سەرەکی » دۆسێ » ئەنقەر هاوڵاتییەكی بەریتانی بە حەوت ساڵ زیندانی سزادەداتپەڕە 2

دژی داعش بووە و لای توركیا تیرۆریستە

ئەنقەر هاوڵاتییەكی بەریتانی بە حەوت ساڵ زیندانی سزادەدات

توركیا سزای زیندانی دەسەپێنێت بەسەر سەربازێكی پێشووی سوپای بریتانیا كە لە ریزی هێزە كوردییەكان لە دژی رێككخراوی «دەوڵەتی ئیسلامی» لەو سوریا شەڕی كردووە، ئەمەش بە گوتەی دایكی وەك «بی بی سی» ئاماژەی پێدەكات.
جۆ رۆبنسۆن سەربازی پێشووی سوپای بریتانیا (25 ساڵ)، لەكاتی بەسەربردنی پشوو بوو لە توركیا لە ساڵی 2017 كاتێك لەلایەن دەسەڵاتدارانی توركیاوە دەستگیركرا و تۆمەتی تایبەت بە تیرۆری رووبەڕووكرایەوە.
رۆبنسۆن تۆمەتی ئەندامبوونی لە «یەكینەكانی پاراستنی گەل»ی كوردی رووبەڕووكراوەتەوە كە لەلایەن توركیاوە بە رێكخراوێكی تیرۆریستی لەقەڵەم دەدرێت.
دادگایەك لە توركیا سزای حەوت ساڵ و نیو زیندانی بەسەر ئەو هاوڵاتییە بریتانییەدا سەپاندووە، بەڵام لەئێستادا بە كەفیل ئازادكراوە.
رۆبنسۆن بە نیازە تانە لە بڕیاری دادگاكەی توركیا بدات.
دایكی رۆبنسۆن دەڵێت، ماریا رۆجكان دەزگیرانی كوڕەكەی كە خوێندكارە و لە زانكۆی لیدز یاسا دەخوێنێت، بە هەمان شێوە بە تۆمەتی «پڕوپاگەندەكردن بۆ تیرۆر» حوكمێكی بۆ دەرچووە بەبێ‌ ئەوەی دادگایی بكرێت.
بە گوتەی شایمچوك (دایكی رۆبنسۆن)، دادگاییەكە بەڕێوەچووە، بەڵام رۆبنسۆن ئامادەی نەبوو.
رۆجكان دەڵێت»دادگا بەو هۆیە حوكمی بۆدەركردووە چونكە هەندێك نوسینی لە فەیسبوكدا بڵاوكردۆتەوە كە ئاڵای كورد و لینكی گۆرانیە كوردییەكانی لەسەر بووە لە پێگەی یوتیوب».
بە گوتەی رۆجكان»هەڵوێستەكە خەمناكە و لە هەمان كاتدا زۆر پوچە. ناتوانم لە شتێكی وەها تێبگەم».
رۆبنسۆن لەگەڵ هێزەكانی بریتانیا لە ئەفغانستان خزمەتی كردووە.
رۆبنسۆن چوار مانگی لە زیندانەكانی توركیادا بەسەر بردووە، دوای ئەوەی لە ساڵی رابردوودا لەو وڵاتە دەستگیركرا. لە مانگی تشرینی دووەمی رابردوو بە كەفالەت ئازادكرا، بەڵام رێگەی نەدرا وڵاتەكە بەجێبهێڵێت.
رۆبنسۆن پێنج مانگ لەگەڵ هێزە كوردییەكاندا بووە وەك خۆبەخش و لەدژی رێكخراوی «دەوڵەتی ئیسلامی» شەڕی كردووە، لەبارەی ئەو ئەزمونەشەوە قسەی بۆ میدیاكان كردووە.
خانەوادەكەی دەڵێن، پزیشكی سەربازی بووە.
وەك (بی بی سی) ئاماژەی پێدەكات، یەكینەكانی پاراستنی گەلی كورد (یەپەگە) وەك رێكخراوێكی تیرۆریست لەلایەن توركیا پۆلێن دەكرێن، بەڵام لە بریتانیا قەدەغە نەكراوە. سەبارەت بە بەرگری وڵاتەكە، وتەبێژی وەزارەتی دەرەوەی بریتانیا رایگەیاندبوو»ئێمە ئامادەین یارمەتی كونسوڵگەریی پێشكەش بەو هاوڵاتیە بریتانییە بكەین لە توركیا.
ئەمەش لەكاتێكدایە كە توركیا بە قۆناغێكی ئاڵۆزدا تێدەچەڕێت بەهۆی قوڵبوونەوەی ناكۆكییەكانی لەگەڵ ولایەتە یەكگرتووەكانی ئەمریكا كە كاریگەرییەكی دیاریی لەسەر رەوشی وڵاتەكە دروست كردووە، بەجۆرێك كە وای لە ئەنقەرە كردووە، نەتوانێت وەك پێشووی رۆڵی خۆی لە سیاسەتەكانی ناوچەكەدا ببنێتەوە.
دەستگیركردن و سەپاندنی سزای زیندانی بەسەر هاوڵاتییەكی بریتانی كە لە ریزەكانی (یەپەگە) لە دژی داعش شەڕی كردووە، پێناچێت تەنگژە و ئاڵۆزی لە پەیوەندییەكانی نێوان ئەنقەرە و لەندەن دروست بكات، چونكە توركیا مافی ئەوەی هەیە لە وڵاتی خۆی یاساكانی خۆی پراكتیزە بكات و هەرجموجۆڵێكیش بە هەڕەشە لەسەر ئاسایشی نەتەوەیی وڵاتەكەی ببینێت، رێوشوێنی لەدژ بگرێتەبەر.
ئەمەش لەكاتێكدایە كە لەم ماوەیەی دواییدا ناكۆكییەكانی نێوان توركیا و ئەمریكا بەشێوەیەكی زەق دەركەوتن زیاتر لە دۆسێی قەشە ئەندرۆ برانسۆندا خۆیان بنینییەوە كە نزیكەی 18 مانگە لە توركیا نیشتەجێی زۆرەملێی بەسەردا سەپێنراوە.
ئەنقەرە ئەو قەشە ئەمریكاییە بە سیخوڕسیكردن و پشتیوانی لە تۆڕی گیولەن و پارتی كرێكارانی كوردستان تۆمەتبار دەكات.
فەتحوڵڵا گیولەنی بانگخواز كە لەئێستادا لە ولایەتە یەكگرتووەكان نیشتەجێبە، لەلایەن ئەنقەرەوە بە تێوەگلان لە هەوڵی كودەتا شكستخواردووەكەی ساڵی 2016 تۆمەتباردەكرێت، توركیا بەردەوام داوای لە ولایەتە یەكگرتووەكان كردووە ئەو پیاوەی رادەستبكات.
لەلایەكی ترەوە ئەمریكا پشتیوانی لە یەكینەكانی پاراستنی گەلی كورد (یەپەگە) دەكات لە سوریادا كە لەلایەن توركیاوە بە رێكخراوێكی تیرۆریستی پۆلێن دەكرێت.
ئەنقەرە ئۆپەراسیۆنی سەربازی لە عەفرین لە دژی (یەپەگە) ئەنجامدا، تا هێزەكانی لە سنورەكانی توركیا درووربخانەوە، ئەمەش لەكاتێكدایە كە واشنتۆن بەردەوام داواكارییەكانی ئەنقەرەی بۆ راگرتنی پشتیوانییەكانی لە یەكینەكانی پاراستنی گەلی كورد كە «پێكهاتەی سەرەكی هێزەكانی سوریای دیموكرات»ە، پشتگوێخستووە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*