سەرەکی » ئابووری » لە ساڵی رابردوودا زیاتر لە سێ ملیار دینار بۆ كەسوكاری شەهیدان خەرجكراوە

بەڕێوەبەرایەتی شەهیدانی سلێمانی:

لە ساڵی رابردوودا زیاتر لە سێ ملیار دینار بۆ كەسوكاری شەهیدان خەرجكراوە

ئامادەكردنی: سامان فەریق

لەماوەی ساڵی 2018دا لەڕێگەی بەڕێوەبەرایەتیی گشتیی كاروباری شەهیدان‌و ئەنفالكراوانی سلێمانییەوە بڕی سێ ملیار و 592 ملیۆن و 89 هەزارو 150 دینار بۆ لایەنی تەندروستی و خوێندكارانی كەسوكاری سەربەرزی شەهیدان خەرجكراوە.
لەساڵی 2018دا، لەڕێگەی بەشی تەندروستیی بەڕێوەبەرایەتی گشتی كاروباری شەهیدان و ئەنفالكراوانی سلێمانییەوە بە بڕی ملیارێك‌و 464 ملیۆن و 450 هەزار دینار چارەسەری تەندروستی بۆ هەزارو 526 نەخۆش لەكەسوكاری شەهیدان ئەنجامدراوە.
هەر لەو ماوەیەدا لەڕێگەی بەشی پەروەردەی بەڕێوەبەرایەتییەكەوە بۆ كرێی خوێندنی (697) خوێندكاری كوڕو كچی شەهید، بڕی دوو ملیار و 127 ملیۆن و 639 هەزارو 150 دینار خەرجكراوە، بۆئەوەی لە زانكۆ و پەیمانگاو خوێندنگە ئەهلییەكان وەربگیردرێن.
هەر لەساڵی 2018دا لەڕێگەی بەشی نیشتەجێبوونەوە، (508) پارچە زەوی بەسەر وارسی سەربەرزی شەهیداندا دابەشكراوە، هاوكات بەشەكە ناوی 188 شەهیدی سەنگەرو جینۆسایدی بۆ وەزارەتی شەهیدان ناردووە تا رەزامەندی وەرگرتنی زەوییان بۆ دەربكات.
بەشی كۆمەڵایەتیی بەڕێوەبەرایەتییەكەش لەهەمان ماوەدا مامەڵەی دیاری هاوسەرگیریی بۆ (177) كوڕو كچی شەهیدی سەنگەرو جینۆسایدو شەهیدانی دەستی داعش كردووە كە بڕی پارەكەیان دەكاتە (885) ملیۆن دینار، بەڵام بەهۆی قەیرانی داراییەوە پارەكەیان بۆ خەرجنەكراوە.
بەڕێوەبەرایەتی گشتی كاروباری شەهیدان و ئەنفالكراوانی سلێمانی، یەكێكە لە بەڕێوەبەرایەتییە فراوانەكانی وەزارەتی كاروباری شەهیدان و ئەنفالكراوانی هەرێمی كوردستان و لە (8) بەڕێوەبەرێتی و (3) بەش و (7) هۆبەو چەند بەڕێوەبەرێتییەكی دیكە لە سنووری قەزاو ناحیەكانی پارێزگای سلێمانی پێكدێت.

(پەروەردە، تەندروستی، چاودێری كۆمەڵایەتی، نیشتەجێكردن)
زۆربەی ئەو ناوچانەی كە خاوەنی ژمارەیەكی زۆر شەهیدو جینۆسایدو قوربانین دەكەونە سنووری چالاكییەكانی ئەم بەڕێوەبەرایەتییە گشتییەوە.
ئەم بەڕێوەبەرایەتییە لەساڵی 2018دا بەپێی توانا لە خزمەتی كەسوكاری شەهیدان و جینۆسایدكراواندا بووەو فەرمانبەرەكانی بە بەردەوامی و ماندوونەناسانە ئەركەكانیان جێبەجێكردووەو كارو چالاكییەكی بەرچاویان ئەنجامداوە.
ئامانجی ئەم بەڕێوەبەرایەتییە خزمەتكردنی سەرجەم وارس و كەسوكاری سەربەرزی شەهیدانە بەبێ جیاوازی لەڕووی: (دابینكردنی مووچە، لایەنی تەندروستی، بواری پەروەردەیی، نیشتەجێكردن، دیاری هاوسەرگیریی بۆ كوڕو كچی شەهیدان و جینۆسایدكراوان، چاودێری كۆمەڵایەتی، هەروەها بەدەنگەوەهاتنی هەموو داواكارییەك كە لەلایەن وارسی سەربەزی شەهیدانەوە ئاڕاستەی بەڕێوەبەرایەتی گشتی بكرێت).
رۆژانە كەسوكاری سەربەرزی شەهیدان و جینۆسایدكراوان بەمەبەستی راپەڕاندنی ئیش و كارەكانیان سەردانی ئەم بەڕێوەبەرایەتی گشتییە دەكەن، بەردەوام ئەم بەڕێوەبەرایەتییە لەخزمەتی كەسوكاری سەربەرزی شەهیداندایە، بەتایبەت لە رێگەی بەشەكانی (پەروەردە، تەندروستی، چاودێری كۆمەڵایەتی، نیشتەجێكردن)ەوە خزمەتی بەرچاو بەسەدان كەسوكاری شەهید بە تایبەت كچ‌و كوڕ و خوشك و براو نەوەی شەهیدان دەگەیەنێت.
لەم راپۆرتەدا پوختەی كاروچالاكییەكانی بەڕێوەبەرایەتییەكە خراوەتەڕوو:

بەشی تەندروستی
بەپێی ئامارێكی بەشی تەندروستی بەڕێوەبەرایەتی گشتیی كاروباری شەهیدان و ئەنفالكراوانی سلێمانی، لە ماوەی ساڵی 2018دا سەدان كەس لە كەسوكاری سەربەرزی شەهیدان لەڕێگەی ئەم بەشەوە سوودمەند بوون لەوەرگرتنی پێداویستییە تەندروستییەكان.
لە ساڵی 2018دا بەپێی فەرمانێكی قوبادی تاڵەبانی جێگری سەرۆكی حكومەتی هەرێمی كوردستان، بۆ 492 نەخۆش بڕی 495 ملیۆن دینار خەرجكراوە، ئەو نەخۆشانە لە ساڵانی رابردوودا نەشتەرگەرییان لە نەخۆشخانە حكومی و ئەهلییەكاندا ئەنجامداوەو دواتر پسوڵەی نەشتەرگەرییەكانیان هێناوە بۆ بەڕێوەبەرایەتی گشتی شەهیدانی سلێمانی و لەو ساڵەدا ئەو بڕە پارەیان بۆ سەرفكراوە.
هەر لە ماوەی ساڵی 2018دا ئەو كەسانەی پێویستیان بە شەبەكە و باڵۆن و قەستەرە هەبووە ژمارەیان (467) حاڵەت بووەو بۆ هەریەكەیان بڕی ملیۆنێك و 200 هەزار دینار سەرفكراوە، كە كۆی گشتییان دەكاتە 560 ملیۆن و 400 هەزار دینار.
سەرجەمی ئەو نەخۆشانەش لەڕێگەی فەرمانگەی تەندروستی و بەشی بوژانەوەی دڵ لە سلێمانی چارەسەریان بۆ ئەنجامدراوە.
لە نەخۆشخانەی شۆڕشیش (277) حاڵەتی نەشتەرگەریی بۆ كەسوكاری شەهیدان كراوە كە بۆ هەریەكەیان بڕی ملیۆنێك دیناری تێچووەو كۆی گشتییان دەكاتە 277 ملیۆن دینار. ئەمە جگە لە چارەسەركردنی (28) حاڵەتی جۆراوجۆری دیكەش كە تەنیا لە نەخۆشخانەكە چارەسەریان وەرگرتووە.
لە بەشی تیشكی فەرمانگەی تەندروستیش چارەسەری تەندروستی بۆ (44) حاڵەت بەبڕی (75) هەزار دینار كراوە كە كۆی گشتییان دەكاتە سێ ملیۆن‌و 300 هەزار دینار.
هەروەها لە نەخۆشخانەی شەهید د.ئاسۆ لەسلێمانی، چارەسەر بۆ (23) حاڵەت كراوە بەبڕی (750) هەزار دینار كە كۆی گشتییان دەكاتە 17 ملیۆن‌و 250 هەزار دینار.
لە فەرمانگەی تەندروستی بەشی كۆئەندامی هەرس و جگەریش چارەسەری تەندروستی بۆ (145) حاڵەت كراوە بۆ هەریەكەیان بەبڕی (500) هەزار دینار كە كۆی گشتییان دەكاتە 72 ملیۆن و 500 هەزار دینار.
هەروەها لە نەخۆشخانەی مناڵبوونی سلێمانیش بڕی حەوت ملیۆن و 500 هەزار دینار، بۆ (15) نەخۆش تەرخانكراوە واتە بۆ هەریەكەیان (500) هەزار دینار.
لە نەخۆشخانەی شاری سلێمانیش بۆ (63) حاڵەت بڕی 31 ملیۆن و 500 هەزار دینار تەرخانكراوە واتە بۆ هەریەكەیان (500) هەزار دینار خەرجكراوە.
هەروەها لە نەخۆشخانەی هیوا لە شاری سلێمانی 13 نەخۆش بینراون و چارەسەری كیمیاییان بۆ ئەنجامدراوە.
واتە لە ماوەی ساڵی 2018دا بەبڕی ملیارێك‌و 464 ملیۆن و 450 هەزار دینار چارەسەری تەندروستیی بۆ (1526) نەخۆش لە وارسی سەربەرزی شەهیدان ئەنجامدراوە.

بەشی كۆمەڵایەتیی
بەشی كۆمەڵایەتیش لەماوەی ساڵی 2018دا مامەڵەی دیاری هاوسەرگیری بۆ (177) كوڕو كچی شەهیدی سەنگەرو جینۆسایدو شەهیدانی تیرۆری دەستی داعش كردووە كە بڕی پارەكەیان دەكاتە (885) ملیۆن دینار، بەڵام بەهۆی قەیرانی داراییەوە پارەكەیان بۆ خەرجنەكراوە.
لەو ژمارەیەش (129) یان كوڕو كچی شەهیدی سەنگەر و (37)یان كوڕو كچی شەهیدی جینۆسایدو (11)یان كچ و كوڕی شەهیدانی تیرۆری دەستی داعشن.
پێویستبوو بۆ هەریەك لەو كچ و كوڕی شەهیدانە بڕی پێنج ملیۆن دینار خەرجبكرایە، بەڵام حكومەتی هەرێم بەهۆكاری قەیرانی دارایی پارەكەیانی بۆ خەرجنەكردووە.

بەشی پەروەردە
لەڕێگەی بەشی پەروەردەشەوە لە ماوەی ساڵی 2018دا بۆ كرێی خوێندنی (697) خوێندكاری كوڕو كچی شەهید بڕی دوو ملیارو 127 ملیۆن و 639 هەزارو 150 دینار خەرجكراوە، تا لە زانكۆو پەیمانگاو خوێندنگە ئەهلییەكاندا وەربگیردرێن.
هەر لە رێگەی ئەم بەشەوە لەساڵی 2018دا (249) پشتگیری بۆ كوڕو كچی شەهید كراوە بەمەبەستی راپەراندنی ئیش و كارەكانیان لەزانكۆ و پەیمانگاكان و ناوەندەكانی خوێندندا.

بەشی نیشتەجێبوون
ئەم بەشەش لەماوەی ساڵی 2018دا سەردانی هەریەك لە شارەوانییەكانی سلێمانی، شارەزوور، وارماوا، سەیدسادق، بازیان، پیرەمەگروون، چەمچەماڵ، قەڵادزێی كردووە بەمەبەستی دابینكردنی زەوی بۆ كەسوكاری سەربەرزی شەهیدان.
هەر لەماوەی ساڵی 2018دا لە رێگەی ئەم بەشەوە (508) پارچە زەوی بەسەر وارسی سەربەرزی شەهیداندا دابەشكراوە، هاوكات بەشەكە ناوی 188 شەهیدی بۆ وەزارەتی شەهیدان ناردووە تا رەزامەندی وەرگرتنی زەوییان بۆ دەربكات، لەو ژمارەیەش (117)یان شەهیدی سەنگەر و (71)یان شەهیدی جینۆسایدن.
زەوییەكانیش بەم شێوەیە دابەشكراون:
* دابەشكردنی (367) پارچە زەوی بۆ شەهیدانی سەنگەرو جینۆساید لە قەڵادزێ.
* دابەشكردنی (26) پارچە زەوی بۆ شەهیدانی سەنگەر لە چەمچەماڵ.
* دابەشكردنی (115) پارچە زەوی بۆ شەهیدانی جینۆساید لە پیرەمەگرون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

عیراق بڕیارێك له‌ باره‌ی قه‌ره‌بووكردنه‌وه‌ی جووتیارانه‌وه‌ ده‌دات

حكومه‌تی عیراق بڕیارێك له‌باره‌ی قه‌ره‌بووكردنه‌وه‌ی جووتیارانه‌وه‌ ده‌دات و ئه‌ندامێكی لیژنه‌ی ...