سەرەکی » وتار » د.به‌ختیار شاوه‌یس‌ » متمانە لە عادل مەسەننەوە!

سه‌كۆی دووەمی پایته‌خت

متمانە لە عادل مەسەننەوە!

20

بەهیچ شێوەیەك ئەم وتارە سۆزی تایبەتی و بەرژەوەندی شەخسی ناینووسێتەوە و كەمترین پەیوەندیم لەگەڵ سەرۆك وەزیران نییە و نەبوە، بەڵام ئەوەی كە لەم رۆژانەدا دەگوزەرێ سەبارەت بەپرسی سەندنەوەی متمانە لە عادل عەبدولمەهدی، شتێكی عەجیبە و مایەی تێڕامان و هەڵوێستە لەسەركردنە. ئاخر هەندێك لە كوتلە سیاسییەكان وەك ئەوەی لەبیریان كردبێت كە ساڵێك بەر لەئەمڕۆ خۆیان رێكنەدەكەوتن و بەناچاری عادل-یان تەكلیفكرد و بەبێ بوونی پشت و پەنا و بەبێ بوونی تاقە كورسییەك لە پەرلەمان، كورسییەكەی سەرۆك وەزیرانیان كرد بەدیاری بۆی، ئەگەر نا لەبەرچاوی كاڵی عەبدولمەهدی نەبوو، بەڵكو لەبەر بەرژەوەندی خۆیان و لەبەرئەوەی وڵات نەكەوێتە بۆشایی دەستووری و هەڵبژاردنی پێشوەختە نەكرێت ئەمیان هەڵبژارد و ئێستاش بەبێ هەبوونی بەدیلی باشتر كەوتوونەتە بەخشینەوەی تۆمەت و پەلاماردان، گوایە لەماوەی ساڵێكدا هیچی نەكردووە، وەك ئەوەی كە ئەم پیاوە عەسای سیحری پێبێت و لەماوەی ساڵێكدا هەموو خەوشییەكانی پانزە ساڵی رابردوو ڕێكبخاتەوە.
ئەوانەی كە داوای ئەوە دەكەن لەماوەی ساڵێكدا سەرۆك وەزیران ببێتە فریادڕەس، سێ توخمن و ئامانجی تایبەتی و جیاوازیان هەیە:
-1بەشێكیان چاویان بڕیوەتە كورسییەكەی عادل و دەیانەوێت سێ ساڵی داهاتوو كێكەكە لەنێوان خۆیان و دەست و پێوەندەكانیان هەر لەناوخۆی وڵات تا دەرەوە لەت بكەن و زیاتر قەڵەو بن.
-2بەشێكی تریان ئەوانەن كە دەیانەوێت لەڕێگەی ئەم لێدوان و داواكارییانە بۆ سەندنەوەی متمانە لە عادل عەبدولمەهدی خۆیان لەگەندەڵی و كەموكورتی و ئەو بەرپرسیارێتییانە پاك بكەنەوە، كە لەساڵانی رابردوودا لەسەر شانیان بووە.
-3بەشی سێیەم ئەوانەن كە خۆشیان نازانن بۆ ئەم داوایە دەكەن و دوای خەڵكەكە كەوتوون و لەگەڵ شەپۆلەكە مەلە دەكەن و هیچ خوێندنەوەیەكیان بۆ دەرەنجامەكانی ئەم پڕۆسەیە نییە و نازانن چۆن تەنگژەیەكی سیاسی و بۆشاییەكی دەستووری و پشێوی ئەمنی دروست دەبێت.
لە پانزە ساڵی رابردوودا زۆرینەی دەسەڵاتدارانی عیراق لەخزمەت نەكردنی هاووڵاتیان درێغییان نەكردووە، لە بەتاڵانبردنی سەدان ملیار دۆلاری نەوت درێغییان نەكردووە، لەدابەشكاریی پۆستەكان و وەلائی سیاسی بۆ ئەم دەوڵەت و ئەو دەوڵەت و بەحزبی كردنی حكومەت و بەشەخسەنە كردنی دامەزراوەكانی دەوڵەت و بڵاوكردنەوەی مەحسوبییەت و خزم خزمێنە درێغییان نەكردووە. لەدروستكردنی پڕۆژەی وەهمی درێغییان نەكردووە، لەدروستكردنی نەخۆشخانە و خوێندنگە و باخچەی ساوایان و پارك و شەقامی نوێی وەهمی یان پڕ لەگەندەڵی هەر درێغییان نەكردووە. بەڵام ئەوەی درێغییان تیاكردووە، پێكهێنانی دەوڵەتێكە لەسەر بنەمای هاووڵاتیبوون و عەدالەت و چاكسازی. ئەوەی كە درێغییان كردووە، پێكهێنانی دەوڵەتێكە كە تیایدا هاووڵاتی هەست بەسەروەریی یاسا بكات و دەستوور پێشێل نەكرێ.
گەر دەتانەوێ عادل سەركەوێ و لەسەر ئەرزی واقع گەندەڵی كەمبێتەوە، دەبێت دەستتان دەربێنن لە ناو بینەقاقای سێكتەری نەوت و تەندروستی و گواستنەوە و ئاوەدانی و ئابووری و پەروەردە … هتد و پیاوەكانتان بنێرنە ماڵەوە. گەر دەتانەوێ كەسێك بتوانێت لەساڵێكدا عیراق چاك بكات، لێگەڕێن با یاسا سەروەر بێت و نەزاهە نەزی بێت و دادگا دادگەرانە ئەركەكانی جێبەجێ بكات.
هەر لەم روانگەیەوە، مەسەلەی سەندنەوەی متمانە لە عادل عەبدولمەهدی پێویستە زیاتر لێكدانەوەی بۆ بكرێت و هەموو لێكەوتەكانی بخوێنرێتەوە، پێویستە هەمووان لەوە تێبگەن كە ئەو داواكارییە زۆر و زەوەندانەی كە هەیە، بەتەنها كەسایەتییەك و لەو ماوەیەدا جێبەجێ ناكرێ، بەڵكو ئیرادەی هەموولایەك و ئیدارەیەكی تۆكمە و بەهێزی دەوێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*