‌وه‌، ته‌كلیفی‌ ئه‌م كۆڕه‌یان كرد.. ئێستا ده‌رفه‌ت ره‌خسا، هه‌تا بێمه‌ شاره‌كه‌و خزمه‌تی‌ ئه‌و خه‌ڵكه‌و ئه‌و كۆڕه‌ی‌ كه‌ هه‌ر خۆیان ناونیشانه‌كه‌یان بۆ هه‌ڵبژاردووه‌، به‌نده‌، تیایدا روانگه‌ی‌ خۆم رونبكه‌مه‌وه‌..
جار جار دێمه‌ ده‌ربه‌ندیخان‌و هه‌ر له‌مانگی‌ دوودا، كۆڕێكی‌ ترمان لێره‌ پێشكه‌شكرد. هه‌روه‌ك یاده‌وه‌رییه‌كانم له‌گه‌ڵ ئه‌م شاره‌دا، هیچ كاتێك بیرناچێته‌وه‌و ده‌توانم بڵێم، هه‌ندێكیش قه‌رزاری‌ ده‌ربه‌ندیخانم.

یه‌كێك له‌هێڵه‌ به‌هێزه‌كانمان بوو، ڵسۆزانه‌ خه‌باتیان ده‌كرد
یه‌كه‌م؛ ئه‌گه‌رچی‌ بۆ خۆم مناڵی‌ خانه‌قینم، به‌ڵام پۆلی‌ یه‌كه‌م‌و دووه‌می‌ سه‌ره‌تایم لێره‌ ته‌واو كردووه‌. ئه‌وكاته‌ زاراوه‌ی‌ سۆرانیمان به‌باش نه‌ده‌زانی‌، به‌ڵام ئێستا كه‌ ده‌توانم به‌ سۆرانی‌‌و به‌ باشی‌ قسه‌ بكه‌م، هی‌ ئه‌وه‌یه‌ له‌م شاره‌ زمانم به‌سۆرانی‌ پژاوه‌. ئه‌گه‌ر بناغه‌ی‌ به‌سۆرانی‌ قسه‌كردن له‌پۆلی‌ یه‌ك‌و دووی‌ سه‌ره‌تایی‌ و لێره‌ نه‌پژایه‌، دڵنیام ئێستا نه‌مده‌توانی‌ به‌وشێوه‌یه‌ قسه‌ بكه‌م، كه‌ خه‌ڵك له‌سۆرانییه‌كه‌م رازی‌ بێت‌و شتێكیش كوردی‌ باش بزانم. بۆیه‌ خۆم به‌قه‌رزارباری‌ ده‌به‌ندیخان ده‌زانم.
دووه‌م؛ له‌كۆتایی‌ ساڵی‌ (1976) و سه‌ره‌تای‌ (1977) به‌موخته‌فێتی‌ له‌گه‌ڵ شه‌هیدان (شاهۆ، ملازم جوامێر، شه‌ماڵ، گۆڕان) بۆ چالاكییه‌ك له‌(به‌كر بایك)ه‌وه‌، هاتینه‌ (قه‌ڵا ته‌بزان)‌و دواتر بۆ ماوه‌ی‌ (10) رۆژ له‌ده‌ربه‌ندیخان مامه‌وه‌و پاشئه‌وه‌ی‌ رێكخستنه‌كانی‌ سلێمانی‌ ناسنامه‌یه‌كی‌ ساخته‌یان بۆ كردم، چومه‌ سلێمانی‌‌و له‌وێشه‌وه‌ بۆ شارباژێڕ.. بۆیه‌ ئه‌م جۆره‌ یاده‌وه‌رییانه‌ بۆمن هه‌رگیز له‌بیرناچنه‌وه‌. ده‌ربه‌ندیخان، ئه‌گه‌رچی‌ حكومه‌ت هه‌رده‌م له‌لایه‌ن ده‌زگا ئه‌منییه‌كان‌و جاشه‌كان، به‌هۆی‌ به‌نداوه‌كه‌وه‌، چاوی‌ زۆری‌ له‌سه‌ر بوو، به‌ڵام به‌هۆی‌ له‌ساڵی‌ (1976)دا سه‌رپه‌رشتیاری‌ رێكخستنه‌كانم ده‌كرد له‌سه‌رانسه‌ری‌ عیراقدا، ده‌زانم چ وه‌ك پێشمه‌رگه‌، رێكخستنه‌ نهێنییه‌كان، زیندانییه‌كانی‌، خه‌ڵكی‌ شاره‌كه‌و گونده‌كانی‌ ئه‌مبه‌رو ئه‌وبه‌ری‌، یه‌كێك له‌هێڵه‌ به‌هێزه‌كانمان بوو، كه‌ به‌ به‌رده‌وامی‌ ده‌نگوباسه‌كانی‌ بۆ ده‌ناردین‌و دڵسۆزانه‌ خه‌باتیان ده‌كرد. 

ئه‌گه‌ر باوه‌ڕمان به‌دیموكراسی‌‌و ئازادی‌ هه‌یه‌
ئێستاش خۆشحاڵم، شاره‌كه‌ گه‌شه‌ی‌ كردووه‌‌و په‌ره‌یسه‌ندووه‌و به‌چوارده‌وریدا بۆته‌ شارێكی‌ جوان‌و ئه‌و خه‌ڵكه‌ جوانه‌ی‌ هه‌یه‌، خه‌باتی‌ مه‌ده‌نی‌ و گفتوگۆ، ره‌خنه‌ و ناڕه‌زایی‌، دڵسۆزیی‌‌و قاره‌مانێتی‌، شه‌هید به‌خشین‌و كارلێك له‌گه‌ڵ رووداوه‌كاندا، مایه‌ی‌ دڵخۆشیمانه‌.
