سەرەکی » دۆسێ » گروپی «فیلق الرحمن» غوتەی شەرقی چۆڵ دەكات

جەنگ لە سوریا بەردەوامە

گروپی «فیلق الرحمن» غوتەی شەرقی چۆڵ دەكات

میدیا رەسمییەكان لە سوریا، باس لەو رێكەوتنە دەكەن كە لەگەڵ گروپی «فیلق الرحمن» كراوە تا لەو ناوچەی لەژێر كۆنترۆڵی گروپەكەدایە لە نزیك دیمەشق، پاشەكشە بكات.
بەپێی راپۆرتە رۆژنامەوانییەكان، گروپی «فیلق الرحمن»، رازیی بووە حەوت هەزار چەكداری خۆی بە خێزانەكانیانەوە، لە ناوچەی جوبر، و عەرەبین، و عەین ترما پاشەكشە پێبكات.
ئەو چەكدارانە لەپاش رادەستكردنی چەكە قورسەكانیان، بەپێی رێكەوتنەكە لە رۆژی 24ی ئاداری 2018وە بەرەو ئیدلیب بەڕێكەوتوون.
گروپی «فیلق الرحمن»پێشتر رایگەیاندبوو كە بە چاودێری نەتەوە یەكگرتووەكان لەگەڵ سوپای سوریا، گەیشتووەتە رێكەوتنی ئاگربەست لە غوتەی شەرقی.
وەك گروپەكەش ئاماژەی پێكردبوو، ئەو رێكەوتنی ئاگربەستە دەكرێت رێخۆشكەر بێت بۆ ئەنجامدانی وتوێژ لەگەڵ سوپای روسیا، سەبارەت بە زامنكردنی سەلامەتی مەدەنییەكان.
رێكەوتنی پاشەكشەی چەكدارانی گروپی «فیلق الرحمن» بە دووەم رێكەوتنی لەو جۆرە دادەنرێت لەپاش رێكەوتن لەسەر ناوچەی حەرەستا كە لێوەی 1500 چەكداری بزوتنەوەی «احرار الشام» لەگەڵ شەش هەزار مەدەنی لەو ناوچەیە چونە دەرەوە.
بۆمەبەستی چونەدەرەوەی گروپە چەكدارەكان لەو ناوچەیە، دوای رێكەوتن لەگەڵ گروپی «فیلق الرحمن»، گروپی «جیش الاسلام» دەمێنێتەوە كە (تا كاتی ئامادەكردنی ئەم نوسینە) رێكەوتنی لەگەڵدا نەكراوە و شارۆچكەی دۆمای لەژێردەستدایە لە باكووری غوتەی شەرقی.
لەو دەمەی هێزەكانی سوریا و روسیا دەستییان كردووە بە بۆردومانكردنی غوتەی شەرقی ژێر چنگی گروپە چەكدارەكان، لە مانگی رابردووەوە زیاتر لە 1600 كەس كوژراون، ئەوەش بەپێی روانگەی سوریا بۆ مافەكانی مرۆڤ كە چاودێری پەرەسەندنەكانی جەنگ دەكات لە سوریا.
بەپێی «بی بی سی»ی بریتانیاش، رێكەوتن لەگەڵ گروپی «فیلق الرحمن»، ئەم خاڵانە لەخۆدەگرێت:
-راگرتنی هەموو شەڕوپێكدادانەكان لە ناوچەكانی جوبر و زملكا و عەرەبین و عەین ترما.
-دەستكردنی بە دەركردنی بریندار و نەخۆشكەكان لەڕێی مانگی سوری سوریاوە.
-رێگەدان بە چوونەناوەوەی یارمەتییە مرۆییەكان بۆ ناوچەكە.
-زامنكردنی سەلامەتی چونەدەرەوەی چەكدارەكان بە چاودێری روسیا.
-رێگە بدرێت بەو گروپە چەكدارانەی لە ناوچەكە دەچنە دەرەوە، چەكە تایبەتیبەكانیان لەگەڵ خۆیاندا ببەن.
-رێكەوتن لەسەر بڵاوەپێكردنی بازگەكان بۆ پۆلیسی سەربازی روسی.
-رێكەوتن لەسەر ئاڵوزگۆڕی دیلەكان لەنێوان حكومەتی سوریا و گروپی «فیلق الرحمن».
پێشتر بەشار ئەسەد سەرۆكی سوریا لە وتارێكیدا كە لەڕێگەی تەلەڤیزیۆنی حكومەتەوە پەخشكرا، رایگەیاندبوو»هەڵمەتی دژ بە تیرۆر بەردەوام دەبێت»، ئەو راپۆرتانەیشی بە «پوچ و ناڕاست» لەقەڵمدابوو كە باسیان لە رەوشی نالەبارەی مرۆیی دانیشتوانی غوتەی شەرقی كردبوو.
بە گوتەی ئەسەد، ئەوان پشتیوانی لە پێشنیازەكەی روسیا دەكەن بۆ ئاگربەستی رۆژانە بۆ ماوەی پێنج كاتژمێر، تا «زۆرینەی دانیشتوانی غوتەی شەرقی بتوانن هەڵبێن و ئەو ناوچانە جێبهێڵن كە لەژێر چنگی تیرۆریستاندان».
لەبەرانبەردا ولایەتە یەكگرتووەكان، هەڵمەتە سەربازییەكەی حكومەتی سوریای مەحكوم كردبوو، لەگەڵ ئەوەشدا رایگەیاندبوو كە روسیا «هاوپەیمانی دیمەشق»، مەدەنییە بێتاوانەكان دەكوژێت.
بەپێی راپۆرتە رۆژنامەوانییەكان، هێزەكانی حكومەتی سوریا هەوڵدەدەن، غوتەی شەرقی بەسەر چەند ناوچەیەكدا دابەشبكەن.
میدیا رەسمییەكانی دیمەشق دەڵێن»سوپا لە چەندان بەرەوە لە غۆتەی شەرقی لەپێشڕەویدایە و بەردەوام دەبێت لەو هێرشانەی لە بەری خۆرهەڵاتەوە دەستیپێكردوون».
بە گوتەی روانگەی سوریاش بۆ مافەكانی مرۆڤ، سوپا بە تەواوەتی لە كۆنترۆڵكردنەوەی شارۆچكەكانی غوتە نزیكبۆتەوە.
سوپای سوریا بەر لەوەی ئۆپەراسیۆنە سەربازییەكەی لە غۆتەی شەرقی دەستپێبكات، لەگەڵ گروپەكانی ئۆپۆزسیۆن دانوستانی كردبوو، تا دەستەی تەحریری شام (بەرەی نوسرەی پێشوو) لە غوتە بچێتە دەرەوە، بەڵام دەنوستانەكە دووچاری شكستخواردن هات و هیچ درەنجاكێكی ئەرێنی لێنەكەوتبۆوە.
دەستەی تەحریری شام سەدان چەكداری لە هەندێك بارەگادا هەیە لە غوتە و كەمێكیان لە گەڕەكی جۆبەری دیمەشقن، بەڵام «جیش الاسلام» بەهێزترین گروپە لەو ناوچە و رەتیكردبۆوە بەشداریی لە هیچ دانوستانێكدا كردبێت لەگەڵ حكومەتی دیمەشق.
پێشتر نەتەوە یەكگرتووەكان، داوای ئاگربەستی دەستبەجێی كردبوو لە سوریا و بەپێویستی زانیبوو ئاگربەستەكە لانی كەم مانگێك بخایەنێت.
روسیا كە پشتیوانی لە حكومەتی سوریا دەكات، پلانی ئاگربەستی لە ئەنجومەنی ئاسایش رەتكردبۆوە كە ماوەی مانگێكی تێدا دیاریی كرابوو، پلانەكەیشی بە «ناواقعی» وەسف كردبوو.
ناوچەی غوتەی شەرقی دەبوو لەنێوان ئەو چوار ناوچەیەدا بوایە كە لە ساڵی رابردوودا رێكەوتنی هێوركردنەوەیان لەسەر كرابوو تا خوێنەڕشتن تێیاندا كەمبكرێتەوە.
غوتەی شەرقی نزیكەی 400 هەزار كەس تێیدا نیشتەجێیە، و دانیشتوانەكەی لە ساڵی 2013وە بەدەست ئەو گەمارۆیەوە گیرۆدەن كە لەلایەن هێزەكانی حكومەتەوە بەسەریاندا سەپێنراوە، لەئێستاشدا لە دۆخێكی مرۆیی نالەباردا ژیان بەسەردەبەن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەمریكا: سزای زیاتر بەسەر ئێراندا دەسەپێنین

دوای ئەوەی ئێران رێژەی رێگەپێدراوی پیتاندنی تێپەڕاند و پیتاندنی یۆرانیۆمی ...