سەرەکی » وتار » لەتیف فاتیح فەرەج‌ » ئەمنە سوورەكە

ئەمنە سوورەكە

1
لە ساڵی 1991ەوە تا ئێستا سەدان جار بە نێو كونج و كەلەبەری ئەو ئەمنە سورەدا سوڕاومەتەوە، لە زۆر شوێن هەڵوەستەم كردووە، جاری وا هەبووە لە ناخەوە هەستم بە زیڕەو هاواری ژنێك، مناڵێك كردووە، راستی نووسین لە سەر ئەمنە سورەكە پێویستی بە كتێبە، پێویستە ئەوانەی لەوێ‌ شەهید كراون لە ژێر دارو ستەما، ئەوانەی ئازار دراون، هەمووی دەكۆمێنت بكرێت و شوێنی تایبەت هەبێت كە بەردەوام بیگێڕنەوەو نیشان بدرێت و خەڵك و میوان بیبینن، من چەندین جار ئەو دۆست و رۆژنامەنووس و میدیاكارە ئەوروپیانەی هاتوون بردوومن بۆ ئەوێ‌، بەڵام كەم و كوڕی زۆری هەیە، ئەركی رۆشنبیری سلێمانی و پارێزگاو دەسەڵاتە بایەخی زیاتر بەم شوێنە بدات و وەك ناوەندێكی ستەمگەری بەعس بیهێڵێتەوە، دەكرێت لەو بارەیەوە زۆر شت بكەین، خەڵك چی لە ژورە بێگیانەكانی سزاو ئازار دان بكات ئەگەر وێنەو گێڕانەوەی تیا نەبێت.
2
ساڵی 1992و یان 93 هونەرمەند كامەران رەوف لەو شوێنە فیلمێكی دەرئەكرد، شانسی ئەوەم درابوویە رۆڵێكی كەمی وەك زیندانی تیا ببینم ئەوەندە لاساربووم كاك كامەران وتی بەكەڵك نایەییت، دەی ئیتر ئەو رۆژگارە گەنج و زیت بووین، تازەكیش گەیشتبووینە ئەو باوەڕەی خەونەكەمان لە بارچووە، بەڵام ئەمنە سورەكە هەر ئەمنەسورەكەیە، ئەو شوێنەی قانع وتەنی بۆ كورد قوتابیخانەبوو:
مامۆستا قانع دەفەرموێ‌ :
گەرچی دووژمن وا ئەزانێ‌ من بە دیلی لاڵ ئەبم
باش بزانێ‌ كونجی زیندانم قوتابیخانەیە
ئەو تەنانەت دەڵێت « گرتن و لێدان و كوشتن عامیلی ئازادیە «
كوردی بەرێ‌ بەو جۆرە بە گژ ستەمدا چوونەوەو گوێیان لە زڕەی زێڕو خشەی دۆلار نەبوو .
3
دەبوو دیوار بەندی هەموو ئەو شیری بەرگری و نامەی شەهیدان و نامەكانی زیندان و هتد لە ئەمنە سورەكە هەبان، ئاخر نامەكانی شێخ مارف و هاوڕێكانی و نامەكانی مەلا عەلی لەوێ‌ نەبن ئەی لە كوێ‌ بن، دەبوو ئەو شیعرە بەرزەی هێمن بە زمانەكانی كوردی و عەرەبی و ئینگلیزی لە ئەمنە سورەكە هەڵبواسرایە :
دەگرێ‌، ئەمما لە گرتوخانە رق ئەستور ترم
لێم دەدا، ئەمما لە سەر داوا رەواكەم سور ترم
دەمكوژێ‌، ئەمما بە گژ جەلادەكەمدا دێمەوە
كوردم و ناتوێمەوە، ناتوێمەوە، ناتوێمەوە
هەقە رۆژانە قوتابخانەكان و باخچەی ساوایان و فەرمانگەو خەڵكی تر نەك لە سلێمانی لە شوێنەكانی دیكەشەوە سەردانی ئەمنە سورەكە بكەن، هەقە هەر بیانیەك سەردانی ئەمنە سورەكە بكات لانی كەم 10 دۆلاری لێوەربگیرێت، بۆ ئەوەی بزانێ‌ كوردلەوێوە هاتن .

 380 جار بینراوە