سەرەکی » وتار » د.عیزه‌دین مسته‌فا » هه‌ر بۆ ناوی كوردی

ئه‌م كونجه‌ش

هه‌ر بۆ ناوی كوردی

من هه‌ر ده‌نووسم. جا كێ ده‌یخوێنێته‌وه‌ سوپاسی ده‌كه‌م و ده‌توانم بڵێم ئه‌وه‌ش كه‌ نایخوێنێته‌وه‌ گه‌ردنی ئازاد بێ – به‌ڵام ڕه‌نگه‌ نووسینه‌كان بۆ نه‌وه‌كانی داهاتوو ببنه‌ به‌ڵگه‌ – ئه‌مه‌ خۆزگه‌یه‌ و ده‌یخوازم – خۆ ڕێی ئه‌وه‌م لێ ناگرن.
له‌ (كونج)ێكی پێشوودا باسی ناوی خۆمم كرد كه‌ تانووتی ئه‌وه‌م لێدرابوو كه‌ ناوه‌كه‌م عه‌ره‌بی یه‌. ڕه‌نگه‌ بڵێم چ ناوی من و چ ناوی زۆر كه‌سیتر – به‌ڵێ عه‌ره‌بین – به‌ڵام زیاتر ده‌توانم بڵێم – ئیسلامین – به‌ كارتێكردنی ئیسلام – ناوی عه‌ره‌بیش هاتۆته‌ ناو كورده‌وه‌، با وه‌ك جارێكیتر نووسیم – یه‌كه‌م كورد له‌ ژیانی پێغه‌مبه‌ری مه‌زندا گه‌یشتۆته‌ (مه‌دینه‌ی مونه‌وه‌ره‌) و له‌سه‌ر ده‌ستی خۆیدا موسوڵمان بووه‌ – ناوی (گاڤان) واته‌ (گاوان) ی كوڕی (مه‌یموون) بووه‌ – ڕه‌نگه‌ ناونان به‌ ناوی زیره‌كترین گیانله‌به‌ره‌وه‌ كه‌ (مه‌یموون)ه‌ لای كورد (شه‌رم نه‌بووبێ، یا عه‌ره‌ب ناوی (میمون)ی عه‌ره‌بی یان لێ نابێ – كه‌ مانای (پیرۆز)ه‌. ئیتر پاش ئه‌وه‌ ناوی عه‌ره‌بی یا ئیسلامی له‌ناو كورد و هه‌موو موسوڵماناندا بڵاوبۆوه‌ – فه‌رمووده‌یه‌ك هه‌یه‌ ده‌ڵێ: (خیر الاسما‌ء ما حمد و عبد) واته‌: باشترین ناو ئه‌وانه‌یه‌ كه‌ به‌ (حه‌مه‌د) و (عه‌بد) ده‌ستپێبكه‌ن – وه‌ك (حمد الله‌) و (حمیدالدین) و (حمید الملك) كه‌ له‌ ناو هه‌موو گه‌لانی موسوڵمانی (نا عه‌ره‌ب) دا باوون. به‌ڵام سه‌یر ئه‌وه‌یه‌ كورد زۆرجار (عه‌بد)ه‌كه‌ له‌ناو ده‌كاته‌وه‌ و هه‌ر به‌ ناوه‌كه‌ی خۆیه‌وه‌ – كه‌ له‌ ئیسلامدا به‌ ناوه‌ پیرۆزه‌كانی خوا (اسما‌ء الله الحسنی‌) ناوده‌برێ – منداڵ ناوده‌نێن – واته‌ (بێ عبد)ه‌كه‌: نموونه‌م زۆر له‌ بیردا یا له‌ به‌رده‌مدایه‌: با بڵێم: مه‌جید – حه‌مید – قادر – ره‌ئووف – ڕه‌حیم – غه‌فوور – كه‌ریم – عه‌زیز – جه‌لیل. ئه‌وه‌تا (عبدالرحمن)یش ئه‌بێ به‌ (ئه‌وڕه‌حمان) و كورد دێڕی فۆلكلۆری لێ دروست ده‌كا ( ئه‌وڕه‌حمانه‌ – … ده‌رمانه‌ – ئاگر بێنه‌ سه‌رمامانه‌) (عه‌بدوڵڵا)ش ده‌بێ به‌ (ئه‌وڵا) (عبدالرزاق)یش ده‌بێ به‌ (ڕه‌زاق) یا (ڕه‌زا) – كاك بیمار لێم زویر نه‌بێ – خۆ (عبدالناسر)یش بووه‌ به‌ (ناسر) و (عبد الباسط)یش بووه‌ به‌ (باسیت) – (عبد الباسط)ی قورئان خوێنی (كوردی) گه‌وره‌ی میسر نه‌بێ – كه‌ هه‌روه‌ك خۆیه‌تی – خۆ (عبدالوهاب)یش ده‌بێ به‌ (وه‌هاب) و (عبدالواحد و عبدالجواد و عبدالحكیم)یش به‌ جواد و واحید و حه‌كیم بانگ ئه‌كه‌ین – ئه‌مه‌ درێژدادڕی یه‌ كه‌ ڕه‌نگه‌ زۆر كه‌س لایان بێ سوود بێ – به‌ڵام مادام ده‌ستم دایه‌. با (حافظ و باقی و مه‌جید و خالق و سه‌لام و له‌تیف و جه‌ببار)م له‌بیر نه‌چێ – خۆ (مه‌عرووف) (ماله‌)یه‌ و (‌‌‌اسماعیل) (سمه‌)یه‌ و
(ابراهیم) (بله‌)یه‌.
من جیاوازی له‌ نێو ژن و پیاودا ناكه‌م. له‌به‌ر ئه‌وه‌ با باسێكی ژنانیش بكه‌م. فاتمه‌ (فاطمة) ده‌بێت به‌ (فاته‌)، (عائشه‌) ده‌بێت به‌ (ئایشێ)، (آمنه‌) به‌ (ئامه‌)، (حلاوة) به‌ (حه‌لاو)، (حلیمة) به‌ (حه‌لیم).
ئه‌وه‌تا كورد به‌ (په‌لكه‌ زێڕینه‌) (قوس و قزح) ده‌ڵێ: (پرچی ئایشێ و فاتمه‌).
په‌لكه‌ زێڕینه‌ی پاش بارانی زۆر
ئه‌چه‌مێته‌وه‌ به‌رامبه‌ر به‌ خۆر
ئه‌م باسه‌ زۆر درێژه‌ ده‌كێشێ – با لێی گه‌ڕێم. به‌ڵام ئه‌م گۆڕینانه‌ هه‌ر لای كورد نی یه‌. به‌ڵكو ناوی عه‌ره‌بی یا ئیسلامی لای (پاكستانی)ی هیندی و ئه‌فغانی حه‌شرێكی پێ ده‌كرێ – ده‌بێ عه‌ره‌ب به‌زه‌ییان به‌ خۆیاندا بێته‌وه‌.
ئه‌وه‌ بۆ (ئه‌نده‌نوسیا)و هه‌ندێ ووڵاتیتر هه‌ر لێگه‌ڕێ. خۆ لای ئێمه‌ (محمد)ه‌كه‌ بووه‌ به‌ (حه‌مه‌) – هه‌ر له‌و حه‌مه‌یه‌ ده‌یان ناو دروست كراوه‌. (حه‌مه‌ عه‌لی) – (حه‌مه‌ نووری) – (حه‌مه‌ وه‌یس)…هتد.
وابزانم درێژه‌م دایه‌ – هیوام وایه‌ زاناكانمان ئه‌م نموونه‌ و زانینانه‌ بكه‌نه‌ كه‌ره‌سه‌ی زانستی و جارێكیتر هیوام وایه‌ وه‌ڕسم نه‌كردبن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شه‌هید دارا تۆفیق

كه‌سێكی زۆر نزیكی خۆم پێی ووتم: سه‌یری ئه‌م هه‌موو كه‌ناڵانه‌ی ...