سەرەکی » ئاراستە » فاروقی مەلا مستەفا تەڵعەت ״حەرب״ی کوردستان

کەرتی سینەماو دراما؛ پەیام و پەیمانێك بۆ سەرمایەدارانی کوردستان

فاروقی مەلا مستەفا تەڵعەت ״حەرب״ی کوردستان

هاوار مستەفا خان

تێدەگەین؛ پارت و هێزە سیاسییەکان مافی خۆیانە لە پێناوی گەیشتن بە دەستەڵات و سەرخستنی پەیام و بەرنامەی سیاسیی خۆیان، تێبکۆشن. جا ئەگەر ئەو هێزانە لە دەستەڵاتدابن، یا ئۆپۆزسیۆن. هەر دوو لایەن گەر بیانەوێت دەتوانن بەرنامەو پلانی گەشەپێدانی کەرتی «سینەماو دراما« بە یارمەتی شارەزایان دابڕێژن و وەبەرهێنانی تێدابکەن و بیخەنە سەر خەرمانی کەرتەکانی دیکەی وەك «سامانی سروشتی و کشتوکاڵ و پەیوەندی و گەیاندن و گەشت وگوزارو..هتد ، یان لە بەرنامەی پارت و جوڵانەوەکانیاندا بە کردەوە پشتیوانی ئەو کەرتە گرنگەی ئابوریی بکەن و لەوێدا رەواجی ئەو کەرتە دنەبدەن و پەیام و پەیمانی ژیاندۆستی تێدا بڵاوبکەنەوە کە بە تەرخانکردنی پارەو پولێکی زۆرو زەوەند، دەتوانن بەرهەمەکانیان بخەنە بۆرسە و بازاڕی گەورەی دونیاو» هۆلیوود و بۆلیوود و نۆلیوود»ێکی نوێی کوردیی و خۆکردیشی لێ دروست بکەن، بۆ نا؟، کێ ناڵێت؛ سلێمانی پایتەختی رۆشنبیریی، یان دەشتی کاکی بە کاکی پایتەختی پیرە هەولێرێ، یان دهۆک و زاخۆی دەلال و کۆیەی حاجی قادرو خاڵە تایەر، هەڵەبجەو گەرمیانی ئەنفال و کیمیاباران و کەرکوکی باوەگڕ گڕ و دەروازەی راپەڕین و باڵەکایەتی لانکەی شۆڕشەکان! نابنە سەنتەری گەورەی بازاڕو وەبەرهێنانی کەرتی سینەما ودراما لەو باشورەی کوردستانی مەزن؟!.
دەپرسین؛ ئەو کەرتە گرنگە لە کوێی بەرنامەی »پارت و هێزە سیاسیەکان»دایە؟، سەرمایەدارانی کوردستان چۆن تەماشای دەکەن؟ کارەکتەرە ئەکشنەکانی بواری کەرتی سینەماو دراما چۆن دەڕواننە ئەو قەیرانە درێژخایەنەی هونەرو بژێوییان؟ بینەر لە کوێی ئەو هاوکێشەیەدایە؟ ئایە لەماڵ دانیشتووەو حەسرەت ئەکێشێ بۆ نەبوونی سینەماو درامای کوردیی؟ یان بەردەوام دەبێت لە بینین، تەنانەت ئەگەر ئەو بینینە بەزیانیش بکەوێتەوە بۆ سەر خودی گەشەی ئەو کەرتەو کولتوورو فەرهەنگ و ئاسایشیی نەتەوەیی؟!.
کەواتە؛ لە کوردستاندا ژینگەی گەشەکردنی کەرتی «سینەما و دراما» لەبارە کە پێویستی بە چوار پایەی: حوکمڕانی و سەرمایەدار و هونەرمەند و بینەرە؟. بە واتایەکی تر گەلی کوردو کوردستانی، «جوگرافیا و مێژوو، کولتوورو فەرهەنگ»ی هەیە کە ببێتە ژێرخان و بانگی سەرهەڵدانی ناوەندێکی گەورەی سینەمایی تێدا رابگەیەنرێت؟. بە بڕوای بەندە؛ بەڵێ؟!.
«وەڵامی ئەو « بەڵێ» یە لە نووسینی دیکەدا درێژەی دەبێت»
فاروقی مەلا مستەفا «تەڵعەت حەرب»ی کوردستان
لە ماوەی دوو ساڵدا، رەنجی زیاتر لە (٣٠)ساڵ کارکردنم کۆکردەوە بۆ دۆزینەوەی رێگاکانی وەبەرهێنانی راستەقینە لە کەرتی سینەماو درامادا.
سەرەتا، پڕۆژەی کارو تەمەنی ساڵەهای کوردستانم لە کۆڵناو لە میسرەوە دەستم پێکرد، بیرۆکەی «موترب»ە کردنی درەختی سینەمای کوردییم کردە پڕۆژەو، مۆڵەتی دامەزراندنی کۆمپانیای هاواری فیلم-م بۆ بەرهەمهێنان و دابەشکردنی هونەریی وەرگرت، پاش ماوەیەك بۆ تەواوکردنی ماستەرو سەرخستنی پڕۆژەکان، جارێکی دیکە گەڕامەوە میسرو لە سایەی ئال بەدرخان و نەوەکانی، پرۆتۆکۆلێکی سێ ساڵەمان لە نێوان میسرو کوردستان، وەك هونەرمەندی مەزن دەرهێنەر عەلی بەدرخان و سینەماکار هاوار خان» بەندە» واژۆ کرد.
پڕۆتۆکۆلی پێویستمان ئەنجامداو کەوتینەخۆ بۆ وردکردنەوەی خاڵەکانی. بەندە گەڕامەوە کوردستان و لە ساڵی ٢٠١٧ دا، کە کەمتر لە مانگێك بەسەر پڕۆتۆکۆلی «هاواری فیلم و سەنتەری بەدرخان» تێنەپەڕیبوو، سەرباری گرژی و ئاڵۆزی گەورەو مەترسیداری سیاسیی لە کوردستان و عیراق، « بەهاوکاری هەندێك هاوڕێ»دەستم کرد بە دروست کردنی پەیوەندیی.
سەرەتای دیدارمان لەگەڵ بەڕێز سەرمایەداری گەورەی کوردستان کاک فاروق مەلا مستەفا دەستی پێکرد. نووسراوێکی فەرمیم ئاڕاستەی کاک فاروق کردو بۆ یەکەمجار پڕۆژەی وەبەرهێنانی سینەما و دراما، بە کوالێتی بەرزی هونەریی و بزنسێکی گەورە کە سنوری وەبەرهێنانی ناوەخۆو ناوچەکەو جیهانی دیاریکرد، گەیاندە دەستی و بەندە بە گووتن و نوسراوی فەرمی ئەوم بە «تەڵعەت حەرب»ی کوردستان چواند، کە «حەرب» سەرمایەدارێکی گەورەو نیشتیمانپەروەری میسر بوو، زیاتر لە نەوەد ساڵ لەمەوبەر ئابوری میسری بوژاندەوەو کەرتی بانک و کارگەی رستن و چنین و فڕۆکەوانی و گەشتیاریی و پەتڕۆڵ ودەیان پڕۆژەی تری دامەزراند، لەناویشاندا « ستۆدیۆی میسر»بوو کە لەسەر داخوازی کوردێکی بەدرخانی و بە پارەو لەسەردەستی ئەو دامەزراو نەشونمای کردو میسری کردە هۆلیۆدی رۆژهەڵاتی ناوەڕاست؟!.
دوای باس و خواسێکی دورو درێژ لەسەر چۆنیەتی گەشەپێدانی کەرتی سینەما و دراما، کاک فاروق بە سەرنجێکەوە ووتی: ئەزانی تۆ دووەم کەسی بە من دەڵێی: تەڵعەت حەربی کوردستان؟، منیش بەراستی زۆر بەپەلە بووم بزانم ئەو یەکەم کەسە کێیە وا گرنگی هەبوونی چەندین تەڵعەت حەربی کوردیی بۆ بوژاندنەوەی کوردستان زانیوە؟، فریا نەکەوتم بپرسم ئەو زاتە کێیە؟ قسەکانی تەواو کردو ووتی: یەکەم کەس مام جەلال پێی وتووم: تەڵعەت حەربی کوردستان.
لەو دانیشتنەدا، پڕۆژەی چەندین فیلمی هاوبەشی سینەمایی نێوان میسرو کوردستانمان تاوتوێ کرد، باسی بنەڕەتی دانیشتنەکەمان لەسەر کەرتی سینەماو گەشەی ئابوریی ئەو کەرتە بە داتاو ئامار خرایەڕوو، دەرکەوتنی پیشەسازی سینەماو بە بزنسکردنی لە کوردستان و «پڕۆژەی موتربەکردنی درەختی سینەمای کوردیی» بە پێویست زانرا و گەنگەشەیەکی چڕو پڕی لەبارەیەوە کرا.
پڕۆژەکە؛ وەك دۆسێیەكی جیاوازی ئابوریی، هێشتا لەبن دەستی کاک فاروق مەلا مستەفا ماوەو خوازیارین لەگەڵ سەرمایەدارانی تری نیشتمانپەروەری کوردستان، چ بەجیاو چ وەك گروپ و هاوبەش و پشك، لەسەر دەستی ئەوان بە هاوکاریی و کارئاسانی حکومەت درەختی سینەمای کوردیی و کوردستانی بەر بگرێت.
لەگەڵ کاک فاروقی مەلا مستەفا، قسەو باسی تری زۆرمان ماوە کە لە دەفتەری یادەوەریی سینەماییمدا تۆمارکراوەو کاتی هاتووە ئەو دۆسێیە بۆ قازانجی «سەرمایەگوزاریی و گەشەکردنی بازاڕو بۆرسەی سینەمای کوردیی» بە هاندان و هاتنەپێشەوەی ئەو کەسایەتییە مەزن و نیشتمانپەروەرانەی کوردستان وەك کودی دافنشی بکرێنەوە؟!.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

له‌ یادی 40 ساڵه‌ی شه‌هیدبوونی سیروان تاڵه‌بانی و هاوڕێكانیدا

ئاوات كۆكه‌یی شه‌هید سیروان تاڵه‌بانی شه‌هیدی سه‌ركرده‌ فه‌یسه‌ڵ ره‌شید حه‌مید ...