بۆ كۆڕه‌كه‌ش تكا ده‌كه‌م، سه‌ره‌تا وه‌ك كۆڕێك لێی‌ بڕوانن، ئه‌وه‌ بیر به‌رنه‌وه‌ چ حزبێك چی‌ وتووه‌! یه‌كێتیی‌، گۆڕان، پارتی‌‌و هێزه‌ ئیسلامییه‌كان چیان وتوه‌و چی‌ ده‌ڵێن؟ میدیاكان چی‌ باس ده‌كه‌ن؟ هه‌موو ئه‌وانه‌ له‌هزری‌ خۆتاندا لابه‌رن، بابه‌تێك كه‌ هاتۆته‌ پێشه‌وه‌، سه‌عاتێك مۆڵه‌تتان لێده‌خوازم‌و وه‌كو كوردێك كه‌ لێره‌ دانیشتوین‌و ئه‌گه‌ر باوه‌ڕمان به‌دیموكراسی‌‌و ئازادی‌ هه‌یه‌، ئه‌وا پێكه‌وه‌ گفتوگۆ ده‌كه‌ین. ئه‌مه‌ش ته‌ندروستترین‌و ئارامترین شێوه‌ی‌ دیالۆگه‌، چونكه‌ به‌حوكمی‌ پێشوه‌خته‌ دیالۆگ ناكرێ‌، به‌ڵكو ده‌بێ‌ گوێ‌ بگری‌، بۆ ئه‌وه‌ی‌ گوێت لێبگیرێ‌!

بۆ ئه‌فریقا حه‌ڵاڵ بێ‌، بۆ كوردستان، سه‌رسوڕهێنه‌ربێ‌؟!
ریفراندۆم.. ره‌وایه‌ له‌سه‌رده‌می‌ گریكه‌كان‌و شارستانییه‌تی‌ یۆناندا ریفراندۆم هه‌بێ‌، به‌ڵام ئێستا له‌لای‌ ئێمه‌، كارێكی‌ سه‌رسوڕهێنه‌ر بێ‌؟ واتا پێش زایین به‌چه‌ند هه‌زار ساڵێك ریفراندۆم هه‌بووه‌، به‌ڵام ئێستا بۆ ئێمه‌ سه‌رسوڕهێنه‌ر بێ‌؟ ئه‌مه‌ خاڵی‌ یه‌كه‌م. 
خاڵی‌ دووه‌م؛ ره‌وایه‌ ریفراندۆم تێكه‌ڵ به‌سیاسه‌ت‌و چاره‌نوسی‌ سیاسی‌، كۆمه‌ڵایه‌تی‌، چاره‌نوسی‌ حزبه‌كان‌و ده‌وڵه‌ته‌كان كرابێ‌‌و له‌سه‌ده‌ی‌ هه‌ژده‌هه‌مه‌وه‌ هه‌بوێ‌، له‌سه‌ده‌ی‌ نۆزده‌هه‌م په‌ره‌ی‌ سه‌ندبێ‌‌و له‌سه‌ده‌ی‌ بیسته‌م، كرابێ‌ به‌ بنه‌مای‌ بڕیاردان‌و له‌سه‌ر بنه‌مای‌ ریفراندۆم بڕیار له‌چاره‌نوسی‌ ده‌وڵه‌ته‌كان، داو ده‌زگا گه‌وره‌كانی‌ دنیاو له‌ عوصبه‌ت ئوممه‌می‌ جارانه‌وه‌، بۆ نه‌ته‌وه‌یه‌كگرتوه‌كان، یه‌كێك له‌چه‌كه‌كانی‌ ده‌ستیان بۆ ساغكردنه‌وه‌ی‌ مافی‌ گه‌لان، یان بۆ چاره‌سه‌ركردنی‌ هه‌ر كێشه‌یه‌كی‌ گه‌لان، كۆمه‌ڵایه‌تی‌، ریفراندۆمبێ‌! بۆ گه‌لان حه‌ڵال بێ‌، بۆ ئۆرۆپا و رۆژئاوا تێكڕا حه‌ڵاڵ بێ‌، بۆ ئه‌فریقا، بۆ باشوری‌ رۆژهه‌ڵاتی‌ ئاسیا‌و سه‌ره‌نجام له‌دوای‌ ساڵی‌ (1989- 1990) زیاتر له‌ (25) ده‌وڵه‌ت به‌ڕیفراندۆم دامه‌زرابێ‌‌و گه‌لانی‌ بچوك، ریفراندۆمیان كردبێ‌‌و بوبێتن به‌ده‌وڵه‌تی‌ سه‌ربه‌خۆ، له‌وانه‌ كۆسۆڤۆ. كه‌ نه‌پرسی‌ به‌ په‌رله‌مانی‌ سه‌رووی‌ خۆیی‌‌و نه‌ به‌ په‌رله‌مانی‌ نه‌ته‌وه‌ی‌ سه‌رده‌ست كردووه‌. ئه‌ریتریا، له‌(11)ی‌ ئه‌یلولی‌ ساڵی‌ (1961)، له‌هه‌مان رۆژی‌ كه‌ شۆڕشی‌ ئه‌یلولی‌ كوردستان به‌رپا بووه‌، شۆڕش له‌وێش به‌رپا ده‌بێت‌و هه‌تا ده‌یگه‌یه‌نێته‌ ئه‌وه‌ی‌ كه‌ حكومه‌تی‌ ناوه‌ندی‌ لاواز ده‌بێ‌، گۆڕانكاری‌ له‌حكومه‌تی‌ ناوه‌ندی‌ رووده‌دات‌و ریفراندۆم ده‌كات‌و له‌ئه‌فریقا ده‌بێ‌ به‌ده‌وڵه‌تێكی‌ سه‌ربه‌خۆ. بۆچی‌ بۆ ئه‌وان، بۆ باشوری‌ سودان، بۆ ته‌یموری‌ شه‌رقی‌ ره‌وا بێ‌‌و به‌ئاسایی‌ وه‌رگیرابێ‌، به‌ڵام له‌لای‌ كوردو بۆ كوردستان، كارێكی‌ سه‌رسوڕهێنه‌ربێ‌؟! 

حكومه‌ته‌كان، له‌ساڵی‌ (1992)ه‌وه‌ له‌دۆخی‌ ئابوری به‌رپرسیارن
به‌شی‌ زۆری‌ ئه‌و ره‌خنانه‌شی‌ ئێستا ده‌گیرێن، له‌سه‌ر ئابورییه‌، كه‌ دۆخی‌ ئابوریمان باش نییه‌. بۆ خۆشم جگه‌ له‌وه‌ی‌ هیچ لاریم له‌وه‌نییه‌ كه‌ دۆخی‌ ئابوری‌ باش نییه‌، زیاتریش له‌وه‌، ده‌ڵێم: كۆی‌ حكومه‌ته‌كانی‌ رابردوو، له‌ساڵی‌ (1992)ه‌وه‌ هه‌تا ئێستا به‌رپرسیارن له‌وه‌ی‌ دۆخی‌ ئابوریمان، گه‌یشته‌ ئه‌نجامێك كه‌ ئێستا (11 بۆ 12) ملیار دۆلار قه‌رزدار بین. هه‌موو تاوان‌و ئۆباڵه‌كه‌، له‌گه‌ردنی‌ ئه‌م حكومه‌ته‌و كابینه‌ی‌ هه‌شت نه‌ ئاڵێنین باشه‌. چونكه‌ له‌یه‌كه‌م كابینه‌وه‌، حكومه‌ته‌كان، هه‌ریه‌ك به‌شێوه‌یه‌ك به‌شی‌ خۆی‌ به‌رپرسیاره‌ له‌وه‌ی‌ ژێرخانی‌ ئابورییه‌كی‌ پته‌ومان نییه‌و به‌روبوومه‌ ناوخۆییه‌كانمان وه‌ك پێویست له‌بازاڕ ساغ ناكرێنه‌وه‌، پاشكه‌وتی‌ دراو ‌و ئاڵتون‌و دۆلارمان نییه‌و سه‌ره‌نجام حكومه‌ت ناچار رووبه‌ڕوی‌ ئه‌و دۆخه‌ بۆوه‌، كه‌ ئێستا پاشكه‌وتی‌ مووچه‌ ده‌كات‌و چاره‌ك یان نیوه‌ مووچه‌یه‌ك ده‌دات! كه‌ ته‌نها بۆ ئاسایش‌و پۆلیس‌و پێشمه‌رگه‌ نه‌بێ‌، ئه‌گه‌رنا باقی‌ مووچه‌كانی‌ تر داشكاوه‌. هیچ لارییه‌كم له‌مه‌ نییه‌ كه‌ ئه‌مه‌ هه‌ڵه‌یه‌‌و خه‌ڵكیش ناهه‌قی‌ نییه‌، كه‌ داوای‌ داخوازی‌ موچه‌ی‌ خۆی‌ بكات‌و سوریش بێ‌ له‌سه‌ر ئه‌وه‌ی‌ مووچه‌كه‌ی‌ بدرێتێ‌‌و پاشكه‌وته‌كانیشی‌ كه‌ نه‌یدراوه‌تێ‌، بیدرێته‌وه‌. له‌سه‌ر ئه‌م خاڵه‌، هیچ قسه‌یه‌كم نییه‌. چونكه‌ ئه‌مه‌ تازه‌ بووه‌ به‌ماڵ له‌سه‌ر ئه‌م حكومه‌ته‌و ئۆباڵ له‌سه‌ر خۆیان. 
ئابوریی‌ سه‌ربه‌خۆ، له‌دوای‌ ده‌وڵه‌تی‌ سه‌ربه‌خۆ 
به‌ڵام ئازیزان‌و دۆستان، له‌دنیادا ریفراندۆم دوای‌ ئابوری‌ نه‌كه‌وتووه‌، به‌ڵكو ئابوری‌ دوای‌ ریفراندۆم ده‌كه‌وێت. ده‌وڵه‌ت داده‌مه‌زرێنرێ‌، پاشان ده‌بیت به‌خاوه‌ن ئابوری‌ سه‌ربه‌خۆ. چونكه‌ ئه‌گه‌ر ده‌وڵه‌ت دانه‌مه‌زرێنی‌، نابی‌ به‌خاوه‌ن ئابوری‌ سه‌ربه‌خۆ. دوای‌ ده‌وڵه‌ت دامه‌زراندن ئابورییه‌كه‌، نه‌وت، غاز، ئاسمان ‌و زه‌وی‌، سنوره‌كه‌ سه‌ربه‌خۆ ده‌بێت و ده‌سه‌ڵاته‌كه‌ش ده‌بێ‌ به‌ده‌سه‌ڵاتێكی‌ سه‌ربه‌خۆو سنور دانانرێ‌ بۆ ده‌سه‌ڵاتی‌ داڕشتنی‌ یاسا‌و هه‌ندێك له‌وه‌زاره‌ته‌كان تایبه‌ت نابن بۆ ناوه‌ند، له‌وانه‌ وه‌زاره‌ته‌كانی‌ ئابوری‌، دارایی‌، سنوره‌كان‌و گومرگه‌كانمان، كه‌ تایبه‌تن به‌ناوه‌ند. بۆیه‌ ئه‌گه‌ر قسه‌ له‌ڕیفراندۆم‌و سه‌ربه‌خۆیی‌ ده‌كه‌ین، ده‌بێ‌ بزانین، سه‌ربه‌خۆیی‌ واده‌كات ببین به‌خاوه‌ن ئابورییه‌كی‌ سه‌ربه‌خۆی‌ خاوه‌نی‌ سه‌روه‌ت‌و سامانی‌ ئه‌م وڵاته‌. 
تكایه‌، ئه‌م قسه‌یه‌ش وا لێكمه‌ده‌نه‌وه‌ كه‌ ئه‌م حكومه‌ته‌ی‌ كوردستان هیچ نه‌كات‌و چاره‌سه‌ری‌ ئابوریی‌، موچه‌و پاشكه‌وتی‌ موچه‌ نه‌كات، له‌به‌رئه‌وه‌ی‌ ئابوری‌ سه‌ربه‌خۆ له‌دوای‌ ده‌وڵه‌تی‌ سه‌ربه‌خۆیه‌. نه‌خێر، ئێستا چی‌ ده‌كرێت، ده‌بێ‌ جێبه‌جێ‌ بكرێت‌و به‌ڵام وه‌كو بنچینه‌و راستی‌ بزانین ئابوریی‌ سه‌ربه‌خۆ، له‌دوای‌ دامه‌زراندنی‌ ده‌وڵه‌تی‌ سه‌ربه‌خۆ دێت.

سه‌رمان نایه‌شێ‌، بۆ په‌ڕۆی‌ پێوه‌ ده‌به‌ستین!
