سەرەکی » وتار » ئیدریس جەبار » كۆبوونەوەكەی وارشۆ

كۆبوونەوەكەی وارشۆ

رووبەڕووبوونەوەی ئێران و بەرگرتن لە خواستی فراوانكردنی هەژموونی وڵاتەكە لە خۆرهەڵاتی ناوەڕاست و دروستكردنی هاوپەیمانییەكی هاوشێوەی هاوپەیمانی باكووری ئەتڵەسی (ناتۆ) بۆ بەگژداچوونەوەی پەلهاویشتنی ئێران لە ناوچەكەدا، دۆسێی سەرەكی كۆبوونەوەكەی وارشۆی پایتەختی پۆڵەندایە.
ئەم كۆبوونەوەیە كە چەندان وڵات بەشداریی تێدا دەكەن، لەسەر داوای ویلایەتە یەكگرتووەكانە و تێیدا جگە لە تاوتوێكردنی «هەڕەشە و مەترسییەكانی ئێران بۆسەر ناوچەكە»، وەك بەرپرسانی ئیدارەی ئەمریكا باسیان كردووە، خستنەڕووی پلانی ئەمریكایی بۆ ئاشتی لە خۆرهەڵاتی ناوەڕاست كە ناوی «گرێبەستی سەدە»ی لێنراوە، لەخۆدەگرێت.
ئەمریكاییەكان، وەك نەریتی سیاسەتی پێشینەی خۆیان، بۆ گورز وەشاندن لەو وڵات و نەزمانەی گەرەكیانە،سەرەتا گەلەكۆمەكێی نێودەوڵەتی دروست دەكەن و لەوێوە هەنگاوەكانیان بەرەو ئەو ئامانجە هەڵدەنێن كە پێشتر نەخشەیان بۆ داڕشتووە.
یەكەم هەنگاویش وەك پێشبینی دەكرێت، وەدەرنانی هێزە سەربازییەكانی ئێرانە لە سوریا و پچڕاندنی ئەو پردەیە كە لێوەی ئێرانییەكان دەیانویست بگەنە سەر رۆخی دەریای ناوەڕاست و لە هەمان كاتدا لە باشووری خۆرئاوای سوریا و لەڕێگەی حزبوڵڵای لوبنانییەوە، هەڕەشە بۆ دەوڵەتی عیبری دروست بكەن.
هەنگاوەكانی ئەمریكا بۆ بەرگرتن لە درێژبوونەوەی هەژموونی ئێرانی لە وارشۆوە دەستپێناكات، رەنگە وارشۆ ئەڵقەیەكی قایمی ئەو زنجیرە رێوشوێنانە بێت كە واشنتۆن لە دژی تاران دەیانگرێتەبەر، ئامانجەكەش پێناچێت روخاندنی سیستمی حوكمڕانی بێت لە ئێران، هێندەی ئەوەی بۆ جڵەوكردن و خەساندن و لەقاڵبدانی زیادڕۆیییەكانە.
ئێرانییەكان بە باشی لەم جموجۆڵ و چالاكیانە تێدەگەن، هەر ئەمەش وایكردووە زۆر سەغڵەت نەبن و لەبەرانبەردا ئاماژە بە توانا سەربازییەكان و پەرەپێدانی جبەخانە موشەكییەكانیان بكەن، چونكە ئەمان بە تەنیا خۆیان لە چوارچێوەی سنورەكانی وڵاتەكەدا قایم نەكردووە، بەڵكو لە عیراق و سوریا و لوبنان و و یەمەن و چەند جێگەیەكی تریشدا بونیان هەیە و دەتوانن لە بری پەلەقاژێ‌، دەستیش بوەشێنن و زیانی گەورە بە پەلاماردەرەكانیان بگەیەنن، لێرەوە دەكرێت بڵێین، وارشۆ تەنیا دەبێتە خاڵێك بۆ زیاتر قامكردنی گەمارۆكان و توندكردنی سزاكان لەسەر ئێران كە ئەمەش بۆ قۆناغەكانی داهاتوو رەنگە كاریگەریی گەورەتر لەسەر ئابوری ئێرانی دروستبكات و لە قۆناغی یەكەم و دووەمی سزاكانی ئەمریكا قورستر و هەژێنەرتربێت بۆ وڵاتەكە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەمریكییەكان و پرسی عەرەبی

ئەمریكاییەكان دەیانەوێت سیمای خۆرهەڵاتی ناوەڕاست بەو شێوەیە بێت كە خۆیان ...