سەرەکی » چاوپێکه‌وتن » پێویستمان بە دەركردنی یاسای نوێ و هەمواركردنەوەی یاسا كارپێكراوەكانەپەڕە 2

لیوا حەسەن نوری بەڕێوەبەری ئاسایشی پارێزگای سلێمانی بۆ كوردستانی نوێ:

پێویستمان بە دەركردنی یاسای نوێ و هەمواركردنەوەی یاسا كارپێكراوەكانە

*ئارامیی سلێمانی هێڵی سوورە و بەزاندنی ئەو هێڵە بەهیچ جۆرێك قابیلی قبووڵكردن نییە

لیوا حەسەن نوری بەڕێوەبەری ئاسایشی پارێزگای سلێمانی لە دیدارێكدا لەگەڵ كوردستانی نوێ، تەئكیدیكردەوە «ئارامیی سلێمانی هێڵی سوورە و بەزاندنی ئەو هێڵە بەهیچ جۆرێك قابیلی قبووڵكردن نییە»، وتیشی: بۆ رێكخستنەوەی باشتری كاروبارەكانی رۆژانەی هاووڵاتیان پێویستمان بە دەركردنی یاسای نوێ و هەمواركردنەوەی یاسا كارپێكراوەكان هەیە.

دیداری، هەڵكەوت زەنگەنە

لیوا حەسەن نوری بەڕێوەبەری ئاسایشی پارێزگای سلێمانی جگە لەوەی بەهۆی سروشتی كارەكەیەوە، رۆژانە سەروكاری لەگەڵ رۆژنامەنووسان و كەناڵەكانی راگەیاندندا هەیە، لەهەمانكاتدا خۆشی دەرچووی پەیمانگەی تەكنیكی سلێمانی، بەشی رۆژنامەنووسییە. ئێستاش خوێندكاری زانكۆیە. بۆیە سەرەتای دیدارەكەمان بەمجۆرە دەستپێكرد..

*ئێستا وەرزی بەهارە، بەڵام ئەمڕۆ 22/4/2019، رۆژێكی سارد و باراناوییە و تەنانەت لەهەندێك ناوچەی هەرێمی كوردستان بەفریش باریوە، دیارە ئەمڕۆ یادی 121 ساڵەی رۆژنامەگەریی كوردییە، بەوبۆنەیەوە رۆژێكی گەرموگوڕ و پڕ رێوڕەسم و چالاكیی جۆراوجۆرە، ژوورەكەی بەڕێزیشتان لەڕووی باسوخواس و دۆسێی جیاجیاو سەردانی چین و توێژەكانەوە گەرموگوڕە، ئێمەش دەمانەوێت دیدارێكی گەرموگوڕ بكەین، لێرەدا دەمانەوێت لەنێو هەموو ئەم پرسە گەرم و جۆراوجۆرانەدا، بەوجۆرە دەستپێبكەین كە ئەگەر لیوا حەسەن نوری بەڕێوەبەری ئاسایشی پارێزگای سلێمانی ئێستا خۆی رۆژنامەنووس بێت و بیەوێت دیدار لەگەڵ بەڕێوەبەری ئاسایشی پارێزگای سلێمانی-دا بكات، یەكەم پرسیار كە دەیكات چییە؟ یان دەیەوێت بە چ جۆرێك دەست بە دیدارەكە بكات؟
-پرسیارێكی قورسە.. بەڵام دەمەوێت ئەوە رونبكەمەوە كە ئیشی ئێمە و ئیشی رۆژنامەنووسان، ئیشێكی زۆر نزیكە لەیەكەوە، هەردوولامان كار لەسەر كۆكردنەوەو گواستنەوەو وەرگرتن و بڵاوكردنەوەی زانیاریی دەكەین، من ئەگەر گفتوگۆ لەگەڵ رۆژنامەنووسێكدا بكەم، پێیدەڵێم تۆ چۆن زانیارییەكان دەگوازیتەوە، لەسەر چ بنەمایەك و بە چ شێوازێك دەیگوازیتەوە. بەبڕوای من ئەمە بۆ هەموو لایەك گرنگە، هەم بۆ لێپرسراوان، هەم بۆ هاووڵاتی، هەم بۆ رۆژنامەنووسان، هەم بۆ كەناڵەكانی راگەیاندن كە پێویستە هەوڵی تەواو بدەن بۆ ئەوەی زانیاریی راست و دروست و بەبنەما بڵاوبكەنەوە. ئەو زانیارییانە بڵاوبكەنەوە كە سوودی هەیە بۆ بەرژەوەندیی گشتی، بەتایبەت لەم قۆناغە هەستیارەدا پێویستە هەموو لایەك هاوكاری یەكتر بین، بەتایبەت رۆژنامەنووسان پێویستە هاوكاری هەم دەسەڵات، هەم پاراستنی پەیوەندییە كۆمەڵایەتییەكان بن، هەم بەپێی ئیتیكی رۆژنامەنووسی، هەواڵ و زانیارییەكان بگەیەنن.

*پێت وایە راگەیاندنەكان بەشێوەیەكی گشتی بەوجۆرە مامەڵە دەكەن كە باستكرد، ئایا ئاسایش و كەناڵەكانی راگەیاندن هاوكاری یەكترن؟
-بێگومان بەو رادەیە نییە، جاری واش هەیە ئێمە هاوكار نین.

*ئێوە بۆ هاوكار نین؟
-هۆكار زۆرە، جاری وا هەیە هەندێك زانیاریی هەیە، ئێمە ناتوانین بڵاوی بكەینەوە، چونكە هەستیاری دروست دەكات، كێشەی كۆمەڵایەتی دروست دەكات، مەترسی هەیە بۆ سەر دۆخەكە و بۆ سەر هاووڵاتیان، بۆیە هەندێك زانیاریی هەیە بیپارێزین باشترە و باسنەكردنی زیاتر خزمەت دەكات. جاری واش هەیە هەندێك زانیاریی هەیە پێویستە لەكاتی خۆیدا بیگەیەنین بە هاووڵاتیان بۆ ئەوەی ئاگاداربن لەوەی چی دەگوزەرێت لە ناوچەكەدا.

*بەڵام پێنەدانی زانیاریی راست و دروست لە سەرچاوەی رەسمییەوە بە كەناڵەكانی راگەیاندن، هەندێكجار بۆ خۆی هۆكار نییە بۆ ئەوەی زانیارییە راست و دروستەكە نەگات، یان كەناڵەكانی راگەیاندن بەوجۆرە مامەڵە نەكەن كە پێویستە، چونكە ئێوە هەندێكجار زانیاریی نادەن، راگەیاندنیش دەیەوێت زانیاریی بڵاوبكاتەوە، بۆیە هەندێكجار پەنا دەبات بۆ سەرچاوەیەكی ئاگادار، سەرچاوەیەك كە نەیویست ناوی خۆی ئاشكرا بكات، ئەمە خۆی هۆكارێك نییە بۆ ئەوەی كێشە لە گەیاندنی زانیارییدا هەبێت؟
-ئێمە زانیارییە راست و دروستەكە دەدەین، ئەو زانیارییەی كە پێویست بكات، دەیگەیەنین، بەڵام بەداخەوە هەندێك لە كەناڵەكانی راگەیاندن و سایتە ئەلیكترۆنییەكان، هەندێكجار بەبێبنەما و لەخۆیانەوە هەڵسەنگاندن، یان شیكردنەوە بۆ زانیارییەكە دەكەن بەبێ ئەوەی بگەڕێنەوە بۆ ئێمە، یان لێدوانمان لێوەربگرن. بۆ نموونە جاری وا هەیە زانیارییەك بڵاودەكەیتەوە، كەچی هەندێكجار هەندێ كەناڵی راگەیاندن ئەو زانیارییە بە «سیناریۆ و دروستكراو» ناودەبات، یان دەڵێت «ئەمە خەڵكی لەپشتەوەیە»، یان كۆمەڵێك تانەی جۆراوجۆری دیكەی لێدەدات، بەڵام ئێمە خۆمان دەزگایەكی رەسمیین و بەڕەسمیش قسە دەكەین، بۆیە پێویست ناكات هەندێك لەكەناڵەكانی راگەیاندن، خوێندنەوەی دیكە بۆ ئەو زانیارییانە بكات كە ئێمە بەڕەسمی بڵاویاندەكەینەوە، چونكە ئەمە مەترسییەكی گەورەیە و هۆكار دەبێت بۆ ئەوەی هەندێك كەس متمانەیان نەمێنێت بەو دامودەزگایانەی كە پارێزەری سەرو سامان و ئارامی و ئاسایشی هەموو لایەكە.

*هۆكار چییە كە هەندێك كەناڵی راگەیاندن بەوجۆرەی كە باست كرد، خوێندنەوە بۆ زانیارییەكانی ئێوە دەكەن، ئایا پەیوەندیی بە كاری پیشەیی رۆژنامەنووسییەوە هەیە، یان پەیوەندیی بەو ململانێ ناتەندروستەوە هەیە كە ئێستا لەبواری سیاسی و تەنانەت بواری میدیاییشدا هەیە؟
-پیشەیی نییە، چونكە بەڕای من پێویستە رۆژنامەنووس لەسەر بنەمای ئەكادیمی و یاسایی، زانیاریی راست و دروست بگوازێتەوە. بەداخەوە ئەم دۆخەی ئێستا لەئارادایە، لەنێوان لایەنە سیاسییەكاندا ململانێیەكی توند هەیە. لایەنەكان دژی یەكترن، هەندێك لەلایەنەكان رێگەیان بە هەندێك لە ئەندامەكانی خۆیان داوە، جاری وا هەیە رێگەیان بەخۆشیان داوە لەڕێگەی كەناڵەكانی خۆیانەوە بەشێوازێكی توند مامەڵە لەگەڵ لایەنەكانی دیكەدا بكەن. ئەمانەش سەرئەنجام دەبنە هۆكاری ئەوەی كێشەو گرفت لەنێو كۆمەڵگەدا دروست ببێت، ئەمەش پەیوەندییە كۆمەڵایەتییەكان تێكدەدات و رق بەرامبەر بەیەكتر دروستدەكات و كاریگەریی سلبـی بەدوای خۆیدا دەهێنێت.
هەروەها غیابی یاساییش هەیە، پێویستە بۆ هەموو ئەم بابەتانە یاسا هەبێت. دۆخەكە پێویستی بەوەیە لەهۆڵی پەرلەماندا بە رێكەوتن لەگەڵ لایەن و دەزگا پەیوەندیدارەكاندا، كۆمەڵێك یاسای گرنگ دەربكرێت كەئەم وڵاتە لەم قۆناغەدا پێویستی پێیەتی، بۆ ئەوەی شەقام زیاتر رێكبخرێت و كاروبارەكانی رۆژانە باشتر بەشێوەیەكی یاسایی رێكبخرێنەوە. بۆ ئەوەی هۆشیاریی یاسایی لەهەموو كاروبارەكاندا بەشێوەیەكی باشتر بڵاوبكرێتەوە. لایەنێكی دیكەش پرسی ئابوورییە كە كاریگەریی زۆری هەیە.

*كەواتە هەرێمی كوردستان ئێستا بەتایبەت پێویستی بە داڕشتن و دەركردنی یاسای نوێ لە چ بوارێكدا هەیە؟
-پێویستمان بە دەركردنی یاسای نوێیە لەهەموو بوارەكاندا، بەداخەوە لەچەندین بواردا ئێستاش كار بە یاساكانی چەندین ساڵ لەمەوپێش دەكەین. بۆیە ئێستا جگە لەوەی پێویستمان بە دەركردنی چەندین یاسای نوێیە، لەهەمانكاتدا پێویستمان بە هەمواركردنەوەی چەندین یاسای دیكەش هەیە كە رۆژانە كاریان پێدەكرێت، گرنگە كار لەسەر دەركردنی ئەو یاسایانە بكەین كە كاریگەرییان لەسەر باشتر رێكخستنەوەی شەقام بەشێوەیەكی گشتی هەیە، شەقام كێیە؟ شەقام خەڵكە، خەڵك كێیە؟ خەڵك هەموو چین و توێژەكانە، كە هەریەك لەوانە تایبەتمەندیی خۆی هەیە. واتە پێویستمان بە یاسای نوێ و هەمواركردنەوەی یاساكانە بۆ باشتر رێكخستنەوەی هەموو بوار و كاروبارەكانی رۆژانە. بۆ ئەوەی لەهیچ بوارێكدا هەست بە غیابی یاسا نەكرێت.

*پرسێكی گرنگ، ئارامی و ئاسایشی سلێمانییە، ئێستا ئارامی و ئاسایش لە سلێمانی لە چ ئاستێكدایە؟
-ئارامی و ئاسایش لە سلێمانی لە ئاستێكی زۆرباشدایە، هێزەكانی ئاسایش و پۆلیس و دەزگا ئەمنییەكان بە بەردەوامی لە جێبەجێكردنی ئەركدان، خۆشبەختانە ئارامی و ئاسایش بەتەواوی پارێزراوە، دیارە لێرە و لەوێ تاوان و رووداوی جۆراو جۆر روودەدەن، كە زۆربەیان هۆكاری خۆیان هەیە، دەتوانم بڵێم خۆشبەختانە ئێستا هیچ مەترسییەكی ئەمنی نییە، بەپێچەوانەوە ئارامی و ئاسایشێكی بەرچاو دابینكراوەو شارو دەوروبەری، هەمووی ئارامە.

*بەڵام هەندێك رووداو و تاوان بەتایبەت لەماوەی رابردوودا لە سنووری سلێمانی روویانداوە كە بوونەتە مایەی پرسیار لای هاووڵاتیان، تێڕوانینت لەمبارەیەوە چییە؟
-هێزەكانی ئاسایش و پۆلیس و دەزگا ئەمنییەكان بەردەوام لە حاڵەتی ئامادەباشیدان، بەڵام دەمەوێت بەڕاشكاوی ئەوە بڵێم كەپێویستمان بەڕێكخستنەوەی یاساكان هەیە، پێویستمان بەوەیە بەردەوام بەدواداچوون بۆ هۆكارەكانی تاوان و جۆری تاوانەكان و ئەو كەسانەش بكەین كە تاوان دەكەن، پێویستمان بەوەیە لەناو زیندان و لە دەرەوەی زیندانیش بەردەوام چاودێری ئەو كەسانە بكەین و لەڕێگەی توێژەری كۆمەڵایەتییەوە كاری زیاتر لەسەر ئەو كەسانە بكرێت بۆ ئەوەی بەتەواوی لەتاوان دووربخرێنەوەو ببن بەكەسێكی ئاسایی لەناو كۆمەڵگە. پێویستمان بەوەیە وردتر كار لەسەر جێبەجێكردنی یاسا بكەین، پێش بڕیاردان هەڵسەنگاندن و بەدواداچوون بۆ ئەنجامی جێبەجێكردنی بڕیارەكان بكەین، بەتایبەت لە پرسی لێبووردنی گشتیدا.

*لەو زیندانانەی كە ئێستا لەهەرێمی كوردستاندا هەیە، كار لەسەر ئەم خاڵانە دەكرێت؟
-بەداخەوە..

*ئێوە چ هەماهەنگییەكتان هەیە لەگەڵ لایەنە پەیوەندیدارەكاندا بۆ ئەوەی كار لەسەر ئەم خاڵانە بكرێت؟
-ئێمە چەندینجار پەیامی خۆمان گەیاندووە.

*پەیوەندیی و هەماهەنگیتان لەگەڵ دامودەزگا یاساییەكان و پۆلیس و هێزەكانی سەر بەوەزارەتی ناوخۆ لە چ ئاستێكدایە؟
-لەگەڵ دادگاو پۆلیس و هێزە ئەمنییەكان پەیوەندییەكی زۆرباشمان هەیە، ئێمە بەبێ پرسی دادوەر و دادگا هیچ كارێك ناكەین، بۆ هەر رووداوێكیش ئەگەر زانیاریی پێشوەختیشمان هەبێت، ئێمە پێشتر دادوەر ئاگادار دەكەینەوە، ئەوكات بەپێی ئەو مادە یاساییەی كە دادوەر دەستنیشانی دەكات، مامەڵە دەكەین و كارەكانی خۆمان جێبەجێ دەكەین. كاری ئێمەش دیارە چەند بوارێكی گرنگ دەگرێتەوە وەكو پاراستنی ئارامی و ئاسایش، روبەڕوبوونەوەی تیرۆر، بەدواداچوون بۆ تاوانی سیخوڕی، روبەڕوبوونەوەی مادەی هۆشبەر، پاراستنی شوێنەوار، رێگەگرتن لەساختەكاریی، بەدواداچوون بۆ تاوانە گەورەكان و تاوانی رێكخراو، پارێزگاریكردن لەهەندێك شوێنی گرنگ وەكو بەنداوەكان و كونسوڵخانەكان، ئەمانە ئەركی ئاسایشن. ئێمە رۆژانە كاروبارەكانمان بەپێی یاساو بەهەماهەنگیی لەگەڵ دادگا، پۆلیس، هێزە ئەمنییەكان، لیژنەی قایمقامییەت، پارێزگا، سەرۆكی لیژنەی ئەمنیی پارێزگا، رادەپەڕێنین.

*تاچەند پێویستە ئاسایش بەردەوام لە خۆڕێكخستنەوەدا بێت؟
-هەموو كاتێك پێویستمان بە خۆڕێكخستنەوە هەیە، بۆیە بە بەردەوامی خۆمان رێكدەخەینەوە، خۆشبەختانە ئێستا هێزی باش و توانای باشمان هەیە لەڕووی مەشق و راهێنان و تیۆرییەوە، كارەكان زۆر بەباشی جێبەجێدەكرێن. بۆیە لێرەوە سوپاسی بەڕێز كاك د.خەسرەو گوڵ محەمەد سەرۆكی دەزگای ئاسایشی هەرێم دەكەم كە هەمیشەو بە بەردەوامی رێنمایی دەدات بەهێزەكان و ئامۆژگاریمان دەكات بۆ ئەوەی بتوانین كارەكانمان بە شێوازێكی یاسایی و سیستماتیك بەڕێوەبچێت. ئەو بۆشایی و كەموكورتییانەی كە هەمانە بۆمان پڕدەكاتەوە. بۆ ئەوەی بتوانین كارەكانمان بەباشی جێبەجێبكەین.

*لەلێدوانێكی پێشتردا ئاماژەت بەوەدا بوو ״ئارامیی سلێمانی هێڵی سوورە״، لە بواری كردەییدا تاچەند كار لەسەر ئەمە كراوە؟
-تەئكید لەسەر ئەوە دەكەینەوە كە ئارامیی سلێمانی هێڵی سوورە و بەزاندنی ئەو هێڵە بەهیچ جۆرێك قابیلی قبووڵكردن نییە، بەهەموو جۆرێكیش كار لەسەر ئەو پرسە گرنگە دەكەین، بەڕاشكاوی دەیڵێم ئەوەی بیەوێت ئارامیی سلێمانی تێكبدات، بەهیچ جۆرێك لێی قبووڵ ناكەین و ئێمە رووبەڕووی یاسای دەكەینەوە، بۆ ئەوەی سزای یاسایی بدرێت. چونكە كۆمەڵانی خەڵك پێویستیان بە ئارامی و ئاسایش و ژیان و گوزەرانی خۆش و باش هەیە، بۆ ئەو مەبەستەش ئێمە لێرەین، لەگەڵ هێزەكانی تر بەهەماهەنگی، كاری تەواو لەسەر پاراستنی ئارامی و ئاسایش، پاراستنی سەرو ماڵی هاووڵاتیان دەكەین. هێزەكانی ئێمە بە شەوو بەڕۆژ، بەبەردەوامی لە ئەركدان و كارەكانی خۆیان جێبەجێدەكەن، واتە 24 سەعات ئێمە لەجێبەجێكردنی ئەركداین.

*بۆ پرسی پاراستنی ئارامی و ئاسایش تاچەند پێویستە ئەم پرسە گرنگە لە ململانێی سیاسی و میدیایی دووربخەینەوە؟
-زۆر پێویستە، بەڕاستی ئەمە پرس و بابەتێكی گرنگە، ئیشی ئێمە جیایە، ئیشی میدیا جیایە، ئەوەی كە پێویست دەكات ئێمە پێیان دەڵێین، باشتر و پێویستە وەكو خۆی بڵاویان بكەنەوە و وەكو خۆی بیگەیەنن، نەچن یان گەورەی بكەن، یان ناشیرینی بكەن، یان تانەی لێبدەن، چونكە ئیشەكەی ئێمە راستەوخۆ پەیوەندیی بە دادگاو بە سەرووی خۆمانەوە هەیە. نابێت میدیا لەسەر بابەتی بێبنەماو بەویستی خۆی، كارەكان لە ئێمە تێكبدات.

*بۆ پرسێكی لەمجۆرە ئێوە لە دەزگای ئاسایش چۆن مامەڵە دەكەن؟
-ئێمە سكاڵامان لەسەر ئەو كەناڵانە تۆمار كردووە كە بابەتی ناڕاست لەسەر دەزگای ئاسایش بڵاودەكەنەوەو داوای قەرەبوویان لێدەكەین. دەبێت ئەو شتانەی كە دەیڵێن بیسەلمێنن، ئێمە پابەند دەبین بە بڕیاری دادگاو یاساوە.

*بۆ پاراستنی ئارامی و ئاسایش، كۆمەڵانی خەڵك تا چەند هاوكاری دەزگاكانی ئاسایشن و هەماهەنگیتان لەگەڵدا دەكەن؟
-زۆر سوپاسی هەم كۆمەڵگەی كوردستان، هەم كلتووری كوردی دەكەم، بەڕاستی خەڵك وڵات و نیشتمان و ماڵ و حاڵ و گوزەرانی خۆی خۆشدەوێت، بە بەڵگەی ئەوەی رۆژانە جاری وا هەیە خەڵك لە پەرۆشی خۆیەوە رێگەیەكی زۆر دوور دەبڕێت و دێت زانیارییەكمان دەداتێ، یان كە گوێی لە بابەتێك دەبێت، یان گومانی لە شتێك هەیە، پەیوەندیی دەكات بە ژمارەكانمانەوە، یان بە ئەفسەر و كارمەندەكانمان، یان بە ژمارە 106 -ەوە. ئەوەی كە ئەو لێی بەگومانە، یان هەستی پێدەكات، زانیاریمان لەبارەیەوە پێدەدات، ئێمەش دەستبەجێ كاری لەسەر دەكەین. دیارە بۆ پاراستنی نهێنی ئەو كەسایەتییە، هەموو جارێك ئێمە وتوومانە وەكو گیانی خۆمان و چاوی خۆمان دەیپارێزین، هەر كەسێك زانیارییەك دەدات بەئێمە، لەلایەن دەزگاكەمانەوە نهێنییەكەی بەتەواوی پارێزراوە، خۆشی پارێزراوە و زانیارییەكەشی پارێزراوە، بەڕاستی خەڵك بە پەرۆشە بۆ ئەوەی هەر دیاردەیەكی ناشیرین ببینێت بیگەیەنێت بە ئێمە. ئێمەش متمانەی تەواومان لای خەڵك دروستكردووە. بەخۆشحاڵییەوە كۆمەڵانی خەڵك متمانەی تەواویان بە دەزگای ئاسایش هەیەو رۆژانە زانیاریمان دەدەنێ. ئەمەش بابەتێكی گرنگەو ئێمە زۆر سوپاسی هاووڵاتیان دەكەین كە پەرۆشی نیشتمانی خۆیانن. دەتوانم ئەوەش بڵێم پەیوەندیی پتەوی نێوان دەزگای ئاسایش و كۆمەڵانی خەڵك یەكێكە لەهۆكارە سەرەكییەكانی پاراستنی ئارامی و ئاسایش.

*واتە ئاسایش هی هەمووانە و بۆ هەمووانە..
-بەدڵنیاییەوە وایە، لێرەدا دەمەوێت باسی بابەتێكی گرنگ بكەم، بەداخەوە هەندێك لە كەناڵەكانی راگەیاندن تێكەڵاوییەكیان دروستكردووە لەنێوان ئاسایشی ئێمەو دەزگا ئەمنییەكانی وڵاتانی تر، بۆ نموونە بە دەزگای ئەمنیی وڵاتێك دەڵێن؛ ئاسایش، ئەمە وانییە، ئاسایش هەر هی ئێمەیە، ناوی ئاسایش هی هەرێمی كوردستانە و هی كوردە، دەزگای وڵاتانی تر هەریەكەو ناوی خۆیان هەیە، پێویستە بەناوی خۆی، ناویان بهێنرێت، بەڵام ئێرە ئاسایشە، ئاسایش لە خەڵكی نیشتمانپەروەر و وڵاتپارێزو دڵسۆز پێكهاتووە. لە پێشمەرگەی دێرین و رێكخستنی دێرین و كەسوكاری شەهیدو كەسوكاری ئەو خەڵكانەی كە نیشتمانپەروەرن و پەرۆشی خزمەتكردنی وڵاتن، پێكهاتووە. دەزگای ئاسایش لەسەر بنەمای سیاسی پێكنەهێنراوەو لەسەر ئەو بنەمایەش كار ناكات، بەڵكو بەپێی یاسا و لەسەر بنەمای پاراستنی ئارامی و ئاسایشی هەموولایەك، پاراستنی ئارامی و ئاسایشی هەموو خەڵك و چین و توێژو لایەنە سیاسییەكان بەبێ جیاوازی كار دەكات. ئامانجی سەرجەم كارەكانیشمان پاراستنی سەرو ماڵ و ئارامی و ئاسایشی هەموولایەكە. لەچوارچێوەی یاساشدا رێز لەهەموو چالاكی و بیروبۆچوونێك دەگرین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*