سەرەکی » کەلتوور » ئاوایی خدربه‌گ _ كه‌ركوك

ئاوایی خدربه‌گ _ كه‌ركوك

كه‌ركوك ته‌مه‌نی ده‌گه‌ڕێته‌وه‌ بۆ (5) هه‌زار ساڵ به‌ر له‌ئێستا, له‌ساڵه‌كانی‌ 1554 هه‌تا 1861 ی زاینی پایته‌ختی ئه‌یاله‌تی شاره‌زوور بووه‌ كه‌ سنجه‌قه‌كانی‌ (أربل) و (جه‌وه‌ڵ حه‌مرین) و (میسڵ _ موسڵ) بوه‌ كه‌ ده‌كاته‌ باشووری كوردستان، كه‌واته‌ كه‌ركوك به‌خاك كوردستان و به‌مێژوو كوردستان و به‌جوگرافیا و جیۆ سیاسی كوردستان و ڕوبارێك خوێنی كوردی بۆ ڕژاوه‌، ئیدی ته‌نها كوردستانه‌، گه‌وجن ئه‌و داگیركه‌ره‌ تۆرانی و عوسمانلی و پێ په‌تییه‌كانی‌ دورگه‌، باس و خواس له‌م شاره‌ ده‌كه‌ن و به‌نه‌فه‌سی درێژی داگیركه‌ره‌كان، خۆیان گه‌وج ده‌كه‌ن، هه‌قیش نییه‌ كورد ئه‌وه‌نده‌ خۆی توڕه‌ بكات، ئێستا له‌ژێر ده‌ستی داگیركه‌ردایه‌و به‌نه‌خشه‌و پیلانی موخابه‌راته‌كانی‌ تورك و فارس و عه‌ره‌ب داگیركرا بۆ هاوسه‌نگی هێز، ده‌نا برایان، كه‌ركوك وڵاتی‌ كورده‌واری یه‌و ئه‌وی به‌شێوه‌ی‌ داگیركردن هاتبێ به‌هۆیهای‌ «منداڵانی‌ حه‌ویجه‌» ده‌كرێنه‌ ده‌ره‌وه‌، ئه‌ویشی له‌موخابه‌راته‌كانی‌ «عوسمانلی» و «عه‌جه‌م»ه‌وه‌ فه‌رمانی‌ كوشتنی «خورماتوو» و «كه‌ركوك»ی كوردی وه‌رگرتبێ و پاره‌و چه‌كی وه‌رگرتبێ، ئه‌وا سه‌رشۆڕ ده‌بێ و دادگایی میلله‌تی كورد له‌كه‌ركوك ده‌كرێ

قه‌ره‌ حه‌سه‌ن _ كارا هه‌سه‌ن _ كوڕی هه‌سه‌ن
«الاغ قۆینلو»یان «ئالاق قۆینلو» واته‌ «مه‌ڕی سپی» له‌هۆزه‌ توركمانیه‌كانن له‌ (توركی ئاغوز)له‌ساڵی 1378زاینی یه‌وه‌، ده‌ستیانكرد به‌جه‌رده‌یی و ڕێگری‌ و تاڵانی و بڕۆو كوشتن و بڕی گه‌لانی‌ ناوچه‌ی ئاسیای ناوه‌ڕاست و به‌زه‌بری دڕنده‌یی ده‌ستیان گرت به‌سه‌ر ئانه‌دۆڵی كوردستانی‌ باكورو ئازه‌ربایجان و فارس و ئه‌فغانستان و توركستان و ناوچه‌ی میزۆپۆتامیا، له‌باشوری‌ كوردستان، باكوری میزۆپۆتامیا، گه‌لێ تاوانی‌ گوره‌یان به‌رامبه‌ر به‌كورد ئه‌نجام داو تاڵان و بڕۆیان كرد كه‌ گه‌یشتنه‌ ناوچه‌ی‌ «ڵێڵان» واته‌ له‌یلان ((_ كه‌ به‌یانیان ته‌ماشای ناوچه‌كه‌ ده‌كه‌یت ته‌مێكی سپی ناوچه‌كه‌ی‌ ڵێڵ كردووه‌ كورد پێ ی وتووه‌ ناوچه‌ی‌ ڵێڵان، دواتر بووه‌ به‌ له‌یلان))
به‌شێك له‌سوپای‌ ئاق قۆینلوی خوێن ڕێژو جه‌رده‌، په‌لاماری‌ ڵێڵان «له‌یلان» ده‌ده‌ن، یه‌كێك له‌سه‌رۆك هۆزه‌كانی‌ كورد ناوی‌ «كارا هه‌سه‌ن» یان «كوڕی حه‌سه‌ن» ده‌بێ، له‌گه‌ڵ هۆزه‌ كورده‌كانی‌ ئه‌و ناوچه‌یه‌ به‌ره‌نگاری‌ زوڵم و زۆرداری‌ توركه‌ خوێن ڕێژو داگیركه‌ره‌كان ده‌بنه‌وه‌ و مه‌ردانه‌ له‌به‌رزایی یه‌كانی‌ جه‌وه‌ڵ بۆرو شاخی مه‌تاره‌و به‌رزایی یه‌كانی‌ خاڵۆ بازیانی زۆرێكیان لێده‌كوژن، لوتیان ده‌شكێنن، به‌مه‌ سه‌ركرده‌ دڕنده‌كانی‌ تورك (كه‌ ئێستاشی له‌سه‌ر بێت هه‌ر دڕنده‌ن و نه‌خۆشی «كورد» كه‌وتۆته‌ گیانیان و توشی شێرپه‌نجه‌ی‌ كورد بوون) خۆیان ئاماده‌ ده‌كه‌نه‌وه‌ هێرشێكی وه‌حشیانه‌ی‌ مه‌غۆلی ده‌ست پێده‌كه‌ن و ده‌ڵێن «قه‌ره‌ هاسان» پاش جه‌نگێكی خوێناوی‌، نامه‌ردانه‌ ئه‌م سه‌رۆكه‌ی‌ كورد له‌خۆرهه‌ڵاتی‌ كه‌ركوكی‌ كورد ده‌كوژن و ناوچه‌كه‌یش تاڵان و بڕۆ ده‌كرێ، له‌و ڕۆژه‌وه‌ پێیان گوتوه‌ ناوچه‌كه‌ی‌ كه‌ «هاسان»ی لێ كوژراو دواتر بوه‌ به‌ قه‌ره‌ حه‌سه‌ن، و جگه‌ له‌سه‌ركرده‌یه‌كی كورد هیچ مێژوویه‌كی دروستكراوی‌ پیاوانی‌ ئه‌نقه‌ره‌ و عه‌ره‌بی داگیركه‌ر هه‌ڵناگرێ.
ناوچه‌ی قه‌ره‌حه‌سه‌ن (48) گونده‌ و مه‌ڵبه‌ندی به‌ڕێوه‌بردنی‌ كارگێڕی له‌شارۆچكه‌ی‌ له‌یلانی كورده‌، یه‌كێكه‌ له‌گونده‌كانی‌ قه‌ره‌حه‌سه‌ن، گوندی «خدربه‌گ یان خسییر به‌گ»ه‌

مێژووی‌ گوندی خییر به‌گ
ئاینی زه‌رده‌شتی له‌سه‌رده‌می «ماد»ه‌كان و هه‌تا سه‌رده‌می ساسانیه‌كانیش گه‌لێ ناوچه‌ په‌یڕه‌وی ده‌كردن، به‌تایبه‌تیش باشووری‌ كوردستان و تایبه‌ت تر كه‌ركوك، بۆ بڵاوبونه‌وه‌ی‌ ئه‌م ئایینه‌، له‌هه‌گباتا «هه‌مه‌دانی‌» ئێستاوه‌ دوو ڕێڕه‌وی ناردنی‌ پیاوانی‌ ئاینی له‌گه‌رمه‌سێر و كوێستانه‌كانی‌ باشوری‌ كوردستانه‌وه‌ ده‌ستیان كرد به‌ناردنی‌ پیاوه‌ ئاینی یه‌ گه‌وره‌كانیان، «ئاوێستا» كه‌ به‌زمانی‌ كۆنی كوردی نوسراوه‌ته‌وه‌ له‌سه‌رده‌می هه‌خامه‌نشینی فارسی زیاتر له‌هه‌زار به‌شی بووه‌، له‌سه‌رده‌می ساسانیه‌كان 348 به‌شی ئاوێستا مابۆوه‌، هه‌رچی «باوه‌»كانیان هه‌بو له‌گه‌رمه‌سێره‌وه‌ هاتنه‌ باشور «باوه‌ مه‌حموی‌»، «باوه‌ شاسوار»، «باوه‌ قه‌تاڵ»، «باوه‌ گوڕگوڕ»و «باوه‌ یادگاری‌ موسڵ» له‌كوێستانه‌كانه‌وه‌ «پیر» هاتن «پیری شه‌وكێڵ»و «پیرمه‌سور»و «پیر ئه‌لیاس»و «پیره‌مه‌گرون»و هه‌تا «پیرمام _ سه‌لاحه‌دین» له‌پاش ئه‌م «پیر»و «باوه‌»یه‌ كه‌سانی دیكه‌ی‌ ئاینی هه‌ن و به‌ره‌و گونده‌كانیان ڕه‌وانه‌كردون.
لێره‌ خدربه‌گ، ده‌سه‌ڵاتی‌ ئاینی یارسان و ده‌سه‌ڵاتی‌ كۆمه‌ڵایه‌تی گه‌وره‌ی‌ بووه‌، له‌ڕۆژهه‌ڵاتی‌ كه‌ركوك، ناوچه‌كه‌ به‌گشتی هه‌تا «باوا»و «مامشه‌»و بان جه‌واری‌ یارسان بوون، هه‌تا ورده‌ ورده‌ كه‌م بوونه‌وه‌ و له‌ناوچه‌كه‌ نه‌مان. له‌ئاوایی خدر به‌گ دوو گۆڕستانی‌ زه‌رده‌شتیانی لێ هه‌یه‌، «كانی‌ سپی»و «گرده‌ خڕ». سه‌ربه‌ست عه‌بدولقادر شێخ محه‌مه‌د تاڵه‌بانی بۆ گوندستانی‌ نوێ وتی: ئاواییه‌كه‌ بۆ هه‌زار یان دوو هه‌زار ساڵ به‌ر له‌ئێستا ده‌گه‌ڕێته‌وه‌، كاكه‌یی لێره‌ نیشته‌جێ بوون ئه‌و ده‌مانه‌، ئه‌و به‌گوندستانی‌ گوت: ئه‌ی‌ ئاوایی یه‌ مێژوویه‌كی كۆنی هه‌یه‌، به‌ڵام مێژووی‌ ڕونتر له‌لای‌ ئێمه‌ 150 بۆ 200 ساڵ به‌ر له‌ئێستا به‌ڕۆشنتر دیاره‌، بڕوانه‌، ئێمه‌ نه‌وه‌ و وه‌چه‌ی‌ مه‌لا مه‌حمودی زه‌نگنه‌ كوڕی یوسف كوڕی ڕۆسه‌مین، شێخ ئه‌حمه‌دی كوڕی مه‌لا مه‌حمودی‌ زه‌نگنه‌ مه‌قامی گه‌وره‌ی‌ ئاینی هه‌یه‌ له‌ته‌ریقه‌تی قادری‌ _ تاڵه‌بانی و دروستكه‌رو بنیاتنه‌ری‌ هۆزی گه‌وره‌ی‌ تاڵه‌بانییه‌ كه‌ له‌بنه‌چه‌دا زه‌نگنه‌ن، شێخ فه‌تاحی كوڕی شێخ ئه‌حمه‌د مه‌لا مه‌حمودی‌ زه‌نگنه‌ هاتۆته‌ «خییر به‌گ» 200 ساڵێ به‌ر له‌ئێستا ئه‌مه‌ ڕوی داوه‌، لێره‌ له‌ئه‌شكه‌وتی خه‌ڵوه‌ت، (40) شه‌وو ڕۆژ چۆته‌ ئه‌شكه‌وته‌كه‌وه‌ و به‌ده‌نكه‌ خورما نوێژو ڕۆژو خواپه‌رستی كردووه‌و خه‌ڵوه‌تی كێشاوه‌، پاشان ته‌كێی داناوه‌. شێخ فه‌تاح پێنج كوڕی هه‌بووه‌ شێخ ته‌های‌ كوڕی ناردووه‌ بۆ ئاوایی «كه‌وه‌ڵه‌» و شێخ سه‌مه‌دی كوڕی ناردووه‌ بۆ «ته‌په‌ لوو» و «عه‌لیاوا» و شێخ سه‌لامی كوڕی ناردووه‌ بۆ گه‌رمیان و كه‌لار و شێخ مارفی ناردووه‌ بۆ ئاوایی «به‌یانلوو»ی‌ بناری‌ شاخی مه‌تاره‌ له‌له‌یلان، شێخ لوتفوڵای‌ له‌هه‌ردوو ئاوایی خدر به‌گی خوارو خدربه‌گی سه‌رو و ئاوایی «قه‌یسه‌ری‌»جێگیركردووه‌، جا شێخ لوتفوڵا خاوه‌نی ڕه‌شماڵ یان ده‌واری‌ 18 هه‌ستون بووه‌، مه‌ڕو ماڵاتێكی زۆرو خاوه‌نی «وشتر»ێكی ڕه‌ش بووه‌، كه‌ به‌هار ده‌هات به‌خۆو ئێڵ و شوان و قه‌ومانه‌وه‌، وڵاخیان باردووه‌، حوشتره‌ ڕه‌شیش ڕه‌ش ده‌واره‌كه‌یان پێ باركردووه‌، ئه‌وجا ڕووه‌ و «حاویه‌ی‌ جاف» یان «حه‌و هیچه‌» یان «حه‌و هۆجه‌» كه‌ شوێنی له‌وه‌ڕگای‌ «جاف» و «زه‌نگنه‌»و « هه‌مه‌وه‌ند» و «تاڵه‌بانی»یه‌كان بووه‌، له‌وێ تاكو سه‌رپه‌ڵه‌ی پایز ماونه‌ته‌وه‌، «عه‌ره‌ب»یان به‌خزمه‌تكار و شوان ڕاگرتووه‌، دوایی ئه‌وانه‌ بونه‌ته‌ خاوه‌نی‌ (حه‌ویجه‌) به‌ پاڵپشتی داگیركه‌ری‌ عه‌ره‌بی غه‌ددارو شۆڤێنی، لوتفوڵا تاڵه‌بانی هه‌ر له‌وێ له‌حه‌ویجه‌ شه‌هیدیان كردووه‌, ئه‌میش شێخ محه‌مه‌د و شێخ حه‌سه‌ن و شێخ تۆفیق و شێخ حوسێن و شێخ ته‌های‌ بووه‌، ئه‌م ئاوایی خییر به‌گه‌ به‌ تاپۆ دراوه‌ به‌شێخ محه‌مه‌دی‌ كوڕی.

حه‌سه‌نس ئه‌نجومه‌ن و ژماره‌كانی‌ ئاوایی
حه‌سه‌ن غه‌فور عه‌لی به‌گوندستانی‌ گوت له‌ساڵی 1983 یه‌كێتیی نیشتمانی‌ی‌ كوردستان داهێنانێكی نوێی هێنایه‌ گونده‌كانه‌وه‌ كه‌ خۆیان كاروباری‌ خۆیان ڕابپه‌ڕێنن، ئه‌وه‌بوو خه‌ڵك ده‌نگیان به‌من و «حه‌یده‌ر تۆفیق»دا، گوتیشی : خدر به‌گی شێخ محه‌مه‌د كه‌رتی كشتوكاڵی ژماره‌ «17»یه‌و وه‌ره‌سه‌ی‌ سێ شێخه‌، «شێخ عه‌بدولقادر»و «شێخ شوكور»و «شێخ فاتیح»و چوار خوشكی ئه‌وانه‌. زیاتر له‌2500 دۆنم شیاوی چاندنه‌ و له‌وه‌ڕگا و شاخ و به‌رده‌ڵان زیاتر له‌4 هه‌زار دۆنم ده‌بێ، چوار چه‌ماوی گه‌وره‌ به‌سنوری‌ گونده‌كه‌دا تێ ده‌په‌ڕن، چه‌می خاڵۆ بازیانی، چه‌می شۆراو، چه‌می مه‌سور، چه‌می ته‌وه‌ت، له‌سه‌ر چه‌می خاڵۆ بازیانی هه‌ر له‌وێوه‌ هاته‌ ده‌م له‌یلان كورد مه‌ره‌زه‌ی‌ له‌سه‌ر ئه‌م چه‌مه‌ كردووه‌، برنجێكی زۆر به‌رهه‌م ده‌هێنرا، هه‌ر له‌سه‌ر ئه‌م چه‌مه‌ حه‌وت ئاسیاو «ئاش» هه‌بوه‌، ئێمه‌ش ئاسیاوێكمان هه‌بوه‌، له‌ساڵی 1978 قوتابخانه‌ لێره‌ كرایه‌وه‌،، پێشتر له‌ئاوایی خاڵۆبازیانی ده‌مانخوێند مامۆستاكه‌مان كریستیان بوو، له‌ساڵی 1948 شێخ محه‌مه‌دی شێخ لوتفوڵا له‌كه‌ركوك ڕادوێنێكی سه‌ندو هاوردیه‌ ئاوایی و پێمان سه‌یر بوو، كا حه‌سه‌ن ئاهێكی هه‌ڵكێشاو گوتی : ئێواره‌یه‌كی باراناوی ساڵی 1983 كۆپته‌ری‌ به‌عسی عه‌ره‌بی داگیركه‌ر هاته‌سه‌ر زه‌وی‌ «داسه‌ كوله‌»ی له‌وبه‌رچه‌مه‌، گوێمان له‌بۆردومان بوو، كه‌ چوین كوڕێك شه‌هید بوو بوو ناوی‌ «محه‌مه‌د ئه‌حمه‌د فه‌تاح» بوو خه‌ڵكی زه‌ڕایه‌نی شاره‌زوور بوو هاتبون مه‌ڕوماڵات بفرۆشن تائێستا «گۆڕ»ه‌كه‌ی‌ لێره‌یه‌.
مانگی نیسانی 1987 به‌عسی هیتله‌ری‌، نزیكه‌ی‌ 20 ماڵێك ده‌بوین ڕایانگواستین، ئاواییه‌كه‌ بوو به‌ (زه‌وی قه‌ده‌غه‌كراو _ أرچ المحرمه‌)و سه‌گه‌كانی‌ ته‌عریبیان تێ به‌ردا، پا په‌تییه‌كانی‌ جنوب، جه‌رده‌، زه‌وی یه‌كانیان ده‌كێڵا و مه‌ڕوماڵاتیان لێره‌ ده‌له‌وه‌ڕاند. له‌ 17/6/2000 نه‌وزادی برام و تالیب عادل به‌كاری‌ ڕێكخستن هاتن بۆ ئێره‌ عه‌ره‌بی ته‌عریب جاسوسیان له‌سه‌ركردن و ئیستیخباراتی به‌عسی عه‌ره‌بی هه‌ردوكیانی شه‌هید كرد، هه‌ر ئه‌مه‌ش نا، نه‌سرینی هاوسه‌رم و 6 منداڵم و خوشكێكم له‌بان قه‌ره‌تامور ئه‌نفالكران.
زه‌نگنه‌ش لێره‌ له‌خدر به‌گ ده‌ژین
كه‌ریم محه‌مه‌د ساڵح له‌هۆزی‌ گه‌وره‌و به‌ناوبانگی زه‌نگنه‌یه‌ له‌تیره‌ی‌ «خه‌نجه‌ر باز»ه‌ ئه‌و به‌گوندستانی‌ وت : گوندێك هه‌یه‌ له‌سه‌ر چه‌می‌ «باسه‌ڕه‌» پێ ی ده‌ڵێن «قای‌ ته‌وه‌ن» با به‌م «عه‌وڵا به‌بلان» كه‌ خێزانی‌ ده‌مرێ ئیدی چاوی به‌رایی نادات له‌وێ بمێنێته‌وه‌ ، ده‌چێته‌ «وه‌سمان له‌كه‌» و دواتر لێره‌ له‌ خدربه‌گ نیشته‌جێ ده‌بێ. چه‌ند خێزانێكی له‌پاش به‌جێ ماوه‌، یه‌كێك له‌وانه‌ حه‌مه‌ ساڵحی باوكم كه‌ به‌داخه‌وه‌ له‌ 12/3/1991 به‌ده‌ستی سوپای‌ به‌زیوی عه‌ره‌بی به‌عسی شه‌هید كرا.
شایی سه‌ڵباتوو و ئه‌نفالی قه‌ره‌تاموور
تات نه‌سرین خه‌ڵكی ئاوایی «تاڵه‌بانی» بناری‌ شاخی سه‌ڵباتووه‌ له‌نزیك ئاوایی «قرخ» به‌نه‌ریتی ژن به‌ژن 45 ساڵ به‌رله‌ئێستا هاتۆته‌ خییر به‌گ، ئه‌و به‌گوندستانی‌ گوت: كه‌ هاتم «گوڵ قه‌ی سه‌ر»و گواره‌و ملوانك و پڕپۆڵ، ماڵه‌ باوانی‌ خۆم بۆیان سه‌ندم» هاتمه‌سه‌ر ماڵو خوزوور، زیاتر له‌ (20) ساڵ به‌یه‌كه‌وه‌ هه‌ڵمان كرد، خه‌سوم منی زۆر خۆش ده‌ویست، ده‌چوینه‌ دروێنه‌و مه‌ڵۆ نانه‌وه‌ شه‌غره‌كێشان و گێره‌كردن له‌و زه‌ویانه‌ی‌ سه‌رێ‌، سبیان و هێواران بێریمان ده‌كردو مه‌ڕمان ده‌ژه‌ند، مه‌ڕوماڵاتێكی زۆرمان هه‌بوو، گاوگوڵ، په‌له‌وه‌رمان زۆرزۆر بوو، مریشكی كوردی، به‌یانیان هێلكه‌ی‌ كوردی و ڕۆنی كوردیمان به‌نانی‌ كوردیه‌وه‌ ده‌خوارد، هه‌موو شتێك خۆمان به‌رهه‌ممان ده‌هێنا، دانه‌وێڵه‌، گه‌نم له‌ئاسیاوی خۆمان باراش ده‌كرد، مه‌ره‌زه‌ لێره‌ كڕه‌مان ده‌كرد، له‌خوری مه‌ڕو موی بزن ڕاخه‌رو فه‌ره‌نجی و لبادمان دروست ده‌كرد، میوه‌ی‌ خۆش ، خڕه‌ بۆیسان مان بوو، ده‌ستاڕو مه‌شكه‌و هیزه‌ و مێكه‌ت و جۆنی و «ته‌ون و ده‌زگا»و ته‌نورو ژیانم زۆر خۆش بوو به‌ڵام ئه‌مانه‌ هیچان له‌چاوتروكانێكدا نه‌مان، له‌شكری‌ عه‌ره‌بی دڕنده‌ ئه‌نفالیان كردین، تاڵانیان كردین، ڕۆڵه‌ شیرینه‌كانمان بزركران، ئه‌وه‌ ئه‌ها ئه‌و كوڕمه‌ «ئاماژه‌ی‌ به‌ئومێدی كوڕی كرد» كه‌ ته‌مه‌نی 8 ساڵان بووه‌ له‌ته‌ك 5 براو خوشكی ئه‌نفالكران.

(مامه‌ سوله‌) له‌ چه‌كداریه‌وه‌ بۆ شۆڕشی نوێ:
سولاح فاتح شێخ محه‌مه‌د ناسراو به‌ (مامه‌ سوله‌) به‌گوندستانی‌ وت: ئه‌و ده‌مه‌ی‌ شۆڕشی نوێ هه‌ڵگیرسا حكومه‌تی عاره‌ب «شه‌وكوت»ی ئه‌نارده‌ ئاواییه‌كان، ئه‌مانه‌ خوێڕی و دزو جه‌رده‌بوون بۆ له‌كه‌داركردنی‌ ناوی‌ پێشمه‌رگه‌، ئێمه‌ش له‌ترسا چه‌كمان هه‌ڵگرت و بوین وه‌ جێش شه‌عوی «مامه‌ ڕیشه‌» دای‌ وه‌ بانمانا، من و (حه‌سیب _ ئێستا ئه‌نفال كراوه‌)گیریاین و چه‌ن شه‌وێ له‌گه‌ڵ پێشمه‌رگه‌ ماینه‌وه‌، كه‌ ئازادیان كردین هاتمه‌وه‌، به‌كۆمه‌ڵ چوین بۆ (منه‌زه‌مه‌)ی‌ له‌یلان و چه‌كه‌كانمان دایه‌وه‌، زۆرێكمان ده‌شتگیر كراین، ورده‌ ورده‌ چوینه‌ ناو ڕێكخستنه‌كانی‌ (ی. ن. ك)، عومه‌ر محه‌مه‌د ڕه‌شی یه‌كه‌م كه‌س بوو بوو به‌ پێشمه‌رگه‌، هێزێكی پشتگیریمان له‌ 15 كه‌س پێك هێنا سه‌ربه‌ (قادر مه‌ملی) بوو له‌هه‌مو شه‌ڕه‌كانی‌ ناوچه‌كه‌ به‌شدار بووین خاوه‌نی 11 شه‌هید و 13 ئه‌نفالكراوین. له‌شه‌ڕه‌كانی‌ دژ به‌چه‌ته‌ خوێڕیه‌كانی‌ داعش له‌هه‌وه‌ڵه‌وه‌ به‌شداریمان كردو شه‌هیدێكیشمان دا كه‌ ناوی‌ (سه‌روه‌ر محه‌مه‌د ڕه‌شید)بو، ئێستاش زیاتر له‌ 100 پێشمه‌رگه‌مان هه‌یه‌ بۆ ڕزگاری‌ كوردستان له‌سه‌ر ڕێبازه‌كه‌ی‌ مامی‌ گه‌وره‌ی‌ كورد به‌رده‌وامین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

زیندان و پێشمه‌رگایه‌تی له‌ كتێبی رستێك میروو دا

رانانی‌: خالد كاوێس قادر (جه‌نگاوه‌ره‌كان بۆگوڵ ده‌جه‌نگن، بێئه‌وه‌ی‌ فریای‌ بۆنكردنی‌ ...