له‌ ئامانه‌تـی‌ ئاشتیدا بن
له‌ ئامانه‌تـی‌ ئاشتیدا بن ‌ 31/8/2017
وه‌رگێڕانی‌ له‌ توركییه‌وه‌: هێژا دڵشاد
به‌شی‌ بیست و یه‌ك و كۆتایی
شه‌ڕێكی‌ قورس به‌رۆكی‌ گرتوین!
ساڵی‌ 1988، ئۆزاڵی‌ سه‌رۆكوه‌زیر: «ده‌وڵه‌تی‌ تورك له‌ رووی‌ هێزه‌وه‌ له‌و ئاسته‌دایه‌ كه‌ روبه‌ڕووی‌ رێكخراوێكی‌ تیرۆریستی‌ خوێنڕێژ ببێته‌وه‌».
ساڵی‌ 1992، ده‌میره‌لی‌ سه‌رۆكوه‌زیر: «رێكخراوی‌ تیرۆریستی‌ په‌كه‌كه‌ ده‌ستی‌ كردووه‌ به‌ منداڵ كوشتن، ئیتر ده‌بێت كاردانه‌وه‌یكی‌ توندنمان هه‌بێت».
ساڵی‌ 1996، تانسۆ چیله‌ی‌ سه‌رۆكوه‌زیر: «تیرۆر بنبڕ ده‌كه‌ین، هیچ شتێك به‌ كه‌س ناده‌ین».
ساڵی‌ 1997، مه‌سعود یڵمازی‌ سه‌رۆكوه‌زیر: «ئیتر وڵاتانی‌ ئه‌وروپا ناتوانێ‌ له‌وه‌ زیاتر هاوكاری‌ رێكخراوی‌ تیرۆرستی‌ بكات و تینمان بۆ هاتووه‌».
ساڵی‌ 1999، ئه‌جه‌ویدی‌ سه‌رۆكوه‌زیر: «ئه‌وه‌ی‌ هاوكاری‌ رێكخراوی‌ تیرۆریستی‌ كردووه‌ با باش ئه‌وه‌ بزانێت كه‌ ده‌بێت به‌قورسی‌ باجه‌كه‌ی‌ بدات».
مانگی‌ ئابی‌ 2011، ئه‌ردۆغانی‌ سه‌رۆكوه‌زیر: « له‌به‌ر حورمه‌تی‌ مانگی‌ ره‌مه‌زان ئارام ده‌گرین،  ئیتر سه‌بر و ته‌حه‌مولمان نه‌ما، هیچ كات رێكخراوی‌ تیرۆریستی‌ ناتوانێك ئه‌م وڵاته‌ دابه‌ش بكات و ناكۆكی‌ له‌ناو مرۆڤه‌كان دروستبكات، ئێمه‌ خۆڕاگر ده‌بین، ئێمه‌ له‌م وڵاته‌ یه‌ك میله‌تین، خاوه‌نی‌ یه‌ك ئاڵا و یه‌ك خاك و ده‌وڵه‌تین. هیچ كاتێك رێگه‌ به‌وه‌ ناده‌ین له‌لایه‌ن رێكخراوێكی‌ تیرۆریستییه‌وه‌ ئه‌م خاكه‌ بشێوێنن و هه‌وڵی‌ دابه‌شبونی‌ بده‌ن».
ته‌مموزی‌ 2011، ئۆجه‌لان له‌ ئیمڕاڵییه‌وه‌: «دۆخی‌ من له‌ دۆخی‌ ماندێلا له‌ باشووری‌ ئه‌فه‌ریقا ده‌چێت،دێسمۆند تۆتۆ به‌ ماندێلای‌ وتوه‌: تاكو ئازاد نه‌بیت، هیچ شتێك بۆ ئاشتی‌ مه‌كه‌، له‌به‌رئه‌وه‌ی‌ مه‌ترسیداره‌. به‌ڵام دواتر رێگرییه‌كانی‌ به‌رده‌م ماندێلایان لابرد،له‌ توركیا كه‌سێك نییه‌ ئه‌و رۆڵه‌ بگێڕێت، له‌ ئێستادا ئه‌ردۆغان رۆڵی‌ چیله‌ر ئه‌بینێت، شه‌ڕێكی‌ قورسی‌ له‌ به‌رده‌مماندایه‌، ئه‌ردۆغان ئۆپه‌راسیۆن له‌سه‌ر ئۆپه‌راسیۆن ئه‌نجام ده‌دات و شه‌ڕی‌ ده‌وێت و ئاشته‌وایی ناخوازێت».
ئابی‌ 2011، موراد قه‌ره‌یڵان له‌ قه‌ندیل: « توركیا مناڵه‌كانی‌ ئێمه‌ ده‌كوژێت، هاوڵاتی‌ مه‌ده‌نی‌ كورد ده‌كوژێت، ئۆپه‌راسیۆنه‌كان بۆ سه‌ر گه‌ریلاكان چڕترده‌كه‌نه‌وه‌، سیاسییه‌ كورده‌كان له‌سه‌ر وته‌كانیان ده‌خرێنه‌ زیندانه‌وه‌، ئه‌وانه‌ی‌ خه‌باتی‌ سیاسی‌ ده‌كه‌ن و دوور له‌چه‌ك تێكۆشانی‌ مه‌ده‌نی‌ ده‌كه‌ن ده‌ستگیرده‌كرێن، تائێستا 3 هه‌زار كه‌س ده‌ستگیركراووه‌، له‌ شه‌قامی‌ شاره‌كانی‌ كوردستان وه‌حشیگه‌ریی و قه‌تلوعام ده‌كرێت. ته‌نها له‌ماوه‌ی‌ نیوه‌ی‌ ساڵی‌ 2011، 37 هاوڵاتی‌ كورد كه‌ مه‌ده‌نی‌ بوون و كراونه‌ته‌ قوربانی‌، حكومه‌تی‌ ئاك پارتی‌ بڕیاری‌ ئه‌وه‌ی‌ داوه‌ به‌ شه‌ڕ و توندوتیژی‌ چاره‌سه‌ری‌ پرسی‌ كورد بكات و هه‌ڵگیرساندنه‌وه‌ی‌ شه‌ڕی‌ به‌رپاكردووه‌. ئه‌گه‌ر بێت رێبه‌ر ئاپۆ شتێكی‌ لێبێت، ئه‌و كات سه‌رۆكێك له‌ توركیا نابێت كه‌ بۆ ئاشتی‌ گفتوگۆی‌ له‌گه‌ڵدا بكرێت و گێره‌شێوێنی‌ رووده‌دات».

ماڵئاوایی له‌ ژیان نا، كاتی‌ ئه‌وه‌یه‌ ماڵئاوایی له‌ چه‌كه‌كان بكرێت!
به‌داخه‌وه‌ ره‌وشی‌ ناوخۆی‌ توركیا له‌ ئابی‌ 2011 زۆر خراپ بوو. توندوتیژی‌ به‌رامبه‌ر به‌ توندوتیژی‌ ده‌كرا و خوێنێكی‌ زۆر رژا له‌ توركیا. وه‌ك بڵێی‌ هێشتا به‌س نه‌بێت ئه‌و هه‌موو خوێنه‌ی‌ كه‌ ساڵانێكه‌ ده‌ڕژێت. وه‌ك بڵێی‌ ساڵانێكی‌ زۆره‌ ئه‌و تراژیدیایه‌ی‌ هه‌بووه‌ له‌م وڵاته‌ به‌س نه‌بێت.
له‌ كاتێكدا تاكه‌ چاره‌سه‌ر بێده‌گكردنی‌ چه‌كه‌كانه‌. كۆتایی هێنانی‌ هێرشه‌كانی‌ په‌كه‌كه‌یه‌. وه‌ستاندنی‌ ئۆپه‌راسیۆنه‌كانه‌. كاتێ‌ كه‌شێكی‌ وا ده‌ڕه‌خسێت كه‌ ده‌نگی‌ ته‌قه‌ له‌ شاخه‌كان نایه‌ت، ئه‌و كات به‌ رابه‌رایه‌تی‌ گه‌وره‌ و ئیراده‌یه‌كی‌ به‌هێزه‌وه‌ ده‌توانرێ‌ پڕۆسه‌یه‌كی‌ نوێی‌ ئاشتی‌ رابگه‌یه‌نرێت و رێگریش له‌ هه‌موو پیلانێكی‌ تێگده‌رانه‌ له‌سه‌ر پڕۆسه‌كه‌ بكرێت، دوور یان نزیك توركیا ده‌گاته‌ ئه‌م خاڵه‌. گرنگ ئه‌وه‌یه‌ به‌زووترین كات بگه‌ین به‌و رێگا ئاشتییه‌، خوێن رشتن و فرمێسك ڕشتن كه‌مبكه‌ینه‌وه‌. كاتێ‌ پڕۆسه‌یه‌كی‌ ئاشتی‌ له‌و جۆره‌ له‌ئارا نابێت، ئه‌وا توندوتیژیی و شه‌ڕ ئه‌و بۆشاییه‌ پڕده‌كاته‌وه‌. باشه‌ گوناح نییه‌ بۆ ئه‌و گه‌نجانه‌ی‌ كه‌ ده‌مرن؟ ئیتر با به‌س بێت تراژیدیای‌ سه‌ر ئه‌م خاكه‌!

«كه‌كه‌ حه‌سه‌ن ئومێدی‌ ئاشتی‌ له‌ئارادا هه‌یه‌؟»
له‌ ناوه‌ڕاستی‌ ئابی‌ 2011، كۆتایی به‌شی‌ كتێبه‌كه‌م ده‌نوسی، له‌ناكاو بیرم له‌ وته‌كانی‌ زاگرۆس كرده‌وه‌، ئه‌و گه‌ریلایه‌ی‌ له‌ قه‌ندیل گفتوگۆی‌ ئاشتی‌ له‌گه‌ڵ كردم. گفتوگۆكه‌مان به‌م جۆره‌ بوو:
وتم «بڵی‌ زاگرۆس «
زاگرۆس وتی‌ «كاكه‌ حه‌سه‌ن تۆ بۆ ئاشتی‌ كارده‌كه‌یت یان بۆ رۆژنامه‌؟»
منیش وتم «بۆ هه‌ردووكیان كارده‌كه‌م زاگرۆس، هه‌م بۆ ئاشتی‌ هه‌م بۆ رۆژنامه‌»
زاگرۆس به‌م وه‌ڵامه‌م پێكه‌نی‌ و وتی‌ «راسته‌كه‌یت كاكه‌ حه‌سه‌ن»
لێمپرسی‌ «بڵێ‌ زاگرۆس»
زاگرۆس وتی‌ « كاكه‌ حه‌سه‌ن ئومێدی‌ ئاشتی‌ له‌ ئارادا هه‌یه‌ «
منیش وتم «ئومێدی‌ ئاشتی‌ هه‌یه‌، ئه‌گینا نه‌ده‌هاتمه‌ قه‌ندیل»
زگرۆس وتی‌ «راسته‌كه‌یت كاكه‌ حه‌سه‌ن»
وتیشم «بێ‌ خه‌م به‌ زاگرۆس، رۆڵه‌كه‌ی‌ تۆ دونیایه‌كی‌ ئاشتی‌ چاوه‌ڕێی‌ ده‌كات كه‌ وه‌ك تۆ ژیانی‌ له‌ شاخ به‌سه‌ر نه‌بات، هیچ گومانت له‌وه‌ نه‌بێت».
زاگرۆس وتی‌ «راسته‌ كاكه‌ حه‌سه‌ن» 

هاواری‌ عایشه‌ له‌ جوله‌مێرگه‌وه‌ 
جوله‌مێرگ، ئه‌و شوێنه‌ی‌ كه‌ هه‌موو تاكێك له‌ناخیدا ئازار و خه‌فه‌تێكی‌ قوڵی‌ هه‌یه‌، یه‌ك له‌وانه‌ ناوی‌ عایشه‌-یه‌، له‌ساڵی‌ 1995 له‌ یه‌ك له‌لادێكانی‌ سه‌ربه‌ چوقورجه‌، به‌ زۆری‌ ده‌وڵه‌ت بۆ جوله‌مێرگ راگوێزراوه‌. كچه‌كه‌ی‌ ناوی‌ خه‌زاڵ-ه‌. ده‌ڵێن جنۆكه‌ چۆته‌ له‌شی‌ خه‌زاڵه‌وه‌ بۆیه‌ باری‌ ده‌رونی‌ ته‌واو نییه‌. به‌ڕای‌ من خه‌زاڵ له‌ ئه‌نجامی‌ ئه‌و هه‌موو ئازار و مه‌ینه‌تیانه‌ی‌ چه‌شتویه‌تی‌ بیروهۆشی‌ له‌ده‌ستداوه‌. عایشه‌ هاوار ده‌كات و ده‌ڵێت «له‌و هه‌موو ئازارانه‌ی‌ چه‌شتوومانه‌ خه‌زاڵ به‌رگه‌ی‌ نه‌گرت و عه‌قڵی‌ له‌ده‌ستدا».

نزیك له‌ قه‌زار لیجه‌ی‌ سه‌ربه‌ ئامه‌د، «كوڕه‌كه‌م چووه‌ شاخ!»
هاوڵاتییه‌ك له‌ قه‌زای‌ لیجه‌ هاواری‌ له‌ من ده‌كرد، ده‌یوت «ئه‌و رۆژه‌ی‌ ئاگر به‌ردرایه‌ لیجه‌، له‌گه‌ڵ كوڕه‌كه‌م به‌ره‌و شوێنێكیتر چووین له‌ ناچاریدا، له‌ وه‌رزی‌ پایزدا بوو، ئیتر نه‌مانتوان بگه‌ڕێینه‌وه‌ بۆ خانوه‌كه‌مان له‌ لیجه‌، چونكه‌ له‌لایه‌ن ده‌وڵه‌ته‌وه‌ روخێرابوو، كوڕه‌كه‌م ته‌مه‌نی‌ 22 ساڵ بوو كه‌ چووه‌ شاخ، ئاره‌زووم وابو له‌ شاخ بگه‌ڕێته‌وه‌، به‌ڵام ئه‌و نه‌گه‌ڕایه‌وه‌ و له‌ شاخ مایه‌وه‌، له‌ ساڵی‌ 1996 شه‌هید بوو».

«بنوسه‌ رۆڵه‌، ئێمه‌ تینووی‌ ئاشتی‌-ین»
گوێ‌ له‌ پوره‌ خزۆ ده‌گرم. ئه‌و خه‌ڵكی‌ لادێیه‌كی‌ سه‌ر به‌ چوقورجه‌یه‌ و له‌وێوه‌ به‌زۆرداری‌ ده‌وڵه‌ت لادێكه‌یان چۆڵ كراوه‌و بۆ جوله‌مێرگ راگوێزراوه‌، ئێستا له‌ هه‌ژارترین گه‌ڕه‌كی‌ ئێره‌ ده‌ژی‌، ده‌وڵه‌ت به‌ زه‌بری‌ چه‌ك و هێز له‌ خاك و زێدی‌ خۆی‌ راگواستووه‌، پوره‌ خزۆ كاتێ‌ منی‌ بینی‌ وتی‌ بنوسه‌ رۆڵه‌ «ئێمه‌ تینووی‌ ئاشتین».  دڵگران بووم به‌ روخساری‌ پاكی‌ پوره‌ خزۆ، به‌ شێوه‌ی‌ قسه‌كردنی‌، به‌هه‌موو ئه‌و ئازار و مه‌ینه‌تییانه‌ی‌ چه‌شتویه‌تی‌ و له‌ روخساریدا نه‌خشه‌ی‌ كێشاوه‌، روخساری‌ ئه‌و گێڕانه‌وه‌ی‌ هه‌موو چیرۆكه‌ به‌ ئازاره‌كانه‌. وته‌كانی‌ پوره‌ خزۆ له‌ ناخه‌وه‌ بۆمان ده‌گێڕێته‌وه‌ ئه‌و ئازارانه‌ی‌ چه‌شتویه‌تی‌ و ده‌شڵێت «گه‌ریلاكان و سه‌ربازه‌كانی‌ شاخ، هه‌موویان رۆڵه‌ی‌ ئێمه‌ن، داكۆكی‌ له‌ ئاشتی بكه‌ن، ده‌ستگیركراوانیش ئازادبكه‌ن».

دایه‌ خه‌یرییه‌ « له‌ ئامانه‌تی‌ ئاشتیدا بن»
دایه‌ خه‌یرییه‌ چوار كوڕی‌ گه‌ریلا بوه‌ و شه‌هید بوون.
پیره‌ژنێك له‌ دووره‌وه‌ هاوار له‌ من ده‌كات، له‌ باخچه‌ی‌ كاروان سه‌رای‌ له‌ ئامه‌د، جل سپی‌ پۆشیوه‌ و سه‌رپۆشی‌ سپی‌ له‌سه‌ره‌، ئه‌و چوار كوڕی‌ له‌ شاخ شه‌هید بووه‌، لێم نزیكبوه‌وه‌ و به‌ زمانی‌ كوردی‌ پێیوتم « له‌ ئامانه‌تی‌ ئاشتیدا بن». ناخ هه‌ژێن بوو، له‌پاش ئه‌و هه‌موو ئازاره‌ی‌ بۆ كوڕه‌كانی‌ چه‌شتویه‌تی‌ وته‌یه‌كی‌ جوان به‌نرخی‌ پێوتم. ئه‌م وته‌ جوانه‌م كرده‌ ناوی‌ كتێبه‌كه‌م.

پڕۆسه‌ی‌ ئۆسلۆ، له‌نێوان په‌كه‌كه‌ و ده‌وڵه‌ت
له‌ كۆتا به‌شی‌ كتێبه‌كه‌م له‌ 27ی‌ ئابی‌ 2011 نوسیم، دۆخی‌ توركیا زۆر هه‌ستیار بوو، له‌ هه‌ر ئان‌و ساتێكدا ئه‌گه‌ری‌ شه‌ڕ و هێرشێكی‌ نوێ‌ هه‌بوو. دواتر له‌ 15 ی‌ ئه‌یلولی‌ 2011 هێرشه‌كان چڕتر كرایه‌وه‌. له‌و كاته‌دا بوو كه‌ تۆماری‌ ده‌نگی‌ كۆبونه‌وه‌كانی‌ نێوان به‌رپرسانی‌ ده‌وڵه‌ت و په‌كه‌كه‌، كه‌ له‌ ئۆسلۆی‌ پایته‌ختی‌ نه‌رویج دیداریان سازكردبوو، تۆماره‌كه‌ له‌ ئه‌نته‌رنێت بڵاوكرایه‌وه‌. رایگشتی‌ شۆك بون به‌مه‌. ئه‌م رووداوه‌ زۆر ئاماژه‌م پێنه‌كردووه‌ له‌م كتێبه‌مدا، پێموابێت له‌ رووی‌ بابه‌تیانه‌وه‌ كاریگه‌ریی له‌سه‌ر ناوه‌ڕۆكی‌ كتێبه‌كه‌م نییه‌. له‌به‌رئه‌وه‌ی‌ له‌م كتێبه‌مدا ده‌مه‌وێت بڵێم:
1-له‌ ئێستادا هه‌لومه‌رجی‌ ئاشتی‌ له‌ئارادایه‌، هه‌ردوولا زۆر به‌باشی‌ درك به‌وه‌ ده‌كه‌ن.
2-هه‌ردوولا زۆر به‌باشی‌ له‌وه‌ تێگه‌یشتوون كه‌ ئیتر له‌ رێگه‌ی‌ شه‌ڕی‌ چه‌كدارییه‌وه‌ ناگه‌نه‌ هیچ ئه‌نجامێك.
3-له‌ مڕۆدا پرسی‌ كورد گرێدراوی‌ پرسی‌ په‌كه‌كه‌ بووه‌ و ناكرێت له‌یه‌ك به‌ دوو پرسی‌ جیاواز ببینرێت. چاره‌سه‌ركردنی‌ پرسی‌ په‌كه‌كه‌، ده‌كاته‌ راماڵینی‌ چه‌ك و توندوتیژی‌ له‌ پرسی‌ كورد.
4-به‌واتایه‌كیتر، تاكو پرسی‌ په‌كه‌كه‌ چاره‌سه‌ر نه‌كرێت، ئه‌وا ناتوانی رێگه‌ی‌ ئاشتیانه‌ بۆ چاره‌سه‌ریی پرسی‌ كورد بگریته‌به‌ر.
5-ده‌وڵه‌ت له‌ پاش ئه‌وه‌ی‌ واقیع و بونی‌ كوردی‌ ناساند، ده‌شبێت واقیعی‌ په‌كه‌كه‌ بناسێنێت.
6- له‌گه‌ڵ كێ‌ شه‌ڕ ده‌كه‌یت، ده‌شبێت له‌گه‌ڵ ئه‌و ئاشتی‌ بكه‌یت، واته‌ ئاشتی‌ له‌گه‌ڵ دوژمندا ده‌كرێت، بۆ ئه‌وه‌ش پێویسته‌ سه‌ره‌تا چه‌كه‌كان بێده‌نگ بكرێن، لایه‌نه‌كان له‌به‌رامبه‌ر یه‌ك له‌سه‌ر مێز گفتوگۆ بكه‌ن.
ده‌قی‌ ناوه‌ڕۆكی‌ كۆبونه‌وه‌كانی‌ به‌رپرسانی‌ ده‌وڵه‌ت- میت و په‌كه‌كه‌ له‌ كۆبونه‌وه‌كانی‌ ئۆسلۆ، له‌ تێڕوانینی‌ منه‌وه‌ نزیكه‌ بۆ پرسه‌كه‌،هاوكاتیش كۆبونه‌وه‌كانی‌ ده‌ستپێكێك بووه‌ كه‌ ده‌وڵه‌ت واقیعی‌ په‌كه‌كه‌ بناسێت.
له‌و كاته‌شدا پرسیاری‌ ئه‌وه‌شده‌كرا، ئایا ئه‌و كۆبونه‌وانه‌ی‌ نێوان په‌كه‌كه‌ و میت له‌ كوێ‌ سازكراوه‌، ئایا به‌ڕاستی‌ له‌ ئۆسلۆ بوه‌؟، یان له‌ هه‌رێمی‌ كوردستانی‌ عیراق بووه‌؟ یان له‌ شوێنێكیتر بووه‌؟ راستییه‌كه‌ی‌ نه‌ده‌زانرا.
پێده‌چوو له‌ ئۆسلۆ ئه‌نجام درابێت، به‌وه‌ی‌ له‌ تۆماری‌ شه‌شه‌می‌ كۆبونه‌وه‌كاندا ناوی‌ ئۆسلۆ هاتووه‌، له‌به‌رئه‌وه‌ له‌ سه‌ره‌تای‌ ساڵی‌ 2010، ئه‌م كۆبونه‌وانه‌م به‌ «پڕۆسه‌ی‌ ئۆسلۆ» ناوبرد.
له‌پاش رووداوه‌كه‌ی‌ خابوور، پڕۆسه‌ی‌ كرانه‌وه‌ی‌ دیموكراتی‌ كۆتایی پێهاتبوو. له‌لایه‌ن دادگای‌ ده‌ستورییه‌وه‌، ده‌ته‌په‌ داخرا. ئۆپه‌راسیۆنه‌كانی‌ كه‌جه‌كه‌ به‌شێوه‌یه‌كی‌ گشتگیر ده‌ستیپێكردبوو. تاده‌هات ده‌ستگیركراوان زیاتر ده‌بوو. له‌ به‌رامبه‌ردا په‌كه‌كه‌ هێرشێكی‌ گه‌وره‌ی‌ بۆ ناوچه‌ی‌ ره‌شادیه‌ ئه‌نجامدا. به‌ڵام له‌سه‌روو هه‌موو گرژییانه‌وه‌، پڕۆسه‌ی‌ ئۆسلۆ نه‌وه‌ستابوو و بگره‌ كۆبونه‌وه‌كان درێژه‌ی‌ هه‌بووه‌. له‌و كاته‌دا پێنجه‌م كۆبونه‌وه‌ی‌ ئۆسلۆ سازكرا. له‌به‌ر ئه‌وه‌یه‌ من له‌م دۆخه‌ی‌ ئێستادا ده‌ڵێم كاتی‌ ئاشتی‌ هاتووه‌.
له‌ پێنجه‌م كۆبونه‌وه‌ی‌ ئۆسلۆ دا، نوێنه‌رانی‌ ده‌وڵه‌تی‌ توركیا ئاماده‌ی بوون له‌وانه‌ش: هاكان فیدان یاریده‌ده‌ری‌ راوێژكاری‌ سه‌رۆكوه‌زیران و سه‌رۆكی‌ میت ی‌ ئێستایه‌. له‌ كۆبونه‌وه‌كه‌ وه‌ك نوێنه‌ری‌ ئه‌ردۆغانی‌ سه‌رۆكوه‌زیران ناوی‌ هاتووه‌. هه‌روه‌ها ئافێت گونه‌ش وه‌ك یاریده‌ده‌ری‌ سه‌رۆكی‌ میت  به‌شداربووه‌.
لایه‌نی‌ دووه‌می‌ سه‌ر مێزه‌كه‌ش به‌رپرسانی‌ په‌كه‌كه‌ دانیشتبوون له‌وانه‌ش: مسته‌فا قه‌ره‌سوو، له‌ قه‌ندیله‌وه‌ هاتبوو. هه‌روه‌ها  سه‌بری‌ ئۆك كه‌ ئه‌ندامی‌ كۆنسه‌ی‌ كه‌جه‌كه‌ و به‌رپرسی‌ په‌كه‌كه‌-یه‌ له‌ ئه‌وروپا.
سه‌بری‌ ئۆك، ناوی‌ له‌ دۆسیه‌ی‌ كه‌جه‌كه‌ هاتووه‌ كه‌ ده‌ستگیربكرێت. ئه‌وكات بڕیاری‌ ئه‌وه‌ی‌ دابوو له‌ قه‌ندیل ژیان به‌سه‌ر به‌رێت، بۆیه‌ به‌رپرسیارێتی‌ یه‌كه‌می‌ په‌كه‌كه‌ له‌ ئه‌وروپا له‌ده‌ستی‌ زوبه‌یر ئایدار بوو، یاریده‌ده‌ری‌ سه‌رۆكی‌ كۆنگره‌ی‌ گه‌ل.
ئینگلیزییه‌كی‌ باش ده‌زانێت، له‌ تۆماره‌ ده‌نگییه‌كه‌دا واده‌رده‌كه‌وت كه‌ ناو به‌ناو سه‌ردانی‌ قه‌ندیل بكات، زمانی‌ تێگه‌یشتنی‌ هه‌بوو.
هاكان فیدان، وه‌ك نوێنه‌ری‌ تایبه‌تی‌ سه‌رۆكوه‌زیران، له‌ پێنجه‌م كۆبونه‌وه‌ی‌ ئۆسلۆ به‌شداری‌ كرد، به‌مه‌ش بۆ یه‌كه‌مجار لایه‌نی‌ سیاسی‌ به‌شداری‌ كۆبونه‌وه‌كه‌ی‌ كرد.
كاتێ‌ ده‌نگی‌ تۆمارییه‌كانی‌ ئۆسلۆ له‌ ئه‌نته‌رنێت بڵاوبوه‌وه‌، منیش له‌ وتاره‌كه‌م له‌ رۆژنامه‌ی‌ میللییه‌ت به‌م جۆره‌ نوسی‌: «ده‌مه‌وێت ئه‌وه‌ بڵێم، ئاشتی‌ به‌ته‌نها له‌گه‌ڵ دوژمن ده‌كرێت. ئۆسلۆ كاره‌ ئه‌سڵه‌كه‌یه‌، كارێكی‌ راستیان ئه‌نجامداوه‌، تاكو دیدار له‌گه‌ڵ ئۆجه‌لان و په‌كه‌كه‌ نه‌كرێت ناتوانین ئاشتی‌ ده‌سته‌به‌ربكه‌ین. دواجار ئه‌ردۆغانی‌ سه‌رۆكوه‌زیر، كارێكی‌ ئیجابی‌ كرد به‌وه‌ی‌ پڕۆسه‌ی‌ ئۆسلۆی‌ ده‌ستپێكرد، ده‌شێ‌ بڵێین ئیراده‌ی‌ سیاسی‌ ته‌واوی‌ نیشانداوه‌، به‌داخه‌وه‌ له‌ئێستادا ره‌وشه‌كه‌ خراپتر بوه‌و هه‌وڵی‌ شه‌ڕ ده‌درێت. له‌كاتێكدا ئه‌گه‌ر زۆره‌ له‌ئاینده‌یه‌كی‌ نزیكدا پڕۆسه‌یه‌كیتر له‌شێوه‌ی‌ ئۆسلۆ بێته‌ئاراوه‌، گرنگ ئه‌وه‌یه‌ رێگای‌ ئاشتی‌ به‌زووترین كات بگرێته‌به‌ر و فرمێسك و خوێنڕشتن كه‌م بكرێته‌وه‌» .
ئه‌م دێڕانه‌م له‌به‌رواری‌ 15 ی‌ ئه‌یلول نوسی‌. تاده‌هات هه‌واڵی‌ ناخۆش ده‌هات. ده‌نگۆی‌ ئۆپه‌راسیۆنی‌ زه‌مینی‌ بۆ سه‌ر ناوچه‌كانی‌ باكووری‌ عیراق هه‌بوو. له‌لایه‌كیتره‌وه‌ هێرشه‌كانی‌ په‌كه‌كه‌ بۆ سه‌ر توركیا روو له‌زیادبون بوو. باشه‌ بۆچی‌؟
ئه‌گه‌ر له‌ ئه‌نجامدا تاكه‌ چاره‌سه‌ر هه‌ر گه‌ڕانه‌وه‌ بۆ سه‌ر مێزی‌ گفتوگۆ بێت، وه‌ك ئه‌وه‌ی‌ له‌ ئۆسلۆ رویدا، باشه‌ ئیتر بۆچی‌ توندوتیژیی و ئازاره‌كانمان زیاتر ده‌كه‌ن؟ یان له‌به‌ر ئه‌وه‌ بوو كه‌ ده‌وڵه‌ت دركی‌ به‌وه‌ كرد په‌كه‌كه‌ به‌هێزه‌ بۆیه‌ ناچار بوو له‌سه‌ر مێزی‌ گفتوگۆ دابنیشێت؟ یان په‌كه‌كه‌ له‌پاش ئه‌وه‌ی‌ زانی‌ ده‌وڵه‌ت گورزێكی‌ كوشنده‌ی‌ لێداوه‌ ئه‌وجا قایل بوو له‌سه‌ر مێزی‌ گفتوگۆ دابنیشێت؟ یاخود هه‌ردوولایان هیچ ئومێدێكیان نه‌ماوه‌؟ هه‌روه‌ك چۆن ئۆجه‌لان له‌ ته‌مموزی‌ 2011 له‌ رێگه‌ی‌ پارێزه‌ره‌كه‌یه‌وه‌ په‌یامێكی‌ بڵاوكرده‌وه‌ كه‌ وتبوی‌ «شه‌ڕێكی‌ قورس به‌ڕێوه‌یه‌».

به‌شێك له‌ده‌قی‌ كۆبونه‌وه‌كانی‌ ئۆسلۆ
*نێوه‌ندگیر: ئامانج له‌م كۆبونه‌وه‌یه‌ له‌به‌رئه‌وه‌یه‌ رووداوه‌كانی‌ رابردوو رویانداوه‌ دووباره‌ نه‌بنه‌وه‌و بۆ ئه‌و ئامانجه‌یه‌ كه‌ له‌داهاتوودا چی‌ بكه‌ین، ده‌مه‌وێت ئه‌وه‌ دووپاتبكه‌مه‌وه‌ ، ئه‌م كۆبونه‌وه‌یه‌ به‌ده‌ستپێشكه‌ریی ئێمه‌ بووه‌، لایه‌نی‌ تورك و لایه‌نی‌ كوردیش ره‌زامه‌ندییان له‌ گفتوگۆكردن پیشانداوه‌، ئێمه‌ جه‌خت له‌ دوو شت ده‌كه‌ینه‌وه‌، رونكردنه‌وه‌كانی‌ به‌ رایگشتی‌ ده‌درێت و میكانیزمی‌ پشتی‌ په‌رده‌وه‌. ئێمه‌ به‌ میت و ده‌وڵه‌تمان وتوه‌ كه‌ ئه‌مه‌ بۆ ئێوه‌ ریسكێكه‌، به‌وه‌ی‌ ئه‌گه‌ر بزانرێت له‌گه‌ڵ په‌كه‌كه‌ له‌سه‌ر مێزی‌ گفتوگۆ دانیشتوون، ئه‌وا جه‌هه‌په‌ و مه‌هه‌په‌ هه‌را ئه‌نێنه‌وه‌. یاخود به‌وه‌ بزانن كه‌ په‌یامه‌كانی‌ ئۆجه‌لان بۆ قه‌ندیل.

*ئافێت گونه‌ش: سه‌ره‌تا سوپاسی‌ ئه‌وانه‌ ده‌كه‌م كه‌ ده‌ستپێشكه‌ریی ئه‌وه‌ی‌ كرد هه‌ردوولامان له‌سه‌ر مێزی‌ گفتوگۆ دابنیشین. پێموایه‌ هه‌ردوولامان ئه‌وه‌ باش ده‌زانین كه‌ كار و هه‌وڵێكی‌ دورودرێژی‌ ده‌وێت. له‌وانه‌ش رووداوی‌ نه‌خوازراو له‌م سه‌روبه‌نده‌دا رووبدات ، به‌ڵام گرنگ ئه‌وه‌یه‌ به‌ ئامانجێك بگه‌ین. ئێمه‌ له‌گه‌ڵ لایه‌نێكی‌ ده‌وڵه‌ت  قایل كرد به‌وه‌ی‌ ئه‌م كۆبونه‌وانه‌ ئه‌نجامبده‌ین، دواتریش قه‌ناعه‌تمان پێكردن كه‌ ئیمراڵی‌ بێته‌ ناو مه‌سه‌له‌كه‌وه‌. له‌وانه‌یه‌ جاربه‌جار كێشه‌ی‌ بێمتمانه‌یی دروست ببێت، به‌ڵام به‌پێی‌ كات ئیراده‌ی‌ سیاسی‌ زیاتر له‌م پلاتفۆڕمه‌دا به‌شداریی ده‌كات. ئه‌وه‌تا به‌ڕێز هاكان فیدان به‌شداریی ئه‌م كۆبونه‌وه‌ی‌ كردووه‌.
*هاكان فیدان: سه‌ره‌تا سڵاوتان لێده‌كه‌م. خۆشحاڵ بووم به‌ناسینتان. من ئه‌ندامێكی‌ نوێی‌ ئه‌م ده‌سته‌یه‌م. وه‌ك خاتوو ئافه‌ت ئاماژه‌ی‌ پێكرد، پێش مانگێك به‌ر له‌ ئێستا له‌ ئیمڕاڵی‌ چاوم به‌ به‌ڕێز ئۆجه‌لان كه‌وت. من هاكان فیدانم، یاریده‌ده‌ری‌ راوێژكار و وه‌ك نوێنه‌ری‌ به‌ڕێز ئه‌ردۆغان لێره‌م. لێره‌وه‌ سوپاس و پێزانینی‌ خۆم ئاڕاسته‌ی‌ هاوڕێیانم ده‌كه‌م كه‌ توانیویانه‌ زنجیره‌یه‌ك كۆبونه‌وه‌ ئه‌نجام بده‌ن. به‌ڕێز سه‌رۆكوه‌زیران منی‌ راسپاردووه‌ كه‌ ئه‌ك كۆبونه‌وانه‌ چوارچێوه‌یه‌كی‌ یاسایی وه‌ربگرێت و رێچكه‌یه‌كی‌ نوێ‌ ته‌كنیكی‌ وه‌ربگرێت. دۆخی‌ توركیا و رۆژهه‌ڵاتی‌ ناوه‌ڕاست زۆر ئاڵۆزه‌، له‌ توركیاش هه‌ندێ‌ له‌ ئه‌ندامانی‌ حكومه‌ت نیگه‌رانن و هه‌روه‌ها ئۆپۆزسیۆنیش ئاره‌زووی‌ پڕۆسه‌یه‌ك ئاشتی‌ ناكه‌ن. 
پێش ماوه‌یه‌ك به‌ر له‌ئێستا سه‌ردانی‌ ئیمڕاڵیم كردوو بۆ ماوه‌ی‌ دوو كاتژمێر له‌ ژووره‌كه‌ی‌ به‌ڕێز ئۆجه‌لان گفتوگۆم له‌گه‌ڵ به‌ڕێزیان كرد، دیدارێكی‌ ئیجابی‌ بوو، دۆخی‌ ته‌ندروستی‌ ئه‌و زۆر باش بوو. مێشكی‌ زۆر به‌باشی‌ ئیشده‌كات و بیروبۆچونی‌ باشی‌ هه‌یه‌. ده‌توانم بڵێم حكومه‌تی‌ ئاك پارتی‌ و به‌ڕێز ئه‌ردۆغان نییه‌تێكی‌ زۆر جدی‌ هه‌یه‌ له‌م پڕۆسه‌یه‌دا. به‌ڕێز سه‌رۆكوه‌زیر منی‌ وه‌ك نوێنه‌ری‌ خۆی‌ بۆ ئه‌م كۆبونه‌وه‌یه‌ ناردووه‌. دووباره‌ سوپاستان ده‌كه‌م.
*سه‌بری‌ ئۆك: خۆشبن و زۆر سوپاس. بۆئه‌وه‌ی‌ به‌رچاومان زیاتر روون بێت ده‌مه‌وێت پرسیار بكه‌م. ئێوه‌ له‌گه‌ڵ به‌ڕێز سه‌رۆك ئاپۆ چاوپێكه‌وتنتان ئه‌نجامداوه‌، وه‌ك خۆتان ئاماژه‌تان پێدا، به‌ گرنگییه‌وه‌ ده‌ڕوانێته‌ ئه‌م كۆبونه‌وانه‌، به‌ڵام ئێمه‌ ناوه‌ڕۆكی‌ ئه‌و كۆبونه‌وه‌یه‌ی‌ به‌ڕێز ئاپۆ له‌گه‌ڵ ئێوه‌ نازانین، ئه‌و نامه‌یه‌ی‌ بۆ ئێمه‌ی‌ نوسیوه‌ زۆر كورت و پوخته‌ و رونكردنه‌وه‌ی‌ پێویستی‌ تیانییه‌. ئه‌گه‌ر شتێكتان هه‌یه‌ ده‌رباره‌ی‌ ناوه‌ڕۆكی‌ ئه‌و كۆبونه‌وه‌ ئه‌وا ده‌كرێ باسی‌ بكه‌ن.
*هاكان فیدان: بێگومان، ته‌واوی‌ گفتوگۆكه‌مان له‌ده‌فته‌ری‌ تێبینییه‌كانمدا نوسییه‌وه‌، به‌ڵام ئێستا ئه‌و ده‌فته‌ره‌م پێنییه‌، به‌ڵام سه‌ردێڕی‌ بابه‌ته‌ گرنگه‌كانی‌ باسمان كردووه‌ له‌بیرمه‌، له‌ راستیدا ساڵانێكه‌ به‌دواداچوون له‌سه‌ر پرسی‌ كورد ده‌كه‌م، له‌ كوێوه‌ سه‌رچاوه‌ی‌ گرتووه‌، ئاسته‌كانی‌ پرسه‌كه‌، له‌ رووی‌ سیاسی‌ و قۆناغه‌كانییه‌وه‌. ساڵانێكه‌ رووداوی‌ ناخۆش رویداوه‌، ئێستاش به‌ تێڕوانینكی‌ جوداوه‌ ده‌مانه‌وێت هه‌ڵسه‌نگاندن بۆ پرسه‌كه‌ بكه‌ین، پێموابێت ده‌رسمان له‌ رابردوو وه‌رگرتووه‌، ده‌شێ‌ چاره‌سه‌رێك بدۆزینه‌وه‌ كه‌ بۆ هه‌لومه‌رجی‌ ئه‌مڕۆی‌ توركیا و ناوچه‌كه‌ بگونجێت. له‌و چاوپێكه‌وتنه‌م له‌گه‌ڵ به‌ڕێز ئۆجه‌لان، له‌ڕاستیدا زۆر ئیجابیانه‌ بوو، له‌وێ‌ به‌ به‌ڕێز ئۆجه‌لانم وت له‌ئێستادا و له‌م هه‌لومه‌رجه‌ی‌ توركیا، ئه‌رۆدغانی‌ سه‌رۆكوه‌زیر ناتوانێ به‌ئاشكرا به‌ رایگشتی‌ بڵێت ئه‌وا پڕۆسه‌یه‌كی‌ نوێ‌ راده‌گه‌ینم . هه‌مووشمان ئه‌وه‌ ده‌زانین كه‌ ئه‌م كۆبونه‌وانه‌ له‌گه‌ڵ ئێوه‌ ئیجابیانه‌یه‌ و به‌ئامانجێكی‌ باش و به‌ به‌شداری‌ و هاوكاری‌ ئێوه‌ ده‌مانه‌وێت پڕۆسه‌كه‌ سه‌ربخه‌ین. من به‌ڕوونی‌ باسی‌ هه‌موو بابه‌ته‌كانم له‌گه‌ڵ به‌ڕێز ئۆجه‌لان كرد، ئه‌ویش تێڕوانین و ئومێدی‌ ئاشته‌وایی هه‌بوو.
*مسته‌فا قه‌ره‌سو: هه‌روه‌ك هه‌ڤاڵ سه‌بری‌ ئاماژه‌ی‌ پێكرد، ئێمه‌ له‌ كۆبونه‌وه‌ی‌ یه‌كه‌م و دووه‌ممان هیچ باسمان له‌ ناوه‌ڕۆك نه‌كردوه‌، پێمان وایه‌ ئیتر بچینه‌ ناو ورده‌كارییه‌وه‌. ئه‌وه‌تا تادێت متمانه‌مان زیاتر ده‌بێت، ئێمه‌ ئاگربه‌ستمان راگه‌یاندووه‌و هیچ چالاكییه‌كمان نه‌بووه‌، باس له‌وه‌ ده‌كرێت كه‌ توركیا هه‌ندێ‌ هه‌نگاو بۆ چاره‌سه‌ری‌ پرسی‌ كورد ده‌نێت، به‌ڵام تائێستا هه‌ر قسه‌ بووه‌و هیچ كردارێكمان نه‌بینیوه‌، وابڕیار بوو له‌ چواره‌م كۆبونه‌وه‌ی‌ ئۆسلۆدا، نه‌خشه‌ڕێگه‌كه‌ی‌ سه‌رۆك ئاپۆ رێككه‌وتنی‌ له‌سه‌ر بكرێت، ئێستاش له‌ پێنجه‌م كۆبونه‌وه‌ی‌ ئۆسلۆدا چاوه‌ڕێین بگه‌ینه‌ رێككه‌وتنێك.
*ئافێت گونه‌ش: منیش ده‌ڵێم باشه‌، ئه‌وه‌تا مادده‌كانی‌ نه‌خشه‌ڕێگای‌ سه‌رۆكه‌كه‌تان له‌به‌رده‌ستمدایه‌، فه‌رموون با رێككه‌وتنی‌ له‌سه‌ر بكه‌ین.
مسته‌فا قه‌ره‌سو: من له‌و باوه‌ڕه‌دام ده‌وڵه‌ت رێككه‌وتن بكات، ئه‌وا ئێمه‌ ئاماده‌ین به‌ فڕۆكه‌كه‌ی‌ ئێوه‌ بێین.
*ئافێت گونه‌ش: بێگومان، منیش ده‌ڵێم فه‌رموون وه‌رن با بڕۆین.
*مسته‌فا قه‌ره‌سوو: ئه‌گه‌ر بتانه‌وێت ده‌توانن ئێمه‌ ببه‌ن.
*ئافێت گونه‌ش: بێگومان ده‌توانم بتانبه‌م، هه‌ر ئێستا ده‌توانین بڕۆین و هیچ كێشه‌یه‌ك نییه‌.
*مسته‌فا قه‌ره‌سوو: كه‌واته‌ كێشه‌یه‌ك نابێت ئه‌گه‌ر ئێمه‌ چاومان به‌ رێبه‌ر ئاپۆ بكه‌وێت.
*سه‌بری‌ ئۆك: ده‌وترێت ده‌رباره‌ی‌ من دۆسیه‌ی‌ یاسایی كراوه‌ته‌وه‌، له‌لایه‌ن دۆسیه‌كه‌م دائه‌خه‌ن و له‌لایه‌كیتر ده‌یكه‌نه‌وه‌.
*ئافێت گونه‌ش: ئه‌وه‌ هه‌ر ده‌وترێت، بۆ ئه‌وه‌ی‌ دۆسیه‌كه‌ ته‌واوبكه‌ن
*مسته‌فا قه‌ره‌سو: دۆسیه‌ی‌ یاسایی له‌سه‌ر هه‌ڤاڵ سه‌بری‌ كراوه‌ته‌وه‌، ده‌توانین ئێستا هه‌ڤاڵ سه‌بری‌ له‌گه‌ڵ خۆمان به‌رین؟
*سه‌بری‌ ئۆك: قه‌ره‌سوو ده‌نێرین.
*ئافێت گونه‌ش: قه‌ره‌سوو بۆ ئێمه‌ ته‌واوه‌.
*مسه‌ته‌فا قه‌ره‌سو: ئێوه‌ نیگه‌ران مه‌بن به‌وه‌ی‌ ئێمه‌ و به‌ده‌په‌، رێبه‌ر ئاپۆ به‌لایه‌نی‌ سه‌ره‌كی‌ بۆ رێككه‌وتن داده‌نێین، بگره‌ رێبه‌ر ئاپۆ بۆ رێككه‌وتن بۆ توركیا باشتره‌ و له‌به‌رژه‌وه‌ندی‌ ئێوه‌دایه‌. له‌به‌رژه‌وه‌ندی‌ توركیایه‌ ئه‌گه‌ر بێت و كۆمه‌ڵگه‌ی‌ توركیا رێبه‌ر ئۆجه‌لان وه‌ك لایه‌نی‌ سه‌ره‌كی‌ رێككه‌وتن ببینن. ئه‌وه‌تا خۆتان دان به‌وه‌دا ده‌نێن كه‌ رێبه‌ر ئاپۆ پێشنیاره‌كانی‌ په‌سه‌نده‌ و جێی‌ ره‌زامه‌ندی‌ ئێوه‌یه‌. ئیچمه‌ش پێمانوایه‌ كه‌ رێبه‌ره‌كه‌مان رێگای‌ راست ده‌زانێت و ده‌شێ‌ ئێوه‌ رێككه‌وتنی‌ له‌گه‌ڵدا بكه‌ن.
*ئه‌فێت گونه‌ش: به‌ڵێ‌ راسته‌، له‌به‌رئه‌وه‌ی‌ جه‌خت له‌ گۆڕانكاری‌ ده‌كاته‌وه‌. ده‌وڵه‌ت له‌ ئێستادا داواكارییه‌كانی‌ گه‌لی‌ كورد له‌سه‌ر مێز داناوه‌و گفتوگۆی‌ له‌سه‌ر ده‌كات. 
*سه‌بری‌ ئۆك: باشه‌ ده‌كرێ‌ له‌گه‌ڵ خۆماندا ئه‌و داواكارییانه‌ش ببیه‌ن و گفتوگۆی‌ له‌سه‌ر بكه‌ین.
*مسته‌فا قه‌ره‌سو: ئێوه‌ ده‌تانه‌وێ‌ بڵێن ده‌وڵه‌ت و سه‌رۆكی‌ سوپا و ته‌نانه‌ت حكومه‌تیش هه‌مان بیروبۆچونیان یه‌كه‌. له‌ كۆبونه‌وه‌كانی‌ پێشووتر ئه‌وه‌تان نه‌وتوه‌، واته‌ ئه‌مه‌ شتێكی‌ نوێیه‌.
*ئافێت گونه‌ش: له‌ئێستادا هیچ پیلانێكی‌ ئۆپه‌راسیۆن له‌ رۆژه‌ڤی‌ سوپادا نییه‌.
*سه‌بری‌ ئۆك: ئێوه‌ش باش ده‌زانن هه‌ندێ‌ له‌ فه‌رمانده‌ سه‌ربازییه‌كانی‌ ناوچه‌كه‌، به‌رده‌وام خواستی‌ شه‌ڕیان هه‌یه‌، به‌ڵام به‌شێوه‌یه‌كی‌ گشتی‌ فه‌رمانده‌كانی‌ ناو سوپا له‌گه‌ڵ چاره‌سه‌ریی و ئاشتیدان.  
*ئافێت گونه‌ش: له‌ئێستادا پرۆسه‌یه‌ك له‌ ئارادا هه‌یه‌ و به‌باشی‌ به‌ڕێوه‌ده‌چێت، ئه‌مه‌ش له‌ ئه‌نجامی‌ هه‌وڵ و لێكۆڵینه‌وه‌یه‌كی‌ زۆر توانیمان پڕۆسه‌یه‌كی‌ جدی‌ وا ده‌ستپێبكه‌ین.  جارێ‌ راپۆرتی‌ كۆتاییمان ئاماده‌نه‌كردووه‌، به‌ڵام كه‌س بۆی‌ نییه‌ ئه‌م پڕۆسه‌یه‌ به‌هه‌نگاوێكی‌ بچوك ناو ببات، له‌به‌رئه‌وه‌ی‌ ئێمه‌ توانیومانه‌ به‌شیك له‌رایشگی‌ توركیا بۆ ئه‌م پڕۆسه‌یه‌ ئاماده‌بكه‌ین و له‌ پارله‌مانیش گفتوگۆی‌ له‌سه‌ر بكه‌ین. ده‌وڵه‌ت ده‌رفه‌تێكی‌ باشی‌ ره‌خساندووه‌ به‌وه‌ی‌ له‌گه‌ڵ ئێوه‌ له‌سه‌ر مێزی‌ گفتوگۆ دانیشتوه‌و ئاڵوگۆڕی‌ بیروڕاكان ده‌كات.
*سه‌بری‌ ئۆك: به‌گرنگی‌ ده‌زانین به‌ڵام ئه‌مه‌ش هه‌موو مانایه‌ك ناگه‌یه‌نێت.
*ئافێت گونه‌ش: پڕۆسه‌ی‌ خابوور، دوو ساڵ و نیو كارمان بۆ كرد، به‌ڵام جێی‌ نیگه‌رانی‌ ئه‌نقه‌ره‌ بوو و كۆتایی پێهات. ئه‌وانه‌ی‌ گه‌ڕانه‌وه‌ بۆ ناو خاكی‌ توركیا بێ‌ ئاگا بوون له‌به‌رچی‌ ده‌گه‌ڕێنه‌وه‌، به‌ ته‌واوی‌ خوێندنه‌وه‌یان بۆ پڕۆسه‌كه‌ نه‌بوو. پڕۆسه‌كه‌یان كرده‌ نمایشێكی‌ سیاسی‌. پێشێلی‌ سیاسی‌ كراو ئه‌و ئامانج و گفته‌ی‌ باس كرابوو له‌گه‌ڵ ئێوه‌دا، به‌پێچه‌وانه‌ی‌ ئه‌وه‌ هاته‌ئاراوه‌. مه‌سه‌له‌كه‌ ده‌ستگیركردنی‌ ئه‌و كه‌سانه‌ نه‌بوو.
*سه‌بری‌ ئۆك: ئیچوه‌ش باش ده‌زانن كه‌ بڕیار وابوو ئه‌وانه‌ ده‌ستگیر نه‌كرێن.
*ئافێت گونه‌ش: به‌ڵێ‌ ده‌زانین به‌ڵام..
*سه‌بری‌ ئۆك: ئێمه‌ش كێشه‌مان هه‌یه‌ كه‌ چۆن ئه‌مه‌ بۆ لایه‌نگرانمان رونبكه‌ینه‌وه‌. ناشتوانین هه‌موو شتێك ئاشكرا بكه‌ین.
*هاكان فیدان:  ئێستا سه‌رۆكوه‌زیران ئه‌و مه‌سه‌له‌یه‌ زۆر به‌هه‌ستارانه‌ مامه‌ڵه‌ی‌ له‌گه‌ڵ ده‌كات. ئه‌وه‌تا له‌ پارله‌مان و له‌ میتینگه‌ جه‌كاوه‌رییه‌كاندا به‌ ئاشكرا وتی‌ من له‌پشت پڕۆسه‌ی‌ ئاشتییه‌وه‌ ده‌وه‌ستم و ریسكێكی‌ سیاسی‌ ده‌گرمه‌به‌ر ئه‌گه‌ر كۆتایی به‌ژیانی‌ سیاسیشم بهێنێت.
لێره‌دا سه‌رۆكوه‌زیران ده‌یه‌وێ‌ په‌یامێك به‌ لایه‌نگران و ئه‌ندامانی‌ پارته‌كه‌ی‌ بدات، ده‌ڵێ‌ من پڕۆسه‌ی‌ ئاشتی‌ ده‌ستپێده‌كه‌م و ئێوه‌ش روبه‌ڕووم مه‌بنه‌وه‌و هاوكاری‌ سه‌رخستنی‌ بكه‌ن. ئه‌مه‌ ترسی‌ له‌ده‌ستدانی‌ ده‌نگه‌كانی‌ هه‌بوو، هاوكاتیش تاده‌هات ده‌نگی‌ ناڕه‌زایی له‌لایه‌ن به‌ره‌ی‌ ئۆپۆزسیۆنه‌وه‌ زیاتر ده‌بوو. لای‌ رایگشتی‌ تێڕوانینێك دروستبووه‌و پێیان وایه‌ په‌كه‌كه‌ هیچ كاتێك چه‌ك دانانێت. لێره‌دا فاكتۆری‌ سه‌ره‌كی‌ ئه‌وه‌یه‌ كه‌ به‌شێوه‌یه‌كی‌ دیار وه‌ك سیمبولێك په‌كه‌كه‌ چه‌ك دابنێت. ئه‌وه‌تا سه‌رۆكوه‌زیران به‌ به‌رده‌وامی‌ په‌یامی‌ ئه‌وه‌ ده‌دات. منیش ئه‌م بابه‌ته‌م له‌گه‌ڵ به‌ڕێز ئۆجه‌لان باس كردووه‌ و وتم، سه‌رۆكوه‌زیران چاوه‌ڕێی‌ ئه‌وه‌ كات په‌كه‌كه‌ چه‌ك دابنێت، ئه‌وه‌تا حكومه‌تیش چه‌ند رێفۆرمێك ده‌كات. به‌تایبه‌ت له‌ماوه‌ی‌ پێنج شه‌ش ساڵدا ده‌رباره‌ی‌ ناساندنی‌ پێناسی‌ كورد و مافه‌ كه‌لتورییه‌كان هه‌نگاوی‌ ناوه‌، ئه‌گه‌ر ئێمه‌ پێشتر گفتوگۆ و رێككه‌وتنمان له‌سه‌ر ئه‌وانه‌ بكردبایه‌، ئه‌وا له‌مڕۆدا ئه‌وانه‌ی‌ قه‌ندیل له‌ شار ده‌بوون و سیاسه‌تی‌ خۆیان له‌رێگه‌ی‌ یاساییه‌وه‌ ده‌كرد. به‌ڵام هه‌لومه‌رجی‌ توركیا له‌ رابردوودا بۆ ئه‌وه‌ له‌بار نه‌بووه‌. ئێستاش ئامانجی‌ ئێمه‌ له‌گه‌ڵ ئێوه‌و به‌ڕێز ئۆجه‌لان بۆ ئه‌وه‌یه‌ كه‌ پڕۆسه‌یه‌كی‌ درێژخایه‌ن به‌رده‌وامبین تا ده‌گه‌ینه‌ ئه‌نجام.
*هاكان فیدان: كۆمه‌ڵگای‌ ئێمه‌ فێره‌ كه‌ كه‌سێكی‌ به‌توانای‌ ده‌ستبكه‌وێت به‌دوایدا بچێت و ئه‌ركی‌ پێڕاسپێرێت.
*سه‌بری‌ ئۆك: هه‌موو فشاره‌كان له‌سه‌ر به‌ڕێز سه‌رۆك ئاپۆیه‌، هه‌م ئێوه‌و هه‌م ده‌وڵه‌تیش فشار بۆ ده‌بات.
*هاكان فیدان: ئیراده‌ی‌ سیاسی‌ ئێمه‌ و تێڕوانیی‌ ده‌وڵه‌تیش، هه‌مان شته‌. ده‌توانی هه‌موو رێگرییه‌كان ببڕین.
*ئافێك گونه‌ش: ده‌زانین كه‌ خۆتان له‌ شاره‌كاندا به‌باشی‌ رێكخستووه‌و بۆمبی‌ زۆرتان دابین كردووه‌.
*سه‌بری‌ ئۆك: نه‌خێر
*ئافێك گونه‌ش: هه‌مووی‌ ده‌زانین.
*سه‌بری‌ ئۆك: ئه‌وه‌ به‌لایه‌ك، ئێمه‌ ئه‌و پڕۆسه‌یه‌ به‌رده‌وامی‌ پێبده‌ین گرنگ ئه‌وه‌یه‌.
*ئافێت گونه‌ش: به‌پێی‌ ئه‌و شتانه‌  گران به‌ڕێوه‌ ده‌ڕوات، ئه‌وانه‌ روونه‌دات باشتر ده‌بێت.
*هاكان فیدان: مه‌سه‌له‌ی‌ تاكتیك ئه‌گه‌ری‌ هه‌یه‌ له‌ئارادا بێت له‌لایه‌نێكه‌وه‌، ده‌تواننی مێزی‌ قه‌یران پێكبهێنین له‌نێوانمان هه‌ندێكجاریش چاوپۆشی‌ له‌ هه‌ڵه‌كان ده‌كرێت، گرنگ ئه‌وه‌یه‌ درێژه‌ به‌ ستراتیژی‌ خۆمان بده‌ین.
 *نێوه‌ندگیر: پێده‌چێت له‌ماوه‌یه‌كی‌ كورتدا ئه‌وه‌ بكرێ، له‌به‌رئه‌وه‌ی‌ پێویسته‌ ئێمه‌ بچینه‌ ئه‌نقه‌ره‌ و بچینه‌ شاخ، كۆبونه‌وه‌ی‌ شه‌شه‌می‌ ئۆسلۆ رێكبخه‌ین له‌و نێوه‌نده‌شدا ئێوه‌ خۆتان بۆ دانیشتنی‌ داهاتوو ئاماده‌بكه‌ن.
*نێوه‌ندگیر: زۆر باشه‌، ده‌مه‌وێت ده‌ستخۆشی‌ له‌ هه‌ردوولا بكه‌م.واده‌بینرێت هه‌موو گڵۆپه‌كانی‌ پڕۆسه‌كه‌ سه‌زو داگیرساون. دڵخۆشین به‌وه‌ی‌ هه‌ردوولا هاوڕان له‌سه‌ر ئه‌وه‌ی‌ ئاگربه‌ست درێژه‌ی‌ هه‌بێت. ئه‌مه‌ زۆر گرنگه‌ به‌وه‌ی‌ ده‌رفه‌ت ده‌دات زه‌مینه‌سازی‌ بۆ رێككه‌وتنی‌ سیاسی‌ خۆش بكات و بگه‌ینه‌ چاره‌سه‌ری‌ ئاشتییانه‌.
*ئافێت گونه‌ش: ئاره‌زوو ده‌كه‌ین جه‌نابیان له‌ ئه‌نقه‌ره‌ ببینین. چونكه‌ به‌لایه‌نی‌ كه‌مه‌وه‌ نامه‌كان ده‌گه‌یه‌نێت.
*نێوه‌ندگیر: سوپاستان ده‌كه‌م. ئێمه‌تان دڵخۆش كرد. ده‌بێت بچینه‌ شاخ و زۆر سوپاس.   
دانپانانی‌ سه‌رۆكی‌ فه‌رمانده‌ی‌ پێشوو ئیشك كۆشه‌نه‌ر!
پرسی‌ سه‌رباز له‌ توركیا چییه‌؟ پرسی‌ كورد چییه‌؟ بۆچی‌ ده‌وترێت پێكهاته‌ی‌ سوپا له‌ناو ده‌وڵه‌تدا وه‌ك ده‌وڵه‌تێك وایه‌؟ بۆچی‌ ساڵانێكی‌ زۆره‌ سوپا له‌م وڵاته‌ قسه‌ڕۆشتوو و زیهنییه‌ت نه‌گۆڕه‌؟ بۆچی‌ سوپا ده‌ڵێت ده‌سه‌ڵاتی‌ مه‌ده‌نی‌ بۆی‌ نییه‌ لێپرسینه‌وه‌ له‌گه‌ڵ ئێمه‌دا بكات؟ بۆچی‌ سوپا له‌ كۆمه‌ڵگه‌ دابڕاوه‌؟
وه‌ڵامی‌ هه‌موو ئه‌م پرسیارانه‌ له‌ فه‌رمانده‌ی‌ پێشووی‌ توركیا ئیشك كۆشه‌نه‌ر وه‌ ده‌بیستین كاتێ‌ سه‌رۆكی‌ فه‌رمانده‌ی‌ سوپا ده‌بێت قسه‌ له‌سه‌ر ئه‌مانه‌ ده‌كات.
له‌ ئابی‌ 2011، تۆمارێكی‌ ده‌نگی‌ ئیشك كۆشه‌نه‌ر، سه‌رۆكی‌ فه‌رمانده‌ی‌ گشتی‌ سوپا، له‌ سایتی (www.dailymotion.com)  بڵاوكرایه‌وه‌. كۆشه‌نه‌ر له‌ ئابی‌ 2010 بوه‌ سه‌رۆكی‌ فه‌رمانده‌. له‌ كۆتا به‌شی‌ ئه‌م كتێبه‌مدا ئاماژه‌ به‌ وته‌كانی‌ ده‌نگی‌ تۆمارییه‌كه‌ی‌ كۆشه‌نه‌ر وه‌ك خۆی‌ ده‌كه‌م.

مین ده‌چێنین، به‌بێ‌ ئاگاداركردنه‌وه‌ی‌ خه‌ڵكی‌ مه‌ده‌نی‌ !
ئیشك كۆشه‌نه‌ر: له‌چوارده‌وری‌ بنكه‌ سه‌ربازییه‌كانمان و له‌ سه‌رسنوره‌كان، به‌بێ‌ به‌رنامه‌ مین ده‌چێنین، به‌ خه‌ڵكی‌ مه‌ده‌نی‌ ناڵێین. ته‌نانه‌ت ئه‌و مینانه‌ی‌ له‌ سنوره‌كان ده‌یچێنین هیچ نیشانه‌یه‌كی‌ بۆ دانانێین. كاتێ‌ به‌ كه‌سێكدا ده‌ته‌قێته‌وه‌، ئێمه‌ بێ‌ ئاگاین له‌وه‌. ده‌سته‌یه‌كمان له‌ ئه‌نقه‌ره‌وه‌ ناردووه‌ تا بزانین مین ماوه‌ یان هه‌یه‌؟
ئه‌فسه‌رێك: مین چاندن درێژه‌ی‌ هه‌یه‌ گه‌وره‌م.
ئیشك كۆشه‌نه‌ر: پێده‌چێت به‌رده‌وامی‌ هه‌بێت.
ئه‌فسه‌ر: به‌رده‌وامی‌ هه‌یه‌.
ئیشك كۆشه‌نه‌ر: ئه‌وه‌ كارێكی‌ مه‌ترسیداره‌، كێ‌ كاره‌كه‌ی‌ كردووه‌ ئێمه‌؟
ئه‌فسه‌ر: به‌ڵێ‌ گه‌وره‌م.
ئیشك كۆشه‌نه‌ر: ئه‌گه‌ر بێت و من ئێستا به‌ به‌رپرسان بڵێم پێش 10 ساڵ به‌ر له‌ ئێستا یه‌كه‌كانی‌ ئێمه‌ ئه‌و مینانه‌یان چاندووه‌ و چیم پێده‌ڵێن؟ به‌داخه‌وه‌ كه‌ ئێمه‌ ئه‌و مینه‌ ئه‌چێنین
ئه‌فسه‌ر: به‌ڵێ‌ گه‌وره‌م
ئیشك كۆشه‌نه‌ر: چه‌ند خاڵێك هه‌یه‌ كه‌ سه‌رنجی‌ منی‌ راكێشاوه‌. هه‌ندێ له‌ فه‌رمانده‌كانی‌ ناوچه‌كه‌ سه‌ربه‌خۆیانه‌ ده‌جوڵێنه‌وه‌و گوێڕایه‌ڵی‌ فه‌رمانه‌كان نین، پێویسته‌ ئه‌و ئۆپه‌راسیۆنانه‌ی‌ له‌ناوچه‌كه‌ ده‌كرێت له‌ئه‌ستۆی‌ یه‌ك فه‌رمانده‌ بێت ئه‌ویش فه‌رمانده‌ی‌ ئه‌و ناوچه‌یه‌یه‌.
یه‌كه‌ بچوكه‌كانمان زۆر لاوازن و به‌پێی‌ پێویست مه‌شقیان پێنه‌كراوه‌. ئێمه‌ له‌رێگه‌ی‌ فڕۆكه‌ی‌ بێ فڕۆكه‌وانه‌وه‌ ده‌ستبه‌جێ‌ وێنای‌ هه‌موو جوڵه‌یه‌ك له‌ ناوچه‌كه‌ ده‌بینین.
له‌كاتی‌ شه‌ڕ و روبه‌ڕووبونه‌وه‌دا، سه‌ربازه‌كانمان سه‌نگه‌ره‌كانیان به‌جێ‌ ده‌هێڵن و چه‌كه‌كانیش به‌جێده‌هێڵن. ئه‌گه‌ر وابڕوات چۆن وڵات رزگار بكه‌ین.
كۆشه‌نه‌ر: شه‌رمه‌زارییه‌ كه‌ دوو تیرۆریست 30 سه‌ربازی‌ ئێمه‌ ده‌ستگیرده‌كات!
ئه‌و فه‌رمانده‌یه‌ی‌ له‌ژێر فه‌رمانی‌ مندایه‌ و كراوه‌ته‌ به‌رپرسیارێتی‌ ناوچه‌یه‌كی‌ له‌ئه‌ستۆیه‌، ئه‌گه‌ر بێت و له‌كاتی‌ روبه‌ڕووبونه‌وه‌ له‌گه‌ڵ تیرۆریستان سه‌نگه‌ره‌كه‌ی‌ به‌جێبهێڵێت ئه‌وا ئێمه‌ ناتوانن به‌و شێوه‌یه‌ ئه‌و كاره‌ بكه‌ین. كه‌واته‌ ئێمه‌ باش په‌روه‌رده‌مان نه‌كردوون، پێمان نه‌گه‌یاندوون. له‌وێ‌ چه‌ك و سه‌نگه‌ره‌كه‌ی‌ خۆی‌ به‌جێبهێڵت و رابكات، بێگومان ئێمه‌ شكست ده‌هێنین و قوربانیشمان ده‌بێت.
دوو كه‌س له‌به‌ری‌ ئه‌وبه‌ره‌وه‌ دێن و 30 كه‌س ده‌ڕفێنن! 

كۆشه‌نه‌ر: گوێ‌ به‌ ئاگربه‌ستێك ناده‌ین كه‌ له‌لایه‌ن تیرۆریسته‌كانه‌وه‌ رائه‌گه‌یه‌نرێت.
رێكخراوی‌ تیرۆریستی‌ له‌ئاینده‌دا هه‌ڵمه‌تی‌ سیاسی‌ زیاتر ده‌بێت. هه‌موو هه‌وڵێكیان له‌سه‌ر سیاسه‌ت چڕكردۆته‌وه‌. تاكتیكیان ئه‌وه‌یه‌ تاكو واده‌ی‌ هه‌ڵبژاردن ئاگربه‌ستێك راده‌گه‌یه‌نن، به‌ڵام ئێمه‌ له‌ روبه‌ڕووبونه‌وه‌یان به‌رده‌وام ده‌بین و گوێ‌ به‌ ئاگربه‌ست ناده‌ین!
هه‌ندێجار له‌ ده‌ره‌وه‌ی‌ یاساكان كارمان كردووه‌، سه‌رده‌مێك هه‌بووه‌ كه‌ واپێویستی‌ كردووه‌.هه‌ندێ‌ جار ده‌سه‌ڵاتمان زیاد له‌ سنوری‌ خۆی‌ به‌كارهێناوه‌ ئێستاش هه‌ر هه‌یه‌.
كۆشه‌نه‌ر: باس له‌ گۆڕینی‌ 35 مادده‌كه‌ ده‌كه‌ن.
باس له‌وه‌ ده‌كرێت كه‌ 35 مادده‌كه‌ی‌ ده‌ستوور ده‌رباره‌ی‌ ده‌سه‌ڵات و پێكهاته‌ی‌ سوپا بگۆڕێت و یاسایتر له‌بری‌ دابنرێت. ئێمه‌ وه‌ك هێزه‌ چه‌كدارییه‌كان له‌به‌ر میلله‌ته‌كه‌مان ئاماده‌ییمان هه‌یه‌، ئه‌مه‌ ئه‌ركێكی‌ سروشتی‌ و مێژویی ئێمه‌یه‌. كه‌س بۆی‌ نییه‌ له‌و باره‌یه‌وه‌ ئامۆژگاری‌ ئێمه‌ بكات. كه‌س بۆ نییه‌ پێچه‌وانه‌ی‌ ئه‌وه‌ به‌ ئێمه‌ بڵێت. كه‌س ناتوانێ‌ نكۆڵی‌ له‌ بونی‌ ئێمه‌ بكات. هه‌میشه‌ به‌شێوه‌یه‌كی‌ به‌هێز ئه‌ركه‌كانی‌ خۆمان راده‌په‌ڕێنین. پێویسته‌ له‌سه‌ر پێی‌ خۆمان و به‌شێوه‌یه‌كی‌ به‌هێز درێژه‌ به‌كاره‌كه‌مان بده‌ین.

كۆشه‌نه‌ر: له‌ روبه‌ڕووبونه‌وه‌ی‌ تیرۆردا، فه‌رمان له‌ كه‌س وه‌رناگرین
بێگومان روبه‌ڕووبونه‌وه‌مان له‌گه‌ڵ تیرۆریستان به‌رده‌وام ده‌بێت، كه‌س ناتوانێ‌ فه‌رمان به‌ ئێمه‌ بدات كه‌ ئۆپه‌راسیۆنه‌كان بوه‌ستێنین. ئه‌گه‌ر پێشمان بڵێن، ئێمه‌ گوێڕایه‌ڵ نابین. هیچ كات ئه‌مه‌تان بیرنه‌چێت. ئێمه‌ هه‌نگاوێك ناكشێیینه‌وه‌ له‌ روبه‌ڕووبونه‌وه‌ی‌ تیرۆردا.پێویسته‌ هه‌واڵگیریی له‌گه‌ڵ یه‌كینه‌كانمان كاربكه‌ن كاتێ‌ ده‌چنه‌ ناوچه‌یه‌كه‌وه‌.

كۆشه‌نه‌ر: پێویسته‌ بۆ میلله‌ته‌كه‌مان بسه‌لمێنین كه‌ له‌سه‌ر پێی‌ خۆمان وه‌ستاوین.
ده‌بێت به‌شێوه‌یه‌كی‌ به‌هێز خۆمان پیشان بده‌ن و له‌سه‌ر پێی‌ خۆمان بوه‌ستین، ئه‌گه‌ر نه‌رمی‌ بنوێنین، ئه‌وا ئه‌وانه‌ی‌ له‌دوی‌ ئێمه‌ دێن كاریان زه‌حمه‌تر ده‌بێت و روبه‌ڕووی‌ كێشه‌ ئه‌بنه‌وه‌. له‌به‌رئه‌وه‌ پێویسته‌ هاوكار و پشتیوانی‌ یه‌كتربین. پێكه‌وه‌ به‌شێوه‌یه‌كی‌ به‌هێز بوه‌ستین. له‌به‌رئه‌وه‌ی‌ به‌پێویستم زانی‌ ئه‌م روونكردنه‌وانه‌ بده‌م، ئێمه‌ سوپای‌ میلله‌تین. شانازی‌ به‌و ده‌كه‌ین. ده‌بێت ئه‌وه‌ پیشان بده‌ین كه‌ هه‌میشه‌ سوپای‌ میلله‌ته‌كه‌مانین. له‌كاتێكدا یاساكانمان زۆر ئه‌رك و فه‌رمانی‌ پێڕاسپاردووین. بۆیه‌ ده‌بێت ره‌چاوی‌ ئه‌وانه‌ بكه‌ین هیوای‌ سه‌ركه‌وتن بۆ هه‌مووان ده‌خوازم.


ناو:  
ئیمه‌یل:    
سه‌رنج:  

#7373
26/9/2017
ئه‌رشیف
وه‌رزش
‌ هه‌ڵبژارده‌ی‌ ئه‌وروپا جامی لیڤه‌ری برده‌وه‌ 26/9/2017
‌ پێگه‌ی‌ فوتباڵ لیكس ورده‌كاری بۆندی نێیمار بڵاوده‌كاته‌وه‌ 26/9/2017
زانست
‌ پاسێكی كارەبایی ژمارەی پێوانەیی جیهانی تێكشكاند ئایندە بۆ ئۆتۆمبیلی كارەباییە 25/9/2017
‌ وریای سوپەر مەلاریا بن 25/9/2017
‌ دیزاینەرە گەورەكەی ئەپڵ 25/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP