سەرەکی » وتار » گەوهەری دایکم… گەوهەری ژیانم

گەوهەری دایکم… گەوهەری ژیانم

عیماد ئەحمەد

وا ئه‌زانم دوێنێیه‌، مێرمنداڵێک بووم له‌ ئێواره‌یه‌کی بێڕه‌حمی خانه‌قیندا به‌هاوارو گریانه‌وه‌ به‌ دوای جه‌نازه‌ی‌ باوكمه‌وه‌ بووم به‌ره‌وگۆڕستان، به‌ڵام هاواری ئه‌و كاتم ته‌نیا هاواری مندڵێك بوو بۆ له‌ده‌ستدانی باوكی به‌بێ ئه‌وه‌ی به‌ ڕاستی قورسایی ئه‌و كۆسته‌ بزانێت، به‌بێ ئه‌وه‌ی درک به‌وه‌ بکات که‌ دێوه‌زمه‌ی بێ باوکی چۆن چنگ له‌ قوڕگی چاره‌نووسی ئه‌گرێت، ساڵانێکی زۆر دوای ئه‌وه‌ به‌هه‌مان شێوه‌ له‌ ئێواره‌یه‌کی خانه‌قیندا به‌ دوای جه‌نازه‌ی دایكمه‌وه‌ بۆ هه‌مان گۆڕستان، به‌ڵام ئه‌م جاره‌ به‌ خه‌مێكی قوڵتر، چونکه‌ هاواری من ته‌نیا تێكه‌ڵ به‌ قوڵپی گریان نه‌بوو، به‌ڵكو هاوارێك بوو له‌ هه‌موو جه‌سته‌و رۆحم هه‌ڵئه‌قوڵا بۆ له‌ ده‌ستدانی (گه‌وهه‌ر)ی ژیانم، ئه‌و ژنه‌ی هه‌موو ته‌مه‌نی خۆی بۆ ئه‌وه‌ ته‌رخان كرد كه‌ هه‌وڵبدات هه‌موو تاڵیه‌كانی ژیان، به‌ تامی هه‌نگوین ده‌رخواردی 5 منداڵه‌ هه‌تیوه‌كه‌ی بدات، هه‌وڵبدات گیان و رۆحی خۆی بکاته‌ قه‌ڵغانی منداڵه‌ بێنازه‌كانی بۆ ئه‌وه‌ی‌ زیاتر به‌ر زه‌بری قه‌ده‌ری بێ باوكی و نه‌داری نه‌كه‌ون،‌ هه‌ر به‌ ڕاست ئه‌و ئێواره‌یه‌ خانه‌قین بۆ من پایته‌ختی خه‌می هه‌موو دنیا بوو، چونکه‌ دایكم به‌ یه‌کجاری جێی هێشتم، ئه‌و دایکه‌ی پاڵه‌وانی راسته‌قینه‌ی پڕكردنه‌وه‌ی كه‌لێنی بێ باوكیمان بوو‌، بۆیه‌ به‌ مردنی سه‌رله‌نوێ هه‌تیو که‌وتمه‌وه‌.
‎من نازانم ئه‌ندازه‌ی خۆشه‌ویستی هه‌موو دایكێك بۆ منداڵه‌كانی وه‌كو یه‌كه‌ یان نا، گه‌ر واش بێت، ناتوانم باوەڕ به‌و راستیه‌ بكه‌م، چونكه‌ خۆشه‌ویستی دایكی من ئه‌ڵماسێك بوو له‌ناو تاریكی ژیانێكی دڵڕه‌قانه‌، له‌ناو ده‌هلیزی هه‌ژاری و نه‌داریدا زیاتر بۆ ئێمه‌ ئه‌گه‌شایه‌وه‌، ئه‌و ته‌نها دایك نه‌بوو، به‌ڵكو فریشته‌یه‌ك بوو له‌ پێستی دایكه‌وه‌ هاتبووه‌ سه‌ر زه‌وی بۆ ئه‌وه‌ی ‌ له‌و دۆزه‌خه‌ سه‌خته‌ رزگار بكات كه‌ بێ باوكی بۆ ئێمه‌مانانی سازدابوو، بۆیه‌ ئه‌و ژنه‌ دوو دیوی هه‌بوو، دیوێك كه‌ ده‌ریایه‌ك بوو له‌ خه‌م؛ مردنی هاوسه‌ره‌كه‌ی، 5 مناڵی هه‌تیو(سعاد، عماد، سناء، سمیر، سەرگوڵ) جیها‌نێك پڕ لەهه‌ژاری كه‌ ئه‌و دیوه‌ی جێ برینی خه‌م و ناسۆر بوو، دیوێكی تریشی خۆشی به‌خش و فریادڕه‌سی ئێمه‌ بوو.
‎دایه‌ (گه‌وهه‌ر)هه‌ر به‌ ناو گه‌وهه‌ر نه‌بوو، به‌ڵكو گه‌وهه‌ری ژیانی ئێمه‌ بوو، چه‌ترێك بوو كه‌ جیهانی هه‌ر پێنج جگه‌رگۆشه‌كه‌ی له‌ ژێردا جێ ده‌بوه‌وه‌، باوه‌شێک بوو تامی هه‌موو ئه‌م جیهانه‌ی ئه‌دا، هه‌رگیز بیرم ناچێته‌وه‌، دایكم قژێكی ره‌شی خاوی هه‌بوو، سه‌ری بێ باوكی و نه‌داریمی ئه‌كرده‌ کۆشی و ئه‌و قژه‌ خاوه‌شی وه‌كو چه‌تر ئه‌خسته‌ سه‌ر روومه‌ته‌كانم که‌ بۆنی به‌هه‌شتی لێ ئه‌هات، به‌ ده‌نگێكی پر له‌ حوزن لایه‌لایه‌ی بۆ ئه‌كردم، به‌ده‌م گۆرانی ئه‌ڵوه‌ن هه‌ی ئه‌ڵوه‌ن، ریزە مرواری فرمێسکه‌کانی ئه‌بوون به‌ ئه‌ڵوه‌ندێکی تر،چاوه‌كانی سیحرێكی بێ كۆتاییان هه‌بو. منی مناڵ له‌ ژێر چه‌تری قژیی و سۆزی ده‌نگه‌ ناوازه‌كه‌ی و سیحری چاوه‌كانی ئه‌خه‌وتم، به‌و شێوه‌یه‌ منی له‌ ژێرده‌ستی قه‌ده‌ری بێ باوكی و چنگی هه‌ژاریه‌وه‌ ئه‌گواسته‌وه‌ بۆ جیهانی فریشته‌كان، من به‌ ده‌م ده‌نگه‌ خۆشه‌كه‌یه‌وه‌ خه‌و ئه‌یبردمه‌وه‌، هه‌ر به‌ڕاست دایکم بۆ ئێمه‌ پردی نێوان مان و نه‌مان بوو، به‌ سۆزی دایکانه‌ی خۆی ئێمه‌ی گه‌یانده‌ که‌نارێکی ئارام، بۆیه‌ تا بمێنم به‌دوای ره‌ونه‌قی ئه‌و روخساره‌یدا وێڵم، به‌ڵام ئه‌فسوس تازه‌ ڕۆیی.
‎بیرمه‌ مناڵێكی هاروهاج، رانه‌وه‌ست و عه‌جوول بووم، هه‌رچه‌نده‌ چاوی ئه‌وم به‌سه‌ره‌وه‌ بوو، به‌ڵام ده‌ره‌قه‌تی کۆنترۆڵکردنیشم نه‌ده‌هات، هه‌میشه‌ ده‌ست و ئه‌ژنۆم برینی پێوه‌ بوو، دایكم سه‌ره‌ڕای ئه‌وه‌ی خه‌مبار و سه‌رقاڵ بوو، به‌ڵام فریای ئه‌وه‌شم ئه‌كه‌وت، له‌کاتی شووشتنا منی ئه‌خسته‌ ناو ته‌شتێك و ئینجا برینه‌کانمی ئه‌بینی، به‌ ده‌سته‌كانی ئه‌و برینانه‌ی ساڕێژ ئه‌كردو له‌گه‌ڵیشیدا ئه‌گریا و فرمێسك له‌ چاوانی هۆنهۆن ئه‌هاتنه‌ خواره‌وه‌، ئه‌و چه‌ند میهره‌بان و دڵ گه‌رم بوو، به‌ڵام من وه‌ك نه‌بووم، هه‌میشه‌ بۆ ئه‌و سه‌رچاوه‌ی سەرئێشەو چه‌رمه‌سه‌ری بووم، چونكه‌ تاكه‌ خه‌می ئه‌و گه‌وره‌كردنی ئێمه‌ بوو، به‌ڵام خه‌می من شتی تر بوو، بۆیه‌ دوای گه‌وره‌بوونم و تێكه‌ڵ بوونیشم به‌ سیاسه‌ت و رێكخستن، گه‌ڕێكی تری سه‌رئێشه‌و خه‌مو ئازاری ئه‌و بوو، گیرانیشم له‌لایه‌ن به‌عس و ئه‌منی عامه‌ ترۆپكی ئه‌و خه‌م و ئازارانه‌ بوو كه‌ دایكم به‌ هۆی منه‌وه‌ بینی، ئه‌و ئه‌یوت (مناڵ به‌م ده‌رده‌سه‌ریه‌ گه‌وره‌ بکه‌و به‌عسیش به‌م ئاسانیه‌ بیبات) ئه‌وکات دایکم به‌ قرچه‌ی گه‌رمای هاوین، ‌به‌ هه‌موو نه‌داری خۆیه‌وه‌ هه‌فته‌ی جارێك ئه‌هات بۆ ئه‌وه‌ی چاوی پێم بكه‌وێت و جل و پێداویستی ترم بۆ بێنێت، كه‌چی بێهووده‌ له‌جیاتی بینینی كوڕه‌كه‌ی، جله‌ خوێناویه‌كانیان ئه‌دایه‌وه‌، من دڵنیام ئازاری دایكی من وه‌ك ئه‌وانی تر نه‌بوو،جله‌ خوێناویه‌كانم دۆزه‌خی ژیانی ئه‌وی گه‌رمتر ئه‌كرد، كه‌ به‌ریشبووم بۆی باس ئه‌كردم چ موعاناتێكی هه‌بووه‌، دوای ئه‌وه‌ش وێستگه‌ی پێشمه‌رگایه‌تیش بۆ دایکم مایه‌ی خه‌م و ده‌رده‌سه‌ری تازه‌ بوو، جاران به‌ده‌م بارگرانی ژیان و گوزه‌ران، رێگه‌ی سجن و بێ سه‌روشوێنی کوره‌که‌ی، دوای بوونم به‌ پێشمه‌رگه‌ش، خۆ حه‌شاردان له‌ ترسی به‌عس و ماڵه‌و ماڵی خانه‌قیشی هاته‌ سه‌ر، جگه‌ له‌ گونده‌و گوندی کوردستان بۆ بینینی من و سمیری برام. برینداربوونیشم که‌سه‌رێکی تری دایکم بوو.
‎دوای راپه‌ڕین و گه‌ڕانه‌وه‌مان من هه‌میشه‌ هه‌وڵمداوه‌ بۆ ئه‌وه‌ی هه‌رنا که‌مێک قه‌ره‌بووی ئه‌و دایکه‌م بکه‌مه‌وه‌و له‌ حه‌سره‌ت و ناخۆشیه‌کانی چاره‌بکه‌م، گه‌ر هیچ نه‌بێت ئارامی و خۆشبه‌ختیه‌کی پێ ببه‌خشم، به‌ڵام چۆن ئینسان ئه‌توانێ قه‌ره‌بووی (گه‌وهه‌ر)ێک بکاته‌وه‌ که‌ گه‌وهه‌ر ئیره‌یی پێ ببات، چۆن ئه‌توانێ نرخی ئه‌و ژان و ناسۆره‌ی بداته‌وه‌ که‌ به‌ درێژایی ئه‌ڵوه‌ن درێژ بوون، ئێستا زۆر جار بیر له‌وه‌ ئه‌که‌مه‌وه‌ دایکم وه‌کو دارخورمایه‌کی هه‌ره‌ به‌ هێزی خانه‌قین بوو، گه‌رماو ره‌شه‌باو ده‌رده‌سه‌ری ژیان نه‌یچه‌مانده‌وه‌، به‌سه‌ربه‌رزی ئێمه‌ی گه‌وره‌ کرد، هه‌ر ئه‌وه‌ش نا به‌ڵکو سه‌ره‌ڕای کۆچی باوکم، سه‌ره‌ڕای ده‌ستکورتی و خراپی گوزه‌ران، وه‌کو که‌سایه‌تیه‌کی دیارو رێزلێگیراوی بنه‌ماڵه‌که‌ی و گه‌ڕه‌ک و خزمانیش مایه‌وه‌، ئه‌زموون و به‌رخوردی له‌گه‌ڵ ژیان به‌هره‌ی ئه‌وه‌ی پێدابوو له‌ هه‌ویری بارخراپی و ده‌سکورتی، نانی عیزه‌تی نه‌فس و رێزو که‌سایه‌تیه‌کی به‌هێز دروست بکات، له‌ هه‌ژاری پاره‌وپول و سامان، ده‌وڵه‌مه‌ندی ناو و ناوبانگ و رێزی خه‌ڵک بۆ خۆی بچنێته‌وه‌، ره‌نگه‌ زیاده‌ڕه‌وی نه‌بێ گه‌ر بڵێم ئه‌و هاوسه‌نگی و حیکمه‌ته‌ی سه‌دان زاناو بیرمه‌ندی وه‌کو مارکس تیۆره‌یان بۆ ئه‌کرد، دایکم به‌ ئاسانی له‌ ناو چوار دیواری ماڵێکی هه‌ژاردا به‌رجه‌سته‌ی ئه‌کرد که‌ ته‌نیا خه‌م و ده‌سکورتی سه‌رمایه‌که‌ی بوو، دایکێک بوو له‌م جیهانه‌دا چاوی له‌هه‌موو شتێک پۆشی بوو و ده‌ستی به‌سه‌ر ئێمه‌دا ئه‌هێنا، به‌ڵام ئه‌و خۆی که‌سێکی نه‌بوو وای بۆ بکا، خه‌می ئێمه‌ی ئه‌خوارد، به‌ڵام ژیان خه‌می ئه‌وی نه‌بوو، زه‌رده‌خه‌نه‌و پێکه‌نینی بۆ ئێمه‌ وه‌کو کولێره‌یه‌ک وابوو دیوێکی جوان و دیوێکیشی جێداغی بارگرانی ژیان و گوزه‌ران بێت.
من بیرمه‌ له‌ گه‌رمای هه‌ڵقرچێنه‌ری خانه‌قیندا، له‌ ژورێکی قوڕینی بێ په‌نجه‌ره‌دا، دایکم به‌ ده‌زو و داوی خه‌م و چه‌رمه‌سه‌ری چاره‌نووسێكی باشتري له‌سه‌ر پارچه‌قوماشی ژیان بۆ ئه‌نه‌خشاندین، له‌و گه‌رما هه‌ڵپڕوکێنه‌ره‌ی خانه‌قیندا به‌ باوه‌شێنێکه‌وه‌ ئێمه‌ی فێنک ئه‌کرده‌وه‌، که‌ گه‌وره‌ بووم و به‌ ئێستاشمه‌وه‌ من بیر ئه‌که‌مه‌وه‌ که‌ دایکم ئه‌وکات چه‌ند به‌ بێده‌نگی بۆ چاره‌نووسی خۆی و منداڵه‌کانی گریابێت، ژنێک له‌ 29 ساڵیدا بێوه‌ژن که‌وتبێ و له قه‌ده‌ری گه‌وره‌کردنی 5 منداڵی بێ ده‌ره‌تان شتێکی تری به‌ میرات بۆ جێ نه‌مابێت؟
منداڵ هه‌ر چه‌ند گه‌وره‌ بێت، له‌ چاوی دایک و باوکی هه‌ر بچوکه‌و هه‌ر وه‌کو منداڵ دێته‌ به‌رچاو، هه‌مان شت بۆ منداڵیش راسته‌، هه‌رچه‌ند بچێته‌ عومره‌وه‌ زیاتر پێویستی به‌ باوه‌ش و خۆشه‌ویستی دایک هه‌یه‌، زیاتر تۆن و مۆسیقای وتنی دایه‌ی لا شیرینترو عه‌زیز تر ئه‌بێت، خۆشه‌ویستی دایک ئه‌و سوڵتان و ئیمپراتۆریه‌ته‌یه‌ جێگره‌وه‌و به‌دیلی نییه‌، دیاریه‌کی خوداییه‌ زه‌مان و مه‌کانی نییه‌، هه‌موو رۆژێک له‌گه‌ڵ خۆری به‌یانیان نوێ ئه‌بێته‌وه‌، بۆیه‌ کۆستی له‌ده‌ستدانی دایک وه‌ک ئاوابوونی یه‌کجاره‌کی خۆره‌ له‌سه‌ر زه‌وی،خوایه‌گیان من چۆن به‌رگه‌ی ئاوابوونی ئه‌و خۆره‌ بگرم ، چۆن بێ بانگ کردنی ناوی(دایه‌) زمانم بێته‌ گۆ ، که‌ من له‌ خۆشترین و پڕ واتاترین وشه‌ بێبه‌ش بووم، ئێستا گیانی من تاریکستانێکه‌ خۆری دایکی لێ ئاوابوو، مه‌گه‌ر بیره‌وه‌ریه‌کانی سه‌بووری ئه‌و کۆسته‌م بده‌ن! من (گه‌وهه‌ر)ێکم رۆشت که‌ تا ماوم جێگه‌ی پڕ نابێته‌وه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

کارکردن لە ژێر ناوی پێشمەرگەیەکی (ی.ن.ک) دا

جەلال دەباغ کاتێک ھاوڕێ کەریم ئەحمەد داوای لێکردم بچمە شام ...