سەرەکی » وتار » ئاشتی‌ عه‌بدوڵڵا‌ » شاگردیش مرۆڤە!!

شاگردیش مرۆڤە!!

ماوەیەكە لەتۆڕە كۆمەڵایەتییەكان لەدوای بیروبۆچوونێكی جێگری سەرۆكی حكومەتی هەرێمی كوردستان لە تیوتەردا، سەبارەت بەكاركردنی گەنجان و جۆری پیشەكەیان، مشتومڕێكی زۆر هاتۆتە ئاراوە.
لێرەدا قسەم لەسەر قسەكەی بەڕێزیان نییەو بەرگریشی لێ ناكەم، ئەویش وەك هەر تاكێكی تر راوبۆچوونێكی خۆی دەربڕیوە لەچوارچێوەی گفتوگۆیەكدا، ئەگەر ئێمەش بۆچوونی خۆمان بڵێین لەسەر ئەم قسەیە، ئەوا قسەی زۆر هەڵدەگرێت و دەبێت بگەڕێینەوە بۆ سەرچاوەی گرفتە ئابووری و سیاسییەكان، كە گەنج و خەڵكی ئەم هەرێمەی بەم رۆژە گەیاند، كە باروگوزەران و نان پەیداكردن ببێتە باس و خواسی تۆڕە كۆمەڵایەتییەكان، كە ئەمە سادەترین مافی هاووڵاتییە كە ژیان و گوزەرانی دابین بكرێت.
گەنج؛ بەخاوەن بڕوانامەكان و بێ بڕوانامەكانیشەوە، بێكارن، لەكاتێكدا كە هەلی دامەزراندن لەنێو دامەزراوە حكومییەكاندا نییە، لەهەمان كاتدا بەهۆی بێ پلانی بۆ دروستكردنی كارگەو شوێنی وەبەرهێنانی بەروبوومە ناوخۆییەكان، كە ساڵانە بڕێكی زۆری بەخەسار دەچێت، دەكرا چەندین كارگە دروست بكرێت و گەنجەكانمان تێیدا هەم كاریان دەستبكەوێت و هەم ببینە خاوەنی بەرهەمی خۆماڵی و بەروبوومەكانیشمان بەخەسار نەچێت.
دەی ئەمەش قسەیەكی ترەو ئەمەوێ بچمە سەر ئەساسی بابەتەكە، ئەوەی مەبەستمە لێرەدا ئاماژەی پێ بكەم جۆری پیشەیە! كە ئیشكردن عەیبە نییە كاتێك یاسایی بێت، بەڵكو عەیبە ئەوەیە كەسێك خۆی بەگەورەتر لەپیشەیەك بزانێت.
لێرەوە ئەوەی كە نیگەرانی كردووم، بێبەهاكردنی پیشەی ئەوانی ترە، كە بڕوانامەیان نییە و ژیان ئەو دەرفەتەی پێنەداون بخوێنن و ئێستا پیشەیەكیان هەیە و سەربەرزانە بژێویی خۆیان و خێزانەكانیانی پێ دابین دەكەن، بەو جۆرەی ئێستا قسەدەكرێت لەسەر پیشەی ئەوانی تر، بێبەهاكردنی پیشەیەك كە نانی سەربەرزی پێ پەیدادەكرێت، بێڕێزییە بەشكۆی مرۆڤەكانی تر، كە جگە لەو جۆرە پیشانە ناتوانن كارێكی تر بكەن، ئیتر ئەو پیشەیە (ترۆزی فرۆشتنە یان فیتەریە یان سەوزەو پاقلە فرۆشتن و شاگردیە)، هەموویان جێی رێزن و كەرامەت و شكۆی مرۆڤەكان بە پیشە هەڵناسەنگێنرێت، زۆرن ئەوانەی بڕوانامەی عیملاقیان هەیە و بەقەد تورێكی سەر عەرەبانەكەی سەوزە فرۆشەكە سوودی بۆ خەڵك و خاك نەبووە، بگرە هەندێكیان بوونەتە بارێكی گران و جار هەیە نەك هەر لەگەندەڵی تێوەگلاون، بەڵكو چارەنووس و ژیانی خەڵكیشی خستۆتە مەترسییەوە، باشترین نموونە ئەو خاوەن بڕوانامە عیملاقانەن كە بازرگانی بەدەرمانەوە دەكەن و لەبری چارەسەر، ژەهرمان دەرخوارد دەدەن!.
ئەم بابەتەی كە ئێستا تۆڕە كۆمەڵایەتییەكانی بەخۆیەوە سەرقاڵ كردووە لەدوای دەربڕینی بیروبۆچوونی سیاسەتمەدارێكی ئەم هەرێمەوە، كە لەو رێگەیەوە شكۆی هەزاران خاوەن پیشەی پێ دەشكێنرێت و بابەتەكە تێكەڵاوی ململانێی سیاسی كراوەو مەبەست لێی لێدانێكی سیاسییە، بەڵام لەم لێدانە سیاسییەدا هیچ مۆڕاڵێكی ئینسانی و سیاسی رەچاونەكراوە، چونكە ئەمە لێدانە لە زۆرێك لە تاكەكانی ئەم كۆمەڵگەیە، كە بەكەرامەتەوە پیشەیەكیان هەڵبژاردووەو نان پەیدا دەكەن.
ململانێی ناتەندروست و فەوزا سیاسییەكە بەجۆرێكە، بەها مرۆییەكانیشیان لەبیر كردووە، كە ئینسان هەر ئینسانە، جا بڕوانامەی هەبێت یان نا، شاگرد بێت یان وەزیر بێت پێویستە رێز لە شكۆو كەرامەت و پیشەكەی بگیرێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*