سەرەکی » وتار » خوێیەکە گەنیوە

خوێیەکە گەنیوە

بە بیستنی پەسەند کردنی سزا نادادپەروەرانە سەپێنراوەکەی سەر (سزادراوەکانی ) بادینان لە لایەن دادگای تەمیزی هەولێرەوە!! وتەیەکی فارسیم بەبیردا هات کە دەڵێت( هرچە بگندد نمکش میزنند، وای بە روزی کە بگندد نمک).. واتە هەرچی بگەنێ خوێی لێ ئەدەن، وەی بەو رۆژەی کە خوێ بگەنێت)..!

کێشەی سەرەکی لەم مەملەکەتەی ئێمەدا بە عیراق و هەرێمەکەشمانەوە ئەوەیە کە خوێیەکەمان لە سەرچاوەکەیەوە گەنیوە..!! بۆیە گۆڕینی ناو و کارگە و جۆری کیسە دادی نادات چ لە زەرفی کاغەز دابێت بێت، چ بوتلی پلاستیک یان بشخرێتە شووشەی کریستاڵەوە و بە ئەڵماس و مەرجانیش بڕازێنرێتەوە خۆی گەنیو هەر گەنیوە..!!
گەر کێشە خوێیەکە نەبێت ئەی خێرە:
بوون بە کەوا سوری بەر لەشکری تورک نیشتمانپەروەری بێت..!!
ئەو فڕفڕاندۆمەی کە بووە هۆی لەدەستدانی لە سەدا ٥١ ی خاکی کوردستان هەڵوێستی نەتەوەیی بێت..!!
کەمپەین کردن بۆ ئەردۆغان لەکاتی بانگەشەی هەڵبژاردندا ئەرکێکی هاوسێیەتی بێت..!!
رادەستکردنی شەنگال و جینوسایدی دژ بە ئێزیدییەکان قەزاو قەدەر بێت..!!
کەچی دیشلەمە خواردنەوەیەک لە کونسولخانەی وڵاتێکی هاوپەیمان و هاوار کردن دژی داگیرکاری تورکیا و داوای بژێوی خۆت کردن تاوانێکی دژ بە مڕۆڤایەتی و سیخوڕی و خیانەتی گەورە و تێکدانی ئاسایشی نەتەوەیی بێت ؟؟

شاناز ئیبراهیم ئەحمەد

 653 جار بینراوە