سەرەکی » وتار » ئیدریس جەبار » بۆینگ و (F-35)

بۆینگ و (F-35)

ئەمریكییەكان كە توركەكان لە بەرنامەی مەشق لەسەر فڕۆكەكانی (F-35) دووردەخەنەوە، مانای بوارنەدانە بە وڵاتەكە كە دەیەوێت لەڕووی هێزی ئاسمانییەوە هاوشانی وڵاتانی تر رێبكات و لەو بوارەدا دوانەكەوێت.
ئەمریكاییەكان هەر تەنیا لەبەر كڕینی (S-400) نییە كە دەیانەوێت هەماهەنگییە سەربازییەكانیان لەگەڵ ئەنقەرەدا سنورداربكەن، بەڵكو چەندان دۆسێی تر هەن كە مایەی ناكۆكی و جیازازین لەنێوان ئەو دوو وڵاتە ئەندامەی هاوپەیمانی (ناتۆ).
هەماهەنگی سەربازی نێوان واشنتۆن و ئەنقەرە، وابەستەی تۆڕێكی بەرژەوەندی گەورەی نێوان هەردوو وڵاتە، ئەمریكا كە بە پاشەكشەكردن لە گرێبەستی فرۆشتنی فڕۆكەی (F-35) ختوكەی توركەكان دەدات، توركەكانیش بە سیخورمەی پاشگەزبوونەوەی لە كڕینی فڕۆكەی مەدەنی بوێنگ ئەمریكاییەكان تەنگەتاو دەكەن.
ئەم گازلەیەكترگرتنەی نێوان ئەمریكا و توركیا، وابەستەی زنجیرەیەك ململانێی نێوان هەردوو وڵاتە كە لە هەوڵی كودەتا شكستخواردووەكەی هاوینی 2016دا زیاتر زەقبۆوە.
ئەمریكاییەكان بە فەتحوڵڵا گیولەن و (هەسەدە) و هەندێك دۆسێی تر، توركەكان بێزار دەكەن، توركەكانیش بە بەرگری لە پرسی فەلەستین و دژایەتی ئیسرائیل و نزیكبوونەوەی لە روسەكان.
كێشمەكێشەكە بۆ زیانگەیاندن بە ئابورییەكان و گرێبەستەكانی كڕینی چەك و ئامێرە پەرەسەندووەكان درێژبۆوەتەوە، كڕینی سیستمی بەرگری موشەكی (S-400)ی روسی، هەڵوەشاندنەوەی گرێبەستی فرۆشتنی (F-35)ی بەدواداهات كە بووە مایەی تەواو توڕەكردنی توركەكان كە ئەمانیش بە چەكی پاشگەزبوونەوەی لە كڕینی (بۆینگ) وەڵامیان دایەوە.
ئەمریكاییەكان تا ئەو ئاستە بە تەنگ دۆستایەتی توركەكانەوەن كە بەرژەوەندییەكانیان زامن بێت و نەكەوێتە سەر لێواری مەترسی، توركەكانیش بە هەمان شێوە دەزانن لەسەر پەتی پراگماتی ئەمریكایی یاریی بكەن و ئاسایشی نەتەوەیی وڵاتەكەیان و بەرژەوەندییەكانیان بپارێزن.
ئەم یارییە زبرەی واشنتۆن لەگەڵ ئەنقەرەدا دەیكات پێناچێت بەمشێوازەی ئێستا درێژە بكێشێت، لەگەڵ ئەوەشدا پێشبینی ناكرێت توركیا لەڕێی هەڕەشەكانییەوە بتوانێت مل بە ئەمریكا كەچ بكات و گرەوەكە هەروا بەئاسانی بباتەوە، بەڵام ئەوەی ئاشكرایەوە و بواری گومانبردنی تێدا نییە، رێكەوتنی هەردوولایە لەسەر چەند خاڵێكی هاوبەش كە دەبنە مایەی پاراستنی بەرژەوەندییەكانی هەردوو وڵات و رێگەنادەن لێوەی درز بكەوێتە نێو ئەو پەیوەندییە مێژووییەی كە دەیان ساڵە هەردوو وڵات بە یەكەوە دەبەستێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئاسایشی ئیسرائیل

بۆ پاراستنی ئاسایشی قەوارەكەی هەموو رێڕەوێك، دروست بێت یان نادروست ...