یەكێتی نیشتمانی كوردستان- ریفراندۆم
یەكێتی نیشتمانی كوردستان- ریفراندۆم ‌ 13/8/2017
حكومەتێكی دیموكرات
لاسۆ ئەحمەد
به‌شی دووه‌م 
(سكۆتلەندە) بەشێكە لە پاشانشینی یەكگرتوو- المملكە المتحدە- كۆنفدراڵی یان هەرێمێكە لە دەوڵەتێكی دیموكراتی زۆر كۆن، كە جاران دەیانووت ( هەرگیز ڕۆژی لێ‌ ئاوا نابێت). (كەتەلۆنیا) بەشێكە لە دەوڵەتی ئیسپانیای دیموكرات كە (بەرشلۆنە) پایتەختەكەیەتی. (كێبك) هەرێمێكی دەوڵەتی كەنەدای دیموكراتە. ئەو بەش، یان هەرێمانە كێشەی حكومەتێكی عەسكەرتاری دكتاتۆریان نییە. هاوڵاتیانیان یەكسانن لەگەڵ هاوڵاتیانی هەرێم و بەشەكانی تری دەوڵەتەكەیان و نا چەوسێنرێنەوە. حكومەتە ناوەندییەكانیان ئەنفال و كیمیابارانیان نەكردوون. چوار هەزار گوندییان لێ‌ نەسووتاندون و ڕایان نەگواستون بۆ شوێنێكی تر. پێناسەی نەتەوەییان نە گۆڕیون. كەسیان لێ‌ گوللە باران و لە سێدارە نەدراوە. بە درێژایی دەیان ساڵی مێژووی خۆیان (جیا لە ئەسپانیای سەردەمی فرانكۆ) مقاوەمەی شەعبی و حەرەس قەومی و داعش و ئەنسارو ئیسلام و حەشدی شەعبیان نەبووە، كەچی چەندین ساڵە شێلگیرانە داوای ڕیفراندۆم دەكەن بۆ سەربەخۆیی خۆیان و جیابوونەوە لە حكومەتە ناوەندییەكانیان. بێگومان حكومەتە ناوەندییەكانیان پێیان خۆش نییەو ڕازی نین. بەڵام چونكە ئەوە مافێكی شەرعی و یاسایی هەموو گەلانە بۆیە ناتوانن ڕێیان لێ‌ بگرن. 
دیارە ئەو گەلانەش سەروەریی زیاتری خۆیان بە جیابوونەوە لەو حكومەتە دیموكراتیە مەركەزییانە بە باشتر دەزانن بۆ خۆیان. بێگومان ئەگەر كوردستانیش هەرێمێك بووایە وەكو ئەو هەرێمانە لە چوار چێوەی دەوڵەتێكی دیموكرات و، مافە یاساییە ڕەواكانی ڕەچاو بكرایە، هەرگیز ئەمڕۆ داوای ڕیفراندۆمی نەدەكرد بۆ سەربەخۆیی. بۆیە ئەگەر بەراوردێك لەنێوان سستەم و مافەكانی ئەو سێ‌ نموونەیەی سەرەوە بكەین لەگەڵ هەرێمی كوردستان، ئینجا دەست بخەینە سەر ویژدان و دڵی خۆمان و واقعیانە سەیر بكەین. دڵنیام هیچ كەس و لایەنێك گلەیی و ڕەخنە لە پێكهاتەكانی كوردستان ناكات بۆ ڕیفراندۆم و پێكهێنانی دەوڵەتێكی سەربەخۆ. بگرە بە پێچەوانەوەو شێلگیرانە پشتیوانی لێ‌ دەكەن.
دوور نییە بەشێك لە حیزب و لایەن و ڕووناكبیرو شارەزایان بەراوردەكە بەو لایەدا بشكێننەوەو بڵێن: ئاخر دەستوری عیراق كە ساڵی 2005 سەرجەم گەلانی عیراق بە كوردستانیشەوە دەنگیان بۆ داوە، ڕێگا بە ڕیفراندۆم و پارچە پارچە بوونی عیراق نادات. ئەو قسەیە لە كاتێكدا ڕاستە كە حكومەتی عیراق خۆی حكومەتێكی دیموكرات و یەكگرتوو بێت و، كاری حوكمڕانی ڕۆژانەی پیادەكردنی دەستورو جێبەجێ كردنی ماددەكانی بێت و پێشێلی نەكردبن. ئەرێ‌ هەڤاڵینە...! دۆست و برادەران ئەبێ‌ ماددەی 140ی دەستووری عیراق لەمەڕ ناوچە دابڕێنراوەكان هەواڵی چی بێت...؟ ئایا ماوەی ئەو هەموو ساڵە حكومەتی عیراق بۆ جێ‌ بەجێی ناكات...؟ 
ماوەی ئەو هەموو ساڵە حكومەتە یەك لە دوای یەكەكانی عیراق دوای ڕووخانی صدام جۆرەها بڕوبیانو دەدۆزنەوە بۆ جێبەجێ نەكردنی و خۆ لێ‌ دزینەوەی. بگرە ڕۆژانە وەكو حكومەتە یەك لە دوای یەكەكانی سەد ساڵ لەمەو پێش بە جۆرەها بڕوبیانوو شەقامی شیعەو سوننەی عیراقی لە دژی كوردو مافە ڕەواكانی هاندەدەن. جار جارەش هێزی سەربازی دەجوڵێنن و حەشدی شەعبی بەگژ ئەو ناوچانەدا دەكەن و خەڵكمان لێ‌ دەڕفێنن و شەهید دەكەن. جارە جارەش دەیانەوێ‌ بە هەڕەشەو چاو سووركردنەوە جاری واش بە چڵێسی پارەو پول دانیشتوانە كوردەكەی ئەو ناوچانە بخەڵەتێنن و وەكو جاری جاران چەكیان پێهەڵبگرن و بە خۆیانیانەوە ببەستنەوە. 
ماوەی زیاتر لە دوو ساڵیشە قوت و بژێوی ئەو پێشمەرگانەشیان بڕیوە كە لە سەنگەرەكانی پێشی پێشەوەی ڕوو بە ڕوو بوونەوەی داعشن و تاكو ئەمڕۆ زیاتر لە هەزارو پێنج شەهیدو چەندین هێندەش زیاتر برینداریان داوە. هێزی پێشمەرگەی كوردستان كە لە شەڕە سەختەكان هاوكارو پشت و پەنای سوپاو پۆلیسی فیدڕاڵی عیراق بوون. بیانیەكان هاوكارییان دەكەن كەچی حكومەتی عیراق خۆی كردووە بە (كەڕەی شەربەت).
كاتێک‌ باس لە حكومەتی عیراقی نادیموكراتیش دەكرێت... هەندێ‌ لایەنی سیاسی و ڕووناكبیرانی كوردستان، تەنانەت هەندێ‌ لە هەڤاڵانی یەكێتی نیشتیمانی كوردستانیش پرسیاری ئەوە ئەكەن: ئایا گرەنتی جیابوونەوە لە عیراق و دروست بوونی دەوڵەتێكی دیموكراتی كوردستانی چییە لە دوای ڕیفراندۆم...؟ ئەوان پشتیوانی لە ڕیفراندۆمێك ناكەن ئەگەر پێشەكی نەزانن دەوڵەتێكی لەو شێوەیە دروست دەبێت. بۆ وەڵامی ئەو پرسیارەو دوو دڵییەش ئەڵێین: (كوێر هەمیشە، تا دوایین هەناسەی ژیانی خەون بە دوو چاوی ساغەوە دەبینێ) كێ‌ هەبێ‌ حەز نەكات دەوڵەتێكی دیموكرات و یاسایی وەكو سویدو نەرویج و فنلەندامان هەبێت. بەڵام خەیاڵ و ئارەزوو لە هەواڵێك و واقیعی حاڵی تاڵی كۆمەڵگاكان و حوكمڕانی ڕۆژهەڵاتی ناوەڕاستیش لە هەوارێكی تر. تێڕوانینی ڕاست و دروست و زانستیانە ئەوەیە كە ئەبێ‌ هەموو شتەكان لەسەر بنەمای واقیعیی ڕۆژانە بنیات بكرێت. 
