سەرەکی » وتار » چرۆ شه‌هاب » شاری ڕۆشنبیری و پاشكۆ كولتورییە جیهانییەكان

فۆكەس پۆینت

شاری ڕۆشنبیری و پاشكۆ كولتورییە جیهانییەكان

سلێمانی كە بە شاری ڕۆشنبیری ناودەبرێت و بە بڕیاری پەرلەمانی كوردستان ئەم ناوەی لێنراوە، بە یەكێك لە شارە گرنگەكانی كوردستان ناوزەند دەكرێت، هەر لەم ڕوانگەیەوە پێویست دەكات بیر لە ئێستا و داهاتوی گرنگی ئەم شارە بكرێتەوە لە ڕوی گەشەسەندنی كەلتوری و ڕۆشنبیریەوە . لە كاتێكدا كوردستان چوارچێوەیەكی هەرێمی خۆی هەیە و توانیویەتی چەندین نوێنەرایەتی خۆی لە وڵاتە دیار و كاریگەرەكانی دونیا بكاتەوە و بەردەوامی بەگەشە و پەیوەندیە سیاسی و نێودەوڵەتیەكانی بدات، لە هەمان كاتدا و لەبەرامبەر ئەو پەیوەندیانە چەندین کونسوڵگەری جیهان و ئاژانسی نێودەوڵەتی نوسینگە و نوێنەراتیەتی خۆیان لە هەرێمی كوردستان هەیە، لەم ڕوانگەیەوە و لەپێناو گەشەسەندنی ئەو پەیوەندیان و لە چوارچێوەی بە ڕۆشنبیری كردنی شاری سلێمانی پێویستمان بە كردنەوەی پاشكۆ كەلتوریەكانی» ملحق الثقافي» ئەو باڵوێزخانانە هەیە لە عیراق كە کونسوڵیەتی خۆیان لە كوردستان هەیە.
ڕەنگە بۆچونێك هەبێت كە بڵێت ئەم پاشكۆیانە چ گرنگیەكی هەیە لە شاری سلێمانی؟ بۆ وەڵامی ئەم پرسەش ئاماژە بەچەند خاڵێكی گرنگ دەدەم:
یەكەم: لەبونی پاشكۆ كولتوریەكانی باڵیۆزخانەكان لە شاری سلێمانی ، گەشەسەندنی بواری كولتوری و ڕۆشنبیری زیاد دەكات.
دووەم: دەتوانرێت چالاكی كولتوری و ڕۆشنبیری هاوبەش لە نێوان ئەو وڵاتانەو كوردستان بە ئاڕاستەیەكی سەركەوتودا بڕوات.
سێیەم: دەشێت لە ڕێگەی پاشكۆ كولتوریەكانەوە پێشانگەی كولتوری و كۆڕو كۆنفرانسی گەورە و تایبەت بە بوارە ڕۆشنبیریەكان ئەنجام بدرێت.
چوارەم: هەلی كار لەبوارەكەدا بەردەست دەبێت.
پێنجەم: ڕەخساندنی هەلی دروستكردنی پەیوەندی لە نێوان هاوپیشە كولتوری و ڕۆشنبیریەكان.
شەشەم: بە گرنگترین خاڵە كانی دادەنێم ئەویش دروستكردنی وێنایەكی زەینی زۆر باش لەسەر كوردستان لە ڕووی گەشەكردن و بەردەوامی دان بەبواری كەلتوری و ڕۆشنبیری، چونكە هەر وڵات و ناوچە و هەرێمێك لەم ڕوەوە گەشەسەندو بێت بێگومان بۆچونی وڵاتانی دیكە جیاوازتر دەبێت و بە گرنگیەوە لێی دەڕوانێت ئەمە چ جای ئەوەی كە شارێكی وەك سلێمانی بە شاری ڕۆشنبیری بەیاسا ناوزەند كراوە.
حەوتەم: بە كردنەوەی پاشكۆ كولتوریەكان دەتوانرێت پردی پەیوەندیی گشتی نێودەوڵەتیەكان دروست بكرێت و ببێتە یەكێك لە دینگە بەهێزەكانی لە گەشەسەندی پەیوەندیەكانی كوردستان و بەستنەوەی كوردستان بە جیهانی دەرەوە.
كەواتە لە ڕووی ئەم گرنگایانەی باسم كرد پێویست دەكات و كاتی ئەوە هاتووە حكومەت و سیلكی دیبلۆماسی حكومەتی هەرێم و سیاسیەكانمان لەكاتی دیدار و پەیوەندیەكانیان باس لە گرنگی كردنەوەی ئەم پاشكۆ كولتوریانە بكەن لە شاری سلێمانی و باشترین موبەریر بۆ قەناعەت پێكردنی ئەو باڵوێز و باڵوێزخانانەش ئەوەیە كە باس لە بە یاسایی بونی شاری سلێمانی بكەن كە بوەتە شاری ڕۆشنبیری.
بەپێی ئەو زانیاریانەی بەردەستم و بەدواداچونەكانم وەك هەرێمی كوردستان شازدە کونسوڵیەتی گشتی لە كوردستان هەن، بەو پێیەی ئەم کونسوڵیەتانە گشتین بێگومان پاشكۆی كەلتوریش لە خۆدەگرن، كەواتە دەبێت كاری جدی بكرێن لەسەر دروستكردنی پەیوەندی ڕاستەوخۆ لەنێوان سلێمانی و باڵوێزخانەكانی كە لەعیراق هەن لەگەڵ كۆی ئەو شازدە کونسوڵیەتەی لە پایتەختی هەرێم لە شاری هەولێر بونیان هەیە، بۆئەوەی بتوانرێت هەنگاوی جدی بنرێت لە خزمەتكردنی شاری ڕۆشنبیری شاری سلێمانی. بیرمان نەچێت بواری كولتوری و ڕۆشنبیری دروستكاری پەیوەندیە بنەڕەتیەكانە لە نێوان گەلانی جیهانە و توانای ناساندن و كاری هاوبەشیان زۆرە بە تایبەتی لە ڕێگەی ئەنجامدانی چالاكییە هونەری وكولتوری و ڕۆشنبیریەكان و ڤێستیڤاڵە نێودەوڵەتیەكانی هونەر و سینەما و پێشانگە گرنگەكانی كولتوری و ڕۆشنبیری .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*