ئیتر یان به‌شێك ده‌بین له‌ هاوكێشه‌كان بۆ گره‌نتی‌ مافه‌كانمان، یان خۆمان بڕیار له‌ چاره‌نوسی‌ خۆمان ده‌ده‌ین!
مه‌لا به‌ختیار: ئیتر یان به‌شێك ده‌بین له‌ هاوكێشه‌كان بۆ گره‌نتی‌ مافه‌كانمان، یان خۆمان بڕیار له‌ چاره‌نوسی‌ خۆمان ده‌ده‌ین! ‌ کوردستانی نوێ‌ 10/8/2017
ئه‌م بابه‌ته‌ی مه‌لا به‌ختیار لێپرسراوی‌ ده‌سته‌ی‌ كارگێڕی‌ كه‌ رۆژی‌ 3/8/2017، له‌ قاوه‌خانه‌ی‌ كه‌لتوری‌ له‌ ده‌ربه‌ندیخان پێشكه‌شكرا، بووه‌ مایه‌ی مشتومڕێكی زۆر له‌ میدیاكان و تۆڕه‌كۆمه‌ڵایه‌تییه‌كان، چونکە بە پچڕ پچڕی و بڕگەکانی لەڕێڕەوی خۆی دەرهێنرا بوو، جا بۆ ده‌رخستنی ڕاستی وته‌كان و كه‌شوهه‌وای كۆڕه‌كه‌، لێره‌دا ده‌قه‌كه‌ی وه‌كو خۆی بڵاوده‌كه‌ینه‌وه‌.
ده‌رفه‌تی گفتوگۆی سه‌نگین و به‌شداری دیموكراتیانه‌ له‌سه‌ر بابه‌تی كۆڕه‌كه‌و باسوخواسی ریفراندۆمی كوردستان بۆ هه‌مووان كراوه‌یه‌.
(2-2)
بۆچی‌ مافی‌ ئازادی‌ ریفراندۆممان ناده‌نێ‌؟!
 كه‌وابێ‌، سیاسه‌تی‌ نێوده‌وڵه‌تی‌‌و هه‌رێمایه‌تی‌، سیاسه‌تی‌ عیراق‌و ده‌وروبه‌رمان، هه‌رچی‌ چۆن سه‌یری‌ ده‌كه‌ین، بۆ سێ‌ به‌شی‌ كوردستان كه‌ ئێستا له‌ئاراداین، رۆژئاوا، باكور و باشور، هێشتا ئومێدێكی‌ ستراتیجی‌ نییه‌! ناڵێم قسه‌ی‌ باش نییه‌، ناڵێم لێدوانی‌ باش نییه‌! به‌ڵكو ده‌ستبه‌رێكی‌ ستراتیجی‌ و یاسایی‌ نییه‌، كه‌ ئه‌م سێ‌ به‌شه‌ی‌ كوردستان، كه‌ له‌سه‌نگه‌ره‌كانی‌ پێشه‌وه‌ی‌ خه‌باتن بۆ رزگاریی‌‌و دیموكراسی‌ و شه‌ڕ له‌دژی‌ داعش، هێشتا سه‌ره‌ڕای‌ هه‌موو قوربانییه‌كانمان بۆ شه‌ڕی‌ دژی‌ داعشیش، كه‌ سوپاكانی‌ ناوچه‌كه‌ نه‌یانتوانی‌ وه‌ك هێزی‌ پێشمه‌رگه‌‌و شه‌ڕه‌ڤانان‌و گه‌ریلا، نه‌یانتوانی‌ ئه‌م شه‌ڕه‌ دژی‌ داعش بكه‌ن، كه‌ به‌پێچه‌وانه‌وه‌ هه‌ندێك له‌سوپاكانی‌ عیراق، سوریا، لیبیا‌و یه‌مه‌ن هه‌ره‌سیانهێنا. به‌ڵام كورد هه‌ره‌سی‌ نه‌هێنا‌و ئه‌گه‌ر له‌شه‌نگال توشی‌ كێشه‌ی‌ گه‌وره‌ بووین‌و پاشه‌كشه‌مان كرد، كاره‌ساتی‌ ئێزدییه‌كانمان به‌سه‌ردا هات، به‌ڵام به‌زوترین كات خۆمان گرته‌وه‌. كه‌چی‌ سوپای‌ عیراق، ئێستاش نه‌بووه‌ته‌وه‌ به‌و سوپایه‌ی‌ كه‌ داعش سه‌ری هه‌ڵدا‌و پشتی‌ پێببه‌سترێت. پێشمه‌رگه‌ خۆی‌ گرته‌وه‌‌و ده‌وڵه‌ته‌ گه‌وره‌كانیش له‌ئارادان، كه‌ كه‌موكوڕییه‌كانی‌ پێشمه‌رگه‌ له‌ڕووی‌ سیسته‌مه‌وه‌، چاره‌سه‌ر بكه‌ن‌و به‌دانپێدانانی‌ هه‌موو ده‌وڵه‌ته‌ گه‌وره‌كانیش: پێشمه‌رگه‌ پارێزه‌ری‌ ئازادی‌ جیهانه‌.
ئێوه‌ پێم ناڵێن: به‌چ سوپایه‌كی‌ ناوچه‌كه‌ وتراوه‌، پارێزه‌ری‌ ئازادییه‌كانی‌ جیهان.. به‌ سوپای‌ سوریا، یان عیراق، به‌ سوپای‌ لوبنان‌و ئێران، یان توركیا ده‌وترێت، یان به‌سوپای‌ هه‌موو وڵاتانی‌ عه‌ره‌بی‌ ده‌وترێت، نه‌خێر به‌هیچكامیان ناوترێت. به‌ڵكو تاكه‌ هێز كه‌ پێیده‌وترێت: سوپای‌ ئازادی‌ پارێزی‌ دنیا، ئه‌وه‌ هێزی‌ پێشمه‌رگه‌یه‌. باشه‌، كه‌واته‌ ئه‌گه‌ر ئازادی‌ پارێزین‌و به‌دانپێدانانی‌ خۆتان، ئه‌مریكا، فه‌ره‌نسا، ئه‌ڵمانیا، به‌ریتانیا، ئه‌نجومه‌نی‌ ئاسایش، په‌رله‌مان‌و یه‌كێتیی‌ ئۆرۆپا، ئۆرۆپای‌ رۆژهه‌ڵات، پێشمه‌رگه‌ هێزی‌ ئازادی‌ پارێزه‌ری‌ جیهانین، كه‌وابێ‌ بۆچی‌ مافی‌ ئازادی‌ ریفراندۆممان ناده‌نێ‌؟! فه‌رمون، ئه‌و ئازادییه‌مان بده‌نێ‌. خۆ كورد جه‌نگاوه‌ر نه‌بووین بۆ ئه‌وه‌ی‌ داعش تێكبشكێنین‌و به‌یانی‌ و دوو به‌یانی‌ شتێك پاره‌مان بده‌نێ‌‌و چه‌كه‌كانمان لێوه‌ربگرنه‌وه‌! خۆ كرێگرته‌ نین..! ئێمه‌ پێش داعش ‌و پێش عیراقیش هه‌بووین. ته‌نانه‌ت عیراق نه‌ببوو به‌ده‌وڵه‌ت‌و هێشتا ناوی‌ لێنه‌نرابوو، كه‌ له‌(19)ی‌ مایسی‌ (1919)دا شێخ مه‌حمود راپه‌ڕیوه‌. واتا دوو ساڵ پێشئه‌وه‌ی‌ ئه‌م قه‌واره‌یه‌ی‌ عیراق ببێ‌ به‌ده‌وڵه‌ت‌و ناوی‌ عیراقی‌ لێبنرێت، شێخ مه‌حمود راپه‌ڕیوه‌و داوای‌ حوكمڕانی‌ كوردستانی‌ كردووه‌.
 
به‌جه‌نگاوه‌ره‌كانی‌ شێخ مه‌حمودتان ده‌وت چه‌ته‌!
بۆ ئاگاداریشتان كه‌ بڕیاریان له‌سایكس پیكۆ داوه‌و شه‌ڕ ته‌واو بووه‌، بیریان له‌وه‌كردۆته‌وه‌ كه‌ چۆن میراتی‌ ئیمپراتۆریه‌تی‌ عوسمانی‌ دابه‌ش بكه‌ن، ئه‌وكاته‌ سعودیه‌، رێژه‌ی‌ (300) هه‌زار كه‌س بووه‌، به‌ڵام كوردستانی‌ عیراق رێژه‌ی‌ (500) هه‌زار كه‌س بووه‌. له‌سعودیه‌، هیچ په‌یوه‌ندییه‌ك له‌نێوان مه‌ككه‌و مه‌دینه‌و شاره‌كانی‌ تردا نه‌بووه‌، هه‌موو میره‌كانی‌ ئه‌وێ‌‌و سه‌رۆك عه‌شیره‌ته‌كان رقیان له‌یه‌كتر بووه‌‌و ئاماده‌ش نه‌بوون سڵاو له‌یه‌كتر بكه‌ن! به‌ڵام له‌كوردستاندا، شێخ مه‌حمود وه‌كو سیمبول‌و وه‌كو مه‌لیكی‌ كوردستان قبوڵكراوه‌. له‌هه‌موو عیراقدا، كه‌سێك نه‌بووه‌ بیكه‌ن به‌مه‌لیك‌و له‌حیجاز بۆیان قه‌رز كردووه‌. به‌ڵام وڵاتێك له‌وكاته‌ودا كه‌ (500) هه‌زار كه‌س رێژه‌ی‌ دانیشتوانه‌كه‌یه‌تی‌، نه‌وت و غاز، جوگرافیایه‌كی‌ جوان‌و كشتوكاڵی‌ هه‌یه‌، كه‌ لێكۆڵینه‌وه‌شی‌ تێدا ده‌كه‌ن، له‌سه‌دا (88)ی‌ زیاتری‌ كورده‌، كه‌چی‌ ده‌وڵه‌تۆكه‌یه‌كمان بۆ دروست ناكه‌ن! به‌ڵام به‌حره‌ین، قه‌ته‌ر، كوێت، كه‌ هه‌ریه‌كه‌یان رێژه‌كه‌یان نه‌ده‌گه‌یشته‌ (50) هه‌زار كه‌س، كه‌چی‌ ده‌وڵه‌تیان بۆ دروست ده‌كه‌ن!