ئەمڕۆ لە ڕۆژهەڵاتی ناوەڕاستدا (لەم قوڕە ئەو تۆزە هەڵدەستێت) حەز دەكەم ئەولایەن و هەڤاڵانە (جیا لە ئیسرائیل كە ئەویش مافی فەلەستینیەكان پێشێل دەكات) هێما بۆ تەنیا یەك وڵاتی دیموكراتی بكەن. هەرە ئارام و باشەكانیان. وڵاتانی (میر نشینەكانی كەنداوی عەرەبی و شانشینەكانی نیشتیمانی عەرەبین) لەگەڵ هەموو زۆرداری و نا عەدالەتی و گەندەڵییەكانیان. ئەو پاشانشینانە سەد بەرامبەر حكومەتە بەناو دیموكرات و سۆسیالیستەكانی وەكو (میسرو عیراق و سوریاو لیبیاو جەزائیر)...هتد باشترن.
هەروەها بەندە نازانم كام لەو حیزب و گروپ و لایەنانە (بە حیزبەكەی خۆشمەوە) لە پراكتیكدا دەرهەق بە هەڤاڵەكانی خۆیان و لایەنە سیاسیەكان و میللەت دیموكراسین...؟ لە وڵاتی ڕۆژهەڵاتی ناوەڕاستدا كوا دیموكراسیەت و سۆسیالستی...؟! كوا عەدالەتی كۆمەڵایەتی. كوانێ‌ سەربەخۆیی دادگاو سەروەری یاسا...؟ ئەمانە هەمووی دروشمی بەردەم مایكرۆفۆن و سەر كاغەزو قسەی سەر شاشەی تەلەفزیۆنن. بەڵام ئەمە مانای ئەوە نیە سەڵەوات لە حوكمڕانی پاشانشینەكان بدەین یان دەستبەرداری هەوڵ و خەباتی هێنایە كایەی دیموكراتی بین. مەسەلەی دیموكراتی لەگەڵ بوونی ئەم گۆی زەوییەیەو هەر ئەبێ‌ بێتە دی. هەروەها بڕواش ناكەم لەسەرانسەی دنیادا دەوڵەتێك هەروا بە ئاسانی و خۆڕسك، بێ‌ ژان گرتنێكی زۆر لە دایك بوو بێت.  ئەمە نموونەی یەكگرتنی ویلایەتەكانی ئەمریكا، ئەمە یەكگرتنی ئەڵمانیا، ئیتاڵیا، سەربەخۆیی بەنگلادیش، كۆسۆڤۆ، كرواتیا...هتد.


ناو:  
ئیمه‌یل:    
سه‌رنج:  

#7347
22/8/2017
ئه‌رشیف
وه‌رزش
‌ جارێكی تر هالیپ شكستی هێنا بچێته‌ پێشه‌نگی ریزبه‌ندییەوە 22/8/2017
‌ ریاڵ مه‌درید گرێبه‌ستی كه‌ریم بنزیمه‌ نوێ ده‌كاته‌وه‌ 22/8/2017
زانست
‌ هەسارەیەك لە زەوی نزیك دەبێتەوە 21/8/2017
‌ نۆكیا 8 ركابەریی ئایفۆن و گالاكسی دەكات 21/8/2017
‌ پێنج هەڵەی باو لەكاتی راكردندا 21/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP