سەرەکی » ئابووری » زیاتر لە ملیارێك دینار بۆ كەسوكاری شەهیدانی سلێمانی خەرجكراوە

ئامارەكانی شەش مانگی یەكەمی ئەمساڵ

زیاتر لە ملیارێك دینار بۆ كەسوكاری شەهیدانی سلێمانی خەرجكراوە

ئا: سامان فەریق

لەماوەی شەش مانگی یەكەمی ساڵی 2019دا نزیكەی هەشت هەزار كەس لە كەسوكاری سەربەرزی شەهیدان، سەردانی بەڕێوەبەرایەتیی گشتیی كاروباری شەهیدان‌و ئەنفالكراوانی سلێمانییان كردووە، بەڕێوەبەرایەتییەكەش بەمەبەستی راییكردنی مامەڵەكانیان حەوت هەزار و 653 نووسراوی ئاراستەی لایەنە پەیوەندیدارەكان كردووە.
هەروەها بڕی ملیارێك‌و 647 ملیۆن‌و 850 هەزار دینار بۆ لایەنی تەندروستی‌و خوێندكارانی كەسوكاری سەربەرزی شەهیدان خەرجكراوە.
هەر لەو ماوەیەدا بەڕێوەبەرایەتییەكە بڕی 647 ملیۆن‌و 850 هەزار دیناری بۆ چارەسەری تەندروستی 654 نەخۆش لە كەسوكاری شەهیدان دابینكردووە.
هاوكات، لەو ماوەیەدا بەڕێوەبەرایەتییەكە بۆ كرێی ساڵانەو دەرماڵەی خوێندن‌و دەرماڵەی نیشتەجێكردنی 894 خوێندكار بڕی ملیارێك دیناری خەرجكردووە، تا لە زانكۆو پەیمانگاو خوێندنگە ئەهلییەكاندا وەربگیرێن.

بەشی تەندروستی
بەپێی ئامارێكی بەشی تەندروستی بەڕێوەبەرایەتی گشتیی كاروباری شەهیدان و ئەنفالكراوانی سلێمانی، لە ماوەی شەش مانگی سەرەتای ئەمساڵدا (2019)، سەدان كەس لەكەسوكاری سەربەرزی شەهیدان لەڕێگەی ئەم بەشەوە سوودمەند بوون لەوەرگرتنی پێداویستییە تەندروستییەكان.
لەو ماوەیەدا بەپێی فەرمانێكی قوباد تاڵەبانی جێگری سەرۆكی حكومەتی هەرێمی كوردستان، بۆ 167 نەخۆش بڕی 165 ملیۆن دینار خەرجكراوە، ئەو نەخۆشانە لەساڵانی رابردوودا نەشتەرگەرییان لە نەخۆشخانە حكومی‌و ئەهلییەكاندا ئەنجامداوەو دواتر پسوڵەی نەشتەرگەرییەكانیان هێناوە بۆ بەڕێوەبەرایەتی گشتی شەهیدانی سلێمانی‌و لەمساڵدا ئەو بڕە پارەیان بۆ سەرفكراوە.
هەر لەو ماوەیەدا ئەو كەسانەی پێویستیان بە شەبەكەو باڵۆن‌و قەستەرەی دڵ هەبووە ژمارەیان (227) حاڵەت بووەو بۆ هەریەكەیان بڕی ملیۆنێك‌و 200 هەزار دینار سەرفكراوە، كە كۆی گشتییان دەكاتە 272 ملیۆن‌و 400 هەزار دینار.
سەرجەمی ئەو نەخۆشانەش لەڕێگەی فەرمانگەی تەندروستی‌و بەشی بوژانەوەی دڵ لەسلێمانی چارەسەریان بۆ ئەنجامدراوە.
لەنەخۆشخانەی شۆڕشیش (98) حاڵەتی نەشتەرگەریی بۆ كەسوكاری شەهیدان كراوەو بۆ هەریەكەیان بڕی ملیۆنێك دیناری تێچـووە، كۆی گشتییان دەكاتە 98 ملیۆن دینار. ئەمە جگە لەچارەسەركردنی (32) حاڵەتی جۆراوجۆری دیكەش كە تەنیا لەنەخۆشخانەكە چارەسەریان وەرگرتووە.
هاوكات لەبەشی تیشكی فەرمانگەی تەندروستیش چارەسەری تەندروستی بۆ (16) حاڵەت بەبڕی (75) هەزار دینار كراوە كە كۆی گشتییان دەكاتە ملیۆنێك‌و 200 هەزار دینار.
هەروەها لە نەخۆشخانەی شەهید د.ئاسۆ لەسلێمانی، چارەسەر بۆ (13) حاڵەت كراوە بەبڕی (750) هەزار دینار كە كۆی گشتییان دەكاتە نۆ ملیۆن‌و 750 هەزار دینار.
لەفەرمانگەی تەندروستی بەشی كۆئەندامی هەرس‌و جگەریش چارەسەری تەندروستی بۆ (83) حاڵەت كراوە بۆ هەریەكەیان بەبڕی 500 هەزار دینار، كە كۆی گشتییان دەكاتە 41 ملیۆن‌و 500 هەزار دینار.
لە نەخۆشخانەی شار لە سلێمانیش بۆ (50) حاڵەت بڕی 60 ملیۆن دینار تەرخانكراوە واتە بۆ هەریەكەیان ملیۆنێك‌و 200 هەزار دینار خەرجكراوە. هەروەها لە نەخۆشخانەی هیوا لە شاری سلێمانی سێ نەخۆش بینراون‌و چارەسەری كیمیاییان بۆ ئەنجامدراوە.
واتە لەماوەی شەش مانگی یەكەمی ساڵی 2019دا بەبڕی 647 ملیۆن‌و 850 هەزار دینار چارەسەری تەندروستیی بۆ 654 نەخۆش لەوارسی سەربەرزی شەهیدان ئەنجامدراوە.

بەشی كۆمەڵایەتی
بەشی كۆمەڵایەتیش لەماوەی شەش مانگی سەرەتای ساڵی 2019دا مامەڵەی دیاریی هاوسەرگیریی بۆ (130) كوڕو كچی شەهیدی سەنگەرو جینۆسایدو شەهیدانی تیرۆری دەستی داعش كردووە، كە بڕی پارەكەیان دەكاتە (650) ملیۆن دینار، بەڵام بەهۆی قەیرانی داراییەوە پارەكەیان بۆ خەرجنەكراوە.
لەو ژمارەیەش (100)یان كوڕو كچی شەهیدی سەنگەر و (25)یان كوڕ و كچی شەهیدی جینۆسایدو (5)یان كچ و كوڕی شەهیدانی تیرۆری دەستی داعشن.
پێویستبوو بۆ هەریەك لەو كچ‌و كوڕی شەهیدانە بڕی پێنج ملیۆن دینار خەرجبكرایە، بەڵام حكومەتی هەرێم لەساڵی 2015ەوە بەهۆكاری قەیرانی دارایی خەرجكردنی دیاری هاوسەرگیری بۆ كچ و كوڕی شەهید راگرتووە.
هەر لەماوەی ئەو شەش مانگەدا بەشی كۆمەڵایەتی 234 بەخێوكاری شەهیدی سەنگەرو جینۆسایدی بڕیوەو مامەڵەی وارس گۆڕینی بۆ 16 كەسوكاری شەهید كردووە.
هەروەها بەشەكە مامەڵەی گواستنەوەی بۆ 18 كەسوكاری شەهید ئەنجامداوەو 1 مامەڵەی بەستنەوەشی كردووە.

بەشی پەروەردە
لەڕێگەی بەشی پەروەردەشەوە لە ماوەی شەش مانگی یەكەمی ئەمساڵدا بۆ كرێی خوێندنی (894) خوێندكاری كوڕو كچی شەهید، ئامادەكاری كراوە بۆ خەرجكردنی بڕی پێنج ملیارو 81 ملیۆن‌و 110 هەزارو 650 دینار بۆ كرێی ساڵانەی خوێندنی (2017 – 2018)، تا لە زانكۆو پەیمانگاو خوێندنگە ئەهلییەكان وەربگیرێن.
هەر لەو ماوەیەدا بەشەكە بڕی ملیارێك دیناری بۆ كچ و كوڕی شەهیدان و ئەنفالكراوان بۆ كرێی ساڵانەو دەرماڵەی خوێندن و دەرماڵەی نیشتەجێكردن لە زانكۆو پەیمانگا حكومی‌و ئەهلی‌و خوێندنگەو باخچە نموونەییەكان خەرجكردووە.
هەر لەڕێگەی ئەم بەشەوە پشتگیری بۆ كوڕو كچی شەهید كراوە بەمەبەستی راپەڕاندنی ئیش‌و كارەكانیان لە زانكۆ و پەیمانگاكان و ناوەندەكانی خوێندندا.

بەشی نیشتەجێبوون
بەشی نیشتەجێبوون لەماوەی شەش مانگی یەكەمی ساڵی 2019دا، مامەڵەی تاپۆكردنی بۆ (117) پارچە زەوی ئەنجامداوە، كە لەساڵی رابردوودا بەسەر وارسی شەهیدان‌و جینۆسایدكراواندا دابەشكراوە. هەروەها بەمەبەستی وردبینیكردن‌و راستكردنەوەی ناوی هەڵەی شەهیدان‌و وارسەكانیان، بەشەكە (300) نووسراوی ئاراستەی بەڕێوەبەرایەتی خانووبەرەی (1+2) و (IT)ی بەڕێوەبەرایەتی گشتی شارەوانیەكان‌و كۆمەڵەی هەرەوەزی كردووە.
جگە لە وەڵامدانەوەی رۆژانەی وارسی شەهیدان‌و جینۆسایدكراوان، (500) فەرمانی كارگێڕی بۆ وارسی شەهیدان تۆماركردووە.
بەڕێوەبەرایەتی گشتی كاروباری شەهیدان‌و ئەنفالكراوانی سلێمانی یەكێكە لەبەڕێوەبەرایەتییە فراوانەكانی وەزارەتی كاروباری شەهیدان‌و ئەنفالكراوانی هەرێم‌و لە هەشت بەڕێوەبەرێتی‌و سێ بەش‌و حەوت هۆبەو چەند بەڕێوەبەرێتییەكی دیكە لەسنووری قەزاو ناحیەكانی پارێزگای سلێمانی پێكدێت. زۆربەی ئەو ناوچانەی كە خاوەنی ژمارەیەكی زۆر شەهیدو جینۆسایدو قوربانین دەكەونە سنووری چالاكییەكانی ئەم بەڕێوەبەرایەتییە گشتییەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*