سەرەکی » وتار » نه‌وزادى موهه‌ندیس‌ » مەكتەب و دەزگاكان لە پەیڕەوی ناوخۆدا…

بەرەو بەستنی كۆنگرەی گشتی چوارەمی یەكێتی نیشتیمانی كوردستان

مەكتەب و دەزگاكان لە پەیڕەوی ناوخۆدا…

((مەكتەبی ڕێكخراوە دیموكراتییەكان و دەزگای هەڵبژاردن))

15
• لەبەشی شەشەم ((مەكتەب و دەزگاكان)) لە پەیڕەوی ناوخۆدا باسكراوە و لە چوارچێوەی مادەكانی ((47 تا65))دا باسی هەریەكە لە (( 12 )) مەكتەب و دەزگاكانی یەكێتی نیشتیمانی كوردستانی كردوە و بەڕوونی باسی لە ئەرك و دەسەڵاتەكان و چۆنێتی بەڕێوەبردنی ئەو مەكتەب و دەزگایانەی كردوە.
• لەم وتارەماندا ئیستێك لە سەر ئیشوكار و ئەرك و دەسەڵاتەكانی هەردوو ((مەكتەبی ڕێكخراوە دیموكراتییەكان و دەزگای هەڵبژاردن)) دەكەین كە لەهەردوو مادەی((56 و 60و 61))ی پەیڕەوی ناوخۆدا باسیان لێوەكراوە.
مەكتەبی ڕێكخراوە دیموكراتییەكان، ئەرك و لێپرسراوێتیەكی گەورەی لە ئەستۆدایە و لە قۆناغی ڕابوودروودا كار و چالاكی گەورەیان پێشكەش كردوە بە یەكێتی و توانیویانە لە ڕێگەی خزمەتكردن و هاوكاری و دەستگیرۆیی كردنی هەموو ڕێكخراوە پیشەیی و جەماوەری و دیموكراتیەكان بكەن و هانیان بدەن بۆ گردبونەوە لە چوارچێوەی ڕێكخراوە پیشەییەكانی خۆیاندا بۆئەوەی توانا و وزەكانیان بەفیڕۆ نەڕوات و یەكێتیش بتوانێت سوودیان لێوەربگرێت لەكاتی هەڵبژاردن و دەنگداندا.
هەموو حیزبێك
هەموو حیزبێكی سیاسی گەرەكە كە بەجۆرەها شێواز و میكانیزم كار و خەباتی خۆی گەشە پێبدات و بچێتە ناو جەماوەرەوە تا دەتوانێت ڕاو بۆچونیان لەخۆی نزیك بكاتەوە، بوونی ئەم ڕێكخراوە دیموكراتیانە لە دونیای پێشكەوتوشدا گرنگیان هەیە و هەموو حیزبێك ڕێكخراوی مەدەنی و دیموكراتی خۆی هەیە لە ڕێكخراوەكانی((كرێكاران و جوتیاران و ژنان و خوێندكاران و ئەندازیاران و پزیشكان و مامۆستا و پارێزەران و فەرمانبەران و زۆری تر)) و هەركات حیزب گەرەكی بێت دەتوانێت شەقامی گشتی كۆمەڵگا بجوڵێنێت. مێژووی كاری ڕێكخراوە دیموكراتیەكان لەمێژە و لە وڵاتانی پێشكەوتوو لە ئەوروپا و ئەمریكادا كاری گەلێگ گەورەیان ئەنجامداوە و تەنانەت لەهەندێك وڵاتیشدا توانیویانە سیستەمی حومكڕانی بگۆڕن (( وەك یەكێتی كرێكارانی پۆڵەندا بەسەرۆكایەتی لیخ ڤاوسیا(( پیاوێكی سیاسی و ئابوری زان و شارەزا لە بواری ڕێكخراوەییدا)) كە بۆ ماوەی 1980-1990 سەرۆكی یەكێتی كریكاران بوو(( بزوتنەوەی هاوكاری)) و دواتر توانی كە ببێتە سەرۆكی پۆڵەندا و خەڵاتی ئاشتی نۆبڵیش لە ساڵی 1983وەربگرێت و پۆڵەندا لە سیستەمی سۆسیالیستیەوە بگۆڕێت بۆ وڵاتێكی دیموكراتیكی سەرمایەداری)) و ببنە لۆبیەكی فشاری گەورەش بۆ سەر دەسەڵات، بۆیە گرنگیدان بەم ڕێكخراوانە كاری لە پێشینەی یەكێتیە و یەكێتیش ئەزمونی گەورەی هەیە لە كاری ڕێكخراوەیی و سەرپەرشتیكردنیاندا هەر لە قۆناغی شاخەوە تاكو ئێستا. و توانیویشێتی سوودیان لێببینێت.

ئەوەیە بەداخەوە
ئەوەی جیاوازی دەبینرێت لەنێوان ڕێكخراوەكانی ئەوروپاو كوردستاندا، ئەوەیە بەداخەوە تائێستا كادری ڕێكخراوەیی و پیشەیی شارەزاو بە ئەزمون دروست نەبوون و ئاستی هوشیاری خەباتی پیشەیی و چینایەتیان بەرز نیە و ناتوانن بەبێ‌ پشتیوانی حیزب خۆیان كاری ڕێكخراوەیی ئازادانە و سەربەستانە بكەن و بۆخۆیان ببنە پارێزەری مافەەڕەواكانیان و تائێستا لە كوردستاندا نەتوانراوە ببنە هێز و لۆبی فشار لەسەر دەسەڵات،بۆیە ئەم خەباتی ڕێكخراوانە پێویستی بە بەسەرداچونەوە هەیە.و ڕێكخراوە دیموكراتیەكان لە كوردجستاندا هەموانیان وابەستی حیزب و پاشكەوتەی حیزبە سیاسیەكانن هەربۆیە نەیانتوانیوە ببنە جێگە متمانەی چین و توێژەكانی خۆیان.
بەڕای بەندە و لەپێناو توندوتۆڵكردنەوەی ڕیزەكانی یەكێتی و كەمكردنەوەی خەرجی و سووككردنی بارگرانی لەئەسۆی یەكێتدا، دەكرێت ئیشوكاری مەكتەبی ڕێكخراوە دیموكراتیەكان دابەشبكرێتە سەر مەڵبەندەكان و هەر مەڵبەندە لە ناوچەكانی خۆیاندا سەرپەرشتی كاری ئەو ڕێكخراوانە بكەن بۆئەوەی مەڵبەندەكان ببنە جێگەی كۆبونەوە و توانای هەموو كادران و ڕێكخستنەكان و بەمەش دەتوانرێت هەمئاهەنگی زیاتر دروست ببێت و گردبونەوەی زیاتریش لە دەوری یەكێتی دروست ببێت، بەداخەوە لەئێستادا لەبەر زۆری بارەگا و مەكتەب و مەڵبەند و نەبونی هەمئاهەنگی تەواو لە نێوانیاندا هەموو توانا و وزە مادی و مرۆییەكان بەهەدەر چوون و ئەو پارە و پول و خەرجیە زۆرانەش كە كراون جێگەی شیاوی خۆیان نەگرتوە، بۆیە دەكرێت لەكۆنگرەدا دوا بڕیار لەم بابەتە بدرێت.

ئاوهاش دەتوانێت
• ئەوەی پەیوەستە بە ((دەزگای هەڵبژاردن))ەوە كەلە مادەی((60 و 61))ی پەیڕەوی ناوخۆدا هاتوە، ئەم دەزگایە گرنگیەكی ئێجگار گەورەی هەیە بۆ یەكێتی ،چونكە لەڕێگەی ئەم دەزگایەوە دەتوانرێت ئامادەسازی بۆ هەموو قۆناغەكانی هەڵبژاردنەكانی ناوخۆ و دەرەوەی یەكێتی بكرێت بەدابینكردنی هەموو پێداویستیە مادی و لۆجستیەكان و كادری مرۆیی شارەزا.ئەم دەزگایە هەروەك چۆن لەڕابووردوودا كار و چالاكی بەرچاوی ئەنجامداوە و توانیویەتی سەرپەرشتی پرۆسەی هەڵبژاردنەكانی بكات، ئاوهاش دەتوانێت زیاتر و زیاتر لە ئایندەدا كارەكانی باشتر ڕێكبخات و زیاتر پڕۆفیشناڵانە ئەركەكانی جێبەجێ‌ بكات،ئەم دەزگایە دەتوانێت بببێتە پێوەرێكی ڕاستەقینە و ڕاستگۆی ئاستی جەماوەری یەكێتی و پاراستنی زۆرێك لەنهێنیەكان و سازدانی ڕاپرسی جیاواز لەناو جەماوەر و ناوچە جیاوازەكاندا، ئەم دەزگایە دەبێت پەیوەندی توندوتۆڵی هەبێت لەگەڵ ڕێكخراوە ناوخۆیی و بیانیەكاندا بۆ سوووەرگرتن و دەوڵەمەندكردنی ئەزمونەكانی و بتوانێت خولی بەردەوام بۆ پێگەیاندنی كادری شارەزا و بەئەزمون ڕێكبخات و تەنانەت وەكو چاودێریش بەشداری لەهەڵبژاردنەكانی دەرەوەی هەرێمیشدا بكات و بتوانێت ناوناوبانگێكی باش بۆخۆی پەیدا بكات.گەرەكە ئەم دەزگایە بێلایەنی خۆی بپارێزێت و لەكاتی جیاكردنەوەی دەنگەكاندا هیچ لایەنگیریەك بۆ هیچ كام لەكاندید و پاڵیوراوەكان نەكات و ڕێگە بگرێت لەكاری ساختكردن و دەستوەردان لە ئەنجامی هەڵبژاردنە ناوخۆیی و دەرەكیەكاندا.

نەیانتوانیوە
• بۆیە بەهەق دەبێت ئەم كۆنگرەی گشتیەی ئایندە كۆنگرەیەكی گشتگیر بێت بۆ بەسەرداچوونەوەی سەرجەم ئیشوكارەكانی دەزگا و ئۆرگان و مەكتەب و مەڵبەندەكان،چونكە هەموانیان بەداخەوە لەم چەند ساڵەی ڕابووردوودا نەیانتوانیوە لە ئاست خواست و داواكاریەكانی یەكێتیدا بن و بتوانن پێكەوە جۆش و خرۆشی زیاتر بدەنەوە بە یەكێتی و بێكەنەوە یەكێتیەكەی جاران كە لەسەرتاسەری هەرێم و عێراقیشدا خاوەن سەنگ و قورسایی گەورە بوو ،ڕێزلێگیرا و گوێلێگیراویش بوو. ئەم كۆنگرەیە دەبێت تەكانێكی بەهێز بداتە هەموو ئۆرگانەكان بۆئەوەی پرۆسەی هەستانەوە و نوێبونەوەیەكی بەهێز ڕووبدات و سەرتاپای یەكێتی ڕابچڵەكێنێت و ببێتە كۆنگرەی وەرچەرخانی دوو قۆناغی ڕابووردوو ئایندەی یەكێتی، بۆیە سەرخستنی ئەم كۆنگرەیە ئەركی لەپێشی هەموو دڵسۆز و خەمخۆرانی یەكێتیە.

print

 21 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*