كوردستان و داغستان
كوردستان و داغستان ‌ محه‌مه‌د کوردۆ‌ 14/9/2017
هاوڕێیەك، كە ماوەیەكە لە یەكێك لە وڵاتە پێشكەوتووەكانی ئەوروپا دەژی، لەو ڕۆژانەی ڕابردوودا، بە سەردان گەڕابۆوە كوردستان، لە دانیشتن و كۆبوونەوەیەكی بچكۆلانەی چەند هاوڕێییدا، زۆر شتی جۆراوجۆری باس كرد. ئەوەی سەیر و سەرنجڕاكێش بوو، لە ناو قسەكانییدا، بە جۆرە شانازییەكەوە باسی پێشكەوتوویی ڕۆژئاوا و بە جۆرە گاڵتەپێكردنێكیشەوە باسی دواكەوتوویی كوردستانی دەكرد، ئەگەر یەكێك نەیزانیایە ئێمە و ئەو هاوڕێیە، هەردوولامان خەڵكی یەك وڵاتین، وایدەزانی ڕۆژئاوا لە سەر دەستی ئەو هاوڕێیە پێش كەوتووە و كوردستانیش ئێمە دوامان خستووە. كاتێك ئەو هاوڕێیە بە گاڵتەپێكردنەوە باسی وڵاتێكی دەكرد، كە منداڵێتیی خۆی، مێژووی، دایك و باوك و كەسوكاری، مامۆستاكانی، هاوڕێكانی، زمانی، وان لە ناو ئەو وڵاتەدا، من (وەفایی) شاعیرم  بیر كەوتبۆوە. لە دڵی خۆمدا دەمووت: ئاخۆ (وەفایی) لە داخی چ مرۆڤگەلێك، ئەو نازناوەی بۆ خۆی هەڵبژاردبێت؟ كاتێك ئەو هاوڕێیە بەو شێوازە، بەراووردی ڕۆژئاوا و كوردستانی دەكرد، من (ڕەسوڵ هەمزاتۆف)م بیر كەوتبۆوە. لە دڵی خۆمدا دەمووت: ئاخۆ نهێنی ئەوەی (هەمزاتۆف) بەو عەشق و خۆشەویستییە زۆرەوە، باسی وڵاتە بچكۆلانە و چەپەك و پەراوێزخراوەكەی خۆی كردووە و ئەم هاوڕێیەش بەم گاڵتەپێكردنەوە باسی وڵاتەكەی خۆی دەكات، چییە؟ بێگومان من دەمزانی ئەو هاوڕێیە (هەمزاتۆف) نییە، دەیشمزانی ناكرێت لەگەڵ (هەمزاتۆف)دا بەراوورد بكرێت، ئەوەی كە نەمدەزانی نهێنی ئەو چێژە گەورەیە بوو، (مەبەستم چێژی باسكردنی وڵاتە)، كە ئەو هاوڕێیە و (هەمزاتۆف)ی پێكەوە كۆ دەكردەوە. بێگومان كۆكردنەوەیەك بە دوو ئاراستەی تەواو پێچەوانە و جیاواز. كاتێك بیرم لە (هەمزاتۆف) دەكردەوە بە چ شەوق و زەوقێكەوە باسی جوانییەكانی (داغستان)ی كردووە و ئەم هاوڕێیەیش بە چ حەز و ئارەزوویەكەوە باسی ناشیرینییەكانی (كوردستان) دەكات، هەستم بە سەرەگێژە دەكرد. بێگومان، من دژی ڕەخنە نییم، بەڵام دژی گاڵتەپێكردنم. دژی ڕووبەڕووبوونەوەی ناشیرینیەكان نیم، دژی ڕاكردنم. دژی دەستخستنەسەر برینەكان نیم، دژی خۆبێبەرییكردنم. بە هەر حاڵ، پرسیاری گرنگ ئەمەیە: ئاخۆ ئەگەر هەر یەكێك لەو خەڵكانەی ئێمە، كە لە وڵاتە پێشكەوتووەكان دەژین، لە بری گاڵتەكردن بە وڵاتی خۆیان، تەنها یەك شتی باش فێر بوونایە و بیانهێنایەتەوە بۆ وڵاتەكەی خۆیان، ئێستا ئێمە لە دۆخێكی تردا نەدەبووین؟ 


ناو:  
ئیمه‌یل:    
سه‌رنج:  

#7367
19/9/2017
ئه‌رشیف
وه‌رزش
‌ ئایا شه‌ڕی ئه‌ستێره‌كان له‌ پاریس سانجێرمان ده‌ستیپێكرد؟ 19/9/2017
‌ نه‌فرەتی خیتافی به‌رده‌وامه‌ 19/9/2017
زانست
‌ كاسینی شۆڕشێك له‌ زانیاری ده‌رباره‌ی زوحه‌ل 19/9/2017
‌ رۆبۆته‌كان ده‌بنه‌ جووتیار 19/9/2017
‌ لە هەر ١٠ كەسێك، یەكێكیان خواردنی پێویستی نییە 18/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP