ترس لە کوچی ڕێبەرێک!
ترس لە کوچی ڕێبەرێک! ‌ 12/10/2017
دەشتی عبدالرحمن
کۆچی دوایی سەرکردەو ڕێبەری ڕزگاری خوازی گەلەکەمان،کارێزمای ئەفسانەیی شۆڕش و خەباتی ڕزگاری خوازی نەتەوەیی گەلی کورد،دامەزرێنەرو ڕێنیشانەدەرو  سکرتێری گشتی  یەکێتی نیشتیمانی کوردستان،هەستێک بووە هەمیشە یەکێتیەکان لە ئاستیدا شعوریان بە ترسێکی گەورە کردووە.
ترس لە بزربوونی هەیمەنەی کەسێک،کە توانی بووی بە کارێزمایی خۆی،حزبێک بە پێچەوانەی خەباتگێڕەکانی ڕابردوو،دوور لە پابەندبوون و پشت ئەستور بوون بە بنەمای خێڵەکی و ئاینی دروست بکاو،کۆمەڵێک چەمک و بنەمای نەتەوەیی و شۆڕشگێڕی بکاتە خاڵی هاوبەش و کۆکەرەوەی کۆمەڵێک خەڵکی ئەهلی فکری جیاوازو ناوچە جیاواز و ئاڕاستەیان بکات لە یەک بەرەی شۆڕشگێڕی،بۆ یەک ئامانجی نەتەوەیی بە ناوی یەکێتی نیشتیمانی کوردستان.
ترس لە لەدەستدانی سەرکردەیەک،کە بەر لە دیاریکردنی  چۆنیەتی جوڵەو ئاڕاستەکردن و بەژداریکردنی یەکێتی بۆ ناو ڕووداوو پیشهاتەکان،دەیتوانی بە پێشبینیە وردوو دوورەکانی،بە خوێندنەوە وردو ئەزموونە دەوڵەمەندەکەی،ڕاسترین ڕێگا بۆ یەکێتی هەڵبژێرێ،وە بەو جۆرەی کە پێویستەو بە قازانج دەشکێتەوە بۆ کوردو یەکێتی،جوڵە بە یەکێتی بکات.
ترس لە لەدەستدانی دیبلۆماتکارێک،کە خاوەن هونەرێکی تایبەت و دەگمەن بوو لە دروستکردنی پەیوەندی و پاڵپشتی بۆ گەلەکەیی و یەکێتی نیشتیمانی کوردستان.دیبلۆماتکارێک بە لێوەشاوەیی و شارەزاییەکەی،بە سام و هەیبەت و شەخسیەتە سیاسیەکەی،بێ خواستی خۆی هەقیقەتێکی دروست کردبوو،کە زۆر جارو لە زۆر شوینی ئەم دونیایەدا،گەلەکەیی و یەکێتی بە هۆی ئەوەوە دەناسران،نەک یەکێتی و کورد ئەویان بناساندایە بە دونیای دەرەوە.
ترس لە لەدەستدانی چێژ لە شانازی و سەرکەوتنەکان،لە نەمانی متمانەو مردنی ئیرادەو سەبر تا دەرکەوتنی ڕاستی دەرئەنجامی جوڵە سیاسی و حزبیەکان،لە دروست بوونی فەوزاو بزربوونی پێوەرەکانی هەقیقەت،لە نەمان و تێکشکانی پرەنسیپی(کەسی شیاو بۆ شوێنی شیاو)،لە نەمانی هاوسەنگی لە ئاستی لێهاتوویی  و هۆشیاری و دڵسۆزی نێوان(هەڵسەنگێنەرو هەڵسەنگێندراوەکان)و دەرکەوتنی نادەداپەروەریەکی کوشندە لە ناوخۆی یەکێتی نیشتیمانی کوردستاندا وەک حزبێکی گەورەی سیاسی لە ناوچەکە.ئەمانەو چەندین ترسی تر بە هۆی مردن و  ماڵئاوایی سەرۆک مام جەلالەوە،هەستێکەو ڕەنگە وا بە ئاسان نەڕەوێتەوە.
بە داخەوە،دواجار  ئەم ترسە بووە ڕاست و ئەم ماڵئاواییە یەک جاریەی سەرۆک ڕویدا،وە ئێستا بە واقعی یەکێتیەکان لە ناو چەشتنی ئازارو دڵەڕاوکێی ئەم هەستەدان.کێشە ناوخۆییەکانی یەکێتی وەک خۆیان ماونەتەوەو یەکێتی لەبەردەم لێکترازانێکی تردایە،پەیامی سیاسی یەکێتی ناڕوونەو لە ئاستی خەم و خواستی جەماوەرو کادیرەکانی نیە. کوردستان و ناوچەکە بە قۆناغێکی سیاسی ناسک و  ناتەندروست و نالەباردا گوزاردەکاو،پێویستی بە جوڵەیەکی سیاسیانەی حەکیمانەی مام جەلالیانەیەو ئەو ڕۆڵە تا ئێستا غائیبە.
لێرەدە پێویستە بپرسین،ئایە کێ دەتوانێ لە ناو یەکێتیدا ببێتە سەرکردەی تێپەڕاندنی ئەم قۆناغەو پێشڕەوی ڕەواندنەوەی ئەو هەموو ترس و دڵەڕاوکێیەی،کە بەهۆی کۆچی دوایی بەڕێز مام جەلالەوە دروست بووە لە ناو کادیرو جەماوەری یەکێتی نیشتیمانی کوردستان؟
ئایە خوێندکارو هاوسەنگەرانی مام،ماڵئاوایی یەکجارەکی مامیش ڕایان ناچڵەکێنێ،تا دەسبەرداری بەرژەوەندی کەسی ببن و خەمی جێبەجێ کردنی ڕێبازەکەی مام و دوا پەیام و ڕاسپاردەکانی بخۆن؟


ناو:  
ئیمه‌یل:    
سه‌رنج:  

#7396
22/10/2017
ئه‌رشیف
وه‌رزش
‌ گه‌وره‌ترین پاڵه‌وانی بازی به‌رز وازهێنانی راگه‌یاند 22/10/2017
‌ ئه‌ندام په‌رله‌مانێكی به‌ریتانیا به‌هۆی كاری ناوبژیوانی هه‌را ده‌نێته‌وه‌ 22/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP