ئه‌م كونجه‌ش

هوورا

– له‌گه‌ڵ ڕه‌حمه‌تی كاكه‌ حه‌مه‌ (حه‌مه‌ی مه‌لا كه‌ریم) و ڕه‌حمه‌تی مه‌لا شوكور (شوكور مسته‌فا) دا به‌ ئوتومبیلی من – گه‌شتێكمان كرد – به‌ره‌و بادینان – ته‌نیا بۆ گه‌ڕان و (بای باڵ دان) – هه‌ر له‌ سلێمانی یه‌وه‌ – یا بڵێم له‌ به‌غداوه‌ تا كه‌ركووك – كاكه‌ حه‌مه‌ به‌ ده‌م ڕێگه‌وه‌ -گۆرانی ده‌ووت و گۆرانی یه‌كه‌ش هه‌ر (هۆره‌) بوو- له‌ كه‌ركووك ڕه‌حمه‌تی مه‌لا شوكور ووتی: ئه‌رێ جه‌ناب (ئه‌رێ جه‌ناب شێوه‌ی قسه‌كردنی بوو له‌گه‌ڵ براده‌ران) – ئه‌رێ جه‌ناب نابێ ئاوازه‌كه‌ی بگۆڕی؟ – كاكه‌ حه‌مه‌ فه‌رمووی: ئه‌مه‌ تا ئێره‌ (هۆره‌)ی جافی بوو – ئیتر لێره‌وه‌ ده‌یكه‌م به‌ (هۆره‌)ی هه‌ورامی – نه‌ختێكیش له‌باره‌ی جیاوازییانه‌وه‌ دووا – وه‌ك جاریتر نووسیومه‌: كاكه‌ حه‌مه‌ – دیالێكتی هه‌ورامیی به‌ خوێندنه‌وه‌ و به‌ نووسین باش ده‌زانی – به‌ڵام نه‌یده‌توانی قسه‌ی پێ بكا – ئه‌مه‌ش چونكه‌ – له‌ ماڵه‌وه‌ به‌ شێوه‌ی نزیك سلێمانی قسه‌یان ده‌كرد. با له‌ (بیاره‌) و هه‌ورامانیش بژین – چونكه‌ نه‌ باوكی و نه‌ دایكی هه‌ورامی نه‌بوون.
له‌ چه‌ند كه‌سم پرسیووه‌ – (هۆره‌) – واته‌: ووشه‌كه‌ له‌ كوێوه‌ هاتووه‌؟- هه‌ندێك له‌وانه‌ی هه‌موو تیپێكی (هـ)ی كوردی ده‌به‌نه‌وه‌ سه‌ر (غ) یا (خ) ده‌ڵێن: له‌ (خۆره‌وه‌ هاتووه‌) به‌ڵام من شتێكی سه‌یرم لایه‌ ئه‌ویش ووشه‌ی (هوورا)ی لای ڕووسه‌. چونكه‌ ڕووسه‌كان له‌ خۆپیشانداندا دروشمێكیان ده‌ووته‌وه‌: كابرای درووشمه‌ده‌ر – وه‌ك بڵێین (بژی یه‌كێتیی چینی كرێكار و فه‌للاح) یا وه‌ك ئێستا هه‌مووی كردووه‌ به‌ (جووتیار) – كابرا خۆی یه‌كسه‌ر پاش دروشمه‌كه‌ ده‌ڵێ (هوورا) – ئیتر هه‌موو خۆپیشانده‌ران هاوار ده‌كه‌ن (هوورا) جاروباریش ده‌بێ به‌ (ئوورا).
ئه‌مه‌ له‌ لایه‌كه‌وه‌ هاوارێكه‌ لای دوو نه‌ته‌وه‌ی هیندۆ ئه‌وروپی (واته‌ كورد و ڕووس)ه‌ له‌ لایه‌كیشه‌وه‌ ووشه‌یه‌كه‌ لای دوو نه‌ته‌وه‌ی هیندۆ ئه‌وروپی – تۆ بڵێی سه‌رچاوه‌كه‌یان هه‌ر یه‌ك نه‌بێ – خۆ ئێستا ڕژێمی مۆسكۆ به‌ ده‌ست كۆمۆنیسته‌كانه‌وه‌ نی یه‌ – تا بڵێین له‌به‌رئه‌وه‌ تۆ ده‌ته‌وێ بمانكه‌یت به‌ (خزم) – به‌ڵام هه‌ر خزمین و هه‌ر (هیندۆ ئه‌وروپین) – هه‌ر خوا خۆی ده‌زانێ كام نه‌ته‌وه‌مان كۆنترین. به‌ڵام ئه‌وه‌ ده‌ستی داگیركه‌ر وای كردووه‌ ئه‌وان ده‌وڵه‌تیان هه‌بێ و ئێمه‌ نه‌مانبێ.
(كونجه‌)كه‌م به‌ به‌ری یه‌وه‌ ماوه‌. چونكه‌ هه‌ندێجار ده‌ڵێن: كه‌مت نووسیوه‌، هه‌ندێجار ده‌ڵێن: درێژت كردۆته‌وه‌- خواش نه‌یفه‌رمووه‌ – (كونج) هه‌ر ده‌بێت ئه‌وه‌نده‌ دێڕ بێ. له‌به‌ر ئه‌وه‌ شتێك باس ئه‌كه‌م كه‌ وا بزانم له‌مه‌وبه‌ریش نووسیومه‌.
من هه‌ر ووشه‌ی (فه‌للاح) به‌كارده‌هێنم – زۆریش له‌ سه‌رچاوه‌ عه‌ره‌بی یه‌ كۆنه‌كاندا گه‌ڕام ووشه‌ی (فه‌للاح) یا فرمانی (فلح)م نه‌دۆزیه‌وه‌ تا بڵێم (فلاح) عه‌ره‌بی یه‌. یا ئێستا كوردیش به‌كاری ده‌هێنێ. ئێستا له‌م كوردی یه‌ (ناڕه‌سه‌نه‌)ی ئێستادا كردوویانه‌ به‌ (جووتیار) – له‌لای كورد هه‌ر چه‌شنێ له‌وانه‌ی به‌ (كشت و كاڵ)ه‌وه‌ خه‌ریكن ناوێكیان هه‌یه‌. ئه‌وه‌ (جووتیار)ه‌ به‌و كه‌سه‌ ده‌ووترێت كه‌ جووت ده‌كات، واته‌ زه‌وی ده‌كێڵێ – ئیتر جاران به‌ گاسن و ئێستا به‌ (تراكتور) – هه‌روه‌ها (سه‌پان)مان هه‌یه‌ – كه‌ ئیشی ئه‌ویش دیاره‌. ووشه‌ی (وه‌رزێر)مان هه‌یه‌، ئیشی ئه‌ویش دیاره‌ – با ووشه‌ی (ئاودێریش) بچێته‌ ڕیز. هه‌موومان – له‌ بنه‌چه‌دا لادێین – چونكه‌ سلێمانی شارێكی تازه‌یه‌ – به‌ڵام من خۆم و باوك و باپیرم خه‌ڵكی شارین و له‌ بنه‌چه‌وه‌ له‌ گوندی (دێلێژه‌)ی پیرۆزی قه‌ره‌داخه‌وه‌ هاتووین. ئه‌مانه‌ بۆچوونی منن. تكایه‌ هه‌ر كه‌س بۆچوونی جیایه‌ – بۆم بنووسێ – به‌ڵام به‌ نه‌رمی، تاقه‌تی (شه‌ڕه‌قسه‌)م نه‌ماوه‌. هه‌ربژین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شەیتان

دیسان نازانم – (كونجە) یا یاداشت – بەڵام هەر دەینووسم ...