سەرەکی » کەلتوور » ئیكیگای هونەری ژیانی ژاپۆنییەكانپەڕە 3

ئیكیگای هونەری ژیانی ژاپۆنییەكان

جۆ پیتەرس

لە فارسییەوە:
كوردەوان محەمەد سەعید

لە كەلتوری ژاپۆنیدا رێگەی زۆر هەن بۆ گەڕان بە دوایی ئاسوودەیی و خۆشبەختیدا، كە دەتوانرێ سوودیان لێ وەربگیرێت، لەم بابەتەدا باسی یەكێك لەو رێگایانە دەكەین ئەویش رێگای (ئیكیگای)یە. كەلتوری ژاپۆنی بەوە ناسراوە كە پەی بە قووڵایی ژیان بردووە، شێوازی ژیانی ژاپۆنی هەر لە نەریتی بچووك بچووكی رۆژانەوە بگرە تا دەگاتە نەریتە دێرینەكانی وەك رێوڕەسمی چا لێنان و چا خواردنەوە پیشانمان دەدات و پێمان دەڵێ: كە لە هەر چركەساتێكی رۆژدا كاتێك هەیە بۆ زەینی روون و هۆشیار.

چی لە ژاپۆنییەکان فێر دەبین؟
لەم جیهانە پڕ لە پەلەپڕوسكێیەدا دەتوانرێ لە پەیبردنی ژاپۆنییەكاننەوە بۆ ژیان زۆر شت فێر بین، فەرهەنگیان رەگ و ریشەی لە بیری بوداییدا داكوتاوەو زۆر شتی لەبارەی بە هێزیی لایەنی باشە و پەیوەندی ژیانی سروشتی و خۆشبەختی ئێمە و بایەخی پەیبردن بە شێوازی ژیانی تێدایە.

بە گشتی ئەم بابەتە و زۆر بابەتی دیكەش لە هونەری ژیانی ژاپۆنییەكاندا دەبینرێت، وەك هەنگاونان لە هونەرەكانی چاودێری بۆنسای، ئیكباناو ئەریگامی، یان تاقیكردنەوەی لێنانی هەندێك لە چێشتە بەلەزەتەكانی ژاپۆنییەكان، دووبارە دۆزینەوەی نهێنییەكانی پشت گەرماوی ژاپۆنی، بەهرە وەرگرتن لە فەلسەفەی رێوڕەسمی چا لێنان و چا خواردنەكەیان، یان ئارام كردنەوەی دڵ و دەروون لە رێگەی حەمام كردنێكەوە لە دارستانێكدا، هەروەها دەتوانرێ لە رێگەی وابی سابی-یەوە بە چاوێكی دیكە بۆ جیهان بڕوانین، یاخود بینینی بەهای جوانیی لە ئاستی نزمدا لە رێگەی كینتسوگی-یەوە.

ئەم نووسینە رازو نهێنی خۆشبەختی رۆژانەو ژیانێكی پڕ فەڕو پڕ لە هات و شادو گەشاوە لەخۆ دەگرێت. زۆر رێگە هەن بۆ ئاسوودەیی و خۆشبەختی، شیوازەكانیش ژاپۆنین، لەم نووسینەدا هەوڵ دەدەین ئەو رێگەو شێوازانەتان بۆ باس بكەین.

هەریەكە لە ئێمە خوازیارین لە ژیاندا هەست بكەین ئامانجێكمان هەیە، ئەوەش ئەو شتەیە كە دڵخۆشمان دەكات و ژیانمان تەژی دەكات لە كامەرانی، شتێك كە وامان لێ دەكات بەیانیان زوو لە خەو هەستین، ژاپۆنییەكان بۆ ئەم جۆرە ژیانە ئامانجدارە وشەیەكیان هەیە ئەویش (ئیكیگای)یە، نزیكە لە واتای (ئامانجی ژیان)ەوە. ئەمە باوەڕو چەقی ئەو هەستەیە كە دەری دەخات تۆ كێیت و گرنگترین شت بۆ تۆ چییە، زۆر كەس لەو باوەڕەدان كە دۆزینەوەی (ئیكیگای) خۆت، واتە ئەو شتەی كە تۆ دەخاتە جووڵە، كلیلی خۆشبەختی و كامەرانییە.

