سەرەکی » ئاراستە » له‌ یادی 15 ساڵه‌ی كۆچی دوایی شێخ دارۆی شێخ نوری دا

له‌ یادی 15 ساڵه‌ی كۆچی دوایی شێخ دارۆی شێخ نوری دا

لاپه‌ڕه‌ی سه‌روه‌ران

سه‌ركرده‌ی نه‌مر كاك دارۆی شێخ نوری، كوڕی پیاوی به‌ناوبانگ و نیشتمانپه‌روه‌ر (شێخ نوری شێخ ساڵحی شاعیر)ه‌، ی سلێمانییه‌و به‌هۆی تێكۆشانی به‌رده‌وامیان له‌بزووتنه‌وه‌ی رزگاریخوازی گه‌له‌كه‌ماندا، به‌هه‌موو خه‌ڵكی كوردستان ئاشنان.
ئه‌و بنه‌ماڵه‌یه‌ به‌هۆی ئاستی به‌رزی رۆشنبیری و كۆمه‌ڵایه‌تیانه‌وه‌، له‌ هه‌رقۆناغ و هه‌ڵوێستێك پێویستی كردبێت به‌ئه‌ركی خۆیان هه‌ستاون و له‌بزووتنه‌وه‌كانی كوردایه‌تی به‌شدارییانكردووه‌، له‌میانه‌ی به‌شداریكردنیشیان به‌شێكی گرنگ بوون له‌ سه‌ركردایه‌تی و رابه‌رایه‌تیكردنی جوڵانه‌وه‌كه‌.
رۆڵه‌كانی ئه‌و بنه‌ماڵه‌یه‌ به‌س له‌سه‌ر نه‌خشه‌و له‌سازدانی خه‌ڵك سه‌ركرده‌ نه‌بوون، به‌ڵكو له‌ته‌نگانه‌شدا، له‌قوربانیدانیشدا هه‌ر سه‌ركرده‌و رابه‌ر بوون.
ئه‌وتا خاڵه‌ شیهابی قاره‌مانی زیندان و داهێنه‌ری درووشمی (كه‌م ژیان و كه‌ڵ ژیان) كه‌برای كاك دارۆیه‌، وه‌ك چۆن رابه‌ری رێكخراوێكی چه‌پی وه‌ك كۆمه‌ڵه‌ی ماركسی-لینینی كوردستان- كۆمه‌ڵه‌ی ره‌نجده‌ران)بوو، هه‌روه‌ها سه‌ركرده‌یه‌كی دیاری یه‌كێتیی نیشتمانیی كوردستانیش بوو، له‌زیندانیشدا خه‌سڵه‌تی سه‌ركرده‌و پێشه‌وای وننه‌كرد، ئه‌و له‌زیندانی به‌عسدا به‌وته‌كانی، چه‌نده‌ تیغی دوژمنی بۆ گه‌ردنی خۆی زیاتر ده‌سوویه‌وه‌، هێنده‌ ئه‌وتیغه‌ی له‌گه‌ردنی هاوڕێكانی و شوێنكه‌وتوانی دوورتر كرده‌وه‌، ئه‌و له‌مه‌رگیشدا ئه‌ركی لێپرسراوێتی و گه‌وره‌یی خۆی به‌جێهێنا.
كاك ئارامی سه‌ركرده‌ش، كه‌شاسوارێك بوو له‌گۆڕه‌پانی خه‌باتدا، سوارچاكێك بوو له‌كاتی (گلان)دا، بۆ قۆناغی سه‌ره‌تا سه‌خته‌كه‌ی شۆڕشی نوێ خوڵقابوو، سه‌ركرده‌یه‌ك بوو له‌ناو پێشمه‌رگه‌دا، له‌ناو هه‌ژاراندا، له‌مه‌ترسیداترین ساته‌كاندا هه‌ر سه‌ركرده‌بوو، تاشه‌هید بوو هه‌ر سه‌ركرده‌بوو، ئه‌ویش خزم و ئه‌ندامی بنه‌ماڵه‌كه‌ی كاك دارۆ بوو.
خاڵه‌ و كاك ئارام، به‌گیانبازی و خوێنی خۆیان، توانیان به‌شێكی هه‌ره‌زۆری شانازیی سازدان و سه‌ركه‌وتنی شۆڕشی نوێ، بۆ خۆیان مسۆگه‌ر بكه‌ن.
كاك دارۆش كه‌ هاوخه‌باتی ئه‌وان بوو، ده‌ربه‌ده‌ریی بینی، زیندان و ئه‌شكه‌نجه‌ی بینی، شه‌هیدبوونی براو ئامۆزای بینی، خه‌باتی پڕمه‌ترسی نهێنی و خه‌باتی سه‌ختی پێشمه‌رگایه‌تی بینی، هه‌موو ته‌مه‌نی جوانی خۆی له‌وڕێبازه‌دا خه‌رج كرد، پاشان به‌هێمنی چووه‌ ئاسمانی نه‌مری و بووه‌ نه‌خشێكی دیكه‌ به‌تابلۆی شه‌هیده‌ سه‌ركرده‌كانی یه‌كێتیی نیشتمانیی كوردستانه‌وه‌.

له‌ سه‌رده‌می ئه‌ودا
كاك دارۆ نمونه‌ی لێپرسراوی ده‌ستپاك و سه‌ركه‌وتوو و داهێنه‌ر بووه‌، له‌قۆناغی دوای ڕاپه‌ڕیندا چه‌ندین پڕۆژه‌ی ئاوه‌دانی و ئابووری و جوانكاریی جێبه‌جێكردووه‌، ئه‌گه‌ر هه‌ریه‌كێك له‌وانه‌ له‌رۆژگاری سه‌ختی نه‌بوونیی و بێده‌رامه‌تی حكومه‌تی هه‌رێمدا ته‌ماشابكرێت، ده‌كه‌وێته‌ خانه‌ی كاری جوان و داهێنانه‌وه‌، له‌وانه‌: پڕۆژه‌ی نه‌وتی شیواشۆك و نۆژه‌نكردنه‌وه‌ی ئوتێل سلێمانی پاڵاس و بازاڕی خانه‌قاو… هتد.
كاك دارۆ هێنده‌ جدی بوو به‌رامبه‌ر به‌ مه‌سه‌له‌ی كورد، پێیوابوو له‌هه‌موو كه‌س زیاتر دڵسۆزتره‌و ئه‌ركی زیاتری له‌سه‌رشانه‌.
له‌ساڵانی حه‌فتاكاندا، ئه‌وكاته‌ی له‌(به‌غدا جدیده‌) بوو به‌ناوی خۆیه‌وه‌ مه‌كته‌به‌یه‌كی هه‌بوو، به‌هۆی ئه‌وه‌ی كتێبه‌كانی ماركس و ماركسیه‌تی تێدا ده‌فرۆشرا، ببوو به‌هی كۆمه‌ڵه‌، به‌رده‌وام ئه‌ندامه‌كانی كۆمه‌ڵه‌ی ره‌نجده‌ران تیایدا كۆده‌بوونه‌وه‌، وای لێهاتبوو مه‌كته‌به‌كه‌ی وه‌ك ناوه‌ندێكی رۆشنبیریی كۆمه‌ڵه‌، رۆڵی ده‌گێڕا.
ئه‌و ماوه‌یه‌ی سه‌رپه‌رشتی ئیداره‌ی گشتیی ده‌كرد هه‌رچی توانای ئابووری هه‌بوو ده‌یخسته‌گه‌ڕ بۆ دامه‌زراندنی پرۆژه‌كان، له‌وبواره‌شدا ئه‌قڵێكی ده‌گمه‌نی ئابووری هه‌بوو، هه‌ركاتێك پرۆژه‌یه‌كی كردبێته‌وه‌، سێ قاتی بڕی تێچوونی ده‌خسته‌وه‌ سه‌ر حساباتی یه‌كێتیی، باوه‌ڕی وابوو نابێ ئه‌و پاره‌یه‌ی دێته‌ به‌رهه‌م هه‌ڵگیرێ یان خه‌رج بكرێت، به‌ڵكو پێی وابوو بكرێته‌ پڕۆژه‌یه‌ك و ده‌شیووت: هه‌م داهاتی زۆرترمان ده‌بێت و هه‌م خه‌ڵكیش كاری ده‌ستده‌كه‌وێت، پڕۆژه‌ی نه‌وتی شیواشۆك یه‌كێك بوو له‌وپرۆژانه‌ی زۆر پێی له‌سه‌ر داده‌گرت، یاخود پرۆژه‌ی سلێمانی پاڵاس كه‌ئه‌و به‌ڕێوه‌یبرد، زۆركه‌س ده‌یووت بۆئه‌و هه‌موو پاره‌یه‌ی تێدا خه‌رج بكرێت؟ له‌وه‌ڵامدا ئه‌ویش پێی ده‌وتن جێبه‌جێكردنی پڕۆژه‌یه‌كی وا له‌ئاینده‌دا داهاتی باشی ده‌بێت و شوێنێكی شایسته‌ش ده‌بێ بۆ پێشوازی ئه‌و میوان و وه‌فده‌ نێوده‌وڵه‌تیانه‌ی سه‌ردانی سلێمانی ده‌كه‌ن.
ژیاننامه‌ی سه‌ركرده‌یه‌ك
سه‌ركرده‌ی نه‌مر، دارۆ شێخ نوری شێخ ساڵح، رۆژی 28/9/1946 له‌بنه‌ماڵه‌یه‌كی ناسراوو كوردپه‌روه‌ری شاری سلێمانی له‌دایكبووه‌، قۆناغه‌كانی خوێندنی له‌سلێمانی و به‌غدا سه‌ركه‌وتووانه‌ ته‌واوكردووه‌، دواجار له‌ساڵی 1971 كۆلێژی كشتوكاڵی له‌زانكۆی به‌غدا ته‌واوكردووه‌.
ساڵی 1967 بۆ 1970 ئه‌ندامی ده‌سته‌ی سكرتاریه‌تی یه‌كێتیی قوتابیانی كوردستان بووه‌، له‌سه‌ره‌تای دامه‌زراندنی كۆمه‌ڵه‌ی ره‌نجده‌رانی كوردستانیشدا كادیرێكی بنه‌ڕه‌تی ئه‌و كۆمه‌ڵه‌یه‌ بوو.
ساڵی 1974 به‌شداریی شۆڕشی ئه‌یلولی كردووه‌و بووه‌ به‌پێشمه‌رگه‌.
ساڵی 1975 كه‌ خاڵه‌شیهابی برای و هاوڕێیانی دیكه‌ی كۆمه‌ڵه‌ ده‌ستگیركران، ئه‌ویش له‌لایه‌ن رژێمی به‌عسه‌وه‌ ده‌ستگیر كراو زۆرترین ئازارو ئه‌شكه‌نجه‌درا له‌ 1ووری لێكۆڵینه‌وه‌ی زیندانه‌كانی ئه‌بوغرێب و ئه‌منی عامه‌ی به‌غدا، به‌ڵام سه‌ربه‌رزانه‌ به‌رگه‌ی ئازارو ئه‌شكه‌نجه‌ی جه‌لاده‌كانی گرت، دوای چوار ساڵ ژیانی زیندانی و له‌ساڵی 1979 ئازاد كرا، مانگی 11ی هه‌مان ساڵ به‌خێزانه‌وه‌ په‌یوه‌ندییان كرد به‌سه‌ركردایه‌تییه‌وه‌و بوون به‌پێشمه‌رگه‌.
مانگی 8/1980 كاك دارۆی نه‌مر بوو به‌نوێنه‌ری (ی.ن.ك) له‌سوریا، ساڵی 1984 له‌ژێر فشاری ئه‌و وڵاته‌دا، سوریای به‌جێهێشت و چووه‌ سوید.
ساڵی 1991 گه‌ڕایه‌وه‌ كورستان و ماوه‌یه‌ك لێپرسراوی مه‌ڵبه‌ندی یه‌كی رێكخستنی سلێمانی بوو.
له‌كۆنگره‌ی یه‌كه‌می ی.ن.ك له‌ساڵی 1992 بووه‌ به‌ئه‌ندامی ئیحتیاتی سه‌ركردایه‌تی و پاشانیش بووه‌ ئه‌ندامی سه‌ركردایه‌تی و ئه‌ندامی مه‌كته‌بی سیاسی یه‌كێتیی نیشتمانیی كوردستان، له‌ساڵی 1993 پۆستی وه‌زیری دارایی له‌حكومه‌تی هه‌رێمدا پێسپێردرا، ساڵی 1998 بۆ ماوه‌ی دووساڵ جێگری سه‌رۆكی ئه‌نجومه‌نی وه‌زیران بووه‌، دواتر لێپرسراوی مه‌كته‌بی دارایی و ئیداره‌ی گشتیی (ی.ن.ك) بووه‌.
رۆژی 31/5/2004 به‌نه‌خۆشی، كۆچی دوایی كرد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پێشمه‌رگه‌ی هه‌ڵمه‌تبه‌ری‌ شاخ و پارێزه‌ری‌ ئارامیی شار

ئالان حه‌مه‌جه‌زا سه‌وڵجانی‌ یه‌كێتیی نیشتمانیی كوردستان شۆڕشگێڕترین حزبه‌ كه‌ زۆرترین ...