سەرەکی » ئاراستە » ‎بەیاننامەی كۆمەڵەی خوێندكارانی كوردستان بە بۆنەی (٤٢)یەمین ساڵیادی دامەزراندنییەوە

‎بەیاننامەی كۆمەڵەی خوێندكارانی كوردستان بە بۆنەی (٤٢)یەمین ساڵیادی دامەزراندنییەوە

كۆمەڵانی خەڵكی كوردستان!

مامۆستایان! خوێندكارانی خۆشەویست!

٤٢ ساڵ لەمەوبەر، لە رۆژگاری رەشی فاشیەكاندا، لە دژوارترین هەلومەرجدا، دوای نسكۆ، بە بڕیارێكی بوێرانەو بێ سڵەمینەوە لەوەی ئەوێ رۆژێ سزای دامەزراندنی رێكخراوی پیشەیی و دیموكراتی، لەسێدارەدان بوو؛ لە ٢٦-٤-١٩٧٦ یەكەمین بەیاننامەی دامەزراندنی (یەكێتی خوێندكارانی شۆڕشگێڕی كوردستان) كە دواتر ناوەكەی گۆڕدرا بە (كۆمەڵەی خوێندكارانی كوردستان) بڵاو كرایەوە. ئەمەش پێویستیەكی مێژوویی، دیموكراسی و پیشەیی بوو. ئەركێك بوو هەروەكچۆن بە دامەزراندنی (یەكێتی نیشتیمانی كوردستان) خەونی لەمێژینەی دوژمنان، بۆ كپكردنی دەنگی كورد، لەگۆڕنراو هەرەس بە هەرەس هێنرا، ئاوهاش؛ لە بەرامبەر سیاسەتی شوڤێنی بەعس و داخستنی خوێندنگا كوردییەكان و سەپاندنی پەروەردەو زمانی عەرەبی، ئەم رێكخراوە تێكۆشەرو خۆڕاگرە وەك قەڵایەكی پۆڵایین دژی دوژمن وەستاو یەكەمین بەیاننامەی دامەزراندنی، دەنگدانەوەیەكی فراوانی هەبوو. ئاماژەیەكی گرنگیش بوو كە رێكخستنێكی گەورە، لەپشت دامەزراندنی ئەم رێكخراوەیە، بۆیەش دوو مانگ دوای دامەزراندنی كۆمەڵە، شۆڕشی نوێی گەلەكەمان دەستیپێكرد، بەمەش رژێم راچڵەكی و دەستیكرد بە گرتن و زیندانیكردنی هەڵسوڕاوانی كۆمەڵە، لەو ساوە (كۆمەڵەی خوێندكارانی كوردستان) شۆڕەسواری مەیدانی خەباتی نهێنی، خۆڕاگری لە زیندان، پێشڕەوی لە خۆپیشاندان و هەڵگری چەكی شەرەف بووەو بە درێژایی (١٥) ساڵی خەبات و تێكۆشان تا راپەڕینی شكۆداری گەلەكەمان (١٩٧٦-١٩٩١) كۆمەڵە وەك دووانەیەكی خەبات؛ هەمیشە هەڵگری چەك و قەڵەم بووەو بە خوێن و قوربانیدان، مێژووییەكی پڕ لە سەروەری و شانازی، تۆمار كردووە.
هێژایان!
هەڵگرانی چرای زانست!
پێودانگی ئاستی هەر كۆمەڵێك، پەروەردەو فێربوونە، ئاستی زانستی خوێندكاران و ناوەندەكانی خوێندنە، كە هەر ئەمەشە زیندویێتی و گەشەی بەردەوامی هەر كۆمەڵێك دەردەخات. هەر بۆیە، لە دوای راپەڕینەوە، (كۆمەڵەی خوێندكارانی كوردستان) بە بەرزكردنەوەی دروشمی «خوێندنی هاوچەرخ و گۆڕینی فەلسەفەی خوێندن» بووە پێشەنگ و، ئاڵاهەڵگری گۆڕانكاری و نوێگەری. بۆ خەباتی دیموكراسی، پیشەیی، خزمەتكردن و نوێنەرایەتیكردنی خوێندكارانی كوردستانیش، رێكخراوێكی رچەشكێنی پڕبەرهەم بووە. لە زاخۆوە تا خانەقی هەزاران خوێندكار بە بەردەوامی بەشدارو سوودمەندی كاروچالاكیەكانی كۆمەڵەن، كە بە ئامانجی زیاتر خزمەتكردنیان، كاروچالاكیەكان بەردەوامیان دەبێت. سەرباری ئەمە، یادە نیشتیمانی و نەتەوەییەكان، وەك ئەركێكی نەتەوەیی بەرز راگیراون. لە پێناو ئاشناكردنی زیاتری خوێندكاران بەو زوڵم و زۆرەی لە گەلی كورد كراوە، ساڵانە بە شێوازی جیاجیا، ئەنفال، كیمیاباران، بۆردومانی قەڵادزێ و یادەكانی تر، وەك ئەركێك تا هەمیشە لەیادمان بێت، یادكراونەتەوە. هەروەها وەك ئەركێكی مرۆڤایەتی و هەستكردن بە بەرپرسیارێتی نەتەوەیی و نیشتیمانی، كادیرو ئەندامانی كۆمەڵە خۆبەخشانە كۆمەكیان كۆكردۆتەوە بۆ ئاوارەكان لە هەر ناوچەیەكەوە لە بەر بارودۆخی سەخت و دژواری جەنگ دژی كۆنەپەرستان، روویان لە هەرێمی كوردستان كردبێت. پیشەییانەتر؛ (كۆمەڵەی خوێندكارانی كوردستان) بە ئەركی خۆی زانیوە لە پێناو وەدیهێنانی مافە رەواكانی خوێندكاران، بەڕێگای یاداشتنامە، پێداگیری، خۆپیشاندان، هەموو رێگا مەدەنی و دیموكراسیەكان، بگرێتە بەرو كۆڵ نەدات، بۆیەش هەمیشە دەنگێكی زوڵال و بەهێزبووەو توانیویەتی نوێنەری راستەقینەی خوێندكاران بێت.
كۆمەڵانی خەڵكی كوردستان!
ساڵیادی دامەزراندنی كۆمەڵەی خوێندكارانی كوردستان، هاوكاتە لەگەڵ بانگەشەی هەڵبژاردنی پەرلەمانی عێراق كە بڕیارە لە ١٢-ی مایس بەڕێوەبچێت. ئێمە وەكو كۆمەڵەی خوێندكارانی كوردستان كە یەكەمین ساڵیادە بەڕێ دەكەین بێ پەیامی تایبەتی سەرۆك و رابەرمان، هەڤاڵ مام جەلال، سڵاو دەنێرین بۆ روحی بەرزەفڕی رابەری گەلی كوردستان و، پەیمان نوێ دەكەینەوە كە درێژەپێدەرو پارێزەری رێبازو چەپكەگوڵەكەی دەبین، هەربۆیەش داوا لە خوێندكاران، مامۆستایان و كۆمەڵانی خەڵكی كوردستان بەگشتی دەكەین كە لیستی خاوەن بڕواو نوێبونەوەو گۆڕانكاری، لیستی سووربوون لەسەر جێبەجێ كردنی دەستور و ماددەی ١٤٠و چەسپاندنی دیموكراسی و دژایەتی كردنی شۆڤینیەت و تایەفەگەری و هەڵگرتنی گەمارۆی ئابوری، لیستی شۆڕشی نوێ و راپەڕین، لیستی پشتیوانی خوێندكاران و مامۆستایان، تاكە لیست كە نوێنەری راستەقینەی كۆمەڵانی خەڵكی كوردستان دەبێت و پارێزەری دەستكەوتەكانی بەدیهاتوو، كۆڵنەدان و بەدیهێنەری مافە بەدینەهاتووەكان، لیستەكەی رێبازی مام جەلال و شەهیدان، لیستی ژمارە (١٦٢)ی یەكێتی نیشتمانیی كوردستان هەڵبژێرن.
سڵاو لە گیانی پاكی شەهیدانی كوردو كورستان…

سڵاو لە خەبات و تێكۆشانی ٤٢ ساڵی خەباتكارو تێكۆشەرانی كۆمەڵەی خوێندكارانی كوردستان…
بەرەو سەركەوتنی لیستی ١٦٢ ی یەكێتی نیشتمانی كوردستان…

مەكتەبی سكرتاریەتی‎
كۆمەڵەی خوێندكارانی كوردستان
٢٦/٤/٢٠١٨

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

یوسف و تۆفیقی ئـەحمەد شەماڵ

نەوزاد كەریم لەگەڵ كۆتایی ئەو شەوە درێژو ساردەی كەپاش رێگا ...