ئێستا له‌سه‌رانسه‌ری‌ كوردستاندا، كورد (50) ملیۆنه‌. ته‌نها له‌كوردستانی‌ باشور، ئه‌گه‌ر ئامارێكی‌ ورد بكرێت، دانیشتوانه‌كه‌ی‌ ده‌گاته‌ (7) ملیۆن. ئه‌گه‌ر به‌(500) هه‌زار كه‌س ده‌وڵه‌تتان پێ‌ ره‌وانه‌بینین، ئه‌وا به‌ حه‌وت ملیۆنه‌كه‌ پێمان ڕه‌وا ببینن. ئه‌گه‌ر ئه‌وكاته‌، به‌جه‌نگاوه‌ره‌كانی‌ شێخ مه‌حمودتان ده‌وت چه‌ته‌ و به‌ شۆڕشی‌ ئه‌یلولتان ده‌وت یاخی‌، به‌ڵام خۆ ئێستا به‌پێشمه‌رگه‌ ده‌ڵێن: پارێزره‌ی‌ ئازادی‌ جیهان! كه‌واتا هه‌ر له‌به‌رئه‌وه‌ی‌ وامان پێده‌ڵێن، مافیشمان بده‌نێ‌. بمانبه‌نه‌ كۆنگره‌كانی‌ جیهان‌و ده‌سته‌به‌ری‌ مافه‌كانمان بكه‌ن. ئه‌گه‌ر پاساوتان ئه‌وه‌یه‌ بچین له‌گه‌ڵ ده‌وڵه‌تی‌ عیراق گفتوگۆ بكه‌ین، به‌ڵێ‌ باشه‌. له‌گه‌ڵ عیراق نه‌ك هه‌ر قسه‌مان كردووه‌، به‌ڵكو رێككه‌وتوین. چونكه‌ عیراق له‌ساڵی‌ (2003) سوپای‌ نه‌بوو، ده‌وڵه‌ت نه‌مابوو، دامووده‌زگاكانی‌ ئاسایش‌و هه‌واڵگری‌ رووخا، به‌ڵام جه‌نابی‌ مام جه‌لال‌و مه‌سعود بارزانی‌ چوونه‌ به‌غداد، مام جه‌لال ماڵێكی‌ به‌كرێ‌ گرت‌و بارزانیش له‌هۆتێل سندباد دابه‌زی‌‌و وتیان: وه‌رن با ده‌وڵه‌ت دابمه‌زرێنینه‌وه‌. هه‌روه‌كو ئه‌وه‌ی‌ تازه‌ ناوی‌ عیراق ده‌نێن. نه‌خێر تازه‌ نییه‌، تا رووخان (84) ساڵ بووه‌و له‌دوای‌ روخانیش بوو به‌(97) ساڵ، كه‌ ئه‌م وڵاته‌ هه‌یه‌. (14) ساڵه‌ ئه‌م وڵاته‌ رووخاوه‌، به‌یه‌كه‌وه‌ چوین عیراقی‌ فیدراڵمان دامه‌زراندووه‌. كورد، رۆڵی‌ گه‌وره‌ی‌ له‌دامه‌زراندنیدا هه‌بووه‌. له‌كاتی‌ هه‌ره‌سی‌ سوپاكه‌تاندا، كورد رۆڵی‌ گه‌وره‌ی‌ له‌تێكشكاندنی‌ داعشدا هه‌بووه‌. كه‌ داعشیش شكاوه‌، سوپاتان نه‌ماوه‌، له‌كه‌ركوك، له‌سه‌ڵاحه‌دین، له‌موسڵ، له‌ دیاله‌، سوپاتان نه‌مابوو! به‌ڵام كورد له‌وكاته‌دا نه‌چوین له‌حه‌مرین ئاڵای‌ كوردستان هه‌ڵبكه‌ین‌و سه‌ربه‌خۆیی‌ رابگه‌یه‌نین، به‌ڵكو هاوكاریمان كردون. داعش، كه‌ دوژمنی‌ ئێوه‌ بووه‌و به‌غدادی‌ خستۆته‌ مه‌ترسییه‌وه‌، شه‌ڕمان كردووه‌و شكاندومانن. كه‌ وتوتانه‌ پێكه‌وه‌ موسڵ رزگار بكه‌ین، وتومانه‌ فه‌رموون. تائێستا له‌كه‌ركوك نین‌و ئێمه‌ ده‌یپارێزین. له‌خانه‌قین نین، له‌جه‌له‌ولا نین، له‌قه‌ره‌ته‌په‌و جه‌باره‌ نین‌و هه‌ر  ئێمه‌ ده‌یپارێزین، مه‌خمور ئێمه‌ ده‌یپارێزین. شه‌نگال‌و ده‌روبه‌ری‌ هه‌ر ئێمه‌ رزگارمان كردووه‌. خۆ نه‌مانوتووه‌: فرسه‌ته‌، سوپای‌ عیراق شكستی‌ خواردووه‌و هه‌ره‌سیهێناوه‌، با ده‌وڵه‌ت رابگه‌یه‌نین‌و ئاڵای‌ كوردستان ببه‌ینه‌ حه‌مرین..! 

كێ‌ رێگه‌ی‌ گرتبوو، حه‌ویجه‌ش رزگار بكه‌ن
ئێستاش، كه‌ داعش شكاوه‌و كۆتایی‌ پێهاتووه‌، ته‌نها حه‌ویجه‌ ده‌وروبه‌ری‌ ماوه‌، ده‌ڵێین: له‌مانگی‌ (9)دا ریفراندۆم ده‌كه‌ین‌و مانگی‌ یانزه‌ش، له‌ كوردستان هه‌ڵبژاردن ده‌كه‌ین. به‌ڵام كێ‌ رێگه‌ی‌ له‌ئێوه‌ گرتبوو، سێ‌ مانگ له‌مه‌وبه‌ر بچن حه‌ویجه‌ش رزگار بكه‌ن؟! له‌كاتێكدا ده‌مانوت یارمه‌تیتان ده‌ده‌ین. دیاره‌ به‌مه‌ست دواتانخست..! ئیتر بۆ پێمانده‌ڵێن: بچن له‌به‌غداد رێكبكه‌ون. وه‌كو ئه‌وه‌ی‌ ئێمه‌ یاخی‌‌و بێئاگا له‌سیاسه‌ت‌و هاوكێشه‌ سیاسییه‌كان بین!
له‌سه‌رده‌می‌ پاشایه‌تیدا چوین گفتوگۆمان كردو سودی‌ نه‌بوو! رێككه‌وتنامه‌ی‌ سیڤرتان له‌گه‌ڵ عیراقدا بۆ كردین‌و سودی‌ نه‌بوو! گۆڕیتان به‌ڕێككه‌تننامه‌ی‌ لۆزان و دیزه‌ به‌ده‌رخۆنه‌تان كردو به‌ئاسته‌میش مافی‌ كوردتان نه‌دا! كۆماری‌ مه‌هابادمان دامه‌زراندو نه‌ته‌وه‌ یه‌كگرتووه‌كانتان دروستكرد، به‌ڵام یه‌كه‌مین قوربانی‌ له‌دوای‌ دامه‌زراندنی‌ نه‌ته‌وه‌ یه‌كگرتوه‌كان، كۆماری‌ مه‌هاباد بوو. یه‌كه‌مین قوربانیش له‌دوای‌ عوصبه‌تول ئوممه‌م له‌ (1919) به‌دواوه‌، حوكمڕانی‌ شێخ مه‌حمود بوو. كاتێكیش جه‌نگی‌ سارد رووده‌دات، ده‌وڵه‌ته‌ گه‌وره‌كان رێكده‌كه‌ون‌و له‌ساڵی‌ (1948- 1949)ه‌وه‌ هه‌تا ساڵی‌ (1989) په‌نجا ساڵی‌ ره‌به‌ق، كورد توشی‌ گه‌وره‌ترین كاره‌سات‌و سیاسه‌تی‌ جینۆساید بوو، به‌ڵام ته‌نها قسه‌یه‌كتان نه‌كرد! كاتێكیش هه‌ڵه‌بجه‌ بۆردومانكرا، هه‌تا كوه‌یت داگیر نه‌كرا، ده‌وڵه‌ته‌ گه‌وره‌كان دیسانه‌وه‌ قسه‌یه‌كتان نه‌كرد به‌رگریمان لێبكه‌ن. به‌ڵام كه‌ كوه‌یت داگیركراو به‌رژه‌وه‌ندی‌ ئابوریتان كه‌وته‌ مه‌ترسییه‌وه‌‌و ئه‌وكاته‌ وتتان: صه‌دام تاوان ده‌كات! ئه‌ی‌ بۆ سی‌،  په‌نجا، حه‌فتا ساڵ تاوانمان به‌رامبه‌ر ده‌كرێت‌و به‌رگه‌ ده‌گرن‌و قسه‌ ناكه‌ن، به‌ڵام كاتێك بڕیاری‌ ریفراندۆم ده‌ده‌ین، له‌ماوه‌ی‌ (24) سه‌عاتدا، هه‌مووتان دێنه‌ سه‌رخه‌ت‌و ده‌ڵێن: بوه‌ستن! 
ئێوه‌ فاشییه‌تتان بوه‌ستاندایه‌! دیكتاتۆریه‌ته‌كانتان بوه‌ستاندایه‌! تاوانه‌كانی‌ دایگركردنتان بوه‌ستاندایه‌! ته‌رحیل، ته‌عریب‌و ته‌هجیرتان بوه‌ستاندایه‌! نه‌ك ئێستا، له‌دوای‌ گه‌وره‌ترین سه‌ركه‌وتن، كه‌ خۆتان پێمانده‌ڵێن: پێشمه‌رگه‌، ئازادیی هه‌موو ده‌وڵه‌ته‌ ئازاده‌كانی‌ جیهان ده‌پارێزن‌و كوردیش ده‌مانه‌وێ‌ ئه‌و ئازادییه‌ به‌كاربهێنین،  قبوڵی‌ ناكه‌ن! بۆیه‌ سیاسه‌ت، مێژوو، هه‌موو هاوكێشه‌كان وه‌كو خۆی‌ ده‌خوێنینه‌وه‌.

ده‌خورێین، ده‌دزرێین‌و دنیایان لێكردوین به‌چه‌رمه‌ چۆله‌كه‌
سه‌ره‌نجامه‌كه‌ی‌ چی‌ ده‌بێت؟ با بزانین..! لێره‌و له‌وێ‌، ترسێكی‌ سایكۆلۆجی‌ بڵاوكراوه‌ته‌وه‌، كه‌ هه‌م ده‌ستی‌ ده‌وڵه‌ته‌كانی‌ تێدایه‌، هه‌م ده‌ستی‌ ئه‌وانه‌ی‌ تێدایه‌، كه‌ نه‌ له‌گه‌ڵ چاره‌سه‌ركردنی‌ كێشه‌ سیاسییه‌كاندان، نه‌ ئاسانیشه‌ هه‌موو لایه‌كمان پێكه‌وه‌ بچینه‌وه‌ ناو په‌رله‌مان! چونكه‌ ورده‌كاری‌ زۆره‌. 
به‌ڵام پڕوپاگه‌نده‌یه‌كی‌ زۆر بڵاوكراوه‌ته‌وه‌، كه‌ ده‌خورێین، ده‌دزرێین‌و دنیایان لێكردوین به‌چه‌رمه‌ چۆله‌كه‌و به‌و پڕوپاگه‌ندانه‌ش بازاڕیان گران كردووه‌! 
به‌ڵێ‌، ده‌وڵه‌ته‌ گه‌وره‌كان ده‌ڵێن: ریفراندۆم قبوڵ ناكه‌ین..! به‌ڵام ئه‌ی‌ نه‌شیانوت فیدراڵ قبوڵ ناكه‌ین؟! هه‌مان قسه‌یان كرد. ئه‌ی‌ وه‌زاره‌تی‌ ده‌ره‌وه‌ی‌ هه‌ر چوار ده‌وڵه‌ته‌كه‌ی‌ ده‌وروبه‌رمان، سێ‌ مانگ جارێك كۆنه‌ده‌بوونه‌وه‌، جارێك له‌به‌غدادو جارێكیش له‌دیمه‌شق، جارێك له‌تاران‌و جارێكیش له‌ئه‌نقه‌ره‌، ته‌نها بۆ ئه‌وه‌ی‌ فیدراڵ له‌ناو به‌رن. ئایا ئه‌وكاته‌ چ ده‌وڵه‌تێك راسته‌وخۆ دانیپێداناین؟ له‌كوێ‌ بازاڕ بۆ كورد هه‌بوو؟ له‌كوێ‌ سنور بۆ كورد كرابۆوه‌، ته‌راتێنی‌ تێدا بكه‌ین؟ له‌كاتێكدا، گه‌مارۆی‌ نێوده‌ڵه‌تیمان له‌سه‌ر بوو، چونكه‌ به‌شێك بوین له‌عیراق. گه‌مارۆی‌ هه‌رێمایه‌تیمان له‌سه‌ر بوو، چونكه‌ هه‌ر به‌شێك بووین له‌عیراق، ئینجا له‌گه‌ڵ ئه‌وه‌شدا فیدراڵمان راگه‌یاند‌و دنیاش نه‌بوو به‌چه‌رمه‌ چۆله‌كه‌و ورده‌ ورده‌ش سنوره‌كان كرانه‌وه‌و وڵاتانی‌ هه‌رێمایه‌تیش زانیان، كه‌ ئه‌م فیدراڵ‌و حكومه‌ته‌، ئاسایش‌و سه‌قامگیری‌ باشوری‌ كوردستان، باشتر ده‌پارێزێت، ورده‌ ورده‌ بازاڕ ده‌بوژێنێته‌وه‌و سنوریش ده‌پارێزێت. هه‌تا رێژه‌ی‌ بازرگانی‌ هاوبه‌ش له‌پێش ئه‌م قه‌یرانه‌دا، له‌نێوان كوردستان‌و توركیا‌و ئێران، گه‌یشته‌ (23) ملیار دۆلار. له‌كاتێكدا ئه‌وه‌ته‌ی‌ ئیسرائیل ده‌وڵه‌ته‌، تائێستا ئابوری‌ هاوبه‌شی‌ نێوان توركیاو ئیسرائیل، ملیارێك‌و (200) ملیۆن دۆلاره‌! به‌ڵام له‌گه‌ڵ كوردستان گه‌یشته‌ (13 بۆ 14) ملیار دۆلار، ئێستاش رێژه‌ی‌ ئابوری‌ ئێران له‌گه‌ڵ باشوری‌ كوردستان، دوو به‌رامبه‌ره‌ ئه‌گه‌ر زیاتر نه‌بێ‌، كه‌متر نییه‌ له‌گه‌ڵ ئابوری‌ ئێرانی‌ شیعه‌ له‌گه‌ڵ عیراقی‌ شیعه‌. چونكه‌ بازاڕه‌كه‌ی‌ كوردستان دڵنیاتره‌، گره‌نتی‌ زیاتره‌و سه‌روه‌ری‌ یاساش پارێزراوتره‌ له‌به‌غداد.

قه‌رزار نین، هه‌تا ئه‌م بیانووه‌مان پێبگرن
به‌ڵێ‌، پێیانوتووین ریفراندۆممان قبوڵ نییه‌و ئه‌مه‌ش له‌نێوان خۆماندا گفتوگۆی‌ له‌سه‌ر ده‌كه‌ین. به‌ڵێ‌، هه‌ندێكیش له‌ده‌وڵه‌ته‌كان قسه‌ی‌ تر ده‌كه‌ن‌و ئه‌مه‌ش جیاوازی‌ هه‌یه‌. ئێران‌و توركیا ده‌ڵێن: قبوڵمان نییه‌. به‌ڵام ده‌وڵه‌ته‌ گه‌وره‌كان به‌ئه‌مریكاشه‌وه‌ ده‌ڵێن: كاتی‌ نییه‌..! قبوڵمان نییه‌و كاتی‌ نییه‌، دوو چه‌مكی‌ جیاوازه‌. قبوڵمان نییه‌، له‌گفتوگۆداین له‌گه‌ڵیاندا. ئه‌مڕۆ دوو كونسوڵی‌ توركیا له‌لامان بوون، دوێنێش نوێنه‌رانی‌ كۆماری‌ ئیسلامی‌ ئێرانمان له‌لابوو، گفتوگۆی‌ ئه‌م بارودۆخه‌مان كرد. ئه‌مڕۆش، نه‌ته‌وه‌ یه‌كگرتووه‌كان له‌مه‌كته‌بی‌ سیاسی‌ بوون. نوێنه‌ری‌ نه‌ته‌وه‌یه‌كگرتووه‌كان، په‌یامی‌ سكرتێری‌ نه‌ته‌وه‌ یه‌كگرتووه‌كانی‌ بۆ هێنابووین‌و گفتوگۆمان كرد. ئه‌مریكا‌و رۆژئاوا ده‌ڵێن: ئه‌وله‌ویه‌ت له‌لای‌ ئێمه‌، شه‌ڕی‌ داعشه‌. به‌ڵام كورد ئه‌م ئه‌ركه‌مان له‌كۆڵ كردۆته‌وه‌، بۆیه‌ پێمانده‌ڵێن: كورد، پارێزه‌ری‌ ئازادی‌ جیهانن. ئه‌مه‌شمان به‌جێهێناوه‌، بۆیه‌ ئه‌م بیانووه‌ به‌كورد مه‌گرن! به‌ڵكو به‌و ده‌وڵه‌تانه‌ی‌ بگرن، كه‌ ناتوانن داعش له‌ناو به‌رن. كورد له‌ناوی‌ بردن‌و له‌مباره‌یه‌وه‌ قه‌رزار نین، هه‌تا ئه‌م بیانووه‌مان پێبگرن. ئه‌گه‌ر داعش له‌باشوری‌ كوردستان، له‌ناو كه‌ركوك، خانه‌قین، شه‌نگال، له‌ناو چوار پارێزگا ره‌سمییه‌كه‌ی‌ كوردستان، هێشتا ماوه‌و كۆڵانه‌و كۆڵان، سه‌نگه‌رو سه‌نگه‌ر شه‌ڕمانه‌، هه‌قه‌ بڵێن: جارێ‌ شه‌ڕی‌ داعش ته‌واو بكه‌ن، ئه‌وكاته‌ بیر له‌پرۆسه‌یه‌كی‌ تر بكه‌نه‌وه‌. به‌ڵام كورد ئه‌ركی‌ خۆمان راپه‌ڕاندووه‌‌و، له‌ساڵی‌ پاریشه‌وه‌ داعشمان تێكشكاندووه‌. ئه‌گه‌ر عیراقیش، له‌حه‌ویجه‌، له‌ڕه‌شادو ریاز شه‌ڕی‌ ماوه‌، هه‌ر ئاماده‌ین هاوكاریان بكه‌ین‌و له‌مباره‌یه‌وه‌ هیچ كێشه‌یه‌كمان نییه‌. له‌به‌رئه‌وه‌، ئه‌وله‌ویه‌ت بۆ شه‌ڕی‌ داعش، باشوری‌  كوردستان ناگرێته‌وه‌، به‌ڵكو عیراق‌و سوریا‌و وڵاتانی‌ تر ده‌گرێته‌وه‌و له‌كوێش پێویستی‌ هه‌بوو، ئاماده‌ین به‌ به‌رده‌وامی‌ هاوكاریان بكه‌ین. 

ئاسایشی‌ ناوچه‌كه‌ لاوازه‌و كوردیش ترسناكین
ئه‌گه‌ر ده‌وترێ‌ مه‌ترسیدارین له‌سه‌ر ئاسایشی‌ ناوچه‌كه‌، به‌ چ پێوه‌رێك مه‌ترسین؟! ئایا ئاسایشی‌ ناوچه‌كه‌ ئه‌وه‌نده‌ لاوازه‌و كوردیش ئه‌وه‌نده‌ ترسناكین؟ ببینه‌ مه‌ترسی‌ له‌سه‌ر ئاسایشی‌ ناوچه‌كه‌؟! برایه‌تیتان ده‌وێ‌ ئاماده‌ین. ئاشته‌وایتان ده‌دوێ‌ هه‌ر ئاماده‌ین. سه‌روه‌ری‌ یاساتان ده‌وێ‌ ئاماده‌ین. رێككه‌وتنی‌ یاسایی‌‌و دیپلۆماسی‌‌و ئاسایشتان ده‌وێ‌، هه‌ر ئاماده‌ین. بازاڕی‌ له‌مه‌ی‌ ئێستا ئازادترو دڵنیایی‌ كۆمپانیاكانتان ده‌وێ‌، هه‌ر ئاماده‌ین. نه‌وت ده‌كڕن؟ ده‌فرۆشین. غازتان ده‌وێ‌، له‌ئۆرۆپا كه‌متر پێتان ده‌فرۆشین. ئیتر له‌چی‌ ده‌ترسن؟!  ده‌تانه‌وێ‌ سنورتان بپارێزرێت، ده‌یپارێزین. لێپرسراوێتی‌ خۆمان، له‌سنوری‌ خۆمان ده‌پارێزین‌و ئێوه‌ش لێپرسراوێتی‌ خۆتان له‌سنوری‌ خۆتان بپارێزن. كه‌واته‌ ئیتر بۆچی‌ مه‌ترسین؟ به‌پێچه‌وانه‌وه‌، ئه‌گه‌ر مافه‌كانمان نه‌ده‌ن، مه‌ترسییه‌ بۆتان. مافی‌ چاره‌نوسمان نه‌ده‌نێ‌، ئه‌وه‌ مه‌ترسییه‌ بۆتان! چونكه‌ (97)  ساڵه‌ مافی‌ چاره‌نوسی‌ كورد، له‌سایكس پیكۆوه‌ هه‌تا ئێستا پێشێل ده‌كرێ‌. به‌ڵام ده‌ ساڵمان له‌وڵاتانی‌ ده‌وروبه‌ر بۆ بهێنن، كه‌ به‌هۆی‌ پێشێل كردنی‌ مافی‌ كوردو گه‌لانه‌وه‌، ئاسایش‌و سه‌قامگیری‌ له‌م وڵاتانه‌دا هه‌بێ‌؟ نه‌خێر نییه‌! چونكه‌ یه‌كێك له‌هۆیه‌ سه‌ره‌كییه‌كانی‌ ئاسایش‌و سه‌قامگیری‌ له‌وڵاتانی‌ ده‌وروبه‌ر‌و زیانگه‌یاندنی‌ گه‌وره‌ له‌ئابوری‌ ئه‌و وڵاتانه‌، نه‌سه‌لماندنی‌ مافی‌ چاره‌نوسی‌ گه‌لانه‌، به‌تایبه‌تی‌ نه‌ته‌وه‌ی‌ كورد.

هیچ ده‌وڵه‌تێك هه‌ڕه‌شه‌ی‌ عه‌سكه‌ریی‌ لێنه‌كردووین
بۆیه‌ به‌ ئۆرۆپاش ده‌ڵێن: ئه‌گه‌ر ده‌وڵه‌تێكی‌ دیموكراتتان ده‌وێ‌، ئه‌وه‌ ئێمه‌ین. ئه‌گه‌ر ئه‌زمونی‌ دیموكراسیتان ده‌وێ‌، ئه‌وه‌ ئێمه‌ین. ئیتر بۆچی‌ دیموكراسی‌ بۆخۆتان ره‌وابێ‌، به‌ڵام بۆ كورد ناڕه‌وابێ‌؟ بۆچی‌، ریفراندۆم بۆ خۆتان ره‌واو بۆ كورد ناڕه‌وا بێ‌؟ له‌كاتێكدا له‌ڕۆژهه‌ڵاتی‌ ناوه‌ڕاستدا، یه‌كێك له‌ئه‌زمونه‌ هه‌ره‌ سه‌ركه‌وتوه‌كانی‌ دیموكراسی‌، كوردستانه‌، به‌هه‌موو كه‌موكوڕییه‌كانیشه‌وه‌. ئایا له‌كوێ‌ كه‌موكوڕی‌ نییه‌؟ تا له‌كوردستان نه‌بێ‌ كورد، به‌(25) ساڵ گه‌وره‌ترین سه‌ركه‌وتنمان به‌ده‌ستهێناوه‌، به‌ڵام ده‌وڵه‌ت هه‌یه‌ به‌سه‌د ساڵ، گه‌وره‌ترین شكستی‌ رووبه‌ڕوو بۆته‌وه‌‌و له‌دنیای‌ دیموكراسیشدا هه‌موو ئه‌و كێشانه‌ هه‌یه‌. كێشه‌ی‌ ئابوری‌، دزی‌، گه‌نده‌ڵی‌، چه‌وساندنه‌وه‌، له‌هه‌موو ده‌وڵه‌ته‌ گه‌وره‌كانی‌ دنیاشدا هه‌یه‌‌و له‌لای‌ ئێمه‌ش هه‌یه‌. به‌ڵام ئایا ئێمه‌ سه‌ركه‌وتووین؟ ئایه‌ ئه‌گه‌ر به‌راوردمان بكه‌ن به‌ده‌وڵه‌ته‌كانی‌ ده‌روربه‌ر، سه‌ركه‌وتووتر نین؟ به‌ڵی‌. خۆتان ده‌ڵێن: كوردستان، به‌ به‌راورد به‌ به‌غدادو ناوچه‌كانی‌ تر، به‌هه‌شتێكه‌. 
كه‌واته‌ ئه‌م سه‌ركه‌وتن‌و ده‌ستكه‌وتانه‌ی‌ به‌دیمانهێناوه‌، ئه‌گه‌ر مافی‌ ریفراندۆمان بده‌نێ‌، باشتر نابین له‌وه‌ی‌ كه‌ ئێستا هه‌ین. به‌ڵێ‌ باشتر ده‌بین. 
سه‌ره‌ڕای‌ هه‌موو فشارو ره‌خنه‌كان له‌سه‌رمان، خۆشبه‌ختین، كه‌ له‌گه‌ڵ ده‌وڵه‌ته‌كانی‌ هه‌رێمایه‌تی‌‌و دنیا له‌دیالۆگداین. هیچ ده‌وڵه‌تێكیش، وه‌كو سیاسه‌تی‌ ره‌سمی‌، هه‌ڕه‌شه‌ی‌ به‌كارهێنانی‌ هێزو گه‌مارۆی‌ عه‌سكه‌ریی‌‌و ئه‌منی‌ لێنه‌كردووین. تاك تاك له‌ لێپرسراوی‌ ناو عیراق ده‌بیستین، كه‌ هه‌ڕه‌شه‌مان لێده‌كه‌ن! با ئه‌وانیش خۆیان تاقیبكه‌نه‌وه‌! چونكه‌ باوه‌ڕ ناكه‌م له‌صه‌دام‌و پێش ئه‌ویش به‌هێزتربن. 

فه‌رموون، با كۆنفیدراڵی‌ دابمه‌زرێنن
له‌گه‌ڵ هه‌موو ئه‌وانه‌شدا، ئومێده‌وارین یه‌ك فیشه‌ك له‌نێوان كوردستان‌و عیراقدا نه‌ته‌قێ‌، خوێن له‌ لوتی‌ كه‌سیش نه‌یات. به‌ڵكو وه‌كو ئێستا چۆن له‌نه‌خۆشخانه‌كانی‌ كوردستاندا، برینداره‌كانیان چاره‌سه‌ر ده‌كه‌ین. نه‌خۆشه‌كانی‌ شێرپه‌نجه‌، له‌هه‌موو عیراقدا له‌نه‌خۆشخانه‌ی‌ هیوا له‌كوردستان چاره‌سه‌ر ده‌كرێن. هیوادارین ئه‌م په‌یوه‌ندییه‌ ویژدانییه‌ له‌نێوانماندا بمێنێ‌، نه‌ك هه‌ڕه‌شه‌ی‌ خوێن رشتن‌و چه‌ك به‌كارهێنان. چونكه‌ كورد ده‌بین به‌باشترین دراوسێ‌‌و دڵنیاترین دراوسێی‌ وڵاتانی‌ ده‌وروبه‌رمان. ده‌شتوانین له‌ئاستی‌ باڵادا هه‌موو به‌رژه‌وه‌ندییه‌ هاوبه‌شه‌كانمان دابین بكه‌ین.
ئه‌گه‌ر ریفراندۆمان كرد، ئه‌وا باوه‌ڕموایه‌ كاردانه‌وه‌كان له‌سه‌ره‌تادا توند نابن. ئه‌گه‌ر مه‌ترسییه‌ك هه‌بێ‌، بۆ ئه‌وكاته‌یه‌ كه‌ ده‌وڵه‌تی‌ سه‌ربه‌خۆ راده‌گه‌یه‌نین. ئه‌ویش له‌لایه‌ن هه‌موو ده‌وڵه‌ته‌كانه‌وه‌ نا، به‌ڵكو تاكه‌ تاكه‌ی‌ ده‌وڵه‌ته‌كانه‌وه‌ مه‌ترسییه‌كه‌ گه‌وره‌تر ده‌بێ‌، به‌ڵام بۆ ریفراندۆم، لێكتێگه‌یشتن دروست ده‌بێ‌‌و هێشتا بواری‌ چاره‌سه‌رو ئه‌لته‌رناتیڤ هه‌یه‌، كه‌ كۆنفیدراڵییه‌. فه‌رموون، با كۆنفیدراڵی‌ له‌م وڵاته‌دا دابمه‌زرێنن. هه‌موو ده‌وڵه‌ته‌كان، ئه‌مڕۆ توركیا، دوێنێ‌ ئێران، نه‌ته‌وه‌ یه‌كگتووه‌كان پێیانوتین، هه‌موو مافه‌كانتان له‌ناو عیراق هه‌قی‌ خۆتانه‌، ماده‌ی‌ (140)، بودجه‌و موچه‌، هاوبه‌شی‌ راسته‌قینه‌ له‌به‌غداد، هه‌موو ئه‌وانه‌ هه‌قی‌ خۆتانه‌‌و ئه‌و غه‌دره‌ی‌ له‌ئێوه‌ كراوه‌، ده‌بێ‌ ئه‌و غه‌دره‌تان له‌سه‌ر هه‌ڵبگیرێت. ئێستا به‌ڕه‌سمی‌ ئه‌مه‌مان پیده‌ڵێن‌و سوپاسیان ده‌كه‌ین. 

به‌قسه‌ی‌ هیچ لێپرسراوێك فریو ناخۆین
به‌ڵام، ئایا ئه‌م قسانه‌ش گره‌نتی‌ ئه‌لته‌رناتیڤه‌ بۆ كورد، وه‌كو سه‌ركردایه‌تی‌ سیاسی‌ كورد؟ نه‌خێر.. هێشتا گره‌نتی‌‌و ئه‌لته‌رناتیڤ بۆ ریفراندۆم‌و سه‌ربه‌خۆیی‌، نابینین. هه‌روه‌ها به‌قسه‌ی‌ ئه‌م لێپرسراو‌و ئه‌و لێپرسراویش له‌خشته‌ نابرێین..! هه‌موو لایه‌ك باگوێی‌ لێبێ‌‌و ئه‌مه‌ش قسه‌ی‌ من نییه‌، به‌ڵكو قسه‌ی‌ هه‌موو حزبه‌ كوردستانییه‌كانه‌: به‌قسه‌ی‌ هیچ لێپرسراوێك نه‌ له‌ناوچه‌كه‌و نه‌ له‌عیراقیش، فریو ناخۆین! گره‌نتی‌ یاسایی‌ ‌و نێوده‌وڵه‌تیمان ده‌وێت. كه‌ پێكهاته‌ی‌ عیراق گۆڕانكاری‌ تێدا هه‌بوو، كورد، له‌چاره‌نوسی‌ خۆمان له‌ناوچه‌كه‌دا نه‌ك هه‌ر له‌عیراقدا، دڵنیابین. چونكه‌ ناهێڵین جارێكی‌ تر رووداوه‌كان تێپه‌ڕن، هاوكێشه‌كان به‌دڵی‌ حكومه‌ته‌كان به‌سه‌رماندا بسه‌پێنرێنه‌وه‌. چونگه‌ ئه‌و سه‌رده‌مه‌ رۆیشت! سایكس پیكۆ رۆیشت، رێككه‌وتنامه‌ی‌ جه‌زائیر، شه‌ڕی‌ عیراق‌و ئێران، ئه‌نفال و ته‌عریب، رۆیشتن.
ئیتر یان به‌شێك ده‌بین له‌هاوكێشه‌كان، بۆ گره‌نتی‌ یاسایی‌ نێوده‌وڵه‌تی‌‌و هه‌رێمایه‌تی‌ بۆ مافه‌كانمان، یان خۆمان بڕیار له‌چاره‌نوسی‌ خۆمان ده‌ده‌ین.
ئومێده‌وارم قسه‌كانم رونبن‌و لێره‌شه‌وه‌ دێمه‌ سه‌ر ئه‌و خاڵه‌ی‌ ئه‌گه‌ر هه‌بێ‌، خۆی‌ حازر كردبێ‌، ئه‌و ده‌ماره‌ بگرێ‌، تۆزێك بۆی‌ خاو ده‌كه‌مه‌وه‌. ئه‌ویش به‌دوو ئاراسته‌ كار ده‌كه‌ین..
ئاراسته‌ی‌ یه‌كه‌م: سوربین له‌سه‌ر مافی‌ چاره‌نوس. ئاراسته‌ی‌ دووه‌م: سوربین له‌سه‌ر چاره‌سه‌ركردنی‌ قه‌یرانی‌ ئابوریمان. 

ئاماده‌ین، ئه‌لته‌رناتیڤێكی‌ گره‌نتی‌ هه‌بێ‌
ئه‌م قسانه‌شمان بۆ ئه‌وه‌نییه‌ ده‌ستبه‌رداری‌ داخوازییه‌كانمان بین. ته‌نانه‌ت له‌كۆبوونه‌وه‌كاندا زۆر زیاترمان وتووه‌، له‌وه‌ی‌ كه‌ هه‌یه‌. له‌سه‌ر هه‌ردوو ئاراسته‌كه‌ سورده‌بین‌و هاوته‌ریب خه‌بات ده‌كه‌ین. هه‌م بۆ ئه‌وه‌ی‌ مافی‌ چاره‌نوسمان باشتر دابین بكه‌ین له‌ڕیفراندۆمدا. هه‌م بۆ ئه‌وه‌ی‌ كێشه‌ی‌ ئابوری‌، پاشه‌كه‌وتی‌ موچه‌و ژیان‌و گوزه‌رانی‌ خه‌ڵك، باشتر چاره‌سه‌ر بكه‌ین.
من، ریفراندۆم واده‌بینم. لێكه‌وته‌كانیشی‌ هێشتا كاتێكی‌ زۆری‌ ماوه‌ بۆ دوا حوكمدان‌و زانینی‌ دوا بڕیاره‌كان له‌ناوچه‌كه‌دا، زۆری‌ ماوه‌. په‌له‌مه‌كه‌ن، مه‌كه‌ونه‌ ژێر جه‌نگێكی‌ سایكۆلۆژی‌ نه‌خوازراوه‌وه‌، كه‌ ده‌یانه‌وێ‌ به‌م جه‌نگه‌ سایكۆلۆژییه‌، پرۆسه‌یه‌كی‌ مێژووی‌ دیموكراسی‌، وه‌كو مافی‌ خۆمان له‌بار به‌رن‌و خه‌ڵكه‌كه‌شمان بترسێنن..! چونكه‌ خه‌ڵك چاوی‌ كرایه‌وه‌و له‌پێناو مافه‌كانیدا ره‌خنه‌ ده‌گرێ‌، كه‌موكوڕییه‌كان قبوڵ ناكات. خه‌ڵكه‌كه‌مان یان به‌شێك له‌خه‌ڵكه‌كه‌مان، یان توێژێك له‌خه‌ڵكه‌كه‌مان نابێ‌ بكه‌ونه‌ ژێر پڕوپاگه‌نده‌ی‌ ناحه‌زان‌و دوژمنه‌كانمان، چونكه‌ له‌گه‌ڵ هه‌موو ده‌وڵه‌تێكدا ئاماده‌ی‌ دیالۆگین. له‌گه‌ڵ هه‌موو ده‌وڵه‌تێك ئاماده‌ین، ئه‌لته‌رناتیڤێكی‌ گره‌نتی‌ هه‌بێ‌، گفتوگۆ بكه‌ین بۆ ئه‌وه‌ی‌ وردی‌ بكه‌ینه‌وه‌، به‌ڵام به‌پڕوپاگه‌نده‌و به‌هه‌ڕه‌شه‌و گوڕه‌شه‌ پاشه‌كشه‌ ناكه‌ین.


ناو:  
ئیمه‌یل:    
سه‌رنج:  

#7392
17/10/2017
ئه‌رشیف
وه‌رزش
‌ رۆجێر فێدره‌ر بۆ جاری چواره‌م له‌م وه‌رزه‌دا له‌ نادالی برده‌وه‌ 17/10/2017
‌ دۆڤیزیسیۆ قۆناغی ژاپۆنی مۆتۆ جی پی برده‌وه‌ 17/10/2017
زانست
‌ ته‌كنیكی نوێ بۆ نووسینی نامه‌ بێ ده‌ستدان له‌ كیبۆرد 17/10/2017
‌ ئه‌ندۆنیزیا چاوه‌ڕوانی هه‌ڵپژانی گڕكانێكه‌ 17/10/2017
‌ زرێبار هه‌ورامی: ژیان جه‌نگه‌، له‌گه‌ڵ خۆت و له‌گه‌ڵ بارودۆخه‌كه‌ت 16/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP