سەرەکی » وتار » په‌ره‌سه‌ندنی‌ ناڕه‌زاییه‌كان له‌ عیراق

په‌ره‌سه‌ندنی‌ ناڕه‌زاییه‌كان له‌ عیراق

مریه‌م ئه‌لحه‌سه‌نی‌

بێكاری‌‌و گه‌نده‌ڵی‌‌و نه‌بوونی‌ خزمه‌تگوزارییه‌ بنه‌ڕه‌تییه‌كان بزوێنه‌ری‌ سه‌ره‌كی‌ خۆپیشاندان‌و ناڕه‌زاییه‌كانی‌ عیراقن كه‌ چه‌ند مانگێكه‌ به‌رده‌وامه‌، به‌ڵام به‌م دواییانه‌ هۆكارێكی‌ دیكه‌ش زیادی‌ كردووه‌ بۆ ناڕه‌زایی گه‌نجانی‌ به‌غدا، ئه‌ویش كه‌مته‌رخه‌می‌ له‌ لێپێچینه‌وه‌ له‌ ده‌سته‌بژێری‌ ده‌سه‌ڵاتی‌ ئێستا‌و ئاماده‌یی حكومه‌ت بۆ سه‌ركوت كردنی‌ خۆپیشاندانه‌كان له‌ بری‌ ئه‌نجامدانی‌ گۆڕانكاریی.
خۆپیشانده‌ران تا ئێستا له‌وه‌دا سه‌ركه‌وتوو بوو كه‌ حكومه‌ته‌كه‌ی‌ عادل عه‌بدولمه‌هدییان رووخاند، به‌ڵام حكومه‌ت تا ئێستاش به‌رده‌وامه‌ له‌ به‌كارهێنانی‌ توندوتیژی‌ به‌رامبه‌ر به‌ خه‌ڵكی‌ ناڕازی‌‌و به‌ زه‌برو زه‌نگ به‌رپه‌رچیان ده‌داته‌وه‌، هه‌فته‌ی‌ رابردوو موقته‌دا سه‌در هێزه‌كانی‌ خۆی‌ كه‌ بۆ پاراستنی‌ خۆپیشانده‌ران ته‌رخانی‌ كردبوو كشانده‌وه‌، به‌وه‌ش مه‌ترسی‌ له‌سه‌ر ژیانی‌ خۆپیشانده‌ران زیادی‌ كرد، ئه‌وه‌بوو هێزه‌كانی‌ ئاسایش په‌لاماریان دان‌و ویستیان خێمه‌كانیان هه‌ڵكه‌نن، له‌و نێوانه‌شدا چه‌ند خۆپیشانده‌رێك كوژرا.
له‌ سه‌ره‌تای‌ سه‌رهه‌ڵدانی‌ خۆپیشاندانه‌كانه‌وه‌ هێزه‌كانی‌ ئاسایش هه‌وڵیان داوه‌ به‌ زه‌بر‌و زه‌نگ بڵاوه‌ به‌ خۆپیشانده‌ران بكه‌ن، سه‌ره‌نجام زیاتر له‌ 600 هاووڵاتی‌ كوژراوه‌‌و 12 هه‌زار كه‌سیش بریندار بووه‌، ئه‌م شێوازی‌ توندوتیژییه‌ وای‌ له‌ خۆپیشانده‌ران كردووه‌ خۆیان له‌گه‌ڵ دۆخه‌كه‌دا بگونجێنن‌و داواكارییه‌كانیشیان زیاد بكات، له‌به‌ر ئه‌وه‌ یه‌كێك له‌ دیارده‌ به‌رچاوه‌كانی‌ خۆپیشاندان‌و ناڕه‌زایی له‌ عیراق توانای‌ خۆگونجاندنه‌ له‌گه‌ڵ دۆخه‌كه‌‌و چۆنێتی‌ به‌رگه‌گرتن له‌به‌رده‌م فشاره‌كانی‌ حكومه‌تدا، هه‌ر ئه‌وه‌ش وای‌ كردوو له‌گه‌ڵ ئه‌و هه‌موو هه‌وڵانه‌ی‌ حكومه‌تدا بۆ سه‌ركوت كردنی‌، به‌ڵام هێشتا خۆپیشاندان به‌رده‌وامه‌‌و رۆژ به‌ رۆژ ته‌وژمی‌ زیاد ده‌كات.
له‌سه‌ر ئاستی‌ ئایدیۆلۆژیا ئه‌و توندوتیژییه‌ی‌ هێزه‌كانی‌ ئاسایش به‌كاری‌ ده‌هێنن به‌رامبه‌ر به‌ خۆپیشانده‌ران‌و حكومه‌تیش گوێی‌ خۆی‌ لێ خه‌واندووه‌‌و هیچ لێپرسینه‌وه‌یه‌ك ناكات، وای‌ كردووه‌ هاووڵاتیانی‌ ناڕازی‌ هێ متمانه‌یه‌كیان به‌ كۆی‌ گشتی‌ سیستمی‌ حوكمڕانی‌‌و ده‌ستووریش نه‌مێنێت، به‌هۆی‌ ئه‌وه‌شه‌وه‌ ده‌بینین دوای‌ كوشتنی‌ هه‌ر خۆپیشانده‌رێك درزێك ده‌كه‌وێته‌ عیراقه‌وه‌‌و درزه‌كه‌ش گه‌وره‌ ده‌بێت‌و ده‌گاته‌ راده‌ی‌ شكان، كه‌ شكاش تازه‌ به‌ حكومه‌ت چاك نابێته‌وه‌‌و چاكسازی ته‌نیا به‌ گه‌ڵ ده‌كرێت.
خۆپیشانده‌ران جه‌ختیان له‌سه‌ر ئه‌وه‌ كرده‌وه‌ كه‌ شه‌قام چۆڵ ناكه‌ن‌و ده‌ستبه‌رداری‌ داواكارییه‌كانیشیان نابن، داواكارییه‌كانیش بریتین له‌ دامه‌زراندنی‌ حكومه‌تێكی‌ نوێی‌ بێلایه‌ن كه‌ له‌ ژێر كاریگه‌ریی هیچ لایه‌نێكی‌ ده‌ره‌كیدا نه‌بێت، دامه‌زراوه‌كانی‌ حكومه‌ت له‌ ناوخۆوه‌ به‌ڕێوه‌ ببرێن‌و پابه‌ند بن به‌ یاساكانه‌وه‌، لێپێچینه‌وه‌ له‌و تاوانانه‌ بكرێت كه‌ ناو حكومه‌تدا ئه‌نجام دراوه‌، میلیشیای‌ سه‌ر به‌ ده‌ره‌وه‌ له‌ عیراقدا نه‌مێنێ. به‌ كورتییه‌كه‌ی‌ ئه‌م جاره‌یان خۆپیشانده‌رانی‌ عیراق نیشتمانێكیان ده‌وێ.
تووڕه‌یی خه‌ڵك له‌ حكومه‌ت بابه‌تێكی‌ تازه‌ نییه‌، به‌ تایبه‌تیش له‌لایه‌ن گه‌نجان‌و لاوانی‌ عیراقه‌وه‌، ئه‌وانه‌ی‌ ژماره‌یان زۆر به‌ خێرایی زیاد ده‌كات، له‌ ساڵی‌ 2018دا‌و دوای‌ ئه‌وه‌ی‌ حكومه‌ت تۆمه‌تبار كرا به‌وه‌ی‌ له‌ هه‌ڵبژاردنه‌كاندا گه‌نده‌ڵی‌ كراوه‌، خۆپیشاندان له‌ شاری‌ به‌سره‌وه‌ سه‌ری‌ هه‌ڵدا، ئه‌وه‌ یه‌كه‌م نیشانه‌ بوو بۆ ئه‌وه‌ی‌ كه‌ خه‌ڵكی‌ عیراق له‌و بارودۆخه‌ رازی‌ نین. حكومه‌ت ئه‌و خۆپیشاندانه‌ی‌ سه‌ركوت كرد‌و پێی‌ وابوو ئیدی‌ بابه‌ته‌كه‌ كۆتایی هاتووه‌، به‌ڵام ئه‌وه‌ بوو له‌ مانگی‌ تشرینی‌ یه‌كه‌می‌ 2019دا خۆپیشاندان سه‌رله‌نوێ‌و ئه‌م جاره‌یان له‌ به‌غدا سه‌ری‌ هه‌ڵدا‌و تا ئێستاش به‌رده‌وامه‌، له‌و كاته‌وه‌ تا ئێستا ته‌نیا له‌ ساڵیادی‌ چله‌دا خۆپیشاندان راگیرا كه‌ لای‌ شیعه‌ یادێكی‌ گرنگه‌.
حكومه‌تی‌ عیراق سه‌ره‌تا گازی‌ فرمێسكڕێژ‌و ئاو‌و فیشه‌كی‌ پلاستیكی‌ به‌كار هێنا دژی‌ خۆپیشانده‌ران، به‌ڵام دواتر فیشه‌كی‌ راسته‌قینه‌شی‌ تێكه‌وت‌و سه‌ره‌نجام سه‌دان كه‌س له‌ خۆپیشانده‌ران كوژران‌و هه‌زارانیش بریندار بوون، جگه‌ له‌ به‌كارهێنانی‌ توندوتیژی‌ حكومه‌ت هه‌وڵی‌ دا رێگایه‌كی‌ دیكه‌ش بگرێته‌به‌ر بۆ كۆنترۆڵ كردنی‌ خۆپیشاندانه‌كان، ئه‌ویش بڕینی‌ هێڵی‌ ئینته‌رنێت بوو تا خۆپیشانده‌ران نه‌توانن په‌یوه‌ندی‌ بكه‌ن به‌ یه‌كه‌وه‌ بۆ رێكخستنی‌ خۆپیشاندان‌و ده‌نگیشیان نه‌گات به‌ ده‌ره‌وه‌، بڕینی‌ هێڵی‌ ئینته‌رنێت رێگه‌ی‌ خۆش كرد بۆ ئه‌وه‌ی‌ هه‌ندێك له‌ میلیشیاكان به‌ جلوبه‌رگی‌ ره‌شه‌وه‌ هێرش بكه‌نه‌ سه‌ر هاووڵاتیانی‌ ناڕازی‌‌و له‌ سه‌ربانه‌كانه‌وه‌ به‌ تفه‌نگی‌ نیشانشكێن ته‌قه‌یان لێ بكه‌ن.
به‌ڵام ئه‌و شه‌پۆله‌ توندوتیژییه‌ نه‌یتوانی‌ خۆپیشانده‌ران بڵاوه‌ پێ بكات‌و له‌ شه‌قامه‌كان ده‌ریان بكه‌ن، به‌ پێچه‌وانه‌وه‌، شێلگیرانه‌تر درێژه‌یان به‌ خۆپیشان دا‌و ئه‌نجامه‌كه‌شی‌ ئه‌وه‌ بوو حكومه‌ت دانی‌ به‌وه‌دا نا كه‌ رۆڵی‌ هه‌بووه‌ له‌ كوشتنی‌ خۆپیشانده‌راندا، ئه‌وه‌ بوو سوپای‌ عیراق رایگه‌یاند، بۆ كۆنترۆڵ كردنی‌ خۆپیشانه‌كان هێزی‌ زیاد له‌ پێویستیان به‌كار هێناوه‌‌و بڕیاریشیان داوه‌ ئه‌و ئه‌فسه‌رانه‌ی‌ ئه‌و هه‌ڵه‌یه‌یان كردووه‌ لێپێچینه‌وه‌یان له‌گه‌ڵدا بكرێت.
له‌گه‌ڵ ئه‌م دانپێدانانه‌شدا كه‌ناڵی‌ ئه‌لعراقیه‌ كه‌ كه‌نالێكی‌ حكومییه‌ راپۆرتی‌ كۆتایی لیژنه‌ی‌ باڵای‌ وه‌زاری‌ سه‌باره‌ت به‌ هۆكاری‌ كوژرانی‌ ئه‌و هه‌موو خه‌ڵكه‌ له‌ ریزی‌ خۆپیشانده‌ران له‌ به‌غدا‌و پارێزگاكانی‌ دیكه‌ی‌ عیراق بڵاو كرایه‌وه‌، به‌ڵام راپۆرته‌كه‌ به‌ زمانێكی‌ نادیار‌و ته‌مومژاوی‌ داڕێژرابوو، هیچ چاره‌سه‌رێكی‌ تێدا نه‌بوو، ئاماژه‌یه‌كیشی‌ تێدا نه‌بوو بۆ سزادانی‌ تاوانباران، به‌رپرسیاریی كوشتنی‌ سه‌دان كه‌سی‌ نه‌خسته‌ ئه‌ستۆی‌ به‌رپرسانی‌ حكومه‌ت، هه‌روه‌ها به‌ روونیش ناسنامه‌ی‌ نیشانشكێنه‌كانی‌ باس نه‌كردووه‌، ئه‌م جۆره‌ راپۆرته‌ هێنده‌ی‌ دی‌ رق‌و تووڕه‌یی خپیشانده‌رانی‌ زیاد كرد‌و خۆپیشانده‌ران داواكاری‌ لێپێچینه‌وه‌ له‌ تاوانبارانیان زیاد كرد بۆ لیستی‌ داواكارییه‌كانیان. له‌ هه‌موویشی‌ گرنگتر داواكاری‌ خۆپیشانده‌ران ئێستا به‌ ته‌نیا له‌سه‌ر كار لابردنی‌ سه‌رۆك وه‌زیر نییه‌ به‌ڵكو داوا ده‌كه‌ن سه‌رله‌به‌ری‌ حكومه‌ت‌و چینی‌ ده‌سه‌ڵاتداران لاببرێن.
عادل عه‌بدولمه‌هدی‌ له‌ رۆژی‌ نۆیه‌می‌ تشرینی‌ یه‌كه‌می‌ رابردوودا وتارێكی‌ پێشكه‌ش كرد‌و به‌ڵێنی‌ به‌ خۆپیشانده‌ران دا كه‌ ئه‌وانه‌ی‌ ده‌ستیان له‌ كوشتنی‌ خۆپیشانده‌راندا هه‌بووه‌ سزا بدرێن‌و هه‌لی‌ كار بۆ بێكاران بڕه‌خسێنێ‌و موچه‌ش بۆ ئه‌وانه‌ ببڕێته‌وه‌ كه‌ له‌ ژێر هێڵی‌ هه‌ژارییه‌وه‌ن. به‌ڵام خۆپیشانده‌ران متمانه‌یان به‌و به‌ڵێنانه‌ نه‌بوو، له‌به‌ر ئه‌وه‌ به‌رده‌وام بوون له‌ دروست كردنی‌ فشار‌و سه‌ره‌نجام عادل عه‌بدولمه‌هدی‌ به‌ قسه‌ی‌ خۆپیشانده‌رانی‌ كرد‌و ده‌ستی‌ له‌ كار كێشایه‌وه‌‌و ده‌ستی‌ كرد به‌ ره‌خنه‌ گرتن له‌ به‌رپرسه‌كانی‌ دیكه‌‌و پێی‌ ده‌وتن بۆچی‌ ده‌ست له‌ كار ناكێشنه‌وه‌.
دوای‌ ده‌ست له‌ كاركێشانه‌وه‌ی‌ سه‌رۆك وه‌زیر حكومه‌ت له‌ هه‌وڵی‌ ئه‌وه‌دا بوو جه‌ماوه‌ر ناڕازی‌ رازی‌ بكات‌و داوای‌ ئاشتبوونه‌وه‌ی‌ كرد، هه‌ر له‌و سه‌روبه‌نده‌دا هێزه‌كانی‌ ئاسایش دووباره‌ ده‌ستیان كرده‌وه‌ به‌ كرده‌وه‌ی‌ توندوتیژی‌ به‌رامبه‌ر به‌ خۆپیشانده‌ران‌و به‌هۆی‌ بڕینی‌ هێڵی‌ ئینته‌رنێتیشه‌وه‌ ره‌فتاره‌كانی‌ هێزه‌كانی‌ ئاسایش په‌رده‌پۆش كرا، چیرۆكه‌كان به‌ شێوازی‌ جیاجیا ده‌گێڕدرانه‌وه‌. به‌ڵام ناوبه‌ناو ئینته‌رنێت ده‌كرایه‌وه‌‌و ئه‌وانه‌ی‌ ئاماده‌بوون له‌ خۆپیشاندانه‌كاندا باسیان له‌ توندوتیژی‌ كردووه‌، ئاماژه‌یان به‌وه‌ كردووه‌ كه‌ هێزه‌كانی‌ ئاسایش هه‌ر به‌ مه‌به‌ست له‌ نزیكه‌وه‌ گولله‌ی‌ گازی‌ فرمێسكڕێژیان ناوه‌ به‌سه‌ر سنگی‌ خۆپیشانده‌رانه‌وه‌‌و مه‌ترسی‌ له‌سه‌ر ژیانیان دروست كردووه‌، سایتی‌ شۆڕشی‌ عیراقی‌ ڤیدیۆیه‌كی‌ له‌و جۆره‌ی‌ بڵاو كرده‌وه‌ كه‌ تیایدا خۆپیشانده‌رێك گولله‌یه‌كی‌ فرمێسكڕێژی‌ به‌ر ده‌كه‌وێ‌و گیانی‌ له‌ده‌ست ده‌دات، له‌و كاته‌شدا ده‌نگی‌ خوێندكارێكی‌ كۆلێژی‌ پزیشكی‌ دێت كه‌ وه‌ك خۆبه‌ش له‌وێ بووه‌، هاوار ده‌كات‌و ده‌ڵێ: سه‌یر بكه‌ن گولله‌ی‌ فرمێسكڕێژه‌كه‌ی‌ نا به‌ كوێیه‌وه‌، ده‌ڵێن توندوتیژی‌ به‌كار ناهێنن، به‌ڵام سه‌یر بكه‌ن‌و به‌ چاوی‌ خۆتان بیبینن.
له‌گه‌ڵ به‌رده‌وام بوونی‌ خۆپیشاندانه‌كاندا حكومه‌تیش شێوازی‌ به‌رپه‌رچدانه‌كه‌ی‌ گۆڕی‌، دووباره‌ هێڵی‌ ئینته‌رنێتی‌ بڕی‌‌و له‌و چه‌ند سه‌عاته‌شدا كه‌ خۆپیشانده‌ران په‌یوه‌ندییان به‌ جیهانه‌وه‌ پچڕا‌و ئینته‌رنێت نه‌ما، هێزه‌كانی‌ به‌ره‌نگاربوونه‌وه‌ی‌ ئاژاوه‌ ده‌ستیان كرد به‌ به‌كارهێنانی‌ گولله‌‌و فیشه‌كی‌ راسته‌قینه‌ به‌رامبه‌ر به‌ خۆپیشانده‌ران‌و ئه‌و كه‌سانه‌ش كه‌ بۆ یارمه‌تی‌ خۆپیشانده‌ران له‌وێ بوون وه‌ك تیمه‌ پزیشكییه‌كان‌و ده‌ستیان كرد به‌ سوتاندنی‌ خێمه‌ی‌ تیمه‌ پزیشكییه‌كان. جگه‌ له‌ به‌غدا قسه‌‌و باس له‌ باره‌ی‌ كوژرانی‌ خۆپیشانده‌ران له‌ پارێزگاكانی‌ دیكه‌ی‌ عیراقیش ده‌كرێ، گرته‌ی‌ ڤیدیۆییش له‌و باره‌یه‌وه‌ بڵاو كرایه‌وه‌، وه‌ك به‌سره‌، كه‌ربه‌لا، زیقار‌و ناسریه‌.
خۆپیشانده‌ران جارێكی‌ دیكه‌ش له‌گه‌ڵ دۆخه‌كه‌دا‌و له‌گه‌ڵ ئه‌و هێرش‌و په‌لامارانه‌دا خۆیان گونجاند، هه‌ر له‌ نزیك مه‌یدانی‌ ته‌حریر خۆپیشانده‌ران هێرشه‌كانی‌ حكومه‌تیان كرده‌ یارییه‌كی‌ بێ ئه‌نجام‌و بێ ئاكام، هه‌ركاتێك پۆلیسێك یان ئاسایشێك بۆمبێكی‌ فرمێسكڕێژیان تێ ده‌گرێ، یه‌كێك له‌ خۆپیشانده‌ران بۆمبه‌كه‌ هه‌ڵده‌گرێته‌وه‌‌و له‌ خۆپیشانده‌رانی‌ دوور ده‌خاته‌وه‌، یان فڕێی‌ ده‌داته‌وه‌ بۆ پۆلیسه‌كان، ته‌نانه‌ت هه‌ندێك له‌ خۆپیشانده‌ران له‌ بری‌ تۆپ شه‌قشه‌قێنی‌ پێ ده‌كه‌ن.
خۆپیشانده‌ران به‌رده‌وام جه‌خت له‌سه‌ر ئه‌وه‌ ده‌كه‌نه‌وه‌ كه‌ بزوێنه‌ری‌ ئه‌م خۆپیشاندانه‌یان داواكارییه‌كانی‌ خه‌ڵكه‌. مه‌یدانی‌ ته‌حریر‌و شه‌قامه‌كانی‌ ده‌وروبه‌ری‌ رۆژانه‌ پڕ ده‌بێت له‌ خوێندكار‌و خاوه‌ن پیشه‌كان‌و ده‌موچاویان هه‌ڵده‌به‌ستن‌و ده‌ستكێش له‌ ده‌ست ده‌كه‌ن، له‌گه‌ڵ ده‌ربڕینی‌ ناڕه‌زاییدا خۆیان ئاماده‌ ده‌كه‌ن بۆ هه‌ر ئه‌گه‌رێك‌و هه‌ر مه‌ترسییه‌ك، پزیشكه‌ لاوه‌كانیش هه‌ر له‌وێ ده‌واریان هه‌ڵداوه‌‌و خزمه‌تگوزاری‌ پزیشكی‌ پێشكه‌شی‌ ئه‌و كه‌سانه‌ ده‌كه‌ن كه‌ بریندار ده‌بن، جگه‌ له‌وه‌ش كۆمه‌ڵێك له‌ خۆپیشانده‌ران ده‌چنه‌ سه‌ربانی‌ چێشتخانه‌ی‌ توركی‌ كه‌ بینایه‌كی‌ به‌رزه‌‌و چۆڵ كراوه‌، ئه‌م خۆپیشانده‌رانه‌ له‌و به‌رزاییه‌وه‌ كه‌ زۆربه‌ی‌ ناوچه‌كه‌ی‌ لێوه‌ دیاره‌ چاودێری‌ ده‌كه‌ن، بۆ ئه‌وه‌ی‌ هه‌ر نیشانشكێنێك ویستی‌ نیشانه‌ له‌ خۆپیشانده‌ران بگرێته‌وه‌‌و ته‌قه‌یان لێ بكات ئاشكرای‌ بكه‌ن‌و خۆپیشانده‌رانی‌ خواره‌وه‌ی‌ لێ ئاگادار بكه‌نه‌وه‌.
هه‌ر له‌ چوارچێوه‌ی‌ خۆگونجاندن‌و گرتنه‌به‌ری‌ شێوازی‌ نوێدا هه‌ندێك له‌ خۆپیشانده‌ران تیشكی‌ له‌یزه‌ر‌و فیشه‌كه‌شێته‌ به‌كار ده‌هێنن بۆ سه‌رلێشێواندنی‌ هێزه‌كانی‌ ئاسایش، هه‌ندێكی‌ دیكه‌یان میزڵدان پڕ له‌ فوو ده‌كه‌ن‌و ره‌وانه‌ی‌ ئاسمانی‌ ده‌كه‌ن، ئه‌وه‌ش په‌یامێكه‌ بۆ جه‌خت كردنه‌وه‌ له‌سه‌ر ئه‌وه‌ی‌ كه‌ خۆپیشاندانه‌كه‌یان ئاشتیانه‌یه‌، له‌سه‌ر پردی‌ جمهوری‌‌و لای‌ چێشتخانه‌ی‌ توركیش خۆپیشانده‌ران خاڵی‌ پشكنینیان داناوه‌ بۆ پاراستنی‌ سه‌لامه‌تی‌ خۆپیشانده‌ران، له‌ هه‌مووی‌ گرنگتر خۆپیشانده‌ران رۆژنامه‌یه‌ك ده‌رده‌كه‌ن به‌ ناوی‌ توك توك، ناوه‌كش له‌ ناوی‌ ئه‌و ماتۆڕه‌ سێتاییانه‌وه‌ هاتووه‌ كه‌ پێی‌ ده‌وترێ توك توك، له‌به‌ر ئه‌وه‌ی‌ یارمه‌تیده‌رێكی‌ زۆر باشن بۆ خۆپیشانده‌ران‌و گواستنه‌وه‌ی‌ برینداره‌كانیان، ته‌نانه‌ت خۆپیشانده‌ران هه‌ر له‌ نزیك مه‌یدانی‌ ته‌حریر شوێنێكیان ته‌رخان كردووه‌ بۆ پاراستنی‌ كه‌لوپه‌ل‌و شتومه‌كی‌ ونبوو، هه‌ر كه‌سێك له‌وێ شتێكی‌ ون كردبێ‌و لێی‌ كه‌وتبێت ده‌چێته‌ ئه‌و شوێنه‌و وه‌ری‌ ده‌گرێته‌وه‌.
خۆپیشانده‌ران بڕیاریان داوه‌ شه‌قام چۆڵ نه‌كه‌ن تا گۆڕانكاری‌ دروست نه‌كه‌ن‌و داواكارییه‌كانیان جێبه‌جێ نه‌كرێت، ئه‌وان سوورن له‌سه‌ر ئه‌وه‌ی‌ چاكسازی‌‌و گۆڕانكاریی بنه‌ڕه‌تی‌ دروست بكه‌ن‌و ته‌نانه‌ت چاكسازی‌ له‌ ده‌ستووریشدا بكرێت‌و به‌ چاكسازی‌ ساده‌‌و كه‌م‌و بچووك رازی‌ نابن.

معهد واشنطن لسیاسات الشرق الادنی‌

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*