سەرەکی » وتار » ته‌ها سلێمان‌ » گه‌ڕانه‌وه‌ بۆ ئاوایی

له‌ نێوان ئێره‌ و ئه‌وێ دا

گه‌ڕانه‌وه‌ بۆ ئاوایی

80
والی پێشمه‌رگه‌یه‌كی جه‌ربه‌زه‌و قاره‌مان بوی، ئه‌و كاتێ له‌ماڵ ده‌رئه‌چێ و ئه‌یه‌وێ بوێته‌ پێشمه‌رگه‌، تویشی ئه‌وێته‌ تویشی پیاو خراوێكه‌وه‌ كه‌ناوی حه‌مید گادز بوی، ئه‌م حه‌میده‌ گادزه‌ حه‌یشی له‌ خه‌ڵك ئاواییه‌كان تاڵ كردوی، ئه‌چویه‌ سه‌رخه‌ڵك و سه‌رانه‌ی وه‌رئه‌گرت، مانگای ئه‌دزی، مه‌ڕو بزنی ئه‌دزی، پاره‌ی وه‌زۆر له‌خه‌ڵك ئه‌سه‌ند. كاتێكیش والی تویشی ئه‌وێته‌ تویش ئه‌م پیاوه‌وه‌و پرسیاری خالد گه‌رمیانی لێئه‌كات وهاتوه‌و گه‌ره‌كیه‌تی بوێته‌ پێشمه‌رگه‌، ئه‌میش هه‌ست ئه‌كا ئه‌مه‌ كوڕێكی جه‌ربه‌زه‌یه‌و گورج و گۆڵ دیاره‌، وا خۆی ئه‌ناسێنێ كه‌ ئه‌م خالد گه‌رمیانیه‌و ئیتر والی ئه‌كه‌فێته‌ ته‌كی، به‌ڵام زۆری پێناچێ و خالد گه‌رمیانی له‌ ئاوایی بانزیخاڵ، حه‌مید گادز ئه‌گرێ و والی چیرۆكه‌كه‌ی خۆی بۆ باس ئه‌كات وهه‌ر له‌و شوێنه‌دا والی ئه‌وێته‌ پێشمه‌رگه‌ی راسته‌قینه‌.
به‌ماوه‌یه‌كی كه‌م والی ناوبانگێكی زۆری ده‌ركرد، من خۆم مناڵ بوویم كه‌ لێل خالد گه‌رمیانی ئه‌هاتنه‌ ئاواییه‌كه‌مان، ئه‌مدی و سامێكی زۆر سه‌یری بووی، باڵا به‌رز، ریش درێژو مووی ده‌م و چاو پڕ، كه‌م قسه‌و گورج وگۆڵ، كه‌ رێی ئه‌كرد هه‌ستت ئه‌كرد عه‌رز له‌ژێر پایدا ئه‌له‌رێته‌وه‌و پێت خۆش بوایه‌ یان نا ئه‌بێ رێگات بۆی چۆڵ بكردایه‌. دیاربیوو خالد گه‌رمیانیش زۆر سیقه‌ی پێ بووی.
بیرمه‌ یه‌كێك له‌به‌ناو بانگترین چالاكیه‌كانی والی ئه‌وه‌ بووی كه‌ به‌ڕۆژی نیوه‌ڕۆ نازانم له‌ناو شار یان له‌سه‌ر رێگای نێوان (كفری –خورماتوی) بوی، كوڕه‌كه‌ی قایمقامی كفری گرت و هێنای له‌گه‌ڵ خۆیان جه‌وله‌یان پێ ئه‌كردو ئاوایی به‌ئاوایی ئه‌یانگه‌ڕان. ئه‌نجا بێ كوڕی قایمقام به‌و له‌ناو نازو نیعمه‌تا گه‌وره‌ بویت و پێشمه‌رگه‌ بتگرێ و ئاوایی وه‌ ئاوایی بتگه‌ڕێنێ و یه‌كێ بێژێ ئه‌یكوژن و یه‌كێ بێژێ ئه‌یده‌نه‌ ده‌م ئاوه‌سپیاو یه‌كێ بێژێ هه‌قه‌ تا باوكی خۆی ته‌سلیم نه‌كا به‌ری نه‌ده‌ن و یه‌كێكی تر بێژێ كه‌رامباوگایی با بزانن قه‌دری عافێت له‌كوێیه‌؟ جا كوڕم ئه‌وێ ته‌حه‌مول بكات و زاڵی نه‌ته‌قێ؟
گرتنی كوڕه‌كه‌ی قایمقام له‌لایه‌ن والیه‌وه‌ رووداوێكی سه‌یرم بیر ئه‌خاتۆ، ئه‌ویش ئه‌وه‌یه‌ كه‌ ئێژن مه‌فره‌زه‌یه‌ك پێشمه‌رگه‌ له‌و سه‌روبه‌نده‌ی پێشمه‌رگایه‌تی والی و هاوه‌ڵه‌كانیدا ئه‌چنه‌ سه‌ر رێگای (كه‌ركویك-خورماتوی) بۆ چالاكی و ده‌ستكه‌وت، زۆر چاوه‌ڕێ ئه‌كه‌ن هیچیان ده‌ست ناكه‌وێ و به‌له‌وه‌ی كه‌مینه‌كه‌یان هه‌ڵوه‌شێننه‌وه‌، سه‌یاره‌یه‌ك تێ و ده‌ستی لێڕائه‌گرن و ئه‌وێسێ و سه‌یر ئه‌كه‌ن دوو توركمانی تیایه‌و تێیان ئه‌خوڕن:
-دابه‌زن زوو دابه‌زن
-ئه‌وانیش دائه‌به‌زن و ئه‌یانده‌ن له‌به‌رو ئه‌یانوه‌ن، له‌ رێگا ئه‌زانن ئه‌مانه‌ هیچ نین و فه‌قیرن، مه‌سولی مه‌فره‌زه‌كه‌ بۆ سوعبه‌ت ئێژێ چیان لێبكه‌ین؟
-پێشمه‌رگه‌یه‌ك: با یه‌ك گوله‌ ئاربیجیان پێوه‌نه‌ین..
-پێشمه‌رگه‌یه‌كی تر: ناوه‌ڵا سی فیشه‌ك..
-پێشمه‌رگه‌یه‌كی تر: ناوه‌ڵا یه‌ك موختار كوژ..
-پێشمه‌رگه‌یه‌كی تر: ئه‌یانخه‌ینه‌ ناو ئاوه‌سپی تا ئه‌خنكێن..
-یه‌كێك له‌ پێشمه‌رگه‌كان كه‌ زۆر قۆشمه‌چی ئه‌وێ، ئێژێ: ناوه‌ڵا من له‌گه‌ڵ هیچ كام له‌وانه‌ نیم و ئێژم با بیان وه‌ینه‌ ئه‌و دۆڵه‌و سه‌روده‌ست بیانگێین و به‌ره‌ڵایان بكه‌ین..
یه‌كێك له‌ دوو توركمانه‌كه‌ش خۆی پێ راناگیرێ و ئێژێ: وه‌ڵا كاكه‌ ئیشته‌ قسه‌كه‌ی كاكه‌م خۆی شه‌كه‌ره‌، ئیتر بۆ ئه‌یمان كوژن، خۆتان بمانبه‌ن له‌ دۆڵ و ئیش خۆتان بیكه‌ن و به‌ره‌ڵامان بیكه‌ن..
به‌ڵام نا، گرتنی كوڕه‌كه‌ی قایمقام له‌و سه‌رده‌مه‌ كه‌ پێشمه‌رگه‌ی شۆڕشی نوێ تازه‌ په‌یدا بووین وده‌هاتن وله‌ ترسی ئاشكرانه‌بوین، له‌ چاو تروكانێكا دیارنه‌ده‌مان، ئه‌وه‌نه‌ گه‌وره‌ بووی وه‌ك ئه‌وه‌وی به‌غات گرتوێ. كێش بیگرێ والی كه‌ هه‌ر ناوئه‌هات پیاوه‌كانی به‌عس خه‌ریك بووی زراویان ئه‌چوی، جا نه‌خوازه‌ڵا له‌ ئیسا به‌دوا، ئه‌وه‌ كوڕی قایمقامیشی گرت و ئیتر ئه‌وانه‌ی تر خه‌و ناچێته‌ چاویان و زینده‌قیان ئه‌چێ..
ئه‌گه‌ر باش بیرم ماوێ كوڕه‌كه‌ی قایمقامیان له‌ گه‌ڵ زیندانیه‌كی گه‌وره‌ دیل به‌دیل پێ كرد، كه‌ جێی داخه‌ نازانم ناوه‌كه‌ی چیه‌و وه‌ك ئه‌وكاته‌ هه‌واڵه‌كه‌ش بڵاوبویه‌وه‌ دوای ئه‌و رووداوه‌ قایمقامه‌كه‌ی كفریان نه‌قڵ كردو له‌ كفری نه‌یانهێڵا، به‌ڵام ده‌رسه‌كه‌ی والی بۆ پیاوه‌كانی به‌عس ده‌رسێك بوی ئه‌وساو ئیساش هه‌ر باس ئه‌كرێ وحه‌یفێ ئه‌گه‌ر هی میله‌تێكی تر بویایه‌ ئه‌كریا وه‌ گه‌وره‌ترین فیلمی سینه‌مایی..

81
له‌ ئاواییه‌كانی پیره‌مه‌وه‌نی و قه‌واڵی و قه‌ڵاچه‌رمه‌ڵه‌و عه‌زیز قادرو تویكن و بنه‌ی خه‌په‌كوێرو گه‌رمك، بڕێك كه‌س بوین زۆر تایبه‌توین، له‌ كورده‌واری ئێژن شێت؟ من ئێژم ئه‌وانه‌ی وا له‌ خه‌ڵكه‌كه‌ی تر بیریان تیژتربووی، وردتر بیریان ئه‌كردۆ، له‌ گوزگییه‌كانی به‌رده‌میانا شته‌كانیان جوان ئه‌وینی ودڵ وده‌روون و قسه‌یان وه‌ك یه‌ك بووی.
من باسی هه‌نێكیان ئه‌كه‌م وه‌ك (حه‌سه‌حویل له‌ گه‌رمك، نامیق له‌ پیره‌مه‌وه‌نی، كاكه‌ خوله‌ له‌ قه‌ڵاچه‌رمه‌ڵه‌، حه‌مه‌جان له‌ بنه‌ی خه‌په‌كوێر، ئه‌حه‌ رویش له‌ تویكن). ئه‌یانوت حه‌سه‌ن حویل ته‌واو نیه‌، سا وه‌بیلاهی ئه‌و له‌ خه‌ڵكه‌كه‌ عاقڵتر بووی، ئه‌یانوت حه‌مه‌جان شێته‌ ده‌ی وه‌ڵاهی ئه‌و له‌گشت خه‌ڵكه‌كه‌ باشتر بیری ئه‌كردۆ، ئه‌یانوت نامیق په‌ته‌ڕییه‌ به‌ ناموس ئه‌و گشت كاتێ قسه‌كانی راست ده‌رئه‌چوی، ئه‌یانوت كاكه‌ خوله‌ ئه‌وانێل ده‌ستیان لێوه‌شانوه‌ ده‌ی به‌ هه‌زار پێغه‌مه‌ر كاكه‌ خوله‌ قه‌ت درۆی نه‌ئه‌كرد، ئه‌یانوت ئه‌حه‌ رویش فڕی وه‌ جمورییه‌وه‌ نیه‌ سا به‌ مه‌رقه‌دی وه‌كاشه‌ ئه‌و له‌ گشتیان راستگۆتروی. ئێمه‌ش وه‌ شوێن ده‌م گه‌وره‌كانا ئه‌مانه‌مان له‌ هه‌ر شوێنێكه‌وه‌ بدیایه‌ هۆیهاو فیكه‌مان لێیان ئه‌كردو ئیتر شێتیه‌كه‌ی ئه‌وان ئه‌وه‌ بووی، كاتێ ئێمه‌ به‌شوێن ده‌می گه‌وره‌كانا كه‌ ئه‌یانوت ئه‌مانه‌ شێتن و ته‌واو نین و ئێمه‌ش هۆیهاو فیكه‌مان لێیان ئه‌كرد، ئه‌وانیش قه‌سیایان ئه‌كرد بمانگرن و تیكه‌ تیكه‌مان بكه‌ن. ده‌ی باشه‌ به‌شه‌ری ساغ و سه‌لیمیش هۆیهاو فیكه‌ی لێبكه‌ی شێت ناوێ؟
جا خۆشییه‌كه‌ی له‌وه‌دا بووی، ئه‌مانه‌ی وا ناومان هاوردن هه‌ریه‌كه‌یان وه‌ شتێك ئیمانیان هه‌رده‌ ئه‌ویی، بۆنمونه‌ ئه‌گه‌ر له‌ هه‌ر شوێنێكه‌وه‌ بانگی ئه‌حه‌ رویشت بكردایه‌و بتوتایه‌: ته‌ماته‌.. ئه‌و یه‌كسه‌ر ئه‌یوت: دایكه‌كه‌ی كه‌ریم كۆمۆنیست بگێم، یان بانگی كاكه‌ خوله‌ت بكردایه‌و بتوتایه‌: مه‌ڕێك تۆپیه‌ ئه‌و قه‌سیایی ئه‌كرد خنجێره‌كه‌ی ده‌ربكاو بیكا وه‌زكتا، یان بتوتایه‌ نامیق رانی قه‌ڵاچه‌رمه‌ڵه‌ چویه‌ته‌ ناو حدویده‌كه‌تان ئه‌و یه‌كسه‌ر ئه‌یوت دایكه‌كه‌ی وه‌رمزیار بگێم، ئه‌گه‌ریش بتوتایه‌ مام حمه‌جان دنیا بۆ كوێ ئه‌ڕوا؟ ئه‌یوت به‌خوا بیعه‌قڵی كوڕم، ئه‌گه‌ریش بتوتایه‌ سه‌ی حه‌سه‌نه‌ حویل رانه‌كه‌ت تێری نه‌خواردوه‌ ئه‌یوت خۆ ده‌ست نه‌دریاوه‌ له‌ قوینت بچیته‌ لایان.
رۆژێك من و فه‌رحان غه‌درێكی گه‌وره‌مان له‌ سه‌ی حه‌سه‌نه‌ حویل كرد، ئه‌وكاته‌ ئه‌و شوانمان بووی، ئێمه‌ش مناڵ بویمان، بیرمه‌ دایكم نیسكی بۆ كردوی، ئه‌ویش رانه‌كه‌ی هاوردیۆو له‌چه‌م بیره‌كانوی، زۆری نه‌ماوی بیتۆ بۆ ماڵ ونان بخوا، ئێمه‌ش فرسه‌تمان هاوردو نازانم سه‌به‌به‌كه‌ی چی بوی، ئه‌و قاپه‌ی دایكم نانی بۆی بڵاوی و نیسكی كردویه‌ سه‌ریا، پڕبانمان كرد له‌ ئاو، ئه‌ویش كه‌ هاتۆ نه‌زیره‌ قاپه‌ نیسكه‌كه‌ی بۆ بردو كه‌سه‌یری كرد، بانگی كرده‌ دایكم و وتی: مه‌یره‌م مه‌یره‌م ئه‌مه‌ ئاوه‌ یان نیسكه‌؟ دایكم كه‌ ئه‌مه‌ی زانی ده‌نگی نه‌كرد تا سه‌ی حه‌سه‌ن رانه‌كه‌ی دووباره‌ ده‌ركردو رۆیی، دوای ئه‌وه‌ گزییه‌كی هه‌ڵگرت وبكوته‌، ئه‌وه‌نه‌ی لێماندا هه‌تا شه‌ل وكول بوی. ئێواره‌ش باوكم له‌ دره‌و هاتۆ پێی وت وئه‌ویش تاوێكی تر بكوته‌ وه‌ شه‌پڵاخی گه‌وره‌ گه‌وره‌ وه‌ بنا گوێمان..
بیرم كه‌فتۆ ئێژن جارێكیان حه‌مه‌ دۆینه‌ی كفری، له‌به‌ر ئه‌وه‌ی كه‌فتنه‌ته‌ دویایی و پێیان وتوه‌: دۆینه‌ دۆینه‌ دۆینه‌ دۆینه‌، ئه‌میش هه‌ڵگه‌ڕیاوه‌تۆو دایه‌ وه‌سه‌ر زه‌لامێكاو سه‌ری شكانوه‌و زه‌لامه‌كه‌ش چویه‌ له‌ مه‌حكه‌مه‌ شكاتی له‌ حه‌مه‌ دۆینه‌ كردوه‌و حاكمیش حه‌مه‌ دۆینه‌ی بانگردوه‌و حه‌مه‌ دۆینه‌ش چویه‌ته‌ به‌رده‌می و وتیه‌تی:
-جه‌نابی حاكم سه‌لام و عه‌لێكوم..
-عه‌لیكه‌ سه‌لام..
-جه‌نابی حاكم سه‌لام و علێكوم..
-عه‌لێكه‌ سه‌لام..
-جه‌نابی حاكم سه‌لام و عه‌لێكوم..
-نه‌عه‌لێك و نه‌سه‌لام.. شڕوشێت، بیبه‌نه‌ ده‌ره‌وه‌و له‌به‌رچاوم لایبه‌ن..
-حه‌مه‌ دۆینه‌ش بێ ئه‌وه‌ی خۆی تێك بدا، ئێژێته‌ حاكم: جه‌نابی حاكم تۆ بۆ سێ جار سه‌لام و عه‌لێك تویڕه‌ ئه‌ویت و من له‌یره‌ ئه‌كه‌یته‌ ده‌شتۆ، باشه‌ وه‌ی رۆژگاره‌ خه‌ڵك كفری ئه‌كه‌فنه‌ دویای من و ئێژن:(حه‌مه‌ دۆینه‌ حه‌مه‌ دۆینه‌ حه‌مه‌ دۆینه‌ حه‌مه‌ دۆینه‌ حه‌مه‌ دۆینه‌). ئیتر چوێن شێت ناوم و ناده‌مه‌ سه‌ر خه‌ڵكاو سه‌ری بشكێنم و هه‌ر باشه‌ نه‌مكوشتوه‌؟ ئینجا حاكمه‌كه‌ تۆزێك ئه‌وێسێ و ئێژێ: ئه‌شهه‌دو خه‌ڵك كفری شێتن نه‌ك تۆ..

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

گه‌ڕانه‌وه‌ بۆ ئاوایی

76 له‌ شه‌وی زمسانا زه‌لامه‌كان دوو دوو یان سێ سێ ...