سەرەکی » زانست » له‌ نێوان بڕواكردن و ره‌تكردنه‌وه‌داپەڕە 2

یۆبیڵی زێرینی چوونه‌ سه‌رمانگ

له‌ نێوان بڕواكردن و ره‌تكردنه‌وه‌دا

ڕۆژی 20ی ته‌موزی 1969 بۆ یه‌كه‌مین جار مرۆڤ پێی نایه‌ سه‌ر خاكی سه‌ر ڕووی مانگ‌و له‌و كاته‌وه‌ دانیشتوانی گۆی زه‌وی بوون به‌دوو به‌شه‌وه‌ له‌نێوان بڕواكه‌ران به‌و هه‌نگاوه‌ مه‌زنه‌ی مرۆڤایه‌تی و ئه‌وانه‌ی هه‌نگاوێكی ئاوا گرنگیان پێ قبوڵ ناكرێت و پاساو ده‌هێننه‌وه‌ بۆ ئه‌وه‌ی بیسه‌لمێنن كه‌ چوونه‌ سه‌رمانگ فێڵ و هه‌ڵخه‌ڵه‌تاندن و سیناریۆیه‌.
هه‌رچه‌نده‌ نێرده‌ی ئه‌پۆڵۆ (11) ی سه‌ر به‌ئاژانسی ناسا به‌ر له‌ په‌نجا ساڵ له‌سه‌ر خاكی سه‌ر ڕووی مانگ نیشته‌وه‌ كه‌ بریتی بوون له‌ (نیل ئارمسترۆنگ، باز ئه‌لدرین و مایكل كۆلێنز)، نیل ئارمسترۆنگیش بوه‌ یه‌كه‌مین كه‌س كه‌ له‌سه‌ر ڕووی مانگ هه‌نگاوی ناو و له‌مباره‌یه‌شه‌وه‌ وتی «ئه‌مه‌ هه‌نگاوی بچووكی مرۆڤێكه‌، به‌ڵام بازێكی گه‌وره‌ی مرۆڤایه‌تییه‌» له‌گه‌ڵ ئه‌وه‌شدا هێشتا ژماره‌یه‌كی زۆر له‌ خه‌ڵكیی بڕوا به‌و هه‌نگاوه‌ ناكه‌ن‌و چه‌ندین پاساوی بۆ دێننه‌وه‌‌و پێیان وایه‌ ئه‌مه‌ ته‌نها سیناریۆیه‌كی ئه‌مریكایه‌ و هیچی تر.
لێره‌شدا مێژوو و لێكدانه‌وه‌ زانستییه‌كان ئه‌و جۆره‌ پاساو و قسانه‌ به‌درۆ ده‌خه‌نه‌وه‌‌و چه‌ند ڕونكردنه‌وه‌یه‌كی زانستیی بۆ ڕاستیی‌و دروستیی پرۆسه‌ی چوونه‌ سه‌ر مانگ ده‌خه‌نه‌ڕوو.

پاساوی یه‌كه‌م: شه‌كانه‌وه‌ی ئاڵای ئه‌مریكا له‌سه‌ر مانگ
هه‌ندێك ده‌ڵێن «پرۆسه‌ی چوونه‌ سه‌ر مانگ درۆ و سیناریۆیه‌ هیچ ڕاستیی تێدا نییه‌ و پاساویشیان ئه‌وه‌یه‌ كه‌ ئه‌گه‌ر ڕاست بێت ئه‌و كه‌سانه‌ چووبنه‌ سه‌ر مانگ و وه‌ك هه‌موانیش ده‌زانین كه‌ مانگ هه‌وای تێدا نییه‌، كه‌واته‌ چۆن ئه‌و ئاڵایه‌ی گوایه‌ فه‌زاوانانی ئه‌پۆلۆ 11له‌سه‌ر مانگ چه‌قاندوویانه‌، له‌ وێنه‌كاندا ده‌شه‌كێته‌وه‌ ؟
له‌مباره‌یه‌وه‌ ڕۆجه‌ر لاونیوس (Roger Launius) میژوو تۆماركه‌ری گه‌شته‌ فه‌زاییه‌كان له‌ مۆزه‌خانه‌ی نیشتمانیی فرۆكه‌وانیی و فه‌زایی سه‌ر به‌ دامه‌زراوه‌ی (سمیشونیان)،(Smithsonian>s National Air and Space) له‌ واشنتۆنی پایته‌خت ده‌ڵێت» هۆكاری ئه‌وه‌ی خه‌ڵك وا ده‌زانن ئاڵاكه‌ ده‌شه‌كێته‌وه‌ ده‌گه‌ڕێته‌وه‌ بۆ یه‌كێك له‌ بنه‌ما فیزیاییه‌ ناسراوه‌كان كه‌ ئه‌ویش بنه‌مای له‌كاركه‌وتن و سستیی خودییه‌ (inertia) یه‌ ، چونكه‌ كاتێك فه‌زاوانه‌كه‌ ئاڵاكه‌ی له‌ زه‌وی مانگدا چه‌قاندووه‌ به‌ هۆی هێزی جووڵه‌ی ئاڵاكه‌وه‌ ئه‌و پرۆسه‌ فیزیاییه‌ دروست بووه‌ و هه‌روه‌ها فه‌زاوانه‌كه‌ چه‌ند جارێك به‌هه‌ڵه‌ شیشی به‌شی سه‌ره‌وه‌ی ئاڵاكه‌ی نوشتاندووه‌ته‌وه‌ ئه‌مه‌ش وایكردووه‌ ئاڵاكه‌ ئه‌و جووڵه‌یه‌ بكات وه‌ك ئه‌وه‌ی به‌ده‌م باوه‌ بشه‌كێته‌وه‌ .

دووه‌م: كێ وێنه‌ی گرتوون
یه‌كێكی تر له‌ به‌درۆخستنه‌وه‌ی پرۆسه‌ی چوونه‌ سه‌ر مانگه‌ و هۆكاری باوه‌ڕنه‌كردن به‌ پرۆسه‌یه‌كی گرنگیی له‌و جۆره‌ ئه‌و پرسیاره‌یه‌ كه‌ باس له‌وه‌ ده‌كات له‌ یه‌كێك له‌ وێنه‌ به‌ناوبه‌نگه‌كانی كه‌ له‌سه‌ر مانگه‌وه‌ گیراوه‌ ڕه‌نگدانه‌وه‌ی وێنه‌ی ئارمسترۆنگ‌و مه‌كۆی نیشتنه‌وه‌ كه‌یه‌ له‌سه‌ر كڵاوه‌كه‌ی باز ئه‌ڵدرین و هیچ كامێرایه‌ك یان وێنه‌گرێكیان له‌گه‌ڵ نه‌بووه‌ ، كه‌واته‌ كێ ئه‌و وێنانه‌ی گرتوون؟
فیل پله‌یت (Phil Plait) نووسه‌ری كتێبێك به‌ ناوی(Bad Astronomy ) ( گه‌ردوونناسیی به‌د) كه‌ ئه‌م كتێبه‌ی چه‌ندین خه‌ڵاتی پێبه‌خشراوه‌ و سه‌رۆك دامه‌زراوه‌ی جه‌میس راندی فێركارییه‌(James Randi Educational Foundation.) ده‌ڵێت « له‌ ڕاستیدا ئه‌و كامێرایانه‌ی له‌كاتی ڕۆیشتنی فه‌زاوانانی ئه‌ركه‌كه‌ی (ئه‌پۆلۆ 11 ) به‌سه‌ر ڕووی مانگدا به‌كارهێنراوه‌ له‌سه‌ر سنگی فه‌زاوانه‌كان جێگیر كراوه‌.
پله‌یت ده‌ڵێت» ئه‌گه‌ر سه‌رنج له‌و وێنه‌یه‌ بدرێت ده‌توانرێت باسكی نیل ئارمسترۆنگ ببینرێت كه‌ به‌ره‌و ئاراسته‌ی سنگی چووه‌ و جگه‌ له‌وه‌ش كامێرا له‌سه‌ر كڵاوه‌كانیشیان جێگیر كراوه‌.

سێیه‌م : ده‌رنه‌كه‌وتنی ئه‌ستێره‌ له‌ وێنه‌كاندا
ئه‌وانه‌ی بڕوایان به‌ چوونه‌ سه‌رمانگ نییه‌ پاساوی ئه‌وه‌ ده‌هێننه‌وه‌ له‌هیچ یه‌ك له‌وێنه‌كانی ئه‌و پرۆسه‌یه‌دا ئه‌ستێره‌ له‌ ئاسماندا نابینرێت و باگراوه‌نده‌كه‌یان به‌ ته‌واوی ڕه‌شه‌ و هیچ نیشانه‌یه‌ك بۆ ئه‌ستێره‌ نییه‌، ئه‌مه‌ش پێچه‌وانه‌ی ئه‌و چیرۆكه‌یه‌ كه‌ له‌ ساڵی (2001) دا نوسه‌ر(ئارسه‌ر سی كلارك) بڵاویكرده‌وه‌ و یه‌كێك له‌ كه‌سایه‌تییه‌كان كاتێك سه‌یری ئاسمانی به‌رفراوان ده‌كات هاوار ده‌كات « خودایه‌ ئاسمان پڕه‌ له‌ ئه‌ستێره‌»، به‌ڵام چونكه‌ چوونه‌ سه‌رمانگ فێڵێكی گه‌وره‌یه‌ هیچ كه‌س له‌ فه‌زاوانه‌كانی (ئه‌پۆلۆ 11 )كاتێك له‌سه‌ر مانگ دابه‌زیوون به‌و شێوه‌یه‌ هاواریان نه‌كردووه‌.
به‌درۆخستنه‌وه‌ی ئه‌و پاساوه‌ ئه‌وه‌یه‌ له‌ ڕاستیدا مانگ تایبه‌تمه‌ندی گه‌وره‌ی هه‌یه‌ بۆ ڕه‌نگدانه‌وه‌ی تیشكی خۆر له‌سه‌ری ئه‌و تایه‌تمه‌ندییه‌ش مانای ئه‌و پرشنگه‌یه‌ كه‌ به‌ هۆی تیشكی خۆره‌وه‌ دروست ده‌بێت له‌سه‌ر ڕووی مانگ و ئه‌مه‌ش ده‌بێته‌ هۆی داپۆشینی بریسكه‌ی ئه‌ستێره‌كان له‌ ئاسمانی مانگدا، ئه‌مه‌ش وا ده‌كات بینینی ئه‌ستێره‌ له‌سه‌ر ڕووی مانگ شتێكی قورس بێت، شتێكی تریش ئه‌وه‌یه‌ كاتێك فه‌زاوانه‌كان خه‌ریكی وێنه‌گرتنی سه‌ركێشییه‌كانیان بوون له‌سه‌ر ڕووی مانگ پشتیان به‌ هه‌ندێك ئامڕاز به‌ستبوو له‌ كامێراكانیاندا كه‌ بووبوه‌ هۆی كه‌مكردنه‌وه‌ی ئه‌و ڕوناكییانه‌ی له‌ باكراونده‌كه‌یاندا هه‌بوو ، هه‌ر بۆیه‌ هیچ ئه‌ستێره‌یه‌ك ده‌رنه‌كه‌وتووه‌، بۆ ئه‌مه‌ش جارێكی تر فیل پله‌یت ده‌ڵێت» فه‌زاوانه‌كان وێنه‌كانیان به‌ ماوه‌ی به‌رفراوانی (1/150 یان 1/250 به‌شی چركه‌یه‌كدا گرتووه‌ ، له‌م ماوه‌ كورته‌شدا هه‌رگیز ئه‌ستێره‌ ده‌رناكه‌وێت».

چواره‌م ، دروست نه‌بوونی هیچ چاڵوچۆڵیه‌ك له‌كاتی نیشتنه‌وه‌ی گالیسكه‌ی (Eagle)یان هه‌ڵۆ له‌سه‌ر مانگ
ئه‌وانه‌ی بڕوا به‌ چوونه‌ سه‌رمانگ ناكه‌ن ئه‌و پاساوه‌ ده‌هێننه‌وه‌ كه‌ له‌و ساته‌ی گالیسكه‌ی ناسراو به‌ (Eagle) له‌مه‌كۆكه‌ جیا ده‌بێته‌وه‌ و له‌سه‌ر مانگ ده‌نیشێته‌وه‌، به‌و په‌ڕی ئاسانی ده‌نیشێته‌وه‌ هیچ ته‌پ و تۆزێك به‌رز نابێته‌وه‌ و هیچ چاڵوچۆڵییه‌كیش دروست نابێت، ئه‌وان به‌ گومانه‌وه‌ له‌و پرۆسه‌یه‌ش ده‌ڕوانن و پێیان وایه‌ ده‌بوو له‌و كاته‌دا هه‌ورێك له‌ته‌پوتۆز دروست بووایه‌ و چاڵییه‌كیش له‌ شوێنی نیشتنه‌وه‌كه‌ی دروست بووایه‌.
بۆ ڕه‌تكردنه‌وه‌ی ئه‌و پاساو و گومانه‌ جارێكی تر ڕۆجه‌ر لاونیوس (Roger Launius) له‌ دامه‌زراوه‌ی سمیشونیان ده‌ڵێت» فه‌زاوانه‌كان به‌ر له‌ نیشتنه‌وه‌ خێرایی بزوێنه‌ری گالیسكه‌كه‌یان كه‌مكردووه‌ته‌وه‌ و بۆ ماوه‌یه‌كی زۆر نه‌فڕیون به‌سه‌ر خاكی مانگدا ، تا ته‌پوتز به‌رزبێته‌وه‌ و چاڵ دروست ببێت»
ئه‌و ده‌شڵێت» له‌ فیلمه‌كانی خه‌یاڵی زانستیدا مه‌كۆ فه‌زاییه‌كان ده‌بینرێت له‌كاتی نیشتنه‌وه‌یاندا ئاگرێكیان لێوه‌ ده‌رده‌چێت، به‌ڵام ئه‌وه‌ ئه‌و شێوازه‌ نه‌بوو كه‌ تیمی ئه‌و ئه‌ركه‌ی ئه‌پۆلۆ گرتیانه‌ به‌ر و ئه‌و شێوازه‌ش نابێت بۆ گه‌شته‌كانی داهاتوو بۆ سه‌رمانگ».

پێنجه‌م: گۆڕانكاریی ڕووناككردنه‌وه‌
ئه‌وانه‌ی بڕوایان به‌چوونه‌ سه‌رمانگ نییه‌ ده‌ڵێن» به‌پێی ئه‌و وێنانه‌ی هه‌ن له‌ یه‌كێكیاندا باز ئه‌لدرین (Buzz Aldrin) ده‌بینرێت له‌سه‌ر پلیكانه‌ی یه‌كه‌می مه‌كۆی (Eagle) وه‌ستاوه‌، به‌پێی دۆخی چه‌مانه‌وه‌ی ئه‌ژنۆكانی بێت وه‌ك ئه‌وه‌یه‌ ویستبێتی باز بدات بۆ پلیكانه‌ی دووه‌م،له‌م وێنه‌یه‌دا له‌گه‌ڵ ئه‌وه‌ی ئه‌ڵدرین له‌سێبه‌ری مه‌كۆكه‌دایه‌، زۆر به‌ ڕوونی دیاره‌.
ئه‌وانه‌ی چوونه‌ سه‌رمانگ به‌ درۆ ده‌زانن ده‌ڵێن» زۆربه‌ی سێبه‌ره‌كانی ناو وێنه‌كانی ئه‌و گه‌شته‌ سه‌یرن، هه‌ندێك سێبه‌ر له‌گه‌ڵ یه‌كتردا هاوته‌ریب نین ، هه‌ندێك ته‌نیش له‌ به‌ر سێبه‌ره‌كه‌شدا زۆر ڕوون دیارن، ئه‌مه‌ش مانای وایه‌ كه‌ ڕووناكییه‌ك له‌ چه‌ند سه‌رچاوه‌یه‌كی جیاوازه‌وه‌ لێیان ده‌دات» ، واته‌ ئه‌وان بڕوایان وایه‌ و گومان ده‌كه‌ن كه‌ ئه‌و جۆره‌ ئامێری وێنه‌گرتنانه‌ ئه‌و وێنانه‌ی گرتبێت كه‌ له‌ ستۆدیۆكانی وێنه‌گرتندا هه‌یه‌.
دیسانه‌وه‌ ڕۆجه‌ر لاونیوس (Roger Launius) قسه‌ی خۆی هه‌یه‌ له‌سه‌ر ئه‌و وێنه‌یه‌ و ده‌ڵێت « به‌ڵی سه‌رچاوه‌ی زۆری ڕوناكیی هه‌بووه‌ له‌سه‌ر مانگ، له‌وانه‌ تیشكی خۆر و پێچه‌وانه‌ بوونه‌وه‌ی تیشكی خۆر له‌ زه‌وییه‌وه‌ و پێچه‌وانه‌ بوونه‌وه‌ی تیشكی خۆر كه‌ ده‌یدا له‌ مه‌كۆكه‌ جگه‌ له‌ تیشكدانه‌وه‌ی جلوبه‌رگه‌فه‌زاییه‌كانی كه‌ فه‌زاوانه‌كان پۆشیبوویان».
ئه‌و ده‌شڵێت» پێویسته‌ بزانین كه‌ سه‌ر ڕووی مانگ ته‌خت نییه‌ ، ئه‌گه‌ر ته‌نێك له‌ شوێنێكی نزمدا بێت چه‌ند سێبه‌رێكی جیاوازی ده‌بێت به‌ به‌راورد به‌ ته‌نێك له‌ شوێنێكی ته‌ختدا دابنرێت».

شه‌شه‌م: شوێنپێیه‌كان زۆر ڕوون دیاره‌
له‌یه‌كێك له‌وێنه‌كاندا هێڵه‌ جیاوازه‌كانی شوێنپێی (بازئه‌لدرین) زۆر جوان دیاره‌ كاتێك قاچی هه‌ڵده‌بڕێت بۆ ئه‌وه‌ی وێنه‌یه‌كی خاكه‌كه‌ بگرێت به‌ مه‌به‌ستی لێكۆڵینه‌وه‌ له‌خاكی سه‌ر مانگ، ئه‌وانه‌ی بڕوا به‌ پرۆسه‌ی چوونه‌ سه‌رمانگ ناكه‌ن ده‌ڵێن» هیچ لۆژیكی نییه‌ له‌ كاتێكدا خاكی سه‌ر مانگ زۆر وشك بێت به‌و شێوه‌یه‌ شوێنپێیه‌كان واڕون‌و جوان ده‌ربكه‌ون ، ئه‌وه‌ی ده‌رده‌كه‌وێت وه‌ك ئه‌وه‌یه‌ ئه‌و كه‌سانه‌ له‌سه‌ر خۆڵیكی نه‌رم یان لمێكی شێدار هه‌نگاویان نابێت»
فیل پله‌یت وه‌ڵامی ئه‌م به‌درۆخستنه‌وه‌یه‌ ده‌داته‌وه‌ و ده‌ڵێت» خاكی سه‌ر ڕووی مانگ له‌ شێوه‌ی بۆدره‌ یان خۆڵێكی بێژراوه‌دایه‌، كاتێكیش له‌ زه‌وییه‌وه‌ به‌ ته‌لسكۆبی ورد سه‌یری ده‌كه‌یت زۆرتر له‌ خۆڵه‌مێشی گڕكان ده‌چێت، كه‌ هه‌نگاوی به‌سه‌ردا بنرێت جی پێیه‌كان به‌ ئاسانی و به‌جوانی له‌سه‌ری ده‌رده‌كه‌وێت، نه‌ك هه‌ر ئه‌وه‌نده‌ ڕه‌نگه‌ شوێنه‌واری جێپێه‌كه‌ تاماوه‌یه‌كی زۆریش بمێنێته‌وه‌، ئه‌مه‌ش به‌ هۆكاری ئه‌وه‌ی كه‌ سه‌ر ڕووی مانگ هه‌وای نییه‌»

حه‌وته‌م: هیچ پاشماوه‌یه‌كی سه‌ر ڕووی مانگ نه‌بینرایه‌وه‌
ئه‌وانه‌ی بڕوا به‌ ئه‌رك و گه‌شته‌كه‌ی ئه‌پۆلۆ 11 ناكه‌ن ده‌ڵێن « ده‌وترێت كاتێك نیل ئارمسترۆنگ و هاوڕێكانی ساڵی 1969 له‌گه‌شته‌كه‌یان گه‌ڕانه‌وه‌ هه‌ندێك شتیان له‌سه‌ر مانگ جێهێشتووه‌، له‌وانه‌ش ئاڵای ئه‌مریكا و به‌شێك له‌گالیسكه‌ی نیشتنه‌وه‌كه‌یان چه‌ند ئامێرێكی دیكه‌، له‌وانه‌ش ئامێرێك بۆ پێوانه‌كردنی بوومه‌له‌رزه‌ ، كه‌ به‌پێی وێنه‌كان بێت باز ئه‌لدرین خه‌ریكی دانانی ئه‌و ئامێره‌یه‌ له‌سه‌ر ڕووی مانگ هه‌روه‌ها پلێتێك كه‌ ئیمزای ژماره‌یه‌ك له‌ سه‌رۆكه‌كانی جیهانی له‌سه‌ره‌».
ئه‌وان ده‌ڵێن» له‌ كاتێكدا ناسا ئامێری زۆر پێشكه‌وتووی گه‌ردووناسیی هه‌یه‌ بۆ بینینی قوڵایی گه‌ردون، له‌وانه‌ش ته‌لسكۆبی فه‌زایی هابل ( Hubble Space Telescop) و به‌كاری ده‌هێنن بۆ وێنه‌گرتنی ته‌نه‌ جیاوازه‌كان ، ئه‌دی بۆچی جارێك به‌كاری ناهێنن بۆ وێنه‌گرتنی ئه‌و ته‌نانه‌ی كه‌ فه‌زاوانانی گه‌شته‌كه‌ی ئه‌پلۆ 11 له‌سه‌ر ڕووی مانگ جێیانهێشتوون؟».
فیل پله‌یت بۆ ئه‌م گومان و پرسیاره‌ وه‌ڵام ده‌داته‌وه‌ و ده‌ڵێت» له‌ ڕاستیدا هیچ تلسكۆبێك نییه‌ له‌سه‌ر زه‌وی كه‌ بتوانێت وێنه‌ی ته‌نێك به‌و وردییه‌ بگرێت، گه‌وره‌ترین ته‌لسكۆب له‌سه‌ر زه‌وی و له‌ فه‌زاشدا ناتوانێت وێنه‌ی ته‌نێك بگرێت له‌سه‌ر مانگ ئه‌گه‌ر به‌ئه‌ندازه‌ی خانویه‌ك نه‌بێت».

هه‌شته‌م : ڕووناكیی نامۆ و سه‌یر
ئه‌وانه‌ی باوه‌ڕیان به‌ چوونه‌ سه‌ر مانگ نییه‌ ده‌ڵێن « له‌یه‌كێك له‌ وێنه‌كاندا كه‌ باز ئاڵدرین سه‌رقاڵی پلێتێكی كانزاییه‌ له‌نزیك گالیسكه‌كه‌وه‌ چه‌ند تیشكدانه‌وه‌ و ڕوناكییه‌ك ده‌ركه‌وتوون كه‌ زۆربه‌ی جار له‌و جۆره‌ حاڵه‌تانه‌ له‌ ستۆدیۆكانی وێنه‌گرتندا ده‌بینرێت».
بۆ ئه‌مه‌ش فیل پله‌یت ده‌ڵێت» هه‌رگیز له‌و بڕوایه‌دانیم ناسا هه‌ڵه‌ی وا كوشنده‌ بكات، له‌كاتێكدا ئه‌و ئاژانسه‌ ملیۆنه‌ها دۆلاری بۆ ئه‌و ئه‌ركه‌ ته‌رخانكردووه‌»، ئه‌و ده‌ڵێت « ئه‌وانه‌ی ئه‌و قسه‌یه‌ ده‌كه‌ن بڕوا به‌وه‌ ده‌كه‌ن ناسا وێنه‌یه‌ك بڵاو بكاته‌وه‌ كه‌ ڕوناكی ستۆدیۆی وێنه‌گرتنی تێدا ده‌ركه‌وێت ؟ ئه‌وه‌ لۆژیكیی نییه‌، ئه‌و ڕوناكییه‌ نامۆیانه‌ی له‌وێنه‌كه‌دا ده‌ركه‌وتوون تیشكدانه‌وه‌ی لینزه‌كانی وێنه‌گرتنه‌وه‌، ئه‌و شێوه‌ پێنج پاڵوه‌ی له‌ ناوه‌ڕاستی وێنه‌كه‌دا ده‌ركه‌وتووه‌ له‌ زوومی كامێراكه‌وه‌ دروست بووه‌ و هیچی تر «.

سه‌رچاوه‌: nasa arabic

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*