سەرەکی » راپۆرت » وەزارەتی خوێندنی باڵا متمانەی نێودەوڵـەتی بۆ زانكـۆكانی كـوردستان بەدەستـدەهێنێت״

وەفدێكی وەزارەتی خوێندنی باڵا سەردانی ئەڵمانیای كرد״

وەزارەتی خوێندنی باڵا متمانەی نێودەوڵـەتی بۆ زانكـۆكانی كـوردستان بەدەستـدەهێنێت״

بەمەبەستی بەشداریكردن لەكۆنفرانسی (GOING GLOBAL 2019) واتە رۆیشتن بەرەو بە جیهانیبوون، لە وڵاتی ئەڵمانیاو كۆبوونەوە لەگەڵ دامەزراوەی دادی ئەڵمانیاو ئیمزاكردنی رێكەوتنێكی سەرەتایی لەگەڵ دامەزراوەی زێڤای ئەڵمانی بۆ متمانەبەخشین بە زانكۆكانی هەرێمی كوردستان، وەفدێكی باڵای وەزارەتی خویندنی باڵاو توێژینەوەی زانستی بەسەرۆكایەتیی د.یوسف گۆران وەزیری خوێندنی باڵاو توێژینەوەی زانستی، د.ئامانج عەبدوڵڵا سەعید راوێژكاری وەزیری خوێندنی باڵا، د.پۆڵا خانەقا سەرۆكی دەستەی كوردستانی بۆ دراساتی ستراتیجی و توێژینەوەی زانستی، د.خەتاب ئەحمەد شێخانی بەڕێوەبەری گشتیی كارگێڕی و دارایی و د.جوان جەلال شەریف بەڕێوەبەری گشتیی نێردراوان و پەیوەندییە رۆشنبیرییەكان، لەڕۆژانی ١٣و١٤و١٥و١٦ی ٥/٢٠١٩، سەردانی وڵاتی ئەڵمانیای كرد.

وەفدی وەزارەتی خوێندنی باڵا بەشداری لە كۆنفرانسی(GOING GLOBAL 2019) لە ئەڵمانیا دەكات
بەمەبەستی بەشداریكردن لەكۆنفرانسی (GOING GLOBAL 2019) واتە رۆیشتن بەرەو بە جیهانیبوون، لە وڵاتی ئەڵمانیا رۆژی دوشەممە ١٣/٥/٢٠١٩، وەفدی وەزارەت، بەسەرۆكایەتیی د.یوسف گۆران وەزیری خوێندنی باڵا و توێژینەوەی زانستی بەشدارییان لە كارەكانی كۆنفرانسەكە كرد.
ئامانج لەم كۆنفرانسە كە بۆ ماوەی سێ رۆژ بەردەوام بوو، بریتیبوو لە كۆبوونەوەی سەرجەم سەركردەكانی خوێندنی باڵا لەسەرتاسەری دنیا بۆ گفتوگۆكردن دەربارەی ئەو ئاڵنگاری و پێشهاتانەی روبەڕوی پڕۆسەی خوێندن و خوێندنی باڵا لە سەرتاسەری دنیا دەبێتەوە، بۆ ئەوەی هەموو وڵاتانی دنیا بەشداربن لەو گفتوگۆیانەی كە تایبەتن بۆ خۆئامادەكردن بەمەبەستی روبەڕوبوونەوەی ئەم پێشهاتانە، كە بەشێكی زۆری ئەم ئاڵنگاریانە رەهەندی نێودەوڵەتییان هەیەو پێویستی بە بەشداری هەموو كۆمەڵگە هەیە بۆ چارەسەركردن. بەتایبەت كە ژمارەیەكی زۆر لە وەزیرانی خوێندنی باڵا لە وڵاتانی جیاجیاوە ئامادەیبوون.
گرنگیی بەشداری وفدی هەرێمی كوردستان و وەزارەتی خوێندنی باڵاو توێژینەوەی زانستیش لە كۆنفرانسەكە، خستنەڕوو و هاوبەشكردنی تێڕوانین و ئەزموونی هەرێمی كوردستان بوو لەگەڵ دیدو تێڕوانینی جیهانی، هەروەها سوود وەرگرتن لە سەرنج و تێبینی سەركردەكانی ئەكادیمی وڵاتان و بەشداربوون لە پێشكەشكردنی تێبینییەكانیان دەربارەی خۆئامادەكردن بۆ ئەو گۆڕانكارییانەی لەئایندە دێنە پێشەوە، بەواتایەكی تر بەشداریپێكردنی ئەزموونی كوردستان و سوود وەرگرتن لە ئەزموونی وڵاتان، ئامانجی سەرەكی بەشداری وەفدی هەرێمی كوردستان بوو.
هەر لە پەراوێزی بەڕێوەچوونی كارەكانی كۆنفرانسی (GOING GLOBAL 2019) چەندین دیدارو چاوپێكەوتن و گفتوگۆ و ئاڵوگۆڕی بیروڕا لەگەڵ ژمارەیەك لە سەركردەكانی خوێندنی باڵا و زانكۆكانی جیهان ئەنجامدرا.

وەزیری خوێندنی باڵا لەگەڵ سەرۆكی دامەزراوەی دادی ئەڵمانی كۆبۆوە
هەر لە پەراوێزی سەردانی وەفدی وەزارەتی خوێندنی باڵا و توێژینەوەی زانستی بۆ ئەڵمانیا، رۆژی چوارشەممە ١٥/٥/٢٠١٩، د.یوسف گۆران وەزیری خوێندنی باڵاو توێژینەوەی زانستی و ستافی وەزارەت، لەگەڵ (دۆرۆپیا رولاند) سەرۆكی دامەزراوەی دادی ئەڵمانی كۆبوونەوە.
لە كۆبوونەوەكەدا گفتوگۆ لەبارەی بەهێزكردن و توندوتۆڵكردنی پەیوەندییەكان و هەماهەنگیكردن لەنێوان هەرێمی كوردستان و زانكۆكانی ئەڵمانیا كرا، هەروەك پرۆژەی دامەزراندنی زانكۆیەكی ئەڵمانی-كوردستانی، لە هەرێمی كوردستان تاوتوێكرا، بۆ ئەمەش سەرۆك و ئەندامانی دامەزراوەی دادی ئەڵمانی پشتگیریی و پشتیوانیی خۆیان بۆ ئەم پڕۆژەیە لە هەرێمی كوردستان نیشانداو داوایان لە وەزارەت كرد لەگەڵ زانكۆكانی ئەڵمانیا پێكەوە پڕۆژەی هاوبەش پێشكەش بكەن بۆ ئەوەی سوود لەو گرانتانە وەربگرن كە لەڕێگەی دادی ئەڵمانی دەستەبەردەبێت.
لەلایەن خۆشیەوە وەزیری خوێندنی باڵا و توێژینەوەی زانستی، سوپاسی پشتیوانی و پشتگیرییەكانی دامەزراوەی دادی ئەڵمانی كردو هەموو پشتیوانیەكی بۆ سەرخستنی كارەكان و بەهێزكردنی پەیوەندییەكان لەگشت ئاستەكان بەتایبەت سوود وەرگرتن لە گرانتەكانی دامەزراوەی داد دەربڕی.

بۆ متمانەبەخشین بە زانكۆكانی كوردستان، وەزارەتی خوێندنی باڵاو رێكخراوی زێڤای ئەڵمانی رێكەوتنامەیەكیان ئیمزاكرد
رۆژی پێنجشەمە ١٦/٥/٢٠١٩، وەفدی وەزارەتی خوێندنی باڵاو توێژینەوەی زانستی بەسەرپەرشتی د.یوسف گۆران وەزیری خوێندنی باڵاو توێژینەوەی زانستی لەگەڵ (peter san jürgen) جێگری سەرۆكی رێكخراوی زێڤای ئەڵمانی و (Prof Dr.werner Stueber) راوێژكاری خوێندنی باڵا لە دامەزراوەی زێڤای ئەڵمانی و (Didar Dawdi) بەڕێوەبەری كاروباری پەیوەندییە نێودەوڵەتییەكانی دامەزراوەی زێڤا كۆبۆوە.
لە دەرەنجامی كۆبوونەوەكەدا رێكەوتنێكی هاوبەش لەنێوان وەزارەت و دامەزراوەی زێڤای ئەڵمانی ئیمزاكرا بۆ ئەوەی بتوانین دەزگایەكی تایبەت بە متمانەبەخشینی كوردستان دروستبكەین و راهێنان بە مامۆستاكانمان بكەین و متمانە بەخشین بۆ زانكۆكانمان بەدەستبهێنین، بەپێی رێكەوتنەكە ١/٧/٢٠١٩، دەستنیشانكراوە بۆ دەستپێكردنی كارەكانی بۆردی نیشتمانیی متمانەبەخشین، لە قۆناغی یەكەمدا ژمارەیەك لە زانكۆكان دەچنە نێو پرۆسەكەو دواتریش لە ساڵانی ئایندە سەرجەم زانكۆكانی تر دەچنە نێو پرۆسەكەوە.
جێبەجێكردنی پڕۆژەی دامەزراندنی بۆردی نیشتمانیی متمانەبەخشین بەهەماهەنگی لەگەڵ (دەزگای ناوەندیی هەڵسەنگاندن و متمانەبەخشینی) ئەڵمانی ناسراو بە زێڤا دەبێت. دەبێتە دامەزراوەیەكی نیشتمانیی سەربەخۆ، كار دەكات بۆ داڕشتنەوەی چوارچێوەی گشتیی پڕۆسەی دڵنیایی جۆری لە دامودەزگاكانی خوێندنی باڵا لە هەرێمی كوردستان و ئامادەكردنیان بۆ بەدەستهێنانی متمانەی نێودەوڵەتی، ئەم بۆردە بەهەماهەنگی و بەسەرپەرشتی راستەوخۆی دامەزراوەی زێڤا كاردەكات بۆ ئەوەی هەموو پڕۆگرامەكانی خوێندن لە هەموو زانكۆكانی كوردستان بتوانن متمانەی نێودەوڵەتی بەدەستبهێنن و بەتەواوەتی بچنە چوارچێوەی ستانداردە جیهانییەكانەوە. بۆ سەركەوتنی ئەم پڕۆژەیەش دامەزراوەی زێڤا لەڕێگای تیمی نێودەوڵەتییەوە راستەوخۆ سەرپەرشتی پڕۆسەكە دەكات.
لەلایەن خۆشیانەوە هەریەكە لە (peter san jürgen) جێگری سەرۆكی رێكخراوی زێڤای ئەڵمانی و (Prof Dr.werner Stueber) راوێژكاری خوێندنی باڵا لە دامەزراوەی زێڤای ئەڵمانی لە وتەكانیان جەختیان لە‌وە كردەوە لەگەڵ وەزارەتی خوێندنی باڵا و توێژینەوەی زانستی هەرێمی كوردستان كاردەكەن بۆ دروستكردنی بۆردێكی سەربەخۆ بۆ بواری متمانەبەخشین. دووپاتیشیانكردەوە ماوەی سێ ساڵە ئەزموونی كاركردنمان لە چەند پڕۆژەیەكدا لە هەرێمی كوردستاندا هەیە، ئەمەش ئەزموونێكی دەوڵەمەندە بۆ ئێمە، خۆمان بەخۆشحاڵ دەزانین كە هەرێمی كوردستان داوای پڕۆژەی گەورەترمان لێدەكات، پڕۆژەكانیش پەیوەستە بە دانانی بۆردێكی تایبەت بە متمانەبەخشین لەهەرێمی كوردستان بۆ بواری خوێندنی باڵا و دەزگاو دامەزراوە پەیوەندارەكان، توانایەكی زۆرمان لەم زانكۆیانەی هەرێمی كوردستان بەدیكردووە لە زانكۆ حكومی و تایبەتەكانیش.
لەكۆتاییشدا جەختیانكردەوە لەسەر ئەوەی كە بەیەكەوە توانیومانە هەنگاوی باش بنێین بە ئاڕاستەی باشكردنی ئاستی خوێندنی باڵا لە هەرێمی كوردستان، بەتایبەت لەبواری چەسپاندنی كلتووری متمانەبەخشین، ئەمەش كاریگەریی لەسەر ئاستی كوالێتی نەوەی داهاتوو دەبێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

راپۆرتێکی تایبەت بە كوژرانی خاشقچی..

راپۆرتێکی تایبەت بە كوژرانی خاشقچی بڵاوكرایەوە رەوتەكان- لێكۆڵەری تایبەت بە ...