ئه‌م كونجه‌ش

لەقەبی كوردی

چەند جاریتر نووسیومە نازانم لەسەر ئەم بابەتەم نووسیوە یا نا؟ – چونكە كونجەكان (لە خوا بە زیاد بێ) زۆر بوون. بەڵام هەر دەڵێم با بینووسمەوە. بەڵام دیارە نووسینی ئەمجارە هەر لەگەڵ ئەویتردا جیاوازیی دەبێ – خۆ ئەویترم لەبەر دەستا نی یە – تا بزانم جیاوازیان چی یە؟. بەڵام دڵنیام كە جیاوازی یەكیان هەیە و كەسانی تازەش هەن كە ئەویان نەخوێندۆتەوە.
دەی – زمانی زگماك.
ئەوە چەند شەوە گوێ لە كەناڵە (زۆر بێ و بۆر بێ)یانەكانی تەلەفزیۆنمان دەگرم – داویانینە بەر باسی (زمانی دایك). من لە كونجێكی لەمەوپێشدا نووسیبووم كورد بەرامبەر بەم (زمانی دایك- لغة الام) ی عەرەبدا، یا (Mother language) ی ئینگلیزدا ووشەیەكی زۆر جوانی هەیە – كە (زمانی زگماك) ی پێ دەڵێ: ئەو زمانەی لە سكی دایكەوە بە گریانی منداڵی لەدایك بۆوە لەگەڵیدا هاتۆتە دەرەوە – ئای كە ووشەیەكی جوانە و كوردیی ڕەسەنە – دە ئەم (زۆر بێ و بۆر بێ) یانە ئەگەر باوەڕیان پێی نی یە با وەڵامم بدەنەوە و لەو كەناڵە – یا كەناڵانەش كە بۆ جنێودان تەرخانكراون – یەك، دوو جنێویشم پێ بدەن. ئەوا من هەر ئەڵێم (زمانی زگماك)
لەقەبی توركی:
لەو تاوانبارانەی كە كوردیان بە كۆمەڵ كوشتووە. مەگەر هەر مستەفا كەمال پێش (سەدام حسێن) ی تاوانبار كەوتبێ. تاوانەكانی مستەفا كەمال زۆرن – بە چەند كتێب باسیان نابڕێتەوە. بەڵام لەوانەیدا كە باس دەكرێت، ئەوەیە – كە خۆی (یۆنانی) بووە- نە ناوی مستەفایە و نە كەمالە – بەڵام كە لە توركیا هێنرایە سەر حوكم دەیویست هیچ شوێنەواری دەوڵەتی عوسمانیی بە ناو خەلیفەی ئیسلام نەهێڵێ. خۆی ناو نا مستەفا كەمال و فاشستی توركیا كردیان بە (ئەتاتورك) – گوایە باوكی تورك.
بۆ ئەمەش كونجێكیترم دەبێ و باسێكی شاعیری مەزنی كۆمۆنیستی تورك – نازم حیكمەتم لایە- كە زۆر ڕقی لەم لەقەبی (ئەتاتورك) ە بوو. بەڵام سەیر ئەوەیە كە (ئۆردوگان) ی بە ناو موسوڵمان و (ئیسلامی) ئێستاش لە ژێر وێنەی (مستەفا كەمال) دا پێشوازی لە ڕۆژنامەنووسان دەكات.
مەبەسم لەم (كونجە) یان ئەوە بوو كە باسی لەقەبی توركی بكەم. مستەفا كەمال كە خۆی كرد بە باوكی تورك بڕیارێكی دەركرد – كە دەبێ لەقەبی هەموو هاووڵاتی یەكی توركیا – توركی بێت – یا بە ناوێكی توركی یەوە بێ.
ئەوە نی یە تا ئێستا هەر توركی یە (ئۆردوگان) و (یڵدرم) و (فڵان ئۆغلۆ)… هتد.
بە داخەوە تا ئێستا تێكۆشەرە گەورەكانی ئێمەش كە مەردانە لە توركیا كار بۆ مەسەلەی كورد و ئازادیی كورد دەكەن لەقەبیان هەر توركی یە. نامەوێ ناوەكانیان بە نموونە بهێنمەوە كە زۆرن. چونكە ئەشزانم كە ئەوە تاوانی خۆیان نی یە – بەڵكو كە لەدایك بوون – ناویان لە (نفووس) دا تۆمار نەدەكرا ئەگەر لەقەبێكی توركیان نەبووایە. یا هەر پێش خۆیان – باوك یا باپیریان ئەو لەقەبەی هەبووە. زۆر كەس تانووت لە ئێمەمانان دەدا كە ناوەكانمان عەرەبی – یا – ئیسلامین. بەڵام ئەوەیان كاری هەموو گەلانی موسوڵمانە لە سەرەتای ئیسلامەوە تا ئێستا و لە باوەڕەوە هاتووە و بە زۆر بە باو و باپیرمان نەكراوە – تازە ڕۆیشتیش. بەڵام ئێستا قسەمان لەسەر توركیایە – كە دەبێ تێكۆشەرە كوردەكانی ئەوێ ئەمە چار بكەن و وەك بەشێك لە خەباتی (بیر) بەرامبەر بە كەمالیزم. ئەمە بە (ئۆردوگان) ئەفەندی بگۆڕن. هەر بۆ ئەم باسە و نموونەی (سووریا) ش (كونجیترم دەبێ).

هەر پایەدار بێ زمانی كوردی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شه‌هید دارا تۆفیق

كه‌سێكی زۆر نزیكی خۆم پێی ووتم: سه‌یری ئه‌م هه‌موو كه‌ناڵانه‌ی ...