لێره‌شه‌وه‌ دێمه‌ سه‌ر ئه‌و پر ۆسه‌یه‌ی‌ كه‌ له‌كوردستاندا هه‌یه‌‌و بڕیاری‌ لێدراوه‌. ئه‌م بڕیاره‌ بۆ دراوه‌؟ هۆكاره‌كه‌ی‌ چییه‌؟ ئایا عیراق پڕه‌ له‌خێرو بێر! ئێمه‌ش شێت بووین و هه‌ر له‌خۆمانه‌وه‌ بڕیارمانداوه‌؟ ئایا ئه‌م وڵاته‌، هه‌رچی‌ كێشه‌ی‌ كوردستان هه‌یه‌ چاره‌سه‌ری‌ كردووه‌؟ ئه‌گه‌ر چاره‌سه‌ری‌ كردووه‌‌و سه‌رمان نایه‌شێ‌، بۆ په‌ڕۆی‌ پێوه‌ ده‌به‌ستین! ئایا دۆخی‌ ئابوری‌ كوردستان، په‌یوه‌ندی‌ به‌ دۆخی‌ عیراق‌و بڕینی‌ موچه‌و بودجه‌وه‌ نییه‌؟ ئه‌گه‌ر په‌یوه‌ندی‌ هه‌یه‌ یان نییه‌تی‌، هه‌ر ده‌بێ‌ بزانین! ئایا سه‌رپكشین له‌ هه‌نارده‌كردنی‌ نه‌وت‌و غازی‌ خۆمان، كه‌ چوار ساڵه‌ ئه‌م كێشه‌یه‌مان له‌گه‌ڵ عیراقدا هه‌یه‌و (97) ساڵه‌ له‌گه‌ڵ حكومه‌تی‌ عیراقداین، له‌ساڵی‌ (1921-1922)ه‌وه‌ نه‌وت له‌عیراق ده‌رده‌هێنرێت‌و ئه‌م (97) ساڵه‌ له‌گه‌ڵ ئه‌م وڵاته‌ بووین، به‌ڵام چوار ساڵه‌ نه‌وت‌و غازی‌ خۆمان ده‌فرۆشین، واته‌ عیراق (93) ساڵ، نه‌وت‌و غازی‌ كوردستانی‌ فرۆشتووه‌و كوردستانیشی‌ به‌یه‌كێك له‌دواكه‌وتووترین ناوچه‌كانی‌ عیراق به‌جێهێشتووه‌! كاتێكیش سه‌دام رووخاوه‌، شاری‌ دواكه‌وتوو، وێران‌و روخاو، ته‌عریب كراو، ئه‌نفال‌و به‌دبه‌ختی‌، پێنج هه‌زار گوندی‌ ته‌خت كراو و (36) ناحیه‌‌و (6) قه‌زای‌ وێرانكراوی‌ بۆ به‌جێهێشتووین! تاوانه‌كانی‌ جینۆسایدیش بخه‌نه‌ ئه‌ولاوه‌. له‌ڕووی‌ ئابوریشه‌وه‌، كه‌مترین بودجه‌ بۆ كوردستان ته‌رخان كرابوو. له‌دوای‌ روخانیشه‌وه‌، له‌ سه‌دا (17) بۆ كوردستان ته‌رخانكرابوو، كه‌ به‌هۆی‌ سه‌رفیاتی‌ سیادیشه‌وه‌ له‌عیراق، هیچ مانگێك به‌ته‌واوی‌ له‌سه‌دا (14) له‌بودجه‌ی‌ عیراق، نه‌هاتۆته‌ كوردستان!. 

ناكاته‌ قه‌ره‌بووی‌ ئه‌نفال‌و كیمیاباران
ئه‌مه‌ له‌كاتێكدا، له‌دوای‌ روخانی‌ به‌عسه‌وه‌، هه‌رچی‌ پاره‌ی‌ وه‌رگیراو هه‌یه‌، ده‌یكه‌ن به‌منه‌ت به‌سه‌رمانه‌وه‌. به‌ڵام هه‌موو ئه‌وه‌ی‌ وه‌رگیراوه‌و (10) ساڵی‌ تریش له‌سه‌دا (17)ه‌كه‌ به‌بێ‌ كه‌موكوڕی‌ بگاته‌ كوردستان‌و هه‌موو ئه‌وه‌ی‌ وه‌رگیراوه‌، ناكاته‌ ئه‌وه‌ی‌ قه‌ره‌بووی‌ ئه‌نفال، كیمیاباران‌و هه‌موو ئه‌و به‌دبه‌ختیانه‌ی‌ كه‌ له‌كوردستاندا رووبه‌ڕوومان بۆته‌وه‌. ته‌نها قه‌ره‌بووی‌ زیانه‌ مادییه‌كان ناكاته‌وه‌، نه‌ك قه‌ره‌بووی‌ زیانه‌ رۆحییه‌كان..!
له‌ئۆرۆپا، هه‌ر هاووڵاتییه‌ك به‌غه‌در بكوژرێت‌و شه‌هید بكرێ، قه‌ره‌بووه‌كه‌ی‌ تا (10 بۆ 15) ملیۆن دۆلار ده‌بێ. به‌ڵام كوردستان (183) هه‌زار كه‌سمان به‌ته‌نها له‌ئه‌نفالدا شه‌هید كراون. ئه‌گه‌ر هه‌ر كه‌سێك (5) ملیۆن دۆلار قه‌ره‌بووی‌ بكرێته‌وه‌، شه‌هیدانی‌ هه‌ڵه‌بجه‌ی‌ شه‌هید، به‌هه‌مانشێوه‌. نه‌خێر (5) ملیۆن نا، با (3) ملیۆن قه‌ره‌بوو بكرێنه‌وه‌، به‌خانووی‌ روخاویانه‌وه‌، ئه‌گه‌ر ئه‌و رێژه‌ هه‌مووی‌ كۆبكرێته‌وه‌، ئایا نیوه‌ی‌ ئه‌و رێژه‌یه‌شمان به‌ناوی‌ بودجه‌ی‌ كوردستانه‌وه‌ وه‌رگرتووه‌؟! 
منه‌تمان به‌سه‌ردا ده‌كه‌ن، پاره‌مان ده‌ده‌نێ‌! شه‌ڕمان پێده‌فرۆشن، كه‌ هه‌ندێك له‌نه‌وت‌و غازی‌ خۆمان ده‌فرۆشین! به‌ڵام ئه‌وان پێش نه‌وت‌و غاز موچه‌و بودجه‌‌و نانیان بڕیوین! ئه‌گه‌ر له‌نه‌وت‌و غازدا كێشه‌مان له‌گه‌ڵ به‌غداد هه‌یه‌، ئه‌ی‌ له‌ماده‌ی‌ (140)دا چ كێشه‌یه‌كمان هه‌یه‌؟ كه‌ ماده‌یه‌كی‌ ده‌ستوریی‌ هه‌میشه‌یی‌‌و گه‌لپه‌سه‌نده‌. بۆ جێبه‌جیان نه‌كرد؟ سێ‌ سه‌رۆك وه‌زیرانی‌ شیعه‌ هاتن‌و جێبه‌جێیان نه‌كرد! پێشتریش جه‌نابی‌ عه‌للاوی‌ به‌هه‌مانشێوه‌. بودجه‌ی‌ قه‌ره‌بووه‌كه‌شیان جێبه‌جێ‌ نه‌كرد. له‌هه‌موو هه‌ڵبژاردنه‌كاندا بۆیان ساغبۆوه‌ كه‌ كورد زۆرینه‌یه‌، هه‌ر له‌شه‌نگاله‌وه‌ تا خانه‌قین، به‌كه‌ركوكیشه‌وه‌، كه‌ تێگه‌یشتن كورد زۆرینه‌یه‌، بودجه‌ی‌ كه‌ركوكیشیان بڕی‌‌و پرۆسه‌ی‌ جێبه‌جێكردنی‌ بڕگه‌كانی‌ ماده‌ی‌ (140)یشیان راگرت..! هه‌روه‌ك ئه‌وه‌ سێ‌ ساڵیشه‌ له‌به‌غداد قسه‌ له‌سه‌ر ئه‌وه‌ ده‌كه‌ن، كه‌ ماده‌ی‌ (140) كۆتایی‌ پێهاتووه‌.  ئه‌مه‌ له‌كاتێكدا ماده‌یه‌ك له‌ده‌ستوری‌ عیراقدا هه‌یه‌، كه‌ تیایدا هاتووه‌، ماده‌ی‌ (140) له‌و مادانه‌یه‌ كه‌ مایه‌ی‌ هه‌مواركردنه‌وه‌ نییه‌. بۆ خۆشم له‌گه‌وره‌ كاربه‌ده‌ستانی‌ عیراقم بیستووه‌، كه‌: دوای‌ ماده‌ی‌ (140) نه‌كه‌ون، چونكه‌ كۆتایی‌ پێهاتووه‌!! له‌به‌رامبه‌ریشدا ئه‌وه‌ی‌ به‌دڵی‌ ئێوه‌ بووه‌، له‌به‌غداد وه‌ڵاممان داوه‌ته‌وه‌، نه‌ك لێره‌وه‌.

دوو وه‌زیر له‌به‌غداد، هاوبه‌شی‌ راسته‌قینه‌یه‌!
باشه‌، له‌عیراقێكدا، چوارده‌ ساڵ سه‌دام رووخاوه‌، كێشه‌كانمان ساڵ به‌ساڵ زۆرتربوون، كه‌متر نه‌بوون! كێشه‌كانمان له‌جێبه‌جێكردنی‌ ده‌ستور، ماده‌ی‌ (140)، دیاریكردنی‌ سنوری‌ كوردستان، هاوبه‌شی‌ راسته‌قینه‌، زۆرتر بووه‌. كورد ته‌نها دوو وه‌زیری‌ له‌به‌غداد هه‌یه‌! ئایا ئه‌مه‌ هاوبه‌شی‌ راسته‌قینه‌و به‌شی‌ له‌سه‌دا (17)یه‌؟! وه‌زاره‌ته‌كه‌ش یه‌كێكیان رووناكبیرییه‌، كه‌ رووناكبیری‌ زاڵ له‌عیراقدا، رووناكبیریی‌ عه‌ره‌به‌. خۆ نه‌چووین رووناكبیری‌ كوردستان ببه‌ین بۆ به‌غداد. چونكه‌ ئه‌وان كه‌لتوری‌ كوردیان قبوڵ نییه‌. وه‌زیره‌كه‌ی‌ تریشمان كه‌ گۆڕانه‌، له‌ وه‌زاره‌تی‌ كۆچ‌و كۆچبه‌رانه‌. ئێستا دوو ملیۆن و نیو ئاواره‌ روویان له‌كوردستان كردووه‌و ورده‌ ورده‌ ده‌گه‌ڕێنه‌وه‌، كه‌ هه‌موویان عه‌ره‌بن‌و خه‌ڵكی‌ موسڵ‌و ئه‌و پێكهاتانه‌ی‌ ترن كه‌ له‌ده‌ره‌وه‌ی‌ پارێزگاكانی‌ كوردستانن. چونكه‌ له‌پارێزگاكانی‌ كوردستان، هیچ كه‌سێك ئاواره‌ نه‌بووه‌، هه‌تا وه‌زاره‌ت كاری‌ بۆ بكات، به‌تایبه‌تی‌ له‌كابینه‌كه‌ی‌ جه‌نابی‌ عه‌بادی به‌دواوه‌. بۆیه‌ هه‌ردوو وه‌زاره‌ته‌كه‌ش له‌خزمه‌تی‌ خۆیاندان، نه‌ك كورد. چونكه‌ كه‌مترین خه‌رجی ئه‌م وه‌زاره‌تانه‌ بۆ كوردستانه‌‌و ناشتوانن هیچ خه‌رجییه‌ك له‌كوردستاندا بكه‌ن، له‌به‌رئه‌وه‌ی‌ ده‌ڵێن، كوردستان بودجه‌ی‌ هه‌یه‌. 

جارێكی‌ تر چه‌ك له‌به‌رامبه‌رمان به‌كارده‌هێنن..!
كه‌واتا، له‌وڵاتێكدا كێشه‌كانی‌ ئابوری‌، ده‌ستوری‌، سنور، ناوچه‌ كێشه‌ له‌سه‌ره‌كان، نانبڕین، كێشه‌ی‌ قوڵكردنی‌ عه‌قڵی‌ تائیفی‌‌و عه‌قڵی‌ شۆڤێنییه‌تمان هه‌بێ‌‌و جار جاره‌ش له‌ناو لێپرسراوه‌كاندا ببیستین، كه‌ ئه‌گه‌ر ریفراندۆم بكه‌ین، هێزمان له‌دژ به‌كارده‌هێنن..! ئه‌مه‌ واتای‌ چی‌؟ واتا: هێشتا پاشماوه‌ی‌ عه‌قڵییه‌تی‌ چه‌ك به‌كارهێنان بۆ یه‌كلایكردنه‌وه‌ی‌ ناكۆكییه‌ سیاسییه‌كان، له‌به‌غداد هه‌رماوه‌!
به‌ڕاستی‌ ئه‌م عه‌قڵییه‌ته‌ش جێگه‌ی‌ مه‌ترسییه‌كی‌ گه‌وره‌یه‌، له‌به‌رئه‌وه‌ی‌ وڵاتێك (83) ساڵ پێش روخانی‌ سه‌دام چه‌كی‌ به‌كارده‌هێناو نه‌یتوانیوه‌ نه‌ته‌وه‌یه‌ك له‌باشوری‌ كوردستان له‌ناو به‌رن، كه‌چی‌ تازه‌ به‌تازه‌ بیر له‌وه‌ ده‌كه‌نه‌وه‌، ئه‌گه‌ر مافی‌ ریفراندۆم به‌كاربهێنین، جارێكی‌ تر چه‌ك له‌به‌رامبه‌رمان به‌كارده‌هێنن..!
ئه‌وه‌ی‌ جێگه‌ی‌ داخه‌، له‌ناو شیعه‌كاندا، دۆسته‌ هه‌ره‌ نزیكه‌كه‌مان، كه‌ له‌ساڵی‌ (1980)ه‌وه‌ هاوپه‌یمانیمان له‌گه‌ڵیاندا هه‌یه‌، ئه‌وان هه‌ڕه‌شه‌ ده‌كه‌ن‌و به‌كرێگیراوی‌ ئیسرائیلمان ده‌زانن! له‌میسر ده‌ڵێ‌: ته‌نها ئه‌وان به‌رگریان لێده‌كه‌ن‌و دانیان پێدا ده‌نێن! له‌كاتێكدا باڵیۆزخانه‌ی‌ ئیسرائیل، دوو كیلۆمه‌تر له‌و هۆتێله‌وه‌ دوور بوو، كه‌ ئه‌و لێی‌ دابه‌زیوه‌. به‌ڵام ئه‌ی‌ بۆ ناڵێی‌ ناچم بۆ میسر، چونكه‌ باڵیۆزخانه‌ی‌ ئیسرائیلی‌ لێیه‌! ئه‌ی‌ بۆ ناڵێی‌ ناچم بۆ ئوردن‌و زۆرێك له‌وڵاتانی‌ تری‌ عه‌ره‌بی‌، چونكه‌ باڵیۆزخانه‌ی‌ ئیسرائیلی‌ لێیه‌‌و زۆرێك له‌ئابوریی‌‌و سیاسه‌تمه‌داره‌كانی‌ ئیسرائیل، له‌و وڵاتانه‌ ته‌راتێنیانه‌! به‌ڵام بۆ ده‌بێ‌ گوناهێكی‌ گه‌وره‌بێ‌، كاربه‌ده‌ستێكی‌ ئیسرائیلی‌، كه‌ لێدوانێكی‌ داوه‌و ده‌ڵێت: كورد هه‌قی‌ خۆیه‌تی‌ ریفراندۆم بكات‌و مافی‌ چاره‌نوس وه‌ربگرێت، ئیتر راسته‌وخۆ كورد به‌ به‌كرێگیراوی‌ ئیسرائیل بزانرێ‌. یان واتا ته‌نها ئیسرائیل له‌سه‌ر زه‌وی‌ هه‌یه‌، كه‌ به‌رگری‌ له‌ كورد بكات؟! گریمان ئه‌وه‌ ئیسرائیل به‌ڵێنیشدا به‌رگریمان لێبكات، ئایا چۆن به‌رگریمان لێده‌كات؟ له‌كاتێكدا كه‌ نه‌سنوری‌ له‌گه‌ڵ كوردستاندا هه‌یه‌و نه‌ بڕیاریشیداوه‌، فڕۆكه‌و هاوكارمان بۆ بنێرێت، ته‌نها قسه‌یه‌كه‌و كردویه‌تی‌.

خۆی به‌ئوممه‌ی‌ باڵا ده‌ست ده‌زانێت به‌سه‌ر كورده‌وه‌
كێشه‌ی‌ كورد ئه‌وه‌یه‌، حكومه‌ته‌كانی‌ ده‌وڵه‌تی‌ عیراق، حزبه‌كانی‌ عیراق، ئایدۆلۆجییه‌ت‌و فه‌لسه‌فه‌ی‌ حوكمڕانی‌ له‌عیراقدا، نه‌یتوانیوه‌ شوناسی‌ نیشتمانیی‌ هاوبه‌ش له‌عیراقدا بۆ هاووڵاتی‌و پێكهاته‌ جیاوازه‌كان دروست بكات. له‌هه‌ستماندا ئه‌مه‌ی‌ دروست نه‌كردووه‌. نه‌ك به‌زۆری‌ زۆرداریی‌‌و به‌سوپا، سنوری‌ جوگرافی‌‌و سیاسی‌ عیراقیان دروستكرد، كه‌ له‌ساڵی‌ (1921)ه‌وه‌ كوردیان خزاندۆته‌ ناو ئه‌م سنورو ده‌وڵه‌ته‌وه‌. به‌ڵام ئه‌م وڵاته‌ش، هێشتا نه‌بووه‌ به‌دیموكراسی‌، نه‌بووه‌ به‌مه‌ده‌نی‌ هه‌تا شانازی‌ پێوه‌ بكه‌ین! نه‌یتوانیوه‌ متمانه‌یه‌ك له‌نێوان هاووڵاتییه‌كی‌ كورد، توركمان، مه‌سیحی‌، ئێزدی‌‌و عه‌ره‌بێكی‌ باشور، ناوه‌ڕاست‌و له‌به‌غداد دروست بكات! ئێستاش له‌هه‌ندێك شوێندا به‌كوردی‌ قسه‌بكه‌یت، گاڵته‌ت پێده‌كه‌ن! بۆ؟ 
چونكه‌ لێی‌ تێناگات‌و خۆیشی‌ به‌ئوممه‌ی‌ باڵا ده‌ست ده‌زانێت به‌سه‌ر كورده‌وه‌. له‌كاتێكدا ئینگلیز له‌ساڵی‌ (1921) هه‌تا ساڵی‌ (2003) ده‌وڵه‌تی‌ بۆ عه‌ره‌ب دروستكردووه‌، به‌ڵام كورد كه‌ (25) ساڵه‌ حكومه‌تمان هه‌یه‌، هه‌تا قه‌یرانه‌كه‌ توشی‌ كوردستان نه‌ببوو، با به‌راوردێكی‌ بكه‌ن‌و بزانن ئایا نه‌مانتوانیوه‌ گه‌وره‌ترین پێشكه‌وتن، له‌باشوری‌ كوردستان به‌دیبهێنین؟ یان عیراق توانیوێتی‌ له‌به‌سره‌، له‌ حلله‌ و سه‌ماوه‌ دروستی‌ بكات؟! یان له‌كه‌ربه‌لاو نه‌جه‌ف دروستیكردووه‌؟ له‌كاتێكدا چوار ساڵ له‌مه‌وبه‌ر له‌به‌سره‌ بووم، حه‌په‌سا بووم له‌و دواكه‌وتنه‌. له‌كه‌ربه‌لاو نه‌جه‌ف، به‌هه‌مانشێوه‌ حه‌په‌سام. بچن بۆ به‌غداد، ده‌حه‌په‌سێن له‌پیسی‌‌و پۆخڵی‌ شاره‌كه‌و ئه‌و عه‌قڵییه‌ته‌ دواكه‌وتووه‌، تائیفیی‌و شۆڤێنییه‌ی‌ ناو به‌غداد! چونكه‌ هێشتا كۆمه‌ڵێكی‌ مه‌ده‌نی‌ له‌به‌غداد دروستنه‌كراوه‌. ئه‌گه‌ر كۆمه‌ڵێكی‌ مه‌ده‌نی‌ دروست كراوه‌؟ بۆ لیستی‌ تائیفی‌، لیستی‌ شیعه‌و سوننه‌، ده‌توانن كاریگه‌ر بن له‌سه‌ر رای‌ گشتی‌‌و زۆرترین ده‌نگ بهێنن؟ به‌ڵام لیستی‌ هێزه‌ مه‌ده‌نییه‌كان، كه‌مترین ده‌نگ بهێنن؟!
بۆیه‌ ئه‌م وڵاته‌ وڵاتێك نییه‌، به‌هه‌ستی‌ قوڵی‌ خۆم بڵێم نیشتمانی‌ منه‌. چونكه‌ به‌سه‌رمدا سه‌پێنراوه‌! له‌گه‌ڵ ئه‌وه‌شی‌ قبوڵمان نه‌كردووه‌، به‌ڵام هه‌ر به‌سه‌رماندا سه‌پێنراوه‌. 

هیچ كوردێك له‌چاره‌نوسی‌ خۆی‌ دڵنیا نه‌بێ‌!
له‌ڕێككه‌وتننامه‌ی‌ سیڤه‌ردا، راپرسی‌ له‌كوردستاندا كراوه‌، كوردیش قبوڵی‌ نه‌بووه‌ به‌عیراقه‌وه‌ بلكێندرێت! به‌ڵام هه‌ر سه‌پاندویانه‌، ئه‌ویش به‌زه‌بری‌ ئینگلیز، به‌تۆپی‌ ئینگلیزو به‌فشاری‌ پشتیوانی‌ وڵاتانی‌ هه‌رێمایه‌تی‌، ئه‌م وڵاته‌مان به‌سه‌ردا سه‌پێنراوه‌. به‌ڵام ئێستا دوای‌ ئه‌و (97) ساڵه‌ به‌رگه‌ی‌ ئه‌م وڵاته‌ ده‌گرین، به‌شوناسی‌ حوكمڕانی‌ جیاوازی‌ پاشایه‌تی‌، نه‌ته‌وه‌یی‌، به‌عسی‌، كۆماریی‌‌و ئێستاش شیعه‌مان قبوڵكردووه‌. به‌ڵام كه‌ رێز له‌ده‌ستور ناگرن، هه‌قمانه‌ نیگه‌ران بین! بۆ سازانی‌ سیاسی‌، پابه‌ندی‌ رێككه‌وتنی‌ سیاسی‌ نێوان حزبه‌ سیاسییه‌كان نابن، هه‌قه‌ نیگه‌ران بین. تۆ، كه‌ نانم ده‌بڕیت، حه‌شدی‌ شه‌عبی‌ دروستده‌كه‌یت‌و له‌پێكهاته‌ی‌ داڕێژراوی‌ هێزی‌ نیشتمانیی‌ عیراقدا، ناتوانی‌ وه‌كو سوپایه‌كی‌ پڕۆفیشناڵ مامه‌ڵه‌ی‌ له‌گه‌ڵ بكه‌یت، كه‌ ده‌وڵه‌تی‌ عیراق خۆیشی‌ ناتوانێ‌ وه‌كو سوپایه‌كی‌ پیشه‌یی‌‌و پرۆفیشناڵ مامه‌ڵه‌ی‌ له‌گه‌ڵدا بكات! هه‌قمه‌ نیگه‌ران بم. چونكه‌ هه‌فته‌ نییه‌ جه‌نابی‌ عه‌بادی‌ و وه‌زیره‌كان نیگه‌رانی‌ ده‌رنه‌بڕن له‌سه‌ر ئه‌وه‌ی‌ ئه‌م حه‌شدو ئه‌و حه‌شد چیده‌ڵێن؟! كه‌وابێ‌ بۆ كورد نیگه‌ران نه‌بێ‌؟!
چونكه‌، ئه‌گه‌ر به‌ئه‌زمونیش بێ‌، ئه‌زمونی‌ سه‌عدیه‌، دووز خورماتوو، یه‌نگجه‌و ئامرلیمان هه‌یه‌، كه‌ حه‌شدی‌ شه‌عبی‌، چۆن حوكمی‌ ده‌كات‌و له‌سێ‌ ساڵ له‌مه‌وبه‌ریشه‌وه‌ (300) كورد، له‌ناوچه‌ی‌ دووز خورماتوو دیارنه‌ماون، یان كوژراون، یان سه‌ره‌ونگوم كراون! ته‌نانه‌ت كار گه‌یشتۆته‌ ئه‌وه‌ی‌ پاسه‌وانه‌كانی‌ سه‌رۆك كۆمار له‌و رێگایه‌ ده‌فڕێنن!! كه‌واتا چۆن نیگه‌ران نابین! ئایا میلله‌ت هه‌یه‌، سه‌ركردایه‌تی‌ سیاسی‌ هه‌بێ‌‌و له‌به‌رامبه‌ر ئه‌م نه‌خشه‌ سیاسییه‌، جوگرافییه‌، ئابوریی‌‌و ئه‌م عه‌قڵییه‌ته‌ی‌ حوكمڕانی‌، له‌رووداوه‌كانی‌ ئێستای‌ رۆژهه‌ڵاتی‌ ناوه‌ڕاست نیگه‌رانی‌ نه‌بێت‌و له‌چاره‌نوسی‌ خۆی‌ نه‌ترسێت؟! یان ئه‌م سه‌ركردایه‌تی‌ سیاسییه‌ی‌ كوردستان، هیچ ئه‌زمونێكی‌ له‌گه‌ڵ حكومه‌ته‌كانی‌ رابردوو عیراق نییه‌؟ یان  ئه‌زمونه‌كان ده‌بێ‌ وایان فێركردبین، كه‌ ده‌بێ‌ نیگه‌ران بین‌و له‌چاره‌نوسی‌ خۆشمان بترسین!. هه‌تا ئه‌م وڵاته‌ نه‌بێ‌ به‌وڵاتێكی‌ دیموكراسی‌ راسته‌قینه‌، هیچ كوردێك له‌چاره‌نوسی‌ خۆی‌ دڵنیا نه‌بێ‌! مه‌حاڵه‌ دڵنیابوون. چونكه‌ مافی‌ نه‌ته‌وه‌كان، ته‌نها له‌سایه‌ی‌ سیسته‌می‌ دیموكراسی‌ راسته‌قینه‌دا دابین ده‌بێت. نه‌ك ته‌نها به‌ به‌ڵێن‌و به‌ سۆز. نه‌ك به‌دروستكردنی‌ هێزی‌ ناپرۆفیشناڵ له‌ژێر پاساوی‌ داعش‌و جۆره‌ها ناوی‌ تردا.. بۆیه‌ ئه‌م وڵاته‌ كه‌ هه‌تا ئێستا نادیموكراته‌‌و ناتوانین بڵێین كه‌لتوری‌ دیموكراسی‌ له‌م وڵاته‌دا هه‌یه‌، ته‌نانه‌ت ناتوانین بڵێین ده‌ستوری‌ عیراق، ده‌ستورێكی‌ دیموكراتی‌ عه‌یار (24)ه‌. چونكه‌ نیوه‌ی‌ ده‌ستوری‌ عیراق، نادیموكراتییه‌..! ئه‌وه‌ ده‌ستوری‌ عیراق، بالێكۆڵینه‌وه‌ی‌ لێ بكه‌ین، كێ‌ یاساییه‌و شاره‌زایه‌ له‌ده‌ستور، با تاوتوێی‌ بكات، بزانن هه‌مووی‌ چ په‌یوه‌ندییه‌كی‌ به‌دیموكراسییه‌وه‌ هه‌یه‌. به‌ڵكو هاوسه‌نگییه‌ك هه‌یه‌ له‌ده‌ستوردا، كه‌ كورد و هه‌ندێك له‌پیاوه‌ دیموكراته‌كانی‌ عیراق، ئه‌م هاوسه‌نگییه‌مان دروستكردووه‌‌و به‌شێكی‌ بۆ به‌ها دیموكراسییه‌كانه‌و به‌شه‌كانی‌ تریشی‌ بۆ مه‌زهه‌ب، بۆ تائیفه‌، بۆ شیعه‌و سوننه‌و نه‌ته‌وه‌ی‌ تری‌ عه‌ره‌بییه‌. 
هێشتا ئومێدێكی‌ ستراتیجی‌ نییه‌!
بۆیه‌ ئێستا، كاتێك ئه‌و رابردووه‌ له‌دامه‌زراندنی‌ ده‌وڵه‌تی‌ عیراقه‌وه‌ هه‌تا ئه‌م حكومه‌ته‌ی‌ ئێستا ده‌خوێنمه‌وه‌، رووداوه‌كانی‌ رۆژهه‌ڵات ده‌خوێنمه‌وه‌، كه‌ گۆنگره‌ له‌جنێڤ‌و ئه‌ستانه‌ هه‌یه‌و جۆرێك له‌هه‌ماهه‌نگی‌ كه‌وتۆته‌ نێوان به‌رژه‌وه‌ندی‌ ده‌وڵه‌ته‌ هه‌رێمایه‌تییه‌كان‌و گه‌وره‌كان‌و ده‌یانه‌وێ‌ دیسانه‌وه‌ كۆنگره‌كان، وه‌كو كۆنگره‌ی‌ لۆزان ببه‌ن به‌ڕێوه‌. كه‌ لۆزان سه‌ری‌ رێككه‌وتنی‌ سیڤری‌ خوارد، ئه‌مجاره‌ رێككه‌وتن‌و كۆنگره‌یه‌كی‌ تر، له‌نێوان ده‌وڵه‌ته‌ گه‌وره‌كان‌و هه‌رێمایه‌تییه‌كان رووبدات، نه‌ك هه‌ر سه‌ری‌ ریفراندۆم، به‌ڵكو سه‌ری‌ فیدراڵیه‌ته‌كه‌شمان ده‌خوات..! چونكه‌ له‌سیاسه‌تدا خۆشه‌ویستی‌ هه‌میشه‌یی‌ نییه‌، به‌ڵكو به‌رژه‌وه‌ندی‌ هه‌میشه‌یی‌ هه‌یه‌. 
ئه‌گه‌ر به‌رژه‌وه‌ندی‌ ده‌وڵه‌ته‌ گه‌وره‌كان، له‌گه‌ڵ به‌رژه‌وه‌ندی‌ ده‌وڵه‌ته‌كانی‌ هه‌رێمایه‌تی‌، له‌سه‌ر دووبنه‌ما یه‌كانگیر بێ‌، كه‌ یه‌كێكیان به‌رژه‌وه‌ندی‌ ئابوری‌ هاوبه‌ش بێ‌‌و ئه‌ویتر ئاسایشی‌ هاوبه‌ش بێ‌، ئه‌گه‌ر ده‌وڵه‌ته‌ گه‌وره‌كان، بزانن ده‌وڵه‌ته‌كانی‌ هه‌رێمایه‌تی‌ ئێستا، ئابوریی‌‌و ئاسایشی‌ هاوبه‌شی‌ ئه‌وان ده‌پارێزن، ئه‌وا هه‌موو رێككه‌وتنێكیان له‌گه‌ڵدا ده‌كه‌ن..! كه‌ بێگومان ئه‌مه‌ش مه‌ترسی‌ هه‌یه‌.


ناو:  
ئیمه‌یل:    
سه‌رنج:  

#7347
22/8/2017
ئه‌رشیف
وه‌رزش
‌ جارێكی تر هالیپ شكستی هێنا بچێته‌ پێشه‌نگی ریزبه‌ندییەوە 22/8/2017
‌ ریاڵ مه‌درید گرێبه‌ستی كه‌ریم بنزیمه‌ نوێ ده‌كاته‌وه‌ 22/8/2017
زانست
‌ هەسارەیەك لە زەوی نزیك دەبێتەوە 21/8/2017
‌ نۆكیا 8 ركابەریی ئایفۆن و گالاكسی دەكات 21/8/2017
‌ پێنج هەڵەی باو لەكاتی راكردندا 21/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP