هه‌ر قۆناغه‌ ناوێك... هه‌ر ناوێك ئه‌ركێك
پیاوێك پێش زه‌مه‌نی‌ خۆی‌ كه‌وت هه‌ر قۆناغه‌ ناوێك... هه‌ر ناوێك ئه‌ركێك ‌ ئاودێر شێخ عومەر‌ 13/10/2017
جه‌لال حسیامه‌دین نوره‌ڵڵا نوری‌، ئه‌مه‌ ئه‌و ناوه‌یه‌ له‌ تۆماری‌ دانیشتوانی‌ كوردستان‌و عیراق‌و له‌سه‌ر ناسنامه‌ ناوی‌ كه‌سێكه‌، به‌ڵام له‌ ده‌ره‌وه‌ی‌ تۆمار و نووسراوه‌ ره‌سمییه‌كان، هه‌مان كه‌س خاوه‌ن چه‌ند ناوێكی‌ جیاوازه‌ كه‌ هه‌ر یه‌كه‌یان له‌ قۆناغێكدا به‌كاری‌ هێناوه‌. به‌ پێی‌ ناوه‌كه‌ی‌ ئه‌ركێكی‌ له‌ ئه‌ستۆ گرتووه‌ له‌ پێناو به‌رژه‌وه‌ندی‌ گشتی‌‌و ده‌وروبه‌ره‌كه‌ی‌. ئه‌و به‌ درێژایی‌ 84 ساڵی‌ ته‌مه‌نی‌ چه‌ندین ناوی‌ جیاوازی‌ هه‌بووه‌. ئه‌گه‌ر بمانه‌وێ‌ -له‌و- بدوێین ده‌بێ‌ هه‌موو ناوه‌كانی‌ بهێنین‌و باسی‌ له‌ رۆڵ‌و ئه‌ركه‌كانیشی‌ بكه‌ین.
له‌ گوندێك له‌ دایك بوو (كه‌لكان- ناحیه‌ی‌ چناران له‌و رۆژگاره‌ هه‌بوو- قه‌زای‌ دوكان- پارێزگای‌ سلێمانی‌)، له‌و رۆژه‌دا (12/11/1933) هیچ خزمه‌تگوزارییه‌كی‌ تێدا نه‌بوو، خوێندنگه‌، بنكه‌ی‌ ته‌ندروستی‌، كاره‌با، ته‌نانه‌ت رێگاو بانێكی‌ باشیشی‌ نه‌بوو. نزیكترین شارۆچكه‌ لێیه‌وه‌ رانیه‌ بوو، به‌ دووری‌ زیاتر له‌ (30 كم). له‌و رۆژگاره‌دا ته‌نیا سێ‌ كه‌س له‌ دانیشتووانی‌ گونده‌كه‌ خوێنده‌وار بوون، (باوكی‌‌و هه‌ردوو مامه‌كه‌ی‌). هه‌ر چۆنێك بووایه‌ ناچار بوو وه‌ك به‌شێك له‌ كه‌سوكاره‌كه‌ی‌ هه‌ر زوو گونده‌كه‌ جێبهێڵێ‌‌و بچێته‌ شارۆچكه‌یه‌ك بۆ ئه‌وه‌ی‌ بچێته‌ به‌ر خوێندن، به‌ڵام وه‌رگرتنی‌ به‌رپرسیارێتی‌ رێبه‌ری‌ ته‌كیه‌ی‌ بنه‌ماڵه‌كه‌یان له‌ شاری‌ كۆیه‌، له‌ لایه‌ن باوكیه‌وه‌، ده‌بێته‌ كارئاسانییه‌ك بۆ ئه‌و، تاكو له‌گه‌ڵ ته‌واوی‌ خێزانه‌كه‌ی‌ كه‌لكان جێبهێڵن و روو بكاته‌ ژیانی‌ شار له‌ كۆیه‌، وه‌ك خۆی‌ چه‌ندین جار وه‌ك بیره‌وه‌ری‌ منداڵی‌ باسی‌ كردووه‌، زاڵ بوونی‌ كلتوری‌ لادێ‌، هه‌روه‌ها جیاوازی‌ شێوه‌زاره‌كه‌ی‌ له‌گه‌ڵ شێوه‌زاری‌ كۆیه‌ (دانیشتووانی‌ بناری‌ كۆسره‌ت  له‌ژێركاریگه‌ریی‌ شێوه‌زاری‌ موكریانیدان، جگه‌ له‌وه‌ش عایشه‌خانی‌ دایكی‌ له‌ عشره‌تی‌ مه‌نگوڕ بووه‌، كه‌ ته‌واوی‌ عه‌شره‌ته‌كه‌ی‌ به‌ شێوه‌زاری‌ موكریانی‌ ده‌دوێن)، به‌ڵام هه‌ر زوو ده‌توانێ‌ تێكه‌ڵاوییه‌كی‌ فراوان له‌گه‌ڵ هاوته‌مه‌نه‌كانی‌ خۆی‌ له‌ خه‌ڵكی‌ شاری‌ دروست بكات، خۆ گونجاندنێكی‌ ته‌واویشی‌ هه‌بێت له‌گه‌ڵ خه‌ڵكی‌ شاری‌. ئه‌و ده‌بێته‌ پێشه‌نگ‌و پێشه‌وای‌ شارییه‌كانیش به‌تایبه‌ت هاوكۆف‌و هاوته‌مه‌نه‌كانی‌. 

          جه‌لال حسامه‌دین
 له‌و قۆناغه‌دا ناوی‌ جه‌لال حسیامه‌دین-ه‌ . ته‌نیا له‌ناو بنه‌ماڵه‌كه‌ی‌‌و له‌ ده‌ره‌وه‌ی‌ قوتابخانه‌ له‌ لایه‌ن كه‌سه‌ نزیكه‌كانیه‌وه‌ به‌ (مام جه‌لال- بانگ ده‌كرێ‌ وه‌ك خۆشه‌ویستییه‌كی‌ بنه‌ماڵه‌كه‌ی‌ بۆ مامی‌ باوكی‌ كه‌ ناوی‌ جه‌لال بوو‌و وه‌فاتی‌ كردووه‌ پێشگری‌ ناوی‌ –مام- ده‌خه‌نه‌ پێش ناوه‌كه‌ی‌). له‌ قۆناغی‌ سه‌ره‌تاییدا،  زیره‌ك‌و لێهاتوو و جیاواز بوو له‌ هاوته‌مه‌نه‌كانی‌. هه‌م به‌ زیره‌كییه‌كه‌ی‌ له‌ خوێندن‌و وانه‌كاندا، هه‌م به‌ بوونی‌  نیشانه‌كانی سه‌ركردایه‌تی به‌ جۆرێ‌ لێیده‌ركه‌وتووه‌ كه‌ پێش هاوڕ‌ێكانی ده‌كه‌وت بۆ كۆڕ‌ی پرسه‌ و ئه‌و بۆنانه‌ی له‌و سه‌رده‌مه‌دا به‌ڕ‌ێوه‌ ده‌چوون. هه‌روه‌ها رۆژانه‌ له‌ كاتی ریزبوونی قوتابیاندا، مامۆستاكان پێش هه‌مووان ئه‌ویان هه‌ڵده‌بژارد بۆ خوێندنه‌وه‌ی شیعری نیشتمانیی و نه‌ته‌وه‌یی‌و به‌شداری ده‌كرد له‌ چالاكیه‌كانی قوتابخانه‌ وه‌ك وتار خوێندنه‌وه‌و شانۆ.
یه‌كێك له‌ كاره‌ مه‌زنه‌كانی‌ ئه‌و له‌ قۆناغی‌ منداڵیدا، ساڵی 1946 دا له‌گه‌‌ڵ چه‌ند هاوڕ‌ێیه‌كی خوێندكار و به‌ ئامۆژگاری یه‌كێك له‌ مامۆستاكانی كۆمه‌ڵه‌یه‌كی فێركاری نهێنی دامه‌زراند به‌ ناوی (كۆمه‌ڵه‌ی پێشخستنی خوێندنه‌وه‌) (k.p.x ) و به‌ سكرتێری هه‌ڵبژاردرا. ئامانجێكی كۆمه‌ڵه‌كه‌ هاندانی خوێندكاران بوو بۆ خوێندنه‌وه‌ی ده‌ره‌كی. به‌و چه‌شنه‌ له‌ خه‌باتی‌ مه‌ده‌نی‌‌و رێكخراوه‌ییه‌وه‌ كاروانی‌ كۆشش‌و تێكۆشانه‌كه‌ی‌ ده‌ست پێده‌كات‌و درێژه‌ ده‌كێشێ بۆ كایه‌ی‌ سیاسه‌ت‌و حیزبایه‌تی‌، رۆژنامه‌گه‌ریی‌، سه‌ركردایه‌تیی‌‌و رێبه‌رایه‌تی‌.
له‌ یه‌كه‌م ساڵی‌ دامه‌زراندنی‌ پارتی‌ دیموكراتی‌ كوردستاندا، ده‌كه‌وێته‌ ژێر كاریگه‌ری به‌رنامه‌ی پارته‌كه‌ و  له‌ چوارچێوه‌ی رێكخستنه‌كانیدا كه‌وته‌ چالاكی خوێندكارانه‌. ساڵی 1947 ده‌بێته‌ ئه‌ندام له‌ پارتی دیموكراتی كورد. ساڵی 1949، یه‌كه‌م به‌رپرسیارێتی‌ حیزبی‌ گرته‌ ئه‌ستۆ‌و بووه‌ ئه‌ندامی لیژنه‌ی ناوچه‌ی كۆیه‌ی‌ پارتی‌. ئه‌مه‌ش وه‌ك قۆناغی‌ سه‌ره‌تای‌ تێكه‌ڵاوبوونی‌ به‌ كاری‌ سیاسی‌‌و حیزبی‌ هه‌ژمار ده‌كرێ‌.

ناوه‌كه‌ی‌ ده‌بێته‌ (ئاگر)
خولیای‌ بۆ نووسین‌و خستنه‌ رووی‌ دید‌و بۆچوونه‌كانی‌‌و گه‌یاندنیان به‌ ده‌ره‌وی‌ ده‌وروبه‌ره‌كه‌ی‌ له‌ كۆیه‌، پاڵی‌ پێوه‌ده‌نێت بۆ ناو دنیای‌ رۆژنامه‌گه‌ری‌‌و میدیا. یه‌كه‌م وێسته‌گه‌ی‌ له‌و كایه‌یه‌دا، رۆژنامه‌ی (رزگاریه‌، كه‌ پارتی دیموكراتی كورد به‌ نهێنی ده‌ریده‌كرد‌و تێیدا وتاری كورتی‌ به‌ ناوی‌ خواستراوی‌ (ئاگر)ه‌وه‌ بڵاو ده‌كرده‌وه‌. له‌ ساڵی 1951 چووه‌ كه‌ركوك بۆ ته‌واوكردنی خوێندن و بووه‌ به‌رپرسی رێكخستنه‌كانی كه‌ركوك. له‌ هه‌مان ساڵیشدا ئه‌ركی چاپ و بڵاوكردنه‌وه‌ی بڵاوكراوه‌كانی به‌ شێوه‌یه‌كی نهێنی گرته‌ ئه‌ستۆ.

       ئه‌و بووبه‌ (پیرۆت)
ساڵی 1958، چووه‌ به‌غداد و به‌شداریی كرد له‌ ده‌ركردنی گۆڤاری (رزگاری)‌و (التحریر)دا، ساڵی 1959، به‌شداری كرد له‌ ده‌ركردنی رۆژنامه‌ی (خه‌بات)دا كرد كه‌ به‌ زمانی عه‌ره‌بی ده‌رده‌چوو، وه‌ به‌ ناوی (پیرۆت) ه‌وه‌ وتاره‌كانی‌ بڵاوده‌كرده‌وه‌. 
ئه‌م دوو ناوه‌ (ئاگر) و (پیرۆت)، بۆ ئه‌و قۆناغه‌ن كه‌ تێیدا له‌ پاڵ كاری‌ به‌رپرسارێتی‌ حیزبیدا، به‌شداری‌ له‌ كایه‌ی‌ راگه‌یاندنی‌ كوردیدا ده‌كات‌و وه‌ك نووسه‌ر‌و رۆژنامه‌نووس ئه‌و دوو ناوه‌ی‌ به‌كارهێناوه‌. كاره‌كانیشی‌ له‌ بواری‌ راگه‌یاندن ته‌نیا له‌و چه‌ند وێستگه‌یه‌دا نه‌وه‌ستاوه‌. ساڵی 1961 بووه‌ سه‌رنووسه‌ری رۆژنامه‌ی (كوردستان). ساڵی 1957 بوو به‌ به‌رپرسی رۆژنامه‌ی (خه‌باتی كوردستان) كه‌ له‌ سلێمانی به‌ نهێنی ده‌رده‌چوو. له‌ ساڵی 1959 وه‌ك ئه‌ندامی ئه‌نجوومه‌نی سه‌ندیكای رۆژنامه‌نووسانی عیراقی هه‌ڵبژێردراوه‌.

مام جه‌لال له‌سه‌ر زاری‌ دنیا
(مام جه‌لال) ئه‌و ناوه‌ی‌ له‌ قۆناغی‌ منداڵیدا، ته‌نیا له‌ لایه‌ن بنه‌ماڵه‌‌و كه‌سوكاره‌كه‌یه‌وه‌ به‌كار ده‌هێنرا، ده‌بێته‌ ناوێك كه‌ هه‌م هه‌موو كوردستانیان‌و هه‌م عه‌ره‌ب‌و فارس‌و هه‌ندێك نه‌ته‌وه‌ی‌ دیكه‌ش بۆ هه‌تایه‌ به‌و ناوه‌ ناوی‌ ده‌به‌ن‌و باسی‌ ده‌كه‌ن. كاروانه‌كه‌ له‌ ئه‌ندامێكی‌ ئاسایی‌ پارتی‌ دیموكراته‌وه‌ ده‌ست پێده‌كات (1947)، دوو ساڵ دواتر ده‌بێته‌ ئه‌ندامی‌ لیژنه‌ی‌ ناوچه‌ی‌ كۆیه‌ی‌ پارتی‌، 1951 له‌ كۆنگره‌ی دووه‌می پارتی به‌ ئه‌ندامی لیژنه‌ی ناوه‌ندی هه‌ڵبژێردرا، به‌ڵام له‌به‌ر پاراستنی ریزه‌كانی پارتی، پله‌كه‌ی خۆی به‌ هه‌ڤاڵێكی خۆی به‌خشی كه‌ دوای ده‌رچوونی له‌ زیندانی به‌شداری له‌ كۆنگره‌دا كردبوو. 1953 له‌ كۆنگره‌ی سێیه‌می پارتی دا به‌ ئه‌ندامی كۆمیته‌ی ناوه‌ندی هه‌ڵبژێردرا و له‌ هه‌مان ساڵدا سه‌رپه‌رشتی یه‌كه‌مین كۆنگره‌ی (یه‌كێتی قوتابیانی كوردستان)ی كرد و له‌ كۆنگره‌یه‌دا به‌ سكرتێری گشتی قوتابیانی كوردستان هه‌ڵبژێردرا و له‌ هه‌مان ساڵیشدا یه‌كێك بوو له‌ دامه‌زرێنه‌رانی (یه‌كێتیی لاوانی دیموكراتی كوردستان). هه‌ر له‌و كاتانه‌دا نوێنه‌ری پارتی بوو لای زۆربه‌ی حزبه‌ نهێنێ‌و ئاشكراكانی عیراقی. له‌ 1954 به‌ ئه‌ندامی مه‌كته‌بی سیاسی هه‌ڵبژێردرا. 1959 جارێكی تر به‌ ئه‌ندامی كۆمیته‌ی ناوه‌ندی پارتی‌و مه‌كته‌بی سیاسی هه‌ڵبژێردرا.  له‌ 1961 كه‌ شۆڕ‌ش هه‌ڵگیرسا، به‌رپرسی ناوچه‌ی سلێمانی بوو، یه‌كه‌مین بنكه‌ی شۆڕ‌شی له‌ چه‌می ره‌زان كرده‌وه‌‌و كرا به‌ لێپرسراوی هێزی پێشمه‌رگه‌ی كوردستان.
له‌ نه‌ورۆزی 1962 دا، سه‌ركردایه‌تی ئه‌و هێرشه‌ به‌ر فراوانه‌ی كرد بۆ سه‌ر ناوچه‌ی شارباژێڕ‌كرا و له‌ ماوه‌ی چه‌ند رۆژێكدا ده‌ست به‌سه‌ر هه‌موو بنكه‌ی پۆلیسی ناحیه‌ی بناوه‌سووته‌‌و چوارتادا گیرا‌و هێزه‌كانی به‌ره‌و‌ قه‌زای پێنجوێن برد‌و ته‌واو ناوچه‌كه‌یان ئازاد كرد.
1962 ـ 1963 زۆربه‌ی ناوچه‌كانی قه‌ره‌داغ و قه‌ڵاسێوكه‌ و گه‌رمیان و سه‌نگاو ئازاد كران. ئه‌و ده‌مه‌ مام جه‌لال فه‌رمانده‌ی هێزی رزگاری بوو، له‌ هه‌مان كاتیشدا سه‌رپه‌رشتی دامه‌زراندنی ناوه‌نده‌كانی به‌مۆ و هه‌ڵه‌بجه‌ و ته‌وێڵه‌ و بیاره‌ی ده‌كرد.  1963 و دوای كوده‌تای شوبات، مام جه‌لال به‌ سه‌رۆكی وه‌فدی كوردی ده‌ستنیشان كرا بۆ گفتوگۆ له‌گه‌‌ڵ حكومه‌تی عیراق. هه‌روه‌ها سه‌ردانی كۆماری میسرو جه‌زائیری كرد‌و چاوی به‌ عه‌بدولناسر و بن بێلا كه‌وت. له‌ هه‌مان ساڵیشدا سه‌ردانی ئه‌وروپای كرد‌و نوێنه‌رایه‌تی شۆڕ‌شی كوردستانی كردو سه‌ركه‌وتوو بوو بۆ ناساندنی كێشه‌ی كوردو ئاشكرا كردنی بارودۆخی كوردستان‌و كۆكردنه‌وه‌ی یارمه‌تی‌و هاوكاری بۆ شۆڕ‌ش له‌ وڵاتانی فه‌ره‌نسا، ئه‌ڵمانیا، روسیا، چیكسلۆ فاكیا‌و نه‌مسا. 1964 گه‌ڕ‌ایه‌وه‌ كوردستان و ئه‌ركی خۆی له‌ فه‌رمانده‌یی كردنی هێزی رزگاری گرته‌وه‌ ئه‌ستۆ.  1967 به‌شداری له‌ كۆڕ‌ی (ئیشتراكیه‌كانی عه‌ره‌ب) كرد له‌ جه‌زائیرو لێكۆڵینه‌وه‌یه‌كی ده‌رباره‌ی كێشه‌ی كوردو شه‌رعیه‌تی بزووتنه‌وه‌ی رزگاریخوازی گه‌لی كوردو دۆستایه‌تی نێوان كوردو عه‌ره‌ب پێشكه‌شكرد.
له‌ 1 / 6 / 1975 له‌ دیمه‌شق له‌گه‌‌ڵ ده‌سته‌یه‌ك له‌ هه‌ڤاڵانیدا یه‌كێتیی نیشتمانیی كوردستانیی دامه‌زراند و نه‌خشه‌ی بۆ هه‌ڵگیرسانه‌وه‌ی شۆڕ‌شی نوێ دانا كه‌ له‌ 1 /6/ 1976 راگه‌یه‌نرا و بووه‌ سكرتێری گشتی یه‌كێتیی. 
(مام جه‌لال) ناوێكه‌ له‌ قۆناغی‌ هه‌رزه‌كارییه‌وه‌ بۆ ناسینه‌وه‌ی‌ كه‌سێكه‌ له‌ ئه‌ندامێكی‌ ئاسایی‌ حیزبه‌وه‌ بۆ كادیر، بۆ سه‌ركرده‌یه‌كی‌ حیزبی‌، پێشه‌وای‌ باڵێكی‌ گه‌وره‌ی‌ حیزبێك، بۆ سكرتێری‌ گشتی‌ كاریگه‌رترین هێزی‌ سیاسی‌ سه‌ر گۆڕه‌پانی‌ خه‌باتی‌ به‌شێكی‌ كوردستان، بۆ چه‌قی‌ كوردایه‌تی‌ له‌ هه‌ر چوار به‌شه‌كه‌ی‌ كوردستان، وه‌ك پێشه‌وا‌و دانا‌و پێشه‌نگی‌ خه‌باتی‌ رزگاریخوازی‌ نه‌ته‌وه‌ی‌ كورد‌و كه‌سایه‌تییه‌كی سیاسیی‌و خه‌باتگێرێكی هۆشمه‌ندی‌ كورده‌واری‌ و نووسه‌ر و یاساناس، هه‌روه‌ها وه‌ك كه‌سایه‌تییه‌كی‌ جیهانی‌ به‌رده‌وام ده‌بێ‌‌و دوای‌ كۆچی‌ دواییشی‌، بۆ هه‌تایه‌ له‌ناو مێژووی‌ مرۆڤایه‌تیدا، وه‌ك  ناوێكی‌ هه‌ره‌ ناسراو و دیار ده‌مێنێته‌وه‌.
ئه‌بو شه‌لال
(ئه‌بو شه‌لال)، ئه‌و ناوه‌یه‌ كه‌ له‌ناو هێزه‌ عه‌ره‌بیه‌ عیراقییه‌كان‌و سیاسه‌تكار‌و ئه‌دیب‌وبه‌شێك له‌ ده‌وڵه‌تمه‌دارانی‌ جیهانی‌ عه‌ره‌بی‌ نازناوی‌ مام جه‌لال بوو. له‌لای‌ ئه‌وان به‌و ناوه‌ ده‌ناسرا (ناوه‌كه‌ له‌وه‌وه‌ هاتووه‌، كوڕی‌ گه‌وره‌ی‌ مام جه‌لال ناوی‌ -بافڵ-ه‌ ، كه‌ به‌ ناوی‌ تاڤگه‌كانی‌ چه‌می‌ ره‌زانه‌وه‌ ناودێری‌ كردووه‌‌و خه‌ڵكی‌ ناوچه‌ی‌ چه‌می‌ ره‌زان -40كم خۆرئاوای‌ شاری‌ سلێمانی‌- به‌ تاڤگه‌كانی‌ ناوچه‌كه‌یان ده‌ڵێن بافڵ، یان بافڵه‌كان)، ناوی‌ ئه‌بو شه‌لال له‌ دنیای‌ عه‌ره‌بدا به‌ تایبه‌ت له‌ قۆناغه‌ سه‌خته‌كانی‌ خه‌باتی‌ كوردایه‌تییدا، نازناوی‌ مام بوو دواتریش وه‌ك یاده‌وه‌ری‌ ئه‌و رۆژانه‌ به‌شێك له‌ هه‌ڤاڵ‌و دۆسته‌كانی‌ هه‌ر به‌و ناوه‌ بانگیان ده‌كرد و په‌یامیان بۆ ده‌نارد. یار‌و نه‌یار گه‌واهی‌ ده‌ده‌ن كه‌ (ئه‌بو شه‌لال) یه‌كێك بووه‌ له‌ بزوێنه‌ری سه‌ره‌كی بۆ لێك نزیك كردنه‌وه‌ی بۆچوونه‌كان له‌ نێو ریزی ئۆپۆزسیۆنی عیراقی له‌ كۆنگره‌كانی نیویۆرك و له‌نده‌ن و سه‌ڵاحه‌دین و هه‌موو دانیشتنه‌كانی دوای ئه‌وانه‌ش كه‌ په‌یوه‌ندییان به‌ رێكخستن و نزیكبوونه‌وه‌ی ماڵی عیراقییه‌وه‌ هه‌بوو، میوانداری زۆربه‌ی زۆری هێزه‌ عیراقیه‌كانی كردووه‌ له‌ كوردستان و پشتگیری هه‌مه‌ جۆری كردوون.
         سه‌رۆك تاڵه‌بانی‌
دوای ئازادكردنی عیراق به‌ ئه‌ندامی ئه‌نجوومه‌نی حوكم هه‌ڵبژێردرا و له‌ مانگی نۆڤه‌مبه‌ری 2003 دا سه‌رۆكایه‌تی ئه‌نجوومه‌نی كرد. له‌ نیسانی 2005، له‌ كۆی 248 ده‌نگی ئه‌ندامانی كۆمه‌ڵه‌ی نیشتمانی عیراقی227 ده‌نگی به‌ ده‌ستهێناو به‌ هه‌ڵبژاردنێكی راسته‌وخۆ به‌ یه‌كه‌مین سه‌رۆكی هه‌ڵبژێراوی عیراق هه‌ڵبژێردرا. له‌وه‌ به‌دوا له‌ زمانی‌ ره‌سمی‌ كوردستان‌و عیراق‌و جیهانیشدا وه‌ك (سه‌رۆك تاڵه‌بانی‌)ناوی‌ ده‌هێنرا. له‌ فراوانترین‌و جوانترین ده‌روازه‌كانه‌وه‌ چووه‌ ناو مێژووی كوردو مێژووی عیراق‌و مێژووی سیاسی و دیموكراسی جیهانه‌وه‌.
جه‌لال تاڵه‌بانی‌
ئه‌م ناوه‌یان دوولایه‌نه‌، نه‌یار و داگیركه‌رانی‌ كوردستان‌و دوژمنانی‌ نه‌ته‌وه‌ی‌ كورد‌و دیكتاتۆره‌كان به‌كاریان ده‌برد، له‌ نموونه‌ی‌ ئه‌و ناوهێنانه‌ی‌ له‌ لێبوردنه‌ گشتییه‌كانی‌ دیكتاتۆری‌ له‌ناوچووی‌ عیراق سه‌دام حسێن كه‌ هه‌میشه‌ ده‌یگوت «لێبوردنه‌كه‌ هه‌موو عیراقییه‌كان ده‌گرێته‌وه‌ جگه‌ له‌ جه‌لال تاڵه‌بانی‌». به‌ دیوێكی‌ دیكه‌دا ئه‌م جه‌لال تاڵه‌بانی‌ ئه‌و بوو له‌ كۆڕی‌ سیاسی‌‌و ده‌وڵه‌تمه‌داره‌كانی‌ هه‌موو جیهان‌و كایه‌ی‌ سیاسی‌‌و ده‌وڵه‌تمه‌داری‌ له‌سه‌ر ته‌واوی‌ گۆی‌ زه‌وی‌، له‌ نموونه‌ی‌ ناوی‌ ئه‌و وه‌ك جه‌لال تاڵه‌بانی‌، جێگری‌ سكرتێری‌ گشتی‌ سۆسیالیست ئینته‌رناسیونال.
كه‌سێك به‌م هه‌موو ناوه‌وه‌، له‌و هه‌موو كایه‌ جیاوازه‌دا، وه‌ك مۆم  سێ‌ چاره‌كه‌ سه‌ده‌ی‌ ته‌واو جه‌سته‌ی‌ خۆی‌ سووتاند، تاكو رێگای‌ كاروانی‌ خه‌باتی‌ كوردایه‌تی‌ رووناك بكاته‌وه‌. له‌ گوندێكه‌وه‌ كاروانی‌ ژیانی‌ ده‌ستێكرد، له‌ سه‌ر ئاستی‌ گۆی‌ زه‌وی‌ ناسرا. ناسینێك جیاواز له‌ زۆر كه‌سی‌ دیكه‌، ناو و ناوبانگێكی‌ جیهانی‌، وه‌ك سیاسییه‌كی‌ هۆشیار، دانا، كارامه‌، ئاشتی‌‌و رزگاریی‌‌و دیموكراسیخواز، چاكه‌كارو ... تاد.


ناو:  
ئیمه‌یل:    
سه‌رنج:  

#7395
20/10/2017
ئه‌رشیف
وه‌رزش
‌ ئیتالیا مه‌ترسی گه‌وره‌ی سه‌رنه‌كه‌وتنی بۆ مۆندیال له‌سه‌ره‌ 19/10/2017
‌ رۆناڵدۆ زیندانی دەکرێت؟ 19/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP