سەرەکی » ئەدەب - سێبەر و سایە » داهات و ژوورێكی تایبه‌ت بۆ نووسه‌ری ژن

دیدارێكی بڵاونه‌كراوه‌ی ڤێرجینیا ۆۆڵف

داهات و ژوورێكی تایبه‌ت بۆ نووسه‌ری ژن

چه‌ند رۆژێك پێش ساڵڕۆژی دوا كۆچی ڤێرجینیا ۆۆڵف، نووسه‌ری ناوداری به‌ریتانیایی. به‌و بۆنه‌یه‌وه‌ دیدارێكی ۆۆڵفم له‌ ئه‌رشیفی گۆڤاره‌ فه‌ره‌نسییه‌كاندا دۆزییه‌وه‌ كه‌ زۆر گرنگه‌. پێش ئه‌وه‌ی بێمه‌ سه‌ر دیداره‌كه‌ كورته‌یه‌كم سه‌باره‌ت به‌ ژیانی ۆۆڵف نووسیوه‌ بۆ ئه‌وه‌ی زیاتر به‌خۆی و به‌رهه‌مه‌كانی ئاشنا بین. ڤێرجینیا ۆۆڵف به‌ یه‌كێك له‌ نووسه‌ره‌ گه‌وره‌كانی سه‌ده‌ی بیست ناوده‌برێت كه‌ پره‌نسیپه‌ باوه‌كانی رۆماننووسینی سه‌رده‌می خۆی به‌زاند و له‌ به‌رامبه‌ر هه‌موو ئه‌و كۆت و پێوه‌ندانه‌دا وه‌ستایه‌وه‌ كه‌ به‌سه‌ر ژنانی ئه‌و رۆژگاره‌دا سه‌پاندبوویانن.

نازنین عرب

لە فارسییەوە: محەمەد کەریم

1-2

ژیاننامه‌ و به‌رهه‌مه‌كانی ۆۆڵف
ڤێرجینیا ۆۆڵف (25-1-1882) له‌ (كینسینگتۆنی له‌نده‌ن) له‌ خێزانێكی خوێنده‌وار و ئه‌كادیمی چاوی به‌ جیهان هه‌ڵهێناوه‌. هه‌ر به‌ مناڵی له‌ كتێبخانه‌كه‌ی ماڵی خۆیانه‌وه‌ ده‌ستی به‌ خوێندنه‌وه‌ی چیرۆك و رۆمان كردووه‌. مردنی له‌ناكاوی دایكی و پاشانیش مردنی باوكی له‌ ساڵی (1904)دا خستییه‌ ناو قۆناغێكی دوور و درێژ و سه‌ختی ناخۆشیی و په‌رێشانییه‌وه‌. ساڵه‌ها دوای ئه‌وه‌ له‌گه‌ڵ خوشك و براكه‌یدا، یانه‌یه‌كیان بۆ یه‌كتربینینی رۆشنبیرانی گه‌نج دامه‌زراند كه‌ پاشان به‌ گروپی (بلۆمسبوری-Bloomsbury) ناوی ده‌ركرد. له‌ ساڵی (1912) شوویكرد به‌ یه‌كێك له‌ ئه‌ندامانی ئه‌م گروپه‌ به‌ ناوی (لیۆنارد ۆۆڵف). یه‌كه‌م رۆمانی به‌ ناوی (گه‌شتی ده‌ره‌وه‌-The Voyage Out) ساڵی (1915) بڵاوكرده‌وه‌ كه‌ نزیكه‌ له‌ ژیاننامه‌ی خۆیه‌وه‌ و له‌ ژیاننامه‌ی خۆی ده‌چێت. دوو ساڵ پاش ئه‌وه‌ له‌ ساڵی (1917) دوای دامه‌زراندنی چاپه‌مه‌نی (هۆگارس-Hogarth) له‌گه‌ڵ مێرده‌كه‌یدا بوو به‌ نووسه‌رێكی سه‌ربه‌خۆ كه‌ پێویستی به‌ وه‌رگرتنی ره‌زامه‌ندنی خاوه‌ن چاپخانه‌كان نه‌بوو. له‌وه‌ به‌ دواوه‌ هه‌موو نووسینه‌كانی له‌ چاپه‌مه‌نییه‌كه‌ی خۆیدا بڵاوده‌كرده‌وه‌ و ئیتر هه‌رگیز له‌ نووسین نه‌وه‌ستا. رۆمانی (شه‌و و رۆژ)ی له‌ (1919) و رۆمانی (ژووره‌كه‌ی جاكوب) ی له‌ ساڵی (1922)دا بڵاوكرده‌وه‌ و دواجاریش شاكاره‌كه‌ی به‌ ناوی (خاتوو داله‌وه‌ی) له‌ ساڵی (1925)دا بڵاوكرده‌وه‌ كه‌ سه‌ركه‌وتنێكی گه‌وره‌ی به‌ده‌ستهێنا.
ۆۆڵف له‌ به‌رهه‌مه‌كانیدا باسی سه‌ختییه‌كانی ژیان و ئازاره‌ ده‌روونیی و زۆر تایبه‌ته‌كانی مرۆڤ ده‌كات، به‌بێ ئه‌وه‌ی بنه‌ما بزوێنه‌ره‌ عاشقانه‌كانی ئه‌ده‌بی كلاسیكی به‌كاربهێنێـت. له‌ ساڵی (1927)دا یه‌كێك له‌ شاكاره‌كانی خۆی به‌ ناوی (به‌ره‌و فانۆسی ده‌ریایی) به‌ چاپ گه‌یاند، كه‌ ده‌توانرێت به‌ ژیاننامه‌ یان (ئۆتۆبایۆگرافی) خۆی له‌ قه‌ڵه‌م بدرێت، چونكه‌ تیایدا باسی دایك و باوكی و مناڵیی خۆی ده‌كات. ۆۆڵف مامۆستای به‌كارهێنانی شێوازی گێڕانه‌وه‌ی (مه‌نه‌لۆگ) بوو، به‌بێ ره‌چاوكردنی به‌ دوای یه‌كداهاتنی كات ده‌ینووسی. له‌ هه‌مانساڵدا خه‌ریكی نووسینی دوو رۆمانی زۆر گرنگی خۆی بوو، (ئۆرلاندۆ) له‌ ساڵی (1928) و (شه‌پۆله‌كان) له‌ ساڵی (1931)دا چاپكران. وێڕای ئه‌وه‌ش له‌ هه‌مانساڵدا چه‌ندین وتاری له‌ بواری فیمینیزمدا نووسی. له‌وانه‌ش كتێبی (ژوورێكی تایبه‌ت به‌ خۆت) له‌ ساڵی (1929)دا و (سێ گێنی-Three Guineas) له‌ ساڵی (1938)دا. دوای ته‌واوكردنی دوا رۆمانی خۆی به‌ناوی (له‌ نێوان په‌رده‌كاندا) چه‌ندین جار تووشی په‌رێشانی بوو، تا له‌ ساڵی (1941)دا له‌ لووتكه‌ی په‌رێشانیدا كۆتایی به‌ ژیانی خۆی هێنا.
ۆۆڵف نووسه‌رێكی بلیمه‌ت و ره‌خنه‌گر و ئه‌دیتۆرێكی به‌ توانا بوو كه‌ له‌ نووسیندا شێوازێكی داهێنه‌رانه‌ و پێشڕه‌وانه‌ی هه‌بوو. به‌هۆی ئه‌زموونی په‌رێشانیی و توانایه‌وه‌ له‌ نووسیندا، ببوو به‌ مامۆستای نووسنی رۆمانی ده‌روونناسیی. ژیانی تایبه‌تی وه‌كو ژنێكی ئازادیخواز هێشتا مایه‌ی ئیلهامی جووڵانه‌وه‌ی فیمینیستییه‌ له‌ دنیادا. به‌ پێچه‌وانه‌ی ئه‌وه‌وه‌ كه‌ له‌م دیداره‌دا پیشانی داوه‌، به‌ درێژایی ژیانی وه‌كو ژنێكی غه‌مبار وه‌سف كراوه‌ كه‌ هه‌میشه‌ مه‌یلی خۆكوشتن هاوڕێی بووه‌، له‌وانه‌یه‌ بتوانرێت ئه‌م دوو سیفه‌ته‌ی به‌ قۆناغی مناڵییه‌وه‌ گرێ بدرێته‌وه‌. مناڵییه‌ك كه‌ پڕه‌ له‌ یاده‌وه‌ریی تاڵ و هه‌ڵكردن له‌گه‌ڵ ئازاره‌كانی زڕ براكه‌ی و مردنی دایكی، كه‌ قۆناغێك بوو تیایدا بێتاقه‌تی و په‌رێشانیی گه‌یشته‌ لووتكه‌. ئه‌وه‌ی كه‌ وایده‌كرد به‌رگه‌ی ئه‌و هه‌موو ئازار و ناخۆشییه‌ بگرێت خه‌ونێك بوو له‌ كه‌لله‌یدا بوو ئه‌ویش ئه‌و خه‌ونه‌ بوو كه‌ ببێت به‌ نووسه‌ر.
ۆۆڵف به‌ نووسینی یاداشتی رۆژانه‌ی ده‌ستی به‌ نووسین كرد كه‌ پاش ساڵانێكی زۆر به‌ هه‌شت به‌رگ له‌ ساڵانی 1981 بۆ 1990 چاپكران. به‌ڵام یه‌كه‌م رۆمانی دوای مردنی باوكی ده‌ستپێكرد، ئه‌و رۆمانه‌ی نووسینی ده‌ ساڵ درێژه‌ی كێشا. ۆۆڵف ته‌قریبه‌ن به‌ درێژایی ژیانی گیرۆده‌ی په‌رێشانیی و شپرزه‌یی بوو تا سه‌ره‌نجام له‌ دوا پیاسه‌ی ژیانیدا گیرفانه‌كانی پڕ كرد له‌به‌رد و خۆیكرد به‌ رووباری (ئۆس- Ouse) دا و به‌و شێوه‌یه‌ كۆتایی به‌ ژیانی خۆی هێنا.
ڤێرجینیا ۆۆڵف كه‌ ساڵه‌های ساڵ به‌ هۆی ئه‌وه‌وه‌ كه‌ بڕوانامه‌ی زانكۆی نه‌بوو سه‌رزه‌نشتی خۆی ده‌كرد، له‌ ساڵی (1929)دا له‌ كتێبی (ژوورێكی تایبه‌ت به‌خۆت)، كه‌ هه‌تا ئه‌مڕۆش مایه‌ی سه‌رنجه‌، به‌ گه‌رم و گووڕییه‌وه‌ داكۆكی له‌ ئازادی بیركردنه‌وه‌ی ژنان ده‌كات. «ژنان هه‌میشه‌ به‌ هه‌ژاری ماونه‌ته‌وه‌ و ئه‌مه‌ش ته‌نیا كێشه‌ی دوو سه‌د ساڵی رابردوو نییه‌، به‌ڵكو له‌ سه‌ره‌تای مێژووه‌وه‌ وابووه‌. ژنان هه‌میشه‌ ئه‌وه‌نده‌ ئازادیی بیركردنه‌وه‌یان هه‌بووه‌ كه‌ كۆیله‌كانی ئه‌سینا هه‌یانبووه‌، هه‌رگیز ئه‌و بواره‌یان نه‌بووه‌ شیعر بڵێن یان بنووسن، رێك له‌به‌رئه‌وه‌یه‌ كه‌ من جه‌خت له‌ سه‌ربه‌خۆیی دارایی ژن و ژوورێكی تایبه‌ت به‌ خۆی ده‌كه‌مه‌وه‌.»
نووسین بۆ ژن وه‌كو قه‌ڵایه‌ك وابوو كه‌ له‌ به‌رامبه‌ر ئازاره‌كانی ژیانیدا پارێزگاریی لێده‌كرد. «ئه‌گه‌ر هیچ كاتێ به‌ قووڵی رووبه‌ڕووی حاڵه‌تی ده‌روونیی نه‌بوومایه‌ته‌وه‌ و په‌رێشان و ئازار چه‌شتوو نه‌بوومایه‌ (…) منیش ده‌ستبه‌رداری خۆم ده‌بووم و ده‌بوومه‌ ژنێكی گوێڕایه‌ڵ و ملكه‌چ. شتێك له‌ ناخمایه‌ كه‌ ناچارم ده‌كات رووبه‌ڕوو ببمه‌وه‌ و بجه‌نگم.» (11-10-1929 ده‌فته‌رچه‌ی بیره‌وه‌رییه‌كان.)
ۆۆڵف له‌ قورسترین ساته‌كانی ژیانیدا، ئه‌و توانا سه‌رسوڕهێنه‌ره‌ی هه‌بوو كه‌ ئازاره‌ ده‌روونییه‌كانی به‌ داهێنانی چیرۆك و رۆمانه‌وه‌ گرێ بدات، توانایه‌كی وه‌های هه‌بوو كه‌ لای نووسه‌رانێكی ده‌گمه‌ن به‌دیده‌كرێت. له‌ ساڵی (1930)دا دیسانه‌وه‌ مردن گه‌مارۆی ده‌دات و یه‌ك له‌ دوای یه‌ك هاوڕێكانی له‌ ده‌ستده‌دات، به‌ڵام له‌گه‌ڵ ئه‌وه‌شدا هه‌رگیز روانگه‌ی مردن ئازاری نه‌ده‌دا، به‌ڵكو ترس له‌وه‌ی نه‌توانێت به‌رهه‌مه‌كانی ته‌واو بكات ده‌یتۆقاند. پاش ئه‌وه‌بوو كه‌ بڕیاریدا به‌بێ ئه‌وه‌ی گوێ به‌ ده‌ستخۆشیی و ره‌خنه‌ لێگرتن بدات بنووسێت. « …. یه‌عنی له‌ په‌نا و گۆشه‌یه‌كی ئارامدا بژی به‌دوور له‌ غافگڵیریی، سه‌رئێشه‌، ئازار، دوور له‌ مه‌ودای تیری كه‌وان، پێویستت به‌ هیچ نه‌بێت نه‌ پێویستت به‌ ماستاوكردن بێت، نه‌ به‌وه‌ی باسی سه‌ركه‌وتنت بكه‌ن، ناچار نه‌بیت هه‌موو داوه‌تێ قبووڵ بكه‌یت و ئه‌و ده‌ستخۆشیی و هاندانانه‌ی له‌ كه‌سانی دی ده‌كه‌ن به‌لاته‌وه‌ هێنده‌ی نووكه‌ ده‌رزییه‌ك بایه‌خی نه‌بێت.» له‌وه‌ به‌ دواوه‌ ئه‌وه‌ی به‌لای ۆۆڵفه‌وه‌ گرنگ بوو خوێنه‌رانی به‌رهه‌مه‌كانی بوون. ڤێرجینیا ده‌یه‌ویست خۆی بێت، خۆی به‌بێ هیچ كۆت و پێوه‌ندێك.
دیدار له‌گه‌ڵ ڤێرجینیا ۆۆڵف
ئه‌وه‌ی لێره‌دا ده‌یخوێنینه‌وه‌ دیدارێكه‌ له‌گه‌ڵ ڤێرجینیا ۆۆڵفدا كه‌ گۆڤاری (كه‌مبات-Combat) (4) له‌ ساڵی (1930) و پاشانیش له‌ كتێبی (ژوورێكی تایبه‌ت به‌ خۆت)دا بڵاوبۆته‌وه‌.

كه‌مبات: سوپاست ده‌كه‌ین ڤێرجینیا كه‌ ئه‌م دیداره‌ت قبووڵكرد، هه‌روه‌ها زۆر خۆشحاڵین ئه‌وه‌ی له‌ دڵتایه‌…
ڤێرجینیا: پێم وایه‌ خۆ راهێنان له‌سه‌ر ئه‌م قسانه‌ زۆر گران نه‌بێت. (پێده‌كه‌نێت).

كه‌مبات: بنه‌مای وتار یان كتێبی (ژوورێكی تایبه‌ت به‌ خۆت) كۆنفرانسێك بوو كه‌ تۆ به‌شداریت تێدا كرد. كۆنفرانسێك كه‌ ناونیشانێكی گه‌وره‌ی هه‌ڵگرتبوو (ژن و رۆمان) به‌ڵام تۆ به‌ لای ئه‌و بابه‌ته‌ گه‌وره‌یه‌دا گوزه‌ر ده‌كه‌یت و باسی ناكه‌یت.
ڤێرجینیا: به‌ڵێ رێك وایه‌، به‌ڵام من كه‌سێك نیم كه‌ ده‌ستبه‌رداری شتێك بم: من هه‌وڵ ده‌ده‌م وه‌ڵامێك بدۆزمه‌وه‌. ئایا باشتر وابوو بچم به‌ لای ستایش و ئافه‌رینی ئه‌ده‌بیاتی ساكسۆنه‌كاندا؟ یان بۆ نموونه‌ وه‌كو مامۆستا قسه‌م له‌سه‌ر پێگه‌ی ژن بكردایه‌ له‌ رۆماندا؟ له‌ جیاتی ئه‌وه‌ قووڵ ده‌بمه‌وه‌، گومان ده‌كه‌م، من پێم باشه‌ له‌ توانای دارایی ژنان بكۆڵمه‌وه‌ بۆ ئه‌وه‌ی بتوانن بنووسن.

كه‌مبات: دیاره‌ له‌ كۆتایی ئه‌م كتێبه‌دا وه‌ڵامی ئه‌و پرسیارانه‌ش ده‌ده‌یته‌وه‌، به‌ڵام هه‌زاران پرسیاری تریش هه‌ن كه‌ تۆ ئه‌سڵه‌ن به‌لایاندا نه‌چوویت و وه‌ڵامت نه‌داونه‌ته‌وه‌.
ڤێرجینیا: ناتوانم ئه‌وه‌ ره‌ت بكه‌مه‌وه‌ و بڵێم قسه‌كانی تۆ رێی تێناچێت! (پێده‌كه‌نێ)

كه‌مبات: ئه‌وه‌ی ته‌نیا له‌ یه‌ك لایه‌نه‌وه‌ سه‌یری ئه‌م بابه‌ته‌ت كردبێت ئه‌ویش له‌ وتارێكی وه‌ها به‌رداردا به‌ شێوه‌یه‌كی سه‌یر كارم تێده‌كات. (له‌م وتاره‌دا) یان راستتر (له‌م كتێبه‌دا) له‌ په‌راوێزه‌ مێژووییه‌كاندا ده‌گه‌ینه‌ گێڕانه‌وه‌ی شاعیرانه‌، هیچ لاپه‌ڕه‌یه‌ك له‌م كتێبه‌ بۆن و به‌رامه‌ی نووسینه‌كانی پێشووی تۆی لێ نایه‌ت. خوێنه‌ر یه‌كسه‌ر تووشی سه‌رسوڕمان ده‌بێت.
ڤێرجینیا: له‌م بابه‌ته‌دا من خۆم به‌ كه‌مته‌رخه‌م ده‌زانم. له‌ڕاستیدا من له‌ ئه‌نجامه‌وه‌ خوێنه‌ر ده‌به‌مه‌ ناو مه‌سه‌له‌كه‌وه‌ نه‌ك له‌ (پێشه‌كییه‌وه‌). خوێنه‌ری جدی بۆ ئه‌وه‌ی چێژ له‌ نووسینی من ببینێت به‌لای كه‌مه‌وه‌ ده‌بێت له‌ په‌یامی سه‌ره‌كی من تێبگات: یه‌ك ژووری تایبه‌ت و داهات یان ده‌رامه‌ت! ئه‌مه‌ ئه‌و شته‌یه‌ كه‌ ئێمه‌ی ژنان پێویستمان پێیه‌تی! له‌ڕاستیدا ناونیشانی كتێبه‌كه‌م به‌ جۆرێك داوای یه‌كسانیی و دادپه‌روه‌رییه‌.

كه‌مبات: خۆت چۆن ئه‌مه‌ روون ده‌كه‌یته‌وه‌؟ ده‌زانین زۆربه‌ی نووسه‌ران (له‌گه‌ڵ هه‌ژاریدا راهاتن) له‌ هه‌ژاری و سه‌رگه‌ردانیدا مانه‌وه‌.
ڤێرجینیا: تۆ ناچارم ده‌كه‌یت له‌ دژت بوه‌ستمه‌وه‌! (پێده‌كه‌نێ) (به‌لای مرۆڤه‌ گه‌وره‌كانه‌وه‌ هه‌ژاریی ته‌نیا مه‌سه‌له‌یه‌كی كاتییه‌: هۆشیاری ئێمه‌ش له‌ هاوكاریی و یارمه‌تیدایه‌. زانایان هه‌رگیز رێگا ناده‌ن چرای داگیرساوی رۆشنگه‌ریی بكوژێته‌وه‌، چونكه‌ خۆیان له‌ هه‌موو كه‌سێك زیاتر بۆ ئاشكراكردنی ده‌سه‌ڵاتی زانستیی خۆیان پێویستیان به‌ رۆشناییه‌، ده‌وڵه‌مه‌ندبوون یه‌كسان نییه‌ به‌ به‌هره‌مه‌ندبوون. به‌لای منه‌وه‌ شاعیری به‌دبه‌خت و بێ پول و پاره‌ حكومدانێكی كوێرانه‌یه‌ (ئه‌سڵه‌ن شتی وا نییه‌). هه‌رچه‌نده‌ پێگه‌ی مرۆڤه‌كان به‌رزتر بێت ده‌بێت به‌شداریییه‌كی زیاتر بكه‌ن. فه‌رامۆشكردنی مرۆڤه‌كان له‌لایه‌ن یه‌كترییه‌وه‌ له‌ تۆمه‌تباركردن ناخۆشتره‌.

كه‌مبات: وادیاره‌ ئه‌فسانه‌ی عاشقانه‌ی هونه‌رمه‌ندی بێكار، هه‌روه‌كو چۆن (تۆماس چاتتیرتۆن) وابووه‌. قورسایی خۆی (له‌ دیدگای تۆ)دا پاراستووه‌. بێبه‌شانی راسته‌قینه‌ كه‌سانێكن كه‌ قه‌ت نه‌ناسێنراون. به‌ڵام من دووباره‌ ده‌گه‌ڕێمه‌وه‌ سه‌ر ئه‌و خاڵه‌ی كه‌…
ڤێرجینیا: تۆ باسی مه‌ته‌ڵم بۆ ده‌كه‌ی یان مه‌ته‌ڵم لێداده‌هێنی؟ (پێده‌كه‌نێ)

كه‌مبات: تۆ لافی ئه‌وه‌ لێده‌ده‌یت «ئه‌وه‌ی لای مرۆڤ هێشتا كه‌مه‌، ده‌سه‌ڵات و توانای پێشنیازه‌». له‌وه‌ تێبگه‌ له‌ به‌رامبه‌ر لاف لێدانێكی ئاوادا من داكۆكی له‌ هاوره‌گه‌زه‌كانی خۆم ده‌كه‌م! به‌م پێیه‌ ژووری تایبه‌ت و پاره‌…
ڤێرجینیا: به‌بێ داهاتێكی جێگیر و به‌بێ خه‌ڵوه‌تێك بۆ خۆی، مرۆڤ نه‌ ده‌توانی رابكات و نه‌ده‌توانێت بمێنێته‌وه‌: له‌ هه‌لومه‌رجێكی ئاوادا (به‌بێ ده‌رامه‌تێكی جێگیر و جێگایه‌كی تایبه‌ت) ئه‌سڵه‌ن كاری كرده‌ نییه‌، بتوانین ته‌ركیز له‌سه‌ر به‌رهه‌مه‌كه‌ی خۆمان بكه‌ین، ئه‌مه‌ وه‌كو راهێنانێك وایه‌ ته‌نیا لای بێكاران چێژی هه‌یه‌. نووسین پێویستی به‌ ته‌ركیزێكی قووڵ و تێر و ته‌سه‌له‌، له‌ هه‌لومه‌رجێكی ئاوادا، وه‌ك ئه‌وه‌ وایه‌ ته‌نیا گوێمان له‌ موسیقایه‌كی هاوڕیتم بێت. له‌ حاڵێكی ئاوادا، ته‌نیا له‌ سه‌ده‌ی هه‌ژده‌دا زۆر له‌ ژنانی ئینگلیز له‌ خێزانه‌ بورجوازه‌كان، روو له‌ ژیانی رۆشنبیریی و ئه‌ده‌بی ده‌كه‌ن و له‌م رێگایه‌شدا رووبه‌ڕووی گه‌لێ كۆسپ و ته‌گه‌ره‌ ده‌بنه‌وه‌. (ژنانی ئه‌و قۆناغه‌) له‌ كاتێكدا له‌ چالاكی پیشه‌یی له‌ كۆمه‌ڵگادا ده‌خرێنه‌ كه‌ناره‌وه‌، ده‌بنه‌ دایكانێك له‌ خزمه‌تی ماڵ و خێزان و وێنه‌ی كۆمه‌ڵایه‌تی مێرده‌كانیاندا، ته‌نیا هاتوچۆی ناوه‌نده‌كانی كڕین یان بازاڕه‌كان ده‌كه‌ن و خۆیان گوێ له‌ قسه‌كانی خۆیان ده‌گرن و تێگه‌یشتنیان سه‌باره‌ت به‌ دنیای ده‌ره‌وه‌ی خۆیان زۆر ساده‌ و رووكه‌شه‌. به‌كورتی با بڵێم ئه‌وانه‌ نه‌ شتێك له‌ ئارامیی ده‌زانن و نه‌ له‌ پووچی ناوه‌نده‌كانی كڕین یان بازاڕ شتێ حاڵی ده‌بن. ته‌قریبه‌ن یه‌ك سه‌ده‌ پاش به‌ ره‌سمی ناساندنی نووسه‌ریی وه‌كو پیشه‌، سه‌ده‌یه‌ك پاش (ئه‌فرا بین-Aphra Behn)، ئه‌ده‌بیاتی ئینگلیز هێشتا قۆرغكراوه‌ بۆ پیاوان. ژنان ته‌نیا رۆمانی خراپ ده‌نووسن، به‌ڵام له‌گه‌ڵ ئه‌وه‌شدا ورده‌ ورده‌ خه‌ریكه‌ پێش ده‌كه‌ون.

سه‌رچاوه‌: tasskhir.blog.ir

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

گورگێك له‌ فنجانه‌كه‌مدایه‌!

کەژاڵ ئەحمەد قاوه‌مان خوارده‌وه‌، دوو رێبوار و دوو خه‌ونی جیاواز ...