سەرەکی » راپۆرت » بە ئاماری كارو چالاكییەكانی وەڵام دەداتەوە

وەزارەتی خوێندنی باڵا

بە ئاماری كارو چالاكییەكانی وەڵام دەداتەوە

ماوەیەكە لێرەو لەوێ چەند كەناڵ ‌و میدیایەك كەوتوونەتە هۆنینەوەی تۆمەتی بێ سەروبەر بۆ وەزارەتی خوێندنی باڵاو توێژینەوەی زانستی و وەزیرەكەی د. یوسف گۆران و چاو لەئاستی هەموو كارو چالاكییەكان ‌و دەستكەوتەكانی بۆ مامۆستایان ‌و خوێندكارانی خوێندنی باڵا نادیدە دەگرن ‌و هەڵەو كێشەیەكی بچووكی لێرەو لەوێ وەك مەسەلەی مێشێك بە گامێشێك لێدەكەن ‌و بەجۆرەها شێوازو ژانەر هەواڵ ‌و راپۆرتی لەبارەوە ئامادە دەكەن، بەمەش دەیانەوێت هەموو ئەو ئامارو داتای چالاكییانە زەڕبی سفر بكەنەوە.
ئەم راپۆرتە بۆ خستنەڕووی ئاماری چالاكییەكانی وەزارەتی خوێندنی باڵا‌و توێژینەوەی زانستی، وەڵامێكی ناڕاستەوخۆی هەموو ئەو میدیاو سایتانەیە كە ئەگەر پیشەییانە مامەڵە دەكەن، با كەموكوڕییەكان بخەنەڕ‌و‌و بەڵام ئاماژەش بە بەشێك لەو چالاكییانە بكەن‌و لە تەرازووی ویژدانی خوێنەران ‌و بینەرانی دابنێن.

رۆژی 2/12/2018 قوباد تاڵەبانی جێگری سەرۆكی حكومەتی هەرێمی كوردستان، هاوڕێ لەگەڵ د. یوسف گۆران وەزیری خوێندنی باڵا ‌و مەحمود حاجی ساڵح سەردانی زانكۆی چەرمووی كردو دوای بەشداریكردنیان لە كۆبونەوەی ئەنجومەنی زانكۆی چەرموودا، ستایشی كار و پڕۆژەكانی وەزارەتی خوێندن باڵاو توێژینەوەی زانستی كرد، لە بەرامبەر جێبەجێكردنی پڕۆژەو بەرنامە زانستی و ئەكادیمییەكان و چاكسازیی و ریفۆرم لە بواری خوێندنی باڵادا و وتی: ریفۆرمەكانی وەزارەتی خوێندنی باڵا شۆڕشێكی لەسەرخۆن بۆ گەیشتن بە ئامانجە دوور مەوداكان.

زانكۆی چەرموو لە قۆناخێكی سەختدا كرایەوە
د. یوسف گۆران وەزیری خوێندنی باڵاو توێژینەوەی زانستی سوپاسی قوباد تاڵەبانی كرد بۆ پشتگیرییە بەردەوامەكانی لە پڕۆسەی خوێندنی باڵا لەهەرێمی كوردستان و باسیشی لە سەرەتاكانی دروستبوونی زانكۆی چەرموو كرد، كاتێك لەساڵی 2014دا بەپاڵپشتی هەمووان لەسەرەتای سەرهەڵدانی قەیرانی دارایی ‌و جەنگی دژ بەداعشدا بەڕووی خوێندكارانی پایتەختی شەهیدان و ئەنفالكراوان و خەڵكی كوردستاندا كرایەوە.
دەستخۆشیشی لە سەرۆك ‌و راگرانی بەشەكان‌و مامۆستایانی زانكۆكە كرد، كە لەو ماوە كورتەی تەمەنیدا كارو پڕۆژەی گەورەی بۆ بەرزكردنەوەی ئاستی زانستی و مەعریفی جێبەجێ كردووە، بەتایبەتی جێبەجێكردنی پڕۆژە و بەرنامە ئاست بەرزەكانی دونیا لەكۆلێژ و بەشەكانیدا، كە بەوەش توانیویەتی بناغەیەكی باش بچەسپێنێت، وتیشی: لەناو ئەو زانكۆیانەی تازە دروستبوون، زانكۆی چەرموو شوێن و پێگەی دیارە،

خزمەتكردنی خەڵك و خوێندكاران ئەولەویاتە
جێگری سەرۆكی حكومەتیش سەرەتا سوپاسی و پێزانینی ئاڕاستەی زانكۆكانی سلێمانی و پۆلیتەكنیكی سلێمانی كرد كە هاوكارو هەماهەنگ بوون بۆ سەرەتاكانی دروستبوونی زانكۆی چەمچەماڵ ‌و وتی: ئەم زانكۆیە لەكاتێكدا دامەزرا كە هەرێمی كوردستان بە قەیرانێكی قوڵی دارایی و ئابووریدا تێپەڕدەبوو، جەختیشی لەسەر ئەوە كردەوە كە خزمەتكردنی خەڵك و خوێندكاران لە ئەولەویاتی هەمیشەیی حكومەت ‌و خودی خۆی دەبێت.
لەبارەی بەستنەوەی بەش و پسپۆڕییەكانیش بە بازاری كاری كوردستانەوە، جێگری سەرۆكی حكومەت ئاماژەی بە گرنگیی بەستنەوەی بەش و پسپۆڕییەكان كردەوە بە بازاری كاری كوردستانەوەو تا دەرچووان بتوانن بە ئاسانی هەلی كاریان دەست بكەوێت وتی: پێویستە بەپێی پێداویستییەكانی كۆمەڵگە كۆلێژ و بەشەكان بكرێنەوە و پسپۆڕی تازەی سەردەم لە بازاری كاری كوردستاندا دەربكەوێت، هەروەك جەختی لەسەر گرنگی و ڕۆڵی زیاتری زانكۆ پۆلیتەكنیكیەكان كردەوە بەو پێیەی بایەخی زیاتر بە خوێندنی پیشەیی لە هەرێمی كوردستان بدرێت.
سەبارەت بە كارو پڕۆژەكانی وەزارەتی خوێندنی باڵا و توێژینەوەی زانستی، قوباد تاڵەبانی جێگری سەرۆكی حكومەتی هەرێم، دەستخۆشی و پێزانینی ئاڕاستەی د. یوسف گۆران وەزیری خوێندن باڵا و توێژینەوەی زانستی و ستافی وەزارەت كرد، بۆ پڕۆژە و بەرنامە زانستی و ئەكادیمییەكان و چاكسازیی و ڕیفۆرم لە بواری خوێندنی باڵا لە سەرانسەری كوردستاندا، بۆ ئەوەش وتی: چاكسازییەكانی وەزارەتی خوێندنی باڵا شۆڕشێكی لەسەرخۆ بوو بۆ گەیشتن بەئامانجە دوور مەوداكان، بەتایبەت چاكسازیی و پڕۆژەكان لە سیستمی ناوەندی وەرگرتنی خوێندكاران لە زانكۆ و پەیمانگەكان و پڕۆژەكانی پەیوەست بە بەرەوپێشبردنی دۆخی خوێندنی باڵاو پڕۆسەی پەرەپێدانی زانست و مەعریفە لە هەرێمی كوردستان، هەروەك جەختیشی كردەوە كەرتی خوێندنی باڵا لە كوردستان دەبێت تا ماوە دەستخۆشی لەم وەزارەتەی ئەم كابینەیەی حكومەتی هەرێمی كوردستان بكات.

زانكۆی چەرموو بەژمارە
د. سەڵاح رەزا سەرۆكی زانكۆی چەرمووش كورتەیەكی لەبارەی كۆلێژ و بەش و سەنتەرەكانی زانكۆ پێشكەش كرد و ئاماژەی بەو خزمەتانە كرد كە پێشكەش بە خوێندكارانی سنوورەكە دەكرێت و وتی: لە زانكۆی چەرموو (127) مامۆستای و (2419) خوێندكار هەیە، جگە لە (33) خوێندكاری خوێندنی باڵا لەهەردوو رشتی ماستەر و دكتۆرا.

سیستمی پۆڵۆنی
ئاماژەشی بە چالاكییەكانی زانكۆكە كرد بۆ بەستنی كۆنفرانس و سمیناری نێودەوڵەتی و هەوڵەكانی زانكۆ بۆ پێشخستنی سیستم و پڕۆگرامەكانی خوێندن و بەردەوامیدان بە پڕۆسەی خوێندنی باڵا لە زانكۆكە و باسیشی لە پلانی نوێی زانكۆكە كرد بۆ دبلۆمی باڵاو ماستەرو دكتۆرا، هەروەك باسیشی لە سیستمی خوێندن لە زانكۆی چەرموو كرد، كە لەساڵی (2017)ەوە سیستمی پۆڵۆنیا جێبەجێ دەكات و بەردەوامیشە لە جێبەجێكردنی، وتیشی ئەم سیستمە لە (50) وڵاتی جیهاندا جێبەجێ دەكرێت و بریتیە لە ئاوێتەكردنی خوێندنی باڵای كوردستان وەك بەشێك لە خوێندنی باڵای جیهانی و جووڵاندنی خوێندكاران لەنێوان وڵاتان و دۆزینەوەی هەلی كار بۆ دەرچووان لە بازاڕی كاردا.

سەنتەری تویژینەوەی جینۆساید
لەسەردانەكەیدا جێگری سەرۆكی حكومەت پڕۆژەی خەونی منداڵانی شەهیدە سەربەرزەكانی شەڕی داعشی كردەوە كە پڕۆژەكە لەگەڵ ڕێكخراوێكی خێرخوازی جێبەجێكراوەو بەشێكە لە كاری خێرخوازیی و خۆبەخشی، دواتریش سەنتەری تویژینەوەی جینۆساید لە زانكۆی چەرموو كرایەوە، كە لەسەر بودجەی وەزارەتی خویندنی باڵا و توێژینەوەی زانستی بەشی یەكەمی بە بڕی (170) ملیۆن دینار جێبەجێ كراوە.
بەپێی زانیارییەكانیش ئامانج لە كردنەوەی ئەم سەنتەرە پێشبینی ررووداوەكان و راڤەكردنیانە، تا باس و توێژینەوەی زانستی لەسەر بكرێت بۆ تاوتوێكردن و سوود لێوەرگرتنی لەهەر هەنگاوێك، بەتایبەت ئەو تاوان و زوڵمانەی بەسەر گەلەكەماندا هاتووە وەكو ئەنفال و جینۆساید.

خوێندنی ماستەر و دكتۆرا دەست پێدەكات
هەر لە هەفتەی رابردوودا وەزارەتی خوێندنی باڵا خوازیارانی خوێندنی باڵا بۆ ماستەرو دكتۆرای ئاگادار كردەوە كە پڕۆسەی پێشكەشكردن بۆ خوێندنی باڵا- ماستەرو دكتۆرا لە زانكۆ حكومییەكان بۆ سیمستەری هاوینە بۆ ساڵی خوێندنی (2016-2017) دەستپێدەكات.
لەوبارەیەشەوە وتەبێژی رەسمیی ئەو وەزارەتە رایگەیاندووە كە سیمستەری هاوینەی ماستەر و دكتۆرا بەهەمان رێنمایی ژمارە (4) بۆ ماستەر بۆ ساڵی خوێندنی (2016-2017) و رێنمایی ژمارە (5) بۆ دكتۆرا بۆ هەمان ساڵی خوێندنی سیمستەری زستانە دەستپێدەكات ‌و خوزاریارانی خوێندنی باڵا دەتوانن داوا پێشكەش بە زانكۆكان بكەن.

11 ملیار دینار بۆ گەشەپێدانی زانكۆی هەڵەبجە
بەمەبەستی گەشەپێدان و بوژاندەوەی زانكۆی هەڵەبجە، لەسەر داوای وەزارەتی خوێندنی باڵا و توێژینەوەی زانستی، سەرۆكایەتی ئەنجومەنی وەزیرانی هەرێمی كوردستان بڕی زیاتر لە (11) ملیار دیناری بۆ زانكۆكە تەرخان كرد ئەوەش دوای سەردانێكی مەیدانیی د. یوسف گۆران وەزیری خوێندنی باڵا دێت بۆ ئەو شارە لە مانگی شوباتی ئەمساڵدا‌و زانینی كۆی كەموكوڕیی ‌و پێداویستییەكانی زانكۆی هەڵەبجە.
لەبارەی ئەو سێكتەرانەشەوە كە پارەیان بۆ تەرخانكراوە، وتەبێژی ئەو وەزارەتە روونیكردووەتەوە كە پڕۆژەكان بریتین لە جێبەجێكردنی پڕۆژەی بینای سەرۆكایەتی زانكۆی هەڵەبجە، كە بڕی 6 شەش ملیار و 300 سێسەد ملیۆن دیناری بۆ تەرخانكراوە، هەروەها پڕۆژەی بینای (بەشی ناوخۆیی 2) قۆناغی سێییەم، بۆ ئەوەش بڕی (5) پێنج ملیار دیناری بۆ تەرخانكراوەو دەشڵێت نووسراوەكەی سەرۆكایەتی ئەنجومەنی وەزیران گەیشتۆتە وەزارەت‌و دوای ئەنجامدانی رێكاری پێوست دەست دەكرێت بە جێبەجێكردنی پڕۆژەكان.

بەرزكردنەوەی ئاستی خوێندكار
لە راگەیەندراوێكی دیكەشدا كە بەڕیوەبەرایەتی راگەیاندنی وەزارەتی خوێندنی باڵا و توێژینەوەی زانستی بڵاویكردووەتەوە، بەسەرپەرشتی د.یوسف گۆران وەزیری خوێندنی باڵاو توێژینەوەی زانستی و بە ئامادەبوونی ئەندامانی ئەنجومەنی وەزارەت، كۆبوونەوەی ئەنجومەنی وەزارەت بەڕێوەچووە و چەند بابەتێكی پەیوەست بە خوێندكاران و خوێندنی باڵا تاتوێ كران و بڕیاری پێویستیان لەبارەوە دراوە.

كردنەوەی سەنتەرەكانی تاقیكردنەوە نێودەوڵەتییەكان
لە تەوەرێكی كۆبوونەوەكەدا باس لە كردنەوەی سەنتەرەكانی تاقیكردنەوە نێودەوڵەتییەكانی (سات 1) و( سات 2) لە زانكۆكانی هەرێمی كوردستان كراوەو لەوبارەیەوە د.یوسف گۆران وتوویەتی: ئەنجومەنی وەزارەت لە دوایین كۆبوونەوەی خۆیدا بڕیاریداوە رێژەی (٥%) كورسی خوێندنی وەرگرتن لە زانكۆكان بۆ قوتابخانە نێودەوڵەتییەكان تەرخانكراوە، دەشڵێت: «ئامانجمان لەو بڕیارەدا ئەوەبوو كە خەڵكی دیكە بهێننە ناو سیستمەكەمان و بۆ خوێندن نەڕۆنە زانكۆكانی دەرەوە. روونیشیكردووەتەوە كە قوتابخانە نێودەوڵەتییەكان بوونەتە بەشێك لە سیستمی خوێندنی هەرێمی كوردستان، لەهەمان كاتدا وەزارەت بڕیاریدراوە تاقیكردنەوە نێودەوڵەتیەكان بۆ وەرگرتن لە زانكۆكان ئەژمار بكرێت.

كۆلێجێكی نوێی لە خانەقین كرایەوە
لە چوارچێوەی بایەخپێدانەكانیان بە ناوچە كوردستانییەكانی دەرەوەی ئیدارەی هەرێمی كوردستان، وەزارەتی خوێندنی باڵا و توێژینەوەی زانستی كۆلێجی كۆمپیوتەرو تەكنەلۆژیای زانیاریی لە شاری خانەقین راگەیاند و لەوبارەیەشەوە وەزیری خوێندنی باڵا دەڵێت: لە ساڵی داهاتووەوە خوێندكاران دەتوانن لەو كۆلێجە دەست بە خوێندنی ئەكادیمی خۆیان بكەن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئه‌و ژنانه‌ی‌ ره‌وتی‌ رۆژئاوایان گۆڕی‌ و بوونه‌ نموونه‌ بۆ كچانی‌ گه‌نج

وه‌رگێرانی‌ _ هانا شوان ڕێگری‌ و كۆسپه‌كانی‌ به‌رده‌م ئه‌و كه‌سانه‌ی‌ ...