ئیكیگای تۆ شتێكە لە سەرتاسەری ژیانتدا هەیە و روو دەدات، هەر چەندە وا دەردەكەوێ ئەم رووداوە لە ئاستێكی بەرزدایە، بەڵام پێوەرەكانی دۆزینەوەی بچووكن، چونكە ئیكیگای تۆ باس لە رەفتاری سادەی ژیانی رۆژانەت دەكات، بۆ نموونە: ئەگەر ئیكیگای تۆ بیەوێت یارمەتی كەسانی دیكە بدات، جێكردنەوەی كەسێك لە ژوورەكەتدا هەستی خۆشبەختیت پێ دەبەخشێ.

ئیكیگای خۆت تایبتە بە خۆت، هەر لەبەر ئەوەشە كە هەریەكە لە ئێمە بە رێگەی جیاجیا بە دوای كامەرانیدا دەگەڕێین، رەنگە لە رێگەی كارەكەتانەوە، یان لە رێگەی سەرگەرمییەوە بۆی بگەڕێیت، دەتوانی ئیكیگای خۆت لە رێگەی دابین كردنی خەرجی خێزانەكەتانەوە، یان لە رێگەی دەستخۆشانەی جوانییەوە، یان لە رێی پێكەنین و پەرەپێدانی ئاشتییەوە بۆی بۆی بگەڕێیت، تەنانەت دەكرێ لە ماوەی ژیاندا هەست بەوە بكەیت كە ئیكیگای ژیانت گۆڕاوە، رەنگە ئەوەی لە 25 ساڵیدا دڵخۆشت دەكات جیاواز بێت لەوەی لە تەمەنی 65 ساڵیدا بە دڵتەو پێت باشە.

دۆزینەوەی ئیكیگای
دۆزینەوەی ئیكیگای خۆت شتێك نییە لە ماوەی شەوو رۆژێكدا جێبەجێ ببێت، بۆ ئەوەی بتوانی ئامانجی ژیانت لە دێڕێكدا بنووسیت، پێویستت بە لەخۆڕوانین و بیركردنەوە لە خود هەیە، ئەوەش واتا تۆ هەماهەنگی تەواوت لە تەك خودی خۆت هەیە، تەنانەت ئەگەر سەبارەت بە ئیكیگای خۆی بە رێژەیەك هۆشیار بیت، لەوانەیە ساڵانێكی زۆر بوێت تا دەگات بە ئەنجام.

رەنگە بۆچوونێكی راستت هەبێت بەرامبەر بەو كارانەی رۆژانە دڵت پێیان خۆشەو ئەو كارانەش كە بێزارت دەكەن، بەڵام ئیكیگای تۆ لەوە قووڵترە كە حەزت لێ بێت یان لێی نەبێت، بۆ نموونە لەوانەیە حەزت لە كاری باخەوانی بێت، لەی خۆشت بپرسیت: ئایا دڵت بە باخەوانی خۆشە؟ بۆچی باخەوانی دەبێتە مایەی دڵخۆشیت؟ ئایا لەبەر ئەوەیە كە بەبەر چاوتەوە گوڵ و گژو گیاكە گەشە دەكەن؟ یان لەبەر ئەوەیە كە حەز بە پەروەردە كردنی شتە جوانەكان دەكەیت؟ ئایا لەبەر ئەوەیە كە حەز دەكەیت كەسێكی بنیاتنەر بیت و سیستم بەدی بهێنیت؟ لە كاتی وەڵامدانەوەی ئەم پرسیارانەدا لە چوارچێوەی هەموو ژیاندا بیری لێ بكەرەوە. ئایا بە دۆزینەوەی جوانییەكانی پێكهاتەی ژیان، یان پێشكەوتن لە هەر بوارێكی دیكەی ژیانتدا چێژ وەردەگریت؟ كاتێك دەست دەكەیت بە گەڕان بە دوای وەڵامدا، لەوانەیە هەر لە وەڵامەكانی خۆتدا نموونەكانیش بدۆزیتەوە، ئەمەش دەستپێكی دۆزینەوەی ئیكیگای تۆیە.

سەرەتا دەبێ ئیكیگای تۆ ئەو شتە بێت كە كامەرانیت بۆ بەدی بهێنێت و لەبری ماندووبوون ئاسوودەت بكات، تەنانەت ئەگەر ئیكیگای تۆ پەیوەندی بە خۆشحاڵ كردنی كەسانی دیكەشەوە هەبێت، دەبێ خۆشت دڵخۆش بكات. ئیكیگای یارمەتیت دەدات بۆ ئەوەی پەیوەندی لەگەڵ خەڵكانی دەوروبەرت دروست بكەیت، هەر لەبەر ئەوەشە كە ئیكیگای تەنیا لە بیری وەرگرتن و دەستكەوت نییە لەم جیهانەدا، بەڵكو زیاتر لە بیری بەخشیندایە، بۆ نموونە نووسەرێك كە بەرهەمەكەی دەخوێندرێتەوەو دەبێتە مایەی گفتوگۆ، یان هونەرمەندێك كە هونەرەكەی دەبینرێت، یاخود كەسێكی خۆبەخش كە خۆبەخشانە یارمەتی كەسێكی دیكە دەدات، كەواتە ئیكیگای كارایە نەك كارتێكراو، ئەمەش ئەو شتەیە كە تۆ هۆشیارانە چێژی لێ وەردەگریت و هەوڵیشی بۆ دەدەیت، تەنانەت ئەگەر كارەكە لەوپەڕی سادەییدا بێت وەك پیاسەیەك، یان خوێندنەوەی كتێبێك، یاخود قسە كردن لەتەك كەسێكی دیكە.

ئامانجێکی دیاریکراو نییە
ئیكیگای تۆ زۆربەی كات پەیوەندی بەو بابەتانەوە كە تیایاندا دەتوانی پێشكەوتن و گەشە كردن ببینیت، ئەوجا پێشكەوتنەكە لە كاتی كاركردن لە پڕۆژەیەكدا بێت، یان لە كاتی پەرەپێدانی توانای مرۆییدا بێت، یاخود لە بینینی نشونما كردنی منداڵێكدا بێت، لەبەر ئەوە ئیكیگای یەك ئامانجی دیاریكراوی نییە، بەڵكو بەشێكە لە ناوەرۆكی خۆت و هەمیشە لەگەڵتدایەو پێی دەناسرێیتەوە، هێڵی كۆتایی نییە، ئەمەش بەو واتایە نییە كە ئیكیگای ناتوانێ تۆ بە ئارەزووەكانت بگەیەنێت، بەڵكو بەو مانایەیە كە لە ئاستێكدا ناوەستێ، بۆ نموونە ئیكیگای تۆ چاپ كردنی رۆمانێك نییە، بەڵكو ئامانجەكە بەشداری كردنی چیرۆك و بەسەرهاتە لەگەڵ كەسانی دیكەدا، لەبەر ئەوە كاتێك رۆمانێك چاپ دەكەیت، وەك ئەوە وایە بەدەم رێوە ئامانجەكەشت پێكابێت.

پرسیارەكە ئەوەیە: بۆچی ئیكیگای خۆت بە زەحمەت دەدۆزیتەوە؟ لە راستیدا ئەوە كاری زۆرو ماندوبوونی دەوێت، بۆچی ئەو كارانە ئەنجام نادەیت كە حەزت لێیەو لەو كارانەش خۆ بەدوور ناگریت كە حەزت لێی نییە؟ لەبەر ئەوەی پەیبردنی راستەوخۆ بەو شتەی كە وا دەكات خۆت، خۆت بیت و بگەیتە ئەو ئاشتەی راشكاوانە دەری بڕی كە تۆ كێیت و ئامانجت چییە، توانای دەوێت، هۆشیاری بەرامبەر بە ئیكیگای خۆت واتە تۆ بە قووڵی لە خۆت و لەو شتەش كە خۆشبەختت دەكات تێگەیشتووی، واتە تۆ سەبارەت بە دۆزینەوەی هۆكاری خۆشبەختی خۆت ئاگاداریت، ئەمەش وات لێ دەكات متمانەت بە خۆت هەبێت و توانای ئەوەشت پێ دەبەخشێ چاودێر بیت بەسەر ژیانی خۆتەوە، توانای ئەوەت پێ دەبەخشێ چیت بە دڵ نەبێت دەستنیشانی بكەیت و لێی دوور بكەویتەوە.

ئیكیگای رێبەریت دەكات
ئیكیگای تۆ پشتیوانێكە لە رۆژە سەختەكاندا رێبەریت دەكات، لەبەر ئەوەی گومانت نامێنێت و بەرامبەر بەوەی بۆ تۆ گرنگەو بەرامبەر بە بایەخبەندییەكانی ژیانت هۆشیارو بە ئاگا دەبیت، هەروەها یارمەتیدەرت دەبێت لەوەی هزرو ئاوەزو جەستەت هەمیشە چالاك بن، یارمەتیدەر دەبێت بۆ ئەوەی هەمیشە بیری چاك هەمیشە رێبەری ژیانت بێت و هاوكاریشت دەبێت لەوەی كە بەردەوام پەیوەندیت لە تەك دەوروبەرەكەتدا هەبێت.
رەنگە دۆزینەوەی ئیكیگای تۆ چەندان ساڵی پێویست بێت، لەو ماوەیەدا زۆر جار خەڵكی لەوە تێدەگەن، كە لە بری ئەوەی بدۆزرێتەوە، خۆی دەردەكەوێت، لەگەڵ ئەوەشدا هەندێك شێواز هەیە بۆ سەرەتاو دەستبەكاربوون لە دۆزینەوەیدا.

کەی چێژ لە ژیانت وەردەگریت؟
سەرەتا لە پرسیارەوە دەست پێ دەكەیت: چ كاتێك زیاتر چێژ لە چركەساتەكانی ژیانت وەردەگریت؟ بێ ئەوەش كەس داوات لێ بكات، چ كارێك دەكەیت؟ بە منداڵی حەزت لە چ كارێك بووە؟ چی وات لێ دەكات كە زۆر هەستیار بیت؟ پڕ بە دڵ تاسەی چی دەكەیت؟ ئەگەر پارەی لێ دەربكەین، دەتویست چ كارێك بكەیت؟ بە وەڵامدانەوەی ئەم جۆرە پرسیارانە بدەیتەوە، هەست بە نهێنی و پاڵنەری پشت خولیاكانت دەكەیت، هەنگاوی دواتر ئەوەیە كە لە وەڵامەكانی خۆت ورد بیتەوەو بزانێت داخۆ دەتوانی نموونەیان تێدا بدۆزیتەوە.

لێرەدا خاڵی سەرەكی گرنگیدان بە خۆت و هەستەكانتە، كاتێك سەبارەت بە شتێك حەزی زانینت لا دروست دەبێت رێگە بە خۆت دەدەیت بەدواداچوونی بۆ بكەیت، لەبیرت بێت ئەوە حەزی تۆیە، لە بارەی سەرگەرمییەكانی خۆتەوە بەدواداچوون بكە، بزانە بۆچی سەوداسەری ئەو كارەی كە دەیكەیت؟ هەرچەندە ئیكیگای بە تەنیا لە حەزكردن بە شتێكدا كورت نابێتەوەو فراوانترە، بەڵام ئەو سەرگەرمییانەی كە لە قووڵایی ناخدا هەستیان پێدەكەین، زۆر شتمان پێدەڵێن.

وانەزانی كە پێویستە زیاتر لە توانای خۆت گەڕان و بەدواداچوون بكەیت، ئەگەری هەیە پێشوەخت بەوە دەبەیت كە ئیكیگای تۆ روو لە كوێیە، لەبەر ئەوە زانیوتە چ شتێك سەرنجت بۆ لای خۆی رادەكێشێت، تەنیا پێویستت بە كاتە تا بتوانی ئەو هەستەی خۆت لە یەك رستەدا كۆ بكەیتەوە، كات وردە وردە تێدەپەڕێ و تۆش دەبێ لە بیرت بێ، ئەگەر ئیكیگای خۆشت بە تەواوی نەدۆزیوەتەوە، هەر ئەو ئاراستەو حەز كردنەت بۆ كارێكی دیاریكراو هەتەو دڵخۆشت دەكات، یارمەتیت دەدات ژیانێكی پڕ فەڕو فراوانترت هەبێت.

سەرچاوە: nebesht.com

 172 جار بینراوە