سەرەکی » راپۆرت » راپۆرتێك: لە عیراق سیغە لەگەڵ كچانی منداڵدا دەكرێت

سیستانی وەڵام دەداتەوە

راپۆرتێك: لە عیراق سیغە لەگەڵ كچانی منداڵدا دەكرێت

تۆڕی (BBC)ی بەریتانی لە راپۆرتێكیدا، ئاماژەی بە بڵابوونەوەی دیاردەی هاوسەرگیریی «سیغە» دەكات لە عیراق لەگەڵ كچانی منداڵ و مێردمنداڵ و پێیوایە دیاردەكە روو لە زیادبوونەوە و پیاوانی ئاینییش كارئاسانی بۆ دەكەن، لەبەرانبەردا ئایەتوڵڵا عەلی سیستانی مەرجەعی باڵای ئاینی شیعەكان لە عیراق وەڵام دەداتەوە و دەڵێت، كچان تا لەڕووی جەستەییەوە پێنەگەن و كامڵ نەبن كەس بۆی نییە ناچارییان بكات بۆ هاوسەرگیری و ئەو دیارەدە دزێوانەی ڕوودەدەن، پەیوەندییان بە هەڵسوكەوتی نەشیاوی تاكەكانەوە هەیە.
لە عیراقدا، هاوسەرگیری “سیغە” لە نێو شوێنكەوتوانی مەزهەبی شیعەدا لەگەڵ كچانی منداڵ و مێرد منداڵ ڕووی لە زیاد بوونە، بە پێی راپۆرتێكی تۆڕی (BBC)ی بەریتانی، هاوسەرگیریی “موتعە”‌و “سیغە” لەگەڵ كچانی منداڵ‌ و نەوجەوان بەشێوەیەكی بەربڵاو لەناو شیعەكاندا تەشەنەی كردووە، بەجۆرێك كچانی تەمەن 9 ساڵ بۆ پیاوان سیغە كراون‌.
بە پێی ڕاپۆرتەكەی (BBC)، هەندێك لە پیاوانی ئاینی شیعەی عیراق لەبەرامبەر وەرگرتنی بڕێك پارەدا رێورەسمی هاوسەرگیریی كاتی (موتعە و سیغە) بەڕێوەدەبەن، كە بەشێكیان كچانی مێردمنداڵ ‌و منداڵن.
بە پێی بەدواداچوونەكانیش، ئەم كارە پێچەوانەی بەڵێنەكانی حكومەتی عیراقە بۆ ڕێزگرتن لەمافەكانی منداڵان، بەپێی یاساش بەتاوان دادەنرێت.
ئەوانەی لەو راپۆرتەی (BBC)دا بەشدارییان كردووە، هەندێكیان باس لەوە دەكەن، لە سەردانەكانیان بۆ لای پیاوانی ئاینی شیعە، ئامۆژگاری ئەو دەكرێن كە “سیغە” بكەن
لەبەرانبەردا ماڵپەڕی رەسمی نوسینگەی ئایەتوڵڵا عەلی سیستانی، مەرجەعی باڵای ئاینی لە نەجەف، وەڵامی ڕاپۆرتەكەی (BBC) دەداتەوە لەبارەی هاوسەرگیری سیغەوە.
(BBC) لە سەرەتای مانگی تشرینی یەكەمی 2019 راپۆرتێكی بنكۆڵكاری لەژێر ناونیشانی “بازرگانی نهێنی سێكس لە عیراق” بڵاوكردبووەوە و ئاماژەی بە بوونی نوسینگەی ئاشكرا بۆ هاوسەرگیری سیغە كردبوو لە عیراق.
لە وەڵامی ڕاپۆرتە بنكۆڵكارییەكەی (BBC)، نوسینگەی سیستانی رایگەیاندووە، هاوسەرگیری كاتی لە مەزهەبی ئیمامیدا ڕێگەپێدراوە و هاوشێوەی هاوسەرگیری هەمیشەییە و جگە لە كاری سێكسی كۆمەڵێك ماف لەسەر هەردوو لایەن دیاری دەكات و بە هیچ شێوەیەك ناچێتە قاڵبی بازرگانی سێكییەوە وەك ئێوە باسی دەكەن و بە هیچ شێوەیەكیش سوكایەتی نییە بە شكۆی ژن و لایەنی مرۆیی ژن، ئەوانەی بەو شێوەیەش كاری پێدەكەن، ئایین بەكاردەهێنن بۆ گەیشتنە بە ئامانجە نەشیاوەكانیان.
هەر لە وەڵامەكەی سیستانیدا هاتووە، “بەپێویستی دەزانن دەسەڵاتە پەیوەندیدارەكان بەشوێن ئەو كەسانەدا بگەڕێن خۆیان لە بەرگی پیاوانی ئایینیدا شاردۆتەوە و بە هەڵسوكەوتە قێزەونەكانیان زیان بە كۆمەڵگە و پێگەی ئایین لە دەرونی خەڵكدا دەگەیەنن”.
لە كۆتایی پەیامەكەیدا، نووسینگەی ئایەتوڵڵا سیستانی، ئاماژەی بە هاوسەرگیری كردووە لەگەڵ كچانی منداڵ و دەڵێت: “ئەو دیاردەیە لە كۆمەڵگە خۆرهەڵاتییەكاندا هەبوو، بۆیە لە پەیامی چاپكراوی پێشووماندا هەندێك ئەحكاممان دیاری كردووە، بەڵام لەئێستادا ئەو دیارەیە كەمبۆتەوە و هەر لەبەر ئەوەشە بەشێكی لابراوە لە چاپە نوێیەكاندا، ئەوەی دەمانەوێت جەختی لەسەر بكەینەوە ئەوەیە: بەخێوكەر بۆی نییە لەبەر بەرژەوەندی خۆی، یان بەرژەوەندی كچ، ناچاری بكات هاوسەرگیری بكات، تا ئەو كاتەی لەڕووی جەستەییەوە پێدەگات و ئامادەیی دەرونی تەواوی دەبێت بۆ كاری سێكسی، بەپێچەوانەشەوە نابێت هاوسەرگیری بكات گەر هاوسەرگیرییەكە لە بەرژەوەندی كچدا نەبێت”.
بەپێی ڕاپۆرتێكی ئاژانسی (BBC) هاوسەرگیری “سیغە” لەگەڵ كچانی منداڵ‌ و نەوجەوان بەشێوەیەكی بەربڵاو لەناو شیعەكانی عیراق تەشەنەی كردووە، بەجۆرێك كچانی تەمەن 9 ساڵ بۆ پیاوان سیغە كراون، هەندێك لە پیاوانی ئایینی شیعەش لەبەرامبەر وەرگرتنی بڕێك پارەدا ڕێوڕەسمی هاوسەرگیری كاتیی (موتعە و سیغە) بەڕێوەدەبەن، كە بەشێكیان كچانی مێردمنداڵ ‌و منداڵن.
هەر لە ڕاپۆرتەكەی (BBC)دا هاتووە،كارەكە پێچەوانەی بەڵێنەكانی حكومەتی عیراقە بۆ ڕێزگرتن لەمافەكانی منداڵان، بەپێی یاساش بەتاوان دادەنرێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*