سەرەکی » دۆسێ » داوا لە سعودیە دەكرێت دەست لە جەنگی یەمەن هەڵبگرێت

دەبێت بیر لە سەركەوتن نەكاتەوە

داوا لە سعودیە دەكرێت دەست لە جەنگی یەمەن هەڵبگرێت

گروپی قەیرانە نێودەوڵەتییەكان، لە راپۆرتێكیدا كە لە 14ی نیسانی 2019 بڵاوكرایەوە، تێیدا داوا لە ویلایەتە یەكگرتووەكان كراوە، یارمەتی سعودیە بدات بۆ دەرچوون لە جەنگی یەمەن، لەڕێی دانانی نێردەیەكی نێونەتەوەیی كە دۆسێكە لەئەستۆ بگرێت و هەناردەی چەك بۆ سعودیە هەڵبپەسێرێت.
گروپی قەیرانە نێودەوڵەتییەكان لە راپۆرتەكەیدا بەپێویستی دەزانێت، ویلایەتە یەكگرتووەكان نێردەیەك بۆ تەنگژەی یەمەن دابنێت و هەموو هەناردەكانی چەك بۆ سعودیە هەڵبپەسێرێت تا ئەو كاتەی ریاز واز لە دەستوەردانی سەربازی دەهێنێت كە چوار ساڵە لە دژی یاخیبووە حوسییەكان دەستیپێكردووە.
لە راپۆرتەكەدا هاتووە»پێویستە هاوپەیمانی سەربازی كە لەلایەن ریازەوە سەركردایەتی دەكرێت لە یەمەن، بیر لە چۆنیەتی بەدیهێنانی سەركەوتن نەكاتەوە لەسەر وەرەقە و لە بری ئەوە بە تەواوەتی پابەندی گەڕان بێت بەشوێن دەرچەیەكی سیاسی، تەنانەت گەر ئەوە مانای پێدانی قورساییەكی گەورەتر بگەیەنێت بە حوسییەكان».
گروپی قەیرانە نێودەوڵەتییەكان پێیوایە»دەبێت ویلایەتە یەكگرتووەكان رێپیشاندەر بێت لەڕێی دۆزینەوەی چارەسەرێكی تایبەت بەخۆی».
ئەم راپۆرتە لەكاتێكدایە كە كۆنگرێسی ئەمریكایی رازیی بووە بە پرۆژە یاسایەك بۆ كۆتایی هێنان بە پشتیوانی سەربازی ئەمریكایی لە جەنگی یەمەن، لە هەنگاوێكدا كە نیگەرانی یاسادانەرە ئەمریكاییەكانی بەرانبەر بە كەوتنەوەی زیاتری قوربانیانی مەدەنی خستبووەڕوو، وێڕای كاریگەرییەكانی ئەو جەنگە لەسەر دانیشتوان كە هەڕەشەی برسێتییان لەسەرە.
هەروەها هەنگاوەكە لەكاتێكدایە كە یاسادانەرە ئەمریكاییەكان، ناڕەزایی زیاترییان بەرانبەر بە ریاز دەربڕیبوو لە دوای كوژرانی جەمال خاشقچی لە كونسوڵخانەی وڵاتەكەی لە ئیستەنبوڵ لە مانگی تشرینی یەكەمی رابردوو.
ترەمپ هەڕەشەی بەكارهێنانی ڤیتۆی كردبوو بۆ رەتكردنەوەی پرۆژە یاساكە، بەڵام تائێستاش ئەو كارەی نەكردووە.
كریس مۆرفی، سیناتۆری دیموكراتی كە دیارترین رەخنەگری جەنگی یەمەنە، لە 13ی نیسانی 2019 رایگەیاندبوو، تەنانەت گەر ترەمپیش ڤیتۆی سەرۆكایەتی لە دژی پرۆژە یاساكە بەكاربهێنێت، كۆنگرێس دەتوانێت بەشێوەیەكی بەردەوام رۆڵی «پۆلیسی خراپ» ببینێت لە گوشارخستنە سەر شانشینی عەرەبی سعودیە بۆ گۆڕینی هەڵسوكەوتەكانی لە یەمەن.
وەك وەڵامێك بەرانبەر بە راپۆرتی گروپی قەیرانە نێودەوڵەتییەكان، مرۆفی لە كۆنفرانسێكی رۆژنامەوانیدا رایگەیاندبوو»ئەوە مەسەلەیەك نییە وابەستەی ئەوە بێت كە ئایا هاوپەیمانی حوسییەكان دەبەزێنێت یان نا، وەڵامی ئەو پرسیارە دراوەتەوە».
بە گوتەی مۆرفی»حوسییەكان رۆڵی گەورە و گرنگیان دەبێت لە حوكمڕانی ئایندەی یەمەن، بۆیە مەسەلەكە پەیوەندی بە دیاریكردنی چۆنیەتی ژیانی سعودییەكانەوە هەیە لەگەڵ رەوشەكە، بە شێوازێك كە هەڕەشە لەسەر بەرژەوەندییە ئەمنییەكانیان دروست نەكات تا مەودایەكی دوور».
یەكێك لەو هۆكارانەی وایكرد ترەمپ پشتیوانی لە ریاز بكات لە جەنگی یەمەن، هەوڵدان بوو بۆ بەرپەرچدانەوەی هەژموونی ئێران كە پشتیوانی لە حوسییەكان دەكات.
بەڵام گروپی قەیرانە نێودەوڵەتییەكان بە راپۆرتەكەیدا دەڵێت، ترەمپ لەو بارەیەوە هەڵەی كردووە، چونكە ئێران لە واقیعدا سود لە بەردەوامبوونی جەنگ وەردەگرێت لە یەمەن، چونكە توانا و داهاتەكانی سعودیەی تێدا بەهەدەر دەچێت و ناوبانگی وڵاتەكەش دەزڕێت، لەكاتێكدا خۆی هیچی وەها لەدەستنادات.
راپۆرتەكە لە زاری رۆبەرت مالی، سەرۆكی گروپی قەیرانە نێودەوڵەتییەكانەوە بڵاویكردۆتەوە، سعودییەكان «پێیانوایە كە پێویستیان بە دانانی سنورێكە بۆ جەنگ (بەڵام) نازانن ئەو كارە چۆن بكەن».
بە گوتەی مالی»سعودییەكان تائێستاش بڕوایان وایە، گەر كەمێك گوشارە سەربازییەكانیان زیاتر بكەن، ئەوا حوسییەكان دادەڕمێن، دوای ئەوە دەتوانن كۆتایی بە جەنگ بهێنن و ئێران تێكبشكێنن. بەڵام وەك بەڵگە چوار ساڵمان لەبەردەستدایە بۆ پوچەڵكردنەوەی ئەو بۆچوونە».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەمریكا كارمەندە ناسەرەكییەكانی لە عیراق پاشەكشە پێدەكات

ئەمریكا داوا لە كارمەندە ناسەرەكییەكانی دەكات لە عیراق، وڵاتەكە بەجێبهێڵن، ...