سەرەکی » ئاراستە » مام جەلال: لێپرسراوێتی لووتبەرزی‌ و سینگ دەرپەڕاندن‌ و خۆسەپاندن ‌و فەخفەخە نییە

وتارێك بۆ رابردوو، ئێستاو داهاتووش

مام جەلال: لێپرسراوێتی لووتبەرزی‌ و سینگ دەرپەڕاندن‌ و خۆسەپاندن ‌و فەخفەخە نییە

بەشی سێەم

پاراستنی كەسایەتی لەلایەن كادیرانەوە
دووەم شتی كە خراپە لەو مەیدانەدا، هێندێ شتە كە من پێی دەڵێم كلكە قوتێ، واتە كلك تەقێنە، هێندێك لە كادیرەكان فێربوون بۆ خۆڕەپێشكردن دەچنە لای ئەو لێپرسراو و ئەم لێپرسراو، ئەو فابریق كاری حكومەت‌و ئەم و ئەو و چ بڵێین‌و چ بكەین.. چ حەقتان بەو شتانە هەیە؟ ئەوان چ حەقیان بەو شتانەوە هەیە؟ خۆتان ئازادن لە كۆنگرێسی خۆتان كێ هەڵدەبژێرن، هەڵیبژێرن، ئیشی خۆتانە، هەقی خۆتانە، سیاسەتی خۆتانە، بەكاریبهێنن، هەر دوو ساڵ جارێك یان سێ ساڵ جارێك ئەو هەقەتان هەیە. بۆ دەچن سەودا بەو هەقەوە دەكەن‌و موزایەدەی پێوە دەكەن‌و كلكە تەقێنەو وەڵڵا فڵان برادەری لێپرسراو چی بكەین‌و چی نەكەین، ئەوە عەیبە بۆ ئێوە بۆ ئەو برادەرە لێپرسراوەی یەكسەر لە دەمتان نەداتەوە، پاش ئەوە پێویستە ئێوە شەخسیەتی خۆتان بپارێزن، ئێوە سەرچاوەی ژیانی ئێمەن، من بە خۆم هەموو جارێ نموونە دەهێنمەوە بۆ ئەوەی برادەرانی سەركردایەتیش كە نموونەم لەسەر هێنایەوە زویر نەبن:
جەلال تاڵەبانی پارێزەرە، نزیكەی ئەوە چل ساڵە من حقوقم تەواو كردووە، بیكەرەوە بە پارێزەرو لە كەركوك دایبنێ، لە جیاتی ئۆفیسێك باڵەخانەیەكی بدەرێ، لە جیاتی دوو سكرتێر دە سكرتێری بۆ دابنێ، لە جیاتی ئۆتۆمبێلێك، دە ئۆتۆمبێلی بۆ دابنێ، یەك پۆلیس دێ گوێی دەگرێ‌و بە شەق دەیباتە دایەرەو دەیهێنێتەوە.. وایە یان وانییە؟ كێ دەڵێ وانییە قسە بكات؟.. كەواتە جەلال تاڵەبانی-یە؟ بە ئێوەوەیە كاكە، بە یەكێتیی نیشتمانیی كوردستانەوە، بە خوێنی شەهیدانەوە، بەو خەبات‌و تێكۆشانەی كە ئەنجام دراوە. ئێستا دەتوانێ لەگەڵ سەدام حسێن وا بڵێ‌و لەگەڵ ئەمریكا وا قسە بكاو لەگەڵ ئێران وا بڵێ‌و لەگەڵ تورك ئەجاوید چەق بەردوكێ قسە بكا.. بەهۆی ئێوەوەیە.. كاكە.. بۆ لە بیرتان دەچێ؟ بۆ خۆتان سووك دەكەن؟ جەلال تاڵەبانی خۆ رۆستەمی زاڵ نییە تا گورزی سەد باتمانی بەدەستەوە گرتبێت‌و بڵێ كێ دێتە مەیدان بفەرموێ؟ ئینجا پاش ئەوەی بە خۆمم گوت، ئەوە بە هەموو برادەرێكی سەركرداییەتیش دەڵێم.. هەموومان سەروەرییەكەمان، حكومڕانیمان، دەستڕۆیشتنمان بەهۆی ئێوەوەیە، بەهۆی یەكێتیی نیشتمانیی كوردستانەوەیەو بەهۆی شەهیدەكانمانەوەیە. فڵان برادەر لێپرسراوە، سەرۆكی حكومەت ئێمە دامانناوە، یەكێتی دایناوە، ئێوە داتان ناوە، وەزیری ناوخۆ كاك مستەفای خۆتان پێشمەرگە بووە لەگەڵتان، ئێمە كردوومانە بەوەزیری ناوخۆ، یەكێتی كردویەتییە وەزیر، جێگری فەرماندەی گشتی خەباتی خۆی راستە هەیە، بەڵام یەكێتیی نیشتمانی كردوێتییە جێگری فەرماندەی گشتی. هەریەكێك لە برادەرانی سەركردایەتی كاك مستەفا چاوڕەش لێرەیەو هەموو كەسێك خۆشی دەوێ‌و منیش خۆشم دەوێ‌و سوپاسیشی دەكەم بەو بۆنەیەوە، بەڕاستی ئێمە زۆر زۆری لێ رازین، بەڵام باشە كاك مستەفا چاوڕەش كە ئەو هەموو ستایشەشمان كرد كە ئێوە نەبن‌و یەكێتیی نیشتمانیی كوردستان نەبێ ناتوانێ 10 شەو لەو شارە بێت، وایە؟ كەواتە، بۆ خۆمان لێ بگۆڕدرێ؟ هەقیقەتەكە ئەوەیەو واشەو پێوە شانازی دەكەین، خۆ باشە ئێمە مانان كە بووینە سەركردایەتی بە كۆدەتای سەربازی نەهاتووین، هیچیشمان بە هێزی عەشیرەت‌و نازانم چی‌و هێزی خۆمان نەهاتووین، هەموومان بە هیممەتی ئێوەو تێكۆشانی ئێوەو یەكێتی‌و كۆمەڵانی خەڵك، خۆشمان دیارە شتۆكەكمان لەباردا هەبووە، خۆ هەروا نەبووە، بەڵام نابێ خۆمان لێ بگۆڕدرێ، دەبێ ئەو راستییە بزانین‌و ئەو راستییەمان لە بیر بێت كە هەمووی بەهۆی ئێوەوەیە، لەبەرئەوە نە پێویستم بە كلكە قوتێیە، نە پێویستم بە كلكە تەقێنەیە، نە پێویستم بە ماستاوكردنە، بەتایبەت كە ئەمساڵ ماست زۆر كەمە، باسكردن لەگەشەكردنی یەكێتیی نیشتمانیی كوردستان دەبێ بڵێم كەوا لێپرسراوێتی لەناو یەكێتیی نیشتمانیی كوردستاندا هەم شەرەفە، هەم ئەركە. لێپرسراوێتی لووتبەرزی نییەو سینگ دەرپەڕاندن نییە، خۆسەپاندن نییە، فەخفەخەو كەشخە نییە، لێپرسراوێتی ئەركە، ئەو برادەرەی دایدەنێین، بۆ نموونە كاك مستەفای خۆتان كە دەیكەینە وەزیری ناوخۆ، دەبێ ئەركی وەزارەتی ناوخۆ بە چاكترین شێوە راپەڕێنێ، بەهەمان سادەیی پێشمەرگایەتی، بەهەمان گیانی پێشمەرگایەتی، بە هەمان ژیان‌و گوزەرانی كە لێرە هەیبووە. دەبێ لەوێش هەروا بێ. ئەو وەختە سەركەوتوو دەبێ‌و ئەو وەختە ئەركی سەرشانی خۆی بەجێدەهێنێ.
لێپرسراوێتی سەروەریشەو ئەركیشە
(صاحب المعالی) نییە، تێكۆشەر مستەفای سەید قادرە، لەبەرئەوە ئەویشم خۆش دەوێ بۆیە بەردەوام نموونەی لەسەر دەهێنمەوە.. واتە پێی دەوێرم، لەبەرئەوە پێویستە برادەران ئەوەش بزانن كە بەڵێ لێپرسراوێتی سەروەریشە، بەڵام ئەركیشە.. سەروەرییە شەرەفی ئەوەی پێ بدرێ‌و خەڵك خۆشی بوێ‌و یەكێتییەكەی خۆی خۆشی بوێ‌و خەباتەكەی بنرخێنێ‌و ئیشێكی پێ بسپێرێ، بەڵێ سەرچاوم، بەڵام دەبێ دیسان بزانین ئەركە، دەبێ بزانین ئەم لێپرسراوێتییە سنووردارە، بۆ نموونە ئێمە دەمانەوێ سەركردایەتی دابنێین، سەركردایەتی بەپێی پەیڕەو 25 كەسە، بەڵام لەبەر بارودۆخی ناهەموار زۆر رۆیشتووە، ئەگینا 25 كەسە. ئێمە نزیكەی 250 هەزار ئەنداممان لە یەكێتی هەیە، دەكرێ هەموویان بكەینە سەركردایەتی؟ دەكرێ هەموویان ئەندامی مەكتەبی سیاسی بن؟ دەكرێ هەموو ئەندامانی سەركردایەتی، ئەندامی مەكتەبی سیاسی بن؟ ناكرێ.. شتێكی سرووشتیە لێپرسراوێتییەكە سنووردارەو لە هەموو یەكێتیی نیشتمانیی كوردستان 250 هەزار ئەندامە، 25 كەس هەڵدەبژێردرێ بۆ سەركردایەتی، لەناو ئەو سەركردایەتییەشدا ژمارەیەكی دیاریكراو بۆ مەكتەبی سیاسی هەڵدەبژێردرێن، لەناو ئەوانیشدا كەسێك بۆ سكرتێری گشتی هەڵدەبژێردرێ، خۆ ناكرێ ئەوەندە زۆربین هەموومان بڵێین، باشە.. هەقی هەر كەسێكە خواست‌و ویستی ئەوەی هەبێ ببێتە سەركردایەتی‌و مەكتەبی سیاسی‌و سكرتێری گشتی، بەڵام بە رێگەی سروشتی خۆی، هەڵبژاردن‌و فیداكاری كردن‌و خۆبەختكردن‌و نیشاندانی ئیمكانیات‌و توانایی خۆی، بۆیە دەبێ برادەرانیش تێ بگەن ناكرێ هەموو كەس لێپرسراو بێت. ئێوە 26 هەزار ئەندامتان هەیە.. یەكێكن لەو مەڵبەندانەی كە مایەی شانازی یەكێتیی نیشتمانیی كوردستانن لە هەموو بوارێكدا، لە حزبایەتیدا زۆر زۆر باشن، لە خەباتی جەماوەرییدا زۆر زۆر باشن، لە پێشمەرگایەتیدا هەزاران پێشمەرگەتان هەیەو هەمووش پێشمەرگەی قارەمان‌و شەڕكەرو تێكۆشەرن. بەڕاستی وەكو پێم گوتن دوێنێ من لەگەڵیان كۆبوومەوە، من‌و كاك جەبار لە خۆشیاندا دڵمان گەش بۆوە. مەڵبەندێك ئەو هەموو سەروەرییەی هەبێ، ئەو هەموو پێشمەرگە قارەمانانەی هەبێ، بۆ بێت لەكەداری بكات‌و بەوەی وەڵڵا كێ دەبێتە جێگری مەڵبەند یان نا… كێ بوو، نەبوو، كامتان پێ باشە هەڵیبژێرن، سەرچاوان ئێمە رێزی دەگرین، بۆ ئێمە وەكو یەكە جیاوازیان نییە، بەڵام ئەوە ناهێنێ مرۆڤ لەسەری خەفەت بخواو تووڕە بێ‌و جا نازانم دڕدۆنگ بێ‌و پرسە دابنێ، رۆژ هەڵدێ‌و وەكو خۆیەتی و شەوورۆژیش یەك لە دوای یەكدا دێن‌و چەرخی دنیاش دەسووڕێتەوەو چیش مێژوو راناوەستێ. بەڵكو دەبێ بە گیانێكی وەرزشوانانە وەربگیرێ، چۆن دوو تیپی فوتبۆڵ یاری دەكەن كێ بردییەوە چەپڵەی بۆ لێدەدەین. سەرچاوان، كێش گۆڵی كرد پێی دەڵێن ئافەرم.. بەڵام ئەوە نابێ ببێتە مایەی نیگەرانیی‌و گرووپ گەریی‌و دەستەگەریی‌و زویربوون‌و ئەو شتانە.. لێپرسراوێتی سنووردارە، كاكە چی بكەین قابیلە هەمووتان بكەینە ئەندام مەڵبەند؟ وەختی خۆی لەشكركاشان هەبوو، دەڵێن هەموویان ئەفسەر بوونە، سەربازیان تێدا نەبووە، بەیانیان یەكێك مابوو زوڕنای بۆ لێدەدان بۆ ئەوەی هەستن، كەس هەڵنەدەستا، چونكە سەرباز نەمابوو، یەكێك فەرمانی دەكرد وەڵاخەكان زین بكەن، كەس نەبوو زینیان بكات، چونكە هەموویان ببوونە ئەفسەر، قابیلە لەم ئاخیرەی تەمەن ببینە عەسكەركاشان؟.
بواری خەبات
پێشمەرگە لێپرسراوێتی سنووردارە، حزبایەتی لێپرسراوێتی سنووردارە، ئەو لێپرسراوێتییانە خۆتان پڕی بكەنەوە، داومانەتە دەست خۆتان، بە هەڵبژاردن پڕی بكەنەوە، جاران رەنگە حەقی گلەییتان هەبوو بەوەی بۆ فڵانتان داناوە، بۆ فڵان دانانێن، دەی كاكە ئەوە دامانەوە دەست خۆتان‌و دەستنوێژی خۆتان، خۆتان، كێ دادەنێن ئێمە سەرچاو قبووڵی دەكەین، بەڵام ئەوەی كە ئێوە دایدەنێن، دەبێ ئەو ئەركی خۆی بزانێ‌و ئەوەش كە دەرناچێ دەبێ زویر نەبێت‌و خەبات بكات بۆ جارێكی دیكەو بواری خەباتیش وەكو گوتم گەلێك زۆرە، خەباتگێڕی راستەقینە لەناو یەكێتییدا زۆرە، بەڕاستی ئێمە رێكخراوێكین دەتوانین شانازی بە ئەندام‌و كادیرەكانی خۆمانەوە بكەین‌و دەتوانین شانازی بە پێشمەرگەكانی خۆمانەوە بكەین، دەتوانین شانازی بە فیداكاری ئێوەو مانانەوە بكەین، چەند نەختۆكەك ژەنگ لە خەنجەرە جەوهەردارەكەمان نیشتووە، مشت‌وماڵی بكەینەوە، نەیهێڵین، یەكێك لەو ژەنگانە، ژەنگی پلەوپایەیە… پیاوێكی تێكۆشەر فڵانە كەس چ لێپرسراوی مەڵبەند بێ چ جێگری مەڵبەند بێ، چ كادرێكی تێكۆشەر بێت هەمان كەسە، هەمان توانای هەیە، هەمان رێزی هەیە، هەمان خەباتی هەیە، هیچ لەوە كەم ناكات‌و بەو شتە زیاد ناكات. لەبەرئەوە پێویستە خەباتگێڕی راستەقینە كە لەناو یەكێتی دا ژمارەیان زۆرە، ئەگەر ژەنگیان لێ نیشتووە مشت‌وماڵێكیان بكەینەوە، وەكو خەنجەرە جەوهەردارەكە، ئەو خەباتگێڕە راستەقینانە دڵسۆز بن، فیداكار بن، لەخۆبووردوو بن، خۆنەویست بن، بەم جۆرە دەتوانن رێزو حورمەتی خۆشیان لەناو كۆمەڵانی خەڵكی كوردستاندا زیاد بكەن.. ئێمە پێویستمان بە گەشەكردن هەیە، ئەمساڵ دەبێ ساڵی گەشەكردن بێ، ئەوە چەرخی بیست تەواو دەبێ، چەند مانگێكی دیكە، هەشت مانگیتر ئێمە دەچینە چەرخی بیست‌و یەكەوە، ئەو چەرخەی كەوا ئەو هەموو گۆڕین‌و پێشكەوتنەی تێدا بەدەستهاتووە، بەداخەوە داگیركەرانی كوردستان وڵاتی ئێمەیان بەدواكەوتەو بەپاشكەوتە هێشتۆتەوە، بەڵام ناكرێ ئێمە بە هەمان جلوبەرگ‌و هەمان بیروبۆچوون‌و راو هەڵوێستەوە بچنە چەرخی بیست‌و یەكەمەوە، دەبێ بە بەرگی نوێ، بە گیانێكی نوێ، بە رێبازێكی راستەقینەی راست، بە بیروباوەڕی راستەقینە، بە دروشم‌و رێبازی گونجاو لەگەڵ واقیعدا بچینە ئەو چەرخەوە. ناكرێ هەتا رۆژی قیامەت بەهەمان شێوەی 25 ساڵ لەمەوبەر كە یەكێتیمان پێ دامەزراند، ئێستاش وابڕۆین، گوڕوتینێكی زۆرمان پێویستە. ئەمساڵ گوتوومانە كەوا گەشەكردن دەكەین بە دروشمی خۆمان، گەشەكردن لە هەموو بوارەكاندا، ئەوەی بۆم باسكردن گەشەكردنە لەناو یەكێتییدا. سەبارەت بە گرنگییەكەی بۆ ئەوەی ئینشاڵڵا باشی تێبگەن‌و ئەگەر پێتان باش بوو كاری پێبكەن. بەڵام ئەو گەشەكردنە دەبێ لەناو هێزی پێشمەرگەشدا بەردەوام درێژەی هەبێ، لەناو هێزی پێشمەرگەشدا ئێمە بەتەماین خولی زیاتر بكەینەوە، ئێستا لەمكاتەی كە قسەتان بۆ دەكەم (دوو سەد و چل و شەش و حەفتاو شتێك) پێشمەرگەی دێرینی تێكۆشەر كە تواناییان هەیە لە كولیەی عەسكەری دەرس بخوێنن، ئەوانە هەم دەبنە ئەفسەری لێزانی نەزەریزان، هەمیش پێشمەرگەی دێرینی تاقیكراو و خاوەن ئەزموون‌و خاوەن مومارەسەی زۆرن، دوولا كۆدەكەنەوە، دوو سەروەریی بەیەكەوە كۆدەكەنەوە، لەبەرئەوە بێگومان فەرماندەی زۆر باشیان لێ دەردەچێ، چەندین خولی جیاجیا دەكەینەوە، كەتیبەی جیاجیا دروست دەكەین، هێزەكانی خۆمان گەشەپێدەدەین، لەشكری تایبەت لە هەر هێزێك دروست دەكەین، ئەوانەی ساختەچی‌و فرت‌و فێڵكەرن، لایان دەبەین، بۆ نموونە من دەمەوێ شتێكتان پێ بڵێم، هەرچەندە گوتم ئێمە شانازی بە هێزی پێشمەرگەوە دەكەین، زۆر زۆر باشە جێی هیواو دڵخۆشكەرە، بەڵام رەنگە هێشتا مابێ، بۆ نموونە لەم رۆژانە من كەشفم كرد كەسانێك هەن دوو مەعاش وەردەگرن، لە حكومەتیش وەردەگرن، لەناو پێشمەرگەش وەردەگرن، سەدجار گوتمان نابێت دوو مەعاش وەربگرن، لەبەرئەوە دەرمانكردن لەپێشمەرگایەتی، هەندێك هەیە بەداخەوە لەناو پێشمەرگایەتی قاچاغچێتی دەكات، ئەوەمان قبووڵ نییە بە هیچ جۆرێك، ئەوە سومعەی پێشمەرگە تێكدەدات، سومعەی یەكێتی تێكدەدات، سومعەی خۆشیان تێكدەدات، راستە ژمارەیەكی زۆر كەمن، بەڵام ئەو زۆر كەمەش نابێ هەبێ، ئەوە دڕك‌و داڵە، دڕك‌و داڵی ناو یەكێتییە، بژاركردنی دەوێ، ناو هێزی پێشمەرگەیە. هەندێك هەیە لاساری دەكەن، یاسا جێبەجێ ناكەن، یەكێك لە ئیشەكانی ئێمە كە ئەمساڵ دامانناوە، حوكم حوكمی قانون بێت، واتا ئەو حكومەتەی خۆمان دامانناوە، حكومەتی خۆمانە، حكومەتێك نییە، حكومەتی بێگانە بێت‌و نە بەسەرماندا سەپێندرا بێت، نە بە كۆدەتای سەربازی هاتبێت، حكومەتێكە كە خۆمان دامانناوە، فڵانەكەس، وەرە تۆ برا ببە بە سەرۆكی حكومەت، فڵانەكەس ببە بە وەزیر، فڵان بەوە. ئەوە بە ئیرادەی خۆمانە، بە ئەمری خۆمانە، بە دەستووری خۆمانە، لەبەرئەوە دەبێ خۆمان حورمەتیان بگرین، ئەو بڕیارانەی ئەوان دەیدەن، جێبەجێیان بكەین، هەندێك لە برادەران لە پێشمەرگەوە دەستمپێكرد، فێری لاساری بوونە، بۆ نموونە لە خاڵی پشكنین راناوەستن، لەسەر هەموو كەس پێویستە، لە مەكتەبی سیاسییەوە پێویستە تا سەر فەرماندەی فەرماندەییەكان، تا سەر فەرماندەی لەشكرەكان، تاسەر ئێوە تاسەر مەڵبەند، لە هەموو خاڵێكی پشكنین كە داوایان لێكردن راوەستن، بۆ؟ چونكە ئەوە حكومەتی خۆمانە، چونكە ئەوە ئەمری حكومەتی خۆمانە، نابێ بۆ نموونە سبەینێ لە كاك مستەفا چاوڕەشیان داواكرد، بڵێ ئەوە چییە؟ پۆلیسێكی… من ئەندامی سەركردایەتیم، ئەوە پۆلیسی…… نییە لەوێ، ئەوە كۆسرەت رەسوڵە سەرۆكی وەزیرانە، ئەوە مولازم عومەرە، ئەوە سەید مستەفایە، وەزیری ناوخۆ، ئەوە ئەو لەوێیە، دەبێ چاو بنوقێنێ نەڵێ وەڵڵا پۆلیسێك لەوێیە، بڵێ وەڵڵا ئەوە سەید مستەفایە، ئەوە مولازم عومەرە، ئەوە كۆسرەتە، لەبەرئەوە دەبێ گوێڕایەڵی بێ، حكومەتی خۆمانە، قەراری خۆمانە، ئەگەر خۆمان جێبەجێی نەكەین كێ جێبەجێی دەكات؟ ئەو لاسارییە دەبێتەهۆی كارەسات، وەكو ئەو كارەساتەی لە حاجیاوا روویدا، یاخود دەبێتەهۆی قاچاغچێتی، ئەو كەسانەی لاساری دەكەن من بۆ دوو هۆی دەگێڕمەوە، هەرچەندە كاك موحسین بایز رازی نییە لەسەر هەردوو هۆكەی من، یەكێكیان عەنتەرییەتە، كاكم عەنتەرە تێدەپەڕێت، چۆن دەبێت رابگیرێت؟ بەفیزە، بۆ كاكە بۆ؟ رابگیرێی چی كەم دەكەی؟ من هەموو جارێ خوا ئەیزانێ بە پێشمەرگەكانی خۆم دەڵێم كە لە خەتە سوورەكە، لە ئاگرە سوورەكە واتە لە گڵۆپە سوورەكەی ترافیك لایت تێدەپەڕن، كاكە ئەگەر من ئیحترامی قانون نەگرم، كێ دەبێ بیگرێ؟ ئەگەر مەكتەبی سیاسی نەیگرێ كێ دەبێ بیگرێ، ئەگەر سەركردایەتی نەیگرێ، كێ دەبێ بیگرێ؟ ئەگەر مەسئوولەكان نەیگرن، كێ دەبێ بیگرێ؟ خۆ قانوون بۆ فەلەك دانەنراوە، بۆ هەموومان دانراوە، كە دەڵێین حكومەتی قانوون واتە هەموومان رێز لە یاسا دەگرین، رادەوەستین، بەسەرچاو كاكی پۆلیس ئەمرت بە چییە؟ تەفتیشی دەكەیت. كاك مستەفاو كاك رەفعەت وەزیرانی ناوخۆو دارایی شتێكی خۆشیان بۆ گێڕامەوە، زۆرم پێ خۆش بوو. نازانم كەی بووە لە هین گەڕاونەتەوە هاوینی رابردوو، پۆلیسەكە نەیناسیون، گوتوویەتی راوەستن لەپێشەوە، چووە پشتی ئۆتۆمبێلەكەی كردۆتەوە، گوتوویەتی ئینجا بڕۆن خواحافیزتان بێ، زۆر چاكە.. چیەو چ عەیبەو چیان كەم كرد؟ چاوێكیان لەدەستدا؟ قاچێكیان پەڕی؟ دەستێكیان بڕا.. چبوو؟ سەرچاو قانوون تەتبیق كراو مەمنون، ئەوە پێویستە حزبییەكان ئێوە باشی تێ بگەن، مەسئوولە عەسكەرییەكان ئێوە باشی تێ بگەن، ئینشاڵڵا دەیكەینە ئەمر بۆ عەسكەرییەكان، ئینشاڵڵا بۆ سەركردایەتیش دەیكەین بە فەرمان، ئێوەش دەبێ بیزانن، ئیحترامی قانوون، واتا ئیحترامی حكومەتی خۆت.
موخالەفەی قانوون قبووڵ ناكرێت
ئەمڕۆ قایمقامی ئێرە شتێكی بۆ نووسیم حەزدەكەم لەبەرچاوی هەمووتان پێی بڵێم قایمقامە، سەڵاحییەتی هەیە بیكات، هەر كەسێك موخالەفەی قانوون دەكات لێی قبووڵ مەكەن، بانگیكە بڵێ كاكە ئەوە قانوونمان هەیە، حكومەتمان هەیە. بڵێ موخالەفەی قانوونە، تكایە بەخۆشی پێت دەڵێم، نەیكرد بیداتە دادگا.
حوكمی قانوون بسەپێنن، حوكمی قانوون دەبێ بەرقەرار بێ لە سەرتاسەری كوردستان، لە هەموو ئاستێكدا، لە سەری سەرەوە تا خوارەوە، قایمقام، قایمقامە، ئەركی خۆی جێبەجێ دەكات، بەپێی قانوون ئیشی خۆی بكات، لە كەس نەسڵەمێتەوە، هیچ كەسێك لەم كوردستانەدا لەسەروو یاساوە نییە، نە مام جەلال، نە سەرۆكی حكومەت نە ئەندامانی مەكتەبی سیاسی، نە جێگری فەرماندەیی گشتی، نە وەزیری ناوخۆ، هیچ كەسێك لە سەروو یاساوە نییە، هەموویان لە خوار یاساوەن، دەبێ بۆ یاسا ئیش بكەن‌و بەپێی یاسا ئیش بكەن، یاساكە خراپە، دەیگۆڕین بەدەست خۆمانە، بەڵام ناكرێ لێی هەڵگەڕێینەوە، وەڵڵا من مەسئوولی نازانم چیمە، چۆن راوەستم؟ ئەوە هۆیەكیانە عەنتەرییەتەكەی هۆیەكی تریان من دەڵێم ئەو قاچاغچییانەیە، شتی تێدایە بۆیە ناوێرن، كاك موحسین بایز قبووڵی نییە، دەڵێ نا هەر ئەوەكەی دووەمە هۆیەكەی یەكەم نییە، من دەڵێم ئەویشەو ئەویشە، دەی كاكە ئەگەر تۆ مەسئوولی، پێشمەرگەی فڵانەكەسی، چ زەرەرە رادەوەستم، با ئۆتۆمبێلەكەشت تەماشا كات، راوەستە هیچی تێدا نەبوو، دەڵێ خواحافیز سەرچاو، ئەگەر شتێكی تیا نییە. ئەگەر زویری لەوە، ئەگەر قاچاغچێتی ناكەیت بۆ زویری؟ ئەوە حكومەتی خۆمانە، حوكمی خۆمانە، بەتایبەتی.. قاچاغچێتی لە كێ دەكەن؟ لە حكومەتی عیراقی دەكەن؟ قبووڵمانە، لە توركیای دەكەن؟ قبووڵمانە، لە ئێرانی دەكەن؟ قبووڵمانە، بەڵام قاچاغچییەتی لە مەعاشی شەهیدان‌و پێشمەرگەو خەڵك، ئەوە تاوانە! ئەوە پیسترین جۆری دزییە لە كوردستان، حكومەتی ئێمە بەچی دەژیێت، مەعاشی پێشمەرگە بە چی دەدەی، یارمەتی كەسوكاری شەهیدان بە چ دەدەی؟ ئەو شتانەی كە دەمانەوێت، ئەو داخوازییانەی هەتانە فڵانە شتمان بۆ بكەن‌و فڵان جادە قیرتاو بكەن، نازانم.. هین بكەن، بە چی بێنین؟ كانییەك شك دەبەن زێڕی لێ هەڵبقوڵێ، بچین كۆی بكەینەوە بیهێنین؟ سەرفی بكەین؟ سەرچاوەیەك شك دەبەن بچین پارەی لێ بهێنین؟ نە   گومرگ دەدەی، نە زەریبە دەدەی، نە بەرهەمی كارگەكان دێت، حكومەت لەو شتانە سەرچاوەی هەیە، لەبەرئەوە ئەوەی كە دەچێت گومرەگەكەمان لێ دەدزێت، واتا لە كێی دەدزێ؟ لە شەهیدان دەدزێ.. لە پێشمەرگە دەدزێ، لە مەئموری حكومەت دەدزێ، لەو پرۆژانەی دەدزێ كە بەدەستمانەوەیە لەبەرئەوە ئەوە پیسترین دزە، ئینسانێك دزی بكات، ئەوە لە میللەت دزی دەكات، لە شەهیدان دزی دەكات، لە پێشمەرگە دزی دەكات، ئەوە پیسترین دزە، دەبێ پیسترین‌و قورسترین سزا بدرێت. یەكێك دێ بۆ نموونە دەڵێ فڵانە كەس قاچاغچێتی دەكات‌و برای شەهیدە، زۆر چاكە.. كەسی شەهید بۆ ئەوە شەهید بووە براكەی قاچاغچێتی بكات‌و مووچەی شەهیدانە بدزێت‌و مووچەی پێشمەرگە بدزێت؟ بۆ ئەوە شەهید بووە ولاتەكەی رزگار بێ، كوردستانێكی ئاسوودە هەبێ، حكومەتێك هەبێ، بۆ ئەوە شەهیدە نەبووە براكە بچێ دزی پێ بكات، بە پێچەوانەوە ئەوەی كە دزی ئەكات برای شەهیدە لە پێش هەموو شتێك ئیهانەی شەهید دەكات. لەبەرئەوە لەسەر ئەویش پێویستە سزایەكی توندی بدەین لەسەر دزییەكەی‌و لەبەرئەوەی ئیهانەی برا شەهیدەكەشی دەكات، پێویستە سزایەكی بدەین، لەو مەیدانەدا حەزدەكەم فێر بن تكایە… تكاو رجا مەكەن، لەو بابەتە رجاش بكەن بە قسەتان ناكەین لەپێشەوە پێتان دەڵێم، بۆیە دەڵێم چونكە هەندێ جار تكام بۆ دێ لەو ناوچەیە، مومكین نییە لەسەر دزی كردن لە موڵكی میللەت، لە هینی حكومەت، مومكین نییە تكای هیچ ئینسانێك قبووڵ بكەین، ئەوەش هۆیەكەیەتی‌و لەبەر چاوتانەو پێم گوتن. بۆیە پێویستە ئێوەش بچن بەگژ ئەو شتانەدا، بچن بە گژ ئەو دیاردەیەدا. من باوەڕم بەوە نییە كە مەسئوولەكانی پێشمەرگە نازانن كێن لەناو هێزەكاندا قاچاغچییەتی دەكەن، باوەڕیشم بەوە نییە ئێوە ئاگاتان لێ نییە، هەموو ئەو بیست‌و شەش هەزار كەسەی
print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

عومەر شێخمووس:لە رۆژئاڤا كورد كارتی گرنگی سیاسی لەبەردەستە

عومەر شێخمووس سیاسەتمەدار و كەسایەتیی سەربەخۆی رۆژئاڤای كوردستان رایگەیاند: لە ...