سەرەکی » وتار » ستران عه‌بدوڵڵا » هەم حزب و بزووتنەوە، هەم مۆدێل و سەلیقەی سیاسیپەڕە 27

هەم حزب و بزووتنەوە، هەم مۆدێل و سەلیقەی سیاسی

یەكێتی هەر حزبێك نییە، هەر گردبوونەوەیەكی سیاسی نییە، كە تەنها ئەندامەكانی خاوەندارێتی لێ بكەن، ئابوونەكەی بدەن، رێكخستنی بۆ بكەن و لە كاتی هەڵبژاردندا دەنگی بۆ كۆبكەنەوە و دەنگی بۆ بدەن، ئەمانە لە پێوەر و هەیكەلی حزبدا بایەخی خۆیان هەیە و كەس ناتوانێت لە بایەخیان كەمبكاتەوە، ئەسڵەن كاڵبوونەوەی ئەو پێوەرانە لە چەند وێستگەیەكدا، كاریگەریی خۆی هەبوو لەسەر یەكێتی، بەڵام دیسانەوەش یەكێتی؛ هەر حزب و رێكخستنێك نییە، یەكێتی؛ شتی دیكەشە.

یەكێتی، بزووتنەوەیەكی رزگاریخوازی و مافخوازانەیە، هەر حزبی یاساسەروەریی و كۆتوبەندی قانوون و رێوشوێنەكان نییە، كە ئەمانە لە كۆمەڵی مەدەنی و یاسامەندیدا گرنگە، بەڵكو یەكێتی؛ لە پێشدا، یەكێتیی بزووتنەوەی حقوق و داخوازییەكانە.

جا دانایان و پیاوماقوڵان دەزانن قانوونسەروەریی و حقوقپەروەریی، خوشك و برای یەكن، بەڵام یەك نین و دیارە مانای جیاواز لەخۆدەگرن.

یەكێتی؛ وەكو بزووتنەوەیەكی بە ناوەرۆك شۆڕشگێڕی، هیوا و داوا و جووڵە دەنوێنێت و كۆشش دەكات، نەك ئەندێشەی خۆی قەتیس بكات. دەشێ بە گوێرەی زەمین و زەمان قۆناغبەندی بكات، بەڵام قەت دەستبەردار نابێت و مەرجی لەگەڵ دیموكراسی و مەدەنیەتیش، شێوازی كار و ئامرازەكانە، نەك قەتیسكردنی ئەندێشە و ئاواتەكان. یەكێتی؛ هەروا رەوت و رێبازی سیاسی، مۆدێل و سەلیقەی كاریشە.

لەبەر ئەوە گرنگە بزانین گەرەكە لە هەموو رەهەندەكانەوە یەكێتی ببینین و كۆی دیمەنەكە رەچاو بكەین تا هەڵسەنگاندنەكەمان دروست بێت.

 245 جار بینراوە