سەرەکی » دۆسێ » راوێژكارێكی ئەسەد باسی سەرچاوەی تیرۆر دەكات

وڵاتێكی ناوچەكە تۆمەتبار دەكات

راوێژكارێكی ئەسەد باسی سەرچاوەی تیرۆر دەكات

بوسەینە شەعبان، ڕاوێژكاری سیاسی و میدیایی سەرۆكایەتی كۆماری سوریا، پێیوایە ئەو تیرۆرەی لە سوریادا سەریهەڵدا و زیانی بە یەمەن و عیراق و لیبیا گەیاند، سەرچاوەكەی ئیسرائیلە كە بە گوتەی ئەو «دروستیان دەكات و كۆمەكیان دەكات».
ئاژانسی ڕەسمی سوریا (سانا) لە زاری بوسەینە شەعبان لە كۆنفرانسێكی ڕۆژنامەوانی كە لە 9ی ئاداری 2019 لە دوای كۆبوونەوەی ساڵانەی ئەنجومەنی ئەمینداران لە ئوتێلی داما رۆز سازكرا، بڵاویكردۆتەوە»ئەوەی بەسەر گەلانی ناوچەكەدا هات لەماوەی چەند ساڵی ڕابردوو، مەبەست لێی كۆتایی هێنانە بە ململانێ‌ لەگەڵ دوژمنی ئیسرائیلی و گۆڕینی ئاراستەكانە بە ئاقارێكی تر كە لێوەی بەرژەوەندییەكانی دوژمن بەدیدەهێنرێت».
بە گوتەی ئەو ڕاوێژكارەی بەشار ئەسەدی سەرۆكی سوریا»پرۆژەی پیلانگێڕی تێناپەڕێت و فەلەستین وەك چەقی خەبات و ناونیشانی یەكەم دەمێنێتەوە».
بوسەینە شەعبان دەڵێت»شەهیدەكانی سوریا و بریندارەكانی، كە لەشەڕەكاندا ڕووبەڕووی تیرۆر و لایەنگرانی ڕاوەستان، شەهیدان و بریندارانن بۆ فەلەستین، چونكە بەئامانجگرتنی سوریا، بە ئامانجگرتنی ڕاستەوخۆی پرسی فەلەستینە».
بوسەینە شەعبان وایدەبینێت «ئەو تیرۆرەی دەستی لە سوریا وەشاند و زیانی بە یەمەن و عیراق و لیبیاش گەیاند، سەرچاوەكەی دوژمنی زایۆنیزمە كە تیرۆریستان دروست دەكات و كۆمەكیان دەكات، ئامانج لە تیرۆریش پارچەپارچەكردنی ناوچەكە و بەدیهێنانی ئامانجەكانی زایۆنیزمە تێیدا».
ڕاوێژكاری سەرۆكی سوریا، درودی بۆ گەلی فەلەستین و دیل و منداڵان و ژنان و ئەوپیاوانە ناردبوو كە لە مزگەوتی ئەقسای پیرۆزەوە سەنگەرەكانیان چۆڵ ناكەن و دەڵێت»ئێوە نوێنەرایەتی ویژدان و شەرەفمەندی ئەم نەتەوە دەكەن.. ئێوە خەمخۆری فەلەستین و ئایندەی نەتەوەی عەرەبن».
كۆمەڵی وڵاتانی عەرەب یەكێكە لە ڕێكخراوە دێرینەكانی ناوچەكە و لەم ماوەیەی دواییدا ئەندامێتی سوریای لە ڕێكخراوەكەدا هەڵپەساردبوو، بوسەینە شەعبانیش وەك كەسێتیەكی دەركەوتوو كە لە ئێستادا گوزارشت لە راووبۆچوونەكانی دەسەڵاتدارانی دیمەشق دەكات لەو بارەیەوە، بڕیاری ڕێكخراوەكەی بە بڕیارێكی نەشیاو لەقەڵەم دابوو.
بوسەینە شەعبان ڕاوێژكاری سیاسی و میدیایی سەرۆكایەتی كۆماری سوریا ڕایگەیاندبوو، سوریا بناغەی كۆمەڵی وڵاتانی عەرەبە و بە یەكێك لە گرنگترین و دێرینترین ئەندامانی ڕێكخراوی وڵاتانی عەرەب دادەنرێت، بڕیاری هەڵپەساردنی ئەندامێتی سوریاش بڕیارێكی نەشیاوە، چونكە وڵاتانی عەرەب لە ئێستادا پێویستیان بە یەكگرتوویی هەیە و پێویستە پشتیوانی لە یەكتر بكەن، نەك بكەونە ژێر ئەو فەرمانانەی بەشێوەیەكی قورس و نەرێنی لەیەكتر جیایان دەكاتەوە».
شەعبان دەڵێت»سوریا بوونی هەیە، پێویستە عەرەب بگەڕێتەوە بۆ سوریا، چونكە سوریا نوێنەرایەتی هێڵی ڕاستەقینەی مقاوەمە دەكات، و نوێنەرایەتی خەمخۆری دۆزی فەلەستینی دەكات و خەمخۆری ئایندەی عەرەبە، بۆیە دەبێت عەرەب بگەڕێتەوە سەر ئەو هێڵە دروستە».
هەر لەو چوارچێوەیەدا، میخائیل بۆگدانۆڤ، جێگری وەزیری دەرەوەی ڕوسیا، ئاماژەی بەو كارانە كردبوو كە لەسەر بابەتی گەڕانەوەی سوریا دەكرێن بۆ بەشداریی لە كۆمەڵی وڵاتانی عەرەبی.
بۆگدانۆڤ بە ڕۆژنامەوانانی ڕاگەیاندبوو»بە بۆچوونی ئێمە، پرۆسەكە بەردەوامە. هەندێك لە وڵاتان هەنگاوی باشیان هەڵناوە، مەبەست دەستپێكردنەوەی كاری باڵێوزخانەكان و كردنەنەوەی باڵێوزخانە داخراوەكان، و زیادبوونی ئاستی نوێنەرایەتی كونسوڵگەریی و سیاسی و دیپلۆماسی وڵاتە عەرەبییەكانە لە دیمەشق. لەئێستاشدا كار بۆ دەستپێكردنەوەی بەشداریی و چالاكییەكانی سوریا دەكرێت لە ڕێكخراوی كۆمەڵی وڵاتانی عەرەبی».
ئەنجومەنی كۆمەڵی وڵاتانی عەرەبی لە تشرینی دووەمی 2011وە ئەندامێتی سوریای بەهۆی گوشاری هەندێك لە وڵاتە عەرەبییەكانەوە هەڵپەساردبوو، بە تایبەتیش وڵاتانی كەنداو، ئەمەش وەك هەڵوێست وەرگرتن بەرانبەر بەو تەنگژە و ململانێیانەی لە وڵاتەكەدا دروستبوو، دواتر ئەو وڵاتانە بەرپرسیارێتی كوژرانی مەدەنییەكانیان خستبووە ئەستۆی حكومەتی سوریا.
بەپێی ئەو كۆبوونەوە سێ‌ قۆڵیانە بێت كە لە سوچی لەنێوان (روسیا-توركیا- ئێران) بە سەرپەرشتی فلادیمێر پوتین سازدەكرێن، ئەو وڵاتانە كار بۆ سەرخستنی پرۆسەی سیاسی دەكەن لە سوریا، تا دیمەشق بتوانێت پەیوەندییەكانی لەگەڵ وڵاتانی عەرەبی ئاسایی بكاتەوە و ببێتەوە بە ئەندامێكی كاریگەر لە ڕێكخراوی كۆمەڵی وڵاتانی عەرەب.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

دۆزینه‌وه‌ی رۆژی به‌ قه‌زابوونی شاری چـۆمان

محه‌ممه‌د گه‌لاڵه‌یی* له‌ زۆر لێكۆڵینه‌وه‌ی مێژوویدا، كه‌ له‌سه‌ر ناوچه‌ی باڵه‌كایه‌تی ...