سەرەکی » راپۆرت » حه‌وته‌مین ساڵیادی كه‌ناڵی ئاسمانیی كه‌ركوك كرایه‌وه‌

دیاری مام جه‌لال بۆ شاری كه‌ركوك

حه‌وته‌مین ساڵیادی كه‌ناڵی ئاسمانیی كه‌ركوك كرایه‌وه‌

نووسینگه‌ی كه‌ركوك، هێمن ئه‌حمه‌د

به‌ئاماده‌بوونی ژماره‌یه‌ك له‌به‌پرسی‌ حیزبی‌‌و حكومی‌، حه‌وته‌مین ساڵیادی كه‌ناڵی‌ ئاسمانیی‌ كه‌ركوك دەكرێته‌وه‌.

كه‌ركوك بگه‌ڕێنینه‌وه‌ سه‌ر هه‌رێمی كوردستان
له‌وباره‌یه‌وه‌ دلێر مامۆستا قادر به‌ڕێوه‌به‌ری گشتیی كه‌ناڵی ئاسمانیی كه‌ركوك به‌كوردستانی نوێ-ی رایگه‌یاند: «كردنه‌وه‌ی كه‌ناڵی ئاسمانیی كه‌ركوك دیاری سه‌رۆك «مام جه‌لال» بوو بۆ شاری كه‌ركوك، به‌مه‌به‌ست له‌كردنه‌وه‌ی ئه‌و كه‌ناڵه‌ش ئه‌وه‌ بوو كه‌ كه‌ناڵێكی تایبه‌ت بێ به‌شاری كه‌ركوك. سیاسه‌ت‌و بیرو بۆچونی یه‌كێتی نیشتمانی كوردستان ئه‌وه‌ی كه‌په‌یوه‌ندی به‌پێكه‌وه‌ژیانی نێوان نه‌ته‌وه‌كانی دیكه‌ی كه‌ركوكه‌وه‌ هه‌یه‌، هه‌روه‌ها ئه‌و بیرو بۆچونانه‌ی كه‌ئێمه‌ی یه‌كێتی بڕوامان پێیه‌تی ئه‌ویش كوردستانی بوونی كه‌ركوكه‌و بڕوامان به‌وش هه‌یه‌ كه‌ له‌كه‌ركوك پێكهاته‌ی عه‌ره‌ب‌و توركمان‌و كلدو ئاشوور هه‌یه‌و پێكه‌وه‌ له‌م شاره‌ ژیان به‌سه‌ر ده‌به‌ین، چونكه‌ یه‌كێتی ماڵه‌ گه‌وره‌یه‌و جێگای پێكهاته‌كانی دیكه‌ش له‌دام‌و ده‌زگاكانی ده‌بێته‌وه‌و یه‌كێتی ده‌بێته‌ پارێزه‌ری ماف‌و ده‌ستكه‌وته‌كانی ئه‌وان، هه‌روه‌ها مه‌به‌ستێكی دیكه‌هه‌یه‌ ئه‌ویش ئه‌وه‌یه‌ له‌ڕێگای ئه‌م كه‌ناڵه‌وه‌و له‌چوار چێوه‌ی سیاسه‌تێكی واقیعانه‌وه‌ كه‌ركوك بگه‌ڕێنینه‌وه‌ سه‌ر هه‌رێمی كوردستان‌و هه‌روه‌ها چاره‌سه‌ر كردنی كێشه‌ی ماده‌ی 140».

شه‌ڕو ناخۆشی وه‌لا بنرێت
وتیشی: «ده‌بێت له‌كه‌ركوك زمانی دیالۆگ هه‌بێت بۆ لێك تێگه‌یشتنی سه‌رجه‌م پێكهاته‌كان‌و شه‌ڕو ناخۆشی وه‌لاوه‌ بنرێت‌و ئه‌م كه‌ناڵه‌ش بێته‌ هه‌وێنێك بۆ ئاشته‌وایی له‌نێوان سه‌رجه‌م پێكهاته‌كانی شاری كه‌ركوك، كه‌ناڵی ئاسمانیی كه‌ركوك به‌چوار زمانی هه‌واڵ پێشكه‌ش به‌دانیشتوانی شاره‌كه‌ ده‌كات، هه‌روه‌ها كه‌ناڵه‌كه‌ ته‌نیا كه‌ناڵی هه‌واڵی نییه‌، به‌ڵكو كه‌ناڵێكی هه‌مه‌ڕه‌نگه‌و به‌رنامه‌ی سیاسی‌و هه‌مه‌ڕه‌نك‌و ته‌رفیهی‌و پێشكه‌ش ده‌كات».
باسی له‌وه‌شكرد كه‌ناڵه‌كه‌ به‌ستافێكی لێهاتووه‌وه‌ رۆژانه‌ ئه‌ركه‌كانی خۆیان راده‌په‌ڕێنن، بۆ نموونه‌ له‌كاتی شه‌ڕی چه‌كدارانی داعشدا ئه‌م كه‌ناڵه‌ رۆڵێكی باڵای هه‌بوو چ له‌ڕۆماڵكردنی هه‌واڵه‌كانی به‌ره‌كانی جه‌نگ‌و نه‌به‌رده‌ی هێزه‌كانی پێشمه‌رگه‌و چ به‌ڕۆماڵكردنی كۆنگره‌ی رۆژنامه‌وانی راسته‌قینه‌ بێت، هه‌روه‌ها زۆرێك له‌كارمه‌ندانیكه‌ناڵه‌كه‌ چ په‌یامنێر، مۆنتێر، وێنه‌گر… هتد،كه‌ ئێستا له‌كه‌ناڵه‌كانی دیكه‌ كار ده‌كه‌ن له‌م كه‌ناڵه‌وه‌ فێر بوونه‌، چونكه‌ ئه‌م كه‌ناڵكه‌ قوتابخانه‌یه‌ك بوو بۆ ئه‌وان، هه‌روه‌ها هه‌ندێك له‌و میدیاكارانه‌ش ئێستا له‌ده‌ره‌وه‌ی وڵاتن‌و كاری رۆژنامه‌وانی ده‌كه‌ن، كه‌ناڵه‌كه‌ كه‌سانی شاره‌زای پێكه‌یاندوه‌و هه‌میشه‌ بۆته‌ جێگای ئومێد بۆ كاری رۆژنامه‌وانی، بۆیه‌ ئێستاش ئێمه‌ پابه‌ندینبه‌ڕێنماییه‌كانی سه‌رۆك «مام جه‌لال» كه‌سیاسه‌تێكی سه‌ره‌كی یه‌كێتی نیشتمانیی كوردستانه‌و به‌رده‌وام پابه‌ندینبه‌و ئامانجه‌ی كه‌ كه‌ناڵه‌كه‌ی بۆ دامه‌زرا، بۆیه‌ له‌م یاده‌دا به‌رنامه‌و پلانمان هه‌یه‌ له‌گه‌ڵ وه‌رزێكی نوێیدا ئێمه‌ش جارێكی دیكه‌ به‌گڕو جینی‌و به‌به‌رگێكی نوێوه‌ خۆمان نوێ ده‌كه‌ینه‌وه‌، بۆیه‌ من ده‌ستخۆشیش له‌سه‌رجه‌م ستافی كه‌ناڵی ئاسمانیی كه‌ركوك ده‌كه‌م به‌و كارمه‌ندانه‌شه‌وه‌ كه‌پێشوتر له‌م كه‌ناڵه‌ كاریان كردووه‌و هه‌روه‌ها ده‌ستخۆشی له‌و كه‌س‌و لایه‌نانه‌ش ده‌كه‌م كه‌پشتیوانی له‌م كه‌ناڵه‌ ده‌كه‌ن، چونكه‌ ئه‌وان بونه‌ته‌ هێشتنه‌وه‌ی ده‌نگێكی ره‌سه‌نی كه‌ركوكیان له‌شاره‌.

تاكه‌ كه‌ناڵه‌ به‌چوار زمان په‌خش ده‌كات
هیدایه‌ت ره‌حیم جێگری به‌ڕێوه‌به‌ریگشتیی كه‌ناڵی ئاسمانیی كه‌ركوك به‌كوردستانی نوێ-ی راگه‌یاند:له‌دوای ئه‌و قه‌یرانه‌ داراییه‌ی كه‌ئێستا به‌روكی عیراق‌و هه‌رێمی كوردستانی گرتوته‌وه‌و كه‌ناڵی ئاسمانیی كه‌ركوكیش به‌ده‌ر نییه‌ له‌و قه‌یرانه‌ ئێمه‌ به‌رده‌وامین له‌پێشكه‌شكردنی په‌خشی به‌رنامه‌ سیاسیه‌كان‌و هه‌واڵه‌كانی كه‌ركوك‌و هه‌رێمی كورستان‌و عیراق به‌گشتیی، به‌ڵام ره‌نگه‌ له‌تموحی ئێمه‌دا نه‌بێ، به‌ڵام جۆكمان دانه‌ناوه‌و به‌رده‌وامین له‌كاری رۆژانه‌ی خۆمان.خۆشبه‌ختانه‌ ساڵپار نوسراوێكمان بۆ مه‌كته‌بی راگه‌یاندنی كردو ئه‌وانیش نوسراویان بۆ مه‌كته‌بی سیاسی یه‌كێتی كرد كه‌ ناوی بنێن ده‌زگای میدیایی كه‌ركوك، چونكه‌ (كه‌ناڵی لۆكاڵی كه‌ركوك، كه‌ركوك سپۆرت، چاپخانه‌ی شه‌هید ئازاد هه‌ورامی، رادیۆی كه‌ركوك F.M)له‌خۆ ده‌گرێت».
وتیشی: «بۆ یاده‌كه‌ی 3/9/2018، كۆمه‌ڵێك میوان‌و لایه‌نی سیاسی پێكهاته‌كانی دیكه‌ی كه‌ركوكمان بانگشتكردووه‌، چونكه‌ تاكه‌ كه‌ناڵه‌كه‌ كه‌ به‌چوار زمان په‌خش ده‌كرێت‌و تاكه‌ كه‌ناڵی كوردیشه‌ش هه‌واڵه‌كانی راستگویانه‌ ده‌گه‌یه‌نێته‌ بینه‌ره‌كانی، هه‌روه‌ها هه‌واڵه‌كانی جیهان‌و عیراق‌و هه‌رێمی كوردستانیش ده‌گوازێته‌وه‌، به‌ڵام تایبه‌تمه‌ندی به‌شاری كه‌ركوك دراوه‌و تاكه‌ كه‌ناڵه‌كه‌ئێستا ركابه‌ریمان بكات كه‌ناڵی به‌ره‌ی توركمانیه‌ كه‌هه‌موو كه‌سێك ده‌زانی كه‌چه‌ند كه‌ناڵێكی چه‌واشه‌كاره‌..!!».
باسی له‌وه‌شكرد پێش روداوه‌كانی شانزه‌ی ئۆكتۆبه‌ری له‌خه‌ڵكانێك پرسیاریان كردوه‌كه‌ سه‌ر به‌ یه‌كێتیش نین رایگه‌یاندوه‌: كه‌ كه‌ناڵی ئاسمانیی كه‌ركوك هه‌واڵه‌كانی شاری كه‌ركوك وه‌كو خۆی بڵاوده‌كاته‌وه‌، بۆ نموونه‌ به‌ڕێوه‌به‌ری فه‌رمانگه‌ی كاره‌بای كه‌ركوك كه‌سه‌ر به‌ره‌ی توركمانی عیراقه‌ ده‌گوت: هه‌موو شه‌وێك به‌بێ دواكه‌وتن بینه‌ری هه‌واڵه‌كانی كه‌ناڵه‌كه‌ ده‌بم، به‌ڵام له‌دوای شانزه‌ی ئۆكتۆبه‌ره‌وه‌ ئه‌و راستیانه‌ نادركێن.

به‌رنامه‌كانی كه‌ناڵی ئاسمانیی كه‌ركوك چین؟
جێگری به‌ڕێوه‌به‌ری كه‌ناڵه‌كه‌ راشیگه‌یاند: به‌رنامه‌ی به‌یانی باشی كه‌ركوك كه‌باس له‌كێشه‌و گرفتی هاوڵاتیان ده‌كات‌و بگره‌ زۆربه‌ی ته‌وه‌ره‌كان له‌و به‌رنامه‌یه‌دا باسده‌كرێت، هه‌روه‌ها به‌رنامه‌ی پرسی رۆژ، به‌رنامه‌ی ته‌وه‌ر كه‌به‌رنامه‌یه‌كی سیاسییه‌، ئیستۆدیۆ لایڤ‌و به‌رنامه‌ی تایبه‌تیشمان كه‌هه‌ركات پرسێك هاته‌ ئاراوه‌ پێشكه‌ش ده‌كرێت‌و له‌گه‌ڵ به‌رنامه‌ی دیكۆمێنتاری، به‌ڵام پێش هاتی قه‌یرانی دارایی سه‌روی 30 به‌رنامه‌مان هه‌بوو.
له‌دوای پرۆسه‌ی ئازادی عیراقه‌وه‌ كه‌ناڵی لۆكاڵی كه‌ركوك به‌ڕووی دانیشتوانی شاری كه‌ركوك كرایه‌وه‌، دواتر له‌سه‌رداوای‌ كۆمه‌ڵێك له‌نووسه‌رو رووناكبیران‌و رۆشنبیرانی كه‌ركوك، رۆژی 3/9/2011، به‌بڕیاری‌ سه‌رۆك «مام جلال»وه‌ك دیاریه‌ك بۆ شاری كه‌ركوك كه‌ناڵیئاسمانیی كه‌ركوك كرایه‌وه‌و ئه‌مه‌ش گرنگییه‌كی‌ مێژوویبوو بۆ سه‌رجه‌م پێكهاته‌كانی‌ كه‌ركوك، به‌وه‌ی‌ كه‌ناڵه‌كه‌ ته‌واوی‌ زمانه‌كانی‌ شاره‌كه‌ له‌خۆ ده‌گرێت‌و ته‌واوی‌ به‌رنامه‌كانی‌ له‌خزمه‌تی‌ پێكهاته‌كانێتی، ئه‌مه‌ش له‌كاتێكدا هه‌ندێك لایه‌ن به‌رده‌وام له‌هه‌وڵی‌ چه‌واشه‌كاری‌ گشتی بڵاوده‌كه‌نه‌وه‌ به‌وه‌ی‌ كه‌ركوك‌و كه‌ركوكیه‌كان كێشه‌ی‌ گه‌وره‌یان له‌نێواندایه‌و ناتوانن به‌یه‌كه‌وه‌ ژیان به‌سه‌ر به‌رن، بۆیه‌ كردنه‌وه‌ی‌ كه‌ناڵه‌كه‌ ئه‌وه‌مان بۆ ده‌خاته‌ڕوو كه‌سیاسه‌تی‌ حیكمانه‌ی‌ سه‌ركردایه‌تی‌ یه‌كێتی‌ نیشتمانی‌ كوردستان هه‌رگیز سڵی‌ له‌و پیلان‌و چه‌واشه‌كارییانه‌نه‌كردووه‌ته‌وه‌.

پەیامی‌ پیرۆزبایی‌ دکتۆر فوئاد مەعسوم بۆ ساڵیادی‌ دامەزراندنی‌ تەلەفزیۆنی‌ کەرکوک

بەڕێز سەرۆک کۆمار دکتۆر فوئاد مەعسوم لەیادی حەوتەمین ساڵڕۆژی دامەزراندنی تەلەفزیۆنی کەرکوکەوە پیرۆزبایی لە بەڕێوەبەر و ستافی تلفزیۆنەکە کردوە ئەمە دەقەکەیەتی:
بەڕێزان بەڕێوەبەرو كارمەندانی تەلەفزیۆنی كەركوك
بە بۆنەی حەوتەمین ساڵرۆژی دامەزراندنی تەلە فزیۆنی كەركوكەوە گەرمترین پیرۆزباییتان پێشكەش دەكەم و داوای سەركەوتن و بەرەوپێشەوەچونی زیاتری ئەم كەناڵە ئازیزە دەكەم . بەراستیی تەلەفزیۆنی كەركوك وەك میدیایەكی بینراو ناوبانگێكی گەشە داری هەیە لە نێو دەستە خوشكە فەزاییەكانی تریدا و توانیویەتی بە باشی چەمكەكانی پێكەوە ژیانی بە ئاشتیی نێوان پێكهاتە جیاجیاكانی كەركوك بەرجەستە بكات و ببێتە دەنگ و رەنگی هەموان بێ جیاوازیی، ئەوەش رێبازێكی نەگۆڕی یەكێتیی نیشتمانیی كوردستانە بۆ پاراستنی ئاشتیی و بەرژەوەندیی رۆڵەكانی گەلەكەمان لە وشارە و سەرتاسەری وڵاتماندا .
ئومێدەوارم تەلەفزیۆنی كەركوك وەك هەمیشە بەرپرسیارانە بەردەوام بێت لەسەر گەیاندنی ئەو پەیامە میدیاییە پیشەییە راستگۆ و هاوسەنگ و راستگۆیانەیەی خۆی لە هەمو روەكانەوە و، قوڵكردنەوەی گیانی تەبایی و برایەتیی و ئاشتیی ،خزمەتی كاروانی دیموكراسیی و بنیاتنانەوە و خستنەروی راستییەكان و دەستنیشانكردنی كەموكورتیەكان بكات . هاوكات درێژە بدات بە بەشداریكردنەكانی لە بەگژاچونەوەی توندڕەوی و دەمارگیریی بە هەمو شێوەكانییەوە و فاكتەری ئارامیی و هێوریی و میانڕەویی بێت .
هەموسالێك تەلەفزیۆنی كەركوك بەخۆشی ئاهەنگی یادكرنەوەی بگێڕێت و هەر دەم ئەستێرە درەوشاوەكەی ئاسمانی میدیای بینراو بێت لە وڵاتماندا .
دكتۆر فوئاد مەعسوم
سەرۆك كۆمار

پەیامی‌ پیرۆزبایی‌ د. یوسف گۆران بۆ ساڵیادی‌ دامەزراندنی‌ تەلەفزیۆنی‌ کەرکوک

به‌ڕێز/ بەڕێوەبەری کەناڵی ئاسمانی كەرکوک
بەبۆنەی‌ ساڵیادی‌ دامەزراندنی‌ تەلەفزیۆنی‌ کەرکوک، جوانترین و گەرمترین پیرۆزبایی ئاراسته‌ی به‌ڕێوه‌به‌ر و تەواوی کارمەندان و میدیاکارانی کەناڵەکەتان دەکەم و ده‌ستی ماندوبونتان ده‌گوشم.
دامەزراندنی‌ تەلەفزیۆنی‌ کەرکوک دەرخەری‌ ئەو راستییە کە ئەو کەناڵە لەسەرەتای دروستبوونیەوە تا ئێستاشی‌ لەگەڵدا بێت هەوڵی‌ داوە بۆ بەهێزکردنی‌ کلتوری‌ پێکەوە ژیان لەو شارە، بەو ئامانجەی‌ ئەم کەناڵە تەنها دەنگ و رەنگی‌ یەک نەتەوەو ئاین نەبێت بەڵکو دەنگی‌ هەموو پێکهاتەو نەتەوە جیاوازەکان بووە، هەر ئەمەش بووە هۆکاری‌ بەهێزی‌ و کاریگەری‌ ئەم کەناڵە لەسەر کەرکوکییەکان.
لەلایەکی‌ دیکەوە کردنەوەی تەلەفزیۆنی‌ كەرکوک ھەنگاوێکی گرنگ و گەورەبوو لە دونیای ڕاگەیاندنی کوردیداو، ھەمووان شاھێدی ڕۆڵ و پێگەی ئەم کەناڵە خۆشەویستە بووین له‌به‌ره‌و پێشه‌وه‌بردنی فه‌رهه‌نگ و كولتور و ڕۆژنامه‌گه‌ری كوردی و پردێكی ڕاسته‌قینه‌بووه له‌ په‌یوه‌ندی نێوان خه‌ڵكی ئەم ناوچانە لەگەڵ هه‌ر چوار پارچه‌كه‌ی كوردستان به‌ گشتی.
تەلەفزیۆنی‌ کەرکوک لەدوای‌ پرۆسەی‌ ئازادی‌ عێراق و گەڕانەوەی‌ ژیان و خۆشگوزەرانی‌ بۆ ئەم شارە سەرمەشقی‌ گەیاندنی‌ پەیام و دەنگی‌ هەمووان بوو بۆ پتەوکردن و بەهێزکردنی‌ گیانی‌ تەبایی‌ لەنێوان هەمووان، لەگەڵ هەڵگیرسانی‌ شەڕی‌ داعش لە کەرکوک بەتایبەتی‌ و ناوچە دابڕاوەکاندا تەلەفزیۆنی‌ کەرکوک پێ بەپێ لەگەڵ هێزەکانی‌ پێشمەرگەو سەرکەوتنەکان بووەو پاڵپشت و هەماهەنگی‌ هەموو هێزی‌ پێشمەرگە بووە لەداستان و قارەمانیەتەکانی‌ ئەو ناوچانەدا.
هیوادارم له‌ ساڵی نوێی ته‌مه‌نیشیدا کەناڵە خۆشەویستەکەتان بەردەوام بێت لە خزمەتکردن بەزمان و ئەدەب و فەرهەنگ و زانست و بواری ڕۆژنامەوانی کوردی و، ‌گه‌یاندنی هه‌واڵ و رووداوه‌كان و به‌دواداچونی گۆڕانكارییه‌كان به‌شێوه‌یه‌كی راست و پیشه‌ییانه‌و، به‌رده‌وامبوون له‌به‌خششه‌ میدیاییه‌ زۆره‌كانتان له‌هه‌موو بواره‌كانی ژیانی گشتی هاووڵاتیانی خۆشه‌ویستی كەرکوک.
بەهیوای‌ سەرفرازی‌ …
د. یوسف گۆران
وەزیری‌ خوێندنی‌ باڵا و توێژینەوەی‌ زانستی‌
٢/٩/٢٠١٨

print

 37 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*