سەرەکی » وتار » دڵشاد ئه‌حمه‌د » ئاوایی زەنگنە – کەرکوک

دڵشاد و گوندەکانی وڵات

ئاوایی زەنگنە – کەرکوک

قاسی به‌گ سه‌رۆكی ئێڵی گه‌وره‌ی‌ زه‌نگنه‌ له‌(ماهی ده‌شت)و ناوچه‌ی‌ كرماشان میرنشینی بوو، قه‌ڵه‌مڕه‌وی حوكمڕانی ئه‌م میرنشینه‌ هه‌تا (سه‌رپێڵی زه‌هاو)و (خانه‌قین)و (مه‌نه‌لی)و (زڕباتێ) هه‌بوو یه‌كێ له‌كوڕه‌كانی‌ (قاسی به‌گ)و (میر عه‌لی خان) وه‌زیری دارایی بووه‌ له‌سه‌رده‌می شاعه‌باسی سه‌فه‌وی دووه‌م، نه‌وشیروان به‌گ كوڕه‌زای‌ قاسی به‌گ به‌پێی (شه‌ره‌ف نامه‌ی‌) شه‌ره‌فخانی‌ به‌دلیسی باسی میرنشینی زه‌نگنه‌ی له‌ڕۆژهه‌ڵاتی‌ كوردستان كردووه‌، ده‌بێته‌ میری میرنشینی زه‌نگنه‌ كه‌ كوڕی میر عه‌لی خان بووه‌، هه‌موو ناوچه‌كانی‌ كرماشان‌و ماهی ده‌شتی هه‌تا خانه‌قین‌و زرباتێ ی له‌بن ده‌ست بووه‌، ناوچه‌یه‌كی فراوانی‌ كوردستانی‌ ڕۆژهه‌ڵات‌و باشور له‌سنوری‌ ئه‌م میرنشینه‌ بووه‌، به‌ڵام به‌هۆی‌ ناكۆكی‌و مل نه‌دانی نه‌وشیروان به‌گ له‌گه‌ڵ سه‌فه‌وییه‌كان ده‌كه‌ونه‌ ململانێ‌و دواتر جه‌نگێكی گه‌وره‌ دژ به‌ زه‌نگنه‌ له‌لایه‌ن سه‌فه‌وی یه‌كانه‌وه‌ به‌رپاده‌كرێ، نه‌وشیروان (11) كوڕی بووه‌ له‌وانه‌ چوار كوڕی له‌و شه‌ڕانه‌دا شه‌هید بووه‌، له‌ساڵی 1615 میرنشینی زه‌نگنه‌ له‌ناوچوو، ئه‌م ئێڵه‌ گه‌وره‌یه‌ له‌و ناوچانه‌ كه‌ دووچاری ماڵ وێرانی‌و ده‌ربه‌ده‌ری‌ بوون به‌ره‌و باشووری‌ كوردستان كۆچیانكرد‌و له‌ڕووباری‌ (هه‌واسان) په‌ڕینه‌وه‌ چونه‌سه‌ر ڕۆخی ئاوه‌سپی‌و به‌شێكیان بۆ (مه‌زار شه‌ریف)ی ئه‌فغانستان‌و (قه‌وقاس)و (ئه‌رمینیا) كۆچیان كرد.
به‌شه‌ زۆره‌كه‌ی‌ زه‌نگنه‌ له‌گه‌ڵ نه‌وشیروان به‌گ كوڕی عه‌لی خان كوڕی قاسی به‌گ له‌ناوچه‌ی‌ (قادر كه‌ره‌م) له‌(گه‌ڕاوی) سه‌ر ڕوباری‌ ڕۆخانه‌ نیشته‌جی بوون، له‌ساڵی 1625 میر نه‌وشیروان به‌گ له‌باشوری‌ كوردستان كۆچی دوایی ده‌كات. حوسین (قولی خان) له‌و ناوچانه‌ی‌ ماهی ده‌شت مابۆوه‌ ، ڕاپه‌ڕینی دژ به‌ نادر شا له‌كرماشان ڕاگه‌یاندو هێزه‌كانی‌ نادر شای وه‌ده‌رناو میرنشینی زه‌نگنه‌ی‌ دامه‌زرانده‌وه‌، له‌ساڵی 1735 نادر شا هێزه‌كانی‌ به‌ره‌و كرماشان ناردو شه‌ڕو جه‌نگ جارێكی دی به‌رۆكی زه‌نگنه‌ی‌ گرته‌وه‌ له‌ساڵی 1736 ئه‌م شه‌ڕه‌ كۆتایی هات‌و (میر حوسین قولی خان)شه‌هید بوو. له‌گوندی (برایم ته‌په‌)نێژرا، سوپای ئێران هه‌موو گوندو شاره‌كانی‌ زه‌نگنه‌ی‌ سوتان‌و كاول‌و وێرانكرد له‌ساڵی 1737 جارێكی دی ئێران بڕیاری ده‌ركردنی هۆزی زه‌نگنه‌ی‌ ڕاگه‌یانده‌وه‌ له‌ساڵی 1738 كۆتایی هات.
پاش مردنی‌ نه‌وشیروان به‌گ، میر سمایلی كوڕه‌ گه‌وره‌ی‌ جێی گرته‌وه‌، قه‌ڵایه‌كی گه‌وره‌ی‌ له‌بناری‌ شاخی (زه‌نور) دروستكرد به‌ناوی‌ (خورما دار). (قه‌یتول)ی كرد به‌پایته‌ختی میرنشینی زه‌نگنه‌و ناوی‌ ئه‌م زاته‌ گه‌وره‌یه‌ گه‌یشته‌ (بابی عالی) له‌ئه‌ستانه‌ لای‌ سوڵتان مرادی چواره‌م‌و فه‌رمانیدا (سه‌در ئه‌عزه‌م)» سه‌رۆك وه‌زیران محه‌مه‌د زاهد پاشا) میر سمایل بهێنێته‌ خزمه‌تی‌، ئه‌ویش فه‌رمانی‌ به‌(نه‌زیف پاشا) والی‌ موسڵی كوردانی‌ داو سه‌رۆك ئه‌ركان (یاوز به‌گ)و پێنج سه‌د سواره‌ی‌ چه‌كداری‌ نارده‌ كه‌ركوك‌و له‌گوندی (قه‌ڵخانلو) دامه‌زران، ئه‌م هه‌واڵه‌ گه‌یشته‌ میری زه‌نگنه‌ (300) سواره‌ی‌ ئاماده‌كرد بۆ پێشوازی‌، له‌(قه‌ڵا میكایل) پێشوازی‌ له‌ یاوز به‌گ كردو پێكه‌وه‌ چوون بۆ گوندی گه‌ڕاوی‌ (سێ ڕۆژ) میوانداری‌ كردو به‌یه‌كه‌وه‌ چوون بۆ (بابی عالی)، سوڵتانی‌ عوسمانلی متمانه‌ی‌ پێبه‌خشی‌و میرنشینه‌كه‌ی‌ به‌ڕه‌سمی ناساند. میرنشینه‌كه‌ی‌ میر سمایل هه‌تا ڕوباری‌ سیروان‌و ده‌ربه‌ندیخان له‌خۆرهه‌ڵات‌و شاره‌زوورو ڕوباری‌ زه‌ڵم‌و تانجه‌رۆو بازیان‌و شوان هه‌تا زێی بچوك له‌ باكورو به‌رزایی یه‌كانی‌ حه‌مرین (سنوری‌ كوردستان له‌گه‌ڵ عێراقی عه‌ره‌بی) هه‌تا سیروان له‌باشور له‌ڕووی سیاسی‌و ئابوری‌‌و سه‌ربازی‌و له‌ژێر حوكمی زه‌نگنه‌دا بون. ئاڕمی میرنشینی زه‌نگنه‌ دانراو بریتی بو له‌(خورما دار قه‌لعه‌سی _ ئه‌ماره‌ قشڵه‌سی زه‌نگنه‌ _ ئه‌میر ئیسماعیل میرسی).
محه‌مه‌د به‌گی نه‌وشیروان به‌گ بوبه‌ فه‌رمانده‌ی‌ گشتی له‌شكری‌ میرنشینی زه‌نگنه‌، میر سمایل هه‌تا ساڵی 1688 میری زه‌نگنه‌ بوو، پاش مردنی‌ كه‌ له‌گۆڕستانی‌ (چوار تاقان) له‌ قه‌یتول نێژراوه‌، ئه‌مه‌ گۆڕستانی‌ میره‌كانی‌ زه‌نگنه‌ بووه‌، گۆڕستانی‌ (خانی‌ چاڵی) گۆڕستانی‌ خه‌ڵكانیتربووه‌. كوڕه‌كانی‌ میر سمایل (ئه‌حمه‌د _ محه‌مه‌د _ عه‌لی _ مسته‌فا _ عه‌بدولڕه‌حمان _ قاسی) بووه‌و دوو كچی بووه‌ (شاه خاتون)و (زارا خاتون) له‌ژنه‌كه‌ی‌ كه‌ ناوی‌ (ئایشێ خاتون) بووه‌. میر سمایل پایته‌ختی هاوینه‌ی‌ له‌سه‌ر ڕوباری‌ باسه‌ره‌ به‌ناوی‌ (گۆمه‌یل) له‌ساڵی 1640 دروست كردووه‌ گومه‌زی زۆری تیاداناوه‌. (15) پانزه‌ نامه‌به‌ری‌ ئه‌سپ سواری‌ بووه‌. له‌ساڵی 1645 سه‌رپه‌رشتیاری‌ شاری‌ كه‌ركوك بووه‌ له‌ساڵێكدا پێنج مانگ له‌وێ ماوه‌ته‌وه‌.
تیره‌كانی‌ هۆزی‌ زه‌نگنه‌ له‌باشوری‌ كوردستان (میر سمایلی)و (برایم خانچی)و (تاڵه‌بانی)و (ئۆمه‌ر ئاغا جان)و (خه‌نجه‌ر باز)و (چنگی)و (سیامه‌نسور) هیترن.
بڵاوه‌كردنی‌ تیره‌ی‌ زه‌نگه‌:
له‌سه‌روبه‌ندی به‌هێزی میرنشینی زه‌نگنه‌، ژماره‌یه‌كی زۆر بۆ كه‌ركوك‌و موسڵ‌و گه‌رمیان‌و گه‌رمه‌سێر كۆچ ده‌كه‌ن له‌سه‌ده‌ی‌ شانزده‌ی‌ زاینی (حه‌مه‌ زه‌نگنه‌) كه‌ یه‌كێك بووه‌ له‌ده‌ست ڕۆیشتوانی میرنشینه‌كه‌، وڵاته‌كه‌ به‌جێ دێڵێ‌و ڕوده‌كاته‌ (دێڵتاوه‌ _ خاڵسی ئێستا) پاشان غه‌ریبی وڵات ئازاری‌ ده‌دات‌و ده‌گه‌ڕێته‌وه‌ كوردستان‌و له‌قه‌ره‌هه‌نجیر نیشته‌جی ده‌بێ. له‌وێ ژن ده‌هێنێ‌و ده‌بێته‌ خاوه‌نی سێ كوڕ (ئه‌لك)و (جه‌لك)و (وه‌لك)و ده‌بێته‌ خاوه‌ن ده‌وارو ڕه‌شماڵی كورده‌واری‌‌و مه‌ڕو ماڵاتێكی زۆر.
(مام غه‌ریب عوبێد یابه‌) نه‌وه‌ی‌ حه‌مه‌ زه‌نگنه‌یه‌و ئێستا (72) ساڵ ته‌مه‌نیه‌تی به‌گوندستانی‌ وت:
به‌هۆی زۆربوونی خاوو خێزان و مه‌ڕو ماڵات و ماڵه‌وه‌، به‌ره‌و به‌رزایی یه‌كی نزیك كه‌ركوك جوڵاوه‌ و له‌ بان گردی (باوه‌ كه‌ره‌م) له‌وێ تاوڵ و ده‌وار و ڕه‌شماڵی هه‌ڵداوه‌، میر سمایل پێی گوتووه‌ له‌هه‌ر شوێنێ نیشته‌جێ بووی ناوی بنێ زه‌نگنه‌. حه‌مه‌ زه‌نگنه‌ قه‌ڵایه‌ك دروست ده‌كات ناوی‌ ده‌نێت (قه‌ڵاگومه‌ت)
له‌ناوه‌ندی (چه‌م هه‌چه‌) و (مه‌حموێۆنز) و (گردهه‌ناره‌) و (گرد جه‌له‌) و زالیاو و كه‌وه‌ڵه‌ گوندێك ئاوه‌دان ده‌كاته‌وه‌، له‌نێوان دوو ڕووباری‌ بچووك دا (چه‌می زه‌نگنه‌) له‌قه‌ره‌ هه‌نجیره‌وه‌ شۆڕ ده‌بێته‌وه‌ ده‌چێته‌ (جه‌وه‌ڵ بۆر)، (چه‌می كه‌وه‌ڵه‌) له‌ (سه‌رده‌ره‌)ه‌وه‌ شۆڕ ده‌بێته‌وه‌ ئه‌میش بۆ (جه‌وه‌ڵ بۆر)، له‌باكوری‌ ئاوایی (ئه‌شكه‌وتێك هه‌یه‌ به‌ناوی‌ گوڕ گوڕ) كوێستانێكی خۆش و فێنكه‌ ئه‌وێ ده‌كاته‌ دیوه‌خان . گوندی زه‌نگنه‌ دوو پیاده‌ ڕێی هه‌یه‌ بۆ كه‌ركوك له‌ قه‌ڵاته‌ گومه‌ت و ڕێگای‌ كانی‌ شارانی، له‌گه‌ڵ چه‌مه‌كوێره‌كه‌ بۆ كه‌ركوك.
فاریق عوبێد)گوندنشینێكی دیكه‌ ئه‌و به‌گوندستانی گوت:
له‌سه‌ر ئه‌و چه‌مانه‌ 3 ناسیاو هه‌بوو یه‌كێكیان مام ڕه‌شید كه‌وه‌ڵه‌ باوكی‌ یاسینه‌ڕه‌ش كه‌وه‌ڵه‌یی، ئه‌وی‌ دی مام جه‌بار حه‌دل بو باڕاش و كڕه‌ی‌ چه‌ڵتوكیشیان پێ ده‌كرد، ئاوه‌كه‌ی‌ ئه‌وه‌نده‌ زۆر بوو، مه‌ره‌زه‌شی له‌به‌ر ده‌كرا، به‌رداشی ئاشه‌كه‌مان له‌ قه‌یتولی پایته‌ختی زه‌نگنه‌وه‌ ده‌هێنا.
له‌گه‌ڵ شیڕه‌ی‌ شه‌به‌ق به‌كاروان ده‌ڕۆیشتین بۆ كه‌ركوكه‌كه‌ی‌ كوردان چوار سه‌عات ڕێگامان ده‌كرد، ڕشق و باره‌دارمان ده‌برد، هه‌موو كه‌ركوك ده‌گه‌ڕاین (یه‌ك عه‌ره‌ب) چی بوو له‌م وڵاته‌ی‌ كورد نه‌بوو.
گوزه‌ران و ژیان له‌ئاوایی زه‌نگنه‌:
زه‌نگنه‌ باخاتی زۆر بوو، له‌و ده‌م چه‌مانه‌ هه‌تا سنوری‌ جه‌وه‌ڵ بۆر ، باخاتی‌ هه‌نجیر كه‌ له‌كه‌ركوك به‌ناوبانگ بوو ، كه‌ ده‌تگوت (هه‌نجیری زه‌نگنه‌) كڕیاری‌ زۆری‌ بۆ ده‌هات، به‌ (سه‌به‌ت) كه‌ به‌ (توڵی شویله‌بی) ده‌یانچنی ده‌یان نارد بۆ كه‌ركوك، میمی (نه‌سرین محه‌مه‌د عه‌لی) پرچ و بسك سپی خه‌ڵكی ئاوایی گوتی: مه‌ره‌زه‌ لێره‌ كراوه‌ به‌ئاوی (سه‌ر ده‌ره‌) به‌ جۆگه‌ ده‌یان هێناو ده‌یان كرده‌ گۆله‌وه‌ به‌ تاقاو بو، به‌ده‌ستیاو و هه‌ره‌وه‌ز و زباره‌ بوو، دره‌و پێكه‌وه‌ ده‌مان كرد، له‌موی بزن چه‌واڵمان دروست ده‌كرد و برنجمان تێ ده‌كرد، ئه‌وجا به‌برای خۆم بڵێم : به‌یانیان زوو هه‌ڵ ده‌ساین، ته‌ندورمان به‌ (پشقل) گه‌رم ده‌كرد نانی‌ ده‌ستی و كولێره‌مان پڕ قوڵینه‌ ده‌كرد توێشه‌به‌ره‌مان بۆ شوان و سه‌پان ئاماده‌ ده‌كرد، له‌گه‌ڵ ئه‌مانه‌ لبادمان دروست ده‌كرد له‌گه‌ڵ ڕه‌شكه‌ ، ماڵ پڕ له‌دۆینه‌ و كه‌شك و ساوه‌ر و برنج و كه‌ندوو پڕ له‌ئاردی گه‌نمی‌ كورده‌واری‌ بو كوڕم.
به‌ڵام سه‌د حه‌یف له‌ساڵی 1965 به‌خوا (15) ڕۆژ بوو شوم كردبوو (حه‌ره‌س قه‌ومی) دڕه‌نده‌ی عاره‌ب په‌لاماریان داین و گاو گۆڵ و مه‌ڕو ماڵاتیان به‌تاڵان و دزی بردو ئاواییه‌كه‌مانیان سوتاند، ئێمه‌یش هانامان برد بۆ ئاوایی (مه‌ملی).
(خالید سلێمان حسین) پێشمه‌رگه‌یه‌كی دێرینی (ی‌. ن. ك)ه‌ و هه‌موو گیانی ئاسه‌واری‌ گولله‌ و پارچه‌یه‌، ئه‌و بۆ گوندستانی‌ ووت: میمی نه‌سرین ڕاست ده‌كات له‌ساڵی 1963 و 1965 و 1967 و 1987 چوار جار ماڵمان كاول بووه‌ له‌سه‌ر ده‌ستی عاره‌ب و حكومه‌تی عاره‌ب، با بۆت بگێڕمه‌وه‌ له‌ساڵی 1980 له‌سه‌ر ده‌ستی (عه‌بدوڵا محه‌مه‌د ئه‌سعه‌د) ڕێكخستن لێره‌ ده‌ستی پێكرد، ئه‌وجا (فاریق) و (خالید)و (بورهان زه‌نگنه‌ی‌ شاعیر) و (هادی) و (یه‌حیا)و (خورشید) و (حه‌سه‌ن به‌شاره‌ت) و (فوئاد محه‌مه‌د ئه‌سعه‌د) بوون به‌ڕێكخستن و به‌ناو قه‌ره‌حه‌سه‌ن و له‌یلان و شوان و چه‌مچه‌ماڵ كاری‌ ڕێكخستن ده‌ستی پێكرد و گه‌نجه‌كانی‌ زه‌نگنه‌ له‌گه‌ڵ پێشمه‌رگه‌ یه‌كیان گرت و به‌یه‌كه‌وه‌ له‌سه‌ر جاده‌ی‌ كه‌ركوك هه‌رجاره‌ی زه‌برێكیان له‌ حكومه‌ت ده‌دا، ئه‌مه‌ش بووه‌ هۆی ڕقی به‌عسیان له‌مناڵ و هه‌تا ڕیش چه‌رمی زه‌نگنه‌. یه‌كه‌م پێشمه‌رگه‌ (ڕێبوار محه‌مه‌د ئه‌سعه‌د) بوو له‌ ساڵی 1981 بوو به‌ پێشمه‌رگه‌ و له‌16/1/1983 له‌ئاوایی (عه‌زیز ئاوا)ی پشتی به‌كره‌جۆی‌ سلێمانی‌ له‌گه‌ڵ مامۆستا كه‌مال شه‌هید بوو، ته‌رمه‌كانیشیان به‌دوای‌ ترومبێلی سه‌ربازی ڕاكێشا، ئه‌وجا من له‌ساڵی 1981 بوم به‌پێشمه‌رگه‌ له‌كه‌رتی چواری‌ جه‌باری‌ لای‌ مامه‌ ڕیشه‌ی‌ نه‌مر. له‌كۆتایی ساڵی 1981 شه‌ڕێكی قورس له‌م گونده‌ ڕوی دا كچێك به‌ناوی‌ (گوڵستان) بریندار بوو له‌گه‌ڵ سالار (ئه‌حه‌ڕه‌شیش شه‌هید بوو) له‌ 15/5/1987 له‌ئاوایی شێخ جیری شه‌ڕێكی گه‌وره‌مان دژ به‌ جكومه‌تی به‌عس كرد (شۆڕش ڕه‌شید محه‌مه‌د) خه‌ڵكی كه‌ركوك بوو شه‌هید بوو (مه‌جید كۆمه‌ڵه‌) خه‌ڵكی ناوشوان بوو ئه‌ویش شه‌هید بوو، منیش برینداربووم گیانم خه‌ڵتانی‌ خوێن بوو، سه‌ربازه‌كانی‌ به‌عس وایانزانی‌ مردوم به‌جێیانهێشتم دوایی پێشمه‌رگه‌كان هاتنه‌وه‌ منیان ڕزگار كرد.
ئێمه‌ خاوه‌نی 15 شه‌هیدین له‌شۆڕشی نوێ و سێ شه‌هیدی شۆڕشی ئه‌یلولیشمان هه‌یه‌ جگه‌ له‌ 15 ئه‌نفال كراو.
حه‌كیم ئه‌حمه‌د حه‌سه‌ن ئه‌نجومه‌نی گوند:
به‌ر له‌ ڕماندنی گونده‌كه‌مان گوندی زه‌نگنه‌ 15 مێگه‌لی تیابوو، زۆر ده‌وڵه‌مه‌ندبوین 150 دۆنم زه‌ویمان باخ و باخات بوو، له‌ساڵی 1986 حكومه‌تی به‌عس زۆر ڕقی له‌ئاواییه‌كه‌مان بوو، ڕماندی و ئێمه‌ش چوینه‌ سه‌رو ئاوایی (سه‌ر ده‌ره‌) له‌ناو بنكه‌دا له‌بن عه‌رز خانومان كرد، 10 ماڵ بوین له‌وێ یه‌ك ساڵ ماینه‌وه‌، پاشان هاوه‌ن بارانیانكردین، (محه‌مه‌د حه‌سه‌ن واحید)و (عومه‌ر محه‌مه‌د عه‌لی) برینداربون. به‌و هه‌ڵه‌ته‌دا شه‌و ڕزگارمان بوو چوین بۆ گوندی شێخ جێری هه‌تا ئه‌نفاله‌ ئه‌وجا به‌یه‌كجاری‌ وڵاتمان جێهێشت و ناوچه‌كه‌ بوبه‌ شوێنی سه‌ربازی قه‌ده‌غه‌كراو.
پاش پرۆسه‌ی‌ ئازادی عێراق گه‌ڕاینه‌وه‌، زه‌نگنه‌مان ئاوه‌دان كرده‌وه‌، ژیانمان تیا دانایه‌وه‌، ئێستا پێنج ڕانه‌مه‌ڕی تێدایه‌، بیست خانو و ماڵمان لێره‌یه‌، هه‌ردوو چه‌می زه‌نگنه‌و كه‌وه‌ڵه‌ تیاماوه‌، بۆ كشتوكاڵ و مه‌ڕوماڵات به‌ش ده‌كات، كانیاوه‌كانی‌ (حه‌وزه‌كه‌) و (كارێزه‌كه‌ كه‌ له‌سه‌روی ئاواییه‌وه‌ بوو 12 ئینج ئاوی ده‌دا) وشك بون، به‌ڵام گوڕگوڕ ئاوی ماوه‌.
زه‌نگنه‌ كه‌رتی كشتوكاڵی 23یه‌ به‌ناوی‌ 15 جوتیاره‌وه‌یه‌ 100 دۆنم به‌راو و 5 هه‌زار دۆنم ده‌یمیمان هه‌یه‌، ئاوی كه‌وه‌ڵه‌ سێ گۆخڵی بووه‌، مه‌ره‌زه‌و توتن كراوه‌، له‌ساڵی 1978 قوتابخانه‌ كراوه‌ته‌وه‌و مامۆستا (غه‌ریبه‌) كه‌نیشكی كه‌ركوك بوو له‌گه‌ڕه‌كی ئازادی مامۆستامان بوو.
زه‌ویه‌كان وه‌رد كرایه‌وه‌و گه‌نم و جۆ سه‌ریانهه‌ڵدایه‌وه‌، كه‌لاوه‌كانمان به‌و خاكه‌ی‌ كوردستان هه‌ڵچنیه‌وه‌و خانوبه‌ره‌مان دروستكرده‌وه‌، مه‌ڕوماڵات كه‌وتنه‌وه‌ كه‌ژه‌كان، باخ‌وباخات پڕبوونه‌وه‌ له‌باڵنده‌و مه‌ل‌و قۆغ‌و هه‌نجیرو ترێ، مه‌شكه‌ ئاخن ژه‌نرایه‌وه‌، (لۆده‌كا) پڕبۆوه‌ له‌ كا.
هه‌وره‌ بروسكه‌ش كه‌ ده‌ست پێده‌كات له‌(بییه‌كان سادق) قارچكێكی زۆر كۆده‌كه‌ینه‌وه‌‌و دۆمه‌ڵانێكی زه‌وه‌ند هه‌ڵده‌گرینه‌وه‌ كه‌ جاران ده‌ماندا به‌ (كه‌ریم فارس)ی خاڵۆبازیانی‌و له‌كه‌ركوك ده‌یفرۆشت.
ئێستاش 80 پێشمه‌رگه‌مان هه‌یه‌ بۆ كوردو كوردستان، سه‌رله‌به‌ر هیچ داگیركه‌رێ نه‌وی ناكه‌ین و كه‌ركوكیش هه‌ر ده‌بێت بگه‌ڕێته‌وه‌ ناو نه‌خشه‌ی‌ كوردستان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئاوایی مه‌مله‌حه‌_سه‌نگاو _ ناو زه‌نگنه‌

هۆزی گه‌وره‌ی‌ زه‌نگنه‌ و مێژوو یه‌كێك له‌هۆزه‌ گه‌وره‌و به‌ناوبانگه‌كانی‌ «هه‌رێمی ...