سەرەکی » راپۆرت » ئامادەكردنی: دیاری سابیر » لیتوانیا گرتووخانەیەكی گەورە دەكات بە شوێنی مانەوەی كۆچەران

لیتوانیا گرتووخانەیەكی گەورە دەكات بە شوێنی مانەوەی كۆچەران

چوونی ئەو ژمارە زۆرەی کۆچەران بۆ ناو خاكی لیتوانیا ‌و نێشتەجێكردنیان لە كەمپەكانی پەنابەراندا، ئەركی حکومەتی ئەو وڵاتەی سەخت كردووە، بەتایبەتی كە وەرزی سەرما بەڕێوەیە ‌و ئەوەش ژیانی كۆچەران سەختتر دەكات، بۆیە بەرپرسانی حكومەتی ڤیلینوس لە هەوڵی نیشتەجێكردنیاندان لە شوێنێكی باشتردا.

700 كۆچەریان گواستۆتەوە
هێزەكانی سنووری لیتوانیا، گرتووخانەیەكی گەورە لە باشووری خۆرئاوای وڵاتەكەیان دەكەن بە گەورەترین شوێنی مانەوەی كۆچەران ‌و لانیكەم 700 كۆچەریان بۆ سەنتەری كیبارتای گواستۆتەوە، كە پێشتر لە كەمپی رۆدنینكای نیشتەجێ كرابوون.

گرتووخانەی كیبارتای كە بینایەكی گەورەیە، لەمەوبەر تایبەتكرابوو بە هێشتنەوەی زیندانیكراوان ‌و دواتر گواستنەوەیان بۆ گرتووخانەی دیكە لە لیتوانیا.

هەموو جۆرە خزمەتگوزارییەكی تێدایە
دەسەڵاتدارانی لیتوانیا ئاماژە بەوە دەدەن، كە لە باكووری وڵاتەكەیان لە نزیك سنووری روسیا، بینایەكیان بۆ كۆچەران ئامادەكردووە، كە جگە لە خواردن، هەموو جۆرە خزمەتگوزارییەكی وەك گەرمكەرەوە ‌و كارەبا ‌و ئینتەرنێت ‌و ئاوی خواردنەوەی تێدایە. هەروەها لە گرتووخانەی كیبارتای بۆ هێشتنەوەی پەنابەران، شوێنی كات بەسەربردنی تێدایە، وەكو كتێبخانە ‌و هۆڵی وەرزش ‌و لەلایەن هێزەكانی پۆلیسەوە پاسەوانی دەكرێن.
ئارۆناس كۆچیكاس سەرۆكی رێكخراوی كاریتاس لە لیتوانیا، كە رێكخراوێكی ناحكومی نێودەوڵەتییە، رایگەیاندووە: شتێكی باش نییە كە پەنابەران لە گرتووخانە دابنرێن، بەڵام بە رەچاوكردنی دۆخی لیتوانیا، كە ژێرخانێكی ئابووری باش ‌و گونجاوی نییە، گۆڕینی گرتووخانەیەك بە شوێنی مانەوەی پەنابەران هەنگاوێكی باشە.

خولی فێربوونی زمانی لیتوانی بۆ 200 منداڵ
روونیشیكردۆتەوە: سەنتەری كیبارتای بەشێوەیەكی باش ئامادە كراوە ‌و بۆ هەر كۆچەرێك، ژوورێكی تایبەت تەرخانكراوە بە هەموو پێداویستییەكانییەوە. وتیشی: بەپێی بەدواداچوونەكانمان، ئێستا هیچ پەنابەرێك لە كەمپەكاندا نەماون ‌و هەنگاوی دووەمیش ئەوەیە، كە پەنابەرەكان بە ئیشێكەوە سەرقاڵ دەكەین، تا ئەو كاتەی چارەسەرێك بۆ داواكاریی تایبەت بە پەنابەرێتییان دەدۆزینەوە.

بە وتەی سەرۆكی ئەو رێكخراوە ناحكومییەی لیتوانیا: بەم دواییانە خولی فێربوونی زمانی لیتوانی بۆ 200 منداڵی كۆچەر كراوەتەوە ‌و ئەوەش هەنگاوێكی گرنگە، چونكە لە نێوان ئەو 4200 كۆچەرەی هاتوونەتە لیتوانیاوە، نزیكەی 500 منداڵیان تێدایە.

ئاماژەی بەوەشداوە، كە كێشەی گەورەیان خۆی لە دەستەبەركردنی چاودێریی تەندروستی بۆ نەخۆش ‌و ئەو كەسانەدا دەبینێتەوە كە مەترسیی توشبوونیان بە نەخۆشییەكان لەسەرە، بۆیە ئێمە پێویستمان بە باشكردنی دۆخەكەیە.

گرژیی نێوان لیتوانیا ‌و بیلاڕوسیا
دوای هەڵبژاردنەكەی مانگی ئابی 2020 لە بیلاڕوسیا، پەیوەندیی نێوان لیتوانیای ئەندام لە یەكێتیی ئەوروپا ‌و بیلاڕوسیا گرژیی بەخۆیەوە بینی و یەكێتیی ئەوروپاش سزای بەسەر حكومەتی مینسك-دا سەپاند، لە بەرامبەریشدا، بیلاڕوسیا وەو گوشارێك بۆ سەر رێكخراوە ئەوروپییەكە، سنوورەكانی بە رووی كۆچەراندا ئاوەڵاكرد بۆ چوونە ناو وڵاتانی ئەندام لە یەكێتییەكە، رۆژی 10ی مانگی تەمموزی رابردووش، لیتوانیا شورایەكی بە درێژایی 550 كیلۆمەتر لەسەر سنووری خۆی لەگەڵ بیلاڕوسیا دروستكرد، بۆئەوەی رێگە لەو كۆچەرانە بگرێت كە لە بیلاڕوسیا هەوڵی چوونە ناوەوەی ئەو وڵاتەیان دەدا.

سەرچاوە/ euronews

 53 جار بینراوە