سەرەکی » وتار » د.عیزه‌دین مسته‌فا » شه‌هید دارا تۆفیق

ئه‌م كونجه‌ش

شه‌هید دارا تۆفیق

كه‌سێكی زۆر نزیكی خۆم پێی ووتم: سه‌یری ئه‌م هه‌موو كه‌ناڵانه‌ی ته‌له‌فزیۆن و ئه‌م هه‌موو ڕۆژنامه‌ و گۆڤارانه‌مان بكه‌، باسی زۆر كه‌س ده‌كه‌ن، به‌ڵام تا ئێستا كه‌س ناوی (دارا تۆفیق) ناهێنێ. سست بووم و پێش ئه‌وه‌ی گله‌یی له‌وان بكه‌م، له‌ دڵدا گله‌ییم له‌ خۆم كرد. چونكه‌ من كۆنترین هاوه‌ڵ و هاوڕێیم و هێشتا هه‌ر ماوم و ئه‌م قه‌ڵه‌مه‌شم به‌ ده‌سته‌وه‌یه‌ و ئه‌م كونجه‌شم بۆ ڕه‌خساوه‌، به‌ڵام بۆچی بێده‌نگم؟
با جارێ به‌ (كونجێك) یادی بكه‌مه‌وه‌ و (خوا كه‌ریمه‌) بۆ نووسینی زیاتر – كه‌ خۆزگه‌ به‌ كتێبێك ده‌بوو.
دارای تۆفیق ئه‌فه‌ندیی ئاغا فه‌تحوڵڵا – له‌ پۆلی پێنجه‌م و شه‌شه‌می قوتابخانه‌ی فه‌یسه‌ڵی یه‌وه‌ له‌گه‌ڵما بوو – دووایی له‌ ناوه‌ندیی سلێمانیش له‌ پۆله‌كانی یه‌كه‌م و دووه‌م و سێیه‌مدا یه‌كمان گرته‌وه‌. ده‌چوومه‌ ماڵه‌كه‌ی خۆیان له‌ (به‌ر خانه‌قا) – سه‌ره‌تا به‌ داڵانێكی گه‌وره‌دا تێده‌په‌ڕیت. له‌و داڵانه‌دا به‌ ده‌رسه‌كانمدا ده‌چووینه‌وه‌، به‌ واتای ئه‌و كاته‌ – (سه‌عی)مان ده‌كرد.
باوكی ئه‌و كاته‌ له‌ پیاوه‌ گه‌وره‌كانی شار بوو – ڕۆژێك به‌ داڵانه‌كه‌دا ده‌چووه‌ ده‌ره‌وه‌. ئێمه‌ له‌به‌ری هه‌ستاین. باوكی ڕێگه‌ی كوڕه‌كانی نه‌ ئه‌دا له‌گه‌ڵ هه‌موو كه‌سێكدا تێكه‌ڵ بن. كه‌ به‌ به‌رده‌مماندا ڕه‌تبوو، من و دارا له‌به‌ری هه‌ستاین، به‌ تووڕه‌ییه‌كه‌وه‌ پرسی: تۆ كوڕی كێیت؟. كه‌ ووتم كوڕی فڵانم – وه‌ك بڵێیت گه‌شایه‌وه‌. ئه‌ملاو ئه‌ولای ماچ كردم. كاكه‌ دارا لای سه‌یر بوو. فه‌رمووی: تۆ كوڕه‌زای مامۆستامی – من سه‌ره‌تای خوێندنم له‌ خزمه‌ت حاجی مه‌لا ڕه‌سوڵدا بووه‌ – ده‌ دانیشه‌ – با دارا هاوه‌ڵی وه‌ك تۆی هه‌بێ.
له‌ دوواناوه‌ندیدا جیابووینه‌وه‌، كاكه‌ دارا له‌ به‌شی زانستی (عیلمی) بوو، من له‌ به‌شی (ئه‌ده‌بی) – به‌ڵام كه‌ چووینه‌ به‌غدا – من له‌ به‌شی عه‌ره‌بیی خانه‌ی به‌رزی مامۆستایان (دار المعلمین العالیه‌) وه‌رگیرام و ئه‌و له‌ كۆلێجی ئه‌ندازیاری – هه‌موو ڕۆژێك پاش ده‌وام به‌پێ له‌ (وه‌زیریه‌)وه‌ ده‌چووم بۆ (بابولموعه‌زه‌م) بۆ ئه‌و به‌شه‌ ناوخۆییه‌ی ئه‌و و ڕه‌حمه‌تی جوامێری لێبوو. (جوامێری مه‌جید ئه‌فه‌ندیی سه‌لیم ئاغا) – هاوڕێی منداڵیم و دراوسێی (ماڵ به‌ ماڵه‌وه‌) – هه‌رسێكمان ده‌ستیشمان دابووه‌ حیزبایه‌تی – له‌ حیزبی شیوعیی عیراقدا – به‌ڵام له‌ یه‌ك ڕێكخراودا نه‌بووین و هه‌ر پێكه‌وه‌ ڕاگۆڕینه‌وه‌ و ده‌نگوباسمان ده‌دا به‌ یه‌ك.
ڕاپه‌ڕینی تشرین هات (1953) – له‌ خۆپیشاندانه‌كاندا یه‌كترمان ده‌گرته‌وه‌. كه‌ زه‌بر و زه‌نگ (ا‌‌‌رهاب) ده‌ستی پێكرد، هاتینه‌وه‌ سلێمانی. هه‌ر من فرمانی گرتنم بۆ ده‌رچوو بوو، چونكه‌ له‌ خۆپیشاندانه‌كاندا خوتبه‌م ده‌دا.
كاك دارا جارێك هات بۆ مۆسكۆ – ئه‌و جاره‌ هێشتا له‌ حزبی شیوعیدا بوو. چونكه‌ من هاوڕێ جه‌مال حه‌یده‌ری بردمی بۆ لای. ئه‌و كاته‌ له‌وه‌ ده‌چوو ئوتێلی حیزب (تایبه‌تی) نه‌بووبێ. چونكه‌ له‌ ئوتێل مۆسكۆ دابه‌زیبوو – له‌ قسه‌دا زانیم – ئه‌و كاته‌ سكرتێری ڕێكخراوی لاوانی جیهانه‌ و له‌ (هه‌نگاریا)یه‌. چونكه‌ پاش چوارده‌ی ته‌مووزیش له‌ به‌غدا سكرتێری یه‌كێتیی لاوانی دیموكراتیی عیراق بوو (كه‌ به‌ ده‌ست شیوعی یه‌كانه‌وه‌) بوو.
جاریتر هه‌ر وا بزانم له‌ مۆسكۆ بوو شه‌هید دارام دییه‌وه‌، ئه‌و كاته‌ وه‌ك نوێنه‌ری سه‌رۆك مسته‌فا بارزانی هاتبوو بۆ مۆسكۆ. بۆی گێڕامه‌وه‌ چۆن بووه‌ به‌ نوێنه‌ری سه‌رۆك بارزانی – ووتی: چومه‌ لای نامه‌یه‌كی لێ وه‌رگرم بۆ به‌ردانی خه‌سره‌وی – برا گه‌وره‌م كه‌ له‌ به‌غدا گیرابوو – دیاره‌ ئه‌مه‌ پاش یانزه‌ی ئازاره‌. ووتی: نامه‌كه‌ی دامێ – به‌ڵام كه‌ ماوه‌یه‌ك پێكه‌وه‌ قسه‌مانكرد فه‌رمووی: جێگه‌ی تۆ لای منه‌ و ده‌بێ كار بۆ من بكه‌یت – ئیتر پاش دان و ستاندن بووم به‌ نوێنه‌ری ئه‌و. نازانم شه‌هید دارا چووه‌ سه‌ركردایه‌تیی پارتی یه‌وه‌ یا نا. به‌ڵام شه‌هید بوونه‌كه‌ی – هه‌ر به‌ كوشتن بوو – به‌ ده‌ستی به‌عسی یه‌ فاشسته‌كان – به‌ڵێ: له‌ نه‌مرانه‌، له‌ شه‌هیده‌كانی ئه‌م گه‌له‌ تێكۆشه‌ره‌یه‌. با ئه‌م كونجه‌ سه‌ره‌تایه‌ك بێ بۆ له‌سه‌ر نووسینی ئه‌و شه‌هیده‌ مه‌زنه‌ و بۆ یادگاره‌كانم.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

هوورا

– له‌گه‌ڵ ڕه‌حمه‌تی كاكه‌ حه‌مه‌ (حه‌مه‌ی مه‌لا كه‌ریم) و ڕه‌حمه‌